Oqaluuserisassani immikkoortoq 01_1a_1b |
|
||
Siullermeerneqarnera | Aappassaanneerneqarnera | Pingajussaaneerneqarnera |
Otto Steenholdt, ataatsimiinnermik aqutsisoq, sivisunerpaamik Inatsisartuni ilaasortaq, Atassut:
Maani Inatsisartut katersuuttut qamannga pisumik tikilluaqquakka.
Ukiakkut katersuunnerup ammarneqarnerani oqaaseqartussaavunga, ataatsimiinnerup matuma aallartinnerani Inatsisartut Siulittaasussaannik qinersisoqassammat, kiisalu Inatsisartut Siulittaasuata tullianik, aappaanik, pingajuanik sisamaanillu qinersisoqassalluni.
Kalaallit Nunaanni Inatsisartut suleriaasiat malillugu qinersineq isumagineqartussaavoq Inatsisartunut sivisunerpaamik ilaasortaasumit imaluunniit arlallit sivisoqatigiimmik ilaasortaappata angajullermik. Tamannalu naapertorlugu ataatsimiinneq, tassa uanga ammartussaavara.
Oqaluuserisassat
tikitsinnagit ilisimatitsissutigissavara Inatsisartunut ilaasortaq Knud
Sĝrensen peqataanngimmat, Naalagaaffiit Peqatigiit FN-ip ataatsimeersuarneranut
peqataasussaanini pissutigalugu. Taamaammat
sinniisussaa hr. Otto Storch aggersarneqarpoq, qinigaasussaassuseqarneralu
misissorneqareerluni, qinersinerup misilinneqarnera pillugu ataatsimiititaliap
Inatsisartunut inassutigaa hr. Otto Storch ataatsimiinnermut peqataanissaa
akuersissutigineqassasoq.
Tamanna pillugu apeqqutigigallarlara,
akerliusoqarnersoq, akerliusoqanngilaq. Taamaattumik hr. Otto Storch
qinnuigissavakkit maani issiavissannut ingikkiartoqqullutik, tikilluarillu.
Tassa imaappoq qinigassanngortittoq amerlanerussuteqarluinnartunit
taaneqaruni siulittaasun-ngussaaq.
Taamaattumik Inatsisartut
Siulittaasussaattut qinigassanngortitsisoqarpat siunnersuutit massakkut
saqqummiuteqquakka, tamatumunngalu aamma nalunaarutigissavara siunnersuutit
oqaatigineqassapput ataasiinnarluunniit siunnersuutigineqaraluarpat tassani
taasisoqassasoq nalunaarutigissavara. Taamaattumik massakkut partiit
tulleriaarlugit aperissavakka qinigassanngortitassaminnik maani
siunnersuutissaqarnersut.
Siullermik Siumut aperissavara.
Laannguaq Lynge, Siumup oqaaseqartua:
Qujanaq.
Siumumiit maannamut Inatsisartunut Siulittaasuusoq Siulittaasutullu Inatsisartuni sullissillua-reersimasoq Inatsisartunut ilaasortaq hr. Anders Andreassen Inatsisartunut Siulittaasutut ingerlaqqissasoq Inatsisartunut siunnersuutigaarput.
Siverth K. Heilmann, Atassutip oqaaseqartua:
Atassumminngaanniit Inatsisartut
Siulittaasuat Anders Andreassen ingerlaannassasoq aalajangiusimavarput.
Josef Motzfeldt, Inuit Ataqatigiit oqaaseqartuat:
Inuit Ataqatigiinninngaanniit siorna
Inatsisartuni Siulittaasussatsinnik qinersigatta Siulittaasortaarput Anders
Andreassen ingerlaqqissasoq, naammaginartumik Inatsisartuni katersuuffittut
manna tikillugu sulisimanera maluginiarlugu aamma ingerlaqqinnissaani
sulilluarnissaanik kissaallugu Anders Andreassen toqqarparput.
Anthon Frederiksen, Kattusseqatigiit:
Inatsisartuni Siulittaasoq maannamut
Siulittaasooreersoq ajunngitsumik naammaginartumillu sulisimasutut
oqaatigisariaqarpoq, aammalu Inatsisartunut qinigaaffik maannamut naammassilersoq
isumaqarpunga siulittaasup paarlannerqarnissaa tulluartuussanngitsoq aammalu
inuiaqatigiinnut akitsorsaataaginnassasoq oqaatigineqarsinnaammat Anders
Andreassenip ingerlaannarnissaa taperserpara.
Otto Steenholdt, ataatsimiinnermik aqutsisoq:
Tassalu paasinarpoq maani partiit aamma
Kattusseqatigiit ataatsimoorlutik Siulittaasorisimasamik ingerlaannarnissaa
kissaatigigaat, taamaattumik paatsoorneqanngilluinnarnissaa aamma kissaatigalugu
naak nalunanngilluinnaraluartoq, piumasarissavara Anders Andreassenip siulittaasutut
ingerlaqqiinnarnissaanik kissaatigisaqartut maani inimi nikueqqullugit, 30,
tassa Inatsisartut tamarmik Anders Andreassen siulittaasussamittut kingumut qineqqippaat.
Anders Andreassen pilluarit.
Otto Steenholdt, ataatsimiinnermik aqutsisoq:
Taamattaarlu aamma tulliullugu oqaatigissavarput
Siulittaasup ilassai qinerneqassasut, taamaattumillu taakkua tallimat
massakkut ikaarsaarfigissavagut kingumullu aamma apeqquteqaqqissaanga
partiinut siullermik Siumut oqaaseqartua maanga oqariartoqqussavara.
Laannguaq Lynge, Siumup oqaaseqartua:
Siumuminngaanniit Inatsisartuni
Siulittaasoqarfimmi ilaasortassatut maannamut Siulittaasoqarfimmi
ilaasortaatitarigiigarput Inatsisartunut ilaasortaq Hans Enoksen Siumumiit
toqqarparput.
Siverth K. Heilmann, Atassutip oqaaseqartua:
Atassumminngaanniit Inatsisartut
Siulittaasoqarfiani Inatsisartut
Siulittaasuata tullissaatut ingerlaannassasoq Finn Karlsen
toqqarparput, utoqqatserpunga aappaa
taanngitsoorakku, tassaassaaq Otto Steenholdt.
Josef Motzfeldt, Inuit Ataqatigiit oqaaseqartuat:
Inuit Ataqatigiit gruppe-mi
siulittaasorput ikinnguterput Lars Sĝrensen sinniisorilluagarput
ingerlaqqissasoq uagut inassutigaarput.
Anthon Frederiksen, Kattusseqatigiit:
Kattusseqatigiinniit amerlanerussuteqartut
isumaat ataqqivara aammalu maannamut toqqarneqartut taaseqataaffigissallugit.
Otto Steenholdt, ataatsimiinnermik aqutsisoq:
Qujanaq, taavalu aamma taakkua
siunnersuutigineqartut ataatsimoortillugit, tassa taakku tallimat allamik
taakkua saniatigut qinigassanngortittoqanngimmat ataatsimoortillugit taasissutigissavagut,
maani taaguunneqartut tassaapput:
hr. Hans Enoksen, Siumumiit, hr. Finn Karlsen aamma Otto Steenholdt, Atassummiit taavalu Lars Sĝrensen Inuit Ataqatigiinninngaanniit, taakkua ataatsimoortillugit taasissutigissavagut, taakkununnga isumaqataallutik taaserusuttut massakkut nikueqqussavakka, 30, qujanaq.
Tassa ataasiaannarluta nikuinnitsinnut oqaatigissavara, tamarmik maani najuuttut isumaqatigiillutik taakkua akuerimmatigit.
Tassa taamaalilluni maani uanga suliaq nuanneraluartoq qimaqqissavaraasiit, tassa taamaalilluni Inatsisartut Siulittaasoqarfiat qinerneqareerpoq, Inatsisartullu Siulittaasortaavat hr. Anders Andreassen qinnuigissavara ataatsimiinneq massakuminngaanniit aquleqqullugu, maanga ingikkiartorniarit, tikilluarit sulilluarnissannillu tamatta kissaappatsigit.
Anders Andreassen, ataatsimiinnermik aqutsisoq, Inatsisartut Siulittaasuat:
Inatsisartut ataqqinartut tamassi, qujanaq taamatut piumassuseqarluarlusi ataatsimoorlusilu siulittaasussatut qinerassinnga. Tamatuma ersersippaa uanga siulittaasuuffiga tassaasoq nunatsinni Inatsisartut. Tamannalu siulittaasuuffinni siullermi anguniartuarsimavara.
Nunatsinni Inatsisartunut qinersinissarput ungasikkunnaarpoq maannalu ukiakkut ataatsimiinneq aallarnigarput tassaavoq Inatsisartut qinigaaffimmi qaangiutilersumi naliginnaasumik ataatsimiinnerat kingulleq.
Siornatigut pisartut eqqaagukkit ataatsimiinneq kingulleq tassaasarpoq, qinersinissamut piukkusarnerup piareersarnerullu aallarteruttorfiat, kiammi tamanna ippigissavaa.
Maluginiarsimavaralu Inatsisartut ukiaq manna suliassaattut siunnersuutaasut Naalakkersuisunit ilaasortanillu maannakkumut tigusimasagut najoqqutaralugit amerlagisassaanngitsut. Tamanna pissuteqarsinnaavoq 1998-imi upernariartornerani marloriarluta ulapaarfioqisumik ataatsimiissimanitta sunniutaat.
Sapaatip akunnerata uuma aallartinnerani nuannareqisatsinnik avataaninngaanniit aggersunik ilinniartitsisoqarluta suliffipput pillugu isumasioqatigiissimavugut, tassanilu eqqaaneqartut ilaat eqqaamalluangara oqaatigilaarallarlara, tassa ataatsimiittarfimmi maani tamarmiulluta suliassagut oqallisigigaangatsigit tamatumap siunertaa tassaanerusartoq, nunatsinni inuiaqatitta sunik anguniagaqarnitsinnik nassuiaateqarfiginissaat, imaanngitsoq ilaasortaqatitta saassunniarnissaat. Qanortoq aamma taanna eqqaamaneqarili.
Maanna ukiakkut ataatsimiinnitta aallartinnerani inuulluaqqusininni ukununnga nassiussimavakka:
Ataqqinartorsuaq Dronning Margrethe aappaat Prins Henrillu, Danmarkimi inatsisartut siulittaasuat, Statsministeri, Islandimi inatsisartut kiisalu Savalimmiuni inatsisartut.
Taama naatsumik oqaaseqarlunga qinigaanera Siulittasoqarfiullu ilaasortaasa qinigaanerat qujassutigaara. Tamassinnullu assigiimmik sulissussinissarput neriorsuutigissavara. Taavalu oqaluttarfik manna Naalakkersuisut Siulittaasuannut ataqqinartumut hr. Jonathan Motzfeldtimut ammarpara, ataatsimiinnermi ammaanersiorluni oqaaseqassammat.
Jonathan Motzfeldt, Naalakkersuisut Siulittaasuat:
Inatsisartunut Siulittaasoq ataqqinartoq, Inatsisartunut ilaasortat ataqqinartut, inuiaqatikka asasakka.
Sapaatip akunnerini aggersuni ataatsimiilluarnissarput neriuutigalugu ilaasortat inimilu maani najuuttut tamaasa aammalu soorunami sinerissami tusarnaartut tamaasa qamannga pisumik tikilluaqquassi.
Nunarput silarsuarmioqatigiit akornanni takussaasumik inissisimalerpoq. Massakkut nunani issittuni, nunani avannarlerni Naalagaaffeqatigiinnermilu pingaarutilinnik suliassaqarpugut.
Avammulli nakuussuseqarluta aalajangersimasumik pissuseqassagutta nunatsinni inuiaqatigiit sutigut tamatigut ineriartorfiusut, innuttaasunik naligiinnik periarfissiisut inuillu ataasiakkaat piginnaassuseqarfippassuinik atorluaajumasut pilerseqqaartariaqarpavut.
Uagut anguniarparput nunatsinni innuttaasut tamarmik naleqarluartumik anersaakkullu inerititsiviulluartumik inuunissaminnut pisariaqartitaminnik tunngavissaqarnissaat.
Tamanna Inatsisartunut piinnarani aammali innuttaasunut ataasiakkaanut piumasaqaateqarpoq. Kingornussaralugit piginnaanerpassuatta atorluarnissaannut qanoq nammineq iliorsinnaavugut. Inuunerput nammineq akisussaaffigigatsigu aamma inuiaqatigiit periarfissiiffiisa atorluarnissaat akisussaaffigaarput. Nammineq, ilaquttavut inuillu qanigisavut isumaginiarluartariaqartarlugit.
Maani Inatsisartut inatsisiliassarpassuaqarpugut aamma nassuiaaterpassuit suliassaqaraagut. Ajornartorsiutinik, nassuiaatinik aaqqiissutissanillu saqqummiussuigineqartussaavugut. Pappiaralerinitsinni tamarmi inuup nammineq ilisimassusillip, kinaassusillip, akisussaaffillip pisussaaffillillu qitiutinneqartuarnissaa aamma maani puigorneqanngisaannarli. Inuimmi ataasiakkaat ataatsimoorlutik imminullu ataqqillutik inuiaqatigiit - tassa nunarput - ataqatigiissittussaavaat.
Naalagaaffeqatigiinneq
Aasaq manna danskit ministeriisa arlallit nunatsinnut tikeraarneranni ilassilluarsinnaagatsigit nuannaarutigaarput. Taakku tassaapput ministeriuneq, naalagaaffiup aningaasaataasa atorneqarnerannut ministeri, aningaasaqarnermut ministeri, avatangiisinut ministeri, inuussutissarsiornermut ministeri, peqqinnissamut ministeri, ilisimatusarnermut ministeri, nunanut allanut ministeri kiisalu sulisoqarnermut ministeri.
Taama naapinnitsinni aningaasanut tunngasut sallersaatillugit taamaattorli aamma akunnitsinni immerfigeqatigiiffigisatsinnik suliassani assigiinngitsuni suleqatigiinnissamut isumaqatigiissutissat pimoorussilluta toqqaannartumillu oqaluuserisarpavut.
Tikeraartarnerit tamakku Naalagaaffeqatigiinnerup ingerlalluarneranut takutitsisuupput - Naalagaaffeqatigiinnerulli ilaani allami toqqissisimaarnerinnaq atuutinngimmat erseqqissarusuppara pitsaasumik ingerlasoqalernissaa maani uagut neriuutigigatsigu.
Naalagaaffeqatigiinnerup nunatsinnut Danmark-imullu pisussaaffiliisuunera aallaavigalugu illoqarfitsinni nunaqarfitsinnilu inissianik, illunik sanaartukkanillu allanik nutarterinissaq pillugu danskit naalakkersuisui oqaloqatigisalerpavut aammalu naliliinerput naapertorlugu suliassaq taanna annertoqimmat naalagaaffeqatigiinnermi nammagassatut isigaarput.
Nutarterinissaq
Namminersornerullutik Oqartussanit, KANUKOKA-mit naalagaaffimmillu inuttalikkamik suliassamik ataqatigiissaarisussamik ataatsimiititaliortoqarnissaa Danmark-imi naalakkersuisunut isumaqatigiissutigeqqammerparput. Kommunit misilittagarpassuaqaramik naalakkersuinikkut suliassani Namminersornerullutik Oqartussanut iluaqutaalluartarput - aamma suliassami matumani.
Ataatsimiititaliaq taanna nutarterinissatsinnut pisariaqartitsinitta annertussusianik nalilersuissaaq aammalu immikkut ittumik nutarterinissanut pilersaarusianik siunnersuuteqassalluni. Illut inissiallu aserfallassimanerpaapput, aammali ilinniartitaanikkut, peqqinnissaqarnikkut isumaginninnikkullu sullissiviit umiarsualiviillu ilaat naammaginanngillat.
Nukissiorfiit sarfallu aqqutaat ajorsisimangaarmata siusinnerusukkut isumannaatsumik sarfalersorneqartuartarnerup ajalusoorfiusinnaanera aamma isumaalunnarsisimagaluarpoq.
Ataatsimiititaliap sulinerata 1999-imi upernaakkut ataatsimiinnissaq sioqqullugu naammassineqarsimanissaa naatsorsuutigineqarpoq, taamaattorli ukiuni tulliuttuni tallimani nutarterinissamut Naalakkersuisut immikkut ittumik 320 mio. krone-nik illuartitsereerput.
Nutarterinerup sulisussaqarnermut atortussaqarnermullu sunniutai aamma ataatsimiititaliamit nalilersorneqassapput. Massakkut sanaartornermi suliassarpassuarnik ingerlatsisoqarmat annertuallaartumik sanaartulersinnaanerup atortussaqarnikkut, sulisussaqarnikkut akitigullu sunniutigipilussinnaasaanik annikillisitsisinnaasunik suliniuteqartoqarnissaa pingaartuuvoq.
Sanaartornerup nutarterinerullu ingerlanneqarnerisa siunertaqarluartuunissaat tamatumani pingaarnerpaavoq, taamaattorli nunami maani najugaqavissut amerlanerpaat sulisorineqarnissaat siunertaralugu Naalakkersuisut isumaqarput nutarterinissaq immikkut ilitsersuinernik ilinniartitsinernillu malitseqartariaqartoq.
Aamma siunissami aserfallatsaaliuinissat pisariaqartut qulakkeerneqartariaqarput. Ukiuni kingullerni ilaatigut Danmark-imi, Nunani Avannarlerni allani Skotland-imilu allaat illoqarfinni nutarterisoqartillugu najugallit atuisullu aalajangerniartarnerni peqataatinneqartalernerinit misilittakkat aamma qimerloorniarpavut.
Aamma tamatumani innuttaasut ataasiakkaat soorunami akisussaaqataasariaqarput.
Aningaasaqarneq,
illoqarneq ineqarnerlu
Nunatta aningaasaqarnermigut patajaallisarneqartuarnissaa Naalakkersuisut pingaartittuarpaat. Ukiuni tulliuttuni sisamani nunatta nunanit allanit taarsigassarsiaasa akisussaassuseqartumik taarsersorneqarnissaat 1999-imut aningaasanut inatsisissatut siunnersuummi oqallisissiarineqarpoq.
Aningaasaqarnikkut aalaakkaasumik ingerlatsineq Naalakkersuisunit nangikkumaneqarpoq, taamaattumillu ukiuni 1999-imiit 2002-mut ingerlasussani aningaasartuutissat isertitassallu oqimaaqatigiittarnissaat naatsorsuutigineqarpoq, tassa Ingerlatsinikkut, Sanaartornikkut Taarsigassarsisitsisarnertigullu naammassisaajumaartut oqimaaqatigiittarnissaat naatsorsuutigineqarluni.
Tamakku avataasigut aningaasaqarnikkut ingerlatsinermi nunatsinni nalilinnik pilersitsiortornerunissap qulakkeerneqarnissaa Naalakkersuisunit pingaartinneqarpoq. Taamaattumik aningaasanik kaaviiartitsinerusariaqalerpugut.
Tamatumunnga atatillugu akit qaffakkiartornerisa annikitsuinnaanissaat pingaaruteqarpoq. Aammattaaq pingaarpoq akileraarutinik akitsuutinillu massakkut qaffaannginnissarput. Anguniakkalli tamakku aatsaat anguneqarsinnaapput nunatsinni akissarsiat suli qaffakkiartorpallaartinneqanngippata.
Ukiuni makkunani pisortat aningaasaliissuteqartarnerunissaat piumaneqaraluaqisoq inuit amerlanersaasa akileraarutinut akitsuutinullu akilertagaat Naalakkersuisunit qaffanniarneqanngillat, taamaaliornikkummi aningaasat nalikillissapput aningaasartuutillu qaffallutik. Angerlarsimaffitsinni siunertanut aalajangersimasunut aningaasartuutissarigaluatta nutaamik pisariaqartilertakkavut aallukkumallugit ilaatigut ikilisittarnerisigut akissaqalertarnitsitut aamma Namminersornerullutik Oqartussat tamatumani iliuuseqartariaqarput.
Siunissami sanaartornernut ukiumut 600 mio. krone-t angullugit aningaasaliissuteqartarniarpugut. Ukiuni arlalinni suliassanik kinguartitsisarsimanerup sanaartornermi sukkassutsimik nutaamik tunngaveqarluni sanaartornernut aningaasaliissutinik sanaartornernilu sullissinernut tunngasunik inuiaqatigiit atuilluarnerunissaat qulakkeerneqassaaq.
Inuiaqatigiit suliassaataat arlaqaqisut pingaarutillillu ukiuni tulliuttuni aningaasaliiffigineqartariaqarput. Tamatumani ilinniartitaanermi inooqatigiinnermilu suliassat, pingaartumik utoqqarnut tunngasut, kiisalu peqqinnissatsinnut, avatangiisitsinnut, nukissiornitsinnut pilersorneqarnitsinnullu tunngasut amerlasuunik aningaasaliiffigisariaqarput.
Illunik inissianillu amerlanerusunik
atorfissaqartitseqaagut. Naalakkersuisut isumaqarput namminersortut namminneq
illuliorsinnaanerat ammaattariaqartoq, taamaaliornikkut innuttaasut
ingerlatseqatigiiffiillu sanaartornerusinnaalissammata. Taamaattumik
taarsigassarsisitsisarnissat aningaasalersorneqartarnissaannik
aaqqissuussinernik nutaamik namminersortut inissialiorsinnaanerannut
pitsaanerusunik periarfissiisumik saqqummiussaqarpugut.
Assigiinnik akeqartitsineq
Assigiinnik akeqartitsinerup
allanngortinneqarsinnaanera pillugu nalunaarutigisinnaavara
aaqqiissutaasinnaasutut najoqqutassanik ingerlaavartumik sulineq ukiakkut
ataatsimiinnermi kingusinnerusukkut ilisimatitsissutigineqartarumaarmat.
EU - Europami Naalagaaffiit Suleqatigiiffiat
Nunarsuarmi allanut qiviarutta aamma
tamakkunani aningaasat qitiutitaanerat paasissavarput. Nunatta EU-mik,
uatsitoorlugu immaqa Europami Naalagaaffiit suleqatigiiffiannik taasinnaasatsinnik,
aalisarnermut isumaqatigiissutaata - tassa nunatta - nutarterneqarnissaani
isumaqatigiinniarnissanut Naalakkersuisut nunatta EU-llu annerusumik
iluaqutaanerusumillu suleqatigiissinnaanerannik paasiniaapput. Naalakkersuisut
taama suliniuteqarnerannut tunngaviuvoq Nunanut Qeqeertanullu Europamiit
Imarpik Ikaarlugu Tikittarissanut aaqqissuussineq (OLT-ordningen-imik
taaneqartartoq) Amsterdam-imi isumaqatigiissut naapertorlugu ukioq
2000-eqalertinnagu allanngortiterneqartussaammat. Naalagaaffiup oqartussaasui
suleqatigalugit suliaq ingerlanneqarpoq, qanorli iluseqarluni
naammassineqarumaarnera maannakkut oqaatigineqarsinnaanngitsoq aamma
oqaatigissallugu siusippallaartoq ilisimavarput.
Isumaqatigiinniarnissavut
eqqarsaatigalugit franskit nunanut allanut ministeriat danskit nunanut allanut
ministeriat peqatigalugu tikeraarmata nunatsinni nuannaarutigaarput.
Attaveqaatit pitsaasut tamatumuuna nunatta Frankrig-illu akornanni
pilersinneqartut kingusinnerusukkut annertuumik iluatinnaateqalersinnaapput.
Piffissami aggersumi Inatsisartut Nunanut
Allanut Sillimaniarnissamullu Ataatsimiititaliaat isumaqatiginninniarnerit
ingerlarngat isumaqatiginninniartitatsinnullu pisinnaatitsissutsinik
iluarsiissuteqartariaqalersinnaanivut pillugit Naalakkersuisunit
ingerlaavartumik ilisimatinneqartassaaq aamma suliarissavarput.
Aamma Naalakkersuisut nunanut allanut
tunngasunik ingerlatsineq pillugu nassuiaataat ataatsimiinnermi matumani
kingusinnerusukkut saqqummiunneqartussaq aammalu itisilerneqarluni
oqaluuserineqarsinnaasussaq innersuussutigissavara.
Atortussiassat
Atortussiassanik nunatta iluaniittunik
ingerlatsineq ukioq manna juulip aalaaqqaataaniit Namminersornerullutik
Oqartussanit tiguneqarpoq. Atortussiassalerinermik tigusinitsigut atortussiassalerinerup
nunatsinni inuussutissarsiutitut nammineq napatittutut inissisimalernissaanik
naalakkersuinikkut anguniakkat pingaaruteqaqisut taamaalilluni
qanilliallanneqarput.
Anguniakkap tamatuma angunissaanut uagut -
ingerlatseqatigiiffiillu ujarlernernik ingerlatallit - kisitta
apeqqutaalerpugut.
Aatsitassarsiornertaa eqqarsaatigalugu
aatsitassarsiornissaminnut akuersissuteqarfigineqarsimasut aatsaat taama
amerlatigaat.
Napasorsuarmi guld-eqarneranik
ujarlernerit neriulluarnaqaat, aammalu ukiuni qaninnerni
angisoorsuunngikkaluamik guld-isiorfeqalernissaa neriunaateqarluni.
Aatsitassaqarneranik uuliaqarneranillu
ujarlernerit aalajangiusimaneqarnissaat nakussassarneqarnissaallu
pingaaruteqarput. Tamanna ilaatigut ingerlatseqatigiiffinnut nunani
allaneersunut toqqaannartumik paasissutissiisarnertigut, ilaatigullu
ilisimatusagassatut tulleriiaarisarnerit pisortanit aningaasalersorneqartartut
aqqutigalugit kiisalu kiffartuusivittut sullissivinnik nunatsinni
pilersitsiortornikkut pisinnaavoq. Naalakkersuisut tamatumunnga pisariaqartunik
suliniuteqarput.
Nuannersuuvoq uuliasiornermi
ingerlatseqatigiiffissuit nunani tamalaani ingerlanneqartut arlallit nunatsinni
uuliaqarneranik ujarlermata. Ilaatigut ujarlernerit nanisinermik
kinguneqarnissaat tamatumuuna annerulerpoq, ilaatigullu qaartitsisarlutik
misissuinernik nunani tamalaani ingerlatallit massakkut ujarlernermi
peqataalivissut uuliaqarneranik misissuinernik aamma annertusisitsipput.
Nunaoil A/S-ip aaqqissuuteqqinneqarnissaa
pillugu naalagaaffik Namminersornerullutik Oqartussallu
isumaqatigiissuteqarput. Aaqqissuusseqqinnikkut uuliamut tunngasut nakussassarneqassapput,
tamatumunngalu peqatigitillugu Namminersornerullutik Oqartussat aatsitassanut
tunngasut ineriartortinneqarnerannut akisussaaffeqarnerulissallutik.
Isumaqatigiissutip kinguneranik Nunaoil-ip aaqqissuuteqqinneqarnera pillugu
ukiaru Folketing-imi inatsisissamik siunnersuuteqartoqassaaq.
Tamatuma kinguneranik Naalakkersuisut
naatsorsuutigaat uuliamut tunngasut pillugit iliuusissanik tamarmiusunik
qinikkat 1999-imi upernaakkut suliassinneqarumaartut. Tamakku tunngavigalugit
nunarput ukiorpassuarni uuliamut tunngasunik ineriartortitsinissamut
piariissaaq.
Takornariartitsineq angallannerlu
Naalakkersuisut atuutilernerminnilli
pingaartitaraat suliassaqarfiit allanngortiterneqartarneri aqqutigalugit
pingaartumik takornariartitsinermut angallannermullu pilersaarusiornerit
annertusineqarnissaannik kalerriisoqartarnissaa. Massakkut kalerriisoqassaaq,
tamannalu nassuiaateqartinneqassalluni.
Nunatsinni takornariarpassuaqalersinnaanera
annerpaamik iluanaarutigineqassappat ilaatigut siunissami takornarianik
kiffartuussinermi naammassiniartakkanut sanaartukkanullu aningaasaleeqataasalernissat
ilaatigullu nunatsinnut nunattalu iluani angallannerup ataqatigiinnerulersinneqarnera
akikinnerulerneralu aamma aqqutiginiartariaqarpavut.
Nunatsinni angallannikkut
ineriartortitsineq pillugu Naalakkersuisut isumaqarput anersaartulaariarluta
ukiuni kingullerni sanaartorneq aningaasanut inatsimmi oqimaalluartartoq
unikaallatsissagipput.
Sanaartugassanik naammassiniagassanillu
angallannermut attuumassuteqartunik nutaanik aallartitsisinnata pigeriikkatta
atorluaanerpaamik atornissaat, aammalu akisussaassusilimmik
aserfallatsaaliornissaat isumannaaqqaartariaqartutut isumaqarfigaagut.
Angallannermut tunngasunut siunissami
aningaasartuutissat taamaallaat ilaasartussatut naatsorsuutigineqarsinnaasut,
angallannermilu aningaasaqarnikkut silatusaarnerit tunngavigalugit
pisalissapput - nunatta ilaani sumiuuneq tunngavigalugu qinikkatut
kissaatiginarsinnaajunnartut tunngaviginagit.
Taamatuttaaq Europa-mi allanilu
isumalioriaatsitut tunngaviit assigiinngiiaartut saqqummertarnerat
peeruttarnerallu ineriartornitta aaqqissuussaanerani isiginiaannannginnissaat
pingaaruteqarluinnassaaq. Namminersortutut inuussutissarsiuteqarnerup
tamakkuninngalu ingerlassaqareersut ikorfartorneqartarneri aningaasarsiornikkut
ineriartortitsinerupput nunap najukkap nunarsuarmi tassanilu niuerfinnut
naleqqiulluni sumiissusiinik ataqqinniffiusut. Nunatsinni angallannermi
niuernerup namminersortuinnarnit ingerlanneqalersinnaanera nunatta
immikkoortuini assigiinngitsuni inooqatigiinnermullu tunngasunik
pilersaarusiornernik tamanik aseruisuusinnaapput.
Nakkutigineqartumik unammilleqatigiinneq
anguniartariaqarparput, tassami ajoqusinnginnissamut, akuttoqatigiiaartunik
angallassisarnissanut atorfissaqartinneqarfinnilu piareersimasuunissamut
inuiaqatigiit piumasaqaataat pingaarnerit aqussinnaasariaqarlugillu
angallassinermi kissaatigisavut isumannaarneqarlutillu namminersortut
sulisorineqarsinnaasut tamaasa aamma tamatumani ilannguttariaqaratsigit.
Ingerlatseqatigiiffiit
Tamatumunnga atatillugu aammattaaq
nuannaarutissarput manna erseqqissarlara: Ingerlatseqatigiiffinni
Namminersornerullutik Oqartussanit pigineqartuni sinneqartoorutaasartut
amerliartortinneqarput, eqaannerusunillu aamma ingerlatsinerni
pisariillisaasoqarluni. Aamma tamatumunnga atatillugu isumalioriaatsit
tunngaviisigoornerusoq ingerlatseqatigiiffinnut piumasaqaatit inuiaqatigiittut
soqutigisavut silatusaarsinnaanerpullu tunngavigalugit
isiginiarnerusariaqarpavut.
Aatsaat suliffeqarfiit inuiaqatigiillu
aningaasaqarnerat pitsaanerulersissinnaagutsigit inuussutissarsiutitullu ingerlatat
amerlanerulersissinnaagutsigit namminersortunut tunniussisinnaallutalu
suliariumannittussarsiorsinnaasariaqarpugut. Taamaattoqanngippammi
ingerlatseqatigiiffiit Namminersornerullutik Oqartussat pigisaat landskarsip
aningaasartuuteqarnerulerneranik kingunilimmik innarlerneqassapput. Tamannali
kisianni uagut kissaatiginngilarput.
Tamatumunnga peqatigitillugu landskarsip
pisariillisaanerpassuit - angallannermut tunngasunik ingerlatseqatigiiffiillu
KNI-p ataaniittut allanngortitererujussuarnerinik ersernillit - landskarsip
iluaqutigisariaqalermagit erseqqissarneqartariaqarpoq.
Ingerlatseqatigiiffiit
patajaallisarneqarnissaminnut sinneqartoorutitik tamaasa nakkartikkusuttaraluaraat
landskarsip piginnittutut soqutigisani aktiaatilittut iluaqutiginiartariaqarpai.
Angallannerup aaqqissuussaaneranut
KNI-mullu tunngasutigut Naalakkersuisut aningaasanut inatsimmi siunnersuutaanni
ingerlatseqatigiiffiit siunissami patajaallisarneqarnissaasa landskarsillu
pissarsiassanik akiliuteqartarnerit akornanni oqimaaqatigiiffiunissaanik
Naalakkersuisut kissaatigisaat takuneqarsinnaapput.
Aalisarneq
Nunatsinni aalisarnikkut
inuussutissarsiornerup Aarlalinnik niunikkiartornera@ isigissallugu nuannersuuvoq.
Naak annikitsunnguamik aallartittoqaraluartoq
nunatta TunumiIsland-ip eqqaani immanilu naalagaaffiit tamalaat
aalisarfigisinnaasaanni suluppaagarniarnerni suliffissuaatigisumik kilisaateqalernera
iluaqutissatut maluginiartariaqarpoq.
Tamatuma saniatigut ammassanniut
ataasiinnaagaluartoq maanna marlunngortinneqarput.
Ukiuni kingullerni Nunatta Avannaata
tungaani qaleralinniarnerujussuarmut sanilliullugu kinguppaqassutsimut
qilersorsimanerput ukiut arlaqanngitsut matuma siornatut naleqiullugu
annikilleriarpoq.
Taamaattumik aalisarneq pitsaasumik
ingerlaannassappat pisariaqarluinnarpoq ukioq nikitsinnagu Avannaani
qaleralinniarnerujussuarmut oqilisaataasinnaasunik - aammalu
akuersissuteqarfigineqarsimanissamik piumasaqaammut ilanngussanik -
tulleriaarisoqartariaqalernera.
Avammut niuerniutaasussaanngitsunik
tunisisarneq nioqqutissiornerlu 1998-imi juulip aallaqqaataaniit Royal
Greenland-imiit ingerlatseqatigiiffimmut NuKa A/S-imut nuunneqarput. Aalisakkat
aalisarneqartartut ilarpassui avammut tuniniagassatut suli
soqutiginaateqanngikkaluarlutik nunaqarfiit inuinut annertuumik
sunniuteqartarput. Tamatumunnga atatillugu massakkut avammut
tuniniarneqarsinnaasut tuniniarneqarsinnaanngitsullu immikoortiterneqarnerat
Naalakkersuisunit pingaaruteqartinneqarpoq.
Asia-mi aningaasarsiornikkut ajornartorsiorneq
soorngunami aalisartutut piniartutullu inuussutissarsiutilinnut
isumakulunnarsinnaavoq.
Kinguppaat avammut tunisavut Kina-miit
pisiarineqarluartalerput. Aamma Kina amersilluartarpoq, isumaliutaavorlumi puisit
neqaasa Nanortalimmi nioqqutissiarineqalersussat taamaallaat Kina-mut
tunineqartarnissaat. Taamaattumik Kina-mut tunngatillugu kissaatigisatta
piaartumik naammassineqarsinnaannginnissaat naatsorsuutigisariaqarparput, tassa
Asia-mi aningaasarsiornikkut eqqissisimasoqannginnera tamatumani
pissutigerpiarlugu, imaappoq kinguarsagaasinnaavoq.
Inuussutissarsiutit nunamiittut
Inuussutissarsiutinut nunamiittunut
arlaatigut tapiissuteqartarsinnaanernut periarfissanik ammaassisussamik
nutaamik pingaaruteqartumillu Naalakkersuisut siunnersuusiorniarput. Tamatumunnga
paasissutissat isumaliuutissiissummi annertuumi ilaasortanut agguaanneqartumi
katersugaapput. Inuussutissarsiutinut nunamiittunut atugassarititaasut pillugit
upernaaq ataatsimiinnermi Inatsisartut oqallinnerat soorngunami suliamut
tamatumunnga tunngaviuvoq.
Avatangiisit
Uagut - inuit inuiaqatigiillu -
avatangiisivut pinngortitarsuarlu sunnertuartarlugillu mingutsittuartartillugit
avatangiisitta pinngortitarsuullu aserujaqisup illersorneqarnissaannut
iluaqutaasunik suliniuteqarnerup pingaarnerutikkiartuinnarneqarnissaa
Naalakkersuisunit qularutigineqanngilaq.
Taamaattumik illoqarfinni nunaqarfinnilu
eqqaaveqarnerup immikkut pitsaanerulersinneqarnissaanut suliniutinik
Naalakkersuisut ingerlatsiuarumapput. Ullut tamaasa avatangiisinik mianerinninnerunissaq
pisariaqarpoq, tamatumanilu aningaasatigut soqutigisat kisiisa
akuersaarneqartariaqanngillat, tassami avatangiisit suliffissuarnit
mingutsaaliorneqarnissaat amma tamatumani pineqarmat.
Nammineq nunatsinni mingutsitsinitta
saniatigut aamma Nunarsuarmi suliffissuaqarfinniit Issittuni
mingutsitsisoqarnerata uppernarsarneqarnera annikillisarneqarneralu aamma
suliariuartussaavaat. Suliani tamakkunani nunarput Issittumi
Siunnersuisoqatigiinni Nunallu Avannarliit ministeriisa
Siunnersuisoqatigiiffianni peqataavilluni suleqataavoq. Nunat issittortallit
allat peqatigalugit Nunarsuaq tamakkerlugu mingutsitsiartuaarnerup
avatangiisitsinnik sunniisup pilersinneqarfimmini minnerulersinneqarnissaa
sulissutigiuarparput.
Avatangiisitsinnik mingutsaaliuinermut
iliuutsivut ajunngikkaluartut isumalluutitsinnik uumassusilinnik sippuisumik
iluaquteqarniarnerput allaavoq. Matumuuna erseqqissarluinnarneqartariaqarpoq
isumalluutitta uumassusillit attassinnaasassaanik sippuilluni
iluaquteqarniarneq kialluunniit akuerisinnaanngimmagu. Taama pisoqassappat
siunissarput tusaamaneqarnerpullu apeqquserneqassapput nungusaataanngitsumillu
ingerlatsisoqarneranik oqaluttoqalerpat tatigineerutissalluta.
Naalakkersuisut isumaqarput pinngortitap
pisuussutaasalu aserorneqaratillu sippulimmik iluaqutiginiarneqannginnissaannik
allanngutsaaliorneqarnissaannillu suliniutivut nukittorsaavigisariaqartut.
Suliassaqarfimmi tamatumani
naalakkersuisut KNAPK-imik pitsaasumik inerititaqarfiusumillu suleqateqarneq
siunissami silatusaaartumik ingerlatsinissanut pingaaruteqarluinnartutut
isigaat.
Uumasuutinik nakkutilliinerit
Inatsisartut ataatsimiinnissaanni matumani
uumasuutinik nakkutilliinernut qimmeqarnermullu akisussaaffiit massakkut
danskinit oqartussaaffigineqartut Namminersornerullutik Oqartussanit
akisussaaffigineqalernissaannik naalakkersuisut siunnersuummik
saqqummiussaqassapput. Naalakkersuisut isumaqarput qimmitta qimuttut
qimmeqatigiiaattut immikkuullarissutut nunatsinni pilerfeqartutut
illersorneqarnissaat uumasuutitsinnillu allanik qanoq piginnittarnissavut
nunatsinnit aalajangersarneqartarnissaannut maannakkut piffissanngortoq.
Isumaginninnermut tunngasut
Isumaginninnermut tunngasut
ataatsimoortillugit qimerlooraanni nunatsinni suliffippassuarnik
inuttaqartitsisuupput aammalu pisortat landskarsimut kommunillu karsiinut
missingersuusiortarneranni initoorujussuullutik. Anguniarneqarpoq
isumaginninnermi aaqqisuussinernik atuisut ilatsiinnaratik namminneq
isumagineqarnerminni kiisalu namminneq ilaquttamillu isumagineqarneranni
suleqataallutillu suliniutissanik pilersitseqataasalernissaat.
Isumaginninnermi aqutsineq
aaqqissuussinerlu pillugit peqqussutissaq Inatsisartut upernaaq
ataatsimiinneranni siullermeerlugu suliarineqarpoq. Ataatsimiinnermi matumani
peqqussutissatut siunnersuutinik suli pingasunik saqqummiussisoqassaaq.
Tamakkununnga ilaavoq utoqarnik paaqqinniffinnut tunngasoq, tassuunami
utoqqartatta timikkut atugaasa pitsaasuunissaat isumannaarniarneqarpoq.
Siunnersuutikkut ersersinneqarpoq utoqqaat pissutsinut sunniuteqaqataanerat
qitiusoq taamaattumillu utoqqarnut tunngasunik ingerlatsinitsinnut
pingaaruteqavissuulluni.
Utoqqalinersiutit pillugit
peqqussutissatut siunnersuutikkut utoqqaat isumaat erseqqissumik
saqqummersinneqarput. 60-inik ukioqalernermiit utoqqalinersiuteqalersinnaanerup
63-inik ukioqalernissamut qaffanneqarnissaannik siunnersuut utoqqarnit
pisinnaagallartillutik inuiaqatigiinni innuttaasutut inuiaqatigiit
ineriartorneranni peqataajumasunit saaqmmiussaavoq.
Peqqussutissatut siunnersuut
oqartussaasunut kattuffinnullu assigiinngitsunut tusarniaassutigineqarpoq.
SIK-p akissuteqarnermini pineqartunut tunngavissunik inerititaqarfiusinnaasunillu
suliareqqiinnermi ilanngunneqartussanik oqaaseqarnera naalakkersuisunit
immikkut qujassutigerusupparput.
Peqqussutissatut siunnersuuterpassuit
suliniutillu innarluutilinnut tunngasut naammassineqareersut arlallit
tassaapput isumaginninnermi iluarsaasseqqinnissamut ataatsimiititaliap kiisalu
kommunini iluarsartuusseqqinnissamut ataatsimiititaliap suliassiissutaanik
aaqqissuussamik malitseqartitsinerit - pitsanngoriaatit tamakku atuutilissapput
ataatsimiititaliat taaneqarut isumaliutaannit siusinaarnerullutik.
Sulisoqarneq
Naalakkersuisut isumaqarput
sulisoqarnikkut ingerlatsinermi tunngaviit isiginneriaatsillu massakkumut
atuuttut allanngortinneqartariaqartut.
Sulisussarsiortarnerit suliffissanillu
neqerooruteqartarnerit oqimaaqatigiilersittariaqalerput. Aamma
eqqarsartaasitoqqat qimallugit nutarterisoqartariaqarlerpoq. Inuit ataasiakkaat
sulinerminnik pitsaanerulersitsinissaminnut amerlanerusunik
periarfissaqalernissaat sulisoqarnikkut ingerlatsinermi isumannaarniartariaqarpoq.
Aammali suliassiissutit amerlanersaasa sulisunit naammassineqartarnissaat
piumasaqaataasariaqarluni.
Nukissiorneq
Nukissiornermik ingerlatsinermi
anguniagaavoq inuiaqatigiinnut ileqqaarnarnerpaamik nukissiortoqarnissaata
annertunerpaamik siuarsarneqarnissaa aammalu uuliamik pinngitsuuisinnaannginnerup
annikillisarneqarnissaa. Nukissiornermi pilersuinerup isumannaatsuunissaa
sukkulluunniit noqillassimaarfigineqassanngilaq akillu
nikerartinneqaratilluunniit minnerulersikkiartortariaqarput.
Taamaaliornikkut naalakersuisut
Nukissiorfiit allanngortiterneqarnissaanut erngullu nukingata
atorluarneqarnerunissaanut naammattunik paasissutissarsiffiusumik
tunngavissarsiorput. Qorlortorsuup Tasersuullu erngup nukinganit
nukissiorfiliorfigineqarnissaannut naammassiniagassanik
aallarteriaannangajannik saqqummiussisoqareerpoq. Massakkumut aaqqissuussinerup
allanngortinneqarnissaanut suliat killiffii kiisalu erngup nukinganit
nukissiorfiliortiterniarnerit pillugit Inatsisartut paasissutissinneqassapput
taamalu tulliani ataatsimiinnissami Qorlortorsuarmi 2000-imi tamtumalu
kingornagut Tasersuarmi erngup nukinganit nukissiorfiliornerit aallartinneqarsinnaaneri
aalajangiiffigineqarsinnaalissapput.
Ilinniartitaaneq
Meeqqat atuarfiiniit inuussutissarsiutinik
ilinniarfinnut ikaarsaariarnermi angusaasartut qaffasinnerulernissaat
nalakkersuisunit anguniagaavoq. Kommunikkaartumik ilitsersuisarnerit siunnersuisarnerillu
peqataaffigisarnerisigut peqataasarumaartussat sulisoqarnermi
inuussutissarsiutinillu ilinniagaqarnermi peqataasarnissaminnut
piareersarneqartassapput soorluttaaq taamaaliornikkut ilinniagassap
suussusissaanik toqqaaniarnissaq ajornannginnerulersinnaasoq.
Taamaattumik inuussutissarsiutinik
tunngaviusumik ilinniartitsinermi, Siamasissumik Tunngaviusunik Ilinniarfinni,
aaqqissuussinerit eqaallisarneqarnissaat siunertarineqarlerpoq, taamaaliornikkummi
ilinniarkkani ataasiakkaani pitsaassusissanik pitsaanerpaanik angusaqarniarluni
aaqqissuussisarnissat salliutinneqarnerulersinnaammata. Tamakku saniatigut
ilinniagaqalernissamut piareersaataasunik suliaqartarnerit
siammarneqarnerunerisigut aammalu inuussutissarsiutnik ilinniartitaanerit
ilinniarnertuunngorniarnertut qaffasissusillit, soorlu hĝjere teknisk eksamenip
(atortorissaarusersuutinik paasisimasaqarnerusutut soraarummeertarinerit),
HTX-ip aamma hĝjere handels eksamenip (niuernermik paasisimasaqarnertut
soraarummeertarnerit), HHX-ip, pilersinneqarnerisigut ilinniartitaanermikj
aaqqissuussinerit ataqatigiissinneqarnissaat isumannaarneqarsinnaavoq.
Ukioq atuartitsiviusoq 1997/1998
aallarnerfigalugu meeqqat atuarfii pillugit peqqussut nutaaq
atuutilerpoq. Tamatumani meeqqat
atuarfiisa aqunneqarneri pillugit nutaanik malittarisassaqalerpoq -
tamakkununnga ilaavoq atuarfinni ataasiakkaani aqutsisunik pilersitsisoqarnera.
Nunarput tammakkerlugu atuarfinni
ataasiakkaani aqutsisut sinniisaasa pikkorissartinneqarnerisigut suliat
tamakku naalakkersuisunit malitseqartinneqarput. Massakkut taakku naammassineqareerput
atuarfinnillu aqutsisut suliassaminnik aallussilereerlutik.
Ilinniartitsisoqarnikkut killiffik
nunarput tamkkerlugu, minnerunngitumillu atuarfeqarfinni,
isumkululersitsigaluartoq massakkut aarlerissutissartaaruppoq aammalu atuartitsinerit
taasarialinnik akornusernagit atuarfiit tamarmik massakkut ingerlapput.
Kisianni nassuerutigisariaqarparput
ilinniartitsisussaaleqineq suli ajornartorsiutaassammat aamma tamanna
pimooruttariaqarparput qanoq iliuuseqarfiginiarlugu. Taamaattumik ilinniartitsisussaaleqineq
anigorniarlugu naalakkersuisut siunissaq qanittoq ungasinnerusorlu isigalugit
ilinniartitsinernik ingerlassaqalerput aningaasartalerneqartunik. Juunimi
1998-imi immikkut ittumik ilinniartunngorniarnermut killissarititap sivitsorneqarneratigut
ilinniartut 60-it sinerissami najukkaminniiginnartulik Ilinniarfissuarmi
ilinniartutut aallartipput. Taakkununnga ilanngunneqassapput Ilinniarfissuarmi
ilinniartinneqarlutik ukioq manna ilinniartunngortut 35-t, taamaalilluni
augustimi 1998-imi ilinniartitsisunngorniat 95-it aallartipput. Augustimi
1998-imi Ilinniarfissuarmi ilinniartitsisunngorniat katillutik 193-iupput.
Sinerissamiiginnarlutik ilinniartitsisunngorniartussanik nutaanik ukioq
2000-imi januaareqalerpat aallartittoqaqqissaaq.
Suliassat tamakku oqimaatsuupput
naalakkersuisulli isumaqarput ajornartorsiutu aaqqinneqarsinnasut. Piffissaq
ungasinnerusoq isigalugu namminerisatsinnik amingaagitsunillu ilinniartitsisoqalernissarput
tamatumani suliniutigaarput. Tamatumunnga peqatigitillugu ilinniartitsisut
kaffuffiisa namminerminnut atuarfinnullu ataasiaakkaanut iluaqutaasussamik
suleqatigiilernerat aamma assut naammagisimaarparput.
Ataatsimut isigalugu ilinniartitaanermut
tunngasut amerlasuut suliniutigineqarput. Nunaqarfimmiunik
ilinniartitsissutitut naammassiniaakt annertuut marluk uku
naalakkersuisoqarfiup naammassivai: Kommunit nunaqarfinni allaffiini sulisut
ilinniagassani immikkoortuni pingasuni ilinniariikkaminnik aamma
annertunerusunik pikkorissartinneqarmata
aamma annertusiiniarlutik Niuernermik
Ilinniarfimmit ineriartortitat tunngavigalugit aamma pikkorissartinneqarlutik
kiisalu nunaqarfimmut nunaqarfimminni aqqusinniortiternernik kiisalu
pioreersunik nutaanillu aserfallatsaaliuinernik siunertalinnik Sanaartornermik
Ilinniarfimmit ineriartortitat tunngavigalugit sanaartornermi
pikkorissartinneqarput.
Nalunngilarput ilinniarfiit
aaqqissuussaanerini arlalinnik ajornartorsiuteqartoqarnera. Atortorissaarusersornermik
ilinniarfinni ilinniartut ilinniarnerminnut atatillugu sungiusarfissarpassuaqanngillat,
inuusuttulli tusarnaartut ima oqarfigerusuppakka: Nunarsuarmi pitsaanerpaat
iaannik ilinnigaqarnersiuteqartitsivugut. Taamaattumik piareersariarlutit illit
nammineq siunissat aallarnisaannaqiuk.
Oqaatsinut allaffik
Nunatsinni oqaatsinut allaffeqarlernissaq
pillugu nassuiaat ataatsimiinnermi aamma saqqummiunneqartussaammat
oqaatigineqassaaq. Oqaatsinut Allaffeqartoqalernissaata kissaatigineqarneranut,
sunik suliaqarnissaanik, qanoq annertutigitinneqarnissaanut
aaqqissuunneqarnissaanullu Inatsisartut naliliinissaat tunngavissiorniarlugu
nassuiaat suliarineqarpoq.
Ilagiit
Aamma ilageeqarnermi annertuumik
allanngortiterisoqalerpoq. Tamanna nuntta biskopeqarfinngornera
pissusissamsoortumik kinguneriinnarpaa. Ilageeqarnermi atorfinitsitsisarnerit
pillugit Inatsisartut peqqussutissannut missingiut ataatsimiinnermi matumani
saqqummiunneqartussaavoq. Kingusinnerusukkut ilagiit allattaaviinut
nalunaarsuisarnerit pillugit Inatsisartut peqqussutissaattut siunnersuummik
aamma tamatumani saqqummiussisoqassalluni.
Ukiaq manna ilagiinni sulianut ilaasumik
ilagiinni sulinissaminnut immikkut ilinniagaqarnngitunut
sammitinneqarnerusunik ataatsimeersuartitsisoqarpoq. Tamatumani
siunertarineqarpoq ilinniagaqanngitsut akornanni matuminnga
oqaluuserinnilersitsiniarneq: AUkiuni 2000-ikkunni ilagiit qanoq
iliussappat ?@
Peqqinnissatsinnut tunngatillugu
Naalakkersuisut anguniarpaat
peqqinnissatsigut sullinneqarnitsinni aningaasartuutissatut killiliunneqartut
sippornagit innuttaasunik sullissinerup aalaakkaasuunissaata pitsaasuunisaatalu
aammalu napparsimasup killiffimmini pisariaqartitsinera aallaavigalugu
pisariaqartinneqartunik kiffartuussisoqartarnissaata isumannaarneqarnissaat.
Nakorsassaaleqinerit, peqqissaasunik
amigaateqarnerit, kigutit nakorsassaaleqinerit il. il. Sulisullu
nikerarpallaarnerat pissutigalugit anguniagaq tamanna massakkut
naammaginartumik anguneqarsinnaasimanngilaq.
Peqqinnissatsinnik sullissinermi sulisussarsiornerup
nukittorsarneqarnissanut aningaasaliisorqareerpoq ajornartoriutillu
assakaatillugillusooq oqaluuserineqartareerlutik aammalu aaqqiissutaagallartorpassuarnik
suliaqareerluta. Nunatsinnili nakorsat assersuutigalugu akissarsiaasa marloriaatinngortinneqarnerisigut
nakorsassaaleqinermi ajornartorsiutit anigorneqarsinnaanerat
isumaqatiginngilara. Pissutsit assigiinngitsorpassuit tamtumani akulerusimapput
- taamaattumik nutaanik isumaliutersuuteqarnissaq
pinngitsoorneqarsinnaanngivippoq.
Aaqqiissutissanik ataavartunik
nassaarniarnermi tulluartumik peqataasinnasut tamarmik peqataasariaqarput.
Isumaliutigineqartariaqarpoq kommunit
Danmarkimi nunanilu allani illoqarfinnik ikinnguteqartiternertik aqqutigalugu
peqqinnissatsinnik sullissinermi sulisussanik pissarsiornsinnaanerat
pitsaanerunnginnersoq. Aamma danskit oqartussaasui kissaateqarfigisinnaavavut
peqqinnissatsinnik sullissisussanik immikkut assigiinngissutinik
ilinniartitsisoqarsinnaanera - tassa nakorsanik peqqissaasunillu nunatsinni napparsimavinni
sulinissaminnut piukkunnarsarsimanerusunik kiisalu nunatta avataani
sulisinnaanermut naammassinniffiusunik - suleqatigaluta pilersitsiniaqqullugit.
Kiisalu pisinnaasatsinnut tunngasunik
isumkoqqittariaqarpugut : Nunatsinni minnerpaamik suut
suliarineqarsinnaassappat aammalu suut iluaqutissarsiffiginerullugit
suliarisinnaavavut ? Tamatumunnga atatillugu oqaatigineqarsinnaavoq danskit
peqqinnissamut ministeriat naalakkersuisunit suleqatigiinnissamut
isumaqatigiissuteqarfigineqaqqammermat.
Kiisalu Rigshospitalimut
napparsimmavinnullu namminersortunut sulassat imikkut ilisimasalinnit
suliarisariaqartut pillugit isumaqatigiissuteqareerpugut, tamatumalu
kingueranik pilersaarusiornerit pitsaalluinnarsimagaangata nappaatillit
ilarpassui nunatsinni sivikitsumik suliarineqarsinnaasalerput.
Nunatta ilaani napparsimmavinni
annertunerusumik sullissisalernissat ingerlatiinnarneqarput tamatumunngalu
atatillugu qarasaasianik atortulersorluni nakorsaasarnerit naalakkersuisunit
pingaartinneqarluarput.
Pinaveersaartitsinerit suli
naalakkersuisunit eqqumaffigilluarneqarput. Tamatumani kommuninik
suleqateqarneq suli annertusiartorpoq aammalu pinaveersaartitsinermut
siunnersortinik atorfinitsitsiortornerit amerliartorlutik. Nunatsinni
AIDS-imik akiuiniarnermut novemberip aallaqqaataani
aningaasaateqarfiliortoqassaaq. Ilaatigut landskarsip tapiissuteqarneratigut
ilaatigullu nuna tamakkerlugu katersuiniarnikkut aningaasat
pissarsiarineiarneqassapput.
Naak peqqinnissatsinnik sullissinermi
massakkut ajornartorsiuterpassuaqaraluarluta siumut sammisunik piffissarlu
ungasinnerusoq isigalugu ikorfartuutaajumaartunik suliniuteqarpugut.
Nappaatillip killiffia aallaavigalugu - inuup qitiunera tunngavigalugu -
sullissisarnissaq erseqqissassallugu pingaartippara.
Naggataatigut
1970-ikkunni namminersornerulernissarput
ilungersuutigalugu atuutilersipparput - tamannalu taamanikkut pisariaqartuuvoq.
Taamanna nunatta naalagaaffeqatigiinnermut pissusiinut attuumassuteqarani
uagut nammineq nunatsinnut asanninnitsinniippoq.
Ukiut 20-t maanna qaangiutilersut
anigorniagassarpassuarnik nassataqarsimapput. Kukkusaannarpugut - tamakkuli uagut
nammineq kukkuneraavut - tassaavorlu ingerlatsineq pisariaqarlunilu
pinngotsoorneqarsinnaanngitsoq aammalu innuttaasut oqartussaqataanerannut
taamanili eqeersaataasoq. Aammami namminersornerulernerput immini
namminiilivikkiartuinnarnitsinnut ingerlaarfiuvoq - aap, nunatta
namminiilivinnissaanut. Immitsinnut amerlanerujartuinnartunik suliaasittaratta
akisussaaffivut amerliartorput. Kingulleq qilanaarnartorlu tassaavoq
atortussiassalerinermut allattoqarfiup ukioq manna juulip aallaqqaataaniit
maanga nuunneqarnera. Tullinnguuttut ilaat tassavoq Danmarki suleqatigalugu
nunatta nunanut allanut tunngasunik toqqaannarnerusumik
ingerlatseqataalernissaa.
Inuiaat taakkulu nunaminnut pissusiat
pisussaaffiliisuuvoq. Pissuseq attatiinnarneqassappat
ineriartortinneqassappallu anigorniagassavut siunitsinni utaqqiinnartutut ittut
malersortariaqarpavut.
Anigorniagassamik sumilluunniit
qaangiiniarnermi sakkussat pitsaanerpaat ilagaat inuiaqatigiinnik
ingerlatsinermi suliassanik tamavitta ilinniartinneqarnissarput. Tassami
naalagaaffimmi namminersortumi - inuianni namminersortuni - inuttaasut
ilinniartitaanikkut kinguartuussappata tamanna inuiannut pineqartunut
oqimaatsorujussuussaaq. Ilinniartitaanerpummi aallullualereerparput - ukiunili
aggersuni suli pitsaanerusunik angusaqartariaqarpugut. Massakkut 60-inik
ukioqangajalerlunga aperineqaraangama misigisanni suna pitsaanerpaasimanersoq
tamtsigut ima akisarpunga: ANunaqarfimmiumut Qassimiormiumut uattut
ittumut ilinniagaqarsimaneq pitsaanerpaavoq@.
Pitsaasumimmi ilinniagaqarutta
inuiaqatigiit nammineq akunnitsinni - aap - ilami nunarsuarmi tamarmi - aamma sulisinnaavugut.
Nunarsuarmi qarasaasianik atortulersukkami atortorissaartunik nutaanik
tamakkuninnga atortoqarsinnasut ilikkagassaminnik aallerfigieriaannagaanni
inuuvugut. Tamakkulu aatsaat ilinniarneqarsinnaapput, atortorissaarutit
qarasaarsianiittut atorlugit. Illoqarfimmiumik nunaqarfimmiumilluunniit
kinaagaluarnersumik siunissami sakkussanik pisariaqavissunik tamakkuninnga
skissaqarlersitsilluni suliniuteqartussaq kinaluunniit naalakkersuisunit
tikilluaqquneqarpoq.
Meeqqat inuusuttullu eqeersimaartumik
soqutigineqarnerat tamatsinnut nuannaarutissaavoq. Tamanna allakkatigut
oqaatsitigullu sakkortusarneqartuarpoq. Meeqqanik ikkatilliisarnerit
amiilaarnartut akuersaarneqarsinnaanngitsullu atorfissaqartinngilavut.
Taamaattumik meerartavut inuusuttortavullu ilinniagaqarnerminni
ingerlariaqqiffissaannik inuiaqatigiinni imminnut napatinniassaannut -
tamannaluunniit sippulaarlugu -
periarfissittariaqarpavut. Atuarfiit, ilagiit angerlarsimaffiillu siunissami
suleqatigiilluarnissaat upperaarput. Tamakkuli saniatigut siunnersuutiginiarparput
meeqqat iluaqutissaannik isumginnittussamik sullissviliortoqarnissaa - immaqa
meeqqat ombudsmandeqarfiannik imaluunniit meeqqat siunnersuisoqatigiiffiannik
taaneqarsinnaasumik. Tamanna pillugu naalakkersuisut 1999-imi upernaakkut
ataatsimiinnissami siunnersuuteqassamaarput.
Taamaattumik naggataatigut inunnut -
arnanut angutinullu - namminneq kajumissusertik tunngavigalugu inuusuttunik
taamalu inuiaqatigiinnik tamatsinnik sullissisunut tamavitta sinnerluta
qamannga pisumik qujarusuppunga - qujanarsuaq. Inuttut inooqatigiinermilu
ajornartorsiuterpassuit taama nammineq inuit kajumissutsikkut suliatigut
qaangerniartarpaat aamma maani qaangerniarneqarput. Neriuutigeqaaralu suli
uteriillusi qasusuillusilu taamatut sulinersi nangissangissi.
Taama oqaaseqarlunga Inatsisartut
ataatsimiilluarnissaannik ineriartortitaqarluarnissaannillu kissaappakka.
Anders Andreassen, ataatsimiinnermik aqutsisoq.
Qujanaq. Taamaalilluni ullumikkut
Inatsisartut ukiakkut ataatsimiileqqaarneranni oqaluuserisassatut
inissinneqarsimasut tamakkerpavut.
Ataatsimiinneq naammassivoq.