Oqaluuserisassani immikkoortoq 35_1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq
30.september 1998 nal. 14.10
Ataatsimiinnermik
aqutsisoq: Inatsisartut Siulittaasuat Anders Andreassen.
Konrad
Steenholdt, Kultureqarnermut, Ilinniartaanermut Ilageeqarnermullu Naalakkersuisoq:
Ilagiinni
atorfinitsisisarnerit pillugit inatsisartut peqqussutissaattut siunnersuut
Naalakkersuisut sinnerlugit matumuuna saqqummiutissavara. Siunnersuut manna
ilageeqarneq pillugu Inatsisartut peqqussutaata allannguutaa pillugu
Inatsisartut peqqussutissaattut siunnersuummut oqaluuserisassani
immikkoortutut 52-itut oqaluuserineqartumut atatillugu saqqummiunneqarpoq.
Ilagiinni
Kalaallini atorfinni atorfinitsitsisarnerit pillugit malittarisassat Kalaallit
Ilagiit pillugit Inatsisartut peqqussutaanni nr. 2-mi 30. marts 1982-imeersumi
tulliuttuni peqqussummik 1982-imeersumik taaneqartartusssami aalajangersakkani
ikittunnguaannarni ilaatinneqarput, malittarisassallu taakku Ilageeqarneq
pillugu Inatsisartut peqqussutaata nr. 15-ip 28. oktober 1993-imeersup
tulliuttuni peqqussummik 1993-imeersumik taaneqartartussap akuerineqarneratigut
atatiinnarneqarsimapput.
Aammattaaq
Kalaallit Nunanni ajoqit, ajoqinut taartaasartut, ajoqiunerit, pattattartut
a-tuaasartullu aningaasarsiaat pillugit ilageeqarnermut ministeriaqarfiup
nalunaarutaani 8. november 1967-imeersumi ikittuinnarnik aalajangersagaqarpoq.
Peqqussutip
1993-imeersup akuerineqarneranulli atatillugu siunertarineqarsimavoq peqqussummi
1982-imeersumi aalajangersakkat ilageeqarnermi atorfinni tamani
atorfinitsitsisarnerit pillugit peqqussummik immikkoortumik taarserneqassasut.
Peqqussutissatut
siunnersuutikkut matumuuna siunertarineqarpoq malittarisassatigut tunngavissanik
ilagiinni sulisunik assigiinngitsunik tamanik atorfinitsitsisarnernut
atuuttunik allanut atanngitsunik peqalernissaq.
Sinniisissatut
qinikkat ilagiit siinniisaattut qinikkat pingaarnerpaatillugit
eqqarsaatigalugit palasinik provstinillu
atorfinitsitsinerni peqataatinneqartarnissaat pingaartumik pisariaqartinneqarpoq.
Kalaallit
Nunaanni ilagiinni tjenestemandit Namminersornerullutik Oqartussani aamma
Ka-laallit Nunaanni kommunini tjenestemandit pillugit Inatsisartut inatsisaanni
nr. 5-imi 14. maj 1990-imeersumi malittarisassani pineqartunut ilaatinneqarput.
Taamaalilluni peqqussutissatut siunnersuummi matumani atorfinitsitsisarnermi
malittarisassat tjenestemandit pillugit
inatsimmi malittarisassanik taarsiisuunatik ilassutaanissaat anguniarneqarsimavoq.
Taamaattumik peqqussutissatut siunnersuummi matumani malittarisassat sulisut
taakku eqqarsaatigalugit kisimiissan-ngillat, tjenestemandilli pillugit
inatsimmi aalangersakkanut atatinneqassallutik.
Palasit
provstillu tjenestemanditut atorfeqartut eqqarsaatigalugit taakku
Naalakkersuisunit atorfinitsinneqartarput. Taamaattumik peqqussutissatut
siunnersuummi matumani atorfinitsitsinermi malittarisassat atorfinni
taakkunani atorfinitsitisiniarnerni ilagiit sinniisaasa allallu qanoq annertutigisumik
peqataatinneqartarnissaat pillugu apeqqummut taamaallaat attuumassuteqarput,
atorfinitsitsinermut oqartussaassuseqarneq pineqarani. Tamatumunnga atatillugu
oqaatigineqassaaq Kalaallit Nunaanni Biskoppi kunngimit - tassa Dronningimit -
naalagaaffimmi tjernestemanditut atorfinitsinneqartarlunilu soraarsinneqartarmat,
ilageeqarnermut ministerip inassuteqaateqarneratigut.
Atorfinitsitsinerni
siinniisutut qinigaasut peqataatinneqartarnerat pillugu aalajangersakkat saniatigut
siunnersuummi palasitut provstitulluunniit atorfinitsinneqassagaanni
piumasaqaatinik sunik eqqortitsisimanissaq pillugu aalajangersakkat
ilanngunneqarsimapput, sulisut allat - tassalu ajoqit, pattattartut,
provsteqarfiit allaffiini sulisut oqaluffinnilu ikiortaasartut - eqqarsaatigineqaratik.
Sulisut
allat eqqarsaatigalugit atorfinitsitsisarnermi soraarsitsisarnermilu
oqartussaassuseqarneq siunnersuummi aalajangersaaffigineqarsimavoq.
Peqqussutissatut
siunnersuutikkut matumuuna palasit
provstillu tjenestmanditut atorfinitsitaasimasut imaluunniit sulisut allat
akissarsiaat atorfinitsitaanermillu atugassarisaaat aalajangersaaffigineqanngillat.
Siunnersuut
oqaaseqaatitalik aamma innersuussutigalugu siunnersuut Inatsisartuni
akuersaartumik oqaluuserineqarnissaminut matumuuna tunniunneqarpoq.
Hans Enoksen, Siumup oqaaseqartua:
Ilagiinni atorfinitsitsisarnerit
pillugit inatsisartut peqqussutissaannut siunnersuut Siumumiit imaak
oqaaseqarfigissavarput.
Ilagiit Kalaallit ingerlalluarnissaat
Siumumi pingaartilluinnagaraarput tamakkiisumillu tapersersorlugit, ilagiit
sulineranni aaqqissutissatut saqqummiunneqartartut pingaartumik ilagiit
suliffigineqarneranni pitsanngorsaatissat.
Matumuuna peqqussutissakkut
saqqummiunneqartukkut anguniarneqartut tassalu, ilagiinni sulisunik
assigiinngitsunik tamanik atorfinitsitsisarnermi allanut atanngitsumik
peqalernissaq, tamakkiisumik Siumumiit tapersersoratsigu.Tassami
pissusissamisoortutut Siumumiit isigaarput ilagiit sinniisaatut qinerneqarsimasut,
aammalu ajoqit palasillu ullumikkornit sunniuteqarnerusumik sulinermi
peqataalernissaat anguniarneqartoq tapersersoratsigu.
Ullumikkut ingerlaaseq
qiviarutsigu, ilagiit sinniisaat atorfinitsitsinermi sunniuteqarsinnaapput,
uanilu peqqussutissami tamakkiinerusumik atorluarneqarnissaat aammalu
kikkunnulluunniit ataanngitsumik atorfinitsitsinermi atuuttumik
aalajagersaasartunik pilersitsinissaq Siumumiit tamakkiisumik taperserparput.
Ilanngullugu ujartorparput
Kalaallit Nunaata 1993-mi nammineq biskoppeqarfinngorneraniit inatsisitigut
allatigullu aaqqitassat suli ulloq manna tikillugu aaqqinneqarsimanngitsut
misissuiffigalugit aaqqinniarneqarnissaat anguniaqqullugu, soorunami tamanna
Danmarkimi ilageeqarnikkut pisortat susassaqartullu suleqatigalugit.
Taamatullu isikkoqarluni
aappassaanerneqarnissaminut ingerlaqqinnissaa innersuussutigalugu.
Jakob Sivertsen, Atassutip oqaaseqartua:
Ilagiinni atorfinitsitsinerit
pillugit inatsisartut peqqussutissaattut siunnersuut naalakkersusiumiit
saqqummiunneqartoq imatut oqaaseqarfiginiarparput.
Kalaallit nunatsinni ilagiittut
sullinneqarnitta nunaqarfimmiikkutta illoqarfimmiikkuttalu
pitsanngorsarluarneqarnissaa Atassut-mit pingaartitariuarsimavarput, soorlu
siornatigut arlaleriarluta ajoqit, pattattut ilagiinnilu sullissisut allat
atorfeqartitaanikkut atugaasa pitsaanerulernissaat anguniarlugit
siunnersuuteqartarnitsigut tamanna ersersittarsimagipput.
Ilagiinni atorfinitsitsisarnerit
pillugit Inatsisartut peqqussutissaannut siunnersuutip Kultureqarnermut,
Ilinniartitaanermut Ilageeqarnermullu naalakkersuisup saqqummiussaa ilagiinni
sullissisuusut atorfinittitaasarnerannut tunngassuteqarpoq.
Peqqussutissamut siunnersuutip
maannakkut saaqummiunneqartup tunngavigaa Inatsisartut peqqussutaat nr. 15 28.
Oktober 1993-meersup, januarillu aallaqqaataani 1994-mi atulersup imarisaasa
kingunerat, tassunga tunngatillugu Atassut-mit isumaqarpugut, ilagiinni
sulisussanik atorfinititsisarnerit pillugit peqqussutissaq maannakkut
nalaakkersuisunit saqqummiuneqartoq ilagiit qullersaqarfianniit assut
utaqqineqartoq paasisimagatsigu, tassami siornatigut ilagiinnut
atorfinititsisarnerit qaffasinnerusut nunatta biskorfeqarfianiit
isumaginneqartartut nalunnginatsigik.
Peqqussutissami maannakkut
saqqummiunneqartumi atorfinititsisarnerit prosvteqarfinnut pingasunut kiisalu atorfinititsinerit tamaasa piffinni
ataasiakkaani ilagiit sinniisaat tusarniarneqaqaartarnissat peqqussutissami oqaatigineqarmat
isumaqatigaarput, ilagiit siniisaasa Nunatsinni ulluinnarni ilagiit
sullinneqarnerat qanimut suleqataaffigigaat akisussaaqataaffigigaallu
Atassut-mit nalunnginnatsigik.
Atassut-mit
erseqqissaatigissavarput ilagiinnik sullissineq suliffiummat ilungersunartoq,
timikkut anersaakkullu piginnaaneqarluarnissamik suliffigisamullu
misilittagaqarluarnissamik annertuumik piumasaqarfiusoq, taamaattumik
palasitut prosvtitullu atorfininissamut peqqussutissamut siunnersuummi
piumasaqaataassut Atassut-mit isumaqatigilluinnarparput.
Soorlu ' 1-mi imm. 2, 3- milu allassimasut
immaatut, issuarpara: AInuit
imatut ilinniagaqarsimasut piginnaassutsinut tunngatillugu Ilinniarfissuarmi
ilinniartitsisutut ilinniartitaanermut
naleqqiunneqarsinnaasumik ilinniagallit, tamatumalu saniatigut kristumiutut
upperisarsiornermik annertunerusumik ilinniagaqarsimasut malittarisassat
Naalakkersuisut aalajangersagaat malillugit, aamma inuit palasitut imaluunniit
ilagiinni danskini palasiunissamut piumasaqaatinik naammassinnissimasut.@ Issuaaneq naavoq.
Peqqussummi taamatut
piumasaqaateqarneq atorfinnut siuliini oqaatigineqartunut pingaaruteqartunut
atorfinissagaanni piumasaqaatit naleqquttutut Atassut-mit isumaqarfigaarput.
Saqqummiussami oqaatigineqarpoq
Kalaallit Nunanni ajoqit, ajoqinut taartaasartut, ajoqiunerit, pattattartut
atuaasartullu aningaasarsiaat pillugit ilageeqarnermut ministeriaqarfiup
nalunaarutaani 8. November 1967-imeersumi ikittuinnarnik aalajangersagaqartoq,
annertunerusumillu naalakkersuisumit
nassuiaateqarfigineqarani. Tassunga tunngatillugu Kultureqarnermut
ilinniartitaanermut ilageeqarnermullu naalakkersuisoq aperiniarparput ajoqit
pattattartullu aningaasarsiaqarnikkut atugaat naalakkersuisut aaqqinniarlugit
suliniuteqarnersut.
Taamatut oqaaseqarluta
peqqussutissamut siunnersuut piffissaq sivisooq atorlugu suliarineqarsimasoq
suliarilluagaasorlu Atassut-mit tamakkiisumik akuersaaratsigu.
Maliinannguaq Markussen Mĝlgċrd, Inuit Ataqatigiit oqaaseqartuat:
Qujanaq. Siullermik Inuit
Ataqatigiinniit maluginiarput peqqussutip matuma allanngortinniarnerani
attuumassuteqartut tusarniarneqarsimasut. Matumuunali tusarniaasimanerup
sivikippallaarnera inuillu feriarnerisa nalaaniissimanera ajuusaarutigaarput,
tassami peqqussut una oqartussaaqataanerunissamik siunertaqartoq oqartussaaqataasussanit
nalilersorluarneqarnissaa pisariaqarmat.
Peqqussumi matumani ilagiit
sinniisaasa atorfinitsitsiniarnerni annertunerusumik oqartussaaqataanerunissaat
siunertaavoq, tamatumanilu Inuit Ataqatigiinniit neriuutigaarput sinerissami
ilagiit sinniisaassa oqartussaaqataanerulernertik atorluarlugu
eqeersaatigalugulu kaammattuutitut tigussagaat, ukiunimi makkunani
inuiaqatigiit anersaakkut piitsutut taaneqartarfitsinni piariaqarluinnarpoq
piitsuussutsip tamatuma qaangerniarnerani ilagiit sinniisaasa
suleqataalluarnissaat.
Ukiuni ajornartorsiuterpassuit
taakkartorneqartuarput, inuiaallu aatsaat taama anersaakkut tarnikkullu
nukittorsarneqarnissamik pisariaqartitsitigaagut, taamaattumik ilagiit
sinniisaasa aaqqissugaanik meeqqanut, inuusuttuaqqanut inersimasunullumi
iliuuseqartarnissat pisariaqarput, periarfissaalluartullu ilagaat sumiiffinni
pinaveersaartitsinikkut suliniuteqartut suleqatigilluarnissaat. Aatsaammi
sulerusussuseqarnikkut takutitsilluarnikkullu annertunerusumik pisortanit
tapersersorneqarnissaq anguneqarsinnaammat, taamaattumik aamma siunissaq
eqqarsaatigalugu ilagiit sinniisaat atorfinitsitsisartutuinnaq assigisaanillu
atorneqassanngippata ilageeqarnerup iluani nutaamik aaqqissuussinissaq
pisariaqarpoq, Inuit Ataqatigiinniillu Ilageeqarnermut Naalakkersuisumut
apeqqutigerusupparput ilageeqarnermi sullissisut isumasioqatigiinnissaannik
Inatsisartut kissaataat qanoq kinguneqarsimanersoq.
Ukiuni makkunani palasissaaleqineq
imaannaanngitsuuvoq, tassungalu atatillugu apeqqutigerusupparput maanna
palasinngorniarneq qanoq ingerlanersoq. Ukiuni tulliuttuni ajornartorsiutit
qaangernissaat naatsorsuutigineqarsinnaanerluni? Ilagiinni sullissisut atugaat,
soorlu ajoqit akissarsiaasa annikeqisut qaffanniarnissaannik
pilersaaruteqartoqarnersoq, maannakkummi sumiiffiit ilaanni palaseqanngilaq,
ajoqillu kisimik isumalluutaapput.
Ajoqit atorfeqartitaanerisa
aaqqissuussivigineqarnissaat pisariaqartoq Inuit Ataqatigiinnit isumaqarpugut,
ullumikkullu annertunerusumik atuarfinni upperisaq pillugu atuartitsisutut
atorsinnaanissaat summiiffinni atuarfiit siulersuisuisa
eqqumaffiginerusariaqaraat isumaqarluta. Tassami sinerissami atuarfiit ilaanni
upperisamik atuartitsisut qallunaajusarput taamaammallu kalaaliaqqanut
paasiuminaassinnaasarlutik.
Naggasiullugu siunissami
ilageeqarnermi hĝjskoleqalersinnaanissaq ilaatigut taakkartorneqarmat, taassuma
pilersaarutigineqarnera sumut killinnersoq Inuit Ataqatigiinniit apeqqutigerusupparput.
Taamatut oqaaseqarluta
uggoringaluarlugu tusarniaanerup sivikippallaarsimanera Inuit Ataqatigiinniit
peqqussutissatut siunnersuut taperserparput neriulluta tamanna ilagiinnut
nukittuallaataajumaartoq.
Anthon Frederiksen, Kattusseqatigiit:
Ilagiinni atorfinitsitsisarnerit
pillugit Inatsisartut peqqussutissaattut siunnetsuut Kattusseqatigiit
sinnerlugit soqutigalugu misissorsimavara, tunngaviatigullu taperserlugu.
Nalunngilarput ukiuni makkunani amma ilagiinni suliaqartut inuiaqatigiinni annertuumik
suliaqartut, kisianni aamma nalunngilarput ilagiinni sullissisut
ilungersorlutik suliniarnerminni arlalitsigut akimmiffissarpassuarnik
atugaqartut, minnerunngitsumik inuiaqtigiinnut qaninnerusumik pitsaanerusumillu
upperisarsiornermik sullissiniarnerminni.
Tassami assersuutigalugu palasit
ullumikkut allaffissornermik annertuumik suliaqarput, allaat ilaatigut
nunaqarfinnik kiffartuussineq tunulliunneqartutulluunniit
oqaatigineqarsinnaasarluni. Soorlu
aamma meeqqat atuarfii palasinit ajorqinilluunniit upperisarsiornerup
tungaatigut killeqangaartumik suliffigineqartut, uffa aamma meeqqat anersaakkut
peqqisuulluni ineriartortinneqarnissaannut upperisarsiornermik aallussineq
annerusoq pisariaqartinneqaraluartoq. Mannalu iluatsillugu apeqqutiginiarpara palasit
allaffissornikkut ikiortaannik atorfinitsitsisarnermut Kalaalit Nunatsinni
peqqussutikkut imaluunniit malittarisassatigut allatigut periarfissaqartitsisoqarnersoq.
Nalunngilarput ukioq manna ajoqit
18-nit ukiuni pingasuni ilinniareerlutik naammassinnittut aammalu
pikkorissartitsineq suli annerusoq ingerlanneqartoq, taamaattumik ajoqit
atorluarneqarnerulernissaat soorlu assersuutigalugu palasit allaffiini,
meeqqat atuarfiini il.il. naalakkersuisunit qanoq pilersaarutigineqarnersoq
paaserusunnarpoq, asulimi ilinniartitsineq akisooq ingerlanneqarneq ajortoq
aamma nalunnginnatsigu. Aammali ilisimavarput ajoqit akissarsiaqartitaanerat
ajornartorsiutaasoq, tassami ilaatigut illoqarfinni ajoqit marluusimagunik
ajoqip ilaatigut ataatsip akissarisassaraluisa nalingi avinneqartarmata inunnut
marlunnut, immaqaluunniit pingasunut. Taamaattumik pissutsit tamakku
iluarsillugit palasillu annerusumik allaffissornerinnaanngitsumut
upperisarsiornermilli annerusumik sullissinissaaannut pitsaanerusumut
naalakkersuinikkut anguniagaqarnissaq Kattusseqatigiinniit ujartorparput.
Taamaattumik taamatut naakkaluamik
oqaaseqarlunga suliap aappassaaneerneqannginnerani Kultureqarnermut
Ilinniartitaanermut Ataatsimiititaliami oqaluuserineqarnissaa innersuussutigaara.
Konrad Steenholdt, Kultureqarnermut,
Ilinniartaanermut Ilageeqarnermullu Naalakkersuisoq:
Qujavunga. Paasivara uani
pineqartoq paasilluarneqarluni tapersersorneqartoq. Tassa inatsisip
allangortinneqarnerani uani qitiulluinnartoq tassaavoq, provsteqalernikkut,
tassa siornatigut, soorlu Atassutip oqaaseqartuata aamma taatsiareeraa,
siornatigut imaassimavoq biskorpeqarfimminngaanniit atorfinitsitsisarneq
tamarmi ingerlanneqarsimalluni. Nutaamilli aaqqissuussineq pilersissimavarput,
tassa provsteqarfiit pingasut, taakulu oqartussaaffi soorunami allangortitserinerup
kinguneranik imatut kinguneqarput allatut ajornartumik aamma ilagiit
sinniisaanni qinersineq pinnguarnerinnaassanngippat aamma taakkua
oqartussaffinnik akisusaaffinnik tunisariaqarlutigit. Tassalu uani
allanngortitsinermi toqqammavippiaavoq ilagiit sinniisaattut qinikkat
atorfinitsitsiniarnerni sunniuteqarsinnaanissaat. Paasivara taanna
paasilluarneqartoq partiit oqaluttuinit tamanit, taamatullu
allanngortitsinissaq tamanit akuersaarneqarluni. Tamanna qujassutigissavara.
Taavalu oqaaseqartut ataasiakkaat
apeqquteqarmata uterfigillattaalaasavakka. Siullermik Siumut oqaluttua Hans
Enoksen -ip apeqqutigaa 1993-mi biskorpeqarfinngornitta kingornatigut inatisitigut
allatigullu aaqqitassat suli ulloq manna tikillugu aaqqinneqarsimanngitsut
qanoq ingerlanneqarnersut. Taanna tassani suliassaq ingerlalluartorujussuuvoq
maannakkut, tassa Danmarkimi Ilagiinnut ministeri suliassami tassannga
paasitereersimavara. Ilaatigut ilumoorpoq aaqqitassat assigiinngitsut
arlaliupput, kisiannili imaakkamingaasiit aqagumut imaaliinnarlugit aaqqinneqarsinnaanatik,
kisianni oqaloqatiginninnerit siulliit imatut nalilerpakka
paasinnilluartoqartoq biskopip Danmarkip ilua kisiat eqqarsaatigalugu taama
ungasitsigisumi inissisimanera patsisaalluni aaqqissutissat assigiinngitsut
iluarissariaqartut. Soorlu ilaatigut biskopilu qaammammut ataasiarluta
pissutsit assiginngitsut nalilersorlugit oqaloqatigiittarnitsinni illarluta
pisarparput una, atorfinitsitaanernut tunngasut Danmarkip sermersuullu
akornanni silaannarmi suli erfattut. Suliassaq ingerlavoq aamma
isumalluarnartoqarpoq naammaginartumik aaqqiisoqarnissaa, soorunami
aaqqiniarnitsinni siunnersorneqarluarnerit aammalu assigiinngitsunin-ngaanniit
nunatsinninngaanniit piumasaqaataasut tunngavigaavut. Taavalu aamma
nalunngilara naalakkersuisut siulittaasuata soqutigilluinnaraa aamma
Naalagaaffeqatigiinnerup iluani aaqqitassani tassani akimmisaarfeqassappat
aamma ilanngullugu Naalagaaffeqatigiinnerup iluani qullersaasut
ataatsimiinerannut allaat apeqqut taanna tigorusukkaa. Kisianni uanninngaanniit
isigalugu imaappoq - suliaq ingerlavoq - aaqqissaqqaarpoq aamma.
Taava Atassutip oqaluttuata
apeqquteqaatigaa - soorunami una erseqqissumik oqaatigilaarlara -
saqqummiininni erseqqissumik oqaatigaara pineqartut tassapput provstit
palasillu atorfinitsinnineqartarnerannut tunngasut - kisianni
ilimagereersimavara soorunami ilagiinni sulisuusut allat tikinneqarumaartut,
pingaartumik ajoqit aamma eqqarsaatigalugit. Ilumoorpoq oqallinnerujussuit annertuut maani
ingerlassimavavut aammalu Inatsisartut oqaaseqaataat assiginngitsut ullumikkut
puigorneqaratik ingerlanneqarput. Pingaartumik soorlu ajoqit, pattattartut
allallu atorfeqarnerannut tunngasut aaqqiissutissartaat, ingerlanniarsaraagut,
kisiannili soorunami akissarsiat tungaatigut isumaqatiginninniarnerit
isumaqatignninniarnikkut ingerlanneqartarmata toqqaannartumik
naalakkersusiuninngaanniit qanoq iliuuseqarsinnaanerput killeqarpoq, kisianni
soorlu ilisimareerissi palasit sapaatip akunnerata siuliani maani Nuummi
katerssuussimapput ukiut marlukkaarlugit katersuuttarnerminnut tunngatillugu.
Taamatut katersuussimanerit tunngavigalugit ajornartorsiutaasut
assigiinngitsut oqaloqatigiissutigisarpavut taavalu aamma taassuma saniatigut
qaammatikkaartumik biskoppi ataatsimeeqatigisarpara, taakkulu qanoq
iliuuseqarfigineqarsinnaanissaat ingerlappavut, kisianni pilertortumik qanoq
ililluni aaqqissoqarniarsinnaanissaanik nassaarniarneq assut ajornakusoorpoq.
Taanna oqaatigissavara.
Taavalu Atassutip oqaluttuata
novemberip 8-ni 1967-mi ministeriaqarfiup nalunaarutaa uani innersuussutigaa,
taanna imannak oqaatigissavara, tassani imaqarnerupput atorfilittat, atorfinitsinneqarlutillu
soraarsinneqartarnerannut tunngasoq tassani erseqqissarneqarsimalluni. Ullumikkulli
ajoqit anigaasarsiaqarnerannut tunngasut nalunaarummi nutaamiipput, tassa
nutaanerusumi 1991-mi januarip 21-ani pilersimasumi, tassanilu
takuneqarsinnaapput ajoqit atorfinitsinneqartarneannut aningaasarsiaannut
tunngasut qanoq aaqqiiffigineqassanersut.
Ilaatigut ajoqit
aningaasarsiaannut tunngatillugu una oqaatigilaarlara Avanersuarmi angalaninni
ilaatigut tikissimagakkit ilinniartitsisut ajoqiujutigisutut sulisut atugaat
tikillugit inuttai paasiniaaffigisimallugit. Tassaniittut tamarmik imatut
oqaluttuuppaannga ,soorunami ajoqitut sulinertik ajorinngilaat akissarsiaq
taanna tunngavigalugu, kisiannili una
qujassutigalugu ilinniartitsisutuut timilĉrerituut suliassaqarnertik tunngavigalugu
aningaasarsiamik tungaatigut maalaarutissaqaratik. Taanna erseqqissummik
uannut anngunneqarpoq, kisinni taamaakkaluartoq Inatsisartut kingullermik
oqallikkatta ajoqit akissarsiaat pillugit naammagittaalliorneq, taanna suliaq
kippunnagu ingerlapparput, kisiannili uani inatsisissap uani
allangortinnissaanut tunngatillugu avataatungaatigut tiguneqaraluartoq
soorunami una oqaatigiinnassavara suliassat taakkua oqallisigineqarsimaneri
tunngavigalugit puigornagit ingerlateqqippavut.
Taavalu IA-p oqaluttuata taallattaagai aamma, ilumoorpoq
puigortariaqanngilarput ukua ilagiinni sinniisut, massakkut
atorfinitsitsiniarnermi soorlu, taanna kisiat suliassatut eqqarsaatiginngilarput,
kisianni qujanartumik illit aamma eqqaasitsissutigaat ilagiinni sinniisut
kommunini, palaseqarfinni allatigut akuliusimanerullutik suleqataanissaat.
Ilumoorpoq, pisariaqarluinnarpoq aamma
tassani kajumissaarisariaqarpugut. Imatut una paaseqqunngeqqaara uani
allannguutissatut siunnersuut tassa imaaginnarpoq, taanna kisiat
suliariniarsiuk sinneri pinnagit, kisianni pissusissamisoorluinnartutu
isigaara inuit ilagiinni suliniartuusut taamannak aamma kajumissaarneqarnissaat
pinaveersaartitsinertigut allatigulluunniit suliniuteqarnikkut amma
akuliusimaneroqqullugit. Taamatut eqqaasitsissuteqarnerit assut
qujassutigaara.
Palasinngorniarneq apeqqutigaat
maannakkut, tassa inatsisip allanngortinneratigut ammaas-simavavut
Ilisimatusarfimmi ilinniarsinnaalerneq. Qujanartumik ukiut tamaasa tallimat
ataallugit ilinniartussat nalunaartarput, aamma ukioq manna aamma
nalunaartoqarpoq palasinngorniarnermik aallatinniarlutik.
Amerlasoorsuunngillat, kisianni soorunami isumalluutigeqaagut. Kisianni
taassuma saniatigut taakkua palasinngorniat qaammatini 30-ni kursusertinneqartussat
ingerlaarput, taakkulu atuarnerat ingerlalluarpoq, tassalu kisianni soorunami
qaammatit 30-it kisikkutsigit tassaavoq ukiut pingajuat affaq ilinniarnertik
naammassigunikku maani 12-14-it eqqaaniittut palasinngorlutik
naammasisussaassapput, taavalu taassuma saniatigut ilannguteriarutsigit
Ilisimatusarfimmi atuarnerminnnik ingerlatsisut.
Taamani
aallarteqqaarnitsinninngaanniit isumalluarnerulernissatsinnut
pissusissaqarpugut, neriuppungalu aamma taamatut atuartitaaneq
ingerlaqqiinnassappat palasissaqarniarnerup tungaatigut ajornartorsiutigut
minnerulissapput. Malugissavarsi oqanngitsunga taamasa qaangissagivut, tassa
nalunngereerparput palaserpassuit ullumikkut utoqqalipput ukiullu ikitsunnguit
qaangiuppata soraarninngortussaassallutik.
Kisianni isumaqarpunga maani
suliarisimasagut massakkut aallartissimasut tunngavissiisut
isumalluarnerulersinnaanissatsinnik taannalu uatsinninngaanniit isigalugu
isumalluarnartorujussuuvoq.
Ajoqit pillugit apeqqutigisat
akereerakku taanna eqqarsaa.., kisianni tullia. Apeqqutigisarnut tunngatillugu
oqaatigerusuppara oqaluuserisassaq tulleq immikkoortoq 52 ilaatigut imaqarpoq,
aamma Atassumminngaannit oqaluttup apeqqutigisaanut, ajoqit allallu ilagiinni
sulisut pikkorissartinneqartarnissaannut tunngasut qanoq
pilersaarusiorneqarnersut. 52-mi tassani anguniarneqartoq unaavoq
siusinnerusukkut maani eqqartorneqareersimavoq seminaria pinnga toqqammavigalugu
tamakkua pikkorissartarnissaat, tassa pattattunngorniartut - tassa organistit,
taavalu ajoqit allallu atuartuusut immikkut tappikani inissinneqarnissaat
anguninarneqassasoq, tassanilu 52-mi immikkut siunnersuuteqarnitsinni
ammaanniagarput tassaavoq maanngaanniit inatsisitigut tunngavissagut
akuersaarneqassasut, tassa imaalillugit tappinnga pilersaarusiornitsinni
ilanngutissagipput ilagiinni sulisut pikkorissartuarnissaat angujumallugu,
tassa hĝjskolitut ilagiinnut tunngatitamik immikkoortortaqalernissaa
qulakkeerniarlugu suliniutitta ilagivaat, oqallisissap tullunnguuttut uuma
pineqarnissaani tikitassarput.
Taavalu kingulliullugu Anthon
Frederikseni. Tassa taakkua ilaatigut apeqqutigivat kordegn-it allallut tassa
illerfissornikkut ikiortit. Tassunga tunngasut ajoraluartumik ukiaq manna
angumerisinnaasimanngilagut inatsisitigut siunnersuuteqarfigissallugit,
kisianni massakkut suliaq ingerlavoq upernaamullu takkuttoqassaaq, soorlu
ilaatigut palasit allaffissornermik annertuumik ingerlataqarnerannut tunngasut,
annertoorujussuarmik palasit ataatsimiinertik tamaasa uagutsinnut
anngunneqartarput, taakkulu iluarsiissutissaannik eqqarsaatersuuteqarpugut
maannakkut, upernaamullu taanna Inatsisartut ataatsimiinnissaannut
saqqummiussissuteqarfigissallugu pilersaarusiorparput.
Isumaqarpunga aamma uani meeqqat,
tassami ilumoorpoq ajoqinik ilinniartitsinerit ingerlapput, aamma soorunami
ilinniartaanerat akisuvoq, tassanilu aamma isumaqarpunga akissuteqarfigereerlugu
uani Nuummi seminaria suleqatigalugu taakkua atorneqarsinnaanissaat aamma
isumannaarniarsarigatsigu ilaatigut aamma upperisarsiornermi atuarfinni
atorneqarsinnaaneri ilinniartitsisutuut, tassani puigorneqanngilaq
taamaalillugulu aamma ikkunniarsarineqarluni. Tassa inatsisissap uuma tullia
akuersaariarussiuk qularutissaassanngilaq ilagiinni sulisuusut
assigiin-ngitsutigut pikkorissartinneqartarnissaaasa ingerlanissaa
siunnerfeqarfigilissavarput aaqqitassanngorlugu.
Naggataatigut qujavunga
oqaaseqartunut tamanut taamatut tapersiilluarnissinnut, tassa taamaalilluni
aamma alloriarneq siulleq uani inissinneqarpoq soorunamilu
aappassaaneernissaanut pingajussaaneernissaatalu akornna apeqqutit
assigiinngitsut itisilerlugit paaserusunneqarpata soorunami aamma
pisortaqarfiga tassani ilaasssaq apeqqutit assigiinngitsut paatsunngassutigineqartut
akiniarneqarnissaassnut. Qujavunga oqaaseqartunut tamanut taamatut
tapersiuteqarnerinut.
Anders Andreassen, Inatsisartut
Siulittaasuat:
Qujanaq. Taamaalilluta ullumikkut
oqaluuserisassat immikkortuusut 35-at siullermeerlugu oqaluuserinera naammasigallarparput,
aammalu taamatut isikkoqarluni aappassaaneernissaminut ingerlaqqissalluni.
Oqaluuserisaq naammassivoq.