Oqaluuserisassani immikkoortoq 34_1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 30. september 1998 nal.
13.58
Ataatsimiinnermi aqutsisoq: Inatsisartut
Siulittaasuat Anders Andreassen.
.
Konrad Steenholdt, Kultureqarnermut, Ilinniartitaanermut
Ilageeqarnermullu Naalakkersuisoq:
Naalakkersuisut sinnerlugit
allagaateqarfeqarneq pillugu inatsisartut inatsisissaattut siunnersuut
matumuuna saqqummiutissavara. Siunnersuut katersugaasiveqarneq pillugu
inatsisartut inatsisissaattut siunnersuutip, oqaluuserisassani 33-miittup
tassa atsaannguaq pisatta, saqqummiunneqarneranut atatillugu Inatsisartunut
saqqummiunneqarpoq. Taamaammat siunnersuutip suliarineqarneranut
tunuliaqutaasut siunnersuummik tassannga saqqummiussinermut attuumassuteqarput.
Nunatta Allagaateqarfia Inatsisartut
inatsisaat nr. 14, 1. november 1982-imeersukkut pilersinneqarpoq. Inatsisartut
inatsisaat atuutilersinneqarpoq Namminersornerullutik Oqartussat pillugit
inatsimmi ' 4 tunngavigalugu. 1990-imi Nunatta Allagaateqarfia
Katersugaasivialu ataatsimoortinneqalerput taallugit Nunatta Katersugaasivia
Allagaateqarfialu. Peqatigitillugu Kalaallit Nunaanni allagaateqarfeqarneq
pillugu inatsimmi aalajangersakkat katersugaasiveqarneq allagaateqarfeqarnerlu
pillugit Inatsisartut peqqussutaat nr. 4, 18. maj 1990-imeersumut ilanngullugit
allanneqarput.
Siunnersuutikkut saqqummiunneqartukkut
Allagaateqarfiup Nunatta Katersugaasivianit avissaartinnissaata
sulissutigineqalernissaa siunertarineqanngilaq. Siunnersuummik tassannga saqqummiussinikkut
anguniarneqassaaq Inatsisartut inatsisaat nr. 4, 18. maj 1990-imeersumut
naleqqiullugu pitsaanerusumik suleriaaseqartoqalernissaa
paasiuminarnerulersitsisoqarnissaalu kiisalu inatsisip immikkoortuisa arlallit
erseqqinnerulersinneqarnissaat.
Allagaateqarfeqarnermi ingerlatsineq
sulinikkut ajornartorsiutitaqarsimanngilaq. Taamaammat siunnersuutikkut
matumuuna pingaarutilitsigut allanngortitsinissaq siunertarineqanngilaq.
Allagaateqarfeqarneq pillugu maleruagassanut maannakkut atuuttunut nassuiaatini
allassimavoq tamakku tassaasut suleriaatsimut tamatumani
ineriartortinneqarsimasumut ersiutaasut allagaateqarfeqarneq pillugu
inatsimmut siullermut 1982-imeersunut nassuiaatit naapertorlugit, siunnersuullu
manna saqqummiunneqartoq tamakku ingerlateqqinneqarnerattut isigineqassaaq.
Allagaateqarfeqarneq
pillugu Inatsisartut inatsisisaanut siunnersuutikkut matumuuna siunertarianeqarpoq
soorlu inatsit maannakkut atuuttoq taamaattoq nunatsinni kultureqarnikkut
kingornussarsiatta ilaasa pisortat suliffeqarfiini toqqortarineqartut
ilaatigullu inuit ataasiakkaat toqqortarisaasa tammatsaalineqarnissaat.
Pissutsit maannakkutuut itsillugit siunnersuut manna inatsisinut allanut
tamakkuninnga aqutsissutaasunut ilanngullugu saniatigullu atorneqassaaq.
Asserssutigalugu taaneqarsinnaapput
pisortarni oqartussaasut nalunaarsuiffii pillugit inatsit normu 294 juunip
8-ani 1978-meersoq aamma oqaluusserisassaq 33-mi katersugaasiveqarneq pillugu
Inatsisartut peqqussutissaannut siunnersuut saqqummiunneqartoq.
Allannguutit
pingaarutilittut nutaatut taaneqarsinnaapput, siunnersuummi ' 16 imm. 1-mi aalajangersarneqarmat:
maannakkut suliat salinneqartalissasut, tassa allagaatit nunatta katersugaasivianut
allagaateqarfianullu tunniunneqalersinnagit,
kiisalu siunnersuutit ' 25-p kingunerissavaa allagaatinik tamanut
takutinneqarsinnaanngitsunik atuisoqartillugu ataatsimut isigalugu
nipangiussisussaatitaaneq atuuttoq, tassa aallagaateqarfeqarneq pillugu maleruagassat
maannakkut atuuttut malillugit taamaanngimmat.Taakkunani Inatsisartut
peqqussutaat normu 4, maajip 18-ni 1990-meersumi ' 14, imm. 6-mi titarnertaat aappaat
malillugu nipangiussisussaatitaaneq piumasarineqarsinnaalluni immikkut
akuersissuteqarnermut piumasaqaatitut.
Kiisalu taaneqarsinnaavoq siunnersuummi ' 26 malillugu maannakkut allagaatit
aalajangersimasut tamanut takutitassanngunngitsoortinneqarsinnaalermata, tassa
taakku pissussaat ima ajortigippat pigiinnarneqarnissaannut tamanna pisariaqartinneqarluni.
Inatsisssamut
siunnersuut ukununnga tusarniaassutigineqareerpoq, tassa Nunatta
Katersugaasivia Allagaateqarfialu, Katersugaasiveqarnermut
Allagaateqarfeqarnermullu Ataatsimiititaliaq, Nukaaka tassa Nunatsinni
Katersugaasiviit Kattuffiat, KANUKOKA, Ilisimatusarfik, Inatsisartut
Allattoqarfiat kiisalu inatsisileriffimmut inatsisissap oqaasertai
misissungassanngorlugit. Tusarniaanermut akissutigineqartut tiguneqarsimasut
suliarineqarput siunertamullu naleqquttutut isigineqaraangata inatsisissatut
siunersuummut ilanngullugit suliarineqartarlutik.
Allagaateqarfeqarneq
pillugu Inatsisartut inatsisissaanut sinnersuutip matumani saqqummiunneqartup
akuersissutigineqarnera allaffissornikkut aningaasaqarnikkullu
sunniutaasussanik kinguneqartussatut naatsorsuutigineqanngilaq. Taamatuttaaq
siunnersuut nassuiaatitaalu innersuussutigalugit siunnersuut matumuuna
Inatsisartunut suliassanngortippara.
Ruth
Heilmann, Siumup oqaaseqartua:
Allagaateqarfeqarneq
pillugu Inatsisartut inatsisissaattut siunnersuut immikkortumut 33-mut atasumik
saqqummiunneqarnera Siumumit paasilluarparput.
Nunatsinni
kultureqarnikkut kingornussarsiatta ilaasa pisortat suliffeqarfiini
toqqortarineqartut ilaatigullu inuit ataasiakkaat toqqortarisaasa tammatsaalineqarnissaat
allagaateqarfeqarnikkut siunertaammat tamanna Siumumi naleqquttuutikkatsigu
iluarisimaaripput oqaatigissavarput.
Aammalu
pisussaaffiinut nutaatut ilanngunneqartut soorlu suliat salinneqartalissasut
tassa allagaatit Nunatta Katersugaasivianut Allagaqaateqarfianullu
tunniunneqannginneranni, kiisalu aamma allagaatinik tamanut
takutinneqarsinnaanngitsunik atuisoqartillugu ataatsimut isigalugu
nipangiussisussaatitaanermut
tunngavissap atuutilernissaanut peqqussuteqalernissap aammattaaq ilaalerneri
Siumumit tapersersornartuutikkatsigit.
Taamaattumik
taamatut inatsisissap aamma attuumassuteqarfiinut tusarniaassutaareersimanera
pereersimammat Siumumit kaammattuutigiinnassavarput Inatsisissap taamatut
isikkoqarluni aappassaaneerneqarnissaminut ingerlaqqinnissaanik siunnersuut
inassutigissagatsigu.
Pauline
Kristiansen, Atassutip :
Oqaluuserisami
imm. 33- mi Katersugaasiveqarneq allagaateqarfeqarnerlu
pillugit Inatsisartut Peqqussutissatut siunnersuummut
ATASSUT-miit oqaaseqaapput tamaat pineqartumut innersuussutigissavarput.
Tassungali ATASSUT-ip nuannaarutigalugu oqaatigeqqikkusuppaa,
katersugaasiveqarneq allagaateqarfeqarnerlu pillugit suliaq pitsaasumik
naammassineqarmat.
Mannasse
Berthelsen, Inuit Ataqatigiit oqaaseqartuat:
Naatsunnguamik.
Inatsisitigut katersugaasiveqarneq allagaateqarnerlu
iluarsaassivigineqarnerani, tassa allagaateqarfiup immikkut
inatsiliunneqarneratigut saqqummiunneqartut Inuit Ataqatgiinniit
pissusissamisuuginnartutut oqaatigissavagut. Taamatut immikkut
inatsisiliunneranni inatsisaareersumit allanngungaarnani saqqummiunneqarmat
annerusumik oqaaseqarfiginagu Kulturqarnermut Ilinniartitaanermullu
Ataatsimiititaliamut ingerlateqqinneqarnissaa Inuit Ataqatigiit
innersuussutigissavarput.
Anthon
Frederiksen, Kattusseqatigiit:
Oqaluuserisap
siuliani katersugaasiveqarneq pillugu Inatsisartut peqqussutissaannut
siunnersuutip saqqummiunneqarnerani Kattusseqatigiit sinnerlugit oqaaseqaatikka
innersuussutigalugit inatsisissatut siunnersuut matumani saqqummiunneqartoq
tunngaviatigut akueraara.
Inatsisissatut
siunnersuut Kattusseqatigiit tungaanniit annerusumik uparuagassaqartinngilara,
taamaattumik taamatut naatsumik oqaaseqarlunga suliap Kultureqarnermut
Ataatsimiititaliami akuersaartumik suliarineqarnissaa inassutigaara.
Konrad
Steenholdt, Kultureqarnermut, Ilinniartaanermut Ilageeqarnermullu
Naalakkersuisoq:
Oqaaseqartunut
tamanut qujavunga. Tassa tamanit tapersserneqarluni suliaq ingerlateqqinneqassaaq,
tassalu siuliatuut aappassaaneerneqarluni pingajussaaneerneqarluni
sammineqartussaavoq, soorunalumi tassani periarfissaqarpoq ataatsimiititaliami
Kultureqarnermut Ilinniartitaanermullu Ataatsimiititaliami apeqqutit
assigiinngitsut paaserusoqqitat itisilerlugit oqallisigineqarsinnaallutik.
Taamatut tapersiineq erseqqarissoq pillugu oqaaseqartunut tamanut qujavugut.
Anders
Andreassen, Inatsisartut Siulittaasuat:
Qujanaq.
Tassa maluginiarpara amerlanerussuteqartut suliaq taamatut isikkoqarluni
aappassaanneernissaanut ingerlanissaa kissaatigigaat, taamaattumik aamma
aappassaaneerneqarnissaminut ingerlaqqissaaq. Taamaalillutalu ullumikkut
oqaluuserisassat immikkoortuisa 34-at tassalu allagaateqarfeqarneq pillugu
Inatsisartut peqqussutissaanut siunnersuut siullermeerneqarnera
naammassivarput, aappassaaneerneqarnissaminullu ingerlaqqinnisaminut
piareerluni.
Oqaluuserisaq
naammassivoq.