Oqaluuserisassani immikkoortoq 22-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut aappaat,
pingasunngorneq 12. februar 2003, nal. 13:35
Ataatsimiinnermi aqutsisoq: Inatsisartut Siulittaasuat, Jonathan Motzfeldt.
Jonathan Motzfeldt, Inatsisartut Siulittaasuat.
Tulliuppoq immikkoortoq 22.
Helene Egede, Ilulissani Perorsaanermik Ilinniarfik.
Tunngavilersuut:
Kalaalinngorsaanerup nalaaniippugut, taamaakkaluartorli ilinniarfippassuarni danskisut oqaatsit atorlugit ilinniartitsineq ingerlanneqartarpoq. Kalaallinik ilinniartitsisussaaleqineq nassuiaatissat ilagisinnaaneruvaat aammali atuartitsinermi atortussat kalaallisut pigineqannginnerat annertuumik pissutaaqataannguatsiarpoq.
Atuartitsinermi atortut kalaallisuunngukkat sooq saqqummersinneqarneq ajorpat? Taamaalior‑nikkut ilinniartut ilinniarnerat oqilissagaluarpoq.
Jonathan Motzfeldt, Inatsisartut Siulittaasuat, Siumut.
Tamatumunnga Naalakkersuisut sinnerlugit akissuteqassaaq Arnatsiaq Larsen.
Arnatsiaq Larsen, Naalakkersuisuni ilaasortaq, Inuit Ataqatigiit, Nuuk.
Naalakkersuisunut apeqquteqaat, atuartitsinermi atortussat kalaallisuunngortillugit sooq saqqummersinneqarneq ajorpat, aajuna akissuteqaaterput:
Naalakkersuisulli ajornartorsiut saqqummiunneqartoq equmaffigaat, atuakkallu atuartitsinermi atorneqartartut ineriartortinneqarnerat suli tapersersorusullugu.
Naalakkersuisut isumaqarput ilinniutit kalaallisoortut soorunami salliutinneqartariaqartariaqartut. Taamaammallu meeqqat atuarfianni, inuussutissarsiutinut ilinniarfinni kiisalu ilinniarfinni qaffasinnerusuni atuakkat kalaallisuut arlallit suliarineqartareerput.
Taamaakkaluartoq atuakkat kalaallisoortut suli amerlaqisunit amigaatigineqarput. Tassunga atatillugu isiginiarneqartariaqarpoq ilinniusiornerup killeqarneranut aningaasat kisimik killiliisuunngimmata. Ilinniusiorneq piffisamik sivisoorsuarmik ingerlanneqartarpoq kiisalu atuakkiortut perorsaanermik ilisimasaqartut pisariaqartinneqarlutik. Ilinniutit ilaatigut ajornaquteqanngitsumik, imaallu allanngortinnagit, kalaallisuunngortinneqarsinnaapput. Atuakkalli ilinniutit kalaallisut oqaasertallit nunatsinni atukkatsinnut naleqqussakkat suliarineqassappata nukiit amerlanerusut pisariaqartinneqarput, tamatumanilu nassuerutigisariaqarparput kalaallit ilinniusiorsinnaasut piginnaanillit naammattut pissarsiarinissaat ajornartorsiutaammat.
Ilinniutinik kalaallisut allassimasunik atuinissap kalaallinik ilinniartitsisussaqarsinnaaneq pisariaqartippaa. Tamannalu tamatigut naammassineqarsinnaaneq ajorpoq.
Tamatumanilu aamma eqqaamaneqartariaqarpoq ilinniarfinni qaffasinnerusuni ilinnialissagaanni ilinniarnertuutut angusisimanissaq piumasarineqartarmat taamalu marluinnik oqaaseqarnissaq naatsorsuutigineqartariaqarluni.
Naalakkersuisut ajornartorsiummut eqqartorneqartumut pissutsit saqqummiunneqartut tunngasut eqqumaffigaat, siunissamilu kalaallisut ilinniartitsissutinik sanaartorluni suliniutit tapersersorusullugit. Naalakkersuisut Aningaasaateqarfiit iluaqutigalugit kalaallisut ilinniusianik saqqummeersitsisinnaanermik periarfissaqarnera ilisimatitsissutigerusuppaat.
Jonathan Motzfeldt, Inatsisartut Siulittaasuat, Siumut.
Tassa apeqquteqaat akissullu.
Apeqquteqartoq aperissavara ilassutissaqarnersoq?
Taamaanngilaq.