Oqaluuserisassani immikkoortoq 32-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 29.september 1998 nal. 14.06
Ataatsimiinnermik aqutsisoq: Inatsisartut Siulittaasuat Anders Andreassen.
Marianne Jensen, Peqqinnissamut, Ilisimatusarnemut, Avatangiisinut Pinngortitalerinermullu Naalakkersuisoq:
Inatsisissatut siunnersuutigineqartukkut siunertarineqarpoq Kalaallit Nunaanni qimmit qitsuillu peqqissuunissaasa qularnaarneqarnissaat. Kalaallit qimmiat qimuttoq allanik akuneqatsaaliussallugu kiisalu inuit, uumasut avatagiisillu qimmit qitsuillu ajoqusiisinnaanerinut illersussallugit.
Inatsisip ilaatigut qimmeqarneq, kiisalu qitsuit nunatsinnut eqquteqqusaannginnerat pillugu aalajangersakkat atuutut taarsissavai, qitsuit pillugit aalajangersagaq, uumasut uumatillugit anninneqarnissaat eqqunneqarnissaallu, kiisalu uumasunit tunisassit pillugit inatsisip nr.833 18.december 1991-imeersup atulersinneqarneratigut atorunnaarsinneqassaaq.
Uumasut isumannaatsumik pineqarnissaat qularnaarniarlugu inatsit qimminik qitsunnillu paarsineq pillugu aalajangersakkanik imaqarpoq. Qimminut qimuttunut tunngatillugu imaanngilaq ukiorpassuarni ileqquliunneqarsimasut iperarneqassasut. Kalaallit qimmii qimuttut issittumi artornaqisunik atugaqarlutik uumaannarsinnaajumallutik silaannarmiittariaqartarput, tamanna ajoqutitaqaraluarpalluunniit. Tamatumali peqatigisaanik qimmiliviit piumasaqaatinik arlalinnik naammassinnittariaqarput. Kiisalu qimusserfiunnginnarani naammattunik nerisaqartariaqarput imissaqartariaqarlutillu.
Eqqortumik qimmiuteqassagaanni aamma qimmit ingasappallaanngitsumik pineqartassapput, pisariaqanngitsumillu pillarneqartassanatik. Uumasut toqunneqassagunik naammaginartumik toqunneqartariaqarput.
Uumasut illersorneqarnissaat pillugu malittarisassat nunatsinni pisariaqarput, siullermik uumasut eqqarsaatigalugit.
Takornariarpassuit nunatsinnukartarput ilaatigut kalaallit qimmii qimuttut misigisaqarfiginiarlugit. Taamaammat taamaattunik malittarisassaqartoqartariaqarpoq, takornariammi ilarpassui qimminik sulisorineqartunik takusimanngisaannarmata.
Uumasuuteqarneq eqqortumik pisaqqullugu kiisalu uumasut, inuit allallu uumasunik ajoquserneqarnissaannik illersorniarlugit, inatsisissatut siunnersuut, qimmit qitsuillu pillugit ileqqoreqqusaliornissamut tunngavissanik imaqarpoq.
Kalaallit qimmiat qimuttoq pillugu inatsimmi immikkut aalajangersakkatigut, kalaallit qimmia qimuttoq qimminiit allaniit kissaatigineqanngitsumit akuneqatsaaliorneqassaaq. Kangerlussuup piniarfiusarnera takornariarfiusarneralu eqqarsaatigalugu, qimminik qimuttoqarfittut ilanngunneqarpoq.
Kiisalu siunnersuut nassuiaatitaalu innersuussutigissavakka, matumuunalu inatsisissatut siunnersuut Naalakkersuisut Inatsisartunut oqallisigisassanngortippaat. Naalakkersuisullu neriuutigaat Naalakkersuisut siunnersuutaat Inatsisartut tigulluassagaat.
Niels Mátâk´, Siumup oqaaseqartua:
Qimmeqarneq qitsuuteqarnerlu pillugit inatsisartut inatsisissaattut siunnersuut.
Aallaqqaammut Siumumiit oqaaseqarfigissavarput kalaallit qimmiat qimuttoq illersorneqartuarluni qaqungorsuarmut atorneqartuassasoq, avataanniit qimminit allanik akuneqanngitsoq.
Qangarsuarli kalaallit kulturitoqarsuatta ilagilluinnagaa, tassa kalaallit issittorsuarmi inuussutissaminnik piniartuarnerminni pinngitsoorsinnaanngissaat kalaallip qimmia qimuttoq - taassumalu illersortuarnissaa paarilluarnissaalu. Taamaattumik Siumumiit oqaatigissavarput qimmeqarfinni qimmit qimuttut nappaatinut qimminut ajoqutaasaqisumik kapoorisarnerit iluaqutaassusia malugineqarsimasoq malilluarneqartariaqartoq. Taamaalilluni qimmillip qimmiminik annaasaqannginnissaa anguneqarsinnaammat.
Siumumiit Inatsisartut inatsisissaattut siunnersuut isumaqatigaarput uumasut pineqartut isumannaatsumik pineqarnissaat qularnaarniarneqarmat.
Siumumiilli isumaqarpugut uumasut taakku assigiinngeqisut, tassa qimmit qitsuillu, ataatsimut inatsisiliuunneqarniarmata pinngitsoorneqarsinnaanngitsoq qimmit nappaataannut akiuussutissamik aamma qitsuit kapoorneqartarnissaat.
Qimminut qimuttunut kapoorisarneq iluaqutaasoq ilisimaneqarpoq, taamaammallu qimmilinnut tamanut inatsisip malinneqartarnissaa pisariaqarluni, qimmeqarfinni tamani qimmilerisoqartarpoq, taakkuli illoqarfinni qimmeqarfiusuni suliaqartarput pingaaruteqaqisumik, tassalu inatsisit malillugit suliaasa ilagisarpaat qimminik pitussimanngitsunik toqoraasarneq, taamatullu atorfeqartitaasut sivikitsuinnarmik suliartik ingerlattarpaat piginnittuniit nuanninngitsumik pineqartarnertik ilaatigut pillugu.
Siumumili isumaqarpugut qimmeqarnermut inatsit kommunimi malinneqartarnissaanik eqqortumik iliornissamik tunngaviussasoq qimmilerinermik qimminillu toqoraasutut atorfeqartitat pikkorissartinneqartarnissaat pingaaruteqartoq anguneqartariaqartoq.
Tamatumani kommunit suleqatigalugit qimmilerisut pikkorissarnikkut ilaatigullu suleqatigiilluarnikkut naammassineqarnissaa Siumumiit kissaatigaarput piviusunngortittariaqartoq.
Inatsisartut inatsisissaattut siunnersuut Siumumiit taamatut oqaaseqarfigalugu siullermeerneqarnera isumaqatigaarput, aappassaaneerneqannginnerminilu Ataatsimiititalilamut susassaqartumut suliassanngortinneqassasoq inassutigalugu.
Otto Storch, Atassutip oqaaseqartua:
Inatsisissatut siunnersuutip qimmit qitsuillu
ajoqusernernut assigiinngitsunut ajortumillu pineqarsinnaaneranut
illersussallugit. Tamanna tunngavingalugu inatsisissatut siunnersuummi
piumasarineqartut tunngaviatigut Atassummiit taperserpavut.
Inatsisissattuli siunnersuummi
piumasarineqarpoq, qimmit qitsuillu panertumik nallavissaqartinneqassasut,
taamatut piumasaqarneq tunngavigalugu qimmit qimuttut eqqarsaatigalugit,
Kommuninut qimuttunik qimmeqarfiusuni, illoqarfimmik pilersaarusiornermi
qimmilivissanik pitsaasunik immikkoortitsisoqartarnissaa ilanngullugu
piumasarisariaqarpoq. Takornartaanngilarmi qimmit qimuttutut
atorneqarunnaarnerini, tassa aputip aattornerata nalaani siallertillugulu
qimmit pituttat pitsaanngivissumik nallavissaqartinneqartut.
Aammattaaq inatsisissatut
siunnersuummi piumasarineqarpoq, qimmit uumatillugit piniariartarfinnut,
sukkanniuuffinnut qimussimillu angallavigisanut qimaannarneqannginnissaat.
Tamanna tunngavigalugu Atassummiit isumaqarpugut, sukkanniuuttarneq
eqqarsaatigalugu piumasarineqartoq sakkukillisinneqartariaqartoq makku
pissutigalugit; -maannakkut nunatsinni sukkanniuuttoqartarpoq ulloq
ataasiinnaaq atorlugu, tamannalu pisarpoq
upernaami silap qaamanertusinerata nalaani. Sukkanniuunnermi
pinngitsoorneqarsinnaasanngilaq qimminik ataasiakkaanik sukkanniuuffimmut
qimataqartarneq, taamaammat qimussimik sukkanniunnermi peqataasut ataasiakkaat
sukkanniuunnermut peqataanertik pissutigiinnarlugu, inatsisinik
unioqqutitsisunngortissanngikkutsigit piumasarineqartoq sakkukillisinneqartariaqarpoq.
Tassami qimussimik sukkanniuttut aallarnavianngillat tamarmik aallaaserlutik,
isumaqarpungattaaq sukkanniunnermik aaqqissuisut tamanna
piumasarinavianngikkaat. Tassami inatsisissaq malillugu qimmeq qimanneqarnissaa
inerteqqutaasussaavoq, isumannaatsumillu sukkanniuttup qimmeq qimatassani
toqussaguniuk aallaallugu toquttariaqassavaa. Aamma imaassinnaavoq
qimanneqartussaq naalliuinnarnissaa pinaveersaartinniarlugu
qimaannarneqarallartariaqartoq, qimmimmi ilai tamaviaartillutik
qimuttoqamminnut anngussinaajunnaartarput, taamaakkaluartorli allatigut
qimuttoralugit pitsaasuusinnaasarlutik.
Taamaattumik inatsisissami
piumasarineqaannartariaqarpoq, sukkanniuteqataasoq imaluunniit peqatigiiffik
sukkanniunnermik aaqqissuisoq, sukkanniunneq naammassippat piaartumik qimmip
qimanneqarsimasup angerlaanneqarnissaa isumagissagaat.
Taamatut oqaaseqarluta
aappassaaneerneqannginnermini Ataatsimiititaliami Susassaqartumi
oqaluuserineqarnissaa innersuussutigaarput.
Evald Brĝnlund, Inuit Ataqatigiit oqaaseqartuat:
Siullermik Inuit Ataqatigiinniit
oqaatigissavarput, nunatsinni qimmeqarneq qitsuuteqarnerlu pillugit
inatsisissami siunnersuut misissuataareerlugu sukumiisumik nunatsinnullu
naleqqussagaalluartumik suliarineqarsimasutut nalileratsigu.
Siunissami taamatut nunatsinni
inatsiseqalernissarput sanioqqunneqarsinnaajunnaarpoq, taamaalilluni inatsisip
uumap atulersinneratigut 1950-ikkut naalerneranni Landsrċdip ileqqoreqqusaliaa
taarserneqartussanngorluni.
Inatsisissami uani
siunertarineqartut paatsuugassaanngilluinnarput, tassa Nunatsinni qimminik
qimuttunik qitsunnillu peqqissunik siunissami peqalernissarput tunngavissiuunneqalermat,
kiisalu qimmit qitsuillu inunnik eqqortumik pineqarnissaat qularnaarniarneqarmat.
Nunarput inoqaleqqaarmalli qimmeq
qimuttoq inummut qaninnerpaajulluni uumasuusimavoq
pinngitsoorneqarsinnaanngitsoq, piniarnermut allanullu atorneqarnissaminut
nunami maani naleqquttumik sananeqaateqarsimanini pissutigalugu.
Qimmit qimuttut ingammik
piniartoqarfinni pinngitsoorneqarsinnaanngitsutut oqaatigineqartarput, aamma
tamanna iluamik uppernarsineqaqqippoq atortorissaarutit allat nunanit
allaneersut takkukkaluarmata sanioqqunneqarsinnaannginnini takutittuarmagu.
Ingammik piniartoqarfinni silarlutsillugu silassorissutsini atorluartaramiuk.
Ullutsinni piniarnerinnarmut
atorneqarunnaarluni aammattaaq inuutissarsiutit allat takkunnerisigut
tamatumani takornariarneq eqqarsaatigalugu peqataallualereersimavoq, Nunattalu
avammut nittarsaannerani peqataaginnarani inuutissarsiornermut iluaqutaalluinnalersimanera
tamanut takussutissaavoq kusanartoq.
Taamaattumik naatsumik oqaatigalugu
oqaatigisariaqarpoq qimmit inuiaqatigiillu pitsaasumik inooqatigiissappata
qimmit pitsaasumik inunnik pineqartariaqartut.
Inuit Ataqatigiit isumaqarpugut
kalaallit qimmiat qimuttoq qimminit allanit akutsaaliorneqartariaqartoq
akuneqartariaqanngitsorlu, taamaaliortoqassagaluarpammi qimmit sananeqaataat
maani nunatsinni naleqqulluartoq allanngortinneqarsinnaanera aarleqqutigineqarsinnaammat.
Tamannalu kialluunniit nunatta qimmianik illersuisup orniginartissinnaanngilluinnarpaa.
Taamaattumik inatsisissami § 19-imi,
immikkoortoq 3-mi oqaaseqatigiit kingulliit imatut allaqqasut: Taamatuttaaq
qimmit taamaattut kinguaassiorsinnaajunnaarnissaat pillugu piumasaqaateqarsinnaallutik.
Taanna naggaterpiaa
piumasaqaateqassallutikiik allanngortinneqarnissaa siunnersuutigaarput.
Taamaalilluni kalaallit qimmii suli sakkortunerusumik qimminik allanik
akutsaaliorneqarsinnaammata.
Uani inatsisissami §9-mi,imm. 4-imi
taaneqarpoq Kommunit qimmit pillugit ileqqoreqqusaat
atuutiinnartinniarneqarput, inatsisissap uumap atuutilerneraniit ukiut
pingasut qaangiunneranni. Tassalu aatsaat kingusinnerpaamik 31.december ukioq
2001-imi. Uagut Inuit Ataqatigiinniit isumaqarpugut ukiumik ataatsimik
sivikillisariaqrtoq tassalu 31.december ukioq 2000-ip tungaanut.
Taamaalilluni aamma Kommunit qimmit
pillugit ileqqoreqqusaliaat piaarnerpaamik Kommunimi
atortuulersinneqarsinnaaniassammata.
Soorlu aallaqqaammut
oqaatigereeripput inatsisissaq una sukumiisumik suliarineqarsimavoq,
taamaattumik annertunerusumik oqaaseqarfiginagu 01.januar 1999-imi Folketingimi
suli akuersissutigineqarsimanngippat, aatsaallu 01.januarip kingornatigut
Folketingimi akuersissutigineqassappat Folketingip ullormi akuersissuteqarfiani
atuutilernissaa isumaqataanerput matumuuna nalunaarutigaarput.
Anthon Frederiksen, Kattusseqatigiit:
Kattusseqatigiit sinnerlugit
qimmeqarneq qitsuuteqarnerlu pillugit Inatsisartut inatsisissaattut
siunnersuut soqutigalugu misissorsimavara.
Siullermillu oqaatigissallugu;
ilumut pisariaqarmat minnerunngitsumik qimmeqarneq pillugu
inatsiseqartitsinissaq, tassami pingaartumik avannaani qimmeqarfinni qimmeqarneq
pillugu ileqqoreqqusat Landsrċdeqarallarneratali nalaani atuuttut, ullumikkumut
naleqqukkunnaarsimammata.
Kangerlussuaq siunissami
qimmeqarfittut isigivinneqalissanersoq, soorunami maanna oqaatigiuminaappoq.
Kisianni inatsisissami ' 3 naapertorlugu taamatut isigineqalertussaavoq.
Taamaattumik Inatsisartut
inatsiseqarnermut Ataatsimiititaliaani inassutigerusuppara, ilumut
Kangerlussuaq qimuttunik qimmeqarfinnut ilanngutinneqassanersoq imaluunniit
immikkut akuersinikkut qimussimik tikinneqarsinnaasarnissaa
naammannginnginnersoq nalilersoqqullugu.
Inatsisartuni
inatsisiliarineqartartut inatsisinut allanut akerliusunik piginnaatitaaffiliisannginnissaat, imaluunniit inatsisinut atuuttunut
assortuutinnginnissaat Kattusseqatigiinniit ilisimavarput, taamaattumik ' 6
imm. 1-imi oqaaseqatigiit imaattut
Aeqqartuussivimmilu piginnaatitsissuteqaratik qaqugukkulluunniit
pisortat namminersortullu illuutaannik, iniutaannik, angallataannik
allagaataannillu takusaasinnaapput@, tassani pineqarput nakkutilliisussat
imaluunniit immaqa qimminik toqoraasartut, tassami pissutsit taamaattut
inatsimmut tunngaviusumut naapertuutinngillat allanngortinneqarnissaallu
Kattusseqatigiit tungaaninngaanniit innersuussutigerusuppara.
Inatsisip suungaluartulluunniit
pissutsit piviusut naapertorlugit naammassiniarneqartarnissaat,
minnerunngitsumik malitsinneqarsinnaanerat eqqarsaatigalugu suliarineqartariaqarnerat
Kattusseqatigiinniit aamma eqqaasissutigeqqissavara, soorlu ilaatigut assersuutigalugu
' 16 imm.1-imi aamma '24 imm.2-anni 3-annilu piumasaqaataasut ingasattajaarutaavallaarnerat
eqqarsaatigalugu, tassami pissutsinut piviusunut taakku naapertuutinngimmata,
tassalu qimussimik sukkanniuffinnut qimmit qimaannarneqartarnissaat
inerteqqutaalertussaavoq, aammalu politiit kommunefogedilluunniit Avatagiisinut
Pinngortitamullu Pisortaqarfiup, Uumasunut Nappaataannut
immikkoortortaqarfinnut piaarnerpaamik nalunaaruteqartartussaanerat
apeqqusertariaqarmat. Tassami Avatagiisinut Pinngortitamullu Pisortaqarfiup
Uumasut Nappaataannut imaluunniit, taassumap taniarnerinnaa ajornakusooreerpoq,
tassami assersuutigalgu qanoq ajornakusoortigissava Savissivimmi
kommunefogeditut atorfeqarluni Pisortaqarfimmut tassunga nalunaarniassagaanni,
aammalu Pisortaqarfiup immikkoortortaqarfiata kommunefogedi immaqa ilaatigut
telefoneqanngitsoq qanoq ilillugu attaveqarfiginiassagamiuk! Taamaattumik pissutsit taamaattut
naleqqussartariaqarput pissutsinut piviusunut naapertuuttunngorlugit.
Aamma uagut qimussimik
sukkanniuuttunik takusartugut nalunngilluinnarparput ' 16 imm. 1-i
sukkanniuunnerit tamaasa unioqqutinneqartuartussanngortussaassasoq, tassalu
kinaluunniit sukkanniunnermut ilaasoq qimmimilu ilaasa pituutaanik
kipisisimasoq unioqqutitsisutut akiliisinneqarsinnaalertussanngorluni.
Inatsisiliat taamaattut atorneqarsinnaannginneri paasineqartariaqarput,
tassami sukkanniuttartut amerlanersaasa sukkanniunneq naammassigaagat
qimmertik peersimasartik ujarlugu tigusarmassuk.
Taamaattumik Kattusseqatigiinniit
kaammattuutigissavara suliap aappassaaneerneqannginnerani KNAPK-mut,
KANUKOKA-mut, Sukkanniuttartut Kattuffiannut, Qimmiutillit Peqatigiiffiannut,
Politimestereqarfimmut Uumasullu nakorsaqarfiannut tusarniaassutigineqassasoq,
tamatumalu kingorna Inatsisartut Inatsiseqarnermut Ataatsimiititaliaanut
sukumiisumik oqaluuserineqaqqissasoq.
Marianne Jensen, Peqqinnissamut, Ilisimatusarnermut,
Avatangiisinut Pinngortitalerinermullu Naalakkersuisoq:
Siullermik qujassutigissavara
inatsisissatut siunnersuut oqaluttunit tamanit qujarunneqarluni ilalerneqarmat
tunngaviatigut. Aammalu soorlu oqaatigineqartoq sivisuumik sukumiisumillu
suliarineqarsimavoq, aammalu tassunga atatillugu oqaatigeriissallugu
aatsaannguaq Kattusseqatigiinninnganniit Anthon Frederiksen-ip oqaaserisaanut
tunngatillugu, tassa tusarniaanerit annertuut aamma ingerlanneqarsimammata,
tassa susassaqartunut.
Uani oqaatigineqartut
oqaluttuninngaanniit ataasiakkaat tamaasa pulaffiginngikkaluarlugit taamaattoq
oqaaseqarfigilaassavakka ilai.
Siumut oqaluttuaninngaanniit maluginiarpara
pingaartinneqarluni oqaatigineqartoq, nappaatinut ajoqutaasinnaasunut
kapoorisarnerup iluaqutaassusia massakkut naluneqanngereermat, taava
kaammattuuteqartoqarluni aamma qimmilinnut/qimmeqartunut tamatumap
isumagilluarnissaanut peqataaqqullugit. Tamanna uppernarserusuppara aammalu
isumaqatigeqingakku, neriuppunga Kommunit, minnerunngitsumik qimuttunik
qimmeqarfiusut aammalu piginnittut
qimmeqartut, tamatumuunakkut maannakkuminngaanniit suli annertunerusumik
suleqataajumaartut. Tassami takornartaasanngilaq alianartunik allaat
inuutissarsiornermut ajoqutaasumik qimmerpassuarnik toqorartoqartarnera,
tassanilu peqqutaanerpaasarpoq kapuuisarnerup annikippallaamik atorneqarnera,
naak kapuutit akeqanngikkaluartut- akeqanngitsumik neqeroorutaagaluartut- ilaatigut
atorneqarneri tamakkua killeqartarput. Taamaattumik Siumut tungaanninngaanniit
taamatut kaammattuuteqarneq neriuppunga tusarluarneqarluni
malinniarneqarluarumaartoq.
Siumut oqaluttuata Niels Mátâk´-p aamma
oqaatigivaa qimmit nappaataannut aamma qitsuit akiuussutissanik
kapoorneqartariaqartut. Tassunga tunngatillugu ilisimatitsissutigiinnarsinnaavara
perlerornermut (Rabbis) sumut akiuussutissamik aamma qitsuit
kapoorneqartarnissaat aalajangersaavigineqareersimammat, kisiannili aamma
ilanngullugu oqaatigissallugu, qimmit nappaataannut allanut qitsuit
kapoorneqarnissaat uumasut nakorsaaninngaanniit pisariaqartinneqanngimmat,
taassamigooq qitsuit taamaattunik nappaateqalerneq ajormata, kisianni
perlerornermut nappaateqalersinnaanerannut akiuussutissaannik
aalajangersaasoqareerpoq.
Siumut tungaanninngaanniit aamma
oqaatigineqarpoq, Kommunini qimminut nakkutilliinissamut toqoraasarnissamullu atorfeqartinneqartut
pikkorissartinneqarnissaannik Siumut kaammattuuteqarpoq, kaammattuut tamanna
aamma siusinnerusukkut saqqummiunneqartareersimavoq, kiisalu aamma
Naalakkersuisuni aammalu Pisortaqarfinni isumaqatigineqarluni
suliniutigineqarusullunilu. Tassami aamma iluatigigatsigu Naalakkersuisut
tungaanninngaanniit taamatut suliaqartut nersutit nakorsaannik, ingammik
tikikulaneqanngitsuni allaat maannakkuninngaanniit annertunerusumik ikiortaasinnaasutut, immaqa allaat
ilinniartinneqarsinnaammata. Tamanna pillugu Avatangiisinut Pinngortitamullu
Pisortaqarfimminngaanniit KANUKOKA saaffigineqarnikuuvoq, aamma neriuppugut
oqaloqatigiinnerit tamakkua ingerlaqqissinnaajumaassasut, tassuunakkullu aamma
KANUKOKA Kommunillu soqutiginnilluarlutik suleqataarusussusermik aamma
takutitaqarumaartut.
Oqaloqatigiinnerit tamakku
ingerlateqqissavavut, neqeroorutigaarput Naalakkersuisuninnganniit
tamatumuunakkut suleqataarusulluta.
Atassutip, Inuit Ataqatigiit aammalu
Kattusseqatigiinninngaanniit maluginiarpara aamma qujarunneqartoq maanna
inatsisissamik siunnersuummik saqqummertoqarmat, kisiannili aamma
misissoqquneqartut assigiinngitsut ataasiakkaarlugit taajunngikkaluarlugit,
oqaluttuninngaanniit assigiinngitsumik saqqummiunneqarput. Ataatsimut oqaatigalugu
imatut oqaatigerusuinnarpakka, taakkua Ataatsimiititaliami Susassaqartumi oqaloqatigiinnissutiginissaat
Naalakkersuisuninngaanniit kaammattuutigigatsigit, uumap inatsisissap
aappassaaneerluni oqallisigineqannginnerani. Naatsorsuutigaara tamatumuunakkut
nalornissutigineqarsinnaasut aamma immaqa allaat allannguutissatut siunnersuutigineqarsinnaasut
taamatut oqaloqatigiinnikkut anguneqarsinnaajumaassasut.
Otto Steenholdt, Atassut:
Inatsisissaq qimerluualaartillugu apeqqutissaqarama, neriulluinnarlunga akineqarsinnaassasunga, tassa ' 10 AKiisortunik qimmeqarnissaq inerteqqutaavoq@. Soorunami pitussimajuaannalersimapput qimuttut, kisiannili qimmit perorsarneri assigiinngittaqaat, ilaat unatoorujussuit ilaalli unanngivillutik palliguttunut kigutiminnik takutitsisartut. Taanna ajornakusuussagunarpoq, ilaat qimmeqartarmata unatuujunngitsunik qimmeqarusuttut, taamaattumik annuataartunik. Taanna immaqa annerulaartumik misissortariaqassaaq, kialluunniit qimussersoq kiisortunik qimmeqarnerarlugu unnerluutigeriataassagalu-arpagu aamma piniartumut tassunga, taamatut perorsaasimasumut annuataalaartumut qimmeqarusuttumut piniarnera eqqorneqarsinnaammat.
Nuanninngilluinnaqqissaartut tassaapput qitsupalaarsuit maani nunatsinniittut. Sumut iluaqutisaanerlutik tamassa sumi tamaani angalaarput. Timmiaaqqanik nuannarisaqa-raanni- aamma nunatsinni taamaattut amerliartormata - sumi tamaani takkuttaraat timmiaaqqanik kimmiarlutik. Taakkua avatitsinninngaanniit eqqussaapput, inequgisinnarlugit inequgiunnaarlugit imminiikkat. Tamakku aamma annerusumik eqqumaffigisariaqartutuut eqqarsaatigisariaqarparput.
Illoqarfiit ilaat nalunaarutigineqarput qitsoqarfiunngillanngooq, anillakkaanni qitsunnik ulikkaavissoq. Kommunit taamaattut aamma nalunaarfigisariaqarput tamakkua nakkutigineqarluaqqullugit.
Kukkussaguma neriullunga Avanersuarmiortatta Tunumiortattalu naqqissagaannga- oqaaseq erlippannik taasagaat tassaasarput, iperaataqarsimagaanni allunaamik sanaamik imaluunniit pituutaqarsimagaanni allunaanik sanaanik, qimmeqarluni killuigajuttorujussuarnik, tassa erlippaat iluamik Avanersuarmiutoorlugu aaqqissuutilaarsimanngikkaanni, ilaanni iperaataq nungussimasarpaat, ilaasalu pituuttat killorlugit ilaatigut nerisarsimallugit. Imaassinnaavoq massakkut allunaasat atorneqarnerulermata tamakkua imannak piginnittumut naalliuutaajunnaartut. Tassani allassimammat §18-imi, imm. 4-mi atortulersorluni allatulluunniit iliorluni qimmit erlippaannik ajoqusiinissaq inerteqqutaavoq. Suli tamanna atorneqarpat allatulluunniit iperaataqarlunilu pituutaqarfiusuni anoqarfiusuniluunniit, taanna aamma eqqumaffigineqalaaqqullugu, qangarsuaaniilli pingaartumik Thulemi atorneqartarmat erlippaasa aaqqissuunneqarnissaannik ilaanni iperaattamik nerigaluaraangamik kipinngivillugu tamaat ataatsikkut iiginnarsimasarmassuk, piginnittullu amusinnaasarlugu ajoqusernagu.
Taamatut naatsunnguamik apeqquteqalaarpunga.
Marianne Jensen, Peqqinnissamut, Ilisimatusarnermut, Avatangiisinut Pinngortitalerinermullu Naalakkersuisoq:
Otto Steenholdtip siullermik apeqqutigivaa § 10, tassa kiisortunik qimmeqarnissaq, qanoq taanna paasisariaqarnersoq ingasappallaannginnersorlu.
Tassunga tunngatillugu erseqqissaatigissavara imm. 2-mi 3-milu, qanoq paasisariaqarnersoq taanna ersarissarneqarsimammat tassalu qimmit inunnik saassussisimasut imaluunniit nersutinik allanik toqutsisimasut piaartumik toqunneqassasut. Aammalu tassunga ilanngullugu allanneqarsimalluni: qimmit tuloriaajarneqartarneri pillugit Naalakkersuisut malittarisassiorsinnaapput. Ilanngullugu oqaatigissavara, soorlu nassuiaatini allanneqarsimasoq tassa §10- mi tassani aalajangersaasimaneq qimminut kiisortunut tunngasoq: ..qimminut kiisortumik pigisaqarnissamik inerteqqummik, siusinnerusukkut atuuttumik aalajangersaaneq, taanna ingerlatitseqqiinerummat, kisiannili allanngortinneqarani uani atorneqaqqissimammat, kisiannili erseqqissaatini imm. 2-mi 3-milu takuneqarsinnaallutik.
Apeqqutip aappaa innersuussutigissavara ataatsimiititaliami pisariaqartinneqarpat ilanngullugu sammineqarumaarpoq.
Anders Andreassen, Inatsisartut Siulittaasuat:
Taamaalilluta
ullumikkut oqaluuserisassaq immikkoortoq 32 tassalu: Qimmeqarneq
qitsuuteqarnerlu pillugit Inatsisartut inatsisissaannut siunnersuutip
siullermeerlugu oqaluuserinera naammassigallarparput, aappassaaneertinnagulu Inatsiseqarnermut
Ataatsimiititaliami suliarineqaqqaarallassaaq, tamatumalu kingorna
aappassaaneerneqarumaarluni.
Oqaluuserisaq naammassivoq.