Ullut ataatsimiiffiusut aappaat, pingasunngorneq 12. februar 2003, nal. 13:00

Oqaluuserisassani immikkoortoq C

(Ullumi ataatsimiiffiusumit siullrmiit oqaluuserisassap nanginnera)

Inuusuttut Inatsisartuisa 10.-14. februar 2003-mi ataatsimiinneranni ullormut oqaluuserisassat saqqummiunneqarneri. (Siunnersuutit ataatsimiititalianut innersuunneqarneri).

(Inuusuttut Inatsisartuisa Siulittaasoqarfiannit)

Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.

Jonathan Motzfeldt, Inatsisartut Silittaasuat, Siumut.

Ataatsimiinneq ammarpoq. Ullumikkut oqaluuserisassat aallartitsinnagit kingullermik saqqummiussassat maani oqaatigineqanngitsut ilaat kingulliit saqqummiunneqaqqaarallassapput tassa immikkoortoq 37, 18, 19, 24, 25 26, 27, 31 kiisalu aamma immikkoortoq 38. Taakkua quleqqutaat saqqummiunneqassapput. Siulliullugu qinnuigissavara Henriette Malakiassen saqqummeeqqullugu. Taassumalu saqqummeereernerata kingorna tullinnguutissaaq immikkortoq 18-i, taassuminngalu saqquummiissaaq Ânâ-Grethe Mathiasssen, taannalu piareersimassaaq tullinnguukkami.

Henriette Malakiassen, Isumaginninnermi Siunnersortinngorniat Ilinniarfiat, Nuuk

Meeqqat atuarfianni atoqatigiinnernut tunngasut ammanerusumik oqallissigisarnissaat aammalu timitta ineriartornerat malillugu ammanerusumik meerartatsinnut oqaloqatigiissutigisinnaanerunissaat pillugu apeqquteqaat aallavigalugu oqallinnissamik siunnersuut.

Jonathan Motzfeldt, Inatsisartut Siulittaasuat, Siumut.

Taavalu tullinnguuppoq Ânâ-Grethe Mathiassen, taassuma saqqummiussassai marluupput; immikkortut 18 aamma 19.