Oqaluuserisassani immokkoortoq 41-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Sisamanngorneq 9. oktober 1997 nal. 13.07
Ataatsimiinnermik aqutsisoq: Siulittaasoqarfimmi ilaasortaq Lars Sĝrensen.
Hans Enoksen, apeqquteqartoq, Siumut:
Kommuunit inuussutissarsiutitigut siuarsaaniarnermi (atukkiisinnaanerannut) tunngasumik siunnersuutiga matumuuna saqqummiutissavara.
Naluneqanngitsutuut kommuunit inuussutissarsiornikkut siuarsaaniarnermi soorlu aalisariutit iluarsaanneqarneranut aquuteralaajarsimasut umiatsiaarartaarniartut taarsersugassanik atortitsinneqartarnikuupput. Ajoraluartumillu ullumikkut tamanna ajornartitaalernikuuvoq.
Ukiut makku aalisartut piniartullu inuussutissarsiornikkut ilungersunartumik inissisimalersimapput, aalisakkat ajornakusoorpallaarnerat pissutigalugu. Qujanartumillu avannaani qaleralinniarneq iluatsisimaarpoq, qaleralinniartunut ajunngilluinnartumik.
Ukiut kingulliit kommuunit inuussutissarsiornikkut taarsigassartitsisarnerat Namminersornerusunit unitsinneqarpoq, assut annertuumik aalisartunut piniartunullu eqquinerluttumik. Isumaqarpunga tamanna kommuunit (nammineersinnaalernerannik) mattussinerusoq, tassami kommunalbestyrelsip nammineq nalunngilaa pissutsit qanoq innersut, kommuuneqarfigisaminni.
Taamaammat tamanna mattussineq unitsittariaqarpoq. Kiammi akuersaarsinnaavaa kommuunimi inuussutissarsiornikkut siuarsaaniaraanni taamaallaat inunnik isumaginninnermi aningaasartuutit kisimik isumalluutigineqarnissaat.
Taamaammat siunnersuutigaara inuussutissarsiornikkut siuarsaanissami kommuunit namminneq aningaasaliisarnerisa atuutsinneqaqqilernissaat. Inuit aningaasarsiornikkut ajornartorsiulersi-masut ikiorsiiffigalugit ingerlariaqqinnissaat inuiaqatigiinnit akikinnerungaassammat. Neriuutigaara siunnersuut ilassilluarneqassasoq. Illoqarfimmiut nunaqarfimmiullu tassani annertuumik ikorsiiffigineqassammata inuussutissarsiornermikkut. Qujanaq.
Jonathan Motzfeldt, Naalakkersuisut Siulittaasuat:
Inatsisartunut ilaasortap Hans Enoksen-ip siunnersuutimini oqaatigaa, kommuunnit inuussutissarsiornikkut siuarsaaniarnerminni inuussutissarsiortunut taarsigassarsiassaminnut periarfissaarutsinneqarsimasut. Kommuunit inuussutissarsiortunut taarsigassartitsinissaminnut periarfissaarutsinneqanngillat. Taamaaliorsinnaatitaanerammi kommuunip inuussutissarsiutinut aningaasaleeqataasinnaanissaa pillugu inatsisip normu 22, 3 november, 1994-imeersup akuersissutigineqarneratigut aalajangersimasumik malittarisassinneqarmat. Inatsisip taassuma atuutilinnginnerani kommuunit aningaasanik taarsigassarsinissaminnut periarfissaqartitaapput, taakku kommuunit akileraarutitigut isertitaasa 5 procentiinut naleqquttussaallutik.
Malittarisassap taassuma sanngeequtigai, kommuuunit akileraarutitigut isertitakitsut taarsigassarsinissaminnut periarfissalunnerat aammalu kommuunit assigiinngitsut malittareqqusanik a-qutsinerisa piffimmiit piffimmut (sumiiffimmiit sumiiffimmut) assigiinngisitaarnerisa aalaja-ngersimasumik qulakkeerinninnissaq pisinnaasimanngimmagu.
Inatsisip normu 22, 3 november, 1994-imeersup akuersissutigineqarneratigut kommuunit inuussutissarsiutinik ingerlatsinermut akuliussinnaanerat aalajangersimasumik malitassaqarlu- ni periarfissiissutigineqarpoq. Kisianni kommuunit inuussutissarsiortunut taarsigassarsinissamut suli periarfissaqartitaapput.
Kisianni ilumoorpoq inatsit killiliissutinik imaqarmat, taakkunani kommuunip aningaasaliinera inuussutissarsiutinik pioreersunik allanut unammillernermik annerulersitsinnginnissaa pillugu maleruaqqusakkut. Tamanna isumaqarpunga kommuunit inuussutissarsiutinut aningaasaliineri kommuunimi inuussutissarsiutit ingerlatassanut nutaanut siunertaqartinneqarnerusariaqartut.
Taamaattumik Naalakkersuisut isumaqatigaatsit ugguuna: Kommuunit inuussutissarsiortunut taarsigassartitsinissaminnut periarfissaqartitaasariaqartut, kisianni Naalakkersuisut isumaqarput inatsit maannakkut atuuttoq tamatumunnga naammattunik periarfissaqartitsereersoq.
Lars Karl Jensen, Siumup oqaaseqartua:
Inatsisartunut ilaasortap Hans Enoksen-ip kommuunit inuussutissarsiutitigut siuarsaanermi taarsigassartitsisarnerisa atuutsinneqalernissaanik siunnersuutaa; tassuunga assingusumik ina-tsisartunut ilaasortat allat siusinnerusukkut oqaluuserisassanngortitsisarnerat tunngavigalugu matumani oqaluuserisassanngortinneqartoq Siumumiit taperserlugu imatut oqaaseqarfigissavara:
Inuussutissarsiutitigut siuarsaaniarnermi taarsigassartitsisarnermut kommuunit atukkiisinnaanerat ukiuni arlalinni atuutereersimasoq Kommunalreformkommision-ip suliaasa ilaanut atatillugu 1994-imi unitsinneqarpoq, tamatumunngalu taarsiullugu inuussutissarsiutinik siuarsaaniarnermut atasumik kommuunit aningaasaleeqataasinnaanerat inatsisikkut 1994-imi atulersukkut periarfissinneqarluni.
Siumumiit maluginiarparput kommuunit inuussutissarsiutitigut siuarsaaniarnermut aningaasaleeqataasinnaanerat ukiuni pingasuni atuutereersimalersoq kommuunit akissaqassusiat apeqqutaatillugu illoqarfiit ilaannaanni taamatut aaqqissuussineq atortinneqartarsimasoq. Amerlaqisunilli inuussutissarsiutinik ingerlatsereersut toqqammavissaannik ajornartorsiorlersillugit kommuunini aningaasanik atukkerneqarsinnaanngimmata taamatut nalaataqartut inunnik isumaginninnerup iluani periarfissanik innersuunneqaannartarsimasut.
Qaqugumulluunniit Siumup akuersaarumanngilaa, inunnik isumaginninnermut aningaasartuutit killeqareeqisut atuuffissaminnut atorneqaratik taamatut ilusilimmik atorneqarnissaannik aaqqissuussineq. Tulluartuunngilarmi inuk peqqissoq, sulisinnaasoq akilersuinissaminnullu periarfissarsiortoq inuuniarnikkut ingerlataanik aningaasarsiornikkut ajornartoortillugu inunnik isumaginninnermi aningaasanik aalliinnartunngortissallugu.
1994-imi inatsisiliarineqarsimasup siunertarinngilaa, kommuunini innuttaasut atugarliortinneqarnissaat. Taamaattumik inatsit taanna kommuunit nammineersinnaanerannut killiliinertut paasillugu Siumup Naalakkersuisunut inassutigissavaa, KANUKOKA peqatigalugu kommuunit inuussutissarsiutitigut siuarsaaniarnermi taarsigassartitsisinnaanerata kommuunit aningaasaqarnerannut akornutaanngitsumik atuutileqqinneqarnissaa kommuunit aqunneqarneranni periarfissat aqqutigalugit aqqutissarsiuuteqqullugu.
Taamatut oqaaseqarluta Inatsisarnut ilaasortap Hans Enoksen-ip siunnersuutaa taperserparput.
Jakob Sivertsen, Atassutip oqaaseqartua:
Siunnersuut saqqummiunneqartoq siornatigut inatsisartuni siunnersuutitut saqqummiunneqareersimavoq, allakkatigullu akineqarsimalluni.
Atassummiit erseqqissarusupparput ullumikkut kommuunit inuussutissarsiutinik aallartitsitsiniarnermi aningaasatigut tapersiisinnaammata piginneqataasinnaallutilluunniit atukkiisarnermut taarsiullugu.
Ullumikkut kommuunini inuussutissarsiutit siuarsarniarlugit kommuunit tapersiisinnaaneran- nik periarfissaq naammagineqarsimanngippat taava kommuunit atukkiisinnaanerat anguniarlu- gu Atassummiit suleqataanissarput piareersimaffigaarput. Apeqqut kommuunit aningaasaqarnerannut attuumassuteqarmat matumuuna Atassummiit piumasarissavarput nunatsinni kommuunit tamarmik apeqqut pineqartoq pillugu tusarniaaffigineqassasut. Tamatumani kommuunit nammineersinnaanerat aalajangiinngikkallarnermi ataqqineqartariaqarmat.
Kommuunit atukkiisinnaanerat atortuulersinneqaqqissappat nunarput tamaat eqqarsaatigalu assigiimmik malittarisassaqarnissap qulakkeerneqarnissaa pingaartumik atortut suut atorniarnikkut suut pissarsiarineqarsinnaasut erseqqissumik nalunaarsorsimanissaat Atassummiit pingaartittupilussuuvarput.
Kommuunit karsiat siunissami sunik tamanit atorniartarfittut isigineqaleqqunagu. Kiisalu kommuunit atukkiisalernissaat nunatsinni kommuunit akuersaarpassuk taava KANUKOKA peqatigilluinnarlugu malittarisassat kiisalu kommuunini aqutsinermut inatsit paatsuugassanngitsumik aqqiivigineqarnissaat Atassummiit kissaatigaarput. Hans Enoksen-ip siunnersuutaa pillugu Atassummiit taamatut oqaaseqarpugut.
Johan Lund Olsen, Inuit Ataqatigiit oqaaseqartuat:
Qinigaaffiup matuma ingerlasup 1995-imit aallartinneranit Inatsisartunut ilaasortat tallimat tas-sa aamma siunnersuuteqartoq ilanngullugu siunnersuuteqartarsimapput ESU-mut assingusumik kommuunit innuttaminnut jannuaarip aallaqqaataa 1995-mi tikillugu tapiissuteqartarsimanerannut ammaassisoqaqqinnissaanik siunertaqartumik inatsisinik maannamut atuutilersimasunik allanngortitsisariaqartugut.
Tamanna takussutissaasorivarput ammaassisoqaqqinnissaanik immaqa tunngavissaqarlualersimasugut, tassami siunnersuuteqartarsimasut tamarmik inatsisartuni partiit annersanit pingasuneersuusarsimapput taassumalu saniatigut kommuunini assigiinngitsuni suleqataanerminni misilittagarilersimasaannik aamma aallaaveqartarsimallutik.
1995 sioqqullugu pissusiusut kommuuninut ajornartitaasimanngilaq ESU-mi malittarisassaareersut saniatigut pingaartumik umiatsiaararsortunillu ajornartuuissimasunut allatigullu ikiorsiivigineqarsinnaanngitsunut taarsigassartitsisinnaasarnerat imaluunniit tapiissuteqartarsinnaasimanerat. Tamannali maanna ajornarsivissimammat oqaatigissavara Inuit Ataqatigiit siunnersuuteqartoq tunngaviatigut isumaqatigigatsigu kisiannili aamma kissaatigissagatsigu allannguisoqartinnagu KANUKOKA aqqutigalugu kommuuninut tusarniaatitsisoqaqqaassasoq ajornanngip- pat upernaakkut 1998-imi ataatsimiinnissatsinnut erseqqissumik inassuteqartoqarsinnaaqqullugu.
Soorunalumi pingaartikkatsigu tamanna patsiseqarpoq kommuunit qulaatiinnarlugit aalajangiisinnaannginnatta aammalu eqqaamasariaqaratsigu maannamut pissusiulersunut kommuunit iluarsartuuteqqinnissaannut ataatsimiititaliarsuarmi sulinermi KANUKOKA matumani sammineqartunut aamma isumaqataareersimammat. Ilisimaneqartutuulli pisut upernaaq kommuuninut nutaamik qinersisoqareersimavoq KANUKOKA-p siulersorneqarnerani nikittoqarneranik aam-ma kinguneqarsimasumik.
Taamaattumik takisuuliunngikkaluarluta siunnersuuteqartoq siunnersuuteqartarsimasullu allat tunngaviatigut isumaqatigisinnarlugit kissaatigissavarput suliaq maanga unitsivinngikkaluarlugu kommuuninut tusarniaasoqaqqaarallassasoq 1998-imi upernaakkut inatsisartuni ataatsimiilerutta aalajangiinissatsinnut tunngavissaqarluarniassagatta.
Bjarne Kreutzmann, Akulliit Partiiat:
Inuussutissarsiortut
ajornartorsiuteqarnerannut Akulliit partiiaat paasinnilluarpoq aappaatigulli
inuussutissarsiutinut kommuunit taarsigassartitsinissamut periarfissaat ukiuni
kingullerni unitsinneqarsimasoq nalunagu. Taamaattumik taarsigassartitsinerup
unitsinneqarnissaanik aalajangersimanerup atorunnaarsinneqarnissaa Akulliit
Partiiata (navianartoqartippaa) ulorianartoqartippaa. Unitsitsinissamut
taamani aalajangernermut tunngaviusut ilaat nalunngisat naapertorlugit
tassaasimammat unammilleqatigiissinnaanerup equngassuteqarnera.
Paasivara kommuunit qanoq
iliuuseqarsinnaanissaminnut periarfissaqartinneqartut taassuma saniatigut.
Taamaattumik isumaqarpunga taamani aalajangersimaneq eqqarsaatigalugu taamatut
aalajangiisoqassappat avaqqutaarinerussasoq. Tassami kommuunit
periarfissiinnassagatsigit aammattaarli pinngitsaaliisutut issagatsigit
imaatigut inuussutissarsiortuniunnaanngitsoq soorlu aalisartutut. Inuussutissarsiutinillu
allanut tapiissuteqarnissaannut isumaga naapertorlugu taamaaliornikkut
kommuunip aningaasaqarniarnikkut artornartorsioreersut nammatassissagatsigit
qaangeruminaasinnaasumik.
Taamatut naatsumik siunnersuut
oqaaseqarfigaara.
Anthon Frederiksen, Kattusseqatigiit:
Oqaaseqalinnginninni isumaqarpunga
pingaaruteqartoq eqqaassallugu inatsisartuni suleriaatsitta malinneqarnissaa
pingaaruteqarmat. Oqaluuserisassat pillugit paasissutissat naalakkersuisuninngaanniit
akissuteqaatit oqaluuserineqannginnerani tigunissaat pingaaruteqarpoq. Suliami
pineqartumi Naalakkersuisut akissuteqaataat tigusimannginnatsigu
agguaanneqanngimmaallu tamanna iluaangivara.
Inatsisartunut ilaasortap Hans Enoksen-ip
siunnersuutaa, Kattusseqatigiit tungaaningaanniit paasilluarpara. Taamatullu
aalisartunut piniartunullu kommuunit periarfissamik ammaasseqqinnissaat
tapersersorlugu.
Soorunami taamatut periarfissamik
ammaassisoqaqqissapput siornatigut misilittakkat isiginianngitsoorneqarsinnaanngillat,
tassa kommuunit ilaanni ajoraluartumik taamtut ikiorsiisarnermi aningaasat
kommuuninut isertitsinneqartussat taarsersorneqartarneri
ajornartorsiutaasarsimammata.
Taamaattumik pisariaqarpoq kommuuninut
inuussutissarsiutinullu taperserneqartussanut assigiimmik
atuutsinneqarsinnaasumillu aningaasat utertinneqarnissaanut qulakkeerinnittumik
malittarisassaliortoqarnissaa. Inuppassuimmi akilersuinissamut
piumasssuseqartut akiliiumajunnaartartunik eqqorneqartarmata.
Inuussutissarsiutillu siuarsarneqarnissaat pimoorullugu sulissutigineqassappat
pisariaqarpoq inuussutissarsiutip imaani nunamilu assigiimmik tapersersorneqarnissaat.
taamaammalli kommuunit kisimiillutik isumalluutigineqarsinnaanngillat.
Matumanilu aperiasariaqarpoq piffissanngorsimannginnersoq KNAPK-p SIK-illu
siuarsaanissamut peqataatinneqarnerunissaat
aqqutissarsiuunneqarsinnaannginnersoq.
Taakkuami ilaasortaat
ajornartorsiuteqarlutik nilliajuarput, kattuffiillu aningaasanik qalaarput
ilaasortanik inuussutissarsiornikkut siuarsaaffigineqarnissaannik
iluaqutaasinnaagaluartunik. Malunngikkaluarpara SIK-p SULISA-mut peqataasoq
kisianni kommuunit aamma suleqatigineqarsinnaanerat
ammaaffigineqartariaqaraluarpoq. Soorunami kattuffiit pingitsaalineqarsinnaanngillat
suleqatigineqarsinnaasariaqarlutillu.
Ikioqatigiinnissarput pisariaqaqaaq,
kommuunimmi suliassaq kisimiillutik tamakkiisumik naammassisinnaanngilaat,
minnerunngitsumik kommuunit aningaasakilliornerat eqqarsaatigalugit.
Qularnanngilarlu kommuunit KNAPK, SIK immaqalu Namminersornerullutillu
Oqartussat peqatigiinnermikkut nukittuumik inuussutissarsiutit
siuarsarneqarnissaannut aningaasaateqarfimmik pilersitsisoqarsinnaassaaq.
Inuiaqatigiinnut iluaqutaasussamik.
Taamatut naakkaluamik oqaaseqarlunga
inatsisartunut ilaasortap Hans Enoksen-ip siunnersutaa taperserpara.
Jonathan Motzfeldt, Naalakkersuisut Siulittaasuat:
Naatsorsuutigigakku partiinit tamanit
taperserneqassasoq aamma tamanna pivoq, suliassarlu ingerlaqqissaaq.
Naalakkersuisullu piffissami aggersumi suliassaq pillugu erseqqissaateqarfigissavaat.
Tamannali pitinnagu
erseqqissaageqqaassavara ilaatigut piffissaq uterfigilaarlugu. Maani ilaatigut
inatsisartuni nutaat amerlaqimmata qinersinerup kingornatigut
inatsisartuniilersimasut (kommuunillu ilaatigut nutaanik qinigaasimallutik)
Kommuunit iluarsaaqqinnissamut
ataatsimiititaliarsuup siunnersuuteqarneratigut kommuunit inuussutissarsiutinik
aningaasaleeqataasinnaanerat pillugu inatsit taanna siusinnerusukkut
oqaatigisara normu 23, 3 november, 1994-imi akuersissutigineqarpoq. Inatsit
kommuunit inuussutissarsiutinik ingerlatsinermi peqataanissaanut assigiiaamillu
ingerlatseriaaseqarnissannut tmatumani tunngaviusutigut tunngavissiisoq taavalu
tamatumunnga peqatigitillugu inatsisikkut isumaginnermut suliffeqarnermullu
inatsit tunngavigalugit pisariaqartitsineq tunngavigalugu aningaasartuutit
aamma siunnerfilimmik inuussutissarsiutinik ineriartortitsineq erseqqinnerusumik
tassuunakkut avissaartinneqarput.
Inatsisip taassuma pineqartup kommuunit
periarfissippai tamatigoortumik kommunini inuussutissarsiornerup
pilersaarusiukkamik ataqatigiissaarneqarnissaannut ineriartortinneqarnissaannullu.
Inuussutissarsiutinillu aningaasalersuinissamut periarfissaareersunut
tapertaassalluni. Siunertaasimanngilaq soorlumi aamma taanna eqqaaneqartoq
kommuunit aningaaserivinnut inuussutissarsiutinut
ineriartortitseqatigiiffinnut qitiusumik inuussutissarsiutinut tapersiinissamut
periarfissanut pioreersunut il.il unammillernissaat.
Soorlu aamma kommuunit peqataaqqusaanngitsut
najukkani ataasiakkaani unammilleqatigiinnermik equtitsinermut. Kommuunini
inuussutissarsiortuni peqataanerata pingaarnerusutut siunertaraa: Kommuunit
inuussutissarsiornermi ingerlatat nutaat aallartinnerani kommuunit aporfissanik
piiaaqataanissaa.
Kommuunip inuussutissarsiutit
eqqarsaatigalugit pilersaarusiornermini assersuutigalugu qinersinnaavaa
aalisarnermik inuussutissarsiuuteqarneq tapersersorlugu ineriartortinniarlugu.
Tamannalu siunertaralugu aalisartunut piniartunullu pilersitsinermut
tapiissuteqarsinnaalluni imaluunniit aningaasalersuisarfimmi
taarsigassarsianut qularnaveeqqusiisinnaalluni. Aningaasaliissuteqartarneq
kommuunit aningaasatigut pisinnaasaanut naleqqussagaassaaq
inuussutissarsiutinillu aningaasaliissutit aningaasaliillutik kommuunit
aningaasartuutaannut allanut ataqatigiisillugit tulleriiaarinermi
pingaarnersiuinikkut.
Kommuunit namminneq inuunnut
ataasiakkaanut taarsigassartitsisinnaanngillat siusinnerusukkut kommuunit
taarsigassartitsisarneranut periarfissaat atorunnaarmat Inatsisartut
inatsisaata normu 22, 3 november 1994-imeersup tamatumani
akuersissutigineqarneratigut. Kommuunip nammineq inunnut ataasiakkaanut
taarsigassartitsisinnaannginneranut pissutaavoq, kommuunip suliassarinngimmagu
namminersortunut taarsigassartitsisarneq.
Suliassaq tamanna aningaaseriviit
aningaasalersuisarfiillu allat suliassaraat. Kisiannili kommuunit
inuussutissarsiutinut suliffissaqartitsiniarnermulluunniit allaffiinut
suliassatsialaavoq aalisartut piniartulluunniit periarfissat assigiinngitsut
pillugit siunnersortassallugit ilitsersortassallugillu, taamatullu aamma
ikiorlugit qinnuteqarnerminni immersuinissaannik il.il ikiuuttassallutik.
Kommuunini inunnik isumaginninnermik
ingerlatsiviit pisuni immikkut ittuni aquuteralattaarnermut imaluunniit
aalisarnermut piniarnermullu atortunik allanik pissarsinissamut ikiorsiisinnaapput.
Innuttaasunut ataasiakkaanut ikiorsiinissamut isumaginninnermut inatsit
periarfissiissutaat naapertorlugit suliassani ataasiakkaani naliliisarnerit
tunngavigalugit.
Namminersornerullutik Oqartussat
Aalisarnermut, Piniarnermut Nunalerinermullu tapersiisarneq pillugu
Inatsisartunut peqqussutaat normu 8, 31 oktober 1996-iminngaannersoq
naapertorlugu umiatsiaaqqap pisiarineqarnerani akiata 75 procentia tikillugu
tapiissutaasinnaapput. Umiatsiaaraq nutaajussaaq isikkanik 16-inik
takissusilik ikkuttakkamik motooreqassaaq. Peqqussutip ' 8-t najoqqutaralugu tapiiffigineqarnissamut
piumasaqaatinik teknikkimut tunnganerusut atuarneqarsinnaapput.
Tapiissutit uterteqquneqarsinnaapput
tapiiffigineqarfimmiit ukiut tallimat iluanni umiatsiaaraq allamut
tunineqarpat. Imaluunniit umiatsiaaraq inuussutissarsiuummut atatillugu
atorunnaarneqarpat.
Kommuunit inuussutissarsiutini aningaasaleeqataasinnaanissaat
pillugu inatsit januaarip aallaqqaataanni 1995-imi atulerpoq. Suut tamarmik
takutippaat inatsit peqataasimasoq kommuunit inuussutissarsiutitigut
suliffissaqartitsiniarnikkullu ingerlatsinermik aallussinerulernerannik.
Takuneqarsinnaavoq
suliffissaqartitsiniutit kommuunit aningaasartuutaat tamarmiusut inatsisip
atulernerata kingorna qaffakkiaartuaarsimasut. Kommuunit (...)
missingersuutitik ima aaqqissuuttalersiimavaat kommuunini siunnerfilimmik
inuussutissarsiutitigut ineriartortitsineq qulakkeerniarlugu,
suliffissaqartitsiniarnerlu siuarsarniarlugu kommuunit inuussutissarsiutini
aningaasaleeqataasinnaanissaat pillugu inatsit kisiat aqqutiginagu kisiannili
aamma eqqarsaatigilluakkamik sanaartornernut aningaasaliissuteqartarnikkut
suliffissaqartitsiniarnermullu aningaasaliissutit siunnerfeqarluartumik
atorneqarnerisigut akissarsiatigut isertitaasartut suliffeqarfiillu qularnaarneqarnerisigut
najukkani ataasiakkaani ingerlataqarneq annertusisimavoq.
Tamanna atuarneqarsinnaavoq kommuunit
KANUKOKA-p nammineq nalunaarusiaanni aningaasaqarnertik pillugu 1997-imi,
nalunaarusiarlu taanna inatsisartunut qangali aamma ilisimaneqarpoq.
Kommuunit inuussutissarsiutini
aningaasaleeqataasinnaanissaat pillugu inatsit maanna ukiuni pingasungajanni
atuussimalereerpoq. Kommuunit sulisimapput killiliussat inatsimmi periarfissiissutaasut
iluanni, taamaattorli inatsisip qanoq paasineqarnissaa malunnarpoq ullumi
oqaluttutigut ilaatigut nalornissutaasartoq.
Ullumi inatsisartuni oqallinneq
tunngavigalugu kommuunit suleqatigalugit
ilumut qanoq ajornartorsiutaatiginersoq misissortinniarpara. Tamatumalu
kingorna nalilerlugu sutigut malittarisassat iluarsineqartariaqarnersut
erseqqissartariaqarnersulluunniit. Taamaalilluni kommuunini pitsaanersumik
periarfissinniarlugit qinnuteqartut ataasiakkaat taperserneqarnissaannut
periarfissat pillugit pitsaanerusumik siunnersorneqartarnissaannut matumani
minnerunngitsumik aalisarnermik piniarnermilluunnit inuussutissarsiuteqartut
eqqarsaatigalugit.
Hans Enoksen, apeqquteqartoq, Siumut:
Siullermik nuannaarutigaara siunnersuut maani ilassilluarneqarmat. Naluneqanngitsutuummi upernaaq KANUKOKA-p ataatsimeersuarnerani aamma annertoorujussuarmik kommuunit eqqartorsimavaat, periarfissap tassani killeqarpallaarnera pissutigalugu.
Tassami kina oqarpa Kommunalreformkommissionip inatsisiliaat ajoquteqanngilluinnartoq kina oqarpa KANUKOKA akuersereermat kommuuni taanna atuuttussatut isigissagaat. Sukkulluunniit periarfissaqartitaasariaqarpugut peqqussutit tulluartuusorinngikkutsigit inuiaqatigiit ingerlatitaanerannut siunnersuuteqarsinnaanissatsinnut.
Takusinnaavaralu oqatarnitsituut inuinnannguit akornanni tamakkununnga pulasartuni malunnartaqimmat ajornartorsiutit ima atsigisut. Uagut ajornartorsiutitut isiginngikkaluakkavut tamakkunani ajornartorsiutaasupilussuupput.
Qaammammusiagulluunniit inorlugit ukiumut aningaasarsiaqartut tassani illersorneqarnissaat qulakkeerneqarnissaat qulakkeerusuppara.
Umiatsiaaqqap 75 proncenti tikillugu tapiiffigineqartarnera ajunngeqaaq aamma atuisunut iluarunaqaaq, qujanarporlu. Kisianni amerlavallaarujussuarput tassunga angummassinnaanngitsut umiatsiaarartaarusukkaluarlutik angummassinnaanngitsut amerlaqaat. Annerusumillu ikiorsiiffiginiaraluakkavut taakkua pissarsiakinnerpaat peqqussutit pissutigalugit inuuttoortinneqartarput, taavalu ikiorniaraluakkavut ikiorserneqanngitsoortarlutik.
Aningaaseriviit atorniarfigineqarsinnaanerat kialuunniit assortorsinnaanngilaa, aamma tunuliaqutaqaraanni ajornanngilliunnarpoq, kisianni 15.-20.000-nik aningaasarsiaqarluni aningaaserivimmut attarsigaluaraanni, takuneqarsinnaavoq ingerlaannaq oqarfigineqassalluni, ajoraluartumik illit uangalu oqaloqatigiissinnaanngilagut, ima aningaasarsiakitsigigavit periarfissaqanngilatit maani ikiorneqarnissannik.
Taava periarfissaq sunaalerpa tulleq? Allatut ajornartumik immaqa kommune-mukartariaqas-sapput, tassanilu pissutsit ima atukkatik ilungersunartigimmata ikiorserneqarnissartik qinnutigalugu.
Aamma nuannaarutigaara kommune-t nammineersinnaanerat ataqqineqarnissaallu maani eqqartorneqarnerat. Tusarniaanissarlu salliutinneqarluni. Aap ajunngeqaaq aamma taamaattussaavoq. Kisianni amerlavallaarujussuaqaat ilaatigut kommune-t qarsupiinnarlugit inimi maani aalajangiisarneq.
Sivert K. Heilmann, Atassut:
Uanga aamma kingulliit
ilaginnguatsiaramikku tassunga Hans Enoksen-ip siunnersuutaanut assingusumik
maani inimi siunnersuuteqarsimasoq, taamaattumik pinngitsoorusunngilanga aamma
oqaaseqarfigilaassallugu.
Taamanikkulli takusinnaareeratsigu
siunnersuutigisimagaluarpara, taassuma mattussinerusimasup inatsisartut
inatsisaata allanngortitsinikkut tassa kommune-t pisinnaatitaaffiata,
umiatsiaaqqanut atukiisarnermut "ajornerulersitsinera" taamatut
oqaatigigaanni, imatut paasillugu aalisartoqarfiusuni imaluunniit
aalisagaqarfiunerusuni massakkut aningaasarsiortut massakkut inatsisip nutaap
ajornartinngilaa 25 %-mik katersaqarsimagaanni aallarniutissanik naammatsitsisinnaalluni.
Kisianniuna takusinnaasimagipput
taamanili, pingaartumik aalisartoqarfissuusimagaluartuni aamma Maniitsumi.
Qeqqaninngaanniit kujammut takusinnaavarput isertitat imatut annikitsigisut,
tassannga umitsiamik nutaamilluunniit pisaarniarnermut katersaqarnissaq
ajornakusoorluinnartuusoq.
Taannaana taamanikkulli anigorniarlugu,
kommune-t pisinnaasut atukkiisarnissaat ammatiinnarnissaallu
kissaatiginarsimasoq. Taamaattumik uani oqallinnermi assut nuannerpoq KANUKOKA
aammalu kommune-t tusarniaaffiginiarneqarmata.
Anthon Frederiksen, Kattusseqatigiit:
Ilumoorpoq, siunnersuuteqartoq
inatsisartuni ilaasortaq Hans Enoksen-i nammineerluni nuna-qarfimmiuusoq, uani qularutissaanngilluinnarpoq
pissutsinik paasinnilluavissorsimasoq, taamaattumillu
tapersersorluinnartariaqarpoq.
Taanna periarfissaq
umiatsiaarartaarnissamut tunngasoq 75 %-mik tapiiffigineqarluni ajunngeqaaq,
kisianni uagut inatsisartuni ilaasortaasugut ulluinnarni piniartut aalisartut
tikillugit oqaloqatigisarnerini malunnarluinnarpoq periarfissaq taanna
ajunngikkaluaqisoq, kisianni siuleqatussat taakkua 25 %-it
naammatsinniarneqartarneri annertoorujussuarmik ajornartorsiutaapput,
pissutigalugu ilaatigut kommune-ni ikiorserneqarsinnaannginneq taakkualuunniit
tungaa eqqarsaatigalugu.
Tassami assersuutigisinnaavarput siorna
december-i qaammat 1996-mi aalisartut piniartullu peqatigiiffiat Kangaatsiami
Aalisarnermut Pisortaqarfimmut Naalakkersuisumut saaffiginnippoq ajornartorsiut
imanna annertutigimmat qanoq iliuuseqartoqartariaqartoq naalakkersuinerup
tungaatigut. Allaat tunngavilersuutini oqaatigineqarpoq Kangaatsiap
kommune-anni aalisartut piniartullu agguaqatigiissitsinermi 1996-mi 4.000
koruunit inorlugit aalisartoq ataaseq aningaasarsiaqarsimasoq ukioq tamaat.
Ukioq tamaat 4.000 koruunit inorlugit agguaqatigiissitsinermi aningaasarsissutigineqarsimaneri ilumut eqqarsaatigigaanni taava
oqartoqartariaqarpoq assersuutigalugu kommune-mi pineqartumi aalisartut
amerlanerparpaat umiatsiaarartaarsinnaanngillat 75 %-milluunniit
tapiiffigineqaraluarunik.
Taamaammat periarfissat taakkununnga
pitsaanerusut anguniartariaqarput. Aammalu uani isumaqarpunga
isiginiartariaqartut pingaartut ilagigaat, kikkut ukua taamatut
periarfissaaleqisut? Periarfissaaleqisut amerlanerpaat tassaapput KNAPK-p
aammalu SIK-p ilaasortai. Inatsisartuni ilaasortaanngitsut. Inatsisartuni
ilaasortat uagut pissarsiagut naammaqaat ila ila naammaqaat. Kisianni taakkua
akissarsiakinnerpaat, taakkuuku pisariaqartitsisut, ajornartorsiutaallu
paasisariaqarpoq.
Karl Lyberth, Siumut:
Nuannertarpoq,
kingusinaalaaraluartumik tamatta inuit tamatta aammalu inatsisartuni
ilaasortaasugut tamatta kingusinaalaaraluartumik pissutsinik
paasinnittarnerput. Aamma nuannerpoq Naalakkersuisut pissutsinik paasinnittarnerat
aamma ilaanneeriarlutik kingusinaalaaraluartumik.
Inuiaqatitta akornanni
akuliulluinnarluni inuusuulluni pingaartumillu umiatsiaararsortut akornanni
inuulluni, umiatsiaararsortoqatigalugit malunnarluinnartarpoq
ajornartorsiortartut, arlaannik umiatsiatik imaluunniit aquuteralatik
ajutooraangata ajornartorsiorluinnartalersimasut. ´95-p kingorna taanna
malunnarpoq.
Taamaattumik tamannarpiaq pillugu
januar-ip qulingiluaani ´96-mi inatsisartuni siunnersuuteqarpunga upernaakkut
oqaluuserisassanngortillugu Hans Enoksen-ip siunnersuutaata asserluinnaa.
Kommune-nit atukkiisinnaanerata utertinneqarnissaa taamani siunnersuutigivara.
Massakkut qujanarpoq assut partiit
tamarmik Akulliit Partiiat pigunarnagu taanna akerliliisutut nipeqarmat
kisianni tamarmik Kattusseqatigiillu paasinnillutik umiatsiaararsortut allallu
aningaasarsiakinnerusut ajornartorsiutaannik paasinnillutik ammaammata
periarfissamut tassunga, tassa paasinarpoq Naalakkersuisut KANUKOKA-lu
oqaloqatigiissapput, ajornartorsiortut periarfissaannik ujaasillutik
aaqqiiniarlutik, tamanna assorujussuaq qujanarpoq.
Kisianni tassa oqareernitsituut tamatta
kingusinaalaartaraluarpugut aamma eqqaamasakka malillugit uani siulinni
oqaluttut tamarmik, eqqaamanerlukkuma utoqqatsissaanga, taamani
siunnersuutigisaraluanni akuersisimanngillat, oqarfigisimavaannga uatsilaaq
takoqqaalaariartigu, kisianni taamanili takusinnaasimagaluarparput tamatta
ajornartorsiut taanna atuuttoq. Taamanili taanna aaqqissimasariaqaraluarparput.
Johan Lund Olsen, Inuit Ataqatigiit:
Unaana oqaatigiinnarniariga, tassa
aamma saqqummiussinitsinni oqaatigeriigarput tassaavoq Hans Enoksen-i uani
siunnersuuteqarsimavoq, kisianni tassa Hans Enoksen-i kisimiissimanngilaq
aamma aatsaaginnaq oqaluttup tassa Karl Lyberth-ip oqaatigivaa aamma tassa
ukioq manna upernaamut 97-mut ataatsimiinnissatsinnut atatillugu imaluunniit
siornali 96-mut upernaakkut ataatsimiinnissamut siunnersuuteqareersimallutik.
Taakku saniatigut
siunnersuuteqartarsimapput inatsisartunut maannakkut aamma siulittaasoriligarput
Anders Andreassen aamma taamatut nipilimmik siunnersuuteqareersimavoq aamma
Sivert K. Heilmann-ip taamatut siunnersuuteqarsimanini maani
oqaluttarfimminngaanniit oqaatigereerpaa.
Taamaattumik maani
isumaqatigeeqigatta, tassa suliassaq tullinnguuttoq aajuna unaaginnarpoq Naalakkersuisut ingerlateqqittariaqarpaat timitaliiniarnissaq,
tassa taamaammat aamma naatsorsuutigisariaqarparput upernaamut
ataatsimeeqqilerutta taava Naalakkersuisut saqqummi-ussassaqarumaartut immaqa
inatsimmik nutaamik immaqaluunnit inatsit una pioreersoq kommune-nullu
matussisimasup aaqqiivigineqarnissaa taanna suliariinnassallugu.
Kisianni aamma una
oqaatigilaarusuppara taamatut periarfissiinissaq kommune-nut maannakkut
pisariaqarluinnalermat piffissami kingullermi annertuumik tusagassiutitigut
allatigullu eqqartorneqarpoq aningaaseriviit kattunnerisa kingorna tassa
Grĝnlandsbank-ip kiffartuussiniarnera aamma ajorsigaluttuinnartoq.
Taanna aamma
eqqarsaatigiinnarluguluunniit pisariaqarluinnarpoq kommune-t taava ammaanneqarsinnaanissaat.
Tassami ukua ESU aqqutigalugu periarfissat soorunami ammagaluarput aamma
siunnersuuteqartup nammineq oqaaseqarneratuut ajunngikkaluaqaat 25 %-nik
tigutsisissaqarluni aquuteralannik pisaarniarsinnaaneq. Kisianni tassa
oqaatigeriikkattuut aningaaseriviit kattunnerisa kingorna aamma tamakkua
aningaasarsiakitsunut aporfinngorsimapput imaannaanngitsut taamaattumik tassa
ammaassisoqaqqinnissaa taaanna isumaqarpunga sanioqqukkuminaatsoq.
Taamaattumik nuannaarutiginiartigu
Naalakkersuisut matuminnga suliakkerneqarmata tassa timitaliiniarnissaminnut.
Lars Karl Jensen, Siumut:
Oqartoqarneratuut
isumaqatigeeqigatta immaqa oqallisigeqqinnissaa pisariaqanngikkaluarpoq.
Uani Naalakkersuisut Siulittaasuata
Jonathan Motzfeldt-ip ESU-mi tapiisarnermi peqqussutip iluaniittuni atuffammatigut,
tamakkua nalunngilagut ilumoorput, tamakku periarfissat ilagivaat,
periarfissarlu tamanna aamma ukiuni kingullerni marlunni
inuiaqatigiissutitsinni atorluarneqarsimaqaaq, umiatsiaaqqanik pisaarniartut
taperneqartarsimapput. 1996-mi umiatsiaarartaarsimapput 40-t taavalu ukioq
manna akuerisaareersut ilanngullugit 45-put, tassa ukiut marluk ingerlaneranni
tassa umiatsiaaqqat 85-t. Qujanartumilli tamarmik nunatsinni suliffeqarfinni
suliarineqartut aalisartunit pissarsiarineqarsimapput.
Soqutigineqarsinnaassasoralugu
taakkua kisitsisit aamma ataatsimiissitaliami ilaasortaaffigineqartut
aningaasartaannik ilisimaneqareeraluartut, tapiissuteqartarnermi 75 %-i
Landskasse-minngaanniit akilerneqartartoq taakkununnga umiatsiaaqqanut 85-nut
akiatigut paaserusunneqassappat inuiaqatigiit 9,7 mio-it
umiatsiaarartaartunut maannakkumut tapiissutigereersimavaat.
Siunnersuuteqartup Hans Enoksen-ip
oqaatigisaatuut qularnanngilaq nunaqarfimmiuni aningaasarsiornikkut
periarfissaqarpallanngitsuni umiatsiaarartaarniarneq
periarfissaqarpallaanngilaq aningaasatigut tassa 25 % ilaatigut
annertusinnaasarmat umiatsiaaqqap atortoqarani akia agguaqatigiissillugu
eqqarsaatigigaanni. Taakkua ersarissaatigilaaginnarpakka paasissutissatut
tunniukkusullugit.
Bjarne Kreutzmann, Akulliit Partiiat:
Uani suliassami oqaaseqarninni
nangaanartoqartillugu oqaatigigakku aamma ilanngullugit oqaatigaakka
taamanikkut aalajangersaanerup tunngaviisa ilaat taaneqartut tassa
unaamilleqatigiissinnaanermut sammisut taakkua isumaqarpunga
saneqqutiinnarneqarsinnaanngitsut, taamaattumik Naalakkersuisut siulittaasuata
oqasii iluarrilluinnarpakka tassa sukumiisumik misissortinnissai aammalu
apeqquteqarnissaq kommune-mut assigiinngitsunut pisariaqartitsinermut
tunngasut isumaqataaffigilluinnarpakka.
Tassami uani aamma taasara
pisariaqarluinnarsorigakku taamatut aalajangersakkamik allanngortitsinikkut
pinngitsoorani periarfissamik atorsinnaasumik aamma pilersitsisoqarsinnaanera
taanna uanga mianersoqqussutigiinnarakku, taamaalilluni kommune-t
pinngitsaalineqartutullusooq pineqalissammata ukua ima imatullu pigussigit
taava ukua allat aamma ima imatullu pisinnaasariaqarpasi inatsisitigut
taamatut ammaasoqarsinnaanera tikkuaannarpara. Oqaatigineqartutuut isumaqatigiippugut
tamatta.
Hans Enoksen, Siumut:
Karl Lyberth oqarmanuna kingusinaalaartartugut tamatta. Taamanikkut Kaalikkut siunnersuuteqarsimapput Sivert-ikkut, taava allakkatigut akineqaramik naammagiinnarsimavaat, taamaammat oqartoqarsinnaanngilaq uagut aatsaat kingusinaarluta paasinnissimasugut. Uanga aamma allakkatigut akineqaraluarmat takusinnaagakku akissut uanga isummannut naapertuutinngilluinnartoq, ikiugassagut ikiorniarutsigit atorsinnaanngitsutut isigisara pissutigalugu siunnersuutiga soorunami illersorsimavara sakkortuumik pinngitsoornagu inimi maani oqallisigineqaqqullugu, aatsaallu taama iliornikkut angusimavara maani oqallisigineqarnissaa, taamaammat oqartoqarnera kingusinaalaarluni paasinnittarnermut isumaqarpunga tulluartuunngitsoq.
Tassami taamanikkut ilissi allakkatigut akineqarassi, akissut naammagiinnarsimavarsi suliarlu unitsiinnarlugu. Uanga taamaaliorusussimanngilanga takusinnaagakku periarfissaq taanna allanngortinneqartariaqartoq.
Naalakkersuisut Siulittaasuat:
Taama oqartoqassanngilaq kingusinaarluni paasinninneq uparuartuutaasinnaasoq. Uani kingusinaarluni paasinnittoqanngilaq. Siusinaarluni paasinnittoqarsimavoq, taanna inatsisip allanngortariaqarneranik. Inatsisit iluarsisarput ima torinngitsigaaq kommune-rparujussuarnut akiligassanik ulikkaarsimalluni, taamaattumillu taanna tunngavigalugu inatsit nutaaq iluarsiniarsimavarput, taamaalillunilu iluarsineqarsimalluni.
Aammalu KANUKOKA-p nalunaarusiaa agguaanneqarluni maannakkut pigineqartoq qiviarutsigu aatsaannguaq oqaaseqarninni aamma taasara 1994-minngaanniit inatsisip atulerneraninngaanniit 96 ilanngullugu 97-mut pilersaarutinut tassanilu allassimasaat najoqqutaralugit, kommune-t inatsimmi tassani ajunngitsumik atorluaasimapput.
Suliffissaqarniarnermut tunngatillugu aningaasaliissutinik 1994-mi 92-minngaanniit 20 mio. sinneqartuninngaanniit marloriaatinngortissimavaat 96-mut 42-43 mio. tikillugit suliffissaqartitsiniarnermut tunngasunik aningaasalersuinissaminnut inatsit taanna tunngavigalugu ammaanneqarnertik ilaatigut tapertaralugu.
Taamaattumik paasinnilluarluta inatsit taanna suliarisimavarput, kommune-t sapinngisamik inunnik amerlanerpaanik kommune-minni suliffissaqartitsinissaat inatsit taanna suliaammat. Aamma ataaseq suliarinerani neriuppunga uparuarneqaatiginagu aamma ataqqiniassagipput Naalakkersuisuni. Kommune-t nammineersinnaassusiat ataqqeqalugu, ataqqillugulu suliassaq tassani ingerlassaaq. Kommune aamma naaggaasinnaasariaqarpoq innuttani aggerpat aquuteralattaarniarlunilu ingerlaannarluni allaffimmut iserluni oqarluni imaattumik pisaarniarpunga, kommune-t taanna namminneq aalajangertassavaat, tassani nammineersinnaassuseqarput imminnulli aamma naaggaarsinnaassusertik tassani atussavaat.
Taamaattumik kommune-t immineersinnaassusiat aamma ataqqillugit inatsisit makkua suliaammata, taamaattumik aamma naaggaarsinnaassusiat aamma ataqqissavarput. Soorlu aamma angersinnaassusiat ataqqiniaripput.
Taamaattumik suliassap uumap ingerlaqqinnerani kommune-t aamma nammineersinnaassusiat tassani ataqqillugu innimigalugu ataqqillugulu aamma suliassaq ingerlaqqissaaq. Soorlu ippinnartoqarsimappat mikisualutsigut aamma oqarpunga mikisualutsigut inuit ataasiakkaat soorunami itigartinneqartut tassani aamma maalaffissaminnik allanillu saaffissaqartarput aamma taanna ajunngilaq aamma taama iliortassaagut. Kisianni uani inatsit aamma pitsaaquteqarmat, pitsaasumillu kinguneqarsimammat taanna aamma taarusuppara.
Taamaattumik suliassiissutigineqarnera soorunami oqassanngilanga qilanaaralugu kisianni nuannaralugu suliarissavara.
Oqaluuserisaq naammassivoq.