2024 2023 2022 Flere år...
17-03-2023
Nunat Avannarliit Siunnersuisooqatigiivisa ataatsimiinneranni piujuaannartitsinissaq sammineqarpoq
Mariane Paviasen (IA) aamma Doris Jensen (S) Nunat Avannarliit Siunnersuisooqatigiivisa Reykjavik Islandimi ataatsimiinnerannut ataasinngornermiit peqataapput.
Doris Jensen aamma Mariane Paviasen Nunat Avannarliit Siunnersuisooqatigiivini Nunat avannarliit attanneqarsinnaanissaannut ataatsimiititaliami ilaasortaapput. Ataatsimiititaliami tassanerpiaq inatsisartuni ilaasortaasut taakkua marluullutik siunnersuutinik suliaqarnikuupput, Nunanut avannarlernuinnaq pingaaruteqaannarnatik kisiannili Kalaallit Nunaat tamakkerlugu pingaarutilinnik. Kalaallit Nunaanni Nunallu Avannarliit sinnerini piujuaannartitsinerup ineriartortinneqarnerata nukittorsarneqarnissaanut siunnersuutit ilaatigut iluaqutaasussaapput.
Piujuaannartitsinerup nukittorsarneqarnissaa Nunat avannarliit attanneqarsinnaanissaannut ataatsimiititaliaata immikkoortuni assigiinngitsorpassuarni annertuumik sulissutigineqarpoq. Nunat Avannarliit Siunnersuisooqatigiivisa ataatsimiinneranni ilaasortat siunnersuutinik innuttaasunut attuumassutilinnik suliaqarput, tassunga ilanngullugu nunatsinni naatitanik naatitsisarneq qanoq ajornannginnerulersinneqarsinnaanersoq, kiisalu siunnersuutit nunani avannarlerni ataatsimoorussamik suliarineqarput, tassani piujuartitsisumik umiarsuarnik takornariartitsisarneq qanoq qulakkeerneqarsinnaanersoq ilaasortanit ilaatigut misissorneqarluni.
Inuussutissanik nunatsinni naatitsisarnissap qulakkeerneqarnissaa pillugu siunnersuut pillugu Doris Jensen ima oqarpoq:
- Nunarujussuarmi inuussutissanik pissarsinissaq eqqarsaatigalugu assigiinngitsunik atugassaqarfiusumi inuuvugut. Taamaattumik nerisassanik eqqaaginnarnaveersaarnissarput eqqarsaatigalugu suliassarput annertuvoq, kiisalu naatitassaqarniarneq pitsaanerusoq qulakkeerneqartariaqarluni. Silap pissusaani assigiinngitsuni naatitanik qanoq naatitsisoqartarsinnaanersoq pillugu paasissutissat pingaarutillit qulakkeerneqarnissaat peqqutigalugu siunnersuut taannarpiaq ataatsimiititaliami taperseqqammerparput. Inunnut najugaqarfimminnut tulluarnerpaanik naatitanik naatitsisalerusuttunut siunnersuut iluaqutaasussaavoq. Taamaaliornikkut nunaqarfinni immap sikusarnera peqqutigalugu naatitanik nutaanik periarfissaqarfiunngitsuni siunnersuut allannguisitsisinnaalissaaq.
Siunnersuut alla Reykjavikimi suliarineqartoq Nunani Avannarlerni piujuartitsisumik umiarsuarnik takornariartitsisarnermi siuarsaanissaq pillugu suleqatigiinnissamut tunngassuteqarpoq. Siunnersuut pillugu Mariane Paviasen ima oqarpoq:
- Umiarsuarnik takornariartitsisarneq illoqarfinnut nunaqarfinnullu isertitassatigut pingaaruteqarluinnarpoq, taamaattorli umiarsuarnik takornariartitsisarnerup piujuartitsisumik ineriartinneqarnissaata qulakkeerneqarnissaa pingaaruteqarpoq. Umiarsuit issittumi angalasartut tamaani angalanissaminnut tulluarsarneqarlutik sananeqarsimanissaat pingaaruteqarpoq. Tamatuma saniatigut takornariat umiarsuarnik takornariartaatinik tikittut amerlassusii najugaqarfiit angissusaannut tulluarsarneqartarpata takornarianut sullissinerput pitsaanerulersinnaavoq. Taamatut siunnersuuteqarnermi kissaatigineqartoq tassaavoq umiarsuarnik takornariartitsisarnerup avatangiisinut inuiaqatigiinnullu sunniutigisartagaasa erseqqissarneqarnissaannik qulakkeerinninnissaq. Umiarsuarnik takornariartitsisarneq piujuartitsisumik ineriartortinneqarnissaa qulakkiissagutsigu ilisimasaq tamanna pigissallugu nalituujuvoq.
Siunnersuutit marluutillugit Nunat avannarliit attanneqarsinnaanissaannut ataatsimiititaliamut suliassanngorteqqillugit nassiunneqarnikuupput.
Nunat avannarliit attanneqarsinnaanissaannut ataatsimiititaliami ataatsimiinnerup saniatigut ilaasortat Hellisheiðavirkjan-imut nukissiorfimmut nunap iluanit kiassarneqartumukarput. Nukissiuutit piujuaannartitsinermik tunngaveqartut, CO2-mik nungusaanerit, silaannarmiit CO2-mik katersuisarneq qanorlu nukissiorfik immap naasuaraanik inuussutissaleriffinniit atorneqarsinnaasunik naatitsisalersinnaanersoq pillugit Doris Jensen aamma Nunat Avannarliit Siunnersuisooqatigiivini ilaasortat pulaarnerminni tiguartinnartumik saqqummiivigineqarput.
Nunat Avannarliit Siunnersuisooqatigiivini Kalaallit Nunaat pillugu
Inatsisartunut ilaasortat marluk Kalaallit Nunaat sinnerlugu Nunat Avannarliit Siunnersuisooqatigiivini ilaasortaapput. Piffissami matumani Doris Jensen aamma Mariane Paviasen Kalaallit Nunaat sinnerlugu Nunat Avannarliit Siunnersuisooqatigiivini ilaasortaapput.
Nunat avannarliit attanneqarsinnaanissaannut ataatsimiititaliaq pillugu
Ataatsimiititaliaq avatangiisinik pinngortitamillu illersuinissamut kiisalu pinngortitamit pissarititaasut pillugit sammisanik sulianillu suliaqartarpoq – tassunga ilanngullugit nunalerinerup, aalisarnerup orpippassualerinerullu iluani pinngortitamit pissarititaasunik atorluaaneq. Silaannaq pillugu apeqqutit aammattaaq suliamut pingaaruteqarput. Atuisut pisinnaatitaaffii, aalisarnermut ingerlatsiviit, nunalerinermut politiki, inuussutissat, atomi pillugu sillimaniarneq, uumassusillit assigiinngisitaartuunerat aammalu piujuartitsineq taakku tamarmik sammineqarlutik Nunat avannarliit attanneqarsinnaanissaannut ataatsimiititaliami suliarineqartarput. Naatsumik oqaatigalugu nunat avannarliit nunarsuarlu tamakkerlugu ajornartorsiutit kiisalu qulaani pineqartut iluanni aaqqiissutissatut periusissiat ataatsimiititaliami suliassat annersaraat.
Doris J. Jensen aamma Mariane Paviasen
Nunat Avannarliit Siunnersuisooqatigiivini ilaasortat
Annertunerusumik paasisaqarusukkaanni mobilnormut ataani allassimasut aqqutigalugit ilaasortat attavigineqarsinnaapput.
Mariane Paviasen uunga attavigineqarsinnaavoq mobil +299 25 01 69
Doris Jensen uunga attavigineqarsinnaavoq mobil +299 53 94 00