Oqaluuserisassani immikkoortoq 13-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinermik aqutsisoq: Finn Karlsen, Siulittaasoqarfik, Atassut.
Jonathan Motzfeldt, Naalakkersuisut Siulittaasuat:
Naalakkersuisut sinnerlugit matumuuna saqqummiutissavara atortussiassat aatsitassanit pisut pillugit suliniutit isumagineqarnissaannut aamma Nuna Oil pillugu inatsimmi taaneqartartup allanngortinneqarneranik Inatsisartut inatsisissaattut siunnersuut.
Oqaatigissavara taanna aamma immikkoortoq ullormut oqaluuserissami 14-imut tunngassuteqarluinnarmat.
Aatsitassanut tunngasut 1998-imi julip aallaqqaataanni allanngortinneqarneranut aammalu ukioq 1999-imiit 2001-imut Naalaaffiup ataatsimoortumik tapiissutissaasa isumaqatigiissutigineqarneranut atatillugu danskit Naalakkersuisuisa Nunatsinnilu Naalakkersuisut isumaqatigiissutigaat Nuna Oil A/S-imi siunissami peqataaginnassanersoq isummerfiginiarlugu.
Isumaliuutit taakku kingunerisaannik isumaqatigiissutigineqarpoq ataatsimoorullugu ingerlatseqatigiiffik Nuna Oil A/S pillugu marlunnik allannguuteqartitsisoqassasoq.
Allannguummut siullermut.
Tamatumanut pissutaavoq Naalagaaffiup aatsitassanut ujaqqanit pisunut tunngatillugu peqataanini ingerlateqqikkusunngimmagu, tassami guldbrintisiornerit assiginagit, tamanna pisortanit peqataaffigineqanngimmat. Taamaattumik Nuna Oil A/S-ip sammisai guldbrintiinnanngortinneqassapput, tassa imaappoq olie-siorniarnermut sammisumik ingerlatsiviulissapput.
Allannguutip aappaanut pissutaavoq, suli ataatsimoorullugu ingerlatsivimmi Nuna Oil A/S-imi siunertamigullu guldbrintisiornerinnarmik ingerlatsinissami ingerlatseqatigiiffimmut Naalagaaffimmi imaluunniit Namminersornerullutik Oqartussanut tamakkiisumik pigineqartunut tunniunneqarsinnaalissammata. Tamanna Naalagaaffiup Namminersornerullutik Oqartussat isumaqatigiissuteqarfigisinnaappassuk.
Taamaalilluta danskit Naalakkersuisui Nunatsinnilu Naalakkersuisut isumaqatigiissutigaat Naalagaaffiup Nuna Oil A/S-imi aktie-tai DONG-imut tunniunneqassasut.
Tamanna naluneqanngitsutut ingerlatseqatigiiffiup Naalagaaffiiup tamakkiisumik pigisaa. Suliassaqarfialu tassarpiaalluni kulbrintisiornerit pisortanit peqataaffigineqarnissaat, taama ililluni suliassaqarfimmi annertuumik ilisimasaqarluni Nuna Oil A/S-ip iluaqutigiumaagassaanik.
Tamatumalu kingunerisaanik siunissami guldbrintisiornissamut kisermaassisinnaassutissani akuersissuteqartarnissani DONG niuernermi peqataasinnaassanngilaq, soorlu Kitaani immap naqqani kulbrintisiornissamut kisermaassisinnaassutsitinik akuersissutini qanittukkut atsiorneqartuni marluusuni taamaattoqarsinnaatitaasoq.
Aktie-tigullu iluanaarutit aatsitassat pillugit inatsit naapertorlugit agguaanneqartartussatut ilaatinneqartarnerat atuutiinnassaaq.
Allannguutinut taakkununnga illugitillugu danskit Nalakkersuisuisa Nunatsinni Naalakkersuisunut isumaqatigiissutigaat ingerlatseqatigiiffiup aningaasaataasa ingerlatseqatigiiffiup siunissami ingerlatassaanut naleqquttunngortillugit iluarsiivigineqarnissaat.
Tamatuma aamma saniatigut isumaqatigiissutaavoq Nuna Oil A/S-ip aatsitassanut ujaqqanut sunut tunngatillugu pigisaasa naatsorsuutini nalingi naapertorlugit Namminersornerullutik Oqartussanit pissarsiarineqassasut. Tassungalu atatillugu immikkut oqaatigerusuppara danskit Naalakkersuisui isumaqatigiissuteqarfigigakkit aatsitassat ujaqqanik pisut pillugit kisermaassisinnaassutsitsinik akuersissutip nalingi 0 kr.-nut angissusilerneqassasut.
Tamakku saniatigut inatsisissanut siunnersuummut oqaaseqaatit erseqqinnerusut innersuussutigissavakka.
Naluneqanngitsutut Nuna Oil pillugu
inatsisit assigiissuutinneqarmata.
Inatsisartut immikkoortumi
matumannga oqaluuserinnereerunik Nuna Oil pillugu danskit inatsisaannut
allannguutissanut danskit Naalakkersuisuisa siunnersuutaannut oqaaseqaateqassapput.
Taamatut oqaaseqarlunga
Naalakkersuisut sinnerlugit atortussiassat aatsitassanit pisut pillugit
suliniutit isumagineqarnissaannut ingerlatseqatigiiffik pillugu Inatsisartut
inatsisaat allanngortinneqarneranik Inatsisartut Inatsisissaattut siunnersuut
Inatsisartunut suliassanngortippara, tamatumalu kingorna
aappassaaniigassanngortillugu.
Ruth Heilmann, Siumup oqaaseqartua:
Atortussiassat aatsitassanit pisut pillugit
suliniutit isumagineqarnissaannut ingerlatseqatigiiffik pillugu Inatsisartut
inatsissaata allanngortinneqarneranik Inatsisartut inatsisissaattut
siunnersuummik suliassanngortitsilluni Naalakkersuisut saqqummiussaat
Siumumiit taperserlugit imatut naatsumik oqaaseqassaagut.
Siullermik oqaatigissavarput Siumumiit
iluarisimaaratsigu Naalakkersuisut ersarissumik anguniagaqartut aatsitassat
pillugit suliniuteqartuarmata, tamanna Siumumiit pingaaruteqarteqaarput,
tassami Nunatsinni inuutissarsiornitta katerisaata aappaatut aatsitassarsiorneq
olie-siornerlu isumalluutitut isigaavut, taamaattumillu taassumani
suliniarnerup annertuumik patajaatsumillu ingerlanneqarnissaa
kaammattuutigissallutigu.
Saqqummiunneqartumi paasinarluarpoq Nuna Oilip
sammisai marluinnut avinniarneqartut siullermi sammineqartut
ujaqqaniikkunnaarlutik kulbrintiinnanngortinniarneqartut, taamaalilluni
malitsigissallugu naalagaaffiup Nunaoil A/S-imit aktiaatai Dong-imut
tunniunnneqassasut Naalagaaffimmit Namminersornerusunillu
isumaqataaffigineqartumik.
Taamatut Naalakkersuisut danskillu Naalagaaffiata
paaseqatigiittumik isumaqatigiissutigisinnaasaannillu manna
saqqummiussaasutut Siumumit isumaqarfigaarput aammalu pingaartuutillugu
taamatut suleqatigiinnerup pitsaasup ingerlanneqartuarnera tamannalu
oqaatigissavarput toqqissisimanartuutikkipput.
Taamatut Naalakkersuisut inassuteqaateqarnerat
Siumumit isumaqataaffigaarput tassanimi aamma kisermaassisinnaatitaanermi
aningaasatigut iluanaarutaasussani avitseqatigiinnikkut periusissat
periarfissallu allannguuteqartinneqartussaanngitsut saqqummiussami
oqaatigineqareermat.
Taamaattumik Siumumit saqqummiunneqartumi
allannguutissatut siunnersuutigineqartut isumaqataaffigalugillu taperserpavut
taamatullu isikkoqartillugit Inatsisartut inatsisissaattut
aappasssaaneerneqarnissaanut ingerlaqqinnissaa inassutqaatigalugu.
Peter Ostermann, Atassutip oqaaseqartua:
Tamakkiisumik isumaqatigisarput naatsunnguamik
oqaaseqarfigissavarput.
Aasaq manna aatsitassanut tunngasut
allanngortinneqarnerata pissusissamisoortumik malitsigiinnarpaa inatsisit
makkununnga tunngasut allanngortinneqarnissaat.
Ullumikkut allannguutissat marluk Nuna Oil
A/S-imut tunngasut Naalakkersuisunit saqqummiunneqartut Atassummiit
annerusumik oqaasertalernagit akueriumavagut.
Paasilluarparput Naalagaaffiup aatsitassaniit
ujaqqaniit pisunut peqataanini ingerlateqqikkumajunnaarmagu, taamalu Nuna Oil
A/S olie-siornikkunniinnaq sammisassaqartilersimallugu.
Allannguutip aappa illua'tungeriinnik
isumaqatigiissutaasimasoq, tassalu naalagaaffiup Nuna Oil A/S-imi
piginneqataagallarami aktiaatai Dong-imut Naalagaaffiup tamakkiisumik
pigisaanut siunissamilu Nuna Oilip iluaqutigiligassaanut tunniunneqassasut
Atassummiit assuarutissaqartinngilarput.
Kiisalu taama aamma naammagisimaarparput
ingerlatseqatigiiffiup aningaasaataasa siunissami suliassanut aaqqiullugit
iluarsiivigineqarnissaannut isumaqatigiissutaasimasut.
Taama naatsumik oqaaseqarluta inatsisissap
siullermeerneqarnera akueralugu iluarisimaarlugulu oqaaseqarfigitsiarparput.
Johan Lund Olsen, Inuit Ataqatigiit oqaaseqartuat:
Siullermik Inuit Ataqatigiinniit erseqqissaqqaassavarput
oqaluuserisarput manna tulliani immikkoortoq 14-imi oqaluuserisassatsinni ima
attuumassuteqartigimmat taakku tamarmik immikkut oqaaseqarfiginatigit
maannakkut ataatsimoortillugit oqaaseqarfigissagatsigit.
Nuna Oil pillugu inatsit allanngortussanngorpoq
maannakkut Naalagaaffiup 50 %-imik piginneqataassutsini "sipaarlugit"
Dong A/S-imut "tuniniartussannguleramigit" kiisalu naalagaaffiup
Nuna Oil aamma aqqutigalugu aatsitassanut ujaqqanit pisunut tunngatillugu peqataanini
ingerlateqqikkusukkunnaarmagu.
Taamaalilluni allatut oqaatigalugu aatsitassanut
ujaqqanit pisunut tunngatillugu Naalagaaffiup akisussaaffini
minnerunngitsumilli Namminersornerullutik Oqartussat peqatigalugit
aningaasalersueqataanikkut aningaasalersueriaatsinilu aarlerissutaasinnaasunut
pisussaaffeqarnini aamma "sipaarniarfigisussanngorpaa."
Inuit Ataqatigiit allannguutissaq kingulleq
pineqartoq, tassalu Naalagaaffiup aatsitassanut ujaqqanit pisunut
tunngatillugu maannakkut iliuuseriniagaa eqqarsarnartoqartipparput.
Pissutigalugu aatsitassarsiornermi
isertitsissutigineqartartussanut avitseqatigiittariaqartarnermi maannamut
atuuttumut tamanna sunniuteqartinniarneqanngimmat.
Taamaalilluni assersuutigiinnarlugu, Kujataani
Nanortallip eqqaani Napasorsuarni guld-isiorfissami naalagaaffik siunissami
aningaasalersuisariaqarnerni aarlerissutaasinnaasunut, naak
pisussaaffeerutereeraluarluni suli guld-imik piiaasoqalissagaluarpat
isertitsissutigineqarumaartussanik tamatigut naalagaaffik 50 %-imik
pissarsitinneqartuartussaammat.
Inuit Ataqatigiit isumaat naapertorlugu tamanna
equngassuteqarluinnarpoq, taamaattumik aappassaaneerisoqartinnagu
kissaatigissavarput tamannarpiaq aatsitassat pillugit siunnersuisoqatigiit
kalaallinit ilaasortaatitaannit suli nalilersuiffigineqaqqaarallassasoq
maannakkut taamaaliinnarlugu akuerineqanngikkallarnerani.
Aatsitassat pillugit allattoqarfik tamakkiisoq
ilisimaneqareersutuut julip aallaqqaataa ukioq manna maanga Nunatsinnut
nuutinneqarpoq. Allaffimmik tamanna nuutsinerinnaavoq taamaattumillu aamma
oqartoqarsinnaavoq maannakkut aatsitassat pillugit allattoqarfittaassatsinnut
illutaarsimagatta, kisiannili illutaarnitsinnut atatillugu nerisassaasivianut
matuersaaserneqarsimannginnatta, naalagaaffiummi suli matuersaat tigummiuartuarsinnarpaa
piumalleraangamillu aatsaat tassunga uagut isertissinnaasarluta.
Tamanna naalagaaffiup aatsitassanut ujaqqanit
pisunut tunngatillugu Nuna Oil aqqutigalugu peqataajumajunnaalerneratigut erseqqilluinnartumik
matumani takutinneqarpoq.
Taamaattuminguna aamma kissaatigigipput aappassaaneerisoqartinnagu suli
nalilersueqqittoqartariaqartoq.
Tamannalu pisinnaasorivarput aatsitassat pillugit
siunnersuisoqatigiit kalaalersaasa akornanni.
Taamatullu oqaaseqarluta kissaatigisarput tamanna
aamma ataqqineqaqqussavarput eqqaamallutigumi nunamit
piginnittussaasariaqarnerput suli maannamut aaqqiissuteqarfiginnginnatsigu
aatsitassallu pillugit allattoqarfeqalerluta illutaassatsinnut taamaallaat
julip aallaqqaataanni matuersaammik tunineqaannarsimagatta,
nerisassaasiviannut suli aamma oqaatigeriikkattuut iseqqusaatinneqarata.
Anthon Frederiksen, Kattusseqatigiit:
Atortussiassat aatsitassanit pisut pillugit
isumagineqarnissaanut ingerlatseqatigiiffik pillugu Inatsisartut inatsisaata
allanngortinneqarnissaanut soqutigalugu Kattusseqatigiit sinnerlugit
misissorsimavara, imatullu oqaaseqarfigissallugu.
Naalakkersuisut danskillu naalakkersuisuisa
aatsitassat ataatsimoortumillu naalagaaffiup tapiissutigisartagai pillugit
isumaqatigiissuteqarsimaneranut tunngatillugu pinngitsoorneqarsinnaasimanngilaq
Inatsisartut inatsisaata matuma allanngortinneqarnissaa.
Taamaattumik pissutsit paasillugit
Kattusseqatigiit tungaanniit allannguutissatut siunnersuut marlunnik
immikkoortortaqartoq tunngaviisigut isumaqatigaakka.
Tassami pisariaqarpoq Nunatsinni
aatsitassarsiorneq pillugu inatsisinik naleqquttunik tunuliaqutaqarnissaq.
Minnerunngitsumik maannamut akuersissutit
ilaatigut pissanganartunik soqutiginartunillu ilallit eqqarsaatigalugit.
Soorlu assersuutigalugu Nanortallip eqqaanni
guld-isiorsinnaanermut tunngasut, kisiannili aamma ujaarleqqinnissamut
aningaasaliissutinik annertuunik pisariaqartitsisussat.
Soorunami oqartussaaffik sunaluunniit
tigussagaanni tamatigut pisussaaffinnik ilaqartarpoq, taamaattumik tamatuma
siunissami aamma sillimaffiginissaa ilanngullugu eqqaamasariaqarpoq.
Tassami Naalakkersuisut danskillu
naalakkersuisuisa upernaaq isumaqatigiissutigisaminni ukioq 2001-ip
tungaanuugallartoq 3,2 mio ataatsimoortumik tapiissutinut ilanngullugit
Nunatsinni aatsitassarsiornerup oqartussaaffigineqarnissaata
ingerlanneqarnerani danskit naalagaaffianiit "akileeqataaffigigallartussaavaat".
Soorunami tamatuma kingorna pissutsit
takutikkumaarpaat qanoq ingerlariaqqittoqassanersoq.
Taamatut naakkaluamik oqaaseqarlunga suliap
aappassaaneerneqannginnerani inatsiseqarnermut ataatsimiititaliami
oqaluuserineqarnissaa inassutigivara.
Jonathan Motzfeldt, Naalakkersuisut Siulittaasuat:
Partiit oqaaseqartui qutsavigaakka, taamatut
ilassilluarmassuk allannguutitut siunnersuutit. Taamatut Siumup oqaluttuata
taamatullu aamma partiit allat oqaluttuisa, minnerunngitsumik Inuit
Ataqatigiit ilaatigut nalorninartutut apeqqutigisai tunngavigalugit.
Aviiffeqatigiittarnissamut tunngasut, aningaasat
isertitassat qanoq aatsitassarsiornikkut pingaartumik
nalornissutigineqarsinnaaneri pillugit.
Oqaatigissavara taanna udvalg-imi nassuiaatit
erseqqissut pineqarsinnaassapput aamma isumaqarpunga Inuit Ataqatigiit
kissaatigisaat Fĉllesrċd-imi ilaasortaasut kalaallit aappassaaneerneqartinnagu
aamma tassa apeqqutinik paasisassarsiorsinnaanerat, isumassarsiaasoq
ajunngitsoq aamma tassani paasissutissanik annertunerusunik paaseqatigiinniarnissaq
periarfissaqartinneqassaaq.
Napasorsuarmut tunngatillugu. Naalagaaffiup
soorunami tassani aningaasaleeqataasimanini assigiinngitsut tunngavigalugit
pissarsiaqarsinnaanini aamma soorunami naatsorsuutigissavaa.
Kisiannilu naalagaaffiup maannaminngaanniit
peqataaffiginngisamini aamma soorunami isertitatigut pissarsiaqarsinnaanini
naatsorsuutigissanngilaa.
Tassa imaappoq, maannamut naalagaaffiup
aningaasartuutigisimasamik tungaatigut tassuunakkut aviffigeqatigiissinnaanini
periarfissaatigut anguniarsinnaavaa, kisiannili matuma kingornatigut
taamaaliorsinnaassanani.
Apeqqutit taamaattut erseqqinnerusumit teknikimut
aningaasatigullu apeqqutit udvalg-ini misissoqqissinnaanerini Inuit
Ataqatigiit noqqaassutaat akuersaarusuppara aammalu innersuussutigerusullugu.
Taavalu aamma Naalagaaffiup nammineq piginnittutut
nuna aatsitassarsiornermi piginnittutut aamma ikkusimanini ilaatigut
soorunami naalagaaffiip ilaatigut nammineq ilaatigut EU-mi malittarisassat
tungaatigut ajornartorsiuteqarsinnaanera isigalugu Naalagaaffiup
tamakkunatigut allanut tunniussisinnaanermini periarfissiiniarnera ilaatigut
Dong-imut aamma eqqarsaatissanut ilaasimapput naalagaaffiup tungaaninngaanniit.
Kisianni taavalu maannakkut akuersaarluarneqarnera
qujassutigalugu taamatut aappassaaneerneqarnerani ingerlatinnagu
innersuussutigineqartut, udvalg-imilu Fĉllesrċd-illu kalaalersai
naapititsinissai akuersaarpakka.
Oqaluuserisaq naammassivoq.