2024 2023 2022 Flere år...
31-05-2023
Inatsisartut Ombudsmandissaat toqqarneqarpoq
Ullumikkut Inatsisartut Gedion Jeremiassen Ombudsmanditut atuuffimmut toqqarpaat. Gedion atuuffimmi 1. august 2023 aallartissaaq, atorfillu Vera Lethimiit, 1996-imiit atuuffimmik isumaginnissimasumiit tigussallugu.
Gedion Jeremiassen 61-inik ukioqarpoq, Københavnip Universitetianit cand.jur.-itut ilinniagaqartoq ullumikkullu inatsisilerituutut namminersortutut aammalu nammineq aningaasartuutiginngisamik eqqartuussisulersuussisoqarnerani eqqartuussissuserisutut sulilluni.
Suleriaaseq pillugu Ataatsimiititaliap, Inatsisartut partiivinit tamanit ilaasortaaffigineqartup peqataatinneratigut, Inatsisinut Ataatsimiititaliap inassuteqarneratigut Ombudsmandimik qinersisoqarpoq.
- Qinnuteqartup matumap inatsisilerinermi naammassisai kiisalu pisortat allaffeqarfiini eqqartuussivinnilu ukiorpassuit misilittagaqarnera Inatsisinut Ataatsimiititaliap matumani inassuteqaammik suliaqarnermini pingaartissimavai. Innarligassaanngitsumik isummertaaseqartutut, siammasissumik misilittagaqartutut, inuttut malunnaateqartutut, illoqarfinnillu nunaqarfinnillu annertuumik ilisimasaqartutut ataatsimiititaliap qinnuteqartoq isigaa. Atorfinitsitsiniarnerup ingerlanerani Ombudsmandeqarfimmut annertuumik ataqqinnissuseqarnini kiisalu Ombudsmanditut atuuffiup ineriartornissaanut takorluukkani ersersippai, Anders Olsen Inatsisinut Ataatsimiititaliap siulittaasua oqarpoq.
- Piffissaq manna iluatsillugu Inatsisinut Ataatsimiititaliamut siulittaasutut taamatuttaaq Inatsisartut ullumikkut Ombudsmanderisaat Vera Leth atuuffimmik ukiorpassuarni isumaginnissimaneranut qujassuteqarfigerusuppara, Anders Olsenip, Inatsisinut Ataatsimiititaliap siulittaasuata oqaatigaa.
Gedion Kalaallit Nunaanni Ombudsmandit pingajorissavaat. Inatsisartut ullumikkut Ombudsmanderisaat, Vera Leth, 1996-imiilli atuuffimminik isumaginnissimavoq. Emil Abelsen, Kalaallit Nunaata Ombudsmandia siulleq, kingoraarlugu Vera Leth tassa maannamut atuussimavoq.
Anders Olsen
Inatsisinut Ataatsimiititaliamut siulittaasoq
Allanik paasissutissanik pissarsiniarnermi ataatsimiititaliap siulittaasua ugguuna attavigineqarsinnaavoq +299 49 07 08