Ullut ataatsimiiffiusut
pingajuat, sisamanngorneq 13. februar 2003, nal. 18:03
Ataatsimiinnermik aqutsisoq: Per Rosing-Petersen,
Inatsisartut Siulittaasoqarfianni ilaasortaq, Siumut.
Per Rosing-Petersen, Inatsisartut
Siulittaasoqarfianni ilaasortaq, Siumut.
Tullia, immikkoortoq 31, meeqqat
atuarfiata oqaatsinut tunngasunik ingerlatsinermut, matematik kimut tunngasunik
ingerlatsinermut assassornermullu tunngasunik ingerlatsinermut agguataarneqarnissaa
suliniutigeqqullugu Naalakkersuisut peqquneqarnissaannik Inuusuttut
Inatsisartuinut aalajangiiffigasssatut siunnersuut.
Tassani isumaliutissiissummik
saqqummiussissooq Stephan Montgomery-Andersen.
Stephan Montgomery-Andersen, Kultureqarnermut,
Ilageeqarnermut, Ilinniartitaanermut Ilisimatusarnermullu Ataatsimititaliaq.
Meeqqat atuarfiata oqaatsinut
tunngasunik ingerlatsinermut, matematikimut tunngasunik ingerlatsinermut
assassornermullu tunngasunik ingerlatsinermut agguataarneqarnissaa suliniutigeqqullugu
Naalakkersuisut peqquneqarnissaannik Inuusuttut Inatsisartuisa
aalajangiiffigisassaattut siunnersuut pillugu Inuusuttut Inatsisartuisa
Kultureqarnemut Ilinniartitaanermullu Ataatsimiititaliaata
isumaliutissiissutaa, siunnersuutip
aappassaaneerneqarnerani saqqummiunneqartoq, Inuusuttut Inatsisartuisa
ataatsimiititaliaat suliarinninnermini ukuninnga inuttaqarpoq:
Inuusuttut Inatsisartuini ilaasortaq
Jakob Lund, Ilisimatusarfik, Inuusuttut Inatsisartuini ilaasortaq Stephan
Montgomery-Andersen, Tupaarnaq Binzer,Ib Uldum, Helene Egede kiisalu Tobiasine
Abelsen.
Inuussuttut Inatsisartuisa
Ataatsimiititaliaanni 2003-mi siullermeerinerup kingorna Inuusuttut
Inatsisartuisa ataatsimiititaliaata siunnersuut siuliani taaneqartoq
misissorpaa.
Inuusuttut Inatsisartuisa
Kultureqarnermut Ilinniartitaanermullu Ataatsimiititaliaat isumaqarpoq atuartut
ataasiakkaat meeqqat atuarfianni aallartittumik immikkoortiterneqartalernissaat
siusippallaartoq. Ataatsimiititaliap isumaa malillugu meeqqat atuarfiat tamatigoortuullunilu
tamanut atuussinnaassuseqartariaqarpoq. Atuartut meeqqat atuarfianniillutilli
siunissamut periarfissaminnik killiliinissamut pinngitsaalineqassanngillat.
Meeqqat atuarfiat pillugu peqqussummi
21. maj 2002-meersumi atuartoq qitiutinneqarpoq. Tamatuma kingunerisaanik
atuartup soqutigisani aqqutigalugit siunissami ingerlavigilerumasinnaasani
suunersoq arriitsumik paasiartorsinnaavaa.
Tamatuma saniatigut peqqussutip § 26,
imm. 3 A kommunalbestyrelsip angajoqqaat qinnuteqareernerisigut atuartoq ukiut
8-t atuareersimappat, tamannalu immikkut patsisissaqartinneqarpat,
atuarunnaarnissaanik akuerinninnissaanut periarfissiivoq.
Siuliani taaneqartut tunngavigalugit
ataatsimiititaliaq isumaqarpoq, agguataarinikkut atuartut
immikkoortinngikkaluarlugit, atuartut ataasiakkaat immikkut soqutigisaasa
isiginiarneqarsinnaanerat Atuarfitsialak aqqutigalugu annertuumik
periarfissinneqareersoq.
Tamanna tunngavigalugu siunnersuutip itigartitsissutigineqarnissaa
ataatsimiititaliap isumaqatigiissup inassutigaa.
Taama oqaaseqarluni Inuusuttut
Inatsisartuisa Kultureqarnermut Ilinniartitaanermullu Ataatsimii‑titaliaata
siunnersuut aappassaaniigassanngortippaa.
Per Rosing-Petersen, Inatsisartut
Siulittaasoqarfianni ilaasortaq, Siumut.
Taasissutigineqarnissaa tullinnguuppoq,
tassanilu itigartitsissutigineqar-
nera taasissutigineqassaaq.
Kikkut itigartitsissutigineqarneranut
isumaqataappat?
27.
Kikkut akerliuppat?
Soqanngilaq.
Kikkut taaseqataanngillat?
Ataaseq.
Taamaasilluni siunnersuutip
itigartitsissutigineqarnera aalajangiunneqarpoq. Immikkoortoq 31 taamaasillugu
naammassivarput.