Nutaarsiassat

31-03-2023

Tusagassiorfinnut nalunaarut 31.marts 2023

“Pisortat immikkoortortaqarfii immikkoortortaqarfiit akimorlugit atugarissaarnermik suleqatigiinnermillu pitsanngorsaassappata oqaloqatigiinneq ilisimasanillu avitseqatigiinneq aqqutissaavoq”

Ilaqutariinnermut Peqqissutsimullu Ataatsimiititaliaq Kommuni Kujallermut paasisassarsiorluni angalavoq angalanermilu makku ingerlanneqarput:

• Qaqortoq: Borgmester Stine Egedemik ataatsimeeqateqarneq, “Akilliit”- meeqqanut inuusuttunullu angerlarsimaffimmut imminut pigisumut pulaarneq, Qaqortumi qitiusumik napparsimmavimmut pulaarneq, “Meeqqat Angerlarsimaffiannut Ivaaqqamut” pulaarneq aammalu Isumaginninnermut Ataatsimiititaliamik taassumalu allattoqarfianik pissarsiffiulluartumik ataatsimeeqateqarneq
• Narsaq: Kommunimi sulisunik ataatsimeeqateqarneq, utoqqaat illuannut aamma innuttaasut innarluuteqartut sulliviannut Narsamilu Peqqissaavimmut pulaarneq
• Eqalugaarsuit: Nunaqarfimmi aqutsisunik allaffiullu sulisuanik ataatsimeeqateqarneq, napparsimmaveeqqamut pulaarneq aammalu innuttaasunik naapitsineq 

Ataatsimiititaliap paasinninnera malillugu Kommune Kujalleq pissanganartumik ingerlataqarpoq, tamatumani kommunimi ingerlatsivimmi ineriartortitsinissamut tunngavissiisoqarluni. Ataatsimiititaliaq kommunip Isumaginninnermut Ataatsimiititaliaanit sukumiisumik ilisimatinneqarpoq paasivaalu anguniagaqarfiusumik sulineq pitsaasoq ingerlanneqartoq.

Kommune Qeqertalimmut tikeraarnermi paasisat assigalugit ataatsimiititaliamit paasineqarpoq hashimik atornerluineq innuttaasut ilaqutariittut inuuneranni annertoorujussuarmik imaannaanngitsumillu ajornartorsiutaasoq imminut pilersornissamut sunniutilimmik. Meeqqat arfineq pingasut tikillugit ukiullit qanittuminni hashimik pissarsisinnaapput, taamaattoqarneralu assut isumakulunnartoq naalakkersuinermik ingerlataqartunit innuttaasunillu tamanit iliuuseqarfigineqartariaqarpoq.

Maluginiarnarporlu oqaloqatigiinnerup ilisimasanillu avitseqatigiinnerup aaqqiiniarnermi sakkussatut atorneqarsinnaanerat isiginiarneqanngimmat. Naalakkersuinermik suliaqartut sulisullu ataatsimiititaliamit naapinneqartut tamarmik ujartorpaat immikkoortoqarfiit akimorlugit siammasissumik suleqatigiinnissaq. Suleqatigisanik pitsaanerusumik oqaloqatiginninnikkut aammalu isummiussat periarfissallu pitsaanerusumik paaseqatigiissutiginerunerisigut illoqarfigisap iluani/kommunerisami pitsaanerusumik angusaqartoqarsinnaavoq.

Pisortat suliassanik isumaginninnerat pitsanngortinneqassappat innuttaasunik sullissinermi aporfiit killilersuutillu nungusarneqartariaqartut ataatsimiititaliamit ersarissumik nalilerneqarpoq. Atugarissaarnerulertoqassappat inuit piginnaasaasa atorluarneqarnissaat pisariaqartinneqarpoq aammalu nukissat sulisullu pigineqartut pitsaanerpaamik atorneqassappata naalakkersuinikkut aqutsinissaq pisariaqarluni.

Naggataatigut ataatsimiititaliamit oqaatigineqassaaq, syfiliserftut kinguaassiuutitigullu nappaatillit amerlammata imminullu paarilluarnerunissaq ataatsimiititaliamit kaammattuutigineqarnissaa pissutissaqalersitsilluni.

Tikilluaqquneqarluarneq, oqallilluarnerit minnerunngitsumillu isumassarsiat ilisimasallu naalakkersuinikkut sulinermik nangitsinissamini atorluarneqarsinnaasut ataatsimiititaliamit qujassutigineqarput.

Inussiarnersumik inuulluaqqusillunga

Mala Høy Kúko

Ilaqutariinnermut Peqqissutsimullu Ataatsimiititaliap siulittaasua