Oqaluuserisassani immikkoortoq 61 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermi aqutsisoq: Anders
Andreassen, Inatsisartut
Siulittaasuat.
Lars Karl Jensen, siunnersuuteqartoq, Siumut:
Siullittaasoq qinnuvigissavara
naalisaajumallunga ukua tamarmik pereernikuummatsigit. Siunnersuutigisanni
aallaavigivara nunatsinni immikkut ilinniarsimasunik sulisoqartarnerup iluani
naalagaaffigeqatigiinnerup iluani sulisussarsiortarnerni maannakkumut
ingerlaasiusartoq, isumaqarama qanga
KGH -ip GTO-llu nalaani periaasiusunik nangitsineruinnartoq naak
namminersornerulernitta kingornatigut ukiut 20-it ingerlagaluartut.
Ilisimaneqartutut sulisussat immikkut
ilinniagaqarsimasut maannakkumut pisariaqartippavut, aammalu suli siunissami
pisariaqartittussaallutigit. Sulisussarsiortarnermi immaqa qerattarsaasartutut
taaneqarsinnaasut tassaapput nunatsinnut suliartortussat tamatigut
piumaffigisarpavut nunatsinnut nuukkallarnissaannik, ilisimasakka nalunngisakkalu
najoqqutaralugit maannakkut ukiuni pingasuni sulinermut
isumaqatigiissuteqartarneq aallaaviusarpoq, isumaqarpungalu tassuuna
ilaqutariit soorlu Qallunaat Nunaanni sulisussarsiarineqarsimagunik imaluunniit
nunatsinnut suliartorniarunik atugarisaatigut ilaatigut annertuumik
nammatassittarigut, tassami ilai sungiusimasatik qimavillugit
qimakkallartarpaat allaallu illutik imaluunniit aamma inissiat nammineq
pigisatik tunigallartariaqartarlugit marloriaammik marloqiusamillu
akilesuinissaq akissaqartinnginnamikku.
Uani siunnersuuteqarninnut taamatut
oqallisissiamik erserseqqaassavara ataqqilluinnarakku sulinermi
isumaqatigiissutaasut Kattuffiit aammalu Namminersornerullutik Oqartussat
imaluunniit pisortat allat isumaqatigiissutaasa maannakkumut atuunnerat taanna ataqqilluinnangarivara aammalu
allangortinneqarnissaat uani
anguniarnagu, kisianni nalunngilara partiit Kattusseqatigiillu namminneq
tamakkua isummerfigisussaagaat uani siunnersuuteqarnera aallaavigalugu. Uani
oqarpunga siunnersuutigisanni naalagaaffigeqatigiinnerup iluani innuttaasut
atugarisamikkut oqalisaaaffigineqarnissaat ujartorlugu, taamatut oqarninnut
tungavigisara tassaavoq aatsaaginnaq siuliani oqaatigisattuut maannga
nunatsinnut nuuvinneq ajormata amerlanerit, suliartuinnartarmatali ukiut
pingasut taamaallaat aallaavigalugit, kisiannili taamaakkaluartoq inooriaatsikkut
allanguerujussuarnermik aammalu taakkununnga ilaqutariinnut aningaasatigut
nammakkiissuutaasartunik kinguneqarsinnaanerat takorloorsinnaagakku.
Minnerunngitsumimmi aamma maana
suliffeqaleraangaasa nunatsinni pittuttorfigisarpavut/pisussaaffigisarpavut
inissaqartinnissaat, meeraqarpata meeraasa meeqqerivinni najugaqarnissaat
kiisalu aamma amerlanertigut sulisussarsiarineqartoq ataasiinnaagaluartoq aamma
tamatigut kissaatigineqartarpoq taakkuninnga suliartortuninngaanniit aappaasup
aamma suliffissaqartinnissaa. Taakku ataatsimut isigalugit oqallisissiara
maani saqqummiussara neriuppunga oqallisigilluarneqassasoq aammalu partiit
saqqummiussassaat qilanaarivakka.
Taamatut naalisarlugu
saqqummiutilaaginnarpara.
Daniel Skifte, Aningaasaqarnermut Ineqarnermullu Naalakkersuisoq:
Hr. Lars Karl Jensenip siunnersuutaa
naalakkersuisut isumaat malillugu pissutsinut marlunnut tunngassuteqarpoq. Siullermik
nunatsinni sulisitsisunut sulisartullu kattuffiinut tunngassuteqartunut
attuumassuteqarpoq. Aappaatut Danmarkimi nunatsinnilu isumaginninnikkut ikiorsiiffigineqarnissamut
pisinnaatitaaffiit assigiinngissutaannut tunngassuteqarpoq. Taakkulu naalagaaffeqatigiinnermi
illuatungeriinnit oqallisigineqartariaqarput, tassa sulisussarsiortarnermik
ajornartorsiutaasut suliamik ilinniagaqarsimasunut nunatsinniikkallartunut
pingaartumik inuuniarnikkut atugassarititassaasut oqilisaaffigineqarnerisigut
aaqqiiviginiarneqassappata.
Kingulleq oqaaseqarfigalugu
aallaqqaatigissavara. Naalakkersuisut isumaqarput sulisussarsiortarnermik
ajornartorsiutit taamaallaat suliamik ilinniagallit ilaqutaasalu
nunatsinniikkallartartut inuuniarnikkut atugarisaasa oqilisaaviginerisigut
aaqqiivigineqartariaqanngitsut. Assigiinngissitsinissamik tunngaveqarnermut
akerliussaaq Namminersornerullutik Oqartussat pisortatut, oqartussaasutut
sulisitsisutullu innuttaasut sulisullu aalajangersimasut innuttaasup
sulisinnaasulluunniit naalagaaffeqatigiinnermi sumi inunngorsimanera
aallaavigalugu assigiinngitsumik pisalissagaluarpatigit.
Hr. Lars Karl Jensenip siunnersuutaa aamma
nunatsinni sulisitsisut sulinermillu inuussutissarsiuteqartut kattuffiisa
susassaqarfigisaannut attuumassuteqarpoq. Illuatungeriillutik isumaqatigiinniartartut
tassaapput isumaqatigiinniartarnertigut akissarsiat sulinermilu atugassarititat
aalajangersarnissaannut akisussaasut, taamatuttaaq suliniutinik
aallartitsisassallutik sulisussarsiortarnermut siuarsaataasinnaasunik
sulisorisallu sulisoriinnarnissaannik sunniuteqarsinnaasunik.
Pisortani, tassa Namminersornerullutik
Oqartussani kommuninilu, atorfilinnut isumaqatiginninniarsinnaatitaaneq
1991-imi Namminersornerullutik Oqartussanit tiguneqarmat nunatsinni
naalakkersuisut annertuumik
sulissutigaat sumi inunngorsimaneq tunngavigalugu assigiinngisitsinitoqqap
kinguneranik assigiinngissutit peerneqarnissaat, tamannalu anguneqarpoq.
1991-imi isumaqatigiinniarnerni sumi inunngorsimaneq tunngavigalugu
assigiinngisitsinerit pingaaruteqarnerusut atorunnaarsinneqarput. Tamatuma
kinguneraa nunaqavissut tikisitallu ilinniakkanut tunngatillugu assigiinnik
periarfissallit suliallillu tamakkiisumik naligiissinneqalernerat, taamatuttaaq
nunaqavissunut tikisitanullu akiliutissanik katersereerluni
sulinngiffeqartarnerni angalasinnaatitaanerit, atorfininnermut soraarnermullu
atatillugit angalanerit kiisalu pigisat nuunneqarsinnaatitaanerat
eqqarsaatigalugit. Pisinnaatitaaffiilli taakkua pissarsiarissagaanni
piumasaqaataavoq ukiut pingasut sulereersimanissaq, tassa siusinnerusutut
ukiut marluk sulereersimanissaq atorunnaarsillugu.
Pisinnaatitaaffiit tamakku nutaat 1991-imi
apriilip aallaqqaataaniit nutaamik atorfinittunuinnaq sunniuteqartussaanerisa
saniatigut 1991-imi isumaqatiginninniarnertigut tikisitat siusinnerusukkut
pisinnaatitaaffiinik atorunnaarsitsinikkut aningaasanik ileqqaartoqarpoq.
Ileqqaakkat taakku nunaqavissut tikisitatulli pisinnaatitaaffeqalernerisa
aningaasartuutitaannut matussutissan-ngortinneqarput. 1991-imi
isumaqatiginninniarnertigut pisinnaatitaaffiit pineqartut aamma nunaqavissunut
atuutitilerneqarnissaannik naalakkersuisut kisaatigisaat anguneqarput.
Aammattaaq pisortat sullissiviini naalakkersuisut akissarsiaqartitsinikkut
sulinermilu atugassatigut ingerlatseriaaseqarnerat atuuppoq, tassa pisortat
qanittoq ungasinnerusorlu eqqarsaatigalugit
suliassaatimik naammassineqartarnissaannut pisariaqartitanik
atorfinitsitsisarlutillu, atorfeqartitsiinnarniarlutillu sulisunik
inerisaanissaat taakkununnga atuummat. Kiisalu sulisut akissarsiaqartinneqarneranni
nunatta aningaasaqarnermigut nammassinnaasai tamatumalu naapertuilluartutut
misissorneqarnissaa tunngaviupput.
Akissarsiaqartitsinermi sulinermilu
atugassaqartitsinermi pingaarnerutillugit anguniakkat taakku tunngavigalugit
1997-imi isumaqatiginninniarnerni naalakkersuisut
atorfinitsitsiniartarnerminnik perrassaajumallutik sulisut pisariaqartitat sulisoriinnarneqarnissaat
anguniarlugu assigiinngitsunik suliniuteqarput. Taamaaliornikkut
ilinniagariikkanik itisileeqqilluni kiisalu ingerlaqqiffiusunik
ilinniagaqartarnerit ingerlanneqalerput kiisalu sulisut ilaat nunattalu
aggornerisa ilaat sulisussarsiornikkut immikkut ajornartorsiorfiusut immikkut
aaqqissuussivigineqarlutik.
Taamaattorli maluginiaqqussavara
atorfinitsitsiniartarnermi ajornartorsiutit kiisalu sulisut
sulisoriinnarneqarnissaannut tunngasutigut ajornartorsiutit assigiinngitsunik
pissuteqartarneri pissutigalugit immikkoortillugit isigineqartariaqarneri.
Pissutaasartut pingaarnerit marluinnaat oqaatigissavaakka. Siullermik
Danmarkimi suliffeqarnikkut killiffiit pissutaasarput, tassa
suliassaqarluarnera pissutigalugu
suliffissaarusimasoqarpiannginnera
kiisalu sulianik ilinniagallit sulisoriumaneqarnerujussuat. Tamatuma
kinguneranik sulianik ilinniagallit nunanit allaneersut
nunatsinnukartinniarneri ajornakusooqaat aammalu pissutsit taamaanneri uagut
sunniuteqarfigisinnaanngilagut.
Aamma Hr. Lars Karl Jensen
ilumoornerassavara, tassa sulianik ilinniagallit atorfinitsinniartarneranni
atorfinikkaangatalu atorfeqartiinnarniartarnerini ajornartorsiutit ilaatigut
nunatsinni inissaqarnikkut meeqqanillu paaqqinnittarfeqarnikkut
ajornartorsiutinik tamanik eqquisunik , tassa nunaqavissunik tikisitanillu,
pissuteqartartut. Ajornartorsiutit tamakku aatsaat qaangerneqarsinnaapput
amerlanerusunik illuliortiternikkut amerlanerusunillu
meeqqeriviliortitsinikkut.
Ilisimaneqartutut nunatsinni ineqarnikkut
ajornartorsiutit naalakkersuisut annertoorujussuarmik akiorniarsaraat aammalu
naalakkersuisunit maluginiarneqarpoq sulisut inissaminnik utaqqisarnerujussuat
sulianik ilinniagalinnik allatigulluunniit piukkunnarsarsimasunik
sulisussarsiornermut ajornarnerulersitsisut. Ajornartorsiutit tamakkorpiaat
aaqqinneqartarnissaat siunertaralugu ataatsimiinnermi matumani naalakkersuisut
illutaarniarnermut aningaasaliisarnissamut peqqussutissamik saqqummiussipput
tassa septembarip 23-anni siullermeerneqartumik. Peqqussutissatut siunnersuummi
pineqartut ilagaat pisortat namminersortullu ingerlatseqatigiiffiisa
sulisuminnut inissialiortarnissaminni aningaasalersuisarnissaminnut
ajornannginnerusunik periarfissaqarlutik taarsigassarsisinnalernissaat.
Peqqussutip akuersissutigineqarneratigut anguniarneqarpoq inissiat attartortittakkat
pisortanit pigineqartut ajornartorsiorfiuallaarunnaarnissaat aammalu tamatumunnga
ungasinnerusoq isigalugu pisortat ingerlatsinissaminnut
aserfallatsaaliuinissaminnullu pisussaaffiinik oqilisaassiffigineqarnissaat.
Aammattaaq pisortat illuutaasa
attartortinneqartarnerat pillugu peqqussutip allannguutissaanik naalakkersuisut
saqqummiussaqarput, taamaaliornikkut sulisorisanit allanillu najugarineqartussat
agguataarneqartarneranni massakkumut malittarisat atorunnaarsinneqassalutik.
Siunnersuutikkut anguniarneqarpoq inissiat Namminersornerullutik Oqartussat
kommunillu attartortittagaasa attartortinneqartarnerinut naalakkersuisut
malittarisassiortalernissaat, tamattumunngalu ilanngullugit kommunit
sulisuminnut inissiaataasa agguataarneqartarnissaat pillugit malittarisassanik
immikkut isumaqatigiissusiortoqarnissaa.
Ersersinneqartutut atorfinitsitsisarnerit
atorfillillu sulianik ilinniagallit, tassa pineqartut tikisitaappata
najugaqavissuuppataluunniit, atorfissaqartiinnarneqartarnissaannut suliniutit
naalakkersuisunit nakussassarniarneqarput. Naalakkersuisunit isigalugu
sulianik ilinniarsimasut nunatsinni pisariaqartinneqaraluarlutik piffissami
aalajangersimasuinnarmi nunatsinniittartut kisimik inuuniarnerminni
atugarisaasa oqilisaaviginerisigut ajornartorsiutit
aaqqinneqarsinnaassanngillat.
Ruth Heilmann, Siumup oqaaseqartua:
Qujanaq. Taamatut Inatsisartuni Ilaasortaq
Lars Karl Jensen, Siumut, oqaaluuserisassanngortitaqarnera Siumumiit paasilluarparput,
tassami nunatsinni immikkut ilisimasalinnik ilinniarluarsimasunillu
amigaateqarnerput ilungersunartuusutut Siumumiit isumaqarfigigatsigu, soorlu
aamma nakorsassaaleqinerinnarluunniit qiviaannaraanni pisariaqartitsineq
annertoqaluni.
Taamatulli suliartorniaraanni aamma nunami
ornitassami sillimaffigisassat suunerisa piareersimaffigineqarnissaat
Siumumiit pingaaruteqarluinnartutut isumaqarfigaavut. Soorlu inissaqarnikkut,
meeqqeriveqarnikkut allatigullu ulluinnarni inooriaaseqarnermut aamma
tunngasuusinnaapput, nalunngilarpullu kommunit arlalissuit tamanna paasillugu
taamatut pisariaqartitaasunik tikittoqarnissaanut pitsaanerpaamik
tikilluaqquneqarnermillu misigititsinissaminnik takutitaqarusussuseqarenerat
ersarissumik qujanartumik annertusiartortinneqartoq.
Danmarki nunarpullu naalagaaffeqatigiipput
inatsisillu tunngaviusut inatsisitigut assigiimmik atugaqarnissamik aamma
tunngaveqarpoq. Kisiannili 1979-mi namminersornerulernitsinni Inatsisartut
inatsisiliaannik toqqanmmaveqarnerput nammineq aqutsiuussimavarput soorlu
isumaginninnikkut, atuartitaanikkut peqqinnissaqarfiillu nammineq nunatsinni
oqartussaaffigilerlugillu inatsisiliorsimagatsigit nunatsinni najugaqartut
kikkuugaluarunilluunniit atukkamikkut assigiissumik pineqarnissaannik
toqqammaveqartuulluni.
Siumup siunertaraa nunatsinni sulliviit
maani najugaqartunik ingerlannneqartariaqartuni ingerlanneqartariaqarput.
Avataaniit sulissusarsiorneq pisariaqavissut patsisigalugit soorlu naammattunik
ilinniarsimasunik amigaateqarneq il.il inerlanneqassaaq isumaqatigiissutit
kattuffinnik paaseqatigiinnissutit tunngavigalugit. Taamaattumik
naalakkersuisut Siumumiit isumaqatigaavut akissumminni aamma oqarmata nammineq
kattuffiit qanoq akissaateqarnissartik inuuniarnikkullu atukkatit pillugit
oqilisaanneqarnissamik piumasaqarlutillu isumaqatigiinninniarnikkut
angusaqarfiginiartaraat politikkut annerusumik akuliuffigineqanngitsumik.
Soorunami Inatsisartuni naalakkersuisunut
qanoq kaammattuuteqarnissamik kinaluunniit piisinnaatitaaffeqarpoq
oqilisaataasinnaasunik siunnersuuteqarsinnaatitaalluni, kisiannili
isumaqatigiinninniarneq aningaasanik
aalajangersimasunik amelassusilinnik pingaarnersiuillunilu kattuffimmi
namminermi agguataariffiusarpoq. Assersuutigalugu Tasiilami ilinniartitsisussaaleqiffiusunilu
allani qaangiiniarnermi ukiut tamaasa ilinniartitsisut akiliunneqarlutik
sulinngiffeqartarnissaannik kaammattuuteqartarnerit suliluunnit ullumikkut
angujuminaatsinneqartuupput.
Taamaattumik uani apeqqummi uani
saqqummiunneqartumut tunngatillugu Siumumiit naatsorsuutigineqarsinnaanngilaq
aalajangiiffusumik massakkut naammassisaqarnissarput, naak taamatut
perusunnaraluaqisoq, tassami allat attuumassuteqartut kalluagassat uani
oqallisissiami amerlaqimmata.
Siumumi aamma qujamasuutigeqaarput 1991-mi
sumi inunngorsimanermi apeqqut atorunnaarsinneqarmat, suliat assigiit,
akissasiat assigiit taamanikkut kiisami anguneqarlutik taamaalilluni sullivinni
akaareqatigiinnerulernermik kinguneqartitsisoq. Sulilu ippassaani nuannaarutissinneqarpugut
aamma ilinniartitsisut kattuffii marluusut allanut maligassaasumik
ataasinnangortinneqarmata kiisami, mannalu iluatsillugu nunatsinni
ilinniartitsisut tamaasa angusaannik kusanartumik pilluaqquniarpavut. IMAK
taagutigiligartik malunnartinniarlugu ippassaani ilassinnissutaannut
qujavugut, neriullutalu siunissami pisarnertut suleqatigilluarimaarivut.
Naalakkersuisut isumaqatigaavut aamma
akissumminni oqarmata piffissami aalajangersimasuinnarmi nunatsinniittartut
kisimik inuuniarnerminni atugarisaasa oqalisaavigineqartarnerisigut
ajornartorsiutit aaqqinneqarsinnaanngitsut, tassami sivisuumik atorfeqartitavut
pikkorissut aalajaatsullu aamma oqilisaanneqarsinnaagaluarmat.
Siumumiit naalakkersuisut immikkut
suliartortitaasut kommunini pisortani inissaqartitaanerannut tungnasunik
immikkut iliuuseqarniarnerat tarpersersornartuutipparput, soorlu namminneq
suliffeqarfiutillit inissiaateqalernissaannik ajornannginnerusumik
periarfissiissoqarneneratigut. Naalakkersuisut siusinnerusukkut taasimavaat
Danmarkimi pisortat allaffii suleqatiglugit taartigiissinnaanerit
aqqutissiorniarlugit, tamanna Siumumit taperserparput aammalu kommunit
Danmarkimi ilaatigut illoqarfiit
ikinngutigisatit aqqutigalugit tamakkunuunatigut suleqatiginiarnissaat aamma periarfissaasoq
kaammattuutigalugu.
Naggataagut Siumumit Nunani Avannarlerni
pissutsit paasiniaaffigineqarnissaat kissaatiginartipparput, qularnangitsumik
periusissanik aallanik tassuunakkut ilinniarfiigneqarsinnaagaluarmata, kiisalu
piffissami sivikitsumi nunanut allanut ineriartorfiusunut
suliartorallartitsisarnermi periuserineqartartunik eqaatsumik
aaqqissuussisarnerit ilanngullugit itinerusumik paasiniarneqarnissaat
Siumumiit kaammattuutigissavarput.
Taamatut Siumumiit naliliillutalu
oqaaseqarpugut siunnersuuteqartup isumaa paasilluaraluarlugu
piviusunngortinnissaanullu akimmiffiusartut suunerinik erseqqissaateqarluta,
taavalu aamma aaqqiiniarnissamut aqqutissaasinnaasut ilaannik tikkusilluta.
Otto Steenholdt, Atassutip oqaaseqartua:
Ukiuni makkunani ilinniarluasimasunik immikkulluunniit ilinniagalinnik suliffeqarfinni arlaqaleqisuni nunatsinni sulisussaaleqinerujussuaq sukkulluunniit oqilisaaviginiarlugu inimi maani eqqarsaatersuutqartuartarpugut, Atassummiillu tupiginngilarput aamma Inatsisartuni Ilaasortaq Lars Karl Jensen aamma ajornartorsiut tamannarpiaq qanoq ilillugu iluarsiiiviginiarneqarsinaanersoq eqqarsaatersorfigisimammagu.
Aamma uagut Atassummiit oqaatsit siunnersuuteqartup ullumikkut saqqummiussininermini atugai oqaluttarfimmit maanngaanniit anittarsimagatsigit isertuukkumanngilagut. Aamma uagut ilattuutigisarsimavarput inuiaqatigiinni atorfiit uagut innuttatsinniit inuttalerneqarsinnaanngippata pisinnaasaq tamakkerlugu avataanit aggersunit inuttalerniarneqassasut atorfinitsinniakkamut aningaasarsiat kisimik naammaginaannaratik aammali atorfinittussap ilaqutaanut tamanut atugassarititaasut ilaqutariinnut naammaginartuusariaqartut.
Tamakkuli tamatigut naammassineq ajornartarput. Nunap aningaasatigut nammassinnaasai qissimagaartilugit inissaaleqinerujussuup, meeqqanik paaqqinnittarfissaaleqinerup pingaartumillu inuiaqatigiinni atorfissaqartilluinnarlugit tikisitat nuliaasa uiisaluunniit suliffissaaleqillutik utaqqisut qaangiinnarlugit atorfinitsinneqartarnerannik paasinartumik uparuartuisarnerit ilaatigut pissutaarpiarlutik. Tamakku aamma ilaginngitsuunngilaat nunatsinni meeqqat atuarfiisa piffinni arlaqartuni Danmarkimit tikisitat meeraasa atuartitaanerannut naleqquttuunnginneri. Angajoqqaat tamarluinnatta siunissaat pitsaanerpaaq eqqarsaatigalugu atuarfigineqartup meeqqat ilisimasariaqagaat pitsaasut tunniussinnaassagai kissaatigisatta siullersarisarpaat. Qanorluunniit inigissaartigigaluaraanni suliffigisamilu aningaasarsilluartinneqartaraluaraanni meeqqat iluamik paarineqarsinnaatinnagit atuartinneqarsinnaanngippata tikisitat amerlassaqaat periarfissaq siulleq atorlugu nammineerlutilluunniit akilerlugu nunatsinniit aallapallakkumasartut, tamakkuugunarpullu siunnersuuteqartup siunnersuumminut qiterititai.
Atorfinitsitsiniarnermi periusiusoq siunissami qaqugorsuarmut naatsorsuutigisassarput tassaavoq isumaqatiginninniarnerit aqqutigalugit atorfinitsitsisarnerit. Tamanna nunap aningaasatigut tunniussinnaasaanik tamatigut aallaaveqaannanngilaq, aammali inissaaleqinerujussuaq, aapparisap suliffigissaartut suliffissaaruteratarsinnaanera, sivisuumilluunniit suliffissarsiorluni unin-ngarujussuarnissaa avataaniit tikittumut sumininnguakkulluunniit kimit naammagineqarsinnaanngilaq, tamattami aningaasatigut nakkaallaatigisinnaasarput ornigineq ajorluinnaratsigu.
Akissuteqaammi eqqortumik oqaatigineqarpoq Danmarkimi sulisussatsitut qinnuteqartillugit piukkussinnaasagut nunaminni nammineq suliassaqarluarmata, pingaartumik ilinniagaqarluarsimasut sulianillu ilinniagaqarluarsimasut eqqarsaatigissagaannni. Danmarkimi suliffiit sulisuminnik pikkorissunik tigumminniinnarusunneri, akilerluaasarneri kiisalu sulisut nunatsinnut naleqqiullugit najugarissaarneri nunatsinni aningasassaaleqiffiusumiit unammilleruminaassaqaat aamma unammilleruminaaqaat.
Saqqummiussami taakkartorneqarput qulaani ajornartorsiutit qiterisaat eqqaariigarput tassalu inissaaleqinerujussuaq, tamanna aaqqiiviginiarlugu suliniutit saqqummiussami taaneqartut nalunngilagut ukiuni tulliuttuni qaninnerni ajornartorsiummik aaqqiisuussallutik naammanngilluinnartut, ilami aamma nunaqqateqaratta initaarnissaminnik ukiorpassuarni utaqqiuarsimasunik. Suliffiilli sulisuminnut illuliorsinnaalernissaat qularutissaanngitsumik ilorfaallaataassaq.
Isumaqatigiinniartarnerit aqqutigalugit atorfinitsitsisarnerit uatsinnit attoruminaattut qissimigaaraluartillugit aamma eqqarsaatigisariaqarpoq nalinginnaasumik ukiuni pingasuni atorfeqartitsisarnerit qumartitsiimissagaluaraanni aamma nunap aningaasaqarniarneranut qanoq kingunerlusinnaanerat, ilami atorfissaqartillugit tikisitat aamma pisataannik imarpik ikaarlugu assartorneq akikitsuunngimmat.
Atassummiit siunnersuuteqartoq paasilluaraluarparput pitsaanerpaamik ujarlerluni eqqarsaatiminik saqqummiussaqarsimammat. Naalakkersuisulli Atassummiit isumaqatigaagut sulianilluunniit ilinniarluarsimasuinnaat nunatsinni pisariaqartinneqartut piffissami aalajangersimasumi nunatsinniinnerani atugarisaasigut immikkoortillugit oqilisaavigigaluaraanni pisariaqartilluinnakkanik avataanit tikisitat ulluinnarni atugaannik oqilisaavigialuaraanni ajornatorsiutit aaqqiviginaanngillat.
Taamma naatsumik oqaaseqarluta siunnersuuteqatup siunnersuutaa oqaaseqarfigaarput.
Johan Lund Olsen, Inuit Ataqatigiit oqaaseqartuat:
Inatsisartunut ilaasortap Lars Karl Jensen-ip tikisitat immikkut ilinniarsimasut maannga suliartortinniakkavut nunatsinni innutaasunit inuuniarnikkut allatigullu atukkatigut immikkut pineqartalernissaannik siunnersuutaa naalakkersuisut siunnersuummut itigartitsiniarnerannut tunngavilersuutigisaat aamma isumaqatigalutigit Inuit Ataqatigiit tapersersinnaanngilarput.
Soorunami siunnesuuteqartup ajornartorsiutitut matumani tikkuartugai iluarsiiviginiarneqartariaqarput nunatsinni innuttaasut pitsaasumik sullinneqarsinaasariaqarnerat angulerneqaqqullugu, kisiannili isumaqarpugut tamanna siunnersuuteqartup eqqarsaatigisaatut anguniarsinnaanngikkipput.
Taamaattumik naalakkersuisut naammaginartumik akissutigisaat innersuussutigiutigalugu tikkuarussussavarput tikisitat immikkut ilinniarluarsimasut nunatsinnut suliartorumalersinniarnissaat eqqarsaatigalugu allatigut iliornikkut aaqqissuussiniartoqartariaqarmat. Atorfinitsitsiniarnermi pilerisaariniarluni qitiusumik aqutsivallaarnerujussuaq pinngikkaluarlugu taamaattumik kommunit qanimut suleqatiserineqarnerisigut aamma periutsinik nutaanik ineriartortitsisoqarlunilu aaqqissuussisoqarsinaanera aamma isumaliutigeqqussavarput. Tamanna periarfissatsialassuuvoq iluatinnartoq paasivarpullu kommunini ataasiakkaani tamannarpiaq aamma misilinneqartalereersimammat ajunngitsumik kinguneqartumik.
Taamaattumik periarfissaq tamanna annerusumik aallunnialerniartigu maani nunatsinni innuttaasut nunaqavissut, suliartoqqullugillu innutaaqaatissatsitut tikisittakkatta maannamut 1991-mili atukkamikkut assigiinngisitsinertaqanngitsumik inuuneqartuarsinnaanissaat aamma ingerlattuagarput attattuarniarumallugu.
Taamatullu naakkaluamik oqaaseqarluta naalakkersuisut siunnersuuteqartumut akissuteqaataat Inuit Ataqatigiit akuersaarparput.
Anthon Frederiksen, Katuusseqatigiit:
Qujanaq. Inatsisartunut ilaasortap Lars Karl Jensen -ip siunnersuutaa Kattusseqatigiinniit paasilluarsinnaavara, minnerunngitsumik ukiuni makkunani peqinnissaqarfimmi nakorsassaaleqinermik ajornartorsiutit aamma eqqarsaatigalugit. Pissutsit qanoq ilineri malinnaaffigigaanni aamma tamanna ajorpoq ajornartorsiutip qanoq iliorluni qaangerniarnissaat sulissutigissallugu.
Taamaattumik 1991-mi halvfems-kunni pissusiusimasut maannakkumut naleqqiunneqarsinnaanngikkaluartut takuneqarsinnaavoq ilaatigut assersuutigalugu nakorsat, sygeplejersket juumuullu mannakkut nunatsinni amigaatigeqisatta, taamanikkullu akissarsiamikkut ikilisaaffigineqarsimanerat aamma maannakkut ajornartorsiutinut nunatta karsianut akisoqisumik sunniuteqaqataasut. Taamaammat ajornartorsiutit aallaavii aamma ilisimasariaqarput.
Taamatut oqarama siuliani sumi ingunnorsimaneq malillugu akissarsiaqartitsinerup eqquteqqinneqarnissaa minnerpaamilluunniit isumaginngilara, kisianni ullumikkut ajornartorsiutit qaangerniarlugit suliniarnermi iluarisariaqartut soorlu ilaatigut siunnersuuteqartup taagugai sanioqqunneqarsinnaanngillat, tamannalumi aamma uanga peqqinnissaqarfimmi ajornartorsiutit pillugit siusinnerusukkut ataatsimiinnermini matumani apeqquteqaateqarnikkut naalakkersuisut akissuteqaamminni qanoq iliornialersaarnerminni akissuteqarnerminni ersersippaat.
Taamaattumik ajornartorsiutinik qanngiinianermi sulisunut amigaatigineqartunut atugassarititaasut pissutsit taamaakkallartillugit taakkununnga atugasarititaasut pitsanngorsaavigineqarnissaat avaqqunneqarsinnaanngilaq.
Taamatut naatsumik oqaaseqarlunga siunnersuumut tapersiivunga.
Daniel Skifte, Aningaasaqarnermut Ineqarnermullu Naalakkersuisoq:
Partiit Kattusseqatigiillu oqaaseqaataannut qujavunga. Ataatsimut isigalugu qularnaatsorujussuuvoq amerlanerussuteqarluartut oqaaseqarnermikkut naalakkersuisut akissuteqaataat naammagisimaaraat, taamaattumik malunnarpoq partiit isumaqatigiittut, Kattusseqatigiit allaanerusumik isumaqarnerat eqqaassanngikaanni. Taamatut oqariarlunga oqaatigissavara partiit ataasiakkaat oqaaseqaataat oqaaseqarfigilaassagakkit.
Siullermik Siumut, tassa Siumut oqaaseqarpoq ilaatigut assigiimmik akissaateqarnerup attatiinnarnissaannut tunngasumik kissaateqarluni, tamannalu isumaqatiginarpoq assut, tassami tassani oqaaseqarnermini aallaavigaat pingaartikkamikku Siumukkut isumaqatigiinniartarneq kattuffiit aallaavigalugit aammalu illuatungaanit isumaqatigiinniarfigisat aallaavigalugit isumaqatigiittarnerit, taamaattumik politikkikkut akuliuffiginagit tamakkua, taamatut ingerlatsinissaq Siumup oqariartutigisaa aamma naalakkersuisut isumaqatigaat.
Uani aamma angujuminaatsinneqartoq eqqaaneqarmat oqaatigssavara tassa assersuutigalugu Tasiilami ilinniartitsitsisussaaleqineq pillugu qanoq iliuuseqarsinaasimannginneq, tassa taanna aaqqereerneqarsimavoq kingullermillu aaqqinneqarsimalluni imaalillugu, taanna angujuminaassimavoq kisiannili anguneqarsimalluni assersuutigalugu Illoqqortoormiuni aammalu Qaanaami ilinniartitsisussaaleqiffiunerujussuarmi isumaqatigiittoqarsimavoq tassani pissutsit aaqqinniarlugit immikkut ilinniartitsisut neqeroorfigineqarlutik isumaqatigiinnerit kattuffinnit Namminersornerullutik Oqartussanit taakkua akornanni aallaavigalugit, taamaalillutik illoqarfiit taakkua taasakka, taassumalu nunaqarfiiniittut ilinniartitsisut immikkut pineqarlutik immikkut allanut naleqqiullugit ajunngitsorsiassanik annertunerulluartunik pissarsisinnaasimallutik.
Ilinniartitsisulersaartillunga oqaatigissavara ilinniartitsisut kattuffiat nutaaq tassami nuttaajoqimmat imatut ateqarmat - IMAK.
Taanna taallatsiaannariarlugu Siumut oqaaseqarnera aamma isumaqatigaara ilaatigut oqarmat Danmarkimi pisortat allaffii suleqatigalugit taartigiittarnerit atornerulernissaat kaammattuutigineqarmat, isumaqarpunga taanna oqariartuut assut pingaartoq, Namminersornerullutik Oqartussaaannarniinngitsoq, taannami atorneqarpoq soorlu akileraartarnermut suliffeqarfimmi Danmarkimilu akileraartarnermi suliffeqarfimmi paarlaasseqatigiittuarneq atorluarpoq. Aamma allani taamaappoq, taannalu atorluarneqarrnissaa aamma Namminersornerullutik Oqartussaniinnaan-ngitsoq aammali kommunini, taamaattummik taamatut oqariartuuteqarneq ajunngitsutut kaammattuutitullu taarusuppara.
Naggataatigut maluginiarpara Siumut oqarmat siunnersuuteqartup siunnersuummini qitiusutullusooq eqqartoqqusaa piviusunngortinniarlugu angusaqarnissamut aqqut ungasissoq oqaatigineqarmat piviusunngortikkuminnaatsuusussaassasoq.
Kisiannili taamatut oqariarlunga Atassumminngaanniit oqaaseqartumut oqassaanga Atassut assiginngitsumnik arlalissuarnik tikkuartuivoq, paasinnilluni tassaasullu soorlu tikisitap nuliaasa imaluunniit uiisa suliffissaqartinnissaannik tunngasumik aammalu meeqqat meeqqerivinni imaluunniit atuarfinni pineqarnissaannut tunngasunik tassunga Atassutip paasinninnini ersersippaa, aammalu inissaaleqinerujussuaq eqqartorpaa, taanna ilumoorluinnarpoq taamaattumillu oqarluni soorlu nakorsassaaleqineq eqqarsaatigalugu tamakkua nalilersornearluartariaqartut. Kisianni naggasiinermini oqarluni taamaakkaluartoq ajornartorsiummik paasinnikkaluarluni kisianni tassa aamma Siumutorluinnaqqissaaq oqariartuuteqarpoq paasilluaraluarlugu kisianni siunnersuutip piviusunngornissaa ajornakusoortoq, naak taakkua aaqqivigeqqusat aallaavigalugit qanoq iliortoqarsinnaagaluartoq.
Uani Atassummi qitiutinneqartoq ilimoornerassavara aamma, tassa illussaaleqinerujussuaq aallaavigalugu ajornartorsiutit takkuttarmata, taamaattumik tassa isumaqateqatigiininnut peqqutigaara tamatigorluinnaqqissaaq illussaalerqinermi sulisut tikisitalluunniit inissaqartinneqarniarneranni tamatigut maani najugaqavissut eqqorneqartamata. Taannarpiaasimagunarporlu Atassutip ilaatigut taamatut ingerlaannartumik akuersiniarnermini aporfigisaa aammalu tunuarsimaarfigineqartariaqartoq, utaqqisummi amerlavallaaqaat. Inuit Ataqatigiit poortornagu erseqqissumik oqariartuuteqarnerat maluginiarpara.
Oqariartuuteqarput Inuit Ataqatigiit tapersersorsinnaanngikkaat taanna siunnersuut, taannalu erseqqissorujussuuvoq. Taamaattumik tassuuna paasinnilluarnera oqaatigissavara, naalakkersuisut aamma taamatut oqarput. Taavalu suliniutit allat aamma ilaatigut Atassutip Siumullu oqariartuutigisaat eqqaaneqarput, periarfissanik allanik allatut iliornikkut aaqqissuusiniartoqartariaqartoq. Ilaatigullu Inuit Ataqatigiit toqqavissumik oqaatigaat kommunit suleqatiginerusariaqartut. Isumaqarpunga aamma taanna naammassiniarneqarsinnaasoq atorneqartariaqartorlu, soorluli naalakkersuisuni aamma taamatut apeqqut taanna pillugu eqqartunitsinni oqarsimasugut. Periarfissat atorluarniarneqartariaqarput aamma kommunit suleqatiginiarnerusariaqarput.
Taammaattumik paasilluarsinnaavara Inuit Ataqatigiit naggasiimata naalakkersuisut akissuteqaataat naammattumik isumaqatigigamikku.
Partiini taamatut oqaaseqareerlunga qularnaatsumik Kattusseqatigiinnut oqassaanga Kattusseqatigiit paasilluaraluarpaat taamatut siunnersuuteqarneq, kisiannili taamaakkaluartoq assersuutigisaat, tassa ilaatigut akissaatinik millisaasimaneq nakorsanut, sygeplejerskenut juumuunullu, taava oqarfigisariaqarpara, taanna eqqunngilaq. Taakkua kattuffii isumaqatigiiffigineqarsimapput illuatungeriit tamarmik atsiorsimapput isumaqaitigiillutillu akissatit imaassasut, taamaattumik taanna eqqunngitsutut oqaatigissavara.
Maannakkumut uani taaneqanngitsoq ilisimaneqartorlu tassavoq ilinniatitsisut kattuffii 1995-mi kisimi inatsisiliuussiffigineqarsimammat, tassa tassani isumaqatigiissinnaasimannginnatta illuatungeriit marluulluta. Ilaat isumaqatigiiffigineqarput aamma ukiup ilaatigut 1999-ip ilaanullu 2000 -ip tungaanut, taamaattumik taanna eqqungitsumik taariarlugu oqassaanga uani erseqqippoq Kattusseqatigiit siunnersuuteqartoq kisimiillutik isumaqatigigaat kisianni taanna partiit akerlilerpaat.
Lars Karl Jensen, Siumut:
Oqaaseqartunut tamanut siullermik qujassuunga, kisiannili uani ilaatigut aamma siunnersuutigisama imarisaa paatsuuallanneqarsimasutut paasisinnaavara, immaqami oqaasiliorneri akuleriiaarneri assigiinngitsunut attuumavallaarneri peqqutaasinnaapput.
IA-minngaanniit oqaluttup oqaasianut aallaqqaasiilluni paatsoornertut taanna paasiinnarpara taanna oqarmat, nunatsinni inuttaasunik inuuniarnikkut allatigullu atukkatsigut immikkut pineqartalernissaannik siunnersuuteqartunga. Tikisitat taamatut pineqarnissai siunnersuutigin-ngilluinnarpara. Kinaluunniit nunatsinnut suliartortoq paasitinneqareertarpoq piffissaalluartillugu nunatsinni atugarisaasuninngaanniit pitsaanerusunik atugaqarnissaminik naatsorsuussisariaqanngitsoq aatsaalli paarlattuanik paasitinneqartarlutik nunaminninngaanniit kingoqqiffimminniik aallaaneroqisunik maani inooriaaseqarnitsinni inooqataalerussaasut.
Uani aamma arlalitsigut oqaaseqartunit aammalu naalakkersuisut, imaluunniit Aningaasaqarnermut naalakkersuisup oqaaseqaatimini ersersitaa ersarissalaaginnarniarpara, aamma uanga Kattuffiit allallu isumaqatigiissutaat ataqqilluinnarlugit aallaqqaataanniilli oqarama, taammatullu aamma naalagaaffeqatigiinnermi maannakkut inissisimanitsinni inatsiseqatigiinnitsigut angusarineqarsimasut minerpaamilluunniit aalassatsinniannginnakkit. Tassani sulisussarsiortarnerup iluani allatigullu aaqqissuussineq eqqarsaatigalugu taama oqarpunga.
Paasisinnaavara siunnersuutigisara aaliangiiffigineqarsinnaanngitsutut oqaaseqarfigineqarmat tamani, aamma taanna tupiginngilara, kisiannili neriuppunga taassuma nassatarisaanik eqqarsalersitsiumaartoq oqallisigineqarsinnaasunillu kingusinnerusukkut. Qanoq ilillutaakkua tikisitarpassuit pinngitsooriartorniarnerat nunatsinni ingerlatilerniaripput. Nunatsinni ilinniarfippassuaqarpugut, taanna ersersinneqartuartarpoq sumiluunniit, aammalu ilinniartut annertunerusumik ilinniagaqartut nunatta pisariaqartitai tamatta tapersersugarivagut, kisiannilu ukiut suli arlaqassaqaat nammineq ilinniarsimasunik sulianut aalajangersimasunut tamakkiisumik sulisussaqalernissarput nunaqavissut aallaavigalugit, uanga takorluueriaasera tassani malillugu.
Tikisitsiortornermi sulisussarpassuarnik, maannakkumut killiffigisarput ulluni kingullerni aammalu maannakkut oqaluttuninngaannit ersersinneqarluarpoq, tassa allatut ajornartumik illuliortitsernerit annertusisariaqarpagut, meeqqanut paaqqinnittarfiit allallu amerlisariaqarput, aamma tikisitagut tamakkununnga pisussaaffeqarfigigatsigit.
Maannakkulli suliffeqarfiit ilaanni misilittagaasut misissulaaraanni peqqinnissaqarfiup iluani aaqqissuussineq isumaqarpunga torrallatarujussuaq maannakkut aamma ilinniarfigisariaqaripput, tassalu nunatsinni kingullermik soorlu isileritittussat, katersorsinnarlugit taamatut suliaqartumik aalajangersimasumik tikisitsinikkut suliaritinneqarput ataatsikkut, immaqa aamma siutit nakorsaanik aamma taamaaliortoqarpoq.
Taanna periuseq suni allani atorsinnaavarput. Oqallissaarutinni taanna immaqa qiteritissimasariaqaraluarpara.
Ilinniartitsinermi meeqqat atuarfiinni immikkut ilinniagalinnik qaffasinnerusumik ilinniartitsisuliisoqartarpoq, ilaatigut aamma allanik faginik tigumminngikkunik atuartitsinerminnik naammatsitsisinnaanngitsunik. Modul-ikkaartunik arlaatigut aaqqissuinermi, imaappoq ilutsinni qaffakkiartuartuumik ilinniartitsinermi tikisitanut taarsiullugit immikkut ilinniarsimasunik avataanin-ngaanniit piffissanik sivikitsunnguamik nunatsinniisinnaasunik atugaqarsinnaanerluta.
Taanna immaqa naameerlugu piinnarneqarsinnaagaluarpoq, kisiat aamma misissugassaqqittorujussuuvoq ilinniarfiit ilaannikkut aamma taama ittumik pisariaqartitsisinnaanerat ersikannertarmat.
Qallunaat Nunaata naalagaaffeqatiginerani nunarput ineriartortutut isigalugu sulisussanillu tikerartitsivigiinnartussatut naatsorsuutiginagu, qaffassaanermi atorneqarsinnaannerluni Qallunaat Nunaata nunanut allanut siuarsakkanut periuserisaa, piffissamik aalajangersimasumik sulisussaq aallartillugu, taavalu tikippat freertillugu ilaqutaaniittittarlugu, inuillu nikittaatillugit sulisillugit.
Soorunami uani tikkuagaqarsinnaanngilanga sutigut taamatut aaqqissuussisoqarsinnaanersoq, kisiannili isumaqarpunga oqaaseqartut ilaasa ersersereermassuk, aamma isuma tapersersornartissinnaallugu, neriuppunga naalakkersuisut tungaanninngaannit oqarnerattuut suliniuteqarnermi qanoq iliuusissanut ilanngullugu tamakkua eqqarsaaersuutigineqarumaartut.
Josef Motzfeldt, Inuit Ataqatigiit:
Aap, tassa una Inatsisartunut ilaasortap Lars Karl Jensen-ip siunnersuumini ilaatigut toqqammavilersuutai marlussuit issuaaffigilaaqqaarallassavakka, siullermik aallaqqaatikanniani oqarpoq: ASoqutiginninnerminnit suliartorusukkaluartut soqutiginninnerminnit tunuaannartarnerannut pissutaasartut ilisimaneqartutut tassaanerusarput suliartorusukkaluartut nunaminni pisussaaffitik sungiusimasatillu qimakkallartariaqarmatigit, tassalu illutik imaluunniit inissiat nammineq pigisatik, ilaqutariiugunik aappaasup suliffia, meeqqanut paaqqinniffit allarpassuillu inooriaatikkut sungiusimasanik allannguisussat@.
Qanormi
allatut ilisimasussagaluarattta nunanut suliartorumalluta qinnuteqarutta? Nunami ornitami pissutsit
piareersimaffigisariaqarput soorunami. Assiliaq miminneqarsinnaavoq, nunamut
allamukassagutta uagut allamut nunap ornitassatta atugassarititai soorunami
soqutigalugit malinnaavigalugillu ilinniarfiginiartariaqassannguatsiaratsigit,
kisianni isumaqarpunga ajornartorsiutit
matumani eqqartorneqartut qiterisaat tassaasoq, nunarput danskit assersuutigalugit,
danskinit suliartorfigalugu tikillugu namminiussuseqarpiarani Danmarkimi
periutsinut issuaanniarujuffiusoq ila soorlu pakatsinassasoq. Nunarput ingerlatsinikkut
namminiussuseqartoq, atuartitaanikkut namminiussuseqartoq, allaffissornikkut
namminiussuseqartoq soorluuna suliffigissallugu nunarsuarmi allaalaartumut
ornissallugu pilerinassaqisoq.
Aningaasarsiat aapparisallu
suliffeqarnissaa atuartitaanermilu pissutsit allaanerunerannik
ippigineqarsinnaasut aanngaamisinneqarsinnaanerannut isumaqarpunga periutsit
atugassarititaasullu nunap inuisalu namminneq pigisaat ersarissuutikkaanni.
Meeqqat atuarfiat aggerfigisamit allaanerugaluarluni inuunerup sinneranut
sunniuteqartumik ilikkarfiusoq soorluuna tikissallugu angajoqqaajulluni
nuannissaqisoq, pinngortitamik tunngasunik suleqatigiissinnaanermut, inuiaallu
assigiinngikkaluarta suleqatigiissinnaanermik ilikkarfiusoq. Allaffissorneq
Christian sisamaata nalaani pissutsinik issuaasuunngitsoq kisianni
namminiulluni ingerlatsiviusoq ilisarnaateqarluni. Soorlu tamakkua
pilerinassagaluartut.
Aammalu inissaaleqinermut
tunngatillugu ajornartorsiutit taakkarsorneqartut ilaatigut tikisitat
amerliartorsimanerannut taanna patsiseqarmat illoqarfiit angisuut
eqqarsaatigalugit sualummik aamma aktieselskab-inngortitsinerup nalaani. Tassa
tamakku ajornartorsiutaapput. Kisiannili Lars Karl Jensen-ip akissuteqarnermini
Inuit Ataqatigiit sumi inunngorsimanermi pissutsinut utertitsiniarnermik
uparuaratsigu tassani naggataatigut issualaaginnassavara Lars Karl Jensen-ip
siunnersuutimini una oqaatigimmagu:
ASiunnersuutigaara immikkut ilinniarsimasut nunatsinni
pisariaqartinneqarlutik suliartorallartut inuuniarnikkut oqilisaanneqarnissaasa
immikkut aqqutissiunneqarnissaat Naalagaaffeqatigiinnerup iluani
sulissutigineqassasoq@.
Allatut qanoq tamanna
paasineqartariaqarami?
Mikael Petersen, Isumaginninnermut,
Suliffeqarnermut, Pisortallu Suliffeqarfiutaanni Naalakkersuisoq:
Siullermik oqaatigissavara
Aningaasaqarnermut Ineqarnermullu Naalakkersuisup akissuteqaataa, aammalu
partiit oqaaseqartuinut akissuteqaatai assigiinngitsut taakkua
akissuteqarfigilaassagakkit Suliffeqarnermut Naalakkersuisutut.
Aammalu una
erseqqissaatigilaassallugu Naalakkersuisuni apeqqut pingaatilluinnaratsigu
aammalu Suliffeqarnermut Naalakkersuisoqarfimmi, kisiannili siunnersuuteqartup
siunnersuutaata imarisai isumaqatigiinniartarnernut tunngatillugu
anguniagassatut isigineqartariaqarmata Suliffeqarnermut
Pisortaqarfimminngaanniit taanna suliassaq isumaqatigiinniartarnermut
Naalakkersuisumut, tassa Sulisoqarnermut Pisortaqarfimminngaanniit, taanna akisassanngorlugu
ingerlatinneqarsimammat.
Partiit oqaaseqartuininngaanniit
arlalinnik eqqaaneqarpoq naalagaaffeqatigiinnerup iluani atugassarititaasut.
Tamanna ilumoorluinnarpoq, ullumikkut naalagaafeqatigiinnerup iluani
inatsisitigut atugassarititaasut assigiinngitsut aporfissat arlalissuummata,
nunatta Danmark-illu akornini.
Suliffeqarnermut tunngatillugu
qallunaat maanga suliartortartut eqqarsaatigalugit, uagut tikisitanik
taasakkavut, taakkua nunatsinnut suliartortikkaangatsigit inatsitigut
assigiinngitsutigut atugassarisaat allaanerujussuanngortarput, aamma
suliffeqarnerup iluani. Taamaattumik inatsisitigut periarfissarititaasut
assigiinngitsut suliffeqarnerup iluinnaatiguunngitsoq kisianni aamma inunnik
isumaginninnikkut inatsisitigut atugassarititaasut nalimmassarneqarnissaat
ilanngullugu Naalakkersuisuni siunertaraarput. Taanna erseqqissaatigaara
pissutigalugu maani oqallinnermi ilaatigut tamakku eqqaaneqarmata, aammalu
siunnersuuteqartup siunnersuutaani ersarilluinnarmat atugassarititaasutigut
naammaginarnerusumik tikisitat imaluunniit nunatsinnut suliartortitat
atugassaqartinneqarnissaat.
Soorunami erseqqissaatigissavara
angusinnaagunanngilarput assigiilivinnissaq, tamanna ajornarpoq soorlu
atiatigut taalluaannarlugu Tuusip oqaaseqarnermini uani eqqaasaa nunatsinni
immikuullarissumik nunaqarnerput aammalu inooriaaseqarnerput
eqqarsariaaseqarsinnaasarnerput. Tamakku avaqqunneqarsinnaanngillat
allaanerussutigiuassavavut. Aammalu avataaninngaanniit suliartortartunut
ilaatigut allaat tamakku kajuminnarsinnaasarlutik.
Kisianni Naalakkersuisuni
siunertarisarput una inatsisitigut nunatsiniikkaanni Danmark-imiikkaanniluunniit
inatsisitigut aporfiusinnaasutigut nalimmassaasoqarnissaa sumiikkaluaraanniluunniit
naalagaafeqatigiinnerup iluani atugarisatigut sapinngisamik periarfissatigullu
ajornartorsiuteqartoqannginnissaa siunertaralugu Danmark-imi suliffeqarnermut
naalakkersuisoq oqaloqatiginiartussaavarput isumaqatigiissuteqarfiginiarlugu,
aammalu inunnik isumaginninnermik ministeri aamma taamatut tamakku pillugit
oqaloqatigisussaallugu.
Isumaqarpunga ajornartorsiutit
siunnersuuteqartup taasai tassunga tunngassuteqartut aamma taamaaliornikkut
naalagaaffeqatigiinnerup iluani siunertaqaqatigiissumik siunnerfeqarluni
suliniuteqalernikkut aamma anigorneqarsinnaasut.
Ilanngullugu taanngitsoorusunngilara
tikisitanut tunngasut ajornartorsiutit taakkuinnaat tunngavigalugit nunatsinni
immikkut inatsisiliortoqarsinnaanngimmat. Nunatsinni suliffeqarnikkut
ataatsimoorussamik anguniagaqarnerup siunnertaqarnerullu iluani avataaniit
suliartortartut atugassaat aamma suliarineqartariaqarmata.
Ullumikkumut amigaatigiuarsimavarput
ataqatigiissaartumik ilinniartitaanikkut suliffeqarnikkullu periarfissat
nalunaarsorsimanissaat sulisussat nunatsinni pisariaqartinneqartut
naammaginartumik pigisinnaajumallugit. Taamaattumik aamma kisitsisitigut
nalunaarsuineq annertoq aamma ingerlakkumallugu siunertaavoq
ingerlanneqassasoq. Tamakkulu kingusinnerusukkut tikikkumaarpavut.
Taamaattumik oqaaseqarlunga ilassuteqarfigaara
Naalakkersuisoq matumani oqaluuserisami akisussaasoq, erseqqissaatigissallugulu
apeqqutit assigiinngitsut aamma maani partiininngaanniit eqqaaneqartut
suliffeqarneq pillugu naalakkersuinikkut siunertat pillugit nassuiaammi aamma
oqallisigineqartussaammata.
Daniel Skifte, Aningaasaqarnermut Ineqarnermullu
Naalakkersuisoq:
Tassaana siunnersuuteqartoq
oqaaseqarfigilaarniariga, Lars Karl Jensen Siumut.
Uanga isumaqatiginngilara Lars Karl-i
oqarmat immaqa Naalakkersuisut imaluunniit partiit Siumut, Atassut Inuit
Ataqatigiillu paatsuuallassimasut. Naagga paatsuuallanngilagut, ilaatigut
tassunga tunngavigissavara Inatsisartunut agguaanneqarsimasoq ippassaani,
tassani immikkut siunnersuuteqartup itisilerilluni agguaassinera. Taanna
akissuteqaat takkukkaluartoq kisianni allannnguuteqangaanngilaq,
nutaarsiassartaqangaanngilaq taamaallaalli nutaarsiassatut taasariaqarluni
nassuiaataani ilaatigut qupperneq 2-mi allassimasoq, ukiunik aalajangersimasunik
sulisartussatut tikisitsisarneq atorneqalissasoq, qallunaatut AĊremċlsansĉttelse@.
Soorunami taanna isumaqatigaara
kisianni taannaluunniit kisimi atorneqaleraluarpat taava ajornartorsiuterput
qaangernavianngilarput. Taanna erseqqissarniarpara. Taamaattumik taanna
Inatsisartunut agguaanneqarmat taamaalillunga tassunga kaputartuutilaarpara.
Taamaalilluni Inatsisartut ilisimaniassammassuk taanna aamma
maluginiarsimagipput uangaqarfimmi.
Aamma tassunga atasumik
oqanngitsoortariaqanngilanga uanga toqqarlunga ilaatigut eqqartorneqarama
Naalakkersuisooqatinnit Mikael Petersen-imit, uanga oqaaseqarpunga
Aningaasaqarnermut Naalakkersuisutuunngitsoq, kisianni Naalakkersuisut
sinnerlugit. Naalakkersuisut sinnerlugit oqaaseqarpunga apeqqut
suliffeqarfimmut tunngasoq suliffissuaqarfiup suliffeqarfiullu ataaniippoq.
Taamaattumik taanna paasilluanngikkaluarlugu nuannaarutigaara immikkut
taaneqarama. Kisianni tamanna nammineq akisussaaffigissavara qimarratiginagulu
uanga suliassaq taanna ingerlakkakku Naalakkersuisut kissaateqarnerat
aallaavigalugu. Taannalu ajunngilaq.
Taava oqaatigissavara naggataatigut
sooq isumaqavissunga paatsoorsimanngitsut Naalakkersuisut imaluunniit Siumut,
Atassut Inuit Ataqatigiillu. Tassami taamatut siunnersuut ingerlaannartumik
Kattusseqatigiittulli akuerissagaluarutsigu aana kingunerisinnaasaa, immikkut
tikisitat iliorfigineqassasut taamaalillunilu assigiinngitsumik
akissaateqartitsineq tunoqqutsisumillusooq eqqunneqassasoq. Taamaattumik taanna
Naalakkersuisuni isumaqatigisimanngilarput. Aamma paasisinnaavara partiit
tamarmik taanna akerlerigaat.
Anthon Frederiksen, Kattusseqatigiit:
Ilumut nuannissagaluaqaaq tikisitat
pisariaqartikkunnaarsimagaluarutsigik ullumikkut, assorujussuaq
nuannissagaluarpoq. Aamma oqaluuserisaq manna qularnanngilaq
oqaluuserineqarsimanavianngikkaluarpoq ajornartorsiut annertummat
saqqummiunneqarsimavoq siunnersuuteqartuminngaanniit.
Sooruna 1998-imi ilassutitut
aningaasaliissutissap aappaani assersuutigalugu peqqinnissaqarfik 42 mill.-it
tungaanut qinnuteqartoq? Ila soormitaavat? Tassa ilaatigut pissutsit
anginerpaat pissutigaat sulisussaaleqineq nunatsinni ilinniarluarsimasunik
nakorsanik, peqqissaasunik juumuunik amigaateqarnerujussuarput pissutaavoq
landskasse-p taamarsuaq aningaasartuuteqartariaqarneranut.
Tassa pissutsit ilumoortut
taamaapput. Taamaattumik tikisitat ilinniarluarsimasut ullumikkullu
amigaatigeqisavut suli atussagutsigik sanioqqunneqarsinnaanngilaq aamma taakku
atugaasa suli ajunnginnerusumik pitsanngorsarneqarnissaat. Massakkut aamma
takoreerparput, aamma partiit tamarmik uppernarsereerpaat taakkua atugaasa
iluarsiniarneqarnissaat sulissutigineqartoq, aamma kommunit akornanni. Sooq?
Sulissutigineqarpoq.
Pitsanngorsarniarneqarput. Isumaqarpunga tamanna tamatta isumaqatigalutigu.
Una malugeqqussavara: Oqaaseqarninni siullermik oqarpunga sumi
inunngorsimanermik akissaasersuineq minnerpaamilluunniit orniginartinngikkiga
aamma uanga.
Qaqortumik allakkaanni qernertumik
ersarissumik takunngitsoorneqarsinnaanngilaq ajornartorsiut sumiittoq.
Miserratissaanngilaq aamma. Sulisussanik pikkorissunik amigaateqarnerput
ullumikkut. Taamaattumik ilaatigut 1991-imi aaqqissuussisimanerup ilaatigut
maannakkut kingunerisai sunniutilersut takusinnaavavut. Naak aamma
apeqquteqarninni siusinnerusukkut oqaatigineqareeraluartoq aamma Danmark-imi
nakorsassaaleqineq ajornartorsiutaasoq. Kisianni Norge-p avannaani
nakorsassaaleqinermik ajornartorsiuteqarsimaneq aamma nakorsat peqatigiiffiata
nammineerluni oqaatigereersimasaa tassalu atorfilinnik amigaatigineqartunik
atugassarititaasutigut aaqqissuusseqqinneq naak akisugaluaqisoq ajornarsiummik
qaangiisimasoq ilaatigut oqaatigineqarpoq nakorsat peqatigiiffianinngaanniit.
Taamaattumik ullumikkut pissutsinik aaqqiinianngikutta
ajornartorsiutit annertuut qanittukkut qaangerallarunanngilavut. Aamma
ippassaaniinnannguaq oqaatigineqarpoq allaat taamatut ingerlaannassagutta
aappaagu ilassutitut aningaasaliissutigineqartussat immaqa 100 mill.-it
angussagaat. Tassa pissutsit taama ersaritsigipput. Taakkuuku aningaasartuutit
qaffakkiartorpallaannginnissaat pillugu aamma amigaatigeqisatta sulisussat
illuatungaatigut ajunnginnerusumik immaqalu pitsaanerukannersumik
aaqqissuussivigineqarnissaat kaammattutigineqartoq maannakkut.
Oqanngilanga uanga immikkut
inatsisiliuullugit immikkut pineqartariaqartut. Kisianni ajornartorsiut
sumiittoq ersaripppoq takuneqarsinnaallunilu. Nassuerutigisariaqarparput
tamatta manngertitaarunnaarluta pissutsit piviusut saqqummiuttariaqarpavut.
Qujanaq.
Otto Steenholdt, Atassutip oqaaseqartua:
Naatsunnguaminguna aamma
uparualaarniarlugu siunnersuuteqartup Lars Karl Jensen-ip pulaffigimmagu
apeqquserlugu qanoq-una ililluta tikisitarpassuit pinngitsoorniarivut. Taanna
uanga akisimanngilara saqqummiussami taamatut apersuusiineqanngimmat.
Kisianni aamma qularisariaqanngitsoq
aamma Danmark-imi ilami nunanilu allani England-imi aamma taamaattoqassaaq.
Nunanut naalagaafimmut atasuni ungasissorsuarmut aallassagaangamik
kisimiinngikkaanni, tassa ilaqutaqaraanni, allatut ajornaqaaq ilaquttat
eqqarsaatigeqqaartariaqartarput. Aamma taakkununnga taamaappoq. Ilaat
oqartarpugut takusassaqarusullutik qilanaarlutik allanut aallartarput. Oqarta
immaqa aningaasaq eqqarsaatigivallaarnagit. Ilaali aningaasat
eqqarsaatiginerullugit aamma aallartarlutik.
Issaq oqaaseqarninni maani assut
assuaraakka assupilorujussuaq, taama atorfissaqartitavut oqallisigitigalugit
tikisittarivut hotel-inullu inissittarlugit, qanoq maaniluunniit
hotel-iniittartusi nalunngilluinnartigigissi qaammat naammatsillugu
maaniileraangassi qanoq qasunarluinnaqqeqqissaartigisoq. Taamaattumik
tikisitanut taamatut innersuussisarneq, pingaartumik ilaqutalinnut ullumikkut
oqaatsitsinnut ilannguttariaqarpoq, atorfissaqartilluinnakkat taamatut
atugassaqartinneri aamma oqaaseqartup maani ilaasa ersersitaat
ataannarsinnaanngillat. Pitsaanersumik iliorneqanngikkunik tikisinniakkavut
atorfissaqartitavut ikiliartuinnassapput.
Tassaana siunnersuuteqartup taanna qiteritikkaa. Qanoq iliussavavut ajornartorsiut taanna tikissimasarput, aggeqquqalugillu kisiannili pitsaanerulaartumik pisinnaanagit. Taanna ikkarlittut tikkuarpaa. Qanoq ilillugulu qaangerniarneqarsinnaasoq oqaatigalugu.
Kisianni Antuup taamatut erseqqaritsigisumik oqaaseqarnera assersuussinnaagunarpara soorlu qanga sumi inunngorsimanerup pissuserpiaanut. Qaalunaat maaniittut pitsaasorujussuarmik periarlugit kisianni nunaqqativut allaanerusumik akilerlugilluunniit inissaqartinnissaat Atassummiit taanna naamerluinnaq piumanngilarput.
Kisianni atorfissaqartilluinnakkatsinnut qanoq iliuuseqarsinnaanerput qaangerneqarsinnaassagunarpoq aatsaat inissianik ima amerlatigisunik peqalerutta uatsitulli ineqartissinnaanngorlugit, meeraallu pitsaasumik iliorsinnaanngorlugit. Taanna takugunikku qularnanngitsumik taakku aggersinnaanertik ullumimut naleqqiullugu orniginerusussaavaat. Kisianni oqaatsitsinni ima oqaatigaarput, ullumikkut pissutsit taamaatsillugit ukiorpaalussuugallassapput ajoraluartumik inissaqartitsinnginnerput qaangerniaasaarusaartussaagatsigu.
Aamma kalaaleqateqaratta imannak oqartartunik: ASooq-un uanga ingiarlunga una tassunga atorfinittoq, sooq-una aamma uagut ingiarluta inissaraluartinnut aamma isertoq@. Tamakkuupput aamma eqqarsaatigisariaqakkavut. Aamma paasinartumik taama uparuaasoqartarpoq.
Lars Karl Jensen, siunnersuuteqartoq:
Oqallisigineqartussatut isummersuiffiusussatullu allassimasakka taakkua sammilluarneqarmata nuannaarutigaara.
Uani Tuusi misiarfigissanngilakkit inuunniarnikkut oqilisaanneqarnissaannut tunngasut taagakkit tikisitanut taanna allassimasara ilumoorpoq. Kisianni imatut paasineqassanngilaq nunaqavissuninngaanniit immikkoortitaallutik pineqassasut. Una piinnarpara Qallunaat Nunaata naalagaaffiata nalunngilaa nunarput ineriartorfiusoq, aammalu nammineq innuttani nunatsinni siuarsaanermut suleqataaniarlutik suliartortut atugarisaat tappiffigineqartariaqartut tassani naalagaaffimminngaanniit isumaqarfigaakka.
Otto-p assersuutigalugu uani allannikuusara taasaa ilumoorpoq. Hotel-imi ineqarneq qasunartorujussuuvoq. Ingammik meerartaqartuni. Taavalu sulilereerlutik aappariiusimagunik meeraqarunillu, meeraasa inissaaleqinermi suliffimmi tusiassutaalissaaq. Tamakkua aningaasarpassuarnik nunatsinnut akeqartartussatut uanga naatsorsuutigaakka, nunatta suna tamaat akilersormagu.
Taavalu aamma sulisussarsioraangatta amerlanertigut suliffeqarfimmi ataasiinnarmi sulisussarsiortarpugut. Kisianni aamma suliartortup soorlu siusinnerusukkut oqaatigereeriga aappaqarsimaguni aappami suliffeqarnissaa qulakkeerusuttarpaa.
Naalagaaffimmik isumaqatigiinniartartugut Naalakkersuisut isumaqarpunga oqaloqatiginninnissaminnik tulliani tamakkua ilanngullugit eqqartortariaqaraat nunatsinnut tapeeriaatsip aamma millisinniarneqarnera ukiuni tullerni pakkerniarneqartussaammat suli nammineq ilinniarsimasunik peqalivinnginnerput aallaavigalugu. Suliartorallartussalluunniit taamatut taavakka ukiut pingasut nunatsiniikkallartarmata amerlanerit isumaqatigiissutinut pituttugaanertik pissutigalugu.
Aappaasa ukioq siulleq suliffissarsinissaasa tungaanut naalagaaffiup angerlarsimaffigineqarnermisut innuttaminut pisinnaatitaaffii kalinneqalaartartunngorlugit pineqartuuppata nunatsinni suliffeqarnikkut aammalu aningaasaqarnikkut isumaqarpunga pitsanngorsaataasinnaasut. Taamaattumik naalagaaffimmik oqaloqatiginnittartut Naalakkersuisunit tamakku eqqarsaatigeqqussavakka naggataarutaasumik.
Daniel Skifte, Aningaasaqarnermut Ineqarnermullu Naalakkersuisoq:
Oqaluttumit kingullerminngaanniit aallartissaanga.
Aap, siunnersuuteqartup kaammattuutaa ingerlateriaqqissavarput. Apeqqut pisariaqartuummat qanoq iliuuseqarfiginiassavarput. Kisianni akissuteqaatinni Naalakkersuisut sinnerlugit taanna innersuussutigalugu taamatut oqaannassaanga.
Maanga qaqininnut peequtima anginerpaartaraat Kattuseqatigiinninngaanneersoq Anthon Frederisenip oqaaseqarfigilaarniarakku. Tassa taamatut tikkuartuussigama oqaasiilu issuarlugit ilaatigut issuaaqqissaanga aappassaa: AAkissarsiamikkut ikilisaaffigineqarsimanerat tassa nakorsat, sygeplejerske-t juumuullu@, taanaana eqqortuunngitsoq taagakku taava oqaloqqinnermini ilaatigut soorluluunniit paasilluarnissimannginnermik oqaaseqarnera imatut oqaaseqarfigerusukkiga, aamma Anthon Frederiksen-ip nassuerutigisinnaasariaqarpaa nammineq oqaatsit allaganngorlugit tunniussani taamatut nipeqarmata.
Aamma peqqinnissaqarfik pillugu 42 mill. koruunit taammagit oqaaseqarfigissavara. Ullumikkut aningaasanik ilassutissanik inatsisissat imaluunniit 1999-imi aningaasanut inatsisissaq eqqartunnginnatsigu. Taanna annertunerusumik oqaaseqarfigissanngilara. Kisianni aamma uanga nassuerutigissavara Anthon Frederiksen-ip isumaa una isumaqatigigakku: AAssigiinngitsut atugaasa pitsanngorsarneqarnissaat@. Tassuuna pitsanngorsaaqataarusunnermik oqariartuutaa taanna isumaqatigaara. Taanna Naalakkersuisut assigiinngitsunik iliuuseqarniarlutik nalunaaruteqartareerput, aammalu nalunaaruteqarumaarlutik, suli manna ataatsimiinneq naammassinngitsoq.
Anders Andreassen, ataatsimiinnermik aqutsisoq:
Taamaalilluni ullumikkut oqaluuserisassap immikkoortup 61-ip oqaluuserineqarnera naammassivoq. Aammalu ullumikkut oqaluuserisassavut tamakkerpavut. Taavalu ataasinngorpat immik-koortut arlaqangaatsiarput, kisiannili aappassaaniigassaapput tamarmik.
Ataatsimiinneq tamaanga killeqarpoq.
Oqaluuserisaq naammassivoq.