Oqaluuserisassani immikkoortoq 48-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Anders Andreassen, Inatsisartut Siulittaasuat:
Jakob Sivertsen, Niueqatigiinnermut Ataatsimiititaliap siulittaasua:
Inatsisartut Niueqatigiinnermut Ataatsimiititaliaata nunami inuussutissarsiutinut aningaasalersuinikkut tapersiisarneq pillugu Inatsisartut inatsisissaannut siunnersuut suliaraa.
Ataatsimiititaliap siunnersuut Naalakkersuisunit saqqummiunneqartoq isumaqatigaa, ilutigitilluguli tassunga tunngasunik ima oqaaseqaateqarumavoq.
' 7, imm. 2 naapertorlugu piumasaqaatigineqarpoq qularnaveeqqusiinermi suliniut suliamik ilisimasalimit aningaasaqarnikkut isumatuumik naammassinneqarsinnaasutut naliliiffigineqarsimassasoq. Tassunga tunngatillugu ataatsimiititaliap oqaatigissavaa qularnaveeqqusiinermi pingaartinneqartariaqartoq suliniutip aningaasaqarnikkut sinneqartoorutaasinnaanerata ilimagineqarnissaa.
Qularnaveeqqusiussat qaqugukkut akilerneqartarnissaannut apeqqut ataatsimiititaliap tullertut naliliiffigaa, siunnersuummi ' 9. Naalakkersuisuni ilaasortamik isumasioqateqareernermi ataatsimiititaliap maluginiarpaa aalajangersakkanik taama ittumik ilanngussinermi eqqarsaatigineqartoq qularnaveeqqusiinermut atasumik taarsigassarsianik akilersuinermi uniuisoqarneratigut taarsigassarsisitsisup taarsigassarsisitsinerminik taamaatitsinnaanera.
Tassunga atatillugu ataatsimiititaliaq isumaqarpoq suliniut pineqartoq ingerlaqqissinnaajunnaavissorinaraangat aatsaat qularnaveeqqusiissutip akilerneqartarnissaa sapinngisamik anguniarneqartariaqartoq. Naalakkersuisut kaammattorneqarput Inatsisartut inatsisaannik aqutsinerminni tamatumunnga peqataassasut.
Naggasiullugu oqaatigineqassaaq ataatsimiititaliap siunnersuummik suliaqarnermini misissorsimagaa kommunit inuussutissarsiutinut tapersiissuteqarnissaminnut qanoq periarfissaqarnersut. Tassunga atatillugu ataatsimiititaliap maluginiaqquaa kommunit inuussutissarsiutini aningaasaleeqataasinnaanissaat pillugu Inatsisartut inatsisaat naapertorlugu tamanna periarfissaqartinneqartoq.
Taama ataatsimiititaliaq oqaaseqarluni Inatsisartut nunami inuussutissarsiutinut aningaasalersuinikkut tapersiisarneq pillugu Inatsisartut inatsisissaannut Inatsisartunit aappassaaneerlugu suliarineqarnissaanut tunniuppaa.
Ataatsimiititaliami ilaasortaapput:
Ruth Heilmann, Siumut
Karl Lyberth, Siumut
Manasse Berthelsen, Inuit Ataqatigiit
Finn Karlsen Jakob Sivertsenilu Atassummiit
Pâviâraq Heilmann, Aalisarnermut, Piniarnermut, Inuussutissarsiornermut Nunalerinermullu Naalakkersuisoq:
Niueqatigiinnermut Ataatsimiititaliap isumaliutissiissutai Naalakkersuisut isumaqatigilluinnarpaat, inatsisillu allaffissornikkut aqunneqarnera pillugu ataatsimiititaliap kaammattuutaa malinniarlugu.
Inuussutissarsiutigalugu suliffeqarfinnut kommunit aningaasaliissuteqarsinnaanerat ataatsimiititaliamit eqqartorneqartoq inatsimmut matumunnga tapertaasutut isigineqarsinnaavoq, soorlu tamanna nunami inuussutissarsiutinut aningaasalersunikkut tapersiisarneq pillugu isumaliutissiissummi, inatsimmut matumunnga tunngaviusumi ersertoq.
Tamanna tunngavigalugu siunnersuutip massakkutut isikkoqarluni pingajussaaneerneqarnissaminut ingerlateqqinneqarnissaa Naalakkersuisut inassutigaat.
Lars Karl Jensen, Siumup oqaaseqartua:
Nunami inuussutissarsiutinut aningaasalersuinikkut tapersiisarneq pillugu Inatsisartut inatsisissaannut siunnersuummut atatillugu Inatsisartut Niueqatigiinnermut Ataatsimiititaliaannit isumaliutissiissut, Naalakkersuisunit tamakkiisumik taperserneqartoq Siumumiittaaq isumaqatigigatsigu, inatsisissap siullermeerlugu oqaluuserinerani oqaaseqaatigut innersuussutigalugit tapersersuinerput matumuuna nalunaarutigeqqissavarput.
Periarfissaq manna iluatsillugu nunatsinni inuit, pingaartumik inuusuttut, nammineerlutik suliffeqarfimmik aallartitsisinissaminnik eqqarsaateqartut imaluunniit pioreersunik ingerlatitseqqinnissaminnik piukkuttut, Siumumiit kajumissaassavagut aningaasatigut ileqqaagaqarnissamik aammalu nangaanatik periarfissaalersussat tamakkua atorluarniaqqullugit.
Naggataatigut Siumumiit piumasarissavarput inatsisit taakkartukkagut piviusunngortinneqariarpata aqqutissat assigiinngitsut atorlugit annertuumik tamakkua pillugit paasissutissiinernik ingerlatsisoqarnissaa.
Taamatut oqaaseqarluta Naalakkersuisut inassuteqaataat taperserlugu pingajussaaneerneqarnissaanut ingerlatinneqarnissaa Siumumiit akuersaarparput.
Siverth K. Heilmann, Atassutip oqaaseqartua:
Niueqatigiinnermut Ataatsimiititaliap
isumaliutissiissummini '' 7 aamm 9-mut innersuussutaa
Naalakkersuisuniit paasilluarneqarluni suliniutigineqarnera Atassummiit
tamakkiisumik taperserparput.
Inatsisissaq Atassummiit arlaleriarluta
piviusunngortinneqarnissaa kaammattuutigisarsimavarput, matumuunalu
piviusunngortinneqalernera Atassummiit qujarullugu tiguarput, neriulluta innuttaasunit
atorluarneqarluni nunami suliffinnik amerlanerusunik siunissami
pilersitsisoqarsinnaajumaartoq.
Taama naatsumik oqaaseqarluta Atassummiit
taamatut isikkoqarluni pingajussaaneerlugu ingerlaqqinnissaanut akuersaarluta
taaseqataaffigissavarput.
Manasse Berthelsen, Inuit Ataqatigiit oqaaseqartua:
Inuit Ataqatigiinninngaanniit
Niueqatigiinnermut Ataatsimiititaliap Naalakkersuisullu akissutaa naatsumik
oqaaseqarfigissavagut.
Niueqatigiinnermut Ataatsimiititaliaq
qujassuteqarfigissavarput siullermeeratta ujartorsimasagut ataatsimiititaliami
sukumiisumik suliarisimammatigit, kiisalu qularnaveeqqutitut qaqugukkut qanorlu
ilinikkut tunniunneqartarnissaa ujartorsimasarput imatut naaperiarsimammassuk,
tassa Naalakkersuisoq peqquneqarluni allaffissornikkut ersarissarneqassasoq,
qaqugukkut qularnaveeqqusiineq tunniunneqartassanersoq.
Taamatut oqaaseqarluta inatsisissap
aappassaaneernissaanut akuerseqataassaagut.
Anthon Frederiksen, Kattusseqatigiit:
Suliap siullermeerneqarnerani oqaaseqaatikka
innersuussutigalugit maannamut saqqummiunneqartut ilanngullugit akuersaarlugit
taaseqataassaanga.
Pâviâraq Heilmann, Aalisarnermut, Piniarnermut,
Inuussutissarsiornermut Nunalerinermullu Naalakkersuisoq:
Qujanaq.
Partiit Kattusseqatigiillu tamaasa
matumuuna qutsaviginiarpakka pingajussaaneernissaanut ingerlateqqinnissaanut
inatsisissap akuerimmassuk.
Taavalu Siumukkormiut oqaaseqartuanut Lars
Karl Jensenip inassutaa, tassa inuusuttut kajumissaarlugit periarfissamik
atorluaaniaqqullugit, taanna Naalakkersuiniit isumaqatigilluinnarparput, tassa
aamma sillimmartaarnissaat namminneq aamma aallarniutissaminnik
katersinissaminnut aallartereerlutik.
Taavalu inatsisissaq akuerineqariarpat
pingajussaaneereerlugu, taava aamma soorunami Naalakkersuisuniit periarfissap
avammut nittarsaannissaa isumagissavarput.
Anders Andreassen, Inatsisartut Siulittaasuat:
Taavalu
taasissaagut, taasissutigitissavara immikkoortoq 48 aappaassaaneerneqarnermisut
iluseqarluni pingajussaaneernissaanut akuersisut nikueqqussallugit: 29.
Akerliusut: 0. Taaseqataanngitsut: 0. Taamaalilluni immikkoortup 48-p
aappassaaneerlugu oqaluuserineqarnera naammassivoq, taavalu
pingajussaaneernissaminut aamma ingerlaqqissalluni.