Nutaarsiassat

30-03-2023

Ammasumik siunersiuinissamut aggeqqusissut

Sivikitsumik piffissalerlugu kalerriuteqarluni Aalisarnermut Piniarnermullu Naalakkersuisoq ullumi sisamanngorneq ulloq 30. marts nal. 14.00 ammasumik siunersiuinissamut Aalisarnermut, Piniarnermut Nunalerinermullu Ataatsimiititaliamit aggersarneqarpoq.

Aalisartut piniartullu Naalakkersuisoqarfimmut saaffiginnissutaat pillugit Aalisarnermut Piniarnermullu Naalakkersuisoqarfiup kiisalu Naalakkersuisup qisuariarnerat pillugit ombudsmandip isornartorsiuineranut siunersiuinissaq tunngassuteqarpoq. Siunersiuinermi tulliuttutigut allaqqasut eqqartorneqarnissaat ataatsimiititaliamit kissaatigineqarpoq:

1. Ombudsmandip Aalisarnermut Piniarnermullu Naalakkersuisoqarfimmut isornartorsiuinera

Tikaagullittassanik ataatsimoorluni pisassanik qinnuteqaatinut itigartitsisaqattaarnerit pillugit Ombudsmandip Aalisarnermut Piniarnermullu Naalakkersuisoqarfimmut isornartorsiuinera pillugu Aalisarnermut Piniarnermullu Naalakkersuisoq ataatsimiititaliamit oqaaseqartikkusunneqarpoq.

1. KNAPK-mit saaffiginnissutit suliarineqarneri

KNAPK-mit oqaatigineqartoq una pillugu Aalisarnermut Piniarnermullu Naalakkersuisoq qanoq isumaqarnersoq ataatsimiititaliamit paasissutissiissutigeqquneqarpoq:

” - Naalakkersuisumut allagaqarput tatiginnikkunnaarnerpullu nalunaarutigalugu. Aalisarnermut, Piniarnermullu naalakkersuisoqarfimmut arlalippassuariarluta saaffiginnissutinik allattuartaraluarpugut akineqanngisaannarpugulli, taamaattumik tatiginnikkunnaarluta nalunaarfigaagut. ” ^[1]

Siunersiuineq Inatsisartut ataatsimiittarfiani ”Erling Høeghimi” ingerlanneqassaaq najuuffigineqarsinnaallunilu. Inuit 15-it tikillugit siunersiuinermi najuussinnaapput. Tamatuma saniatigut inissat tallimat tusagassiorfinnut inniminnerneqarnikuupput. Tamatuma saniatigut inissat tallimat tusagassiortunut immikkut atugassiissutigineqarput. Inissat Inatsisartut Allattoqarfiannut

inatsisartut@inatsisartut.gl-imut imaluunniit 34 50 00-imut saaffiginninnikkut inniminnerneqarsinnaapput, tamatumani siulliullutik saaffiginnittut inissanik pissarsisinnaallutik.

Siunersiuinermut najuussinnaassagaanni inissamik inniminneereernissaq pisariaqarpoq. Tusarnaariartut siunersiuinissaq kingusinnerpaamik minutsinik 15-inik sioqqullugu Inatsisartut saaffiginnittarfiannut apuutereersimassapput.

Siunersiuineq kalaallisut danskisullu malinnaaffigineqarsinnaassaaq.

[1] KNAPK tilslutter sig kritik af departement: - Vores tillid er nået grænsen | KNR

Hans Aronsen

Aalisarnermut, Piniarnermut Nunalerinermullu Ataatsimiititaliap Siulittaasua

Annertunerusumik paasissutissanik piniaraanni ataatsimiititaliap siulittaasua uunga attavigineqarsinnaavoq mobil +299 22 87 33