2024 2023 2022 Flere år...
09-03-2023
KNR nukittorsartariaqarpoq
KNR kulturikkut suliffeqarfiuvoq pingaarutilik nunatta kujataanit avannaanut aammalu kitaanit kangianut ataqatigiissitsisoq. KNR tamat oqartussaaqataanerannik ingerlatsinitsinni pingaaruteqarpoq nunatsinnillu angeqisumik ataqatigiissitsisuulluni. Taamaattumillu innuttaasunik sullissivittut aallakaatitsivipput pillugu ajornartorsiutit sapaatip akunnerani kingullermi tusagassiorfitsigoortut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliamit qisuariarfigineqartariaqarput.
Tusagassiortunik kalaallinik sulisorinniinnarniarnermik sulisussarsiortarnermillu unammilligassat KNR-imit misigineqartut tigussaasumik aaqqiivigineqartariaqartut ataatsimiititaliaq isumaqatigiittoq isumaqarpoq takkulu Naalakkersuisut, Inatsisartut, KNR-ip aammalu tassani sulisut kattuffii siammasissumik suleqatigiinnerisigut aaqqiivigineqassapput.
- Ajornartorsiutit imaannaanngitsut KNR-ip pisortaata tunualersup kiisalu Tusagassiuinermi Sulisut Peqatigiiffiata oqaatigaat. KNR nunatsinni kulturikkut ingerlatsinermi suliffeqarfittut nukittorsarneqartariaqarpoq. Unammilligassat KNR-imit nalaanneqartut iliuuseqarfigineqartariaqarput ataatsimiititaliallu isumaqatigiittup oqaatigaa aaqqiissutissanik nassaarniarnermi Inatsisartunut ilaasortatut peqataarusuttoqartoq.
Tusagassiorfiit kiffaanngissuseqartut nunatsinni tamat oqartussaaqataanerannik ingerlatsinermi pingaaruteqarmata KNR aammalu nunatsinni tusagassiorfinni pissutsit Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliamit ingerlaavartumik eqqumaffigineqartarput. Tassunga atatillugu ataatsimiititaliamit ilaatigut oqaatigineqarsinnaavoq tusagassiorneq pillugu nassuiaammik, 2023-mi ukiakut ataatsimiinnermi naammassineqareersimasussamik, suliaqaqqullugit Naalakkersuisut ataatsimiititaliamit 2022-mi ukiakkut ataatsimiinnermi kaammattorneqarmata[1]. Nassuiaatikkut tassuunakkut unammilligassat aaqqiissutissallu tusagassiorfiit nukittuut kiffaanngissuseqartut siunissaat qulakkeerunneqassaaq.
Taamatuttaaq Ilinniartitaanermut, Kultureqarnermut, Timersornermut Ilageeqarnermullu Naalakkersuisumit Journalistenimi ulloq 23. juni 2022-mi oqaatigineqartutut suleqatigiissitassap pilersinneqarnissaanik Naalakkersuisut ataatsimiititaliamit kaammattorneqarput. Suliami matumani naalakkersuinikkut piumassuseqarnissaq tapersersuinissarlu pisariaqarpoq.
Unammilligassat KNR-imit nalaanneqartut iliuuseqarfigineqarnissaat qulakkeerniarlugu Naalakkersuisut qanoq iliornissamik kissaateqarnerat paasiumallugu Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliamit ulloq 7. marts 2023-mi siunersiuinissamut aggersarneqarpoq. Ataatsimiinneq paasisaqarfiuvoq aammalu Ilinniartitaanermut, Kultureqarnermut, Timersornermut Ilageeqarnermullu Naalakkersuisup suleqatigiinnissamik kissaateqarnerminik Inatsisartut ataatsimiititaliaat isaassivigaa. Iliuuseqartoqarnissaa qulakkeerumallugu isaassiviginninneq ataatsimiititaliamit malitseqartinneqassaaq.
Doris J. Jensen
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap siulittaasua
Annertunerusumik paasisaqarusukkaanni ataatsimiititaliap siulittaasua Doris Jensen mobil +299 53 94 00 sianerluni attavigineqarsinnaavoq