Kalaallit Nunaanni Inatsisartut

Oqaluuserisassani immikkoortoq 14

Ataatsimiinnerit ] Tilbage ] Op ] Nĉste ]

Siullermeerneqarnera Aappassaanneerneqarnera Pingajussaaneerneqarnera
Marlunngorneq 29. september 1998 nal. 15.45

 

Oqaluuserisassani immikkoortoq 14

 

Kalaallit Nunaanni atortussiassat aatsitassanit pisut pillugit suliniutit isumagine­qarnissaannut ingerlatseqatigiiffik pillugu inatsisip allanngor­tinneqarnera pillugu inatsisissamut siunnersuummut Namminersornerullutik Oqartussat oqaaseqaataat.

(Naalakkersuisut Siulittaasuat)

 

 

 

Ataatsimiinermik aqutsisoq: Finn Karlsen, Siulittaasoqarfik, Atassut.

 

Jonathan Motzfeldt, Naalakkersuisut Siulittaasuat:

Soorlu oqaatigereera immikkoortumi matumani siuliani taaneqartutuut Nuna Oil A/S pillugu Nunatsinni Inatsisissaq danskillu inatsisaat assigiissuu­tinneqarput, taamaattumik ataatsimut isigalugu Nuna Oil pillugu Nunatsinni inatsimmik allanngortitsinissaq pillugu oqaaserisassap matuma siuliani im­mikkoortoq 13-imi saqqummiussissut innersuussuti­gissavara.

 

Taamalu oqaaseqarlunga Naalakkersuisut sinnerlugit inassutigissavara dan­skit naalak­kersuisuinut inatsisissap siunnersuutaannut Inatsisartut isuma­qataaqqullugit.

 

Ruth Heilmann, Siumup oqaaseqartua:

Aap, isumaqataavugut. Siumumiit immikkoortoq 13-imi innersuussutigalugit Nuna Oil A/S-ip ingerlataanik allannguiffiusussap Nunatsinni aamma Qallu­naallu Nunaanni inatsisip assigiittuunissaannik siunertaqartumik Naalakker­suisunut inassuteqaataasoq matumuuna aamma Siumumiit isumaqataaffigigipput oqaatigissavara.

 

Peter Ostermann, Atassutip oqaaseqartua:

Uaguttaaq Atassumminngaanniit siuliani oqaaserisagut isumaqatigalugit Naa­lakkersuisut saqqummiussaat tamakkiisumik akuersaarparput.

 

 

 

Johan Lund Olsen, Inuit Ataqatigiit oqaaseqartuat:


Immikkoortoq 13-imi aatsaaginnaq Inuit Ataqatigiinniit oqaaseqaatigisagut innersuussu­tigalugit aamma matumani oqaatigiinnartariaqassavarput inatsi­sissatut siunnersuut una aamma Folketing-imi suliarineqartussaq soorunami naatsorsuutigilluinnarparput Folketing-imi inatsisiliortarnerat malillugu aamma siullermeerneqarlunilu, aappassaane­erneqarlunilu pingajussaaneerne­qaqqaartussaasoq.

 

Taamaattoq immikkoortoq 13-imi oqaaseqarnitsituut oqaatigeqqiinnassavara uagut imaaliallaannarlugu maannakkut siullermeerinermi akuerisinnaanngin­natsigu taanna saqqummiunneqarsimasoq, taamaattumik-una aamma kissaatigi­gipput aatsitassat pillugit siunnersuisoqatigiivini kalaallit ilaasortaati­taasa akornanni taanna suli oqallisigineqaq­qaarallassasoq suli aappassaane­erisoqartinnagu.

 

Taamatullu oqaaseqarlunga tassa aamma nuannaarutigivara aatsaaginnaq Naa­lakkersui­sut Siulittaasuata oqaatigimmagu soorunami tamanna akornutissaqar­tinneqanngitsoq.

 

Taamaattumik naatsorsuutigilluinnarpara ulluni tulliuttuni tamanna naammas­siniarne­qarumaartoq.

 

Anthon Frederiksen, Kattusseqatigiit:

Immikkoortoq 13-imi oqaaseqaatikka innersuussutigalugit saqqummiunneqartut tunnga­viatigut taperserlugit akuersaarpakka.

 

Oqaluuserisaq naammassivoq.