Ullut ataatsimiiffiusut
pingajuat, sisamanngorneq 13. februar 2003, nal. 18:07
Ataatsimiinnermik aqutsisoq: Per Rosing-Petersen,
Inatsisartut Siulittaasoqarfianni ilaasortaq, Siumut.
Per Rosing-Petersen, Inatsisartut
Siulittaasoqarfianni ilaasortaq, Siumut.
Tullinnguuppoq immikkoortoq
qulingiluaat, Ilinniagaqartut ilinniarnerminnik naammassinninnermik kingorna
sivikinnerpaamik ukiuni pingasuni Kalaallit Nunaanni sulisimanngitsut
ilinniarnersiutinik tigusimasaminnik utertitsillutik akiliisarnissaat pillugu malittarisassanik
atulersitsinissaq anguniarlugu Naalakkersuisut suliniuteqaqqullugit
peqquneqarnissaannik Inuusuttut Inatsisartuinut aalajangiiffigisassatut
siunnersuut.
Tassani saqqummiissaaq
isumaliutissiissummik Karen Steenholdt, takanna.
Karen Steenholdt, Peqqinnissamut,
Isumaginninnermut Suliffeqarnermullu Ataatsimiititaliaa.
Qujanaq. Inuusuttut Inatsisartuini
ilaasortat Juliane Henningsenip aamma Ib Uldumip, Ilinniarnertuunngorniat
Ilinniarfiat Aasiaat, ilinniagaqartut ilinniarnerminnik naammassinninnermik
kingorna sivikinnerpaamik ukiuni pingasuni Kalaallit Nunaanni sulisimanngitsut
ilinniarnersiutinik tigusimasaminnik utertitsillutik akiliisarnissaat pillugu
malittarisassanik atulersitsinissaq anguniarlugu Naalakkersuisut
suliniuteqaqqullugit peqquneqarnissaannik Inuusuttut Inatsisartuinut
aalajangiiffigisassatut siunnersuutaat pillugu
Inuusuttut Inatsisartuisa Peqqinnissamut, Isumaginninnermut
Suliffeqarnermullu Ataatsimiititaliaata isumaliutissuusutaa aalajangiiffigisassatut
siunnersuutip aappassaaneqarnerani saqqummiunneqartoq.
Inuusuttut Inatsisartuisa
Peqqinnissamut, Isumaginninnermut Suliffeqarnermullu Ataatsimiititaliaat
suliarinninnermini ukuninnga inuttaqarpoq:
Aggo Løvstrøm, Karen Steenholdt,
Johanne Olsen Kreutzmann, Qaavigaq Kristensen, Ânâ-Grethe Mathiassen kiisalu
Juliane Henningsen.
Inuusuttut Inatsisartuisa
Peqqinnissamut, Isumaginninnermut Suliffeqarnermullu Ataatsimiititaliaata
aalajangiiffigisassatut siunnersuut Inuusuttut Inatsissartuisa
Ataatsimiititaliaanni 2003-mi siullermeerlugu oqaluuserineqarnerata kingorna
misissuataarpaa, imalu oqaaseqarfigissallugu:
Siunnersuutip imarisai:
Inuusuttut Inatsisartuini ilaasortat
Juliane Henningsenip aamma Ib Uldumip siunnersuutaasa siunertaraa Kalaallit
Nunaata avataani ilinniagaqarnermut atatillugu ilinniagaqarnersiutinik
pissarsiarineqarsimasut, ilinniarnerminik naammassinnissimasoq ilinniarnermi
naammassinerata kingorna sivikinnerpaamik ukiuni pingasuni Kalaallit Nunaanni
suliffeqalersimanngippat, utertinneqarnissaannut maleruagassiortoqassasoq.
Ataatsimiititaliaq isumaqatigiittoq
siunnersuut pillugu ima oqaaseqassaaq:
Ilinniagaqarnerup
naammassinerata kingorna Kalaallit Nunaannut utinngitsut qassiunersut kiisalu
tamanna sumik tunngaveqarnersoq siullermik sukumiisumik misissorneqaqqaartariaqarpoq.
Imaassinnaavormi annertunerusumik misilittagaqalerumalluni Danmarkimi
nunamiluunniit allamiittoqarallartoq.
Nunani allani qanoq
aaqqissuussisoqarsimanersoq kiisalu taakku qanoq kinguneqaateqarsimanersut
misissorneqartariaqarpoq, maannakkorpiarmi utertitsilluni akiliisarnissamut
maleruagassanik atuutilersitsisinnaanermut nalorninartut amerlavallaarmata.
Inuusuttut Inatsisartuisa
Peqqinnissamut, Isumaginninnermut Suliffeqarnermullu Ataatsimiititaliaata
isumaqatigiissup inassutigaa siunnersuut ilusiligaanermisut ilusilik
itigartitsissutigineqassasoq.
Taama oqaaseqarluni Inuusuttut
Inatsisartuisa Peqqinnissamut, Isumaginninnermut
Suliffeqarnermullu
Ataatsimiititaliaata aalajangiiffigisassatut siunnersuut
aappassaaniigassanngortippaa.
Per Rosing-Petersen, Inatsisartut
Siulittaasoqarfianni ilaasortaq, Siumut.
Karen Steenholdtimut qujanaq. Allamik
oqaaseqartoqarumanerluni. Taamaattoqanngilaq.
Taamaalilluni taasissutigineqassaaq,
tassanilu taasissutigineqassooq isumaliutissiissut toqqammavigalugu itigartitsissutigineqarnissaa.
Kikkut isumaqataappat
itigartisissutigineqarnissaanut?
19.
Kikkut akerliuppat
itigartitsissutigineqarnissaanut?
8.
Taava naggataatigut, kikkut
taaseqataanngillat?
1.
Taamaasilluni siunnersuut
itigartitssissutigneqarpoq.