Ullut ataatsimiiffiusut aappaat, pingasunngorneq 12.
februar 2003, nal. 15:15
Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.
Jonathan Motzfeldt, Inatsisartut
Silittaasuat, Siumut.
Tulliuppoq immikkortoq 13-i; Ilinniagaqartut ilinniartut ineqarfiini ineqarnermut akiliuteqartarunnaarnissaat,
ilinniartullu tamanna aqqutigalugu aningaasaqarnikkut ineqarnermut akiliutitnut
sipaarutigineqartut amerlaqataanik pissaqarnerulernissaat anguniarlugu
suliniuteqaqqullugit Naalakkersuisut peqquneqarnissaannik Inuusuttut Inatsisartuinut
aalajangiiffigisassatut siunnersuut.Tassunga siunnesuuteqarput Hans Lars
Mathiassen aamma Qaavigaq Kristensen. Hans Karl Mathiassen qinnuigissavara
saqqummiusseqqullugu.
Hans Lars Mathiassen, Niuernermik
Ilinniarfik, Qaqortoq.
Ilinniagaqartoq ullumikkut qaammammut 4.200 kr.-nik
ilinniagaqarnersiutisisarpoq, taakkulu inuuniutigissallugit Kalaallit Nunaanni
akit eqqarsaatigalugit ikittuararsuupput. Ilinniagaqartup ineqarnermut
qaammammut akiliutit 850 kr.-t aningaasanit taakunannga aamma akilertartussa‑vai,
taamaalilluni qaammammut 3.350 kr.-nnaat atisanut, nerisanut, atuakkanut
aningaasartuuti‑nullu aalajangersimasunut atugassarilersarlugit.
Taamaattumik ilinniagaqartut atugaat
pitsanngorsaaviginiarlugit siunnersuutigaarput ilinniartut ineqarfiini najugaqarneq
akeerutsinneqassaasoq, taamaaliornikkummi ilinniagaqartoq qaammam‑mut 850
kr.-nik sipaaruteqartalissaaq, iniagaqartummi qaammammut 850 kr.-nik amerlaneru‑sunik
tunineqartarnissaa aalajangerneqaannassappat ilinniagaqartoq aningasanut
taakkununnga akileraarutinik akiliisartussaavoq, taamallunilu
pitsanngoriaataasoq malugineqangaartussaanani.
Ilinniartut ineqarfiinik ingerlatsinermut aningaasartuutit
amerlanerpaartaat Naalakkersuisut ma ssakkut akilertaraat, ineqarnermullu
akiliutit Naalakkersuisunut pingaaruteqangaarnatik.
Ineqarnermulli akiliutit ilinniagaqartup isertitaanit
tamarmiusunit 20%-iusut pingaaruteqarnerujussuupput, taamatullu
oqilisaanneqarnera malunnartorujussuusinnaalluni.
Amerlanerusut ilinniagaqarnerminnik aningaasassaaleqineq
pissutigalugu tamaatitsiinnaartarnerannut taarsiullugu amerlanerusut
angusisalernerat tamatuma aamma kingunerissavaa.
Jonathan Motzfeldt, Inatsisartuni
Siulittaasoq, Siumut.
Naalakkersuisut sinnerlugit akissuteqassaaq Poul Olsen
akissuteqassaaq.
Poul Olsen, Naalakkersuisunut
ilaasortaq, Siumup Inuusuttai, Sisimiut.
Naalakkersuisut isumaqarput ilinniagaqartut ilinniartut
ineqarfiini akeq anngitsumik najugaqartinneqarnerisigut ilinniagaqartut
aningaasanik amerlanerusunik atugassaqalersinniarneqarnissaat naleqquttuunngitsoq.
Taamatut aaqqissuussinerup ilinniagaqartut namminerisamik inigisaminni
najugaqartut kiisalu kalaallit ilinniagaqartut Danmarkimiittut
ilinniagaqartunut allanut sanilliullugit ajornerujussuarmik
inissisimalersittussaavai.
Kultureqarnermut, Iliniartitaanermut, Ilisimatusarnermut
Ilageeqarnermullu Pisortaqarfiup nassuiaat ilinniagaqarnersiutit
allanngortinneqarnissaat pillugu siunnersuutitalik 2002-mi suliarisimavaa.
Tamatumani anguniagaasoq tassaavoq ilinniagaqarnersiutit pillugit malittarisassat
makku eqqarsaatigalugit qanoq iliorluni pisariinnerulersinneqarnissaannik
atuisunullu pitsaanerulersinneqarnissannik qulaajaaneq:
ilinniagaqartut atugaasa
ataatsimut isigalugit ajornerulersinneqannginnissaat,
malittarisassat aqunneqarnerisa
ajornannginnerulernissaat, aamma
aningaasatigut
atugassarititaasut pitsaanerusunik atorneqarnerisa qulakkeerneqarnissaat.
Ilinniagaqarnersiutinut amerlassuseritinneqartut
eqqarsaatigalugit nassuiaammi kaammattuutigineqarpoq ilinniagaqartut
ilinniagaqarnissamut piareersarfiusuniittut qaammammut 3.500 kr.-nik
tapiiffigineqartassasut
ilinniagaqartullu ilinniagaqarfinni ingerlaqqiffiusussaniittut 4.200
kr.-nik tapiiffigineqartassasut. ammattuutigineqarpoq amerlassusiliussat taakku
isertitanut tunngasut apeqqutaatinnagit tunniunneqartassaasut, aamma
ilinniagaqartup angerlarsimafimmi angerlarsimaffiulluunniit avataani
najugaqarnera apeqqutaatinnagu. Kiisalu kaammattuutigineqarpoq
amerlassusiliussat taakku ukiumut ataasiarlutik akitigut
aaqqiiffigineqartassasut.
Ammattaaq kaammattuutigineqarpoq taarsigassarsinissamut
periarfissat annertusineqassasut, taamaalillutik ilinniagaqartut
ilinniartitsinerni taarsigassarsiaqarfiusinnaatitaasuni ilinniartuusut
qaammammut 2.000 kr.-inik taarsigassarsisarnissaminnut periarfissaqalersillugit.
Tamatumunnga illuatungiliullugu kaammattuutigineqarpoq
ilinniagaqartunut immikkut tapiissutaasartut arlallit, llimi
sulinngiffeqarnermi akiliunneqarluni angalanerit, atuakkanut
ani-ngaasartuutinut tapiissutit, katsorsartinnermut aningaasartuutit, bussinut
qimuttuitsunullu ikissutissat kiisalu amerlanaarlugit nassatanut tapissutit,
peerneqassasut, tassami tapiissutinik taakkuninnga aqutsineq nukinnik suliassap
annertussusianut naapertuutinngitsumik annertuallaamik atuiffiusarmat.
Nassuiaammi kaammattuutit taakku annertuumik
misissueqqissaarnerni paasisanik tunngaveqarput, ilaatigut nalunaarusiaq “Kina
ilinniagaqarpa” aamma Kalaallit Nunaanni Naatsorsueqqissaartarfiup misissuinera
“Kalaallit Nunaanni ilinniagaqartut ineqarnikkut aningaasaqarnikkullu atugaannik
misissuineq”.
Misissuinerni marlunni taakkunani ilinniagaqartut
apersorneqartut amerlanersaasa aningaasaqarnikkut atugassarititaasut
naammagisimaarlugu oqaatigisimavaat.
Tamakku tunngavigalugit Naalakkersuisut isumaqarput
ilinniagaqartut iluarsaaqqinneq pillugu nassuiaammi kaammattuutigineqartut
saniatigut aningaasanik atugassaannik amerlanerulersitsi‑nissamut
naammattumik tunngavissaqanngitsoq.
Jonathan Motzfeldt, Inatsisartuni
Siulittaasoq, Siumut.
Tulliulluni oqaaseqassaaq Juliane Henningsen.
Juliane Henningsen, Avannaani
Ilinniarnertuunngorniarfik, Aasiaat.
Ilinniagaqarnersiutit eqqaaneqarmata tassani
naammagittaalliortutullusooq nipeqarmat eqqarsarpunga unga – oqarsinnaallunga
uanga naammagittaalliutissaqarnanga ilinniartutut ineqarnermut akilereeraanni
sinneqarluartarmata, taava nammineq sinneri aningaasat naammatusaarlugit
atoraanni naammatutut oqaatigisinnaagakkit. Aamma atuakkat
eqqarsaatigissagaanni – annertunerusumik akiliuteqarneq ajorpugut
ilinniartutut, taava eqqaaneqartut uani tunngavilesuummi soorlu
amerlissagaluartut naammassinnittartut ilinniartut aningasanik amerlanerusunik
tunisikkuni. Taanna aniguiffissaasiorinngilara pissutigalugu ilinniartoq
piumassuseqaruni aningaasat eqqarsaatigsussaanngilai kisianni nammineq imminut
piumaffigisariaqarpoq naammassinninnissaminut taava soorlu imminut
oqaaitigisinnaavunga tugarissaarluartutut ilinniarutut. Qujanaq.
Jonathan Motzfeldt, Inatsisartut
Siulittaasuat, Siumut.
Tulliulluni oqaaseqassaaq Ânâ-Grethe Mathiassen.
Ânâ-Grethe Mathiassen, Perorsaanermik
Ilinniarfik, Ilulissat.
Imatut. Ilinniarnermi akeqanngitsumik
inissaqartitaasarnissaq siunnesuutigineqarsimammat uanga taanna
akuersiinnaanngilara pissutigalugu kolligiani akit inissiani akikitsuni
najugaqartitaareerlutik saniatigut aamma innaallagissamut sipaarutaasumik
akiliisinneqarneq ajoratta, tamakkua aamma eqqarsaatigisariaqarput -
sipaarutigut annertoreertigisut taama.
Jonathan Motzfeldt, Inatsisartut
Siulittaasuat, Siumut.
Tulliulluni oqaaseqassaaq Poul Olsen,
Poul Olsen, Naalakkersuisuni
ilaasortaq, Siumup Inuusuttai, Sisimiut.
Qujanaq. Tassani nammineq isummannik saqqummiilaassaanga.
Isumaqarpunga ilinniartut qalliinnakkut atugarissaarnissartik
anguniarnaveersaartariqaraat. Massakkut ilinniartut ajornartorsiutaa annerit
ilagaat ilinniarfiit ineqarfii pisoqalisimaqisut ilaannikkut ukiukkut
isseqisumi kiagunnaavittartut isersimaffigiuminaallisartut. Tamakkua
aaqqissuunneqarnissaat salliuttariaqarput ilinniartut qallikkut
aaqqissuussaanissaat kingulliullugu. Tassami aningaasanik amigaateqartaqigunik
ilinniartut ilinniartullu amerlanersaat tamangajammi mobiltelefuuneqarlutillu
pisut. Eqqarsarluartariaqarpugut ilinniartuulluta sukkut sipaarsinnaavugut
aningaasat sukkut atorluarsinnaavagut – taanna siulliuttariaqarparput
aningaasanik pissarsiniarnitsinni. Qujanaq.
Jonathan Motzfeldt,
Inatssiartut Siulittaasuat, Siumut.
Tulliulluni oqaaseqassaaq Aka Debis.
Aka Debis, Ilinniarnertuunngorniarfik,
Qaqortoq.
Tassa isumaqarpunga pingaartuusoq ilinniagaqartut ilaat
aamma immikkut aningaasartuuteqartartut, soorlu ilai meeraqarput kisimiillutik
pilersuisuullutik taamaalillutillu saniatigut aamma suliffeqarsinnaanatik.
Taakua amerlanerusunik isertitaqarnissamut allanik periarfissaqanngillat.
Taakkorpiaat annertuumik taamaatiinnartarput taavalu ilinniagaqarnissamut
annertoorsuarmik periar fissaqarnatik.
Jonathan Motzfeldt, Inatsisartut
Siulittaasuat, Siumut.
Tullippoq Tupaarnaq Binzer.
Tupaarnaq Binzer, Qeqqani
Ilinniarnertuunngorniarfik, Nuuk.
Oqaatiginiaannarlugu ilinniagaqarnersiuteqartut nunani
allani nammineerlutik suut tamaasa akilertarmassuk, taannataa aamma
eqqqarsaatigisariaqarpaat,t assa 4.200,00 koruunersisarassi qaammammut.
Jonathan Motzfeldt, Inatsisartut
Siulittaasuat, Siumut.
Tulliuppoq Johanne Olsen Kreutzmann.
Johanne Olsen Kreutzmann, Ilisimatusarfik, Nuuk.
Aningaasartuutigisagut
qaffakkaluttuinnarput aamma immaqa qaffakkaluttuinnartussaassapput,
namminneerlutalu akisussaaffik annertunerusoq tiguartuinnarusullutigu. Taava
immaqa pingaaruteqarpoq meeraqarniarutta kinguaassagut ilinnialernissaannut
aamma toqqorsissussinnaasariaqarlugit aningaasanik, oqilisaataasinnaasunik
ilinniarnerminni aningaasartuuteqarnerusariaqassagut – atuakkat akisunerusut
pisiarisariaqassagunikkit ilinniartuunerminut attuumassuteqartut. Imaluuniit
pitsaanerusumik atugaqarusukkunik nammineerlutik aamma akisussaffigilernissaat
– qaammarsaavigineqassaoq akisussaaffiit inunnut tunngasut –
atugarissaarnerujumagaanni akisussaaffiit qaammarsaaffigineqartariaqarput
annertunerusumik inuiaqatigiinni. Atugarissaarumagutta taava aamma qanoq
iliuuseqartariaqartugut.
Jonathan Motzfeldt, Inatsisartut Siulittaasuat,
Siumut.
Allanik
oqaaseqaruamsoqanngilaq apeqqummi tassani, kisianni akissutigineqartut
oqaaserineqartullu tamarmik taakku tungavialguit Aningaasaqarnermut Ataatsimiititaliamut
suliassaq ingerlateqqinneqassaaq.