Oqaluuserisassani immikkoortoq 03-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aappaat,
pingasunngorneq 12. februar 2003, nal. 15:48
Ataatsimiinnermik aqutsisoq: Jonathan Motzfeldt, Inatsisartut
Siulittaasuat, Siumut.
Jonathan Motzfeldt, Inatsisartut Siulittaasuat, Siumut.
Tulliuppoq immikkoortoq 3, qatserisunngornianut
ilinniarfimmik Avannaani pilersitsinissaq a nguniarlugu Naalakkersuisut
suliniuteqaqqullugit peqquneqarnissaannik siunnersuut.
Siunnersuuteqarpoq Poul Olsen, qinnuigissavara
saqqummiusseqqulugu.
Poul Olsen, Naalakkersuisunut ilaasortaq, Siumup Inuusuttai,
Sisimiut.
Qujanaq, Kalaallit Nunaanni
qatserisartunngornianut ilinniarfituaq Nuummiippoq. Sineriak isorartoorsuuvoq,
qatserisartullu pikkjorissut pisariaqartinneqaqimmata ilinniartitsineq
pitsanngorsaqqinneqartariaqarpoq.
Kalaallit Nunaanni qatserisartunngorniat
ilinniarfiata marlunnut avinneqarnissaa siunnersuuti‑gaara.
Ilinniartitsinerup avinneqarnissaanut piffissanngorsimavoq, tamaaliornikkut kujataani
avannaanilu ilinniarfeqalersillugu. Taamaaliornikkut ilinniartut marloriaammik
amerlillugit agguataarneqarsinnaalissapput.
Qatserisartut pisortaannik ilinniartitsineq
ukiarmi Nuummi ingerlanneqarpoq, tassa funktioni. Ilinniartitsinermi tassani ilinniartut
18-it peqataapput, naak sinerissamit qinnuteqarsimagaluartut 38-usut.
Tamatuma takutippaa atuarfiup allineqarnissaa
pisariaqartinneqartoq, tassa imaappoq atuarfiup suli ataatsimik ilaneqarnissaa
pisariaqartoq.
Nuummili piorsarnissaa ajornakusuussaaq, Nuummi
inissaaleqineq pissutigalugu.
Nunatsinni nunakkut imaatigullu annaassiniarnerit
pisariaqartinneqartuartussaapput; qulaani siunnersuutikkut aqqartartunik
ilinniartitsineq aamma pimoorullugu ingerlanneqarsinnaalissaaq.
Aammattaaq suleqatigiit pisortassannik, tassa
holdlederinik, aningaasarpassuit atorlugit Qallunaat Nunaannut
ilinniartitsiatirtarit nunatsinnut nuunneqarsinnaalissapput.
Ilinniarfiit taakku illoqarfinni
angisuunittariaqarput. Nuum‑mi ilinniarfiup ilinniartut Maniitsumiit
kujammut kiisalu Tunumiit ilinniartut tigusassavai. Sisimiuni ilinniarfiup
ilinniartut Sisimiuniit avannamut tigusassavai.
Taamaaliornitsigullu aamma
piffissaqalerfigilissavagut allatigut annaasiniarnerit, soorlu takornariaqarnikkut
sullissisut assigisaallu annaasiniaqqaarnermut sungiusartinneqartalernissaat.
Qujanaq.
Jonathan Motzfeldt, Inatsisartut Siulittaasuat, Siumut.
Naalakkersuisut akissuteqaatissat Naja Stefani,
takassa.
Naja Stefani, Naalakkeruisunut ilaasortaq, Atassutip
Inuusuttai, Sisimiut.
Akissuteqaat:
Naalakkersuisut nassuerutigaat ukiut ingerlanerini
qatserisartut ilinniartinneqarsimasut amerlassusiat naammanngitsoq.
Tamatumunnga patsisaanerpaavoq Nuummi
qatserisartut ilinniarfianni ilinniartitsinissamut periarfissap
annikippallaarnera aningaasaliissutillu ikippallaarnerat patsisaanerunani.
Kommunit qatserisartoqarfiini ilinniartitaanerit
kinguaattoorfiusimanerannik misissuineq Ineqarnermut, Attaveqarnermut
Pilersuinermullu Pisortaqarfiup 2002-mi naammassivaa.
Ineqarnermut, Attaveqarnermut Pilersuinermullu
Pisortaqarfiup misissuinerata takutippaa ilinniartitaanikkut maanna
kinguaattoorutaasimasut angummaffiginiarnissaannut 8 mio. kr.-it missaat
pisariaqartinneqassasut, qatserisartut ilinniarsimasut qanoq piginnaaneqarnissaannik
pisortaqarfiup najoqqutassarititai maleruarneqassappata. Tamatuma saniatigut
misissuinerup aamma paasinarsisippaa najoqqutassarititaasut atuuttut
naapertorlugit qatserisartunik iliniartitsinerup ingerlanneqarneranut ukiumut
2,5 mio. kr.-it missaannik aningaasaliisoqartarnissaa pisariaqartinneqassasoq,
taakkulu ukiuni kingullerni tassunga aningaasaliunneqartunit 1,5 mio. kr.-it
missaannik amerlanerupput. Assersuutigalugu 2003-mi aningaasanut
inatsississamut qatserisartut ilinniartitaanissaannut 981.000 kr.-it
qinnutigineqarsimapput.
Pingaartuuvoq erseqqissassallugu
ilinniartitaanerit kinguaattoorfiunerat pitsaassutsimut, qatserisartut
ilinniarsimasut angusimasaannut attuumassuteqanngimmat. Ikuallattoqarnerani s
uliassanut ilinniartitaaneq, suleqatigiiaanik aqutsisutut ilinniartitaaneq
qatserinermilu pisortatut ilinniartitaaneq tamarmik ilinniartitaanerupput
tamakkiisumik akuerisaasut. Ilinniartitaanermi kinguaattoornermut peqqutaapput
kommuunini amerlanerpaani qatserisartunik naammattunik ilinniarittsisoqartarsimanngimmat.
Naalakkersuisut anguniarpaat suliassamut
pingaaruteqartumut tunngatillugu ilinniartitaanerit naammattumik
sulissutigineqarnissaasa qulakkeeriffigineqarnissaa, tassungalu atatillugu
Naalakkersuisut kommuunit qatserisartoqarfii pillugit piumasaqaataasa
illuatungaatigullu qatseirsartut pisariaqartutigut ilinniartitaanissaannut
Naalakkersuisut aningaasaliissutigisartagaasa imminnut
naapertuuttunngortinneqarnissaat.
Taamaattumik Ineqarnermut, Attaveqarnermut Pilersuinermullu
Pisortaqarfiup misissuisimanera qulaani eqqartorneqartoq tunuliaqutaralugu
Naalakkersuisut pilersaarutigaat qatserisartut ilinniartitaasarnissaasa ukiuni
aggersuni pilersaarusiorfigineqarnissaa. Ilinniartitaanerup kinguaattoorfiunera
kommuunini ataasiakkaani qatserisartoqarfinni sulisut qanoq
piginnaasaqarnerannut atatillugu paasiniaqqissaarneqassaaq,
taamaaliortoqareerpallu ilinniartitaanernut kinguaattoorutit
nungutsinneqarnissannut kiisalu qatserisartut ilinniartitaanerannut ukiumoortumik
aningaasaliissutaasartut iluarsiivigineqarnissaannut
siunnersuusiortoqassalluni. Siunnersuusiassaq taanna 2004-mut aningaasanut
inatsisissatut siunnersuusiassaannut ilanngunneqarumaarpoq.
Naalakkersuisut tamatumunnga atatillugu
nalilersoqqissaarniarpaat qatserisartut atuarfiannik aamma allamik
pilersitsinermi aatsaat anguneqarsinnaanersoq ilinniartitaanernut
kinguaattoorutit nungunneqarsinnaanerat. Naalakkersuisut misissuinerata
takussutississinnaappassuk ilinniartitaanernut kinguaattoorutit maannakkut periarfissaasut
atorlugit nungunneqarsinnaanngitsut, taava Naalakkersuisut eqqarsaatigissavaat
qatserisartut ilinniarfiannik aamma allamik pilersitsisoqarsinnaanera.
Taamaattorli qatserisartut ilinniarfissaannik
aamma allamik pilersitsineq sanaartornermut aamma ingerlatsinermut
aningaasartuutaassaaq, taakkulu ilinniartitaanernut kinguaattoorutit
nungunneqarsinnaanerannik naatsorsuinermi eqqaaneqareersuni
ilanngunneqanngillat.
Naalakkersuisut misissuinertik
naammasseqqaartinnagu Naalakkersuisut isumaqarput siunnersuutitut
saqqummiunneqartup tapersernissaanut tunngavissat naammanngitsut,
taamaattumillu inassutigalugu siunnersuutip atorunnaarsinneqarnissaa. Qujanaq.
Jonathan Motzfeldt, Inatsisartut Siulittaasuat, Siumut.
Maanna oqaaseqassaaq Âna-Grethe
Mathiassen.
Ânâ-Grethe Mathiassen, Perorsaanermik Ilinniarfik,
Ilulissat.
Uangaana Poul Olsenip siunnersuutaa
qatserisartut ilinniarfiata ilaqqinneqarnissannut tunngassuteqartoq –
illua’tungililaarusuppara, Sisimiuniissaguni pitsaavallaarnavianngitsoq
pillugu, pissutigalugu soorlu Iluissanut nuussagaluarutsigu ilaa, avaannaani
taava periarfissaqarnerussaaq pissutigalugu avannaani ukiukkut umiarsuaqarneq
ajorami, taavalu qaninnerusut taakku avannaanniittut
periarfissaqarnerulissagaluarput atuarfeqalissagaluarpat fagskolimik.
Taavalu aamma tulleriiaarinissami
eqqarsaatigeqqunarpoq qatsrisartunik taamatut ilinniarsimanngitsunik
ilinniartitsisoqarnissaq tulleriaarneqassappat Tunu aamma
eqqarsaatigineqaqqaartariaqartoq aamma Tunumi qatserisartut arlalissut
ilinniarnikuunngimmata.
Jonathan Motzfeldt, Inatsisartut Siulittaasuat, Siumut.
Allanik oqaasissaqartoqarpa?
Taamaanngippat aamma taanna
udvalginut ingerlasussaassaaq, tassa Nuna Iluani Ataqatigiiaarinermut
Ataatsimiititaliami suliassaq taanna ingerlateqqinneqassaaq
aappassaaneerneqartigani.