Kalaallit Nunaanni Inatsisartut

Oqaluuserisassani immikkoortoq 68		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 7. oktober 1998 nal. 14.03

 

Oqaluuserisassani immikkoortoq 68

 

Tasermiuni VHF-imik atuisinnaalernissaq pillugu pingasunngornikkut apeqquteqaat.

(Kristine Raahauge)

 

 

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq, Atassut.

 

Kristine Raahauge, apeqquteqartoq, Siumut:

Tasermiuni VHF-imik atuisinnaalernissamik piaartumik periarfissiisoqarnissaa pillugu apeqqute­qaat. Apeqquteqaateqarnernullu saqqummiussinissannut tunngaviginiarsimavara Tele Attaveqaat A/S-imut akuersissut pillugu nalunaarummi ' 7-at tunngavigalugu. Tassalu akuersissummik pigisaqartoq pisussaasoq Naalakkersuisut erseqqissumik aalajangiinerat malillugu suliassat immikkut ittut suliarissallugit iluanaaruteqarnani imaluunniit ajunaaruteqarluni.

 

Tassalu taanna periarfissaq atorneqarsinnaanera tunngavigalugu taamak apeqquteqaateqarpunga. Soorlu naluneqanngitsoq Tasermiuni arlariinnik savaateqartoqartoq aammalu meeqqat atuartut aallaarsimaarfeqartut. Massakkullu suli periarfissinneqarsimanngillat attaveqarsinnaanissamut, uffalu pisariaqartitsigaluaqalutik. Aammalu angallatikkut, umiarsuakkut radiukkut kiffartuussin­naaneq ajornartarluni. Imakkut ukiuni makkunani annertusiartuinnarpoq, tassami aamma takornarissat nunatta sineriaaniit aggersut aammalu nunaniit allaneersut ukiut tamaasa takkuttar­tut nalinginnaalernikuummata.

 

Angallannermi sillimmatit pingaarnersaannut ilaavoq radiukkut attaveqapallattarsinnaaneq, ullutsinnilu angallattakkanik telefonikkut atassuteqarsinnaaneq aamma killeqarluni. Aammalu umiartornermik ilisimasaqarluartut kiisalu Tele-p mianersoqqussutigereerpaa angallattit VHF-imik atuinertik unitsissanngikkaat, tassamigooq pisariaqavitsillugu angallattakkamik telefon-imik atuisinnaaneq sillimmatissaanngimmat kigaappallaaqimmat. Kisiannilu VHF-radio atorlugu attaveqaraanni piaartumik ikiorsinneqarsinnaaneq kiffartuunneqapallassinnaanerlu anguneqarsin­naammat.

 

Peter G. Samuelsen, Takornariaqarnermut, Angallannermut, Niuernermut Attaveqaatinullu Naalakkersuisoq:

Inatsisartunut ilaasortap Kristine Raahauge-p apeqqutigaa Tasermiuni VHF-ikkut attaveqaasiiso­qarsinnaanersoq. Tamatumunnga patsisaatinneqarpoq Tasermiuni arlariinnik savaateqarfeqarnera aammalu meeqqat atuartut aallaarsimaartarfeqarnerat kiisalu ukiuni kingullerni amerlanerujartor­tut immakkut angallattarnerat.

 

Nunaqarfinni savaateqarfinnilu nalunaarasuartaatitigut attaveqaatit ineriartortitsivigineqarnis­saannut 1999-imut Tele Greenland A/S-ip pilersaarutai sap. ak. kingullermi Naalakkersuisunit akuersissutigineqarput. Ineriartortitsinissamut pilersaarutit ukiut tallimat ingerlaneranni suliari­neqassapput, anguniagaavorlu nunaqarfiit 50-init amerlanerusunit najugaqarfigineqartut tamar­mik oqarasuaatikkut attaveqarnissamut aammalu KNR-ip FM-ikkut TV-kkullu aallakaatitaanik illoqarfimmiutulli atugaqartitaalernissaminnut neqeroorfigineqarsinnaanissaat.

 

Qujanartumik paasinasisimavoq naatsorsauutigineqaqqaartumiit anguniakkat pitsaanerusumik angusaqarfiusinnaasut, taamaalilluni siunertarineqalerpoq nunaqarfiit 30-nit amerlanerusunit najugaqarfigineqartut tamarmik oqarasuaatikkut attaveqalernissamut periarfissinneqarnissaat. Ineriartortitsinissamik pilersaarutit 1999-imi naammassineqarpata nunaqarfinni najugaqartut 99,6 %-ii oqarasuaatikkut attaveqalersinnaassapput nunaqarfimmilu innuttaasut tamarmiusut 99,7 %-ii periarfissaqassallutik KNR-ip TV-ianik isiginnaarnissamut kiisalu nunaqarfinni najugaqartut tamarmik FM-radio tusarnaarsinnaalersimassallugu.

 

Kujataani savaatillit eqqarsaatigalugit pissutsit allaanerulaarput, tassa KNR-ip radiukkut aalla­kaatitai mellembølge atorlugu tusarnaarsinnaavaat. Taakku 92 %-ii VHF-ikkut Qaqortoq Radio aqqutigalugu imaluunniit nalinginnaasumik oqarasuaatikkut attaveqaatit atorlugit attaveqarsin­naapput savaateqarfiillu affangajaasa TV isiginnaarsinnaallugu. Oqarasuarnissamut, radio-mik tusarnaarnissamut TV-kkullu aallakaatitanik isiginnaarnissamut savaateqarfiit sapinngisamik periarfissinneqarnissaat suliassaavoq Naalakkersuisunit Tele Greenland A/S-imillu pingaartinne­qartoq. Tassunga atatillugu Naalakkersuisut nalunaarutigisinnaavaat Tele Greenland A/S-ip maannakkorpiaq suliarigaa paasiuminaallisaatinik pilersitsinissaq, taamaalillutik savaateqarfiit VHF aqqutigalugu oqaloqatiginnissinnaalissallutik allanit tusarnaarneqaratik.

 

Savaateqarfiit ullumikkut pisortat oqarasuaatinut attaveqaataannik atuisinnaasut savaateqarfiillu suli pisortat oqarasuaatinut attaveqaataannik atuisinnaanngitsut attaveqaateqarnikkut periarfis­saasa pitsaanerulersinneqarnissaannut periarfissat ukiuni kingullerni misissorneqarsimapput. Ilimagineqarpoq 1999-ip ingerlanerani teknikkikkut periarfissaqalissasoq savaateqarfiit amerla­nersaasa pisortat oqarasuaatinut attaveqaataannik atuisinnaalernissaq ukiut tulliuttut ingerla­neranni pilersikkiartuaarneqassaaq.

 

Taakku saniatigut Naalakkersuisut erseqqissassavaat VHF-radioqarneq naalagaaffiup oqartus­saaffigimmagu Naalagaaffimmilu aningaasalersorneqarluni. Ilaatigut Tele Denmark A/S-imit imarsiortut navialernermi isumannaallisaanermilu attaveqaateqarsinnaanerat eqqarsaatigalugu. Tassa imaappoq VHF-imik atuiffiusinnaasut annertusarneqarnissaat VHF-ikkullu attaveqaatit nutaat pilersinneqarnissaat aatsaat pisinnaavoq Tele Greenland A/S-ip aamma Tele Denmark A/S-ip akornanni isumaqatigiinniuteqartoqareerneratigut, tassa tamanna taaneqartup kingulliup akisussaaffigimmagu, taamaattumillu inaarutaasumik aalajangiiffigisinnaallugu.

 

Naalakkersuisut, Tele Greenland A/S suleqatigalugu, sulissutiginiarpaat VHF-imik atuinermi pisariaqartitat misissuiffigineqarnissaat taaneqartullu pilersitsivigineqarnissaannut periarfissat naliliiffigissallugit. Tamanna pereerpat oqallisissiaq Tele Denmark A/S-imik oqaloqatiginnissuti­gineqarumaarpoq.

 

Kristine Raahauge, Siumut:

Naalakkersuisup akissuteqaataanut qujavunga, tassami paasissutissarpassuarnik imaqarmat. Siunnersuut una qangali siunnersuutigissamaartarsimagaluarpara, kisiannili telefonit angallattak­kat qanoq atorsinnaatigineri utaqqisimaarsimallugu massakkullu  tassa paasisat naapertorlugit imarsiorluni angalanermi navianartorsiornermi atorsinnaanerat taama killeqartigimmat taanna siunnersuut ingerlassimavara.

 

Neriuppunga ajornerusumik angallanneq kinguneqartumik pisoqartinnagu Naalakkersuisut pisussaaffitsik. Tassa Naalakkersuisut erseqqinnerusumik aalajangiinerat malillugu suliassat immikkut ittut suliarineqartarnissaanut, taanna akuerisamut sullissisumut piumasaqaataasinnaa­soq atorlugu piaartumik aaqqiiumaartut.

 

Oqaluuserisaq naammassivoq.