Oqaluuserisassani immokkoortoq 23-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders Andreassen, Inatsisartut Siulittaasuat.
Mikael Petersen, Isumaginninnermut, Suliffeqarnermut, Pisortallu Suliassaqarfiutaannut Naalakkersuisoq:
Nukissamik pilersuineq pillugu Inatsisartut peqqussutissaattut siunersuut oqaaseqaatitalik, Inatsisartunut agguaanneqarsimavoq. Nukissamik pilersuinerup inuiaqatigiit aningaasaqarneratigut akilersinnaanerpaap, avatangiisinullu pitsaanerpaap siuarsarnissaa, kiisalu nukissat ataavartut annerusumik atorneqalernissaat siunertaralugu, inuiaqatigiit uuliamut pituttorsimavallaarnerata annikillisinneqarnissaa peqqussutikkut siunertarineqarpoq.
Pernaataasumik nunami maani nukissamik pilersuineq pillugu pingaarnerusutigut killissarititassiortoqarpoq. Tamatumunnga pissutaavoq, nukissaqarniarnermut tunngasut malittarisassiuunneqarnissaannut tunngavissaviit aalajangerneqarnissaat nassuiarneqarnissaallu pisariaqartinneqa-raluttuinnarmat. Inatsisini ullumikkut atuuttuni amerlasoorpassuit nukimmik piortorfiit, sulif-feqarfiit nukissiortut, aammalu nukissamik pilersuinerup aqunnissaanut periarfissat malittarisassaqartinneqarnerannut tunngassuteqarput. Inatsisit ullumikkut atuuttut suliassat suliassaqarfiillu Naalagaaffimmit tigooqqarneqarnerat ilutigalugu ilusilersorneqartarput, akuersissutigineqartarlutillu. Nukissaqarniarnermut tunngassuteqartut naalakkersuinikkut malittarisassiuussinnaajumallugit, aammalu teknikkikkut ineriartorneq siuarsarniarlugu nukittunerusunik tunngaveqarnissap pisariaqartinneqariartuinnarnissaa naatsorsuutigineqarpoq. Taamaammat Naalakkersuisut nukis-saqarniarnikkut ingerlatsinermi anguniakkat, aammalu pilersaarusiornikkut oqartussatullu suliassat pingaarnerusut, ataatsimut tunngavissaqartilerniarlugit suliniuteqarsimapput.
Peqqussutissatut siunnersuusiornikkut, nukissamik pilersuinerup teknikkikkut annertusaanernut aningaasaqarnikkullu pilersaarusiornermut allanut ilanngullugu ataatsimut aaqqissuussivigineqarsinnaanngornissaa siunertarineqarpoq. Kiisalu suliffeqarfiit, nukissamik pilersuisut, anguniagaasa naleqquttumik tunngavissiorneqarnissaat, taakkununngalu killissarititaasut nassuiarneqarnissaat peqqusutikkut ilanngullugu anguniarneqarpoq. Atuisut innaallagissamik, uuliamik kiassarnermillu naammaginartumik pilersorneqarnissaminnut periarfissaqarnissaat, qularnaarniarlugu nukissaqarniarnerup malittarisassaqartinneqarneranut ataatsimut atugassaqartitsisoqarnissaa, aamma anguniagaavoq pingaaruteqartoq.
Nukissanut ataavartunut - erngup, seqerngup, anorillu nukinganut - soqutiginninnerujussuaq, aamma nukissaqarniarnikkut allaasunik suliassaqarfiulerpoq. Naalakkersuisut siunnersuutikkut tassuuna ineriartornermut malinnaajuarnissartik kissaatigaat. Teknologiip nutaap tiguneqarnissaannut eqqunneqarnissaanullu, aammalu nukissamik pilersuinerup annertunerpaaffiani, nukissaqarfiit ataavartut ilanngullugit atorneqalernissaannut, naalakkersuinikkut malittarisassaqartitsisinnaanissaq Naalakkersuisut anguniarpaat.
Suliffeqarfippassuit nukissamik pilersuisuusut peqqussummi eqqartorneqarput. Pingaartumik kiassaanikkut peqataasorpassuaqarpoq. Innaallagissamik pilersuinermi peqataasut ikinnerupput. Suliffeqarfik ataasiinnaq uuliamik eqqussuisuuvoq, amerlaqaalli atuisunut uuliamik siammarterisartut.
Taamaalilluni nukissaqarniarnermut tunngassuteqartuni pineqarpoq, pilersuineq amerlaqisunik killilersugaanngitsunik atuuffeqartoq. Peqatigisaanillu suliffeqarfiit ingerlatseqatigiiffiillu ilaat, inoqarfinnik pilersuinissaminnik annertoqisumik pisussaaffilerneqarsimapput. Peqqussutissatut siunnersuutikkut, Naalakkersuisut pissutsit qanoq issusiat allanngortissanngilaat, qularnaassalluguli atuisut, sanaartortitsisut suliffeqarfiillu pilersuisuusut, siunissami ajornannginnerusumik suleqatigiinnissaat.
Nunatta pissusaa inoqarfeerarpassuaqarneralu pissutigalugit nukissamik pilersuinerup ilisarnaatigisarpaa, illoqarfinni nunaqarfinnilu immikkut ingerlatsisoqartariaqartarnera - tassa qeqertarmiusut pissuseqapajaarpugut. Aningaasat periutsilluunniit suli illoqarfiit nunaqarfiillu akornanni, ataqatigiissumik pilersuisitsilersinnaanngillat. Innaallagissat aqqutaat ingerlatsisinnaaqisut ineriartortinneqaraluarpummi, sulili ukiut arlalippassuussagunarput innaallagissap aqqutaasa taamaattut nalinginnarineqalernissaannut, imaluunniit aningaasatigut nammanneqarsinaasumik akeqalernissaannut.
Inoqarfinni nukissamik pilersuinerup annertusarneqarneranut iluaqutaasumik pilersaarusiortarnerup nukittorsarneqarnissaa, Naalakkersuisut kissatigaat. Pilersaarusiornikkut siunissami qaninnerusumi ungasinnerusumilu, allaat ukiut 30-t 50-illu siumut, annertusaanermut nutaanngorsaanermullu killissarititaliortoqassaaq.
Naalakkersuisut isumaqarput paasissutissat kisitsisillu tutsuiginartut pitsaasullu tunngavigalugit, nukissaqarniarnikkut pilersaarusiortoqartassasoq. Nukissaqarniarnermut tunngasuni ukiorpassuarni aningaasatigut nunamut pingaaruteqarsinnaasunik atortunut siammarterinermilu atortunut aningaasaliinissamik annertusaanissamillu aalajangiisoqartarpoq. Assersuutigalugu erngup nukinganut aningaasaliinerit sivisoorujussuarmik imminnut akilerniarsarisarput.
Siunissami atuinerup missingerniarnerata ajornakusoortorujussuusinnaanera pissutigalugu, aningaasaqarnikkut misissueqqissaarnerit naatsorsuinerillu peeqissaarluinnartumik tutsuiginartumillu suliarineqartariaqarput.
Atuisut inuussutissarsiortullu aningaasartuutikinnerulernissaat Naalakkersuisut anguniagaraat. Kisiannili assersuutigalugu aalisarnermi, angallassinermi allanilu nukissamik atuinivik pillugu paasissutissat pigineqanngimmata, nukissaqarniarnerup siunertanik qanoq naammassinnitsiginera oqaatigiuminaattarpoq. Peequssutissatut siunnersuut aqqutigalugu suliffeqarfiup pilersaarusiortussaatitaasup, Naalakkersuisut aalajangernerisigut pilersaarusiornermi atugassanik paasissutissanik kisitsisinillu pissarsiniartarnissaa tungavissaqalerpoq. Tamatuma kingunerisaanik atuinerup qanoq issusianik ilisimasaqarnerulissaagut. Taamaalilluni nukissaqarniarnikkut sipaarniarnerit inuussutissarsiutinut, atuisunut sanaartukkanulluunniit sipaarfissaqqissunut sammitinneqarsinnaanerulerput.
Kiassarnermut sinnerussamik pilersitsiortornerup naammattumik atorneqartannginnerata ajornartorsiutaanera, Naalakkersuisut eqqumaffigilluinnarpaat. Ungasissumit kiassaanermut aningaasartuutinik naatsorsuinermi ingerlatsinermi aningaasartuutit, aammalu ernialiinermut nalikilliliinermullu aningaasartuutit tamarmik ilanngunneqartarput, kisiannili inissiarsuarnik kiassaanermi suliffeqarfiillu namminneq kiassarneranni, erniat akilersuutillu ilaatinneqakkajunngillat. Taamaaliornikkut ungasissumit kiassaaneq atuisut aingaasaqarnerannit isigalugu kajungernarsisinnaangilaq. Kisiannili ungasissumit kiassaaneq inuiaqatigiit aningaasaqarnerannit isigalugu pitsaanerpaavoq, tassami ilaatigut uulia innaallagissiornermut atorneqartarmat kiassaanermullu atorqqinneqartarluni. Assortorneqarsinnaanngilaq uuliap atorluarneqarnerpaaffia atorluarneqannginneraniit pitsaanerummat, uuliami tamarmi avataanit eqqussorneqartarpoq. Kiassaanerup nukissamik atorluaaffiunerpaap pissarsinarnerpaallu siuarsarnissaa, Naalakkaersuisut kissaatigaat, taamaammallu Naalakkersuisut kiaap sinnerussap maangaannartinneqartarnera unitsinniarpaat.
Taama oqaaseqarlunga nukissamik pilersuineq pillugu Inatsisartut peqqussutissaattut siunnersuut Inatsisartunut oqaluuserisassanngortippara, siunnersuutigissavaralu siunnersuut Inatsiartuni aappassaaneerneqartinnagu Nukissaqarnermut, Nalunaarasuartaatitigullu Attaveqarnermut Ataatsimiititaliamut suliassanngortinneqassasoq.
Ruth Heilmann, Siumup oqaaseqartua:
Siumumit nuannaarutigaarput,
Naalakkersuisut Nukissiuutit pillugit Inatsisartut peqqussutissaattut
siunnersuut ersarissoq suliarilluagaasorlu, maannakkut inatsisartunut
isummersorfigeqqullugu saqqummiumassuk.
Naalakkersuisut nukissiuutinut
tunngatillugu anguniagaat arlalissuit saqqummiunneqartut, Siumumit sakkortuumik
taperserniarpavut. Nukissamik pilersuineq inuiaqatigiit aningaasaqarnerannut
naapertuunnerpaaq, avatangiisinullu ajunnginnerpaasussaq, taamalu uuliamik
isumalluuteqarnerup annikillisarneqarnissaa peqqussummi siunnerfiit
ilagisaattut oqaatigineqartoq, Siumumit isumaqatigilluinarparput.
Ullumikkummi nukissanik pilersuinerup
aaqqissuunneqarnissaa pisariaqalivissimasoq tamatta nalunngilereerunaqaarput.
Tamassumallu pisariaqassusiata ersernerisa ilaat, qanittukkut Sisimiuni
misigisaasoq tujorminartoq tamatta annilaarutigisimaqaarput, tassa ullualuit
inissiat amerlanerpaat qaminngasariaqarlersimanerat, aammalu suliffeqarfiit
suliffissuullu unittoortitaaneranik kinguneqartoq imaannaanngitsorujussuuvoq.
Tamanna misigisaasoq qinikkatut
oqarutussaaqataalluni, allat taamaaqataanik siunissami
mi-sigisaqartannginnissaannik sammivilimmik suliniuteqarnissamik,
sillimaniarnissamillu anguniagaqarnissamik tamatsinnut kaammattuiffiuvoq.
Ataasinngormat Nukissiuutinut
Naalakkersuisup Naalakkersuisut sinnerlugit nassuiaataa tigusimasarput,
pisimasumut paasissutaasoq nukissiuutinik eqqartuinitsinnut naapertuummat,
iluatsillugu qujassutigissavarput.
Taannaannaanngilarlu misigisaasoq,
ulluinnarnimi taamaaqataanik ilaqutariit ataasiakkaat, aamma namminneq
illuuteqartut kissarsuutiminnik, innaallagiaqarfimminnik, imermik attaveqarnerminnik
ajutoortarnerat nalinginnaasuusarpoq, ilaanni ilaqutariinnut inuuniarnikkut
artukkiisumik allaat kinguneqarsinnaasartoq, pingaartumik ukiukkut
issileruttornerani taamatut misigiffiusuni.
Tassuunakkut paasinarluinnarpoq qanoq
ulluinnarni inuuniarnitsinnut nukissiuutinik pisariaqartitsinitta
annertulluinnartigissusia uppernarsineqartuartarmat. Najugaqarpugummi nunarsuup
avannaarpiarsuani issittumik qiianartumillu silaannaqartumi.
Eqqarsaatigilerlugulu tupinnaqaaq siulitta inuuniallaqqilluinassusiat, issunik
ujaqqanillu qarmalinnik oqorsarluakkanik illoqarlutik, amiinnarnik
atisaqarlutik orsuinnarmillu ikummateqarlutik, taamaattoq kiagualaarlutik
nuannaarlutillu ukiorpassuarni taamatut nunatsinni inuunertik
atortuarsimavaat.
Ullutsinnilu allaalluinnarpoq
inuiaqatigiinngorsimavugut nunarsuarmioqatitsinnut attaveqaliinnarnata
attaveqarnissamik pisariaqartitsisut, inuiannut atugartuunngorsimasunut
malinnaaniarluta peqataaniarlutalu aalajangersimasut. Tamanna inuiaqatigiit
kalaaliusugut isumaginiarparput pitsaanerpaamillu angusaqarnissarput siunertaralugu
siunnerfigalugulu ingerlanissarput peqatigiilluta allorissaarfiginiarlugu
suliniarnerput nuannersumik sakkortuumilu ingerlatileruttorparput.
Ukiullu makku ineriartornermi
killiffigisavut kingumut qiviarluni pissusiusut nalilersoqqinnissaannik piffissanngorpoq,
tamannalu Naalakkersuisut aamma paasilluarlugu Nukissiuutitigut ullumikkut
killiffiusoq naliliiffigaat, qanorlu ingerlaqqinnissami nalimmassaaniarnerminni
nassuiaataat Siumumit iluarisimaarluinnarparput.
Naalakkersuisut anguniarpaat nukissaqarniarnermi
ataatsimoortumik malittarisassaliorneq, teknikkikkut annertusaanermik
ilaqartinneqartoq. Nunarput tamaat nunaqarfinnilu nukissiuutitgut
pilersaarusiorneq sukumiisoq ingerlanneqartussanngorpoq, allaat ukiut 30-t
sinneqalugit siumut pilersaarutinik nutaanngorsaanernillu ilaqartinneqartussaq.
Nukissiuutitigut atuinitta
akilersinnaasumik ingerlanneqarnissaa sipaarniarfiusumillu ingerla-lernissaa
anguniarlugu INI-p aamma suliniutigiligai, qaammarsaanerit aqqutigalugit
meeqqanit paasisitsiniutigineqalernerat nuannaarutigaavut.
Taamalu najugaqartut peqatigiiffiisa IPK
aqqutigalugu pikkorissaanikkut nukissamik sipaaruteqarsinnaanermik
suliniuteqarnerit aallartinneqareersut, ignerlanneqartuarnissaat Siumumit
kaammattuutigerusuppavut.
Minnerunngitsumillu ullumikkut
illuliortartut inissialiortartullu sannarlutaanngitsunik oqorsarluakkanillu
sanaartornissaat isumagiuarniartariaqarpavut, kingunissamut tamatsinnut
isumannaannerpaallunilu akikinnerpaasussaammat, taamaammallu Naalakkersuisut
namminneq illuutiminnut inissiarsuarnilu oqorsaanissamut suliniuteqarlutillu
periarfissiiniarnerat, iluarisimaarnarlunilu tapersersornartuuvoq.
Nukissiorfiit ilaasa kiammik sinnerussamik
atorluaaniarnertik ajornartorsiutigigaat, aamma Inatsisartuni ilisimavarput,
aammalu akigitinneqartartut annertuallaarnerat pillugu ingerlatsiviit ilaat
namminerisaminnik kiassaatilersortalerput, akiliutigisartakkaminnik
millisaaniarlutik. Taamaattumik akilersinnaasumik atorluaasumillu
Naalakkersiusut misissuititsillutillu anguniagaqarnerat, taamalu kiaap
sinneruttup maangaannartinneqartarneranik unititsisussamik iliuuseqarumanerat
Siumumit qilanaareqaarput.
Siumumit innaallagissap akiinik
apparsaajuarnissamik suliniuteqarneq tamakkiisumik tapersersortuagaraarput.
Naalakkersuisut uuliamik isumalluuteqarnerup millisikkiartuaartinneqarnissaa
anguniarlugu soorlu seqerngup, erngup anorillu nukinginik atuinermik
siuarsaanerit eqqumaffigilluinnarnissaannik suliniutaat, aamma Siumup
tungaanit kaammattuiqataaffigaavut. Eqqaaveqarfiliortarnertigut kiammik
atorluaanermik siunertaqartinneqartumik ilaqarnissaa iluatinnaateqartutut
aamma isumaqarfigisarput, inassutigissavarput atorluarniaqqullugu.
Kiisalu akigititatigut Naalakkersuisut
Inatsisartullu eqaannerusumik aaqqiisarnissamillu aalaja-ngersaasalernissaat,
aamma siuariaallannertut isigalugu maluginiarsimasatsinnut ilaammat
iluarisimaarparput. Siunissami isumalluarnartoqarmat tassuunakkut suli
innaallagissap erngullu akikillinerunissaannik angusaqartoqarsinnaasoq takorloorsinnaagatsigu.
Nukissiuutit pillugit eqqartuinermi
eqqaanngitsoorsinnaanngilarput, massakkorpiaq siunissamilu sullissisunik aamma
pisariaqartitsinerput annertuujummat. Taamaattumik Naalakkersuisunut
kaammattuugissallugu naleqquttuuvoq, nunatsinni sulisussanik ilinniartitsinerit
pikkorissaanerillu annertuumik suliniutigeqqullugit, minnerunngitsumik
nunaqarfinni ilinniarsimasunik aamma sulisoqarnissaq
qularnaariffigisariaqarmat.
Pitsaasumik sullississagaanni ilinniarluarsimanissaq
pikkorissuunissarlu ullutsinni sutigut tamatigut pisariaqarluinnartuusoq
eqqaasitsissutigiuartariaqarparput, tamannalu inuiaqatitsinnut
nammineerusussuseqartunut kaammattuutigiuassallugu pissusissamisoortuuvoq.
Teknikkikkut nutaamik pitsaasumillu
aqutseriaaseqarnikkut, eqaatsumik sullissinissap aqqutissaanerata
pisariaqartuunera, Siumumit arajutsisimanngilarput, taamaattumik
Naalakkersuisut teknologi atorlugu nutarsaaniarnermik suliniuteqarniartuarnerat
aamma Siumup ilalernartuutilluinnarpaa.
Peqqussummi anguniagaavortaaq,
Naalakkersuisut nukissanik atuinermi ingerlaaseqarnermik ukioq allortarlugu
Inatsisartunut nassuiaateqartalernissaat. Tassungalu atatillugu nukissiuuteqarnikkut
ineriartorneq, ilisamatusarnerullu ingerlaneranik annertunerusumillu
kisitsisinik paasissutissanik ataavartumik ilisimatinneqarlutalu,
malittarinninnissarput pingaarteqisarput piviusun-ngortinneqartussangortoq
Siumumit nuannaarutigaarput.
Taama oqaaseqarluta Siumumit inatsisissap
siullermeerneqarnera akuersaarparput, ataatsimiititaliamilu
suliareqqinneqarnissaa inassutigalugu.
Finn Karlsen, Atassutip oqaaseqartua:
Nukissamik pilersuineq pillugu
Inatsisartut peqqussutissaanut siunersuut, Naalakkersuisumit
saqqummiunneqartoq, Atassummi sukumiisumik misissoreerlugu, imattumik naatsumik
oqaaseqassaagut.
Peqqussutissap siunertaa, nukissamik
pilersuinermi inuiaqatigiinnut akilersinnaanerpaaq, aammalu avangiisit
eqqarsaatigalugit mingutsitsinnginnerpaaq, soqutiginarpoq tapersersornarlunilu.
Taamatut peqqussusiorneq Atassutip
politikkikkut anguniagaanut naleqqulluinnartuummat iluarisimaarluinnarparput.
Atassutimmi anguniagaraa, nunatsinni
uuliamik atuisariaqarnerujussuatta millisarneqarnissaa, tassungalu taarsiullugu
erngup nukinganik atuinerujartuinnarnissarput, tamatumani aningaasatigut
periarfissavut aallaavigalugit. Tamannami aamma namminersortunit, imaluunniit
nunanit allamiunit aningaasaliiffigiumaneqarneruvoq imminullu
akilersinnaanerpaalluni.
Naalakkersuisunit oqaatigineqartoq eqqorpoq,
tassalu nunatta isorartunerujussuata inoqarfippassuaqarneratalu, nukisssamik
pilersuinermi illoqarfinni nunaqarfinnilu immikkut
ingerlatsiso-qartariaqartarnera pinngitsoorneqarsinnaanngitsoq
nalunnginnatsigu.
Taamaattumik ullumikkut politikkikkut
anguniagassap, tassalu erngup nukinga atorlugu nukissiorfinnik
pilersitsiortorniarnerup pimooruttuaannarnissaa Atassummit inassutigaarput.
Soorlu Kujataani, Qorlortorsuarmi, erngup
nukissiorfeqalernissaata pilersaarutit malillugit Kujataa tamakkingajavillugu
pilersulersinnaagaa. Taamaattumik nunap immikkoortuini allani, erngup
nukiliorfinnik illoqarfinnut nunaqarfinnullu pilersuisinnaasunik
nassarniartuartoqarnissaa, Atassummit inassutigaarput, taamaalilluni aatsaat
nunatsinni uuliamik atuinerujussuup malunnaateqarluartumik
appartinneqarsinnaneranik kinguneqarsinnaammat. Tamatumalu ki-ngunerissavaa,
pingaartumik namminersorlutik inuussutissarsiuteqartut aningaasarsiornerinut,
annertuumik iluaqusiisussaanera, aammalu suliffinnik nutaanik aallartitsiniarnissamut
annertuumik periarfissiisussaapput, nunamut tamarmut iluaqutaasussamik.
Seqerngup anorillu nukingi atorlugit
iluaquteqarniarsinnaanerup pimoorullugu misissuiffineqartuarnissaa, Atassummit
piumasaraarput, tamakkumi nunani allani atorneqaleriartuinnarnerat
ilisimagatsigu.
Erngup nukinganik nukissiorfeqalernikkut
nukiit sipporussat atorluarumallugit, kiassarnermut atorluarneqartarnissaat
eqqumaffigeqquarput, soorlu taamatut atuisoqartoq Nuummi, taamaalilluni
uuliamik atuinerput millisarneqassaaq mingutsitsinerlu millisarneqassalluni.
Nukissamik nutaamik pilersuinerup
annertusarneranut ukiorpaalussuit atortariaqarnerat naatsorsuutigisariaqarparput,
soorunalumi aamma tamatumani aningaasat apeqqutaasussaammata.
Naalakkersuisunut ilaasortaq Atassummit
isumaqatigaarput, paasissutissat kisitsisillu tutsuiginartut pitsaasullu
tunngavigalugit nukissaqarniarnikkut pilersaarusiortoqartassasoq.
Taamatut oqaaseqarluta, nukissamik
pilersuineq pillugu Inatsisartut peqqussutissaattut siunnersuut, Atassummit
tamakkiisumik taperserparput, aappassaaneerneqartinnanilu Nukissiuuteqarnermut
Nalunaarasuartaatitigullu Ataaveqarnermut Ataatsimiititaliami
sammineqaqqaarnissaa inassutigalugu.
Manasse Berthelsen, Inuit Ataqatigiit oqaaseqartuat:
Nukissamik pilersuineq pillugu
peqqussutissatut siunnersuut Inuit Ataqatigiinit soqutigalugu
qimerluuataarsimavarput, ukulu oqaatigissallugit.
Peequssutissatut siunnersuummi 25-nik
paragraf-ilimmi Naalakkersuisut pissutsinut assigiinngitsunut 30-t sinnilinnut
aalajangiisinnaapput malittarisassaliorlutillu.
Peqqussutip siunnersuutigineqartup
atortinneqarniarnera ersernerluppallaartutut isigalugu, Inuit Ataqatigiinit
oqaatigissavarput, erseqqissumik suut nukissamik pilersuinermi malittarineqassanersut,
suullu piumasaqaataanersut ilanngunneqarsimasussaagaluarmata.
Assersuutigiinnassavarput ' 4-mi, imm. 3: ANukissiorfiit
aqunneqarnerat aaqqissuussaanerallu aamma suliffeqarfiup Naalakkersuisullu
akornanni pissutsit pillugit Naalakkersuisut malittarisassiortassapput@.
Sooq Nukissiorfinnut atugassaritinneqartut
erseqqissumik maani saqqummiunniarneqanngillat
isumaqatigiinniutigineqarlutillu?
Peqqussutissatut siunnersuummi aammattaaq
allassimavoq, Naalakkersuisut piorsaanernut piumasaqaatinik
killissarititaasussanillu aalajangiisassassut. Sunaana aalajangerneqassasoq?
Pisinnaasarpummi tamaat
innaallagissiorfiit, erngup aqqutaasa iluarsarneqartarnissaat annertusarnissaallu
ingerlattariaqarpavut. Qaavatigullu Nukissiorfiit ' 12-imi illoqarfinni nunaqarfinnilu pitsaasumik
naammattumillu innaallagissamik kiammillu pilersuinissamut pisussaatitaapput.
Inatsisitaanut naggataatigut Inuit
Ataqatigiinnit piumasarissavarput, Inatsisartut malinnaatinneqartuarnissaat
siunertaralugu Naalakkersuisut nalunaarusioraangamik, Inatsisartuni
Nukissiornermut Nalunaarasuartaatitigullu Attaveqarnermut Ataatsimiititaliaq
pinngitsooratik tusarniaqqaartassagaat.
Inuit Ataqatigiit siunertat kusanartut
siuliani taasat isumaqatigilluinnarpaat, innersuussutigis-sallugulu 1995-imi
april-imi saqqummersinneqarsimasoq nukissiuutit pillugit iliuusissatut
innersuutigineqarsimasoq, unalu peqqussutissatut siunnersuut
piviusunngortitsiniarnermut takussutissatut isigalutigu.
Inuit Ataqatigiinni iluarisimaarparput,
ukioq ataaseq allortarlugu nukissiuutit pillugit nassuiaammik
saqqummertoqartalissammat, kiisalu paasissutissanik kisitsisinik
assigiinngitsunik saqqummiussisarnissat, ilisamatusarnikkummi nukissiornerup
malinnaviginissaa pingaaruteqarpoq, ineriartorneq siunertalimmik
ingerlanneqassappat. Naalakkersuisummi saqqummiinermini oqaatigaa aalisarnermi,
angallassinermi allanilu nukimmik atuinivik qanoq annertutigisoq pillugu
paasissutissanik peqartoqannngitsoq.
Ullumikkut nunarsuaq tamakkerlugu
ilisimatuut ilungersorput, uuliaanngitsumik nukissiornissamik
ineriartortitsinermik, maannamullu ineritissimasaat nunatsinit
malinnaaffiginissaat pisariaqarluinnarpoq. Suliassaavorlu ilisimatuut
paasisaat nunatsinnut naleqqussarlugit ineriartortin-neqartariaqartut,
siunertaralugu siunissami atorneqalersinnaanerat. Tassani eqqarsaatigaavut,
seqerngup qinngorneri nukimmik pilersitsisinnaanerat ineriartorneq malillugu
alliartuinnartoq malinnaaffigineqarnissaa. Uuliamimmi atuiffiunngitsut
atuleriartuinnarpavut, soorlu erngup nukinga, eqqakkallu ikuallannerisigut
kiammik pilersuisinnaaneq. Taamaammat Inuit Ataqatigiinnit qilanaaraarput
nassuiaasiortarnikkut ineriartornermut malinnaatinneqarnissarput.
Inuit Ataqatigiinnit aamma paasissalugu
pingaaruteqarluinnartoq unaavoq:
Sinerissami innaallagissiorfinni
innaallagiaq qanoq annertutigisoq atunngitsoorneqartarnersoq.
Suliffeqarfinnimmi ataavartunik pilersitsiniarnitsinni nukik akikitsoq
atorfissaqartipparput, ujartortuarlugulu innaallagissap atorneqanngitsoortup
suliffeqarfinnut aallartinniartunut akikinnerusumik akilersinneqartarnissaa,
naammassisaasalu illersorneqarnissaat avataanit unammillerneqarnerannut.
Maannamummi suliffeqarfiit aallartisartaraluartut ilaatigut innaallagissap akisuallaarnera
unammillerneqarnerlu aallartitsiniarnermi killiliinerpaapput.
Sillimaniarneq:
Nukissiornermi sillimaniarnissaq
pingaaruteqarnerpaanut ilaavoq. Innaallagissiorfimmut ataasiinnarmut
isumalluuteqarpallaarneq sapinngisamik ungalassimaniagassat ilagilluinnarpaat.
Ingammik suliffeqarfissuit angisuut innallagissiuutinik sillimmateqarnissaat
pingaaruteqarluinnarpoq. Soorlu Sisimiuni Royal Greenland-ip suliffeqarfissua
innaallagissiornissamut sillimmartaarsimannginnera pissutaalluni, inuit
sulisut ataasiakkaat suliffeqarfissuullu aningaasarpassuit annaavaat. Royal
Greenland nunarsuarmi aalisakkanik minguinnerpaamik akisunerpaanullu ilaasunik
nioqqutissiortoq, innaallagissiornikkut sillimanissaq qularnaartariaqarpaa,
siunissami ajunaarnersuit pinaveersimatinniarutsigik.
Peqqussutissatut siunnersuummi
Naalakkersuisut periarfissinneqarput
kiammik siammartiterinermi akigitinneqartut 0,25 megawatt-imik
annerusumik pilersitsisartut qanoq akeqartitsinissaat akuersissutigisassagaat.
Inuit Ataqatigiinni neriuutigaarput inissiarsuarni angisuuni kiammut
akigitinneqartartut assigiiaarnerulernissaannik, immaqalu akikinnerusumik
akeqartitsilernissaq.
ANukissamut@ aamma ilaalluinnartoq tassaavoq imeq.
Ulluinnarni uagut inuttut ataasiakkaatut nukippassuarnik
pissarsiffigisarparput, imernertigut nerisaqarnertigullu. Taamaammat Inuit
Ataqatigiinit naatsorsuutigisimagaluarparput, peqqussummi ilaatinneqassasoq
imeq. Uanilu peqqussutissatut siunnersuummi anguniagaq kusanarnerpaaq
tassaassagaluarmat: Ukioq 2000-mi illoqutigiit tamarmik kuuginnartumik
pilersorneqalernissaat. Imermi nappaatinut pinaveersaartitsinermi atortut
pingaarnersaraat, tamattalu peqqissuunisarput ukioq 2000-mi anguniarneqarpoq.
Inuit Ataqatigiinni malinnaavigisimavavut,
najugaqarfinni ataatsimoorussanik kiassaateqarfiusuni, nukiit qanoq
atorluarsinnaanerannik pikkorissaanerit kusanartut ingerlanneqartartut,
neriuutigissavarpullu taamaattut pikkorissaanerit ingerlanneqaannarumaartut,
sulilu nukinnik atuinermut paasititisiniaanerit ingerlaqqikkumaartut.
Peqqussummi nukissamik pilersuinermik
suliaqartunut piumasarisariaqakkanut ilaatinneqar-tussatut Inuit Ataqatigiinit
tulluartuutipparput, sulisorisanut pikkorissaanissamut pilersaaruti- nik pinngitsooratik saqqummiussaqartarnissaat.
Taamaalilluni nunaqavissut sulisorineqartut tikisitanik taarsersuinissaat
peqqussutissami tunngavilerneqassammat.
Nukiip akia:
Inuiaat kalaallit inuuniarnerminni uulia
kiassarnermut atugassaq, innaallagiaq imerlu pinngitsorsinnaanngilaat. Qanoq
pinngitsoorneqarsinnaanngitsigisoq takuarput Sisimiuni innaallagissiorfiit
marluusut aserortoormata, takuarpullu inunnit qanoq qisuariarfigineqartoq. Una
tamatta isumaqatigiissutigisinnaavarput, ulluinnarni atugassarput nukik
akisuallaarujussuaqaaq. Uanilu siunnersuummi Naalakkersuisut
akigitinniarneqartunut akuersisartutut inissisimapput. Ullumikkulli
innaallagissamik, kiammik inermillu pilersuisorput annerpaaq qanoq
inissisimanersoq qiviaqqaalaariartigu.
Nukissiorfiit Namminersornerullutik
Oqartussanit aningaasanik atukkinneqarsimapput 970 mill. koruuninik, ukiullu
tamaasa 40 mill. koruuninik naasaanngiusartumik atukkinneqartartussaalluni,
aningaasanut inatsit malissagutsigu. Nukissiorfiit ukiut tamaasa 160 mill.
koruuninik Namminersornerullutik Oqartussanut taarsersuipput, taakkunanngalu
ukioq manna 87 mill. koruuninik akiliissallutik erniaannarnut. Oqaatigineqarpoq
innaallagissamut akiliutaasartut 33 mill. koruuniusut, illoqatigiinnut
ataatsimut qaammammut 70 koruuninik naleqartoq. Taava atuisut qaammammut 160
koruuneertarput qaammammut Nukissiorfiit Namminersornerullutik Oqartussanut
taarsersugaasa erniaannaanut akiliutissatut atorneqartussanik.
Tamannalu tupinnaraluartoq aamma qaavatigut
Nukissiorfiit innaallagisssiornissaminnut uulia KNI Pilersuisumit
pisiarisartagaat liter-imut 1,98 koruuneqartinneqarpoq, assigalugu KNI
Pilersuisumut pisiniaruma 10 liter-imik, aama akeqassaaq 1,98 koruunimik.
Niuernermi ileqquuvoq, amerlasuunik pisigaanni akikillisaaffigineqartarneq,
taamaammallu naatsorsuutigilluinnarsimagaluarparput, Nukissiorfiit KNI
Pilersuisumit uuliamik ukiumut 40 mill. liter-imik pisigaa-ngami
akikilliliivigineqartartoq, kisianni taamaanngilaq. Taamaammat innaallagissamut
akikillilerisoqassappat siuliani taasavut nalilersoqqissaarneqartariaqarput.
Inuit Ataqatigiinnit taama oqaaseqarluta,
suliap Nukissiornermut Nalunaarasuartaatitigullu Attaveqarnermut
Ataatsimiititaliami sukumiisumik suliarineqaqqaarnissaa innersuussutigaarput.
Bjarne Kreutzmann, Akulliit Partiiat:
Akulliit Partiiata aallaqqaammut
oqaatigissavaa nukissamik pilersuineq pillugu Inatsisartut peqqussutissaattut
siunnersuut tapersersoratsigu, tassanimi uku siunertaammata:
Nukissamik pilersuinerup inuiaqatigiit
aningaasaqarneratigut akilersinnaanerpaap avatangiisinullu pitsaanerpaap
siuarsarnissaa.
Nukissat ataavartut annerusumik
atorneqalernissaat siunertaralugu inuiaqatigiit uuliamut pituttorsimavallaarnerata
annikillisinneqarnissaa anguniarlugu.
Isumaqarpunga pisariaqartinneqartoq,
nukissamik pilersuinerup aaqqiivigineqarnissaanut piginnaatitsissutissaq
allaganngorlugu saqqummiunneqartariaqartoq erseqqinnerusumillu aalajangersarlugu.
Tassanilu taanna
pissaaq inatsimmi.
Alla - maanna inatsisissaasumut
naleqqiullugu - tapersersornarneranut pissutaaqataasoq tas- saavoq - suliassat suliassaqarfiillu
Naalagaaffimmit tigooqqarneqarnerat ilutigalugu akuersissutigineqarsinnaammat.
Isumaqarpunga, susassaqarfimmut
tassunga Naalakkersuisoqarfik ineriartornermit siulliulaarluni ingerlatsisoq;
tamanna Akulliit Partiiata oqaasinnaavanut naapertuulluinnarpoq, tassa
oqartarat- ta ineriartornermit siulliulaartuartariaqartugut.
Siunnersuut tapersersornarpoq
ilaatigut pissutigalugu, tamatumuuna qulakkeerneqassammat atuisartut,
sanatitsisut aamma nukissamik pilersuiffiup suleqatigiilluarnerusinnaanissaat.
Taamak naatsumik oqarlunga,
suleqatigiissitaliamut inassutigaara.
Anthon Frederiksen, Kattusseqatigiit:
Kattusseqatigiinniit soqutigilluinnakkatta
ilagivaat nukissiornikkut pinngortitap nukingisa, tassalu erngup, seqernup
anorillu nukingisa, nunatsinni pitsaasumik akikinnerpaamillu nunatsinnut
iluaqutaasumik atorneqalernissaat.
Taakkualu saniatigut nukinnik
allanik aamma atorluarneqarsinnaasunik ilanngullugu, soorlu eqqakkanik
ikuallaasarfiit atorluarneqaleriartornerisigut kiaap pilersinneqartup,
inissianut allanullu kiassarnermut atorneqaleriartornissaa qularnanngimmat
nukissamik annertuumik pissarsivigineqarsinnaasut.
Aammalu aalisakkat olie-nik
maannakkut atuilernerup pitsaanerusumik atorneqarnissaa ilanngullugu
eqqarsaatigeqqussavarput. Tassami assersuutigalugu maanna Ilulissani fabrik-ip
nutaap nukissiornermut aalisakkat olie-aat atorpaa - tusartakkallu ilumuussappata,
aalisakkanik olie pissarsiarineqartartup maangaannartinneqartarnera
angivallaarpoq atorluarneqartariaqaraluartoq - fabrik-imilu tamarmi atorneqarsinnaanngippat,
sooq illoqarfiup sinnerani iluaqutaassanngila?
Tamakkuusariaqarpullu
Naalakkersuisut kiaap, nukiullu maangaannartinneqartarnerisa unitsinniarnissaannut
ilanngullugit suliniutigisariaqagaat, sipaarniarneq atorluaanissarlu eqqarsaatigalugit.
Taamaattumik Inatsisartut ukiakkut
1995-imi atortorissaarusersuineq pillugu nassuiaat, kiisalu nukissiornikkut
ingerlatsineq pillugu nassuiaat 1996-imi ukiakkut saqqummiunneqarmat Kattusseqatigiit
sinnerlugit siunertanut ajunngitsunut isumaqataanera nalunaarutigisimavara, taamanikkullu
oqaaseqaatikka innersuussutigalugit Inatsisartut peqqussutissaattut siunnersuut
tamakkiisumik isumaqatigaara.
Ukiunimi makkunani olie-mik
avataaniit tikisitsisarnerup annertuvallaarnera, inuaqatigiinnut akisuinnarani,
aammali pinngortitamik mingutsitsinerup millisarneqarnissaa aamma pinngortitap
nukinginik atuinikkut anguneqarsinnaammat, taamaattumik sapinngisamik
piaartumik nukissiuutit pineqartut atorluarneqarneruleriartornissaat
pisariaqarpoq.
Taamaaliornikkut ukiuni makkunani
nukissiornikkut atortulersuutit ilaatigut pisoqalisut, nukissiuutinik
pineqartunik taarseriartuaarneqassammata, kiisalu ajutoornerit soorlu Sisimiuni
qanittukkut pisumut assingusut inuaqatigiinnullu annaasaqaataaqisut,
taamaalilluni qularnanngitsumik pinngitsoorneqarsinnaaneri pitsaanerusumik
qulanaarneqassallutik.
Soorunami taamatut pilersuinissami
malittarisassaqartitsinissaq pinngitsoorneqarsinnaanngilaq pisariaqarlunilu,
aammalu pilersaarusiornermi paasissutissat kisitsisillu eqqortut tunngavigineqartarnissaat
pinngitsoorneqarsinnaanngillat, taamaattumik suliat peqqissaartumik
suliarineqarnissaat pisariaqarpoq.
Kiisalu inatsisissami siunnersuummi
kukkunerup aaqqinneqarnissaa malugeqqussavara, tassalu siunnersuummi ' 34-imik allassimasoq ' 26-ussammat, taanna kukkuneq
aappassaaniinnginnerani iluarsineqassasoq.
Taamatut oqaaseqarlunga
peqqussutissatut siunnersuutip aappassaaniinnginneqannginnermini
Nukissiuuteqarnermut Nalunaarasuartaatitigullu Attaveqarnermut
Ataatsimiititaliamut suliassanngortinneqarnera ilalerpara.
Mikael Petersen, Isumaginninnermut, Suliffeqarnermut
Pisortallu Suliffeqarfiutaannut Naalakkersuisoq:
Nuannaarutigaara peqqussutissatut
siunnersuutigineqartoq, aamma matumannga saqqummiunneqartoq, partiinit tamanit
aammalu Kattusseqatigiinniit tigulluarneqarmat.
Tamatumuuna atatillugu erseqqissaatigissavara
nunatsinni nukissiuuteqarneq pillugu annertuumik itisuumillu oqallinneq
1988-imi Inatsisartuni peqqaarmat, tassalu nunatsinni nukissiuuteqarnikkut
ineriartortitsinissaq pillugu isumaliutitsiissut, taamanikkut maani
Inatsisartuni oqallisigineqarmat. Aammalu tamatuma kingornatigut 1990-ikkut
aallartilaarnerani annertuumik eqqartorneqarluni, nukissiuutitigut
inatsisilioriaatsit qanoq aaqqissuunneqassanersut.
Oqallinnerit tamakku maani inimi
pisarsimasut aallaavigalugit, massakkut peqqussutissaq nutaaq massakkut
saqqummiunneqarpoq. Soorlu saqqummiussininni ilanngullugit eqqaagikka, peqqussutissatut
matumuuna periarfissiissutaasut nutaat arlaqarput ilaatigut partiininngaaniik
uparuarneqartut oqaaseqarfigineqartullu.
Tassani taasariaqartutut pingaartutut
erseqqissartariaqarpara Naalakkersuisut peqqussutikkut matumuuna
piginnaatinneqassammata akigititat assigiinngitsut eqaatsumik aaqqinneqarsinnaasarnissaannut.
Teknologi nutaaq atorlugu nukissiuutinik
pilersuinissaq annertusiartussaaq, erngup nukinga atorlugu
nukissiulereersimavugut, maani Nuummi Utoqqarmiut
Kangerluaarsunnguaninngaan-niit pilersorneqartumik. Ukiuni aggersuni
Qullortorsuarmi kujataani, Tasersuarmi Sisimiut eqqaani aamma erngup nukinga
atorlugu nukissiorsinnaanissami periarfissat sukumiilluinnartumik
misissorneqaleruttussapput, ukiullu marluk qaangiuppata tamanna imaassinnaavoq
suliassaq aallartereersimasinnaasoq.
Taakkualu saniatigut seqernup
nukinga atorlugu, inuit arlaqalereerput ilaqutariit aammalu suliffeqarfiit
nammineerlutik iluaquteqalereersimasut.
Anorip nukinga atorlugu
iluaqusersuinissamut periarfissat qanoq ittuunissaat misissorneqassapput.
Aningaasalersueriaatsit qanoq ittuunissaat aalajangersarneqassapput.
Soorunami avaqqunneqarsinnaanngilaq
Inatsisartut aamma isumasiortarneqarsinnaanissaat, soorlu uani aamma
eqqaaneqartoq saqqummiussami; ukiut marlukkaarlugit nassuiaasoqartarnissaat
Inatsisartunut taanna pingaaruteqarluinnartuusoq pissutsit qanoq ittuulersimanerannik.
Kisianni soorunami taakku
avataasigut Inatsisartut tamatigut periarfissaqartuarput apeqquteqarnikkut,
siunnersuuteqarnikkut allatigulluunniik nukissiuutit pillugit aamma
tusarniaanissamut.
Suleqatigiinermut tunngatillugu,
Inatsisartut Naalakkersuisullu akornanni pissusiusussatut saqqummiunneqartut
pillugit IA-p oqaaseqartuata oqaaserisaanut oqaatigissavara:
Soorunami nalunaarutissat
assigiinngitsut Naalakkersuisuninngaaniit saqqummiunneqannginnerminni
Inatsisartut Ataatsimiititaliaannit qimerloorneqarnissaanut uanga taanna
pingaartissaqaara, taanna oqaatigissavara. Taamaattumik tassuuna isumaqarpunga
uagut akornitsinni ajornartorsiutissaqarata.
Ilanngullugit IA-p oqaluttuata
taavai; tassa ' 4-mi imm. 3-p: Nukissiorfiit
aqunneqarnerat aaqqissuussaanerallu pillugit Naalakkersuisut
killissarisitsissutaasussanik aalajangersaasarnissaannut tunngasoq.
Inatsisinik tunngaveqartumik
nukissiorneq aammalu siunissami nunatsinni qanoq atorneqassanersoq massakkut
ilusilersorneqarpoq. Tassalu taannarpiaavoq oqallisigisarput peqqussutissakkut
matumuuna, taamaattumik nukissiorfinnut tunngatillugu sullissinerup aammalu
Nukissiorfiit suliffeqarfissuup qanoq aqunneqarnera pillugu aaqqiisarnissat,
ingerlaannartumik aaqqiiisar- sinnaanerit
eqaatsumik taakkua Naalakkersuisut pisarnissaat naatsorsuutigaara. Inatsisartut
ataatsimiinnissaat utaqqeqqaarnagu aaqqiisoqartarnissaa pingaaruteqarpoq
suliassani taamak ittuni, inunni attuisinnaasumik annertuumik.
Assersuutitut taalaaginnarlara
Sisimiuni pisoq, ila taamak ittumik qanoq iliuusissat allallu Nukissiorfinnut
Naalakkersuisut piumasaqaatigisinnaasaat sulissivimmut, Nukissiorfinnut Inatsisartut
ataatsimiinnissaat utaqqisissagutsigu erininassaqaaq. Taamaattumik
Nukissiorfinnut piumasaqartarnissaq eqaatsuusariaqarpoq, inunnik sullissineq
pilersuinerlu pitsaasumik ingerlanneqarsinnaassappata.
Arlaliugaluarput
oqaaseqarfigisinnaasakka, kisianni taakkua arlallit oqaatigineqartut Nukissiuuteqarneq
pillugu ataatsimiititaliami neriuppunga oqallisigineqassasut. Aammalu
ataatsimiititaliap Inatsisartunut aappassaaneerinnissamut ilanngullugit
taakkua oqaaseqarfigisinnaajumaarai.
Naggasiullugu
erseqqissaatigilaaginnassavara; Kattuseqatigiit ilanngullugit taasaannut Sisimiunut
tunngatillugu:
Naatsorsuutigaara Sisimiumi taanna
pisimasoq, aamma ataasinngormat Inatsisartunut ilaasortanut naatsukullammik
nassuiaatigalugu nassiussuussimasara, taassuma avataatigut sunarpiaq
aallaaveqartumik taamarsuaq ajutoortoqarsinnaanera pillugu qaammat ataaseq qaangiuppat
Inatsisartunut nassuiaammik nassiussaqarsinnaajumaarlunga, tamanna oqaatigaara
tassani paasiniagassat annertummata aamma isumannaatsuunissaq eqqarsaatigalugu
piumasaqaatit Inatsisartuninngaaniit aamma ippassaq aammalu matumani ullumikkut
taaneqartut aallaavigalugit avaqqussinnaanngilara sukumiinerusumik
ersarinnnerusumillu Sisimiuni pissuterpiaasut pillugit nassuiaateqarnissara,
tamanna qaammatip ataatsip qaangiunnerani Inatsisartunut ilaasortanut
naatsorsuutigaara naammasineqarsinnaajumaassasoq.
Taavalu nunatsinni nukissamik
pilersuinermi isumannaatsuunissamik piumasaqarnermut tunngatillugu sineriak
tamaat eqqarsaatigalugu misissuinerit massakkut aallarteruttortut naatsorsuutigaara
1998-imi Inatsisartunut nassuiaammik saqqummiussisoqartoqarsinnaassasoq.
Tassa ingerlaannaq taanna
pisinnaanngilaq, suliassaagami
annertooq. Kallerup inneranik pilersuinerup, imaanngilaq tassa motor-i
aallartiinnaraanni, kisianni annertoorujussuummat taasuma iluaniittoq taamaattumik
misissueqqissaarnissaq pisariaqarpoq. 1998-imi ukiakkut pitsaassutsimik
isumannaasutsimillu misissuinerit taakku naammassippata naasuiaassuteqarnissara
naatsorsuutigaara.
Akigititanut tunngasut IA-inngaaniik
saqqummiunneqartut taakkua ilisimaaraagut, taamaattumik eqaatsumik
akigititatigut aaqqiisalernissamik siunnerfeqarnerup taakkua neriuppunga
isumagisinnaassagaat naammassisaqarfigalugillu, kisianni soorlu oqaatigiga
ataatsimiitsitaliami nalilersugassaapput assigiinngitsut saqqummiussuunneqarlutik.
Qujavunga ilassilluarneqarmat
siullermeerinninnermi maani peqqussutisatut siunnersuummi.
Karl Lyberth, Siumut:
Oqaluuserisatta assigiinngitsut
oqaluuserinerini ilaanni tupinnalaartarpoq aammalu qungujuffiulaanngitsuussanani
partiit ilaasa oqaluuserisassaminngaanniit allamut nuukkaangamik imminnut
assortulaartoortarnerat.
IA eqqarsaatigalugit immikkoortoq
11-mi aappaagumut aningaasanut inatsisissaq samminerani, assut
eqqarsarnartoqartippaat innaallagissap akiata 25 ĝre-mik appartinneqarnissaa.
Taava uani oqaluuserisatsinni kissaateqarput nukissanut akit apparnissaannik.
Aammalu oqarlutik innaallagissamut aki qaffasippallaartoq, tamatta taanna
isumaqatigisinnaagipput. Tassa qaffasippallaarpoq, taanna isumaqatigiissutigisinnaavarput.
Kisiat tassa oqareerpunga partiit imminnut assortulaartarnerat taanna
ilaanneeriarluni qungujuffiulaartarsinnaavoq.
Aamma isumaqarpunga IA-p oqaluttuata
kisitsisit paatsullatsiarsimagunarai, uanga paasinnittaasera malillugu oqarami
innaallagissamut isertittakkat ukiumut 33 mio. kr.-usut. Taamatut
saqqummiinermini oqarpoq. Uani 33 mio. kr.-t tassa innaallagissamut akit 25
ĝre-mik apparneqassagaluarpat, taakkua 33 mio. kr. naleqartut. Immaqa
nalunngikkaluarlugu kukkulaartoorlugu allasimagunarpaa saqqummiisussap.
Uanili majuarninni aamma
pissutiginngitsuunngilara Naalakkersuisut imaluunniit Namminersornerullutik
Oqartussat suliffeqarfiutaat assigiinngitsut eqqarsaatigitillugit oqaluttuap
takutimmagu suliffeqarfissuit aktieselskab-inngortikkaanni ilaanneeriarluni
taanna ajunngitsumik taanna kinguneqartarpoq.
Assersuutigiinnarlugu
eqqaasinnaavarput KNI siornatigut qanoq ingerlasimasoq, kisiannili
aktieselskab-inngortinnerata kingornatigut ingerlanerup pitsanngoriartornera
taanna tamatta nalunngilarput.
Uani Nukissiorfiit eqqarsaatigalugit
piffissanngunnginnerluni eqqarsaatigilissallugu Nukissiorfiit
aktieselskab-inngortinnissaat. IA ilumoorluinnarpoq oqaramik landskarsimut
annertuunik akiligissaqarput Nukissiorfiit.
Immaqa aktieselskab-inngornermikkut
allanut atorniarfiusinnaasuni, akikinnernilluunniit atorniarfiusinnaasunik
periarfissarsiunnaagaluarput piginneqatigiiffittut aktieselskab-itut aallartittuugunik.
Aktieselskab-itut aallartikkunik
Nukissiorfiit qularnanngitsumik niuertorpalaarneq niuerniarnerlu
tunngavigalugu ingerlalissapput tamatsinnut iluaqutaasumik. Taamaattumik
Naalakkersuisunut misissullaqqunarpoq ilumut piffissanngunnginnersoq
Nukissiorfiit aktieselskab-itut ingerlan-neqalernissaata misissorneqarnissaa.
Mannasse Berthelsen, IA-p oqaaseqartua:
Siullermik oqaaseqartoq kingullermik
oqaaseqarfigilaassavara.
Aap, oqarpugut innaallagissamut akit
qaffasippallaaqaat, ingammik suliffinnik ataavartunik imminut akilersinnaasunik
aallartitsiniarnermi innaallagissap akisuallaarnerujussua. Sanaartorfinni
innaallagissamik annertuumik atuiffiusuni sarfaq Kwh-mut 2 kr. sinneqassappat
akisual-laarujussuaqaaq.
Innaallagissap apparnissaanut
eqqarsartoqarnerani oqaratta, ukua eqqarsaatigaagut:
Sinerissami innaallagissiorfiit
sillimaniarnissaanut atortussat, soqanngitsutut amerlanerit oqaatigineqarsinnaapput.
Akeqarput sarfap aqqutai, suliassat annertupput.
Minnerunngitsumillu imermut aqqutit
uani aamma siullermi oqaaseqaratta oqaatigaagut. Taakkuuput peqqinnissamut
aamma tunngaviunerpaasut pinaveersaartitsiniarnermut nappaatinut. Taakkua
illoqarfinni, anngajaani allaat, illut affai sinnerlugilluunniit
imeqanngillat,. Tassa ukiukkut imertartariaqarput imaluunniit aasakkulluunniit
imertartuartariaqarput imermik pissarsiniarlutik. Taakua akeqarput. Illuatungaani
eqqarsarnartoqartikkatsigu oqarpugut: Nukissiorfin-nut akit
apparsaannartuassagaluarutsigit, naggataanut Nukissiorfiit akissaarutissavagut
piorsaanermut atugassaannik aningaasanik.
Karl Lyberth (S)
isumaqatigissavarput imatut: Nukissiorfiit aningaasat attartugaasa ernianut
akiliutigisartagaat appasinnerusumik aaqqiisoqarnissamik ujartuineq. Massakkut
9 %-mik Nukissiorfiit akiliisarlutik oqaatigineqarput, kisiannilu aningaaserivinnut
imaluunniit aningaasaliisarfittut ittut namminersortut erniaannut akigitippaat
immaqa 5-6 %, tassa minnerungaatsiaqaaq.
Taamaammat qilanaarpugut IA-nni
ataatsimiititaliami tamakku pissutsit assigiinngitsut eqqartussallugit.
Anthon Frederiksen, Kattusseqatigiit:
Ullumikkut oqaluuserisassatta
ilagivaat punkt 32, tassalu siorna suliatta, kukkunitta, kukkunitsinnut
uteqqiinissaq. Taavalu aatsaaginnaq oqalukkama aamma kukkuneq, tassa
annertunngikkaluartoq taassuma aaqqinneqarnissaa eqqarsaatigeqquvara. Ukiormi
ataaseq qaangiuppat aamma taannannguaq pillugu oqalliseqqinnginnissarput
anguneqarniassammat.
Taavalu Karl Lyberth-imut (S)
aktieselskab-inut tunngatillugu. Isumaqarpunga aamma sissuilaartariaqaripput
A/S-imut asannilertoorpallaannginnissaq. Tassami eqqaamasariaqarpoq KNI A/S
Royal Greenland A/S-ilu qiviarutsigit nunanut allanut ullumikkut qanoq
akiligassaqartiginersut aamma taakkutsia isigisariaqarpoq. Aappaatigullu aamma
taamatut eqqarsarnermi ilanngullugu eqqarsaatigisariaqarpoq ingerlataq
sunaluunniit A/S-inngoraangami taava soorunami taakkua siulersuisa
aalajangiisinnaanerat tunngavigalugu ingerlanneqartarluni.
Ukiuni makkunani naalakkersuinikkut
anguniakkanut ilaapput akit qaffattaaliorneqarnissaat aamma minnerunngitsumik
nukissiuutit tungaasigut. Takorlooriaraanni immaqa Nukissiorfiit ullumikkut
Namminersorullutik Oqartussanut 1 mia. kr. pallingajallugit akiligassallit
A/S-inngortinneqassappata taava niuernerpalaartumillu ingerlaniassallutik taava
tamatuma kingunereratarsinnaasai ilaatigut aamma inuiaqatigiinnut
sunniuteqarsinnaasut aamma eqqaamasariaqarmata. Taamaattumik A/S-imut
asannittoorpallaalinnginnissaq isumaqarpunga aamma ilanngulugu
eqqarsaatigillualaartariaqartoq.
Josef Motzfeldt, IA-p Siulittaasua:
IA-ninngaanniit oqaaseqartutta
erseqqissagaa ilumoortoq mannaavoq: Ingerlatsinikkut naammassisinnaasat
najoqqutaralugit allatigulluunniit matussutissaqartikkaanni, aningaasalissuugaanni,
landskarsi aningaasalissuuppat akikillisaanissat ajorilluinnanngeqqissaarpagut.
Aamma naalakkersuisooqatigiit Karl
Lyberth-ip ilaasortaaffigisaasa eqqartortuarpaat akit eqqortut atorneqassasut.
Taamaattumik Nukissiorfiit annertoorujussuarmik innuttaasut atugaannut,
ulluinnarni atukkatsinnut pingaaruteqartorujussuarnut pisussaaffeqartut
eqqarsaatigissagaanni, qanimut ilisimasat Nukissiorfiit qanimut ilisimasatik
najoqqutaralugit iluarsiissutissanik iluarseerusunnernik nutaanillu
taarseerusunnernik naammaserusutaat innimigineqartariaqarput -
kiffaanngissuseqarfigissagaat tamanna oqariartuutaavoq aamma ippassaq ilaatigut
ani- ngaasatigut inatsisissaq oqaluuserinerani Naalakkersuisunut tamanna
saqqummiunneqarpoq.
Suut tamarmik akikillilernissat
inuuniarnermi oqilisaataasinnaasut pisariaqarput, pisariaqartinneqarput kisiannili
akissaqarnerput nammaqatigiinnikkullu manna tikillugu inuaqatigiit periuserisimasaat
qimanneqarnaveersaartariaqartoq IA-p aalajangiusimavarput.
Taavalu KNI A/S-inngortinneratigut
pitsanngoriarujussuarsimanernik Karl Lyberth-ip (S) oqaatsini soorunami
nammineq isumagai, innuttaasuniilli 2 mia. kr.-it angullugit aningaasartuutitalimmik
aaqqiniarsimanerit innutaasuniit apeqqutigerusunneqartartut tusaaneqartariaqartut
tassaapput ilumut 2 mia. kr.-it sinnerlugit
akiliinerusimanerup nalinganik pitsanngoriaatit oqaatigineqarsinnaanersut,
tamanna IA-p apeqquserpaa.
Mikael Petersen, Isumaginninnermut,
Suliffeqarnermut, Pisortallu Suliffeqarfiutaannut Naalakkersuisoq:
Tassa naatsunnguamik kingullermik
oqaaseqartut oqaaseqarfigilaassavakka.
Siullermik Karl Lyberth-ip Siumup
oqaaseqartuata saniatigut oqaaseqarnermini ilanngullugu Naalakkersuisunut
eqqarsaatigillaqqusaa, tassa Nukissiorfiit aktieselskab-itut aaqqiivigineqarsinnaanerat.
Tassunga tunngatillugu erseqqissartariaqarpara taamatut siunnersuuteqartarneq
arlaleriarluni Inatsisartunut pisarsimammat, kisiannili
aktieselskab-inngortitsiniarneq Nukissiorfinnut tunngatillugu sukumiisumik
suliarineqarsimanani.
Soorunami apeqqutit qulaajagassat
arlaqarput Nukissiorfiit aktieselskab-itut aaqqinneqassaga-luarpata aamma
inuiaqatigiinnut iluaqutaanerpaasussaq tassani anguneqassanersoq, taamatut
aaqqiisoqassappat aamma naliligassaasariaqarpoq.
Isumaqatigaakka oqartut
aktieselskab-inngortitsiniaannarluni aktieselskab-inngortitsisoqassanngilaq.
Tassani inuiaqatigiinnut aaqqiinissaq siunertarigutsigu aamma taava
naliliissutissat, paasissutissat aamma nalilersoqqaartariaqarput taamatut
aalajangiinnginnermi.
Kisianni oqaatigissavara soorunami
taamatut piumasaqarneq misissugasaavoq taamaattumik paasissutissanik
ersarinnerusunik peqarnissaq, taanna aallaavigalugu misissorneqarumaarpoq.
Kallerup innerata akikillisinnaaneranut tunngasoq Naalakkersuisut siunnersuutaaniippoq, tassa 2,15 kr/Kwh-mik massakkut akeqartoq 1,90 kr/Kwh-ngortinnissaanut siunnersuuummik ima-qarmat. Taannalu 33 mio. kr. ukiumut aningaasartaqarpoq, taakkualu 33 mio. kr. Naalakkersui-sut siunnersuutaanni, tassa aningaasami inatsisissami siunnersuutaanni aallaavigineqarpoq Nukissiorfiit Namminersornerullutik Oqartussanut akiitsuisa ernialersorneqarneranut taakkua ilanngaatigineqassasut. Tassa taannarpiaq aallaavigalugu IA-p oqaluttuata piumasaqarnermini naliligassatut ilanngullugu taasaa. Taamaappoq, taanna erseqqissaatigilaaginnarpara taanna aallaaviummat tassuuna isumaqatigiinngissuteqannginnatta.
Nukissiornermut tunngasut taakkua taamaalillugit oqaaseqarfigilaarlugit Josef Motzfeldt-ip (IA) oqaaserisai kingulliit taakkua nukissiornermut attuumassuteqanngimmata annertunerusumik oqaaseqarfigissanngilakka, tassa KNI-mut aktieselskab-inngortitsinermut tunngasut. Kisianni tassunga tunngatillugu nukissiornermi tunngasortaani tassani aajuna nalunngisarput: KNI aktieselskab-inngortinneqanngikkallarmat olie ullumikkornit akisunerujussuummat, KNI aammalu KGH-usimasup taamanikkut annertuumik aamma iluanaaruteqarfigisimasaa. Eqqaamasakka malillugit ukiut sisamat-tallimat matuma siornatigut ukiumut naatsorsorneqartut taamanikkut 100 mio. kr.-nik iluanaarutaasartut taamanikkut naatsorsorneqarsimapput. Kisianni ullumikkut taakku 100 mio. kr.-it iluanaarutigissaarsimavagut aammalu 100 mio. kr.-it ukiumut sinnerlugit olie-mut akikillisaaneq ingerlanneqarsimalluni..
Taamaattumik taanna erseqqissaatigilaarpara Aktieselskab-inngortitsinermi aningaasat qanoq aaqqiivigineqartarsimaneri aamma taamak ililluni takuneqarsinnaammata.
Oqaluuserisaq naammassivoq.