Oqaluuserisassani immikkoortoq 20-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 23. September 1998
nal. 14.30
Ataatsimiinnermik aqutsisoq: Inatsisartut Siulittaasuat Anders
Andreassen.
Daniel Skifte, Aningaasaqarnermut
Ineqarnermullu Naalakkersuisoq:
Illuliortiternernut
aningaasalersuineq pillugu Inatsisartut peqqutissaattut siunnersuut
Naalakkersuisut sinnerlugit matumuuna saqqummiuppara.
Peqqussutissatut siunnersuummik
matuminnga saqqummiussineq 1997-imi ukiakkut ataatsimiinnermi boligstøttimut
tunngasut pillugit Naalakkersuisut nassuiaataannik saqqummiussinermut
atatillugu nutarterinissaq pillugu kaammattuutinik Inatsisartunit
saqqummiunneqartunik pissuteqarpoq.
Oqaluuserisassani immikkoortuni
19-imi inissialiornermut tapersiissuteqartarneq pillugu Inatsisartut
peqqussutaata allanngortinneqarneranik Inatsisartut peqqussutissaattut
siunnersuut Naalakkersuisut saqqummiutissavaat. Immikkoortoq 19-imut
saqqummiussissummi atuarneqarsinnaavoq aaqqissuussineq arlaleriaqaluni
aaqqiissuteqarfigineqartarsimasoq suli paasiuminaannerulersillugu
nutartissallugu ajornakusoortuuvoq.
Taamaattumik inissialiornernut
tapersiissuteqartarnermik aaqqissuussinermik allanngortiteriuarnerup
killilerneqarnissaa Naalakkersuisut siunnersuutigaat, tamatumunngalu
peqatigitillugu illuliortiternernut aningaasalersuineq pillugu Inatsisartut
peqqussutissaattut nutaatut siunnersuummik nutaamik massakkut inissianik
pisariaqartitsinermut inuiaqatigiillu
tunngavissarititaannut naleqqussagaasumik saqqummiussillutik.
Illuliortiternernut
aningaasalersuineq pillugu Inatsisartut peqqussutissaattut siunnersuummi
malittarisassat nutaat massakkut ineqarniarnikkut aaqqiissutit siumut
eqqoriarneqarsinnaareersut tunngavigalugit suliarineqarsimapput,
aningaasaqarnikkullu tunngavigisat ullumikkut atuuttut ukiunilu aggersuni
atuuttussatut naatsorsuutigineqartut aamma ilanngullugit
qissimigaarneqarsimallutik.
Peqqussutissatut siunnersuummik
matuminnga saqqummiussineq Kalaallit Nunaanni inissaqartitsiniarnermik
ataatsimut isigaluni ilusilersuinermik allanngortiterinerup ilaatut
isigineqassaaq. Aningaasalersueriaasissatut siunnersuutigineqartut
aningaasalersueriaatsinut ullumikkut atorneqareersunut ilassutissatut isigineqassapput.
Tassa imaappoq 60/40 atorlugu sanaartornernut, piginneqatigiilluni
inissialiortiternernut, nammineq illulianik sanaartornermut, kommunit
illuliaannut nunaqarfinnilu illulianut.
Kalaallit Nunaanni
inissaqartitsiniarnerup ilisarnaataasa ilaat tassaavoq inissiat pisortanit
pigineqarlutilluunniit 90% tikillugu aningaasalersueqataaffigineqarsimanerat.
Inissiat 10%-iisa missaannaat namminersortunit pigineqarlutilluunniit
namminersortunit aningaasaleeqataaffigineqarsimapput.
Pisortat aningaasaataat
inissialiortiternermut atugassiissutigineqartut taakkuusut atorlugit
amerlanerusunik inissialiortitertoqarnissaanik kissaateqarneq tunngavigalugu
peqqussutissatut siunnersuut saqqummiunneqarpoq. Siunnersuutip kingunerisaanik
pisortat aningaasaataannit tamarmiusunit 60/40 atorlugu inissiamik ataatsimik
sanasarnermut taarsiullugu malittarisassat nutaat atorlugit inissiat 22-it maannaq sananeqarsinnaalissapput.
Inissiat namminersortunit pigineqartut
amerlanerulersinneqarnerisa, matumani inissiat attartortittakkat sulisunullu
inissiat ilanngullugit eqqarsaatigalugit, pisortat inissiaataasa
attartortittakkat pilerngunneqarnerat annikillisissavaa, taamatuttaarlu
siunissaq ungasinnerusoq eqqarsaatigalugu pisortat ingerlatsinermut
aserfallatsaaliinermullu pisussaaffii annikillisinneqassallutik.
Peqqussutissatut siunnersuutip
kingunerisaanik inissiat nammisortunit pigineqartut 10%-inik nammineq
siulequtsiinikkut, 40%-inik ukiuni 15-ini taarsersugassaanatillu
ernialersugaanngitsunik taarsigassarsinikkut kiisalu 50%-inik
taarsigassarsiniartarfinnit aningaaserivinnilluunniit taarsigassarsinikkut
aningaasalersorneqarsinnaalissapput.
Peqqussutissatut siunnersuut manna
inuinnarnut, namminersortut suliffeqarfiutaannut, ingerlatseqatigiiffinnut
namminersortunit pisortanillu pigineqartunut inissianik attartortittakkanik,
sulisunut inissianik imaluunniit ilaqutariinnut ataasiakkaanut illulianik
sanaartorniartunut sammitinneqarpoq.
Peqqussutissatut siunnersuummi
atuarneqarsinnaasutut sunut qanorlu amerlatigisunik
taarsigassarsisitsisoqarsinnaanera killilerneqarsimavoq, inissiat annertussusii
sanaartornermullu aningaasartuutit eqqarsaatigalugit. Sanatitsisup inissiat
killissarititaasut taakku sinnerlugit annertussusillit sanaartussallugit
kissaatigippagu aningaasartuutaanerusut taamaattut sanatitsisup nammineq
akilertariaqartussaassavai.
Pitsaassutsimut piumasaqaatit
aalajangersarneqarneranni piginneqatigiilluni inissialiortiterneq pillugu
peqqussummi malittarisassat aallaavigineqarsinnaanerat Naalakkersuisut
takorloorpaat, taakkunanimi inissiat anginerpaaffimmikkut 105 kvadratmeterimik
annertussutilerneqarsimapput kvadratmeterimullu 13.500 kr.-it missaannik
akeqarnissaat aalajangersarneqarsimammat.
Aammattaaq peqqussutissatut
siunnersuutip ilaqutariinnut ataasiakkaanut illuliaareersut
iluarsaanneqarnissaannut pitsanngorsarneqarnissaannulluunniit
taarsigassarsisitsisinnaanermut malittarisassat nutaat imarai. Tamatumani
eqqarsaatigineqartut tassaapput illut pisoqqat mikisullu boligstøttikkut
aaqqissuussineq aqqutigalugu sananeqarsimasut, aaqqissuussinermili tassannga
kaanngartinneqarsimasut.
Aamma illoqarsinnaavoq pisoqqanik,
namminersortunit aningaasalersorneqarsimasunik, imaluunniit boligstøttip
illuutigisaanik, piginnittup ukiuni arlalinni taarsigassarsiaminik
akilersuinermini paatsiveerussimasaanik.
Peqqussutissatut siunnersuutip
kingunerisaanik suliarineqartussatut qinnuteqaatigineqartunut
ernialersugaanngitsunik taarsersugassaanngitsunillu 40%-inik
taarsigassarsiniartoqarsinnaalissaaq. Taarsigassarsiat taakku
akilersorneqassanngillat, aatsaallu piginnittut paarlaanneranni
akilerneqartussanngussallutik, assersuutigalugu kingornussisussanut
tunniussinermi, taarsigassarsiat kingornussisussamit tiguneqarnissaat
taarsigassarsisitsisumit akuerineqarsinnaapput. Illut sorliit
iluarsaassinermilu pitsanngorsaanermiluunniit suliassat sorliit
taarsigassarsisitsiviusinnaanersut Naalakkersuisunit aalajangersarneqarnissaat
matumani tunngaviusussaavoq.
Peqqussutissatut siunnersuutip
aningaasalersuinikkut aaqqissuussinernut atuuttunut ilassutissatut
isigineqarnissaa erseqqissaqqissallugu Naalakkersuisut pissutissaqarsoripput.
Taamaattumik aningaasalersuinermik aaqqissuussinerup nutaap taassuma nunatta
ilaannaani atorneqarsinnaanera aallaqqaataaniilli paasineqartariaqarpoq,
tassami sanatitsisup sanaartornermut aningaasasartuutimi 50%-iinik
taarsigassarsiniartarfinnit aningaaserivinnilluunniit taarsigassarsinermigut
aningaasalersorsinnaassagai peqqussutissatut siunnersuummi tunngavigineqarmat.
Taarsigassarsiniartarfiit
aningaaseriviillu ullumikkut nutaanik taarsigassarsisitsinissaminnut
tunuarsimaarput taamaallallu illoqarfiit ilaannaanni annertunerusumik
annikinnerusumilluunniit taarsigassarsisitsisarlutik. Sanaartornermullu
aningaasartuutinut 50%-it tikillugu taarsigassarsiniartarfinnit taakkunannga
taarsigassarsisinneqarnissaq illoqarfinni aalajangersimasuinnarni
periarfissaqartussaassaaq.
Kisianni Naalakkersuisut isumaqarput
aningaasalersuinissamut periarfissat amerlasuut nunatsinni pigineqarnissaat
pingaartuusoq. Taamaattumik periarfissat tamarmik kommunit illoqarfiilluunniit
ilaannaanni atorneqarsinnaasussaanerat paasilluarneqartariaqarpoq, 50%-it
sinneruttut taakku taarsigassarsiniartarfinnit aningaaserivinnilluunniit
aningaasalersorneqartussatut eqqarsaatigineqartut taakku sanatitsisup
nammineerluni aningaasalersorsinnaanngippagit.
Illoqarfinni anginerusuni inissiat
amerlanerusut aningaasat ikinnerusut atorlugit sanaartorneqarsinnaappata
pisortat aningaasaataat illoqarfinnut mikinerusunut nunaqarfinnullu
iluaqutissanngortinneqarsinnaapput, taakkunanimi 60/40-mik aaqqissuussineq
atorlugu inissialiortiterneq, nammineq illulianik sanaartorneq
aaqqissuussinerillu atuuttut sinneri atorlugit sanaartorneq suli
atorfissaqartinneqartussaassammat.
Pingaarnerusutut anguniagaq tassaavoq
pisortat aningaasaataat taakkuusut atorlugit amerlanerusunik
inissialiortiterneq, tamannalu taamaallaat anguneqarsinnaavoq inissialiortiternermi
namminersortut annertunerusumik aningaasalersueqataanerisigut, ilaatigut
namminersortut sipaagaqartarnermik aningaasalersueqataanerisigut, ilaatigullu
taarsigassarsiniartarfinnit aningaasaserivinnilluunniit taarsigassarsiat
atorlugit namminersortut aningaasalersuinerisigut.
Aammattaaq pingaarnerusutut
anguniagaavoq pisortat inissiaataannik attartortittakkanik pilerngussinermik
annikillisaanissaq, tassami siunissaq ungasinnerusoq eqqarsaatigalugu Naalakkersuisut takorloormassuk ingerlatseqatigiiffiit
pisortanit pigineqartut sulisuminnut inissialiornerminni pisortanit 40%-inik
taarsigassarsitsisinneqarsinnaanerat pissutigalugu taakku pisortat
inissiaataannik atuinerat annikillisinneqarsinnaasoq.
Aamma Naalakkersuisut
oqaatigisinnaavaat peqqussutissatut siunnersuutip periareersarneqarnerani
inissiat attartortittakkat pioreersut inissianut nammineq
pigineqalersinnaasunut allanngortinneqarnissaannut periarfissaq
isumaliutersuutaasimasoq. Kisianni taamaaliortoqassappat tamanna pillugu immikkut
inatsisiliuussinissaq piumasaqaataasussaavoq.
Inissianut aningaasalersuineq pillugu
peqqussutissatut siunnersuut saqqummiunneqartoq ineqarnermut tunngasutigut
allannguutinik annertuunik nassataqarmat inissiat nammineq pigineqalersinnaasut
pillugit malittarisassanik nutaanik massakkut saqqummiussinissaq
pissusissamisoornavianngitsoq Naalakkersuisut isumaqarput.
Ukiuni aggersuni periarfissaq taanna
Naalakkersuisut isumaliutersuutiginiarpaat tamanna pillugu immikkut
inatsisiliassanik saqqummiussiumaarnissaq siunertaralugu, aamma
inissialiortiternermi namminersortut peqataanerisa suli
annertunerulersinneqarnissaat siunertaralugu.
Tamatumunnga atatillugu
initaarniarluni ileqqaagaqartarnerup qanoq ingerlanera Naalakkersuisut
malinnaaffigeqqissaarniarpaat. Taamatut ileqqaagaqarneq
taarsigassarsisitsisinnaasunut allanut sanilliullugu pingaaruteqannginnerusutut
isiginiarneqassanngilaq. Siullermik ileqqaagaqarnerup takutippaa pineqartoq
aningaasaqarnikkut pisariaqartinneqartumik pisinnaassuseqartoq, taamaalillunilu
siunertamut tassunga aningaasanik qaammatikkuutaartumik illuartitsisinnaalluni.
Aappassaanik tamatuma siunissami
taarsigassarsisitsisarumaartussat takutippai pineqartoq ukiut arlallit
ingerlaneranni aalajangersimasunik aningaasartuutiminik ileqqaakkaminullu
akiliisinnaasarsimasoq. Tamanna namminerisamik initaarniarneq pillugu
pingaaruteqartorujussuuvoq.
Naalakkersuisut sinnerlugit taamatut
oqaaseqarlunga illuliortiternernut aningaasalersuineq pillugu Inatsisartut
peqqussutissaattut siunnersuut Inatsisartuni oqaluuserisassanngorlugu
saqqummiuppara, siunnersuutillu aappassaaneerneqannginnermini Inatsisartut
Ineqarnermut Ataatsimiititaliaani oqaluuserineqarnissaa siunnersuutigalugu.
Anders Andreassen, Inatsisartut siulittaasuat:
Maanna partiit
kattusseqatigiillu oqaaseqartussaat oqaaseqassapput. Siulliulluni oqaaseqassaaq
Bjarne Kreutzmann, Siumut.
Bjarne
Kreutzmann, Siumup oqaaseeqartua:
Illuliortitsinermut
aningaasalersuineq pillugu Inatsisartut peqqussutissaannut siunnersuut pillugu
Siumut-mi imaattunik oqaaseqassaagut.
Siunnersuummut
pissutaatinneqarpoq inissialiornermi namminersortut tungaanniit annerusumik
aningaasaliisoqarnissaa
kissaatigineqarmat.
Pisortat
aningaasarpassuit inissialiornermut atorpaat aningaasarpassuillu inissianut
pioreersunut pituttorsimaffigalugit.
Kommunip
aningaasaqarneranut aamma nuna tamakkerlugu aningaasaqarnermut
ajussanngikkaluaqaaq inissiorneq suli amerlanerusunit aningaasalersorneqartuuppat.
Tamatuma
tungaanut qanoq iliuuseqartoqareerpoq tassami 1990-imi piginneqatigiinnikkut
inissialiornermut, tassa andelsbolig-inik, tapiissutit eqqunneqarmata.
Piginneqatigiilluni inissialiornermi aningaasartuutit pingasunngorlugit
avinneqarput. Namminersornerullutik Oqartussat pingajorarterut akilerlugu,
kommunip pingajorarterut aammalu piginneqatigiissutaatillip nammineq
pingajorarterut. Taamatut periaaseq iluatsilluarsimaqaaq, pingaartumik Nuummi.
Taamatut
periaatsimi pisortanut iluaqutaasoq tassaavoq inissiat arlallit nalinginnarmik
akiisa 2/3-liannik akeqarmat. Ilaatigullu ineqartut inissiaq piumasartik
pivaat, pingaartumillu allaffissornertaa aserfallatsaaliinerlu pisortanit
susassarineqarani. Taamaattumillu piginnittut aserfallatsaaliinissamut
soqutiginnilluarlutik, tassami nammineq pigileramikkit.
Ilivitsunngorlugu
nammineq akiliutitut piumasarisaasoq 110.000-iuvoq piginneqataanissamut,
taannalu inissiamut attartukkamut angeqataasumut pisortanit
attartortinneqartumut naleqqiullugu 700,00 kruuninik qatsinneruvoq.
Aaqqiineruvoq tamagiinnut ajunngitsoq.
Namminersortut
piginneqatigiilluni inissiaateqarnermut aningaasaliiumalersinniarlugit
namminersortut inissianik attartortitsinermut akigititaat qummut
killeerutitaapput. Tamanna piffissaq sivikinnerusoq eqqarsaatigalugu immaqa
aaqqiineruvoq pitsaasoq pisortat attartortitassat annerpaartaannik
pigisaqartillugit, aningaasartuutit tunngavigalugit akit aalajangerneqatarnerat
pisuulluni, kisianni namminersortut attartortitaasa amerliartuinnarnerisigut
akit killeqartitaannginnerat nalilerneqaqqittariaqassagunarpoq.
Namminersortut
inissiaqarnermik tigusiartuaarnissaannik siunertaqartumik qanoq iliuutsit
kingullersaat iliuuserineqarsimasoq tassa sulisunut inissiaatit akileraarutitigut
ilanngaatigineqarsinnaanissaat eqqunneqarmat.
Mannakkut
selskabsskat-i 35%-usoq aamma ilanngaateqartitseriaaseq, akileraartarnermut
inatsisiniittoq, najoqqutaralugu naligaa toqqaannanngikkaluamik tapiissut 35%
sulisunut inissialiornermut. Tamanna aamma aaqqiineruvoq pitsaasoq, kisianni
piumasaavoq ingerlatsivik sinneqartooruteqassasoq ilanngaateqartsiteriaaseq
atorneqassappat.
Maannakkut
siunnersuutigineqarpoq inissianut attartortitanut, sulisunut inissianut
ilaqutariinnullu
ataatsinut
inissianut tapiissut 40%.
Namminersorlutik
inissiaateqarnermi akitigut killeqanngitsumik suli ingerlatsisoqartillugu
eqqumiigaarput namminersortunut inissiaateqarnermut tapiisoqartassappat.
Taamatut inissiat aaqqissuussinermit taamaattumit tapiiffigineqarlutik ingerlasut
pisussaaffigineqanngillat akit aalajangersimasut inissiiffigineqarnissaannik.
Tassa suli killeqartitaanngillat.
Tamanna pissusissamissoorsinnanngilaq.
Taamatut
tapiissuseeriaatsimut Siumut tapersersuissappat, 40%-imik tapiiffigineqarluni
sanaartornissap tapeeriaatsimut inatsisiliunnissaat isumageqqaartariaqarpoq.
Sulisorisat
inissaannut tunngatillugu inissialiornermi ilanngaataatitsineqartarnissaq
kajumissaatitut naammattutut isigaarput. Ilumoorpoq ingerlatsiviit
amigartooruteqartut tamatumuunakkut sulisorisanut inissialiornissamut
kajumilersinneqarsinnaanngimmata. Kisianni amigartooruteqarlutik ingerlasut
qanoq sivisutigisumik ingerlasinnaappat?
Ilaqutariinnut
akunnattumik imaluunniit qutsissumik isertitalinnut ilaqutariinnut ataatsinut imissiamik
sanarusuttunut tapiissuteqarnissamut tunngatillugu Siumumiit isumaqarpugut
eqqussinissamut piffissaq eqqortoq oqallisigineqartariaqartoq.
Taamatut
oqaaseqarluta Siumumiit inassutigissavarput siunnersuut aappassaaneerneqartinnani
ineqarnermi ataatsimiititaliami suliarineqassasoq.
Anders
Nilsson, Atassutip oqaaseqartua:
Siunnersuut
saqqummersinneqartoq pissanganarpoq,
ineqarnermi aningaasalersuisarnermi siunissami malitassatut saqqummiunneqartoq,
illuliornermi aningaasartuutit 40 % -ii erniaqanngitsumik
taarsigassaanngitsumillu taarsigassarsiarisassagaat, illuliortullu 10 %-ii
nammineq akilertassallugit, sinnerilu tassa 50 % -it realkreditimit
taarsigassarsiarineqartarlutik.
Siunnersuut
takuginnarlugu iluarinaqaaq, misissuataalaarluguli apeqqutit arlallit
saqqummerarput paasiniaqqaartariaqartut, aatsaallu akineqarsinnaasut maanna
ineqarnermi illoqarnermi tapiissutaasartunut sanilliullugit
missingersuulluaqqaarlugit.
Isumagineqanngilaq
namminersornerusut 40 % -inik erniaqanngitsunik taarsigassaanngitsunillu 40 %
-inik tapiissuteqartassasut. Naluneqanngilaq realkreditimit
taarsigassarsisitsisartut nalunaaruteqareermata Kalaalit Nunaanni
illuliortsiternermi ukiut 15-it sinnerlugit taarsigassarsisitsisarnissartik
kissaatiginngikkitsik. Uani siunnersuutigineqarpoq, taarsigassarsianik
taarsersuinermi ukiut kingulliit qulit piffissaritinneqassasut, ukiuni 25-ini
taarsersugassanik taarsigassarsisimagaanni. Taama pisoqassaaq 40 %-inik
aningaasaliisoqarsimappat 15-issaannit 25-issaata tungaanut landskarsimit
taarsersugassanik.
Tassa
illuliortup tamaasa akilersortariaqassaavai soorlu maannakkut taamaattoq.
Taamaassappat
namminerlutik akilersukkaminnik illuliorumasut amerlanerulernavianngillat,
ullumikkut pissusiusut oqinneroqimmata.
Imissianik
attartonermi ullumikkut inissiat akiisa sisamararterutaannat attartortup
akilertarpai, sinneri uagut nammineq akileraarutitsigut matusarpavut.
Attartortulli inissiamut akiliutini utertinneq ajorpai.
Kapitali
2 malillugu illuliat akiisa 70 %-ii angullugit piginnittup nammineq
akilertarpai, sinneri landskarsimit tapiissutigineqartarput.
Piginneqatigiilluni
inissialiortiternermi aningaasartuutit 67 %-ii pisortanit
tapiissutigineqartarput, sinneri piginneqataasup nammineq ooriutiminik
realkredit-timilluunniit taarsigassarsiaminik akilertarpai.
Ernianik
ilanngaataasartussatut siunnersuutit assigiinngitsut allallu taamaattut maanna
atuuttut siunnersuutigineqartullu imminnut missingersuutissallutik piviusunik
tunngavissaaleqinaqaaq.
Atassutip
suli aalajangersumik isummerfiginngikkaluarlugu, partii isumaqarneruvoq
siunnersuut ilalernarpallaanngitsoq. Siunertarineqartorlu
anguneqarnavianngitsoq, tassa isumaqartoqarmat landskarsip
aningaasaliissutissaiiluaqutaallutik illuliassat 2,5 %-inik amerleriassasut.
Atassummi
isumaqarneruvugut siunnersuut allanngortittariaqartoq, tapiissutissatut
siunnersuutigineqartut 40 %-ii illup nalingata ilaanit piumasarineqartassasut, milliartuaartinneqartassallutilli
realkredit-imit taarsigassarsiat akilersorneqarnerat ilutigalugu. Privatit
illuliornerulernissaat aatsaat taamaalilluni anguneqarsinnaavoq, landskarsimiit
tapiissutit peqatigalugit.
Oqareerpugulli
nalorninartoqaqisoq. Atassummiilli siunnersuutigissavarput boligudvalgimi
naatsorsueqqissaarneqassasoq. Tapiissuteqartarnerit assigiinngitsut
ataasiakkaarlugit kisitsisinngorlugit imminnut missingersuuteqqissaarlugit.
Siunnersuummi
aamma ilanngunneqarsimapput, illut pisoqqat iluarsartunniissaannut
taarsigassarsiniarnermi malittarisassat. Upernaakkut ataatsimiinnermi tamanna
ajornartorsiut boligudvalgimit suliarineqarpoq. Taamani boligudvalgimit
siunnersuutigineqarpoq illuliassanut aningaasaateqarfiliortoqassasoq,
iluassartuussinermut aserfallatsaaliuinissanullu
taarsigassarsinniarfiusinnaasumik, piginnittut paarlaanneranni
tunniunneqartartussanik.
Siunnersuummi
saqqummiunneqartumi siunnersuutigineqarpoq, erniaqartinneqanngitsunik
taarsersugassaanngitsunillu aningaasartuutit 40 %-ii tikillugit
taarsigassarsiaritinneqartartussaassasut, illu allanut tunigaanni aatsaat
akilerneqartassallutik. Taama siunnersuuteqarneq Atassut-miit
isumaqatigilluinnarparput.
Taama
oqaaseqarluta siunnersuut Ineqarnermut Ataatsimiititami suliarineqassasoq
inassutigaarput. Maanilu aappassaaneerneqarnissaminut isumaliutissiissummik
saqqummiussissoqassasoq.
Josef
Tuusi Motzfeldt, Inuit Ataqatigiit:
Peqqussutissatut siunnersuut amerlasuutigut Inuit Ataqatigiit illoqarnermut tunngasutigut ukiut kingulliit ujartortarsimasatsinnut naaperiaanertut nalilerparput. Tassani pingaartillugu taarusutarput tassaavoq: Ullumikkumut periarfissaareersunut tapertaliussatut Naalakkersuisuni ilaasortap oqarnerattut nalilerneqartariaqarnera.
Peqqussutissatummi
siunnersuut najoqqutaralu nutaanik illuliornissaannaq pinnagu illulli
pigineqareersut BSU najoqqutaralugu aammalu innuttaasut ataasiakkaat
namminneerlutik qangali illuliarereersimasaat matumani
periarfissinneqartussaapput. Illummi pigineqareersut manna tikillugu ullutsinni
naleqquttunik atortorissaarusersornissaannut allatigullumi nutarternissannut
manna tikillugu periarfissaqanngingajassimanerat peqqutigalugu illoqartut
amerlaqaat, illutsiarsuarminnik aniinnarlutik inissiarnut nuuttariaqartarsimasut.
Kiisami oqareernitsisut aaqqiissutissatut ukiuni arlaqalersuni
ujartortarsimasarput siunnersuutikkut matumuuna periarfissinneqartussanngorpoq.
Assersuutigalugu
illu piginnitsiminik 100.000 koruuninik naliginut nutarterluguluunniit
atortorissaarusersorniaruniuk nammineq 10.000 koruuninik peqaruni tamanna
angusinnaanngussavaa. Malugalugu aningaasaat atorfissaqartinneqartut 50.000
koruunit aningaaserivimmit imaluunniit realkredit-ikkoorlugit
attartortissinnaagunigit. Tassaniipporlu peqqussutissatut siunnersuutip
sanngeequtaatut taarusutarput, tassami ilisimaneqartutut aningaaseriviit
realkredit-illu nunatsinni illoqarfinni aalajangersimasuinnarni siullertut
aningaaseriviit immikkoortortaqarfiini ullumikkumut innutaasunik
periarfissaqartitsipput.
Aaqqissuussinikkullu
nutaassatut innuttaasut sumi najugaqarnertik najoqqutaralugu
immikkoortinneqarnissaat pinngitsoortinniarlugu periarfissat arlaqartut
anguniarneqartariaqartutut Inuit Ataqatigiinniit tikkuarusuppaat. Soorunami
siullermik nunatsinni aningaaserivituaq Naalakkersuisunit
kaammattorneqarsinnaavoq sumi nunaqarneq apeqqutaatinnagu akiliisinnaanerli
kisiat najoqqutaralugu innuttaasunut periarfisseeqqullugu. Tamannali
inussiarnersumik ilassineqassanngippat periarfissatsialarujussinnaavoq. Norgimi
Husbank-itut aaqqissuussisinnaaneq bankimi pineqartumi assersuutigalugu 400.000
koruuninik taarsigassarsiguit ullumikkorpiaq 4,2 procentimik taamaallaat
erniaqartitsivoq. Piffissarlu taarsersuiffissaq ukiunut 25-nut
sivisussusilerneqarsimalluni. Imaappoq: Ukiuni 25-ni attartukkannut
taarsersuutissatit qaammatikkaartumik aalajangersimasuullutik 2.168
koruuniupput. Periutsip taassuma Norgemi ingerlannera isumaqarpugut
paasiniarneqartariaqartoq. Taannaluunniit suleqatigalugu maani pilersitsinissaq
siunertaralugu.
Tassungalu
sanilliutissaqqippoq ullumikkut GrønlandsBank-imut aqqutigalugu periarfissaq,
illuliornissamut taarsigassarsisinnaavutit taamaallaat ukiuni qulini
sivisussusilimmik taarsersugassannik, erniaritinneqartorlu 10,5 procentiuvoq.
Imaappoq, 400.000 koruuninik attartoruit ukiuni qulini qaammamut akiligassatit
aalajangersimasut 5.409 koruuniupput. Norgemili Husbankip periarfissiineratut
aningaasat taakku 400.000 koruunit ukiuni qulini taarsersugassanngorlugit
atorusukkukkit ukiuni qulini qaammammut taarsersugassatit aalajangersimasut
4.100 koruuniupput. Ukiullu qulit qaangiunnerini taarsersukkatit
naammassigukkit Husbankip aaqqissuussinera malillugu 157.136 koruuninik ilinnut
akikinneruvoq. Tamakku eqqaalaareerlugit Inuit Ataqatigiit iluaraarput,
aaqqissuussinertut siunnersuutigineqartoq akisoorsuarnik illussaarsualiornernut
atorneqartussaajunnaarlugu kiisami sanaartukkat km2-imut akissaattut
aalajangersimasoq pisortanit akuerineqarsinnaasoq annerpaaffilerneqarsimammat
13.500 koriininut, naak ilisimagaluarlugu illuatungaani nunaqarfiit
isorliunerusunilu illoqarfiit nammineerluni illuliornikkut
periarfissarissaarnerugaluartut taamaattoq Inuit Ataqatigiinniinngaannit
pingaartipparput innuttaasut assigiimmik periarfissinneqarnissaata siunnerfiujuarnissaa.
Taamaattumik siusinnerusukkut Aningaasaqarnermut Ataatsimiititaliakkoorlugu
oqaatigereernikuusarput nammineerluni illuliorsinnaanermut illoqarfinni
anginerni najugaqartut periarfissinneqarsinnaanerat suliap matuma
ingerlaqqinnerani ilanngunneqassasoq kaammattuutigerusupparput. Tamatumali
piviusunngortinneqarsinnaanera periarfissiissutigineqarsinnaanera
piviusunngortinneqassappat tamanna nunaqarfinni isorliunerusunilu ullumikkut
nammineerluni illuliaasartutut akuerisaasut ukioq manna 76-iusut soorunami amerlineqartariaqassapput.
Periarfissap
matuma ukiuni arlaqartuni anguniarsimasatta saqqummiunneqarnera manna
iluatsillugu innuttaasut pingaartumik inuusuttortagut kaammattorusuppagut
sapinngisannguartik tamaat illutaarnissamut initaarnissamullu
toqqorterisinnaaneq atorluarniaqqullugu. TV-ikkummi takoqqusaarut malillugu
ileqqaarneq akilersinnaavoq.!
Taamatut
oqaaseqarluta peqqussutissatut siunnersuut aappassaaneerneqannginnermini Ineqarnermut
Ataatsimiititaliakkoortinneqaqqaarnissaa inassutiginiarparput.
Anthon
Frederiksen, Kattusseqatigiit:
Illuliortiternermut
aningaasalersuineq pillugu Inatsisartut peqqussutissaattut siunnersuut
Kattusseqatigiit sinnerlugit soqutigalugu misissorsimavara. Siusinnerusukkut
ilaatigut boligstøtte pillugu nassuiaatip allallu ineqarnermut tunngasut
oqallittarnerit Kattusseqatigiit sinnerlugit oqaaseqaatigisarsimasakka
innersuussutigalugit aammalu Inatsisartut oqallittarnerpassui tunngavigalugit
nuannaarutigaara Naalakkersuisut illuliortiternernut aningaasalersuineq pillugu
peqqussutissatut siunnersuut nammineerlutik illutaarniartunut
initaarniartunullu ajunngitsunik periarfissiisoq saqqummiummassuk.
Ataatsimut
isigalugu siunnersuut tamakkiisumik taperserpara. Tassami ilaatigut banki
aqqutigalugu nammineerlutik illuliorsimasumut nalunngilarput erniarnik
akilersuineq aammalu atukkanik akilersuiniarneq qanoq
angummanniapiloornartartigisoq. Aamma nalunngilara boligstøtte aqqutigalugu
illutaarsimasut ullumikkut akilersuiniarnerminni qanoq ajornartorsiortigisut,
taamaattumik siunnersunnerusukkut tamakku pillugit inimi maani
saqqummiuttarsimasakka uterfigeqqinngikkaluarlugit nuannaarutigaara peqqussutip
akuerineqarneratigut siunissami namminerisaminnik illutaarniartut
initaarniartulluunniit pitsaanerusunik periarfissinneqartussaammata.
Kisianni
taarsigassarsiaritinneqartussat erniarlersorneqarnissaannut tunngatillugu
siunnersuut tassa Nationalbank-ip ernialiuttagai 3 procentinik ilallugit
ernialersorneqartarnissaannut siunnersuut assut eqqarsarnartoqartippara.
Tassami tamatta nalunngereerparput erniat annertussusaat akilersuiniarnermi
kinguaattoorsinnaanermut annertuumik siunniuteqartartut soorlu tamanna siorna
ukiakkut boligstøtte pillugu nassuiaat saqqummiunneqarmat takusinnaasimagipput.
Tassami assersuutigalugu boligstøtte-imut atukkat erniaat 4 procentimiit 6
procentimut qaffanneqarmata akiligassanut kinguaattoorutit malunnaatilimmik
qaffariarsimasut takusinnaagatsigu, taamaattumik neriuppunga Ineqarnermut
Ataatsimiititaliap tamakku tamaasa tappiffigalugit suliap
aappassaaneerneqannginnerani suliarilluarumaaraa.
Tamatuma
eqqartorneqartut soorunami siunissami inissaaleqinerup anigorniarneqarneranut
tunngassuteqarput. Kisianni aamma puigortariaqanngilaq akilersuisinnaassuseq
akiliisinnaassuserlu eqqaamasariaqarmata, taamaattumik assersuutigalugu
ullumikkut boligstøtte aqqutigalugu illutaarsimasut akilersuiniarnerminnilu ilaatigut annertuumik ajornartorsiuteqartut
soorlu sillimmasiisarnernut tunngasut illut pisoqqat tassa boligstøtte-p
illuutai, allanik pisiarineqarnerini nutaatorluinnangajak akilersillugit
sananeqartarneri, massa ilaatigut najugaqartut siulliit illup pineqartup
nalinga tamangajaat akilereersimagaluaraa. Pissutsit tamakku isumaqarpunga
iluarsineqarluinnartariaqartut. Taamaammat illunik pisoqqanik
nalilersuisarnerup ilanngullugu eqqumaffigineqarnissaa eqqaasissutigerusuppara.
Aamma
minnerunngitsumik boligstøtte aqqutigalugu illutaartartut ilaatigut
tupinnaannartumik mittatigineqartarput. Soorlu illu nutaaq ilaatigut ukioq
ataaseq soqqajanngitsorluunniit ineqarnikkut ruujoritigut kuuffitsigut
allatigulluunniit ajutoortillugu najugaqartut iluarsaassinissamut
boligstøtte-imut atorniarteqqinneqartarput, uffa massa kukkussutit
nammineerlutik pisuussutiginngikkaluaraat. Taamaaliornikkummi illutaartut
akiligassaat ilaatigut 100.000 koruunikkaanik
arlariinnik akiligassaat ilaneqartarmata. Taamaattumik pisutsit
ilaatigut taama ajortigisut aamma akilersuiniarnermi ajornartorsiortitseqataalersartut
atuuttuaannalinnginnissaat eqqumaffiginiartariaqarput. Matumanilu
periarfissiinermi nutaami aamma taamatut pisoqaqqinnginnissaa
qulakkeerneqartariaqarluni.
Kiisalu
peqqussutissamut siunnersuummi '
1, immikkoortoq 2, - naapertorlugu ilaqutariit ataasiakkaat illuutimik
iluarsartuunnissaannut taarsigassarsisinnaatitaalernissaat
periarfissinneqarnera ilanngullugu maluginiartariaqarpoq, tassami
minnerunngitsumik nunaqarfinni nammineerlutik illuliaasartorpassuit ukiunilu
makkuni ilaatigut aserfallakkiartoqisut taamaalillutik aamma
iluarsaanneqarnissaannik periarfissiisoqarnera qujaruttariaqarpoq.
Taamaatut
naakkaluartumik oqaaseqarlunga suliap aappassaaneerneqannginnermini
Ineqarnermut Ataatsimiititaliami oqaluuserilluarneqarnissaa inassutigaara,
eqqaamallugulu '-it
ilaanni naqinnerlutat aamma iluarsineqartariaqarmata.
Daniel
Skifte, Ineqarnermut Aningaasaqarnermullu Naalakkersuisoq:
Siullermik
partiit ataatsimut oqaasii Kattusseqatigiillu qujassutigaakka. Isumaqarpunga
siunnersuut naatsuararsuarmik oqaaseqarfigissagukku isumaqrpunga partiit
tamarmik siunnersuut tunngaviusumik tapersersorpaat. Aammalu Ineqarnermut
Ataatsimiititaliamut ingerlateqqinneqarnissaa aamma tunngaviatigut
taperserlugu. Tamanna qujassutigaara.
Siumup
oqaaseqartuata ilaatigut oqaatigaa akit killeqartitaannginnerat
nalilersorluarneqaqqissaartariaqartoq, ilumoorpoq, taanna
misissorluarneqartariaqartoq. Aamma partiinit allanit taaneqarmat taanna
ingerlateqqinneqassaaq. Taanna nalunaarusiaq qularinngilara Ineqarnermut
Ataatsimiititaliami eqqartorneqarluarumaartoq.
Siumuminngaanniit
assigiinngitsut qaffatsinneqartut (oqaatigineqartut?) annertunerusumik
maannakkut oqaaseqarfigissanngilakka, kisianni erseqqippoq tunngaviatigut
tapersiisoq, taavaalu Ineqarnermut Ataatsimiititaliap misissorluarumaarai.
(Apeqqutit ilanngullugit eqqartulinnginneranni)
Atassumminngaaniiit
oqaaseqartoq aamma qujassuteqarfigaara naak Atassutip oqaaseqartua ilaatigut imannak
kissartigisumik oqariartuuteqanngikkaluartoq, kisianni paasivara tunngaviatigut
Atassutip taanna taperseraa, tassami ilaatigut Atassumminngaanniit
namminerisamik illuliortussat amerlivallaarnissaat ilimagineqanngitsoq. Soorlu
saqqummiussami eqqaaneqartoq, namminerisamik kikkunnulluunniit mattussiumata
suliffeqarfiit namminersortut allallu tamaasa taamatut neqeroorfigaavut,
minnerunngitsumik ingerlatseqatigiiffiit Namminersornerullutik Oqartussat
pigisaat. Tassami una qitiuvoq siunnersuummi inissaqarniarneq ataatsimut
isigalugu pitsanngoriaatit tunngaveqartumik taanna saqqummiunneqarmat
aningaasat inissaqarniarnermut atukkat Naalakkersuisut siunnersuutiginngilaat
ikilissasut, kisianni atukkat amerlassusaat aallaavigalugit namminersortunit
imaluunniit suliffeqarfinniit imaluunniit Namminersornerullutik Oqartussat
pigisaannit suliffissuaqarfinnit inissialiorneq annertunerusumik pilerpat taava
aningaasat naliginnaasumik inissialiornermut atugassat
atornerulersinnaassavavut, ikilisaanata amerlisaallutali.
Atassutip
ujartugaa aamma ilaatigut Siumumit taaneqartoq Ineqarnermut Ataatsimititaliap
qularnaatsumik naatsorsueqqissaarluni apeqqutit assigiinngitsut suliarissagai,
taanna neriorsuutigissavara, taamatut naatsorsueqqissaarnissaq qanoq taanna
isumaqarpiarnersoq qanoq pineqarumaarnersoq taamaaliornissaq, taanna uanga
Naalakkersuisoqarfinninngaanniit Ineqarnermut Ataatsimiititaliarmut
nassiutissavara.
Inuit
Ataqatigiit aamma qujassuteqarfigissavakka. Tassami isumaqarpunga
qularnaatsumik taanna siunnersuut naaperiaanertut isumaqarfigimmassuk,
taamaalluinnarpoq. Nuannaarutigaara ilumut taamatut naaperiaanerput
Naalakkersuisuninngaanniit paasilluarneqarmat.
Ajornartorsiutit
assigiinngitsut soorlu qaffatsinneqartut(oqaatigineqartut?) ilaatigut
nutaartallit taakkua misissorneqarnissaat aamma isumaqarpunga
mattunneqassanngitsoq. Uani assersuutitut taaneqarput Norgemi Husbank-imi
aaqqissuussisimaneq isumaqarpoq taanna aamma Naalakkersuisoqarfitsinniit
qularnaatsumik paasiniarneqartariaqartoq. Taamatut aaqqissuussisimaneq qanoq
ittuunersoq isumaqarpunga taanna isummiut pitsaasuusoq, maannangaaq
oqaatigineqassanngilaq oqaatigisinnaanngilarpullu taamatoqqissaaq issimanersoq.
Kingunissaalu eqqarsaatigalugu isumaqarpunga taamatut kaammattuut naammassiniartariaqartoq.
Kattusseqatigiit
eqqarsaatigalugit aamma tunngaviatigut taamatut isumaqataammata allaat
oqarlutik siunnersuut tamakkiisumik taperserparput, tamanna
qujassutigaarattaaq.
Aamma
isumaqarpunga misissorneqartut ilagisariaqaraat illunik pisoqqanik
naliliisarnerup eqqumaffigineqarnissaa ilanngullugu misissorneqallaruneqarmat,
isumaqarpunga apeqqut taanna ilumut taamaassanersoq imaluunniit aamma nutaat
nutaanngorsaareerluni naliliineq, sorliussanersoq oqaatigisinnaanngilara,
kisianni isumaqarpunga apeqqut taanna qitiatigut misissorneqartariaqartoq.
Taamaattumik tamanna nuannaarutigara qaffatsinneqarmat(oqaatigineqarmat).
Pissutsit
allat eqqartugai, taakkua soorunami Ineqarnermut Ataatsimiititaliami
misissorneqassammata annertunerusumik oqaaseqarfigissanngilakka.
Naatsumik
oqaatigalugu nuannaarutigaara siunnersuut tunngavisumik partiinit tamanit
tapersersorneqarmat. Aammalu Ineqarnermut Ataatsimiititaliap allaat maannangaaq
sulilluarnissaannik kissaateqarfigalugu.
Josef
Tuusi Motzfeldt, Inuit Ataqatigiit:
Partiit
allat oqaaseqartuinut oqaatigerusutavut
marlussuit oqaatigissavakka, siullermik Atassutip oqaluttuanut
annilaarutigerpasillugu oqaatigaa aaqqissuussinissatut siunnersuut
naapertorlugu siunissami aaqqissuussinissamut siunnersuut najoqqutaralugu
illutaartussat illutaassatik tamakkerlugit nammineq akilertassagaat. Aamma
isumaqarpunga Inuit Ataqatigiinninngaannit isumaqarpugut eqqarsaatigigaanni
illutaarniarnermi aaqqissuussinissatut siunnersuut najoqqutaralugu
aningaasartuutissat 40 procentiisa tassa 1 mio. koruunilimmik illutaarniaraanni
400.000 koruunilimmik ukiuni 15-ini erniaqartinnagit akilersugassaatinnagit
ajunngitsorsiatit tunniunneqarnerat allamut ullumikkumut aaqqissuussinertut
atuutereersunut sanilliussinermut taanna soorumani
arajutsinaveersaartariaqarpoq, aamma nammineq illorisaq nammineq
akilersinnaanera taamatut ikiorserneqarnikkut anguniagaasinnaavoq ajunngitsoq.
Kiisalu
Siumup oqaaseqartuanut oqaatigissavarput ilaatigut oqaatigimmagu ullumikkut
nammineq inissianik attartornermi killeqanngitsumik suli ingerlatsisoqartillugu
eqqumiigigaat Siumup namminersortunut inissiaateqarnermi tapiisoqartassappat,
taanna isuamaqarpugut siuliani oqaluuserisami tassa immikkoortup 17-iannut
Siumup taanna eqqumaffigisimasinnaagaluaraa, tassanimi ineqartut
illersorneqarnerata sakkukilliallatsinniarneqanerat ilaatigut Inuit
Ataqatigiinnit uparuareerparput. Kiisalu Siumup oqaluttuata aamma oqaatigaa
namminersortut attartortittaasa amerliartuinnarnerisigut akit
killeqartitaannginnerat nalilerneqaqqittariaqassagunarpoq.
Upernaaq
apeqqut taannarpiaq oqaluuseraarput, taamanikkullu Inuit Ataqatigiit taamatut
killiliineqanngitsumik kikkulluunniit qanoq akilersuisinnaanerannut ammaassineq
soorunami akerlilersimavarput, kisiannili Siumup partiiata taamanikkut tamanna
taperserpaa. Taamaattumik isumaqarpunga ukua oqaluuserisat nammineq illunik
inissianilluunniit attartortut pisinnaatitaaffiisa illersorneqarnerisa
pisinnaatitaaffimmikkut illersorneqarnerat sakkortusineqarnissaat oqaluuserisami
siulianiittoq ataatsimut soorunami Inatsisartut Ineqarnermut
Ataatsimiititaliani nalilersorneqartariaqartut, aammalu paatsuugasoqaqqunagu
isumaqarpunga Ataatsimiititap sulinissaminik upernaaq aalajanersorneqartut
ilanngullugit uterfigalugit nalileqqittariaqassagai.
Kiisalu
Naalakkersuisunit ilaasortap akissutaanut oqaatigissavarput, Norgemi
aaqqissuussisimaneq tassa Inatsisartut ingerlataraat ullumikkullu Husbank-imik
taaneqartoq 1 million-it sinnerlugit Norgemi illulioreerpoq, tassa imaappoq
1997-imi assersuutigalugu Norgemi inissiatut illuliatullu sananeqartut 53
procentii Husbank-ikkut aningaasalersorneqarsimapput. Ukiuni 50-ini
atuussimavoq, siunertariaqartorlu tassaavoq: Innutaasut naammaginartumik
piffissallu ingerlanerani avatangiisinut piumasarisaasumillu naleqquttunik
illoqartinnissaat. Isumaqarpunga taanna soqutiginartoq Naalakkersuisoqarfik
aqqutigalugu misissorumallugu oqaatigimmagu taanna tusarluaatigisariaqaripput.
Finn
Karlsen, Atassut:
Taamaalilluni ullormut
oqaluuserisassaq immikkoortoq 20, siullermeerneqarnerani maani
oqaluuserineqarnera naammassivoq, aappassaaneerneqartinnanilu
Ataatsimiititaliami suliarineqarnissaa inassutigineqarluni.
oqaluuserisaq
naammassivoq.