Oqaluuserisassani immokkoortoq 34-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Sisamanngorneq
25. oktoberi 1997 nal. 14.31
Ataatsimiinnermi
aqutsisoq: Inatsisartut Siulittaasuat Anders Andreassen.
Konrad
Steenholdt, Kultureqarnermut, Ilinniartitaanermut Ilageeqarnermullu
Naalakkersuisoq:
Ilageeqarneq
pillugu Siunnersuisartutut Ataatsimiititaliap atorunnaarsinneqarnera siunnersuutip
kingunerissavaa.
Ataatsimititaliaq
taanna massakkut ukiuni pingasuni atuutereersimalerpoq, arfinileriarlunilu
ataatsimiittarsimalluni. Ataatsimiinnerit taakku ilisimatitseqatigiinnertut
ingerlanneqarnerusarsimapput, siunnersuinertut pinnatik, naak
ataatsimiititaliap pilersinneqarnerani tamanna siunertarineqarsimagaluartoq.
Naalakkersuisut isumaqarput ataatsimiititalianik immikkut ilisimasalinnik
ilaasortalinnik taamaallaat atuisarnissaq naleqqunnerpaamik aaqqiinerusoq,
tamannalumi ilageeqarneq pillugu peqqussutikkut atuuttukkut
ammaanneqareersimavoq. Taamaaliornikkut suliassaqarfinni aalajangersimasuni
pitsaasumik siunnersorneqarnissaq periarfissaqalissaaq. Ataatsimiititaliat
taamatut immikkut ilisimasalinnik ilaasortallit pisariaqalerfiatigut
pilersinneqartartut pissutsinik ilageeqarnermut tunngasunik naammattumik siunnersorneqartarnissamik
pisariaqartitsinermik taakkua matusisuusussaassapput. Ilanngullugu oqaatigineqassaaq
ataavartumik siunnersuisarneq ingerlanneqareermat qaammatikkaartumik
biskopimik ataatsimeeqateqartarnikkut, tassa uanga ataatsimeeqateqartarnikkut.
Piffissaq
manna iluatsillugu oqaatigissavara apeqqut upernaaq manna majip 26-iani
1997-imi Kangerlussuarmi ilagiit ataatsimeersuarneranni saqqummiunneqarmat.
Siunnersuut taanna ataat-simeersuaqataasunit ilalerneqarpoq, ilaatigut
oqaatigineqarluni ilagiit sinniisaannit provste-qarfinnillu
ataatsimiititalianit siunnersorneqarnissamut periarfissaqareersoq.
Hans Enoksen, Siumup oqaaseqartua:
Ilageeqarneq pillugu Inatsisartut
inatsisissaata allanngortinneqarnissaanik siunnersuummut Siumumiit
nalilersoqqinneqarnissaa pisariaqarsoraarput.
Siumumiit pingaartittuarparput inuit inuiaqatigiinni
oqartussaanerat sutigut tamatigut pitsaanerpaanik
periarfissaqartinneqarnissaa. Tamanna aamma ilageeqarnermi atuuppoq, tassanilu
Siumumi inuiaqatigiit suli annertunerusumik oqartussaaqataanissaat
siunniussimasariaqartutut isumaqarfigaarput.
Kangerlussuarmi ilagiit sinniisaasa
ataatsimeersuarneranni eqartorneqareersimagaluartoq paasilluaraluarlugu
isumaqaratta tamakkiisumik ilagiinnut apuunneqarsimanngitsoq. Taamaattumik
apeqqut una inuiaqatigiinnut pingaaruteqarluinnartoq Kalaallit Nunaanni
ilagiinnut tama- nut tusarniassutigineqaqqinnissaa Siumumiit
kissaatigissavarput. Aappassaaneerneqannginne-ranilu Kultureqarnermut
Ilinniartitaanermullu ataatsimiititaliami naliliiffigineqaqqinnissaa Siumumiit
kissaatigalugu.
Jakob Sivertsen, Atassutip
oqaaseqartua:
Kalaallit Nunatsinni ilagiittut
sullinneqarnitta patajaatsumik ineriartortinnneqarnissaa atassummit
pingaartitariuarsimavarput, pingaartittuassallugulu.
Atassummit malugaarput nunatsinni
ilageeqarneq pillugu siunnersuisartut ataatsimiititaliat ukiuni pingasuni
atuutereersimagaluartut ataatsimiittarnerat ilisimatitseqatigiinnertut
ingerlanneqarnerusarsimasut siunnersartutut pinnatik, taamaattumik
Kultureqarnermut Ilinniartitaanermut Ilageeqarnrmullu Naalakkersuisup
ilageeqarneq pillugu siunnersuisartutut ataatsimiititaliat
atorunnaarsinneqarnissaannik siunnersuummik saqqummiussaqarnera
paasilluarparput taperserlugulu.
Kultureqarnermut Ilinniartitaanermut
Ilageeqarnermullu Naalakkersuisup piumasaraa, ilageeqarneq pillugu
siunnersuisartutut ataatsimiititaliaagallartunut taarsiullugu immikkut
ilisimasalinnik ilaasortalimmik ataatsimiititaliorsinnaaneq
siunnerfigineqassasoq, ilageeqarneq pillugu peqqussutikkut tamanna
periarfissaareermat, taamatut allannguiniarneq Atassummit pisariaqarluinnartutut
isumaqarfigalugu taperserparput.
Kiisalu Atassummit oqaatigissavarput
upernaaq manna ilagiit sinniisaannut qinerseqqammerat- ta qinigaasut ilagiittut
sullinneqarnitta pitsaanerulernissaanik assut pingaartitsisut
malugisin-naavarput kiisalu provsteqarfinni ataatsimiititaliat
atorluarneqarpata pitsaasumik siunnersorneqarnissaq anguneqarsinnaasoq
isumalluarfigigatsigu.
Ilageeqarneq pillugu
siunnersuisartutut ataatsimiititaliat atorunnaarsinneqarnissaannik siun-nersuut
ajuusaarutigigaluarlugu tunngaviatigut paasilluarlugu Atassummit
taperserparput.
Maliinannguaq Marcussen Mĝlgaard,
Inuit Ataqatigiit oqaaseqartuat:
Siullermik Inuit Ataqatigiinniit
oqaatigissavarput ilageeqarneq pillugu siunnersuisartutut ataatsimiititaliap
atorunnaarsinneqarnissaanik siunnersuut tamakkiisumik tapersersoratsigu.
Ilageeqarnrermummi Naalakkersuisup oqarneratuut ataatsimiititaq taanna ukiumut
marloriarlu- ni ataatsimiittartoq siunnersuisutut atornerunani
ilisimatitseqatigiiffittut atornerusimavoq. Taamaattumik Naalakkersuisup
allatut aaqqissuussamik siunnersuisarnermik iliuuseqarnialersaarnera
tapersersorparput.
Ukiuni kingullerni
palasissaaleqinerup palasinngorniarusuttunillu ilinniartussaaleqisarsimane- rup
takutippaat ilageeqarneq annertunerusumik pimoorunneqanngitsoq. Taassumalu
saniatigut oqaatigineqartuarpoq meeqqat inuusuttullu ilageeqarnerup tungaatigut
sammisaqartinneqan-ngippallaartut. Tamannalumi aamma erserpoq nunatsinni
allanik upperisallit amerliartuinnarnerisigut.
Sooruna ilageeqarneq qangamut
naleqqiullugu taama ullumikkut soqutigineqannginnerutigisoq.
Nalunngikkaluarparput kommuunini tamani ilagiit sinniisaat pilersinneqartartut,
taakkuli annertuumik malunniuteqartannginnerat takornartaanngilaq. Inuup
kialuunniit pisariqartitaraa inuunermi anersaakkut nukittuumik ingerlanissaa.
Timilumi nukittugaluarluni anersaakkut nukittunngikkuni sanngiittuusarpoq.
Anersaakkullu nukittuneq tassaavoq,
inuuneq ilungersunarsingaluarpalluunniit ilukkut neriuu-teqartuarsinnaaneq.
taannalu neriuuteqarneq ilaatigut uppernikkut imaluunniit allatigut
toq-qammavissaasinnaasunik ujartuinikkut pisarpoq. Inuunermimi
apeqquterpassuaqartarmat uagut inuinnartu imaaliallaannaq
akisinnaanngisatsinnik. Taannaavorlumi ullumikkut inuunitsinni
inuusuttortattalumi akornanni amigaataasartoq.
Ilageeqarnerup aallaavigaa inoqammut
asanninneq, inoqatillu kikkuungaluarpataluunniit assigiissumik naligiissumillu
isigineqarneri. Taannaavorlu ullumikkut inuiaqatigiit akornanni
amigaataalluinnartoq. Nunatsinnimi assigiinngissutsit naligiinnginnerillu
annertoqaat. inuit ilaat pigissaartuupput, ilaallu angummanniaasaarlutik
inuuniarsaripput. Inuit ilaat asanninnermik amigaateqartuupput
atugarliortuullutillu.
Inuit Ataqatigiinniillu isumaqarpugut
tamakkuusut ilageeqarnerup iluani annertunerusumik sulissutissanut
ilaasariaqartut. Politikkeriugaanni ilageeqarnerlu illersorlugu, pisariaqarpoq
sapinngisamik inuit akornanni naligiinngitsumik assigiinngippallaamillu
inuunerup akiorniarnissaa. Inatsisimmi qulit aallaaviusut anguniaraanni
ulluinnarni inuit inuunerat sapinngisamik oqilisartariaqarpoq, pisuut
pisuunngoriartortiinnarnagit, suuteqanngitsullu atugarliortikkiartuinnarnagit.
Inuimmi inunngortaratta tamatta assigiilluta.
Upperisaqarnerlu
ilumoorukkaanni inuiaqatigiillu paasinninnerunissaat anguniaraanni pissutsit
tamakku aaqqiiviginiarlugit ersarissumik sulissutigisariqarput. Sumummi
iluaqutaassava inuk inuunini tamaat ilungersorluni atugarliortoq
oqarfigigaanni, upperuit aaqqissuutit. Atukkat aamma pitsanngorsartariaqarput,
inoqatinullu asanninneq qanilaarneq ataqatigiinnerlu ersarinnerusariqarlutik.
Taamaattumik
aamma ilageeqarneq ullumikkumut naleqqussartariaqarpoq, naleqqussaanerullu
aallaavigisariaqarpai, meeqqat inuusuttullu inuunerat paasinnittarnerallu.
Taamaattumik ilageeqarneq nutarterniaraanni allatut nutaamik
eqqarsartoqartariaqarpoq, tamatumuunalu Inuit Ataqatigiinniit ilageeqarnermut
Naalakkersuisoq qinnuiginiarparput, ilageeqarnerup iluani pitsanngorsaanissami
iliuusissat pillugit upernaamut nalunaarusioqqullugu, ilaatigut ilagiit
sinniisaat sinrissamiittut isumassarsianik nutaanik pissarsiniarfiginerisigut.
Immaqalu aamma inuusuttut suliniaqatigiiffiisa isumasiortarnerisigut.
Inuit
Ataqatigiinni isumaqarpugut aatsaat taamaasiornikkut isumassarsiat nutaat
ullutsinnullu naleqquttut pissarsiarineqarsinnaasut.
Taakku
saniatigut Inuit Ataqatigiinniit ilagiit sinniisaasa atugaasa
pitsanngorsarneqarnissaat sulissutigeqquarput, tassami ullumikkut ilagiit
sinniisaasa sulinerminni atugaat pitsaasuunngil-lat. Sinniisutummi
ataatsimiigiarnermi qanorluunniit sivisutigisumik atorfik qimallugu ataatsimiikkaluaraanni
akissarsiaq ataasiuvoq, taannaavorlu ilagiit sinniisaanni suliniarnermi
peqataa-rusunnermut aporfiit ilagisartagaat.
Sinerissamissaaq
provstiudvalgit ilaatigut pisortaqarfimmut ungasippallaartutut
oqaatigineqar-tartut qaninnerusumik suleqataatinnissaat anguniartariaqarpoq.
Maannami nalunngilarput oqaluffippassuit aserfallassimaqisut, taakkulu
saniatigut atortumikkut soorlu pattagiaqarner-mikkut qanganitsertoorsimasut.
Tamakkuuppullumi
ilagiit sinniisaasa provstiudvalgillu sulilluarnerunerisigut
ersarinneruneri-sigullu aaqqiiviginiassallugit aqqutissaalluartut.
Taamatut
oqaaseqarluta Inuit Ataqatigiinniit palasinngorniarlutik aallartittussat nutaat
angusa-qarluarnissaannik kissaappagut, ilageeqarnerlu pillugu
siunnersuisartutut ataatsimiititap ato-runnaarsinneqarnissaa isumaqatigaarput,
neriulluta allatigut eqaannerusumik suliniartoqalerumaartoq.
Bjarne
Kreutzmann, Akulliit Partiiat:
Ilageeqarneq
pillugu Inatsisartut peqqussutaata allanngortinneranik Inatsisartut
peqqussutissaannut nalinginnaasumik oqaaseqaatit pisariaqartitsineq
naapertorlugu aaqqiissutissaasutut Akulliit Partiianiit isigaakka.
Tamatumani
eqqarsaatigaara piviusoq una isumaga naapertorlugu qaangiinnarneqarsinnaanngitsoq,
tassa nuna tamakkerlugu ataatsimiinnermi kissaatigineqarsimammat, ilagiit
sinniisaat provsteqarfinnilu ataatsimiititaliat tassaassasut apeqqutini
ilageeqarnermut tunngasuni Naa-lakkersuisunut ilaasortamut siunnersuisartut,
soorlu aamma naalakkersuisunut ilaasortamik siunnersuisartut, soorlu aamma
naalakkersuisunut ilaasortamik siunnersuineq pisartoq qaammatikkaartumik
biskoppip ataatsimeeqatigisarneratut. Isumaqarpunga taamatut aaqqiinissaq
naleqquttuussasoq. Soorlu saqqummiussissummi allakkiami oqaatigineqartoq aamma
periarfis-saqassaaq pisariaqartitsineq naapertorlugu immikkut ilisimasalinnik
ataatsimiititaliortarnissa-mut, oqaatigneqarlunilu siunnersuut aningaasatigut
sunniuteqassanngitsoq. Taama naatsumik oqaaseqarfigalugu allannguutissatut
siunnersuut taperserpara
Anthon
Frederiksen, Kattusseqatigiit:
Ilageeqarneq
pillugu Inatsisartut peqqussutaata allanngortinneqarnissaanut tunngatillugu
Kattusseqatigiinniit oqaatigissavara peqqussummik allanngortitsiniarneq
tunngaviatigut akuersaarakku.
Inatsisartunut
pappiliat tunniunneqartut tunngavigalugit paasinarpoq Ilageeqarneq pillugu Siunnersuisartut,
Ilagiit kalaallit siulersuisui, imaluunniit Ataatsimiititaliat
pisariaqartinneqarunnaarsimasut, tamannalu Ilagiit kangerlussuarmi maajip
26.-ani 1997-mi ataatsimiinneranni ilalerneqarsimasoq aamma tamanna pillugu
Ilageeqarnermut Naalakkersuisup nunatta Biskop- pia isumasioreerlugu suliaq
ingerlanneqartoq.
Oqaaseqatini
ersersinneqarpoq Ilageeqarnermut Naalakkersuisoq Biskoppimik qaammatikkaartumik
ataatsimeeqatiginnittarneratigut siunnersuineq pisartoq - imatullu
paasineqarsinnaavoq nunatsinni Ilagiinni qullersaasut inuit marluk
kisimiillutik ilageeqarnq siunissami annerusumik isummerfigalugulu
aalajangiiffigisassagaat. Tassumallu saniatigut aatsaat malungalugu aatsaa
pisariaqartitsisoqaleraangat ataatsimiititaliat immikkut ittumik ilisimasallit
atorneqarsinnaasut, ataatsimeereernerullu kingornatigut
atorunnaarsinneqartassallutik, allaanngilaq ilageeqarnermut tunngasut aatsaat
taamak ukiuni makkunani piorsarneqarnissamikkut nukittorsarneqarnissamikkullu
pisariaqartitsigilersut missukutarineqartut.
Soormi
ataatsimiititaliamik ataavartumik immikkut ilisimasalinnik
siunnersuisartussamik
pilersitsisoqarnianngilaq? Allanimmi ataavartunik
ataatsimiititaliarpassuaqarpoq, immaqa ilageeqarnermut tunngasuniit pingaaruteqannginnerungaluartunik.
Ilageeqarnerummi iluani iluarsaatassat amingaatillu pisariaqartinneqartut
suliarineqartariaqarput.
Konrad
Steenholdt, Kultureqarnermut, Ilinniartitaanermut Ilageeqarnermullu
Naalakkersuisoq:
Una
siunnersuut Ilagiit qullersaat suleqatigalugit isumasioreerlugit
aalajangiineruvoq maani taamatut allannguuteqartitsinissamik
saqqummiussinissannut.
Kangerlussuarmi
saqqummiussininni taasanni upernaaq isumaqatigiinnikkut, tassa Kangerlussuarmi
ataatsimeersuarneq taanna pivoq ilagiit sinniisaannik ataatsimeereernerup
kingorna, ulloq aalajangersimasut qaangiutsinnagit inatsisitigut
pisussaaffigigatsigu qinigaaqqaartut taakkua karterlugit isumasioqatiginissaat.
Tassanilu oqaloqatigisimavagut suliassanut tamakkununnga tunngasut. Malugaara
qallunaatut taaneqartartoq Anĉrdemokrati@ imaluunniit kalaallisuun-ngorlugu
najugaqavissut suleqatigalugit suliassanik assigiinngitsunik
inerisitsiartuaarsin- naaneq, assorsuaq
pingaartinneqartoq.
Ilagiit
sinniisaat najukkatik tunngavigalugit qinerneqarsimasut najukkaminni pissutsit
tunngavigalugit siunnersuisarput assigiinngitsunik. Taakkua siunnersuutaat
ingerlanneqartarput provsteqarfinnut pingasunut agguataarneqarsimasunut.
Taakkulu suliaat ingerlateqqinneqartarput qullersaqarfimmut maanga taavalu
aamma biskopeqarfik ilanngullugu. Taakkuli isumaqarput suliassat tassani ima
inissilluareersimatigisoq, assut ilaasa tupigalugu taakkua inuit ilagiit
qinigaasa avataatigut Naalakkersuisut aamma toqqartuisut oqarlutik, illit
ilaasortaassaatit maannartillugillu. Naammagisimaartutut isigineqarpoq taanna
najukkami pissutsit tunngavigalugit ilagiit sinniisaasa suliassat
suliarissagaat, provstip udvalgianut ingerlatinneqartarnissaat taavalu
katersorlugit taamatut isumassarsiat piviusunngortikkiartuaarnissaat.
Imatut
paatsoorneqaqqunngeqaara ilagiinni suliniarneq ukiuni kingullerni
biskopeqarfillu ilagiinnullu sinniisut akornanni ilungersuutigalugu nukissarlu
annerpaaq atorlugu sulissutigi-simasarput tassaavoq
palasissaaleqileriartuinnarnerup qanoq ililluni unitsinneqarsinnaanissaa.
Taanna sakkortoorujussuarmik sulissutiginiarsimavarput. Taamaattumik assut
nuannerpoq takullugit ukiarmanna palasissatut ilinniarumallutik aallartittut
taamak amerlatigimmata. Taassuma saniatigut nukissaqalerpugut uani
oqaaserineqartut tunngavigalugit misissueqqissa- luta nukiit palasissaaleqinerup aaqqiivigineqarnissaanut
taamaallaat atorunnaarlugit kisianni aamma qinikkat ilagiit namminneerlutik
qinersimasaasa uatsinnut apississutaat tunngavigalugit suliniarnissatsinnut
periarfissaqarnerulerluta.
Taamaattumik
nalilersuineq taanna tunngavigalugu siunnersuutigaara taassuma allannguallatsinnissaa
inatsisip ullumikkut tunngaviusup. Kisianni imatut paaseqqunngilanga biskopilu
qaammammut ataasiarluta oqaloqatigiittarnitsigut tassaalersugut nunarput aquleripput
kisermaassilluta ilagiillu qanoq iliornissaannik oqaluttuullutigit. Taanna
anguniarneqanngilluinnarput, kisianni Naalakkersuisut paaserusuppara aammalu
biskopip aamma taanna soqutigaa Naalakkersuinikkut ilagiillu
ingerlatitaaneranni pissutsit qanoq innersut nalilersuisinnaanissaq
tunngavigalugu isumasioqatigiittarpugut tassani. Imaanngilaq Nuumminngaaniit
suna tamaat aqullugu ingerlatsiniartugut.
Uani
oqaaseqartut tunngavigalugit oqaaseqaataat nuannaarpunga taperserneqarmat
taanna suleriaasissatut siunnersuutigineqartoq. Soorunami Siumup oqaluttuanut
taanna akissutigaara suna pillugu suliassaq taamatut ilusilerlugu
saqqummiuttariaqarsimallugu. Kisianni ajoriffissaqartinngilara soorunami
ataatsimiisitaliami tassani apeqqutit taakku uani tiguneqartut oqaatigineqartut
nalilersoqqinneqassappata.
IA-p
oqaluttuanut qujavunga taamak erseqqaritsigisumik nalilersuimmat ilagiinnut
sulinermut tunngasunik. Aap, nutaanik qanoq iliuuseqarniartariaqalerpugut.
Soorluluunniit eqqarsaatikka ilaatigut atuarsimagitit. Ilaatigut
eqqarsaatigaara manna tikillugu ilagiinni suliniarnermi nalilersuisartut
tassaasimapput ilagiinni atorfeqareersut palasit, ajoqit pattattartut imminnut
naliler-sortartut taanna uanga ajorinngilluinnarpara aamma taamaatitinnianngilara.
Kisianni eqqarsaatersuutiga uaniippoq nunatsinni inuiaqatigiit akornanni
ilageeqarnerup inissisimanera nalilersorneqartariaqarpoq tassani ukua
ilagiinni sulisooreersut kisiisa isumasiornagit kisianni inuit aqqusinermiittut
aamma taakkua tigullugit isumasioqatigiiffigissallugit soorlu ilaatigut
Maliinan- nguup eqqartugai tarnitsigut nakussassagutta pisariaqarluinnarpoq
ilageeqarnermik periarfissat aqqutigalugit qanoq iliuuseqarnissarput.
Taamaattumik
una uanga isummiuppara ukiumi tulliuttumi pisariaqalersoq ilageeqarneq pillu-
gu isumasioqatigiinnissarput. Ataatsimeersuaqatigiittarnerpassuit
assigiinngitsunik qulequtallit ingerlanneqartarput kisianni ilumoorpoq ilagiit
akornanni suliniarnerup nalilersorneqarnissaa ukiuni makkunani pisariaqalerpoq.
Soorlu oqartunga ilagiinni sulisussat pillugit ajornartorsiutit pillugit
suliassaq annerpaaq imaluunnit illoqqinarnissaat taanna massakkut
anigortuusivarput. Atuartut aallartipput ilinniarnerit aallartipput taava
tullia pisariaqalissaaq una nunatsinni inuiaat apersussallugit ilageeqarneruna
qanoq sumullu atorniaripput. Taamaattumik IA-kut oqaluttuat qutsavigissavara
uani erseqqarissunik isummanik nillikaatitsinera pillugu. Ingerlariaqqissaagut
suliassat soorlu ukua unamminarnerullutillu piuminarneruleriartortut kisianni
soorunami imatut paasineqassanngilaq siunnersuisartut soraarsinneratigut
suliassat tamaasa unitsikkigut, naamik ingerlaqqissaagut pitsaanerusumillu
aaqqiinissaq aamma anguniarlugu nukigut atoqqissavagut.
Otto Steenholdt, Atassut:
Oqaaseqartut tusarnaarlugit
nuannarilerlugit ilanngutilaarusuppunga. Ullumikkut pissutsit
ajornartorsiuterpaalussuit taagorneqartarput ulluinnarni pisimasut alianartut.
Tamakkua tusarlugit tupigisarpakka ilageeqarnerinnarmut pisuutitsisut. Oqaluffik
taakkunani imannak kisimik pisuunngilaq. Naalagiarneq ajorami taamatut
nalaataqartutut aamma oqaatigisariaqartanngillat. Ullumikkut pissutsit
qiviarutsigit tassa soorlu oqareersunga ilagiit oqaluffilluunniit imannak
pisuutinniartariaqanngillat. Qanga sammisassaqanngilluinnarallaratta
naalagiarnerlu kisimi sammisassaagallarmat ulikkaavillugu naalagissattarpugut.
Ingasaassiniartut ullumi tusartakkagut silarsuarmi sumiluunniit radioaviisikkut
TV-kut isiginnaartakkagut, toqoraasut imannaannaq Afrikap avannaani
upperniaqqissaarluartuugamik naalakkersuerusuttut nunartik taanna kisiat
aallaavigalugu naalakkersorneqassasut.
Tamakku usoraagut
ingasaasserusuppugut, naamik aamma uagut sapaatikkulluunniit arsaattut
isiginnaarusuttarniarpagut. Allamilluunniit suliassaqarsimagutta
naalagianngikkallarsinnaanerput aamma inuup pisussaaffigaa. Taamaattumik
Malinanguup aallaqqaasiussaa atuarlugu ila nuannissusia
suleqaterpassuaqartarami imak oqartunik socialistiugaanni oqaluffik
atorfissaqartinneqan-ngilaq. Qujanaq nunatsinni taamaattoqanngimmat. Oqaatsit
taakkua nuannersorujussuit soorlu inoqammut asanninneq inoqatillu
kikkuugaluarpataluunniit assigiinngitsumik naligiissumillu
isigineqartariaqarneri pissusissamisoorput. Meeraalluuni aajukua aamma
eqqaamasassat piitsunnguinngooq qilammut kisimik pissapput. Tamatta upperaagut
aamma tassaniittoqarpoq pisoorsuarnik Lazarusimillu kilattorsuarmik kina arlaat
tassani pitsaasumik angusaqarpa? Taan-na kisimi pisoorsuaq pillagassaavoq.
Taanna socialismimut immaqa ajunngilaq maanngaaniit eqqartussallugu. Taamatut
oqaatigiinnarniarpara una ingasaateqqunagu upperisamik ingasaassineq aamma
inuiaqatigiinnut navianartuummat.
Aammalu sammisassaqarlualerneq
ullumikkut qangamut naleqqiullugu pissusissamisoorpoq Taamaattumik
palasissaaleqineq aallanik pissuteqarsinnaavoq uppinnginnermik pissuteqarnani.
Upperisamik soqutigisaqannginnermik aallaaveqarnani nunamiorpalussutsimilli
aallaaveqan-nguatsiarluni aamma sammisassarpassuit tassaniipput. Uanga
palasinngornavianngilanga aningaasarsiassakka ikippallaaqimmata naak
oqaluussigaluarlunga aningaasarsiaqarnanga piitsunnguuguma aatsaat qilammut
pisussaallunga.
Jonathan Motzfeldt, Naalakkersuisut
Siulittaasuat:
Imaanngikkaluarpoq Otto Steenholdt
akissuteqarfiginiarlugu qaqisunga kisianni Naalakkersuisup Ilageeqarnermut
Naalakkersuisup akissutaanut ilassutitut oqaatigilaarniarpara aamma Siumup
oqaluttuata oqaatigisaa isumaqatigigakku imak paasillugu maani
saqqummiunneqartoq aamma saqqummiussinermi ilanngunneqarmat ilagiit taamatut
siulersuisoqarnerat atorunnaarsinneqarpat taava taarsiullugu Naalakkersuisoq
udvalginik immikkut siunnertaqartunik atulersitsisarluni
periarfissinneqassasoq. Taanna oqaloqatigiissutiginiarneqarmat udvalgimi
paasilluarpara. Isumaqarpunga taanna ilagiit siulersuisoqarfiat kipisoornani
kisianni atorunnaassappat taarteqarnissaa ingeerlaavartumik aamma peqarnissaa
nalilertariaqartoq.
Aamma Kangerlussuarmi
ataatsimiissimanermi oqaatigineqartuni nalunaarummi uani oqaatigineqarpoq, 26.
maj 1997 Kangerlussuarmi ataatsimiinnerminni ilagiit oqaatigigaat
kissaatigineqartoq ilagiit sinniisaat provsteqarfinnilu ataatsimiititaliat
tassaassasut apeqqutini ilageeqarnermut tunngasuni Naalakkersuisunut
ilaasortamut siunnersuisartut. Tamakkuupput aamma oqaaseqarnermi
naaperiarfiusinnaasut taartissaannik maannakkut aaqqissuussinermi
siunnerfigineqartut.
Taamaattumik oqaatigineqartutut
udvalgip misissuinissaani aamma Maliinannguup Mĝlgaardip oqaatigisai Inuit
Ataqatigiit sinerlugit, ilagiit tungaatigut oqalliseqarnissamik upernaamut
saqqummiussisoqarnissaanik noqqaaneq; isumaqarpunga Naalakkersuisuninngaanniit
aamma misissussallugu pisariaqartoq. Ullumikkutut oqallinneq ilagiit
atugarisaasigut siulersorneqarnerisigut aammalu ilinniartitaanerat maannakkut
ataavartutut ingerlalersussaq ilanngullugu. Ilagiit sinniisaasalu
annertunerusumik pisinnaatitaaffii, angalanerminni ajornartorsiutigisaat il.il.
tikinneqarsinnaaqqullugit udvalgini aamma nalilersoqqinneqarnissaat
kissaatiginarpoq.
Taamatut ilageeqarnermut
Naalakkersuisup oqaatigisaa
tapersiiffigaara udvalgimilu sulilluarnissamik kissaassillunga
Maliinannguaq Marcussen Mĝlgaard:
Inuit Ataqatigiit oqaaseqartuat:
Aap, Otto Steenholdt-iuna aamma
akissuteqarfigilaarniarlugu. Soorlulusooq mamiangigaa taamatut nipeqarluta
saqqummernerput socialismingooq uppertuunngimmat. Isumaqarpunga maanngaanniit
ajoqersuuttariaqanngikkaatigut uppertuussanersugut uppertuussanersuunnginnersugulluunniit
inuup piginnaatitaaffigivaa aamma taanna ataqqilluinnaqqissaartariaqarpoq.
Isumaqarpunga kristumiussuseq eqqarsaatigissagaanni oqariartuutaalu annerpaamik
inoqatinut asanninneq aammalu naligiissumik inuuneq annerpaamik
oqariartuutaasoq taannalu aamma uagut Inuit Ataqatigiinni inuit
naligiinnerusumik atugaqarnissaat soorunalimi taamaalillugu
oqaaseqarfigivarput.
Oqaatigisannut nuannaarutigivara
Naalakkersuisut Siulittaasuata aammalu Kultureqarnermut Ilageeqarnermullu
Naalakkersuisup taamatut oqaaseqarneq tapersersormagu, oqallittoqartariaqarpoq.
Unalu akissuteqarfiginngimmagu apeqqutigilaarusullugu ilaatigut
nalunaarusiornissaq soorlu ilageeqarfiit atassuteqarfigalugit immaqa
sumiiffimminni isumasiortitseriarlutik katersukkanik isumassarsianik nutaanik
nassiussuinerisigut aammalu immaqa inuusuttut Sorlak allalu inuusuttut
suliniaqatigiiffii suleqatigalugit taamatut isumassarsianik nutaanik taamatut
katersueriarluni nalunaarusiamik isumassarsianik nutaanik Inatsisartunut
saqqummiussisinnaanera takorloorlugu taamatut siunnersuuteqarpugut.
Soorunami aamma orniginarsinnaassooq ataatsimeersuarnermik
pilersitsinissaq, sukkulluunniit aamma tamakku isumassarsianik annertuumik
katersuiffiusarmata.
Kisianni aamma ilaatigut
ataatsimeersuarnerit tamakku sumiiffiit illoqarfiit aallartitaqakkajuttarput
ataasiakkaanik imaluunniit inunnik marlunnik, sumiiffinni ataasiakkaani
oqallinnerit annertunerusut piniaraanni aamma sumiiffinni isummat
assigiinngitsut aamma tamatumani amerlanerpaat peqataatinnissaat isumaqarpunga
pingaaruteqartuusoq. Kisianni tassa oqareernittuut nuannaarutigivara
pimoorullugu taamatut Naalakkersuisut tungaaningaanniit ilassilluarneqarmat.
Otto Steenholdt: Atassut:
Partiimut sumulluunnit
ilanngutissagaanni partiimilluunnit pilersitsisartut isigissagaanni tunuliaqutaat
misissoqqaarluarneqartariaqartarput. Silarsuup oqaluttuarisaanerani pissutsit
aallaavigalugit socialisme aatsaannguaq oqaatsimik taavara. Alianaqisumik
taakkunani oqaluffiit matooqqaarneqartut atuartarsimavagut nalunngilagut
ullumikkullu taamaattoqarpoq. Qujaffigaakkit Maliinannguaq ilissi
taamaaliunnginnersi aallaavigalugu tassa taanna paasisassarsi. Oqalutuarisaasut
nuanneeqisut tusariikkat atornagit ilissi taamaaliornersi qutsavigigakku,
oqaluffiit matooqqaarneqartut palasit toqorarneqartut nalunnginnatsigit
oqaluttuarisaanermi taakkua ilinniarsimallugit.
Aamma oqaluttuutissanngilassi
ilumoorpusi aamma taamaaliunngilanga kina uppissasoq uppissannginnersorluunniit
uanga susassarinngilara aamma maangaaniit taama oqanngilanga. Kisiannili una
piinnariga susassaqariartorneq imannaannaavik angummanniarfigisarput tassa
taannarpiaannguatsiarpoq ilaatigut piffissaaruffigisaligarput allaat
oqaluffiliarnissamulluunniit. Taakkuuku uanga sanileriissikkikka qanga
sammisaqarpiannginneq massakkullu imannarujussuaq sapaatikkut aatsaat
piffissaqarfigilertakkagut imatut naqissusissanngimmatigut uppinngitsorsuugatta
oqaluffiliarneq ajortugut.
Palasissaaleqineq taanna
allamiissoraara oqaatsikka siulliit ima naaginnarpakka, ila nunamiorpalaarunarami
taanna akissaatit immaqa aamma tassani pisooqataagamik.
Konrad Steenholdt: Kultureqarnermut,
Ilinniartitaanermut Ilageeqarnermullu Naalakkersuisoq:
Siullermik oqaaseqarninni puigugara
erseqqissaatigilaarlara. Siornatigut ilagiit nunatsinni ukiumut
aningaasaliissutigisartakkagut maanngaanniit qitiusumik ingerlanneqarsimapput,
tassa maanngaanniit tamarmik aningaasartai ingerlanneqarlutik
Vicebiskoppeqarfimminngaanniit. Kisianni aatsaat 1996-mi nutarterineqarpoq
taannalu sioqqullugu taakkua uani siunnersuummi tunuartinniarneqartut
siunnersortituut ingerlalluarsimaqaat suleqatigineqarluarlutillu.
Kisianni 1996-minngaanniit imaalerpoq
aningaasaliissutaasartut Provsteqarfinnut pingasunut agguaanneqartalerput
nammineq akisussaaffittut ingerlatassaat. Tassa Kujataata Provsteqarfia, Qeqqata
Provsteqarfia Avannaatalu Provsteqarfia. Qeqqanullu Provsteqarfimmut atasuupput
Tunu Avanersuarlu. Aningaasatigut akisussaassuseq Qeqqani maaniigunnaarluni
Provsteqarfinnut agguaanneqarpoq. Imaappoq provsteqarfinni taakkunani ilagiit
pillugit suleriaaseq eqaannerulersinneqarsimavoq, ilagiit sinniisaat
siunnersortituut suleqatigalugit aningaasalersuinerit ingerlanneqalersimapput.
Tassaluuna tassumarpiaap kinguneriga uuma inatsisip allanngortinneqarnissaanik
siunnersuuteqaratta. Aamma una pingaartikkamikku ilagiit sinniisaanut qinigaasut; qinikkatunuku suut
suliariniarigut suusupagineqartutut aallatut ililluta Naalakkersuisoq ataatsimiititaliussappat
uani ilusilikkatuut.
Taava una aamma
paatsoorneqaqqunaguuna erseqqissumik oqaatigilaarlara, ullumikkut inatsimmi
atuuttumi periarfissaqareerpoq apeqqutinut assigiinngitsunut tunngasumik
Naalakkersuisut immikkut ataatsimiititaliussallutik - taanna ilaareerpoq
taannalu allanngortinniarneqanngilaq.
Tassa imaappoq isumassarsiat nutaat
sammilissavagut soorlu aatsaannguaq oqaaseqaqqinninni oqaatigitsiariga.
Eeqqarsaatigaara ilagiit qanoq inuiaqatigiinni inissisimanerat
nalilersorneqarnissaa siunniusimaarpara. Isumassarsiat mattunneqanngillat
katersorneqarsinnaapput suminngaanniilluunniit - qinnuigalugit soorlu
provsteqarfinni assigiinngitsuni una sammilaarsiuk, taavalu taakkua
pissarsiarisinnaanissaat aamma taamaalilluni iluatinnaateqarpoq. Imaappoq
aningaasat ukununnga atorneqartartut allanut aamma atorneqarsinnaaneri
periarfissarsiuutissavagut isumassarsiat assigiinngitsut piumasatik.
Taava aamma sioqqullunga Marianne
Jensennip nalaani ilaatigut ingerlanneqartarsimapput inuusuttut tassa Sorlak
toqqammavigalugu inuusuttut oqallitsinneqartarsimallutik ilagiit inissisimanerat
tunngavigalugu. Suliat taamaattut tassa 1994-imi siullerpaamik
taamaaliortoqarsimavoq, aammalu malunnarpoq inuusuttut taanna soqutigiartoraat
ilagiinni oqallinnermut tusarneqarnissartik, taamaattut suleriaatsit
asigiinngitsut soorunami periarfissikkumavagut ammavugullu tamakkua nunatsinni
oqallinnermi soqutiginartunngortitsillutillu eqeersaasuusarmata.
Kisianni tassa soorlu oqarnittuut
isumassarsiat assigiinngitsut tamaasa iluatigalugit tigusarpagut, taakkulu
aamma periarfissaqarsinnaanissaat siunissami sulinitsinni salliutitassat
ilagisussaavaat. Qujanaq taamatut oqallinnermut taavalu suliassaq una
tigoqqikkumaarparput Ataatsimiititaliami nalilersorneqareerpat partiit
oqaluttuisa assigiinngitsut nalilersuinerat tunngavigalugu.
Oqaluuserisaq naammassivoq.