Kalaallit Nunaanni Inatsisartut

Oqaluuserisassani immikkoortoq 44-2		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Marlunngorneq 27. oktober 1998 nal. 13.40

 

Oqaluuserisassani immikkoortoq 44

 

Naartunermut, erninermut meeravissiartaarnermullu atatillugu sulinngiffeqarneq il. il. ullormusiaqarnerlu pillugit Inatsisartut peqqussutaata allanngortinneqarneranik Inatsi­sartut peqqussutissaannut siunnersuut.

(Inatsisartunut ilaasortaq Maliinannguaq Markussen Mølgaard, Isumaginninnermut suliffeqar­nermullu Ataatsimiittitaliap siulittaasua aamma Isumaginninnermut, Suliffeqarnermut Pisortallu Suliffeqarfiutaannut Naalakkersuisoq)

(Aappassaaneerneqarnera)

 

 

 

Ataatsimiinnermik aqutsisoq: Anders Andreassen, Inatsisartut Siulittaasuat.

 

Maliinannguaq Markussen Mølgaard, siunnersuuteqartoq:

Matumuuna siunnersuutiginiarpara nunatsinni juumuussaaleqinerujussuup kinguneranik naartusup qaammat sioqqullugu ilaquttani, uini meeqqanilu qimattariaqartarnerani ikiorsiivigine­qartarnissaat.

 

Tamatumani eqqarsaatigaara uiusup qanigisaasulluunniit piffissap ilaani erninerulluunniit nalaani ornigussinnaanissaata peqqinnissaqarfimmiit aningaasaliiffigineqarnissaa. Maannakkum­mi juumuussaaleqineq ima annertutigaaq kisitsisit kingulliit malillugit juumuut atorfeqartussat 23 akornanni arfiniliinnaat atorfeqavissuullutik.

 

Pissutsillu ukiuni kingullerni pitsanngoriartunnginnerat eqqarsaatigalugu ingerlaannaq aaqqis­sinnaanissaat ilimananngimmat pisariaqarpoq immikkut iliuuseqarnissaq. Naaratuneq-una erninerlu misigissuserpassuarnik nassataqartartoq. Taamaattumik pisaqarluinnarpoq naartusup toqqissisimasumik erninissaminut avatangiiseqarnissaa. Taamaattumik pisariaqarluinnarpoq nunatsinni ilaquttatik avatangiisitillu sungiusimasatik qimallugit erniartortariaqartartut qanigisa­minnik ilaqarsinnaanissaasa periarfissiunnissaat.

 

Naartusummi nammineq piumasarinngilaa allamut erninartornissani. Taamaattumik aappaasup qaningisaasulluunniit allap erninerulluunnit nalaani akiliunneqarluni ornigussinnaanissaa periarfissiunneqartariaqarpoq. Matumanilu kommunit akiliisarnissaat taakkartorumaneqassaga­luartoq, isumaqarpunga juumuussaaleqineq kommunit pisuussutiginngimmassuk taakku isumalluutigineqartariaqanngitsut. Ilisimaneqarpormi kommunit tamarmik aningaasatigut periarfissarissaanngilluinnartut.

 

Erninermi ernisup pisinnaatitaaffigisariaqarpaa minnerpaamik inummik qanigisaminik ataatsi­mik ilagineqarnissani. Aappatut illoqarfimmut allamut erniartortariaqartut allatut ajornartumik erninermi kingorna sulinngiffeqarnissartik atortariaqartarpaat ilaasalu allaat ferie-ssatik atortaria­qartarlugit. Tamanna akuersaarneqarsinnaanngilaq tassami illoqarfigisami ernisussaasut ilaat erninissartik tikivillugu sulisinnaasarput erninermi kingorna sulinngiffeqarnissartik atorluarusul­lugu.

 

Taamaattumik taamatut piumassuserinngisamik qaammat ataaseq sioqqullugu erniartortariaqar­nermi erninermi sulinngiffeqarnerup ferie-llu atorneqannginnissaat pisariaqarpoq. Juumuussaale­qineq pimoorullugu akiorniarneqartariqarpoq siunnersuutillu uku soorunami juumuussaaleqigal­larnermi atorneqarnissaat siunnersuutigaara nalunngilaralu aamma nunaqarfimmiorpassuit ukiorpassuarni taamatut atugaqarsimasut.

 

Taakku atugaasa pitsanngorsarneqarnissaat aamma matumani pineqarpoq. Meeqqat siunissatut taasarpavut ajunnginnerpaamillu inuunerat aallartinniarneqassappat sapinngisamik angajoq­qaanngortunut atugassarititaasut pitsaasuusariaqarput.

 

Finn Karlsen, Isumaginninnermut Suliffeqarnermullu Ataatsimiititaliap siulittaasua:

Naartunermi, erninermi meeravissiartaarnermilu sulinngiffeqartarneq il. il. ullormusiaqartarnerlu pillugit Inatsisartut peqqussutaata allanngortinneqarneranut Inatsisartut inatsisissaattut siunner­suut pillugu ataatsimiititaliap isumaliutissiissutaa saqqummiutissavara.

 

Ataatsimiititaliap Inatsisartut siullermeeralutik suliarinninnerata kingorna siunnersuut oqaase­qaatit ilanngullugit misissuataarpaa. Ataatsimiititaliap pitsaasutut isigaa Naalakkersuisuni ilaasortap siunnersuut ataatsimiinnermi matumani saqqummiummagu. Siunnersuummut tassunga tunuliaqutaasut ilaatigut ilagaat marlulisunut angajoqqaajusut naartunermi erninermilu sulinngiffeqartarnerisa sivitsorneqarnissaanik Inatsisartuni ilaasortamit siunnersuut siusinneru­sukkut Inatsisartuni oqaluuserineqareersoq.

 

Siunnersuutikkut anguniarneqarpoq angajoqqaat marlunnik amerlanerusunilluunniit piffissami ataatsimi qitornartaartut pissutsit atugarisaasa pitsaanerulersinnissaat. Tamannalu ataatsimiitita­liami isumaqatigiissumi tamakkiisumik isumaqatigineqarluni. Taamaammat ataatsimiititaliaq isumaqatigiissoq siunnersuummut pineqartumut isumaqataavoq. Taannami siullermik anaanaa­sup erninermi kingorna sulinngiffeqarnerani sapaatip akunnerini 14-iniit 18-inut sivitsuinissamik periarfissiimmat.

 

Aappassaanik periarfissiisoqarpoq angajoqqaat sulinngiffeqartarnerisa sapaatip akunnerinik arfinilinniit sapaatip akunnerini qulinut sivitsuinissamut. Taamaalilluni meeqqanut marlunnut amerlanerusunulluunniit ataatsikkut inunngortunut angajoqqaat sulinngiffeqarfiup sivitsuiffigi­neqarnera taanna pillugu ataatsimut atuisinnaanngussammata.

 

Taamatut oqaaseqarluni ataatsimiititaliaq isumaqatigiissoq inassuteqarpoq naartunermi, erniner­mi meeravissiartaarnermilu sulinngiffeqartarneq il. il. ullormusiaqartarnerlu pillugit Inatsisartut peqqussutaata allanngortinneqarneranik Inatsisartut inatsisissaattut siunnersuut maannatut isikkoqarluni Inatsisartuni suliarineqarnera ingerlaqqissasoq.

 

Mikael Petersen, Isumaginninnermut Naalakkersuisoq:

Naartunermi erninermi meeravissiartaarnermilu sulinngiffeqartarneq pillugu il.il. ullormusiaqar­tarneq pillugit Inatsisartut peqqussutaata allanguutissaatut siuunnersuut Inatsisartut Isumaginnin­nermut Suliffeqarnermullu Ataatsimiititaliaata suliarisimavaa.

 

Isumaliutissiissummi takuneqarsinnaavoq ataatsimiititaliap isumaqatigiissut angajoqqaat ataatsikkut marlunnik amerlanerusunilluunniit meerartaartartut atugaasa pitsaanerulersinneqar­nissaannik peqqussutissatut siunnersuutip siunertaa tapersersoraat.

 

Taamaalilluni pisuni taamaattuni anaanaasup erninermut atatillugu sulingiffeqartarnerata sap.ak. 14-iniit sap.ak. 18-inut sivitsorneqarnissaa tamatumalu 1999-imi januarip aallaqqaataa aallarner­figalugu atuutilernissaa ataatsimiititaliap isumaqatigiissut isumaqatigaa.

 

Aammattaaq anaanaasup erninermut atatillugu sulinngiffeqareernerata kingorna angajoqqaat sulinngiffeqartarnerata peqqussummi atuuttumi angajoqqaanut ataatsimik amerlanerusunik ataatsikkut meerartaartunut sap.ak. arfinilinnik sivisussuseqartup sap.ak. qulinut sivitsorneqar­nissaa ataatsimiititaliap isumaqatigiissut aamma tapersersorpaa.

 

Ataatsimiititaliap oqaaseqaatai Naalakkersuisut isumaqatigaat, tamannalu tunngavigalugu naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaata allanguutissaatut siunnersuutip massakkuttut iluseqarluni pingajussaaneerneqarnissaaminut ingerlateqqinneqarnissaa Naalakkersuisut inassutigaat.

 

Inatsisartunut ilaasortap Maliinannguaq M. Mølgaardip ernisussiortunik amigaateqarnerujussu­armut atatillugu naartusut qaammammik sioqqutsillutik ilaquttaminnit uiminnit meeqqaminnillu qimatsisariaqartut ikiorsiiffigineqarnissaannik siunnersuuteqarpoq.

 

Siunnersuut naartunermi, erninermi meeravissiartaarnermilu sulinngiffeqartarneq il.il. pillugit Inatsisartut peqqussutaata allanguutissatut siunnersuutip suliarineqarneranut atatillugu suliarine­qartussanngorlugu Inatsisartut Siulittaasoqarfiannit siunnersuutip aappassaaneerneqarnerani oqaluuserisassatut innersuussutigineqarsimavoq.

 

Siunnersuummi oqaatigineqarpoq aappaasup qanigisaasulluunniit allap angalanermini akiliunne­qartarnissaa eqqarsaatigineqartoq, tassami naartusup toqqissisimanartumik avatangiiseqarluni uninnganissaa pingaartuummat. Aallarnissaq naartusup nammineq piumasarinngikkaa tikkuarne­qarpoq, ernisussiortussaaleqinerli pisut ilarpassuinit tamanna pisariaqalersittaraa.

 

Naggataatigullu arnat nunaqarfimmiorpassuit ukiorpassuarni taamatut atugaqartariaqartarsima­nerat tikkuarneqarpoq, taakkulu atugaasa pitsanngorsarneqarnissaat aamma siunnersuummi pineqartoq oqaatigineqarluni.

 

Napparsimasut najukkami napparsimavigisap avataani misissugassanngorlugit katsorsartussann­gorlugillu innersuunneqartarnerat pillugu malittarisassat massakkut atuuttut Peqqinnissaqarfiup kaajallaasitaani nr. 8-mi, 29. Marts 1995-imeersut tunngavigalugit napparsimasut peqqinnissa­mut tunngasunik ilinniagaqarsimanngitsunik ingiaqateqartinneqarnissaannut ukununnga akilius­sisoqarsinnaavoq:

 

Meeqqat aqqaneq-marluk inorlugit ukiullit angajoqqaanit qanigisatulluunniit ilaqutaasumit ingiaqatigineqarsinnaapput. Kiisalu inuunermik ulorianartorsiortoqartillugu kiisalu aamma minnerunngitsumik meeqqat marluk inorlugit ukiullit suli anaanaminnit miluttut anaanaminnit ingiaqatigineqarsinnaapput.

 

Siunnnersuut saqqummiunneqartoq aningaasartuutinik nassataqartussaavoq, aningaasartuutaa­sussat naatsorsorneqarsinnaassappata pisariaqartitsinerup annertussusia misissorneqartariaqar­poq. Tamatumalu saniatigut siunnersuutip pisariaqartitatigut allatigut assersuutigalugu akissarsi­at annaasat taarsiissutigineqarnissaannut il. il. sunniuteqarsinnaanerat misissuiffigineqartariaqar­luni.

 

Siunnersuutip aningaasatigut inatsisilerinikkullu kingunerisassaanik peqqinnissaqarfiup isuma­ginnittoqarfiullu suleqatigiinnerisigut misissuisoqarnissaa Naalakkersuisut piareersimaffigaat.

 

Ruth Heilmann, Siumup oqaaseqartua:

Naartunermi, erninermi meeravissiartaarnermilu sulinngiffeqarneq il. il. ullormusiaqartarnerlu pillugit Inatsisartut peqqussutaata allanngortinneqarneranik Inatsisartut inatsisissaattut siunner­suutip aappassaaneerneqarnissaanik Inatsisartuni isumaginninnermut suliffeqarnermullu ataatsimiititaliamit Siumumit siunnersuuteqarnerput aallaavigalugu isumaliutissiissut saqqum­miunneqartoq Siumumiit tamakkiisumik tapersersorparput.

 

Angajoqqaat marlulisut amerlanerusunilluunniit qitornisut taamaalillutik ullumikkorninngarnit atugarissaarnerulernissaminnik periarfissaqalerput. Tassa sapaatip akunnerinik sisamanik amerlineqartussamik kinguneqartumik inatsiseqalissammat. Siumumiit pingaartitaraarput sapinngisamik angajoqqaat mikisuutillit qitornaminnut qanimut malittarinninnissaat periarfissa­qartillugulu annertusaavigineqartuarnissaasa anguniartuarnissaa, soorlu aamma taama Naalak­kersuisoq akissuteqarnermini tapersiinini tamakkiisoq ersarissaraa tamanna Siumumiit iluarisi­maarlugu qujassutigaarput.

 

Taamaattumik Siumumiit taamatut oqaaseqarluta inatsisissap taamatut isikkoqarluni pingajus­saaneerneqarnissaanut ingerlaqqinnissaa innersuussutigaarput. Kiisalu uunga taputartuunneqar­toq Inatsisartunut ilaasortap Maliinannguaq Markussen Mølgaard-ip ernisussiortunik amigaate­qarfiusuni illoqarfimmut nakorsaqarfiusumut ernisussiortoqarfiusumulluunniit erniartortitaasa­lernerisa kingunerisaanik ilungersunartunik ilaqutariit atugaqartarnerat saqqummiussaa paasillu­arparput.

 

Erninermi imaannaanngitsuuvoq annertuunik misigissutsinik aalassatsitsisarmat taamaattumik tamanna iluarsiiviginiarlugu annertuumik iliuuseqarnissamik tassuunakkut kaammattuuteqarluta tassami angerlarsimaffimmi sungiusimasami erninissaq meeqqamut anaanaasumut ilaqutariin­nullu toqqissisimanarnerpaallunilu peqqinnarnerpaasarmat.

 

Taamatut tassunga naatsunnguamik oqaaseqarluta Isumaginninermi Naalakkersuisup akissutaa tusaatissatut tiguarput.

 

Jakob Sivertsen, Atassutip oqaaseqartua:

Peqqussutissatut siunnersuut siullermeerlugu oqaluuserineqarmat Atassummit allannguutissamik saqqummiussaqarsimanngilavut.

 

Aamma oqaatsivut maanngaanniit nangeqqinnianngilavut. Kiisalu Inunnik Isumaginninnermik Ataatsimiititaliami peqqussutip allanngortinneqarnissaa saqqummiunneqarmat aamma suliarine­qarmat ataatsimiititaliami ilaasortat tamarmik isumaqatigiissimapput. Taamaattumik annertu­nerusumik Atassummiit oqaaseqarfigissanngilarput.

 

Maliinnannguaq Markussen Mølgaard-ip siunnersuutaanut ilassuteqaataasoq Atassummit annertunerusumik ilassutissaqartinngilarput, Naalakkersuisup akissutaa sukumiisut erseqqissut maanngaanniit oqaatigineqartut naammattutut isumaqarfigigatsigik.

 

Taamatut naatsumik oqaaseqarluta peqqussutissamut allannguutissaq saqqummiunneqartoq taamatut isikkoqarluni pingajussaanut ingerlaqqinnissaa Atassummit akuersaarlugu taaseqataaf­figissavarput.

 

 

Lars Sørensen, Inuit Ataqatigiit oqaaseqartuat:

Naartunermi, erninermi meeravissiartaarnermilu sulinngiffeqartarneq il.il. pillugit ullormusiaqar­tarneq pillugit Inatsisartut peqqussutaata allannguutisaatut siunnersuutip siullermeernerani oqaaseqaativut innersuussutigalugit Inatsisartut Isumaginninnermut Ataatsimiititaliaata isumaqa­tigiissup isumaliutissiissutaa Inuit Ataqatigiit tamakkiisumik isumaqatigigatsigu oqaatigissavara.

 

Taamaattumik peqqqussutissamut siunnersuut taamatut isikkoqarluni pingajussaaneerneqarnis­saminut ingerlaqqinnissaanut akuersaarluta taasissaagut.

 

Inuit Ataqatigiit nuannaarutigaarput Inatsisartunut ilaasortap Maliinannguaq Markussen Mølgår­dip siunnersuutaanut Nalakkersuisut siunnersuutip aningaasatigut inatsisilerinikkullu kinguneri­sassaanik Peqqinnissaqarfiup Isumaginnittoqarfiullu suleqatigiinnerisigut misissuisitsisoqarnis­saanik siunniussaqarmata. Taamaattumik Inuit Ataqatigiinniit naatsorsuutigaarput misissuiso­qareerpat siunnersuut Inatsisartuni saqqummiunneqaqqissasoq isummerfigineqarlunilu.

 

Anthon Frederiksen, Kattusseqatigiit:

Suliap siullermmerneqarnerani oqaaserisakka innersuussutigissavakka, aammalu oqaatigisaria­qarpara siullermeerinninermi marlulisunut tunngatillugu inatsisip paragrafia aalajangersimasoq uparuarsimagakku matumani Ataatsimiititaliap eqqaaqqinngimmagu qanoq tamanna kingune­qarumaassanersoq, ksiianni tassa paasivara allangortinniarneqarsimanngitsoq.

 

Taavalu Inatsisartunut ilaasortap Maliinannguaq Markussen Mølgaardip siunnersuutaanut tunngatillugu siunnersuut paatsoorneqarsinnaanngilluinnartoq ersarissorlu maani saqqummiun­neqarmat uggorivara matunami siunnersuummi allannguutissatut siunnersuuteqartoqanngimmat, tassami periarfissaq taanna Inatsisartut suleriaaserput naapertorlugu suliap aappassaaneerneqar­nerani allaganngorlugu allannguutissatut siunnersuuteqartoqarsinnaagaluarmat, tassa periarfissaq taanna maannakkut Peqqinnissaqarfimmi ajornartorsiutit annertuut eqqarsaatigalugit ullutsinni pisalersoq aammalu ilaqutariippassuarnut meerartaartussanullu annertuumik attuisoq pingaarute­qarluinnartoq kinguarsinneqarsinnaanngitsutut uanga tunginninngaanniit nalilerakku, tassa pissutsit massakkorpiaq taamaammata.

 

Taamaattumik aappaatigut Naalakkersuisup akissuteqarnera qujarutiinnartariaqarpoq, tassa taassumap aningaasatigut inatsisilerinikkullu kingunerisassaanik Peqqinnissaqarfiup Isumagin­nittoqarfiullu suleqatigiinnerisigut misissorneqarnissaa Naalakkersuisup eqqaammagu nuan­naarutigisariaqarpoq, kisianni tassa nukinginnaraluarpoq suliassaq taamaattoq, aamma misigis­sutsitigut assigiinngitsutigut attuisuummat sulisoqarnerullu tungaatigut annertuumik ilaatigut sunniuteqartalereersimalluni.

 

Taamaakkaluartoq suliap aappassaaneerneqarnerani soorunami aamma pissutsit allat eqqarsaati­galugit aaqqiinissami siunnersuut, tassa sulinngiffeqartarnerup meeravissiartaarnermut aammalu erninermut atatillugu sivitsorneqarneranut soorunami taaseqataassaanga.

 

Mikael Petersen, Isumaginninnermut Naalakkersuisoq:

Partiininngaanniit Kattusseqatigiinniillu oqaatigineqartunut qujaannassaanga, taamaalilluni peqqussutissatut siunnersuutigineqartut taakkua pingajussaaneerneqarnissaminnut piareertutut oqaatigineqarsinnaanngorput.

 

Inatsisartunut ilaasortap Maliinannguaq Markussen Mølgaardip siunnersuutaanut tunngatillugu Kattusseqatigiinninngaanniit oqaatigineqartut oqaaseqarfigilaarusuppakka. Tassa ullumikkut inatsisitigut aningaasatigullu periarfissat naapertorlugit soorunami isumaginninniartoqartarpoq isumaginninnermut allaffeqarfiit aqqutigalugit. Minnerunngitsumik nunaqarfimmiut illoqarfin­nut erniartortarnerat eqqarsaatigalugu meeraasut isumagineqartarnerat allallu eqqarsaatigalugit.

 

Kisianni ilumoorpoq annertuumik ullumikkut tassuuna suli amigaateqaratta inatsisitigut aamma­lu aningaasalersuinissakkut isumaqatigiissutissat inissinneqartariaqartut pillugit. Taamaattumik Naalakkersuisuninngaanniit isumaqarpunga paatsuugassaanngitsumik oqaatigigipput taanna taakkunuunatigut misissuinissarput Peqqinnissaqarfik peqatigalugu ingerlatissavarput ullumik­kut inunnik isumaginninnikkut aamma pisussaaffigigatsigu taamatut inissisimalersartut pitsaa­nerpaamik atugaqartinnissaat siunertaralugu sulissalluta.

 

Peqqinnissaqarfiup aningaasatigut akisussaaffii kiisalu Inunnik Isumaginnittoqarfiup aningaasa­tigut akisussaaffii taakkua tamatigut akuliutitittassanngilagut, neriuppunga eqqaamajuartariaqari­vut isumaginninnikkut aningaasartuutissavut Isumaginnittoqarfiup isumagissavai peqqinnissak­kut katsorsaanermi isumagisassat Peqqinnissaqarfiup aamma akilissavai. Taamaattumik neriup­punga taakkua imminnut ilaqutsillugit pinaveersaassasugut aamma matumani taakkua pillugit oqallikkaangatta.

 

Naggataatigut qujassutigeqqippara peqqussutissatut siunnersuut taamaalillugu ilassilluarneqar­mat.

 

Maliinannguaq Markussen Mølgaard, Inuit Ataqatigiinniit siunnersuuteqartoq:

Qujanaq. Naalakkersuisut akissutaannut qujavunga aammalu nuannaarutigaara siunnersuutima ajattorneqarnani kisianni misissuiffigineqarnisaa siunniunneqarmat.

 

Tassami ajornartorsiut imaannaanngitsuuvoq aammalu una ajornartorsiutit ilagisaat tassaavoq massakkut qaammat sioqqullugu aallartariaqarnermi allaat erninerup kingorna sulinngiffissaqar­nissaraluit tassani atortariaqartarneri isumaqarpunga pissusissamisuunngilluinnartut, aammalu allaat feeriassatik tassani atortariaqartarnissaat aamma ilaatigut oqaatigineqarsimammat oqaloqa­tigisatta ilaannit taanna isumaqarpunga aaqqiivigineqartariaqartoq, tassami meeqqap inunngor­nerata kingorna naalungiarsunnguuneraninngaanniit sivisunerpaamik najornissaa aammalu milutsinnissaa oqaatigineqartuarput pisariaqavissorlu aamma meeqqap siunissaanut.

 

Taamaattumik aaqqiiniartoqartariaqarpoq aammalu soorunami taassuma avataatigut aningaasat uani aporfiummata aamma paasinarpoq qanoq annertutigisut pisariaqartinneqarnersut tassani misissorniarneqarmat. Aammalu uani oqilisaaffiusinnaasut immaqa takorloorneqarsinnaavoq aqqutaannaataluunniit inummut ataatsimut najuukkiartorsinnaasumut tapiissuteqarsinnaaneq. Tamannami aamma oqilisaataasussaavoq erniartortumut.

 

Soorunalimi aamma juumuussaaleqinerup akiornissaa tassani qitiulluinnarpoq. Aammalu matumani eqqarsaatinut ilannguttariaqartut ilagisariaqarpaat, ullumikkut juumooqarmat soraar­ninngorsimasunik. Taakkuli immaqa aamma ikiuussinnaagaluarput pisinnaasortaat soraarninn­goreersimagaluarlutik. Kisianni ilaasa aarleqqutigisarpaat taakkua ikiuunniarunik immaqa utoqqalinersiaminnik ilanngaavigineqarnissartik imaluunniit arlaatigut tassuunakkut arsaartorne­qarnissartik.

 

Apeqqutit assigiinngitsut ujartorneqarsinnaapput aammalu juumuussaaleqinerup annertunerujus­sua isumaqarpunga aamma suli eqqarsaatersuutigineqartariaqartoq ilinniartitaanikkut nunatsinni ilinniarfitta peqqissaasut ilinniarfiata suli atorluarnerullugu aamma juumuussaaleqinermut akiuiniarnermut siunissami atornissaa pisariaqartoq immikkut aningaasaliissuterpassuit siunissa­mi pissanngikkutsigik.

 

Qujavunga partiinut tamanut tapersersuisunullu.

 

Anders Andreassen, ataatsimiinnermik aqutsisoq:

Taavalu taasissagut. Isumaginninnermut Sulisoqarnermullu Ataatsimiititaliap isumaqatigiissup isumaliutissiissutaa taamatut isikkoqarluni pingajussaaneernissaanut akuersisut nikueqqussavak­ka: 30.

 

Tassalu isersimasut tamarmik, akerliullunilu taasinngitsoortoqanngilaq.

Taamaalilluni suliap pingajussaaneernissaminut ingerlaqqissinnaanngorpoq.

 

Oqaluuserisaq naammassivoq.