Oqaluuserisassani immikkoortoq 07-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aappaat,
pingasunngorneq 12. februar 2003 nal. 14:50
Ataatsimiinnermik aqutsisoq: Jonathan Motzfeldt, Inatsisartut
Siulittaasuat, Siumut.
Jonathan Motzfeldt, Inatsisartut Silittaasuat, Siumut.
Ataatsimiineq ingerlaqqippoq. Maannakkut tikipparput - Inuusuttut Inatsisartuini aalajangiiffigisassatut siunnersuut: Naalakkersuisut pisussaatinneqarput ilinniagaqartut ineqarnerannut immikkut tapiissutit atulesinneqarnissaat suliniutigissallugu, inimut akiliutit qaammammut kr. 1.700,-nik qaffasinnerugaangata. Siunnersuuteqartuusimapput Poul Olsen aamma Helene Egede. Taava saqqummiussisussaavoq Lars Kristian Jensen, takanna.
Lars Kristian Jensen, Sulisartut Hųjskoliat, Qaqortoq.
Uani immikkortoq 7-mi ima siunnersuuteqarpugut.
Una siunnesuut tapersorparput kisiannili ilinniartunut tamanut atuutsinnissaa
siunnesuutigallugu, tassani eqqarsaatialugu ilinniartut ataasiakkaat immikkoortitaasutut
misigitinnginnissaat pinerullugu. Soorlu boligsikringi atuutileqqinissaa
ilinniartunut tamanut. Qujanaq.
Jonathan Motzfeldt, Inatsisartut Siulittasuat, Siumut.
Tassa taanna kukkulaarparput kisianni siulliullugu
Helene Egede saqqummiussiteqqaarallassavarput, kisianni ajunngilaq akissutissaq
tusareerparaput. Kisianni saqqummiussap imarisaa maannakkut saqqummiunneqassaaq
Helene Egedemit.
Helene Egede, Perorsaanermik Ilinniarfik, Ilulissat.
Siunnersuutigaarput aalajangiisoqassasoq ilinniagaqartut nammineq inillit oqilisaanneqarnissaat. Ilaatigut tunngaviuvoq ilinniagaqartut atugarisaasa assigiinngitsuunerat.
Ilinniagaqartuugaanni ilaqutaqarlunilu inimilu ilinniarfimmit aqunneqartumi ineqaraanni ullu-mikkut qammammut 1.700 kr.-nik akiliuteqartitsisoqartarpoq. Akerlianik ilinniagaqartuugaanni namminerlu ineqarluni minnerpaamik marloriaammik akiliuteqartoqartarpoq. Taamaakkaluartoq ilinniagaqarnersiutinik qaffasinnerusumik tunineqartanngillat, naak pineqartut immaqa assigiimmik ilinniakkamik ingerlataqarluarlutik.
Taamaattumik pisariaqarluinnarpoq naapertuunerusumik aaqqissuussisoqarnissaa.
Jonathan Motzfeldt, Inatsisartut Siulittaasuat, Siumut.
Naalakkersuisuningaanniit akissuteqassaaq Arnatsiaq Larsen.
Arnatsiaq Larsen, Naalakkersuisunut ilaasortaq, Inuit Ataqatigiit, Nuuk.
Ilinniagaqartut ineeqqani inissianiluunniit ilinniartut ineqarfiinik aqutsisoqarfik aqqutiginagu innersuunneqarsimasuni najugartut ineqarnermut tapiissutisisinnaatitaapput, malittarisassat atuuttut malillugit.
Ineqarnermut tapiissutit inoqutigiit akileraaruteqataasussatut isertitaat tamarmiusut kiisalu inoqutigiinni meeqqat amerlassusiat tunngavigalugu tapiissutigineqartarput.
Ilinniagaqartut annertunerusunik ilinniarfinni ilinniartuusut ilinniagaqarnersiutit qaammammut 4.200 kr.-t tigusarpaat Ilinniarnertunngornianut Ilinniarfinni, FSA/FSUA-ni STI-milu ilinniartunut angerlarsimaffimminni najugaqartunut immikkut amerlassusiliussat atuupput. Taakku ukiumut 50.400 kr.-nik naleqarput. Ilinniagaqartut meerallit meeqqanut tapit meeqqamut ataatsimut naatsorsuullugit 758 kr.-iusut aamma tigusarpaat.
Ilinniagaqartoq meeraqanngitsoq ilinniagaqarnersiutimi, meeqqamut tapeqarsimappat taakku ilanngullugit, saniatigut inoqutigiinni allanik isertitaqanngitsoq ineqarnermut tapiissutinik ine-qarnermut akiliutit 78%-iinik tapiissutisisinnaatitaavoq, taamaattorli ukiumut amerlanerpaamik 60.000 kr.-nik.
Ilinniagaqartoq ataatsimik meeralik inoqutigiinnilu 59.496 kr.-nik isertitalik ineqarnermut akiliutit 77%-iinik tapiissutisisinnaatitaavoq, taamaattorli ukiumut amerlanerpaa‑mik 60.000 kr.-nik.
Ilinniagaqartoq marlunnik meeralik, inoqutigiinnilu 68.592 kr.-nik isertita‑lik ineqarnermut akiliutit 75%-iinik tapiissutisisinnaatitaavoq, taamaattorli ukiumut amerlaner‑paamik 60.000 kr.-nik.
Ilinniagaqartoq pingasunik meeralik inoqutigiinnilu 77.688 kr.-nik isertitalik ineqarnermut akliliutit 74%-iinik tapiissutisisinnaatitaavoq, taamaattorli ukiumut amerlanerpaamik 60.000 kr.-nik.
Ilinniagaqartoq sisamanik meeralik inoqutigiinnilu 86.784 kr.-nik isertitalik ineqarnermut akiliutit 72%-iinik tapiissutisisinnaatitaavoq, taamaattorli ukiumut amerlanerpaamik 60.000 kr.-nik.
Ineqarnermut tapiissutit ilaatigut inoqutigiit akileraaruteqaataasussatut isertitaat tamarmiusut tunngavigalugit tapiissutigineqartarmata ilinniagaqartoq katissimasaminik inooqatigisaminilluunniit aappaqartoq, akileraaruteqaataasussanillu isertitaqartoq pissutsit taamaannerat pissutigalugu ineqarnermut tapiissutinik ikinnerusunik pisinnaatitaasussaavoq. Taamaalillutik ilanngaatissat ilanngaatigereerlugit ineqarnermut akiliutit inoqutigiit isertitaasa amerlassusiannut naapertuuttuupput, tamannalu inuit akornanni naapertuilluiartumik agguataarisoqartarnissaanik kissaateqarnermut takussutissaavoq, tassa isertitaqqortunerit oqimaannerpaanik nammagassaqartinneqartariaqarlutik.
Ilinniagaqartoq ineqarnermut akiliutit 75%-iinik tapiissutisisinnaatitaasoq ineqarnermut qaam‑mammut 6.700 kr.-it missaannik taakk unanngaluunniit amerlanerusunik akiliisassaaq, ilinniaga‑qartumit ilinniartut ineqarfianni arlalinnik initalimmi najugaqartumit ilanngaatissat ilanngaatigeerlugit ineqarnermut amerlanerusunik akiliuteqartassaguni.
Tamakku tunngavigalugit Naalakkersuisut isumaqarput ilinniaqartunut, kisermaanut meerartalinnut meerartaqanngitsunullu, namminerisaminnik ineqartunut amerlanerusunik tapiissuteqartarnissaq pisariaqartinneqanngitsoq. Ilinniartulli ineqarfiini inissiamut arlinnik initalimmut akigitinneqartoq, inoqutigiit isertitaat apeqqutaatinnagu, aalajangersimasumik angissuseqartussatut 1.700 kr. aalajangersarneqarsimavoq.
Aki tamanna ilinniartut inaannut marlunnik initalimmut naleqquttuuvoq. Ilinniartulli ineqarfiini ilaqutariinnut inissannik amigaateqarup kingunerisaanik INI-mit imaluunniit inuinnarnik pigineqartunik inissianik attartorttoqartariaqartarpoq. Siunnersuuteqartorli ilumoorpoq oqarami aappariit, aappaa ilinniartuusoq aappaalu akissarsiarissaarluni suliffeqartuusoq, ilinniartut ineqarfiinik aqutsisoqarfik aqqutigalugu inissarsissusunneqarsimagunik nammineq attartugaralugu ineqarnermut sanilliullugu ilaatigut pitsaanerungaartumik inissisimasartut.
Taamatut assigiinngisitsineq tapiissutit aqqutigalugit atorunnaarsinneqarpat ilinniartunut aningaasaliissutit aappariinnut, ilinniartunut allanut sanilliullutik aningaasarissaarneroreersunut iluaqutissanngorlugit tulleriinnilersuiffigineqartalissapput..
Periarfissarli alla tassaavoq ilinniartut aappariit isertitaat malillugit ilinniartut inaanni immikkut pitsaassusilinni najugaqarnerini akiliisinneqartalerneri. Taamatulli aaqqiineq allaffissornikkut annertuumik aningaasartornerulernermik kinguneqassaaq.
Taamaattumik assigiimmik atugassaqartitserusunneq kiisalu inuit akornanni naapertuilluartumik agguataarisoqartarnissaanik kissaateqarneq ilinniartitaanerup iluani aningaasanik atorluaarusunnermut naleqqiunneqartariaqarput.
Naalakkersuisut oqallisigineqartussami oqallilluartoqarnissaa qilanaaraat.
Jonathan Motzfeldt, Inatsisartuni ilaasortaq, Siumut.
Allamik oqaaseqartoqarnianngila? Ānā-Grethe Mathiassen.
Ānā-Grethe Mathiassen, Perorsaanermik Ilinniarfik, Ilulissat.
Uanga tassunga 1.700,- koruunertarnermut taavalu illoqarfigisami soorlu najugaqartuulluni, soor lu assersuutigalugu Perorsaanermut Iliniarfimmi iliniartuuvunga aappar aamma ilinniartuuvoq, taava marluulluta iliniarnersiuteqarpugut illoqarfigisamilu najugaqartinneqarluta nammineq illugisatisnnik. Assersuusiorpunga tssani. Taava kolligiassaaleqineq peqqutinik kolligielejlighedinut inissinneqarsinnaanngilagut taavalu ajornakusoortorujusuulluni taakku tapiissutit pissarsiarinissai, pissutigalugu INI A/S-minnganniit kommuneminngaanniillu uterteqattaarneqartarput taaamatut tapiissutinik peqataarniartut sorliup kiap akisussaaffigineraa imatut ilisimaarineqarpallaarsimagunannginnami.
Taamaammat erseqqinnerusumik tamakkua malittarisassat ilinniarfinnut erseqqissaatigineqartariaqalersimassapput, taamatut pisinnaatitaaffeqarutta ilinniartuusugut. Qujanaq.
Jonathan Motzfeldt, Inatsisartut Siulittaasuat, Siumut.
Allamik oqaaseqarumasoqanngilaq apeqqummut tassunga tunngaillugu kisianni suliasaq taanna ingerlateqqinneqassaaq Inissaqarniarnermut Ataatsimiititaliamut aammalu uani oqaaserineartut ataatsimiititaliap oqaaserisai kiisali aatsaannguaq oqaaserineqartut malittarisassanik erseqqinnerusunik ilanngussassanik aamma nalunaarusiortoqarnissaanik noqqaasutit Ataatsimiititaliamutingerlateqqinneqarnissaat innersuussutigineqarpoq.