Oqaluuserisassani immikkoortoq 01-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aappaat,
pingasunngorneq 12. februar 2003, nal. 13:12
Ataatsimiinnermik aqutsisoq: Jonathan Motzfeldt, Inatsisartut
Siulittaasuat, Siumut.
Jonathan Motzfeldt, Inatsisartut Silittaasuat, Siumut.
Maannakkut oqaluuserisassani immikkortoq
1 tikippaarput; Meeqqat atuarfianni atuartsitinerup ukiumik ataatsimik
sivikkillineqarnissaa anguniarlugu Naalakkersuisut suliniuteqaqqullugit
peqquneqarnissaannik Inuusuttut Inatsisartuini aalajangiiffigisassatut
siunnersuut. Juliane Henningsen qinnuigissavara saqqummiusseqqullugu.
Juliane Henningsen, Avannaani
Ilinniarnertuuungorniarfik, Aasiaat.
Annertunerusumik ilinniartitsinerni
ukiuni kingullerni ilinniakkaminnik naammassinnittartut procentinngorlugit
ikissusiat ukiuni kingullermi assorsuaq maluginiarneqartarsimavoq.
Misissuinerit takutippat atuarfimmik qatsussisimaarneq taama amerlatigisut
maanaannaq soraartarnerannut pissutaasunut ilaasoq.
Meeqqat atuarfianni atuartitsinerup
sivikillineqarneratigut atuarfimmik qatsussisimaaneq pakkersimaarneqarsinnaavoq,
taamalu Ilinniarnertuunngorniat ilinniarfianni annertunerusumillu
ilinniagaqarfinni allani ilinniakkaminnik naammassinnittartut
amerlisarneqarnerannut aamma peqataasinnaalluni.
Tamatumunnga peqatigitillugu meeqqat
atuarfianni atuartitsinerup sivikillineqarneratigut ilinniartitsisut meeqqat
atuarfianni klassini anginerusuni atuartitsinermik pitsanngorsaanermut
atorneqarsinnaasut pissarsiarineqassagaluarput. Tamanna aamma annertunerusumik
ilinniagaqar‑finni ilinniakkaminnik naammassinnittartut
procentinngorlugit amerlanerulersinneqarnerannut peqataasinnaasorujussuuvoq.
Aamma klassit atuarfiusut
pissarsiarineqarsinnaalissapput, taamaalillunilu atuarfinnik allilerinissamik
pisariaqartitsineq annikinnerulaalissalluni.
Kiisalu ilinniakkaminnik
naammassinnissimasut massakkornit inuusunnerullutik suliffeqarnermut
attuumassuteqalersinnaappata tamanna inuiaqatigiit ataasiakkaallu
aningaasaqarniarnerannit isigalugu iluaqutaasussaavoq.
Jonathan Motzfeldt, Inatsisartut Siulittaasuat, Siumut.
Tamanna Naalakkersuisunit
akissuteqarfigineqassaaq. Poul Olsen takanna.
Poul Olsen, Naalakkersuisunut ilaasortaq, Siumup
Inuusuttai, Siumut.
Meeqqat atuarfiani atuartsisinerup
ukiumik ataatsimik siviskillineqarnissaanut tunngatillugu Naalakkersuisut
imaatumik oqaaseqassapput:
Malittarisassat atuuttut malillugit
ukiumi ataatsimi atualernissamut piareersarfik ukiunilu arfineq pingasuni
tunngaviusumik atuartitsineq, ukiuni marlunni ingerlaqqiffittut atuarnermik
tamatumalu kingorna ukiumi ataatsimi pikkorissaanermik nanginneqarsinnaasumik
atuartitsineq meeqqat atuarfianni ilaapput. Taamaalilluni atuartitsineq
pinngitsoorani ingerlanneqartussaq ukiunik qulingiluaannarnik
sivisussuseqarpoq.
Ilinniarnertuunngorniaraanili
ilinniartitsinermi ilinniartussatut tiguneqassagaanni malittarisassat atuuttut
malillugit piumasaqaataavoq ilinniagaqartup meeqqat atuarfianni kalaallisut,
danskisut, kisitsinermik/matematikkimik, tuluit oqaasiinik kiisalu
fysikkimik/kemimik annertusisamik soraarummeerluni misilitsissimanissaa.
Ukiuni qulingiluani pinngitsoorani
atuartussaatitaaneq inatsimmi Namminersornerullultik Oqartussat meeqqat
atuarfiannut tunngasuni malittarisassanik aalajangersaanissaannut
piginnaatitsisumi aalajangersarneqarsimavoq, tamannalu taamaallaat danskit
Folketingiannit allanngortinneqarsinnaavoq.
Meeqqat atuarfiat pillugu peqqussut
Inatsisartut 2002-mi akueraat. Peqqussutip taassuma 1. august 2003
aallarnerfigalugu atuutilersussap meeqqat atuarfiannik iluarsaaqqinnermi
sinaakkusiunneqartut pilersippai.
Iluarsaaqqinneq taanna
AAtuarfitsialammik atserneqarsimavoq. Meeqqat atuarfiat pillugu peqqussut
nutaaq atuutilerpat ukiuni qulini atuartitsisarneq eqqunneqasaaq, nukarlernut
ukiut pingasut, akullernut ukiut sisamat angajullernullu ukiut pingasut. Taamaattorli
atuartut peqqussutip nutaap atuutilernerani 7.-12. klassini atuartut
atuarnertik malittarisassat massakkut atuuttut malillugit inaarsassavaat.
Taamaalilluni ukioq atuartitsiviusoq 2006/2007-llu tassaassaaq ukioq
atuartitsiviusoq, 10. klassimik inaarsiffigineqartoq siulleq.
Meeqqat atuarfiannik
iluarsaaqqinnermi atuartut tamatumunnga piareersimasut ilinniarnerminnik
nangitsinissaminnut 10. klassimiilli periarfissinneqassanersut
misissorneqassaaq.
Nuummi misiligutaasumik ingerlatami
atuartut 10. klassimiit ilinniarnertuunngornianik ilinniartitsinermut
ikaarsaariarnerat ingerlanneqarpoq, tassanilu misilittagaalersut
pilersaarusiornermi ilanngunneqarniarput.
Ukiuni qulingiluani
atuartussaatitaaneq Namminersornerullutik Oqartussani oqartussaasunit allanngortinneqarsinnaanngimmat,
meeqqallu atuarfiat pillugu peqqussummi nutaami ilinniar‑nertuunngornianik
ilinniartitsinermut siusinnerusukkut ikaarsaariarnissamik kissaateqarnerup
akuersaarneqarnissaanut periarfissiisoqarmat Naalakkersuisut isumaqarput siunnersuutip
akuerineqarnissaata inassutigineqarnissaanut tunngavissaqanngitsoq.
Jonathan Motzfeldt, Inatsisartut Siulittaasuat, Siumut.
Tulliulluni oqaaseqartussaq
tassaavoq Tupaarnaq Binzer.
Tupaarnaq Binzer, Qeqqani Ilinniarnertuunngorniarfik,
Nuuk.
Kultureqarnermu Iliniartitaanermullu
Ataatsimiititaliami isumaqarpugut meeqqat atuarfianni atuartitsinerup ukiumik
ataatsimik siviskillineqarnissaa anguniarlugu siunnersuut assut
tapersersornartipparput, nuannaarutigalugulu Atuarfitsialak aaqqereersimagaat.
Ilanngukkusupparpullu
Naalakkersuisut aalajersimagaat aatsaat 2006-imi aallartittussatut, taannalu
uagut isumaqatiginngilarput.
Uagut isumaqarpugut atuartut
tamarmik periarfissaqarsinnaassasut aniaarnissaminnut. Imatullu
aaqqinneqarsinnaavoq: Nuummiinnaq misiliissanngitsut, Avannaani
Ilinniarnertuunngorniarfik, Aasiaat, HTX, HHX-imilu tamarmik - tassa inuusuttunut atuarfiit, taavalu
atuarfinni ilinniartitsisuninngaanniit ”egnethedserklæringimik” pisinnaassasut
10. klasseminngaanniit, taavalu soraarummeersinnaassasut 10. klassemiit.
Nammineq uanga 11. klassemi
atuarnikuunngilanga, taavalu misigaara amigaateqarnanga taavalu misigisaq
nuanneqaaq. Misisigisanut nuannersuinnarnut – taavalu taanna misilitaq
ajunngitsuinnarmik ingerlasimasoq. Tassa qujanaq.
Jonathan Motzfeldt, Inatsisartut Siulittaasuat, Siumut.
Allamik oqaaseqartoqarumanngilaq.
Taamaalilluni oqaluuserisassaq
taanna siullermeerneqarpoq, taamallu isikkoqarluni aappassaaneerneqarnissaminut
ingerlatinneqassaaq, taannalu pisinnagu aamma Atuartitaanermut
Ataatsimiititaliami suliarineqaqqaassaaq.