Kalaallit Nunaanni Inatsisartut

Oqaluuserisassani immikkoortoq 62

Ataatsimiinnerit ] Tilbage ] Op ] Næste ]

Siullermeerneqarnera Aappassaanneerneqarnera Pingajussaaneerneqarnera

Pingasunngorneq 7. oktober 1998 nal. 13.20

 

Ullormut oqaluuserisassani immikkoortoq 62

 

Radiuaqqat VHF-it pillugit pingasunngornikkut apeqquteqaat.

(Niels Mátâq)

 

 

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq.

 

Niels Mátâq, Siumut:

Radiuaqqat VHF-it pillugit apeqquteqaateqarniarpunga.

 

Upernaviup eqqaani qaleraleqarfinni ilaatigut kangisissuni sakkortusaaviit tarrittarlugit aalisarto­qarpoq, radiuaqqat VHF-it Upernaviup eqqaani qaarsorsuarmi sakkortusaaveqarput, taamaan­neralu avataani angalasunut assut iluaqutaalluni.

 

Aalisartullu amerlasuut Upernaviup avannaata kangiani aalisartut ilaatigut pisariaqartunik nalunaarutissaqaraluarlutik attaveqarniapiloortarsimapput amerlanertigullu attaveqartarsimanatik. Maannakkullu TV-kut radiukkullu Upernaviup nunaqarfiini tamani sakkortusaavitsigut iluarsaas­sisoqarpoq, ullumikkullu Kullorsuaq ilanngullugu toqqaannartumik TV-kut isiginnaartoqarsin­naalernikuulluni radiokkullu ajunngitsumik naalaartoqarsinnaalernikuulluni.

 

Taakkununngalu taasannut Qaarsorsuarmiit Kullorsuaq ilanngullugu sakkortusaaviit iluarsini­kuupput, taakku sakkortusaaviit atorluarniarlugit VHF radiut sakkortusaavilerneqarsinnaanngin­nerpat?

 

Peter Grønvold Samuelsen, Takornariaqarnermut, Angallannermut, Niuernermut Attaveqaati­nullu Naalakkersuisoq:

Inatsisartunut ilaasortaq Niels Mátâq aperaaq Qaarsorsuarmi, Nuussuarmi, Kingatassuarmi Kullorsuarmilu toqqaannartumik TV-kut isiginnaarsinnaanissamut radiumullu sakkortusaaviit pioreersut iluaqutigalugit VHF-radiut sakkortusaavilerneqarsinnaanersut.

 

VHF-ikkut attaveqarniarneq immikkut aallakaatitsissuteqarlunilu tigooraassuteqarpoq, taamaat­tumik TV-mut radiumullu sakkortusaaviit pioreersut atorneqarsinnaanngillat.

 


Upernaviup eqqaa ullumikkut ataatsimik VHF-inut aallakaatitsissuteqarlunilu tigooraassuteqar­poq Qaarsorsuarni inissinneqarsimasumik. Umiatsiaaqqat anginerit taamaallaat Kullorsuup kujataatungaa killiffigalugu ullumikkut atuisinnaammata ilumoorpoq. Umiatsiaaqqat attaveqar­sinnaanerat annikinneruvoq VHF-antennit umiatsiaaqqani appasinnerusumiittarmata.

 

VHF-ikkut radioqarneq naalagaaffiup oqartussaaffigaa Naalagaaffimmillu aningaasalersorneqar­luni - ilaatigut Tele Danmark A/S-imiit imarsiortut navialinermi isumannaallisaanermilu attaveqaateqarsinnaanerat eqqarsaatigalugu. Imarsiortut nalinginnaasumik attaveqaateqarsinnaa­nerat Tele Greenland A/S-ip akisussaaffigaa. VHF-ikkut aallakaatitsissutit tigooraassutillu annertusaavigineqarnissaat nutaanillu pilersitsivigineqarnissaat aatsaat pisinnaavoq Tele Green­land A/S-ip aamma Tele Danmark A/S-ip akornanni isumaqatigiinniuteqartoqareerneratigut, tassa tamanna taaneqartup kingulliup akisussaaffigimmagu, taamaattumillu inaarutaasumik aalajangiiffigisinnaallugu.

 

Naalakkersuisulli piareersimaffigaat Upernaviup eqqaata sukumiinerusumik misissuiffigineqar­nissaa Tinumanersuarmi imaluunniit Kullorsuarmi VHF-ikkut aallakaatitsissummik tigooraas­summillu nutaamik pilersitsisoqarsinnaanera paasiniarlugu. Kisianni erseqqissumik oqaatigine­qassaaq Kingatassuarmi VHF-ikkut aallakaatitsissummik tigooraassummillu pilersitsisoqarsin­naanngimmat, tassani sakkortusaavik sakkukitsoq pineqarmat, naammattumik piginnaaneqann­gitsoq.

 

Naalakkersuisut Tele Greenland A/S suleqatigalugu sulissutiginiarpaat VHF-imik atuinermi pisariaqartitat misissuiffigineqarnissaat taaneqartullu pilersitsivigineqarnissaannut periarfissat naliliiffigissallugit. Tamanna pereerpat oqallisissiaq Tele Danmark A/S-imik oqaloqatiginnissuti­gineqarumaarpoq. Sumiiffimmi misissuinissat arlallit ingerlanneqaqqaartariaqarmata Naalakker­suisut Tele Greenland A/S-illu Tele Danmark A/S-imik oqaloqatiginnissutissaat 1999-imi ukiakkut aatsaat suliarineqarsinnaassasoq naatsorsuutigineqarsinnaavoq.

 

Oqaluuserisaq naammassivoq.