Ullut ataatsimiiffiusut
pingajuat, sisamanngorneq 13. februar 2003, nal. 19:38
Ataatsimiinnermik
aqutsisoq: Inatsisartut Siulittaasoqarfianni ilaasortaq Per Rosing-Petersen,
Siumut.
Per Rosing-Petersen, Inatsisartut
Siulittaasoqarfianni ilaasortaq, Siumut.
Taava ullumikkut
oqaluuserisassat kinguliata pingajuat, immikkoortoq 15, atueqqittarfinnik,
soorlu saviminernik, pappialanik il.il. atueqqiffiusinnaasunik pilersitsinissaq
anguniarlugu suliniuteqaqqullugit Naalakkersuisut peqquneqarnissaannik
Inuusuttut Inatsisartuinut aalajangiissifigsassatut siunnersuut.
Tassani
isumaliutissiissusiortoqarnikuuvoq, Niuernermut, Inuussutissarsiornermut,
Eqqissisimatitsinermut Avatangiisinullu Ataatsimiititaliaq, tassani
saqqummiissooq Sussi Adel Holm, takanna.
Sussi Adel Holm, Niuernermut,
Inuussutissarsiornermut, Eqqissisimatitsinermut Avatangiisinullu
Ataatsimiititaliaq.
Inuusuttut
Inatsisartuisa ataatsimiitiaata siunnersuut siullermeerlugu oqaluuserineqarnerata
kingorna misissuataarpaa, imatullu oqaaseqarfigissallugu:
Ataatsimiititaliaq
isumaqarpoq siunnersuuteqartut siunnersuummik qitiusumik pingaarutilimmillu
oqallisissanngortitsisut.
Ataatsimiititaliaq
isumaqarpoq avatangiisit pinngortitallu innimigineqarnissaat inuiaqatigiinnut
kalaallinut pingaarluinnartuusoq.
Ataatsimiititaliap
siunnersuummik oqaluuserinninnermini paasivaa Sanaartornermut Ilinniarfik
atueqqinnissamut periarfiusinnaasunik sukumiisumik misissuillunilu
misileraasimasoq. Sanaartornermut Ilinniarfimmi misissuinerit inerneri
neriulluarnartorujussuupput. Inernerit tikkuussipput pappiaqqap issusuup,
pappiarap saffiugassallu sanaartukkanik angisuunik ingerlatsinermilu
aningaasartuutinik annertuunik nassataqanngitsumik atoqqinneqarsinnaaneri iluaqutissartalimmik
pilersinneqarlutillu piviusunngortinneqarsinnaasut.
Misissuinernut
taamaattunut tunngatillugu ataatsimiititaliamit tikkuarneqassaaq,
assersuutigalugu nunatsinni ilinniarfiit aqqutigalugit, ilisimatuussutsikkut
atoqqinneqarsinnaasunik misissueqqisaartoqarlunilu
misileraajuartoqartariaqartoq.
Atueqqittarnermut
tunngasuni inuussutissarsiornikkut suliffissaqartitsinikkullu
periarfissaqarnera ataatsimiititaliap tikkuanngitsoorumanngilaa.
Piumassuseqarneq
aqqutissamik tikkuussissaaq, aqqutaanilu piumassuseqarneq, piginnaasaqarneq
takorluuisinnaassuserlu naajorarluarumaarput. Eqqarsaatersorneq
suleqatigiissitallu, misissuinerit aningaasatigullu nalilersuinerit
siunnersuummut angusaqarfiusumik iliuuseqalersitsinavianngillat. Iliuuseqarneq
allanngortitsissutaallunilu angusaqarfiussaaq.
Atueqqittarsinnaanermik
isummamut innuttat avatangiisinut pinngortitamullu naapertuuttumik
inuuneqarnissamik kissaateqarnerannut ilaavoq avatangiisinik pinngortitamillu
innimiginninneq. Taamaammat nunatsinni innuttat tamakkerlugit atueqqittarnikkut
ingerlatani peqataatinneqartariaqarput.
Atueqqittarneq
eqqarsaatigalugu aningaasaannaat aallaavigalugit isummersortoqarsinnaavoq.
Apeqqutaasorli tassa, avatangiisit pinngortitarlu akilersinnaassuseqarneq
kisiat tunngavigalugu naliliivigigaanni avatangiisit pinngortitarlu
innimigalugit inuusoqarsinnaanersoq. Ataatsimiititaliaq taama isumaqanngilaq.
Pissusiviusunik qulaani
taaneqartunik takkuninnga tunngavilersuutitullu saqqummiunneqartunik
innersuussilluni siunnersuut Inuusuttut Inatsisartuinit
ilaliivigineqartariaqarpoq.
Tamanna tunngavigalugu Ataatsimiititaliap isumaqatigiittup siunnersuut akuersissutigineqassasoq inassutigaa.
Taama tunngaveqarluni Ataatsimiititaliap isumaqatigiittup siunnersuut itigartinneqaqullugu inassutigaa. Qujanaq.
Per Rosing-Petersen, Inatsisartut
Siulittaasoqarfianni ilaasortaq, Siumut.
Sussi Adel Holmimut
qujanaq. Allanik oqaaseqartoqarumasoqarnerluni. Taamaattoqanngilaq,
taamaasillugu isumaliutissiissut toqqammavigalugu akuersissutigineqarnissaa
taasissutigineqassaaq.
Kikkut tassunga
isumaqataappat?
24-t.
Kikkut akerliuppat?
2.
Kikkut taaseqataanngillat?
2.
Taamaasilluni siunnersuut
akuersissutigineqarpoq.