Ataatsimiinnermik aqutsisoq: Jonathan Motzfeldt,
Inatsisartut Siulittaasuat, Siumut.
Jonathan Motzfeldt, Inatsisartut Siulittaasuat,
Siumut.
Ataatsimiinneq ammarpoq. Kalaallit
Nunaannit inuusuttut Inatsisartuisa ataatsimiinerat taamaalilluni ammarpoq,
tamassi tikilluaritsi. Aamma tikilluaqquakka maani isersimasut
Naalakkersuisunut ilaasortat taamatullu aamma Rigsombudsmandi aamma maannga
tikilluaqquara.
Taavalu ullormut oqaluuserisassat
aallartitsinnagit ataatsimiinnerup ammarneqarnerani oqaasissakka
saqqummiukkallassavakka.
Asasakka ikinngutit inuusuttut
Kalaallit Nunaannit tamarmit ataatsimiigiartut. Nunatsinni tamat
oqartussaaqataaneranik suliassat suliarineqarnissaannut tunngavissat
akuerisimasagut aallaavigalugit inuiaqatigiittut ineriartornitta
oqallisigineqarnerani ilissi inuusuttut pingaarutilillut isigialugit
ssaqqummiukkumasasi saqqummiunnissaannut piffissamik maanni atuiumasimgassi
Inatsisartut ataatimiittarfiannut tikilluaritsi.
Nalunngisatsitut inuiaqatigiittut
ineriartornitsinni piffissaq pissanganartoq killiffigaarput.
Namminersornerulluni Oqartussaaneq ukiuni 24-ngajanngortuni matuma siorna
atuutsilersimavarput.
Naalakkersuinikkut ineriartornerup
akisussaaffigineqarnerata Qallunaat Nun aanniit Kalaallit Nunaannut
nuunniarneqarnera akornatsinni amerlasuunut naalakkersuinikkut anguniarlugu
ilungersorfiusimavoq. Nunatta namminiilernissaanik Qallunaat Nunaanniluunniit
nutaamik peqateqalernissaanik ilaasa taasartagaannik oqallisilerutta nunatta
taamatut oqaluttuarisaaneranut tunngasoq taanna aamma eqqaamasariaqarparput.
Namminersornerunitsinni pisut
aallarnisarsinnaajumallugit Qallunaat Nunaannik oqaloqatiginnissinnaaneq
toqqarsimavarput, aallaqqaataaniilli tamatumap oqaluuserinerani tamat
oqartussaaqataanerannut tunngavissat Nunani Avannarlerni atorneqartut
nalunnginnerusagut atorlugit ingerlanniarsimavavut.
Namminersornerulernerput inuit ilaasa
taasarpaat eqqissisimasumik mumisitsinertut, tamatumaniipporlu uagut qallunaat
oqartussaasuinut isumaqatigiissutigisatsitut nunatta ineriartornerani
nammineernerulluta akisussaajumanerput angugatsigu, sulilu taamaappoq.
Taamaammat uannut uatsinnullu nuannerpoq ilissi inuusuttut naapillusi
inuiaqatigiiussutsitsinni pissutsinik taakkulu nassatarisaanik tamanik uatsitut
taamanitulli soqutiginnilluinnartut.
Oqartoqartarpoq inuuneq
misigisassarsiorfiuvoq. Siulliullugu pingaarnerutillugulu imminut, qanig isanut
inuiaqatigiinnullu inuuffigisanut akisussaaffiginninneruvoq aammali
nammineerluta inuiaqatigiiuffigisatta avataaniittunik silarsuaqarpoq.
Immissinnut neriorsortariaqarpusi
silarsuaq nunatta avataaniittoq aamma misigisaqarfigiumallugu, taamaaliorneq
ilisimasassanik misilittakkanillu pissarsivigissavarsi, tamannalu ilissinnut
avatangiisissinnullu nuannaarutaalissaaq. Ilinniarluarnissaq inuttut
toqqammaveqarlualernissamut aqqutaasoq amerlasuujusugut isumaqarpugut.
Ilisimasaqarneq anersaakkullu toqqammaveqarneq ingiaqatigiittariaqarput.
Ulluni tullerni maani pisussat
pilersaaruttersi nuannaarlunga misissuataarsimavara. Nuannaarutigaara
ilinniartitaaneq oqallisiginiarassiuk, tamannami nunarsuarmi inummut
kimulluunniit piginnaasaqarfigissallugu pitsaanerpaammat. Pingaartitasi
siullersaralugu pingaarnersaraat aamma nuantsinni ilissi inuusuttut
naammassiniagassarsi. Taamaammat naggataatigut inuiaqatigiittut ingerlanitsinni
inuttut inuunissinnik suujunnaarsitsiniartut tamaasa akiortariaqarpasi.
Kinguaariipassuit ingerlanerisa
pinngortitami naakkitsaassinnaaqisumi allangorartumilu maani nunatsinni
inuunerput naleqqussarsimavarput. Taamaaliorsimavugut nunami kusanartumi
tassani inuuginnarsinnaajumalluta, pinngortitaammi nukingi
maniguuffigisariaqartup takutittuartarmatigu tamanna.
Imigassamik ikiaroornartumillu
hashimik ikiaroorniutinillu allanik atornerluineq avatangiiseraagut
inuiaqatigiinnullu aamma inuusuttunut ajornartorsiutinik pilersitsisartut.
Tamanna nalunngilluinnarparput, taamaammat ajornartorsiutit
millisinneqarnissaannut ikiuuttariaqarpusi aammalu tamatta peqqinnartumik,
sulilluarfiusumik pitsaasumillu angerlarsimaffeqarnissaq pitsaanerpaamik
tunngavileeqataaffigisariaqarparsi.
Kalaallit Nunaat tamatta
angerlarsimaffigaarput tamattalu maani inissaqartariaqarpugut.
Uummammit pisumik tikilluaqqoqqippassi
sulilluarnissassinnillu kissaallusi. Aamma nuannaarutigaara manna
oqaatigisinnaagakku ataatsimiittut tamarluinnangajammik tikimmata. Qaqrotormiut
ippassaq kingusinaalaaraluartut tikilluaqquagut aamma Ittoqqortoormiiniit
aggersoq takkuteriarpat tassa ataatsimiigiat inuusuttut Inatsisartui
tamarmiullutik ataatsimiilissapput.