Oqaluuserisassani immikkoortoq 76-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataatsimiinnermik aqutsisoq: Anders
Andreassen, Siulittaasoq, Siumut.
Finn Karlsen, Isumaginninnermut Suliffeqarnermut
Ataatsimiitiliap siulittaasua:
Inatsisartut Isumaginninnermut
Suliffeqarnermullu ataatsimiititaliaata isumaliutissiissutaa saqqummiutissavara:
Inatsisartut Isumaginninnermut
Suliffeqarnermullu ataatsimiititaliaata siunnersuut oqaaseqaatitai
ilanngullugit suliaraa.
Siunnersuut 1998-imi upernaakkut
ataatsimiinnermi siullermeerlugu suliarineqarpoq.
1997-imi Isumaginninnermik
Iluarsaaqqinnissamut Ataatsimiitsitaliarsuup isumaginninnermi
naammagittaalliuuteqartarnerup aamma Isumaginninnermi
Naammagittaalliuuteqartarfiup allanngortinneqarnissaat kaammattuutigaa.
Ataatsimiititaliarsuup isumaliutissiissutaa Inatsisartunit tusaatissatut
tiguneqarpoq. Taamaattumik ataatsimiititamit iluarisimaarneqarpoq
Naalakkersuisut kaammattuutit tamakku peqqussutissatut siunnersuutikkut
matumuuna malitseqartimmatigit.
Ataatsimiititap siunnersuummik
suliarinninnermini pingaartippaaaisumaginninnerup iluani innuttaasut
inatsisitigut illersugaanerisa pitsanngoriartinneqarnissaanut siunnersuut
marlutsigut peqataaqataammat.
Siullermik siunnersuutip
kingunerissavaa sulianik ingerlatsinerup sivikinnerulerlunilu eqaannerulernera,
tassa kommunimi aalajangiineq toqqaannartumik Isumaginninnermi
Naammagittaalliuteqartarfimmut, kommunalbestyrelsi naammagittaalliuteqarfittut
siullertut atunngikkaluarlugu, suliassanngortinneqarsinnaalermat.
Aappaattut siunnersuutip
kingunerissavaa Isumaginninnermi Naammagittaalliuuteqartarfiup allatut
isikkulerlugu inuttalersorneratigut ataatsimiititatut suliamik ilisimasalittut
inissisimalernissaa, naammagittaalliutillu isumaginninnermi inatsisinik
tunngaveqarluni ataatsimiititamit nalilerneqartalissapput.
Taamaattumik innuttaasut
inatsisitigut illersugaanerisa pitsanngornissaannik siunnersuutip
kinguneqarnissaa ataatsimiititap isumaqatigiittup tamakkiisumik taperserpaa.
Taamaattorli Isumaginninnermi
Naammagittaalliuuteqartarfiup siulittaasuata inatsisilerituutut ilinniagaqarsimanissaanik
piumasaqaat naammaginarnersoq ataatsimiititap sukumiisumik oqaluuseraa.
Ataatsimiititaq isumaqarpoq ataatsimiititap isumaginninnermi inatsisinik
ilisimasaqarnerata nukittorsarneqarnissaanik siunertaq ataatsimiititami
siulittaasup inatsisilerituujunerinnaatigut qulakkeerneqarsinnaanngitsoq.
Taamaattumik siulittaasup isumaginninnermut isumaginninnermut tunngasunik
inatsisinik sukumiisumik ilisimasaqarnissaa pillugu aalajangersakkamik
ilusiliisoqartariaqarpoq.
Ataatsimiititaq isumaqatigiittoq
matumuuna allannguutissatut siunnersuummik imaattumik saqqummiiussivoq:
' 8, imm. 1 naggatit pingajuat ima oqaasertalerneqassaaq:
ASiulittaasoq inatsisilerituutut soraarummeersimassaaq aamma/imaluunniit
Kalaallit Nunaanni isumaginninnermi inatsisinut tunngasunik sukumiisumik
ilisimasaqassaaq@.
Ataatsimiititap ilanngullugu
malugeqqussavaa utoqqarnik paaqqinniffiit il.il. pillugit Inatsisartut
peqqussutissaattut siunnersuummi (UKA98/43) oqaluuserineqarsimasoq inatsisinut
tunngasut misissorneqarneranni Inatsiseqarnermut allaffeqarfiup oqaatigimmagu Akommunimi isumaginninnermut tunngasunik ulluinnarni
ingerlatsinermi ataatsimiititaq ataavartoq@-mik taaguut Akommunalbestyrelsi@-nngorlugu allanngortinneqassasoq.
Utoqqarnik paaqqinniffiit il.il.
pillugit Inatsisartut peqqussutissaattut siunnersuutip inatsisinut
tunngasortaata misissorneqarnerata
kingunerisaatut taaguut isumaginnittoqarfiup aqunneqarnera aaqqissuussaaneralu pillugit
Inatsisartut peqqussutissaattut siunnersuummi aamma allanngortinneqarnissaa
siunnersuutigineqarpoq.
Taamaattumik siunnersuutip
siullermeerlugu suliarineqarnerata kingorna Naalakkersuisunut ilaasortap
siunnersuummi ima allanngortitsisoqarnissaa siunnersuutigaa:
' 5, imm. 2 ima
oqaasertaqalissaaq:
AKommunit
aggornerisa avataani suliassat nalinginnaasumik kommunimi kommunalbestyrelsimit
suliarineqartartut Isumaginninnermut Pisortaqarfimmit suliarineqassapput.@
Taamatut
oqaaseqarluni ataatsimiititaliaq isumaqatigiittoq inassuteqarpoq
isumaginnittoqarfiup aqunneqarnera aaqqissuussaaneralu pillugit Inatsisartut
peqqussutissaattut siunnersuut maannakkutut iluseqarluni Inatsisartunut
aappassaaneerlugu suliarineqassasoq.
Ataatsimiititaliami
ilaasortaapput:
Ruth
Heilmann (S)
Laannguaq
Lynge (S)
Jakob Sivertsen (A)
Finn Karlsen (A)
Lars Sørensen (IA).
Mikael Petersen, Isumaginninnermut, Suliffeqarnermut,
Pisortallu Suliassaqarfiutaannut Naalakkersuisoq:
Isumaginnittoqafiup aqunneqarnera
aaqqissuussaaneralu pillugit Inatsisartut peqqussutissaattut siunnersuut
Inatsisartut Isumaginninnermut, Suliffeqarnermullu ataatsimiitsitaliaata
suliarisimavaa.
Isumaliutissiissummillu
allannguutissanik marlunnik siunnersuuteqartumik saqqummiussilluni.
Ilaatigut ' 8, imm. 1-imi oqaaseqatigiit pingajuanni
Isumaginninnermi Naammagittaalliuuteqartarfiup Siulittaasussaanik toqqaanermut
ilaatigullu naleqqussaataasumik ' 5, imm. 2-p
allanngortinneqarnissaanut tunngasunik.
Ataatsimiititaliap pingaartissimavaa
Isumaginninnermi Naammagittaalliuuteqartarfiup aalajangersaaffiunissaa sulianik
ilisimasalinnik inuttaqartoq tamatumunngalu atatillugu ataatsimiititaliap
oqallisigisimavaa ilumut naammagittaalliuuteqartarfik inatsisilerituumik
siulittaasoqartariaqarnersoq.
Ataatsimiititaliaq isumaqarpoq
siulittaasup isumaginninnermi inatsisinik sukumiisumik ilisimasaqartuunissaa,
isumaginninnermilu sulinikkut misilittagaqartuunissaa pingaartuusoq
tamaattumillu ' 8, imm. 1-imi oqaaseqatigiit
pingajuisa allanngortinneqarnissaat siunnersuutigalugu
naammagittaalliuuteqartarfiup siulittaasussaanik inatsisilerituutut ilinniarsimanngikkaluartumik toqqaasinnaaneq
periarfissalerlugu.
Aammattaaq ' 5, imm. 2-p oqaasertalersugaanermigut
naleqqussaataasumik allanngortinneqarnissaa ataatsimiititaliap siunnersuutigaa
taamaalillunilu oqaaseqatigiit kommunini ataatsimiititaliani ataavartunit
kommunip ulluinnarni isumaginninnikkut suliaanik ingerlatsisartunit
naliginnaasumik kommunimi kommunalbestyrelsimit taarserneqarlutik.
Ataatsimiititaliap siunnersuutai
Naalakkersuisut isumaqatigaat tamannalu tunngavigalugu Isumaginnittoqarfiup
aqunneqarnera aaqqissuussaaneralu pillugit Inatsisartut peqqussutissaattut
siunnersuutip ataatsimiititaliamit siunnersuutigineqartunik ilaneqarluni
pingajussaaneerneqarnissaminut ingerlateqqinneqarnissaa siunnersuutigalugu.
Laannguaq Lynge, Siumut oqaaseqartua:
Peqqussutissamik siunnersuut
pineqartoq upernaaq 1998-imi
siullermeerneqarmat siumuminngaanniit siunnersuummut allannguutissamik
siunnersuuteqarpugut.
Siunnersuutigaarput Isumaginninnermi
Naammagittaalliuuteqartarfiup siunissami siunnersuutigineqartutut
inatsisilerituutut soraarummeersimasunik siulittaasoqarnissaanik piumasaqarneq
isumaqatiginagu nalunaarutigigatsigu.
Taarsiullugu siunnersuutigalugu siulittaasoq
inatsisilerituujunngikkaluarluni inunnik isumaginninnermik suliat inatsisitigut
allatigullu suliarineqarnissaanik ilinniagaqarsimasuussasoq imaluunniit
ilisimaarinnilluartuussasoq.
Siumumi nuannaarutigaarput
Isumaginninnermut, Suliffeqarnermllu Ataatsimiititaliap allannguutissatut
siunnersuuterput oqaluuserilluareerlugu peqqussutissap ' 8, imm. 1-ip naggataatigut oqaasertaliussat
allannguutissaannik siunnersuuteqartoq imaattunik:
ASiulittaasoq inatsisilerituutut soraarummersimassaaq
aamma imaluunniit Kalaallit Nunaanni isumaginnermi inatsisinik tunngasunik
sukumiisunik ilisimasaqassaaq@.
Siumumit Ataatsimiititaliap allannguutissatut siunnersuutaa tamakkisumik
taperserlugu akuersissutigineqarnissaa inassutigissavarput.
Qujassutigissavarput
Ataatsimiititaliap Siumup peqqussutissatut siunnersuutip siullermeerneqarnerani
allannguutissatut siunnersuutaanut paasinnilluni tapersiinerat.
Taama oqaaseqarluta Siumumit
peqqussutissatut siunnersuutip Ataatsimiititaliap isumaliutissiissutaatigut
siunnersuutigineqartutuut isikkoqarluni pingajussaaneerneqarnissaminut
ingerlaqqinnissaanut akuersaarluta taaseqataassaagut.
Taamatulli aamma oqaluuserisassami
43-mi oqaasertatigut allannguuteqartinnissaata isumaliutissiissummik inassutigineqarneratuut.
Tassani aappassaanerinninnissamut aamma isumaqataalluta taaseqataassaagut.
Jakob Sivertsen, Atassut:
Peqqussutissamut siunnersuutip siullermeerlugu
oqaluuserineqarmat Atassummit allannguutissamik saqqummiussaqarsimanngilagut.
Taamaattorli peqqussutissamut
siunnersuutip Ataatsimiititaliami suliarineqarnerani Isumaginninnermut
Pisortaqarfimmiit teknikkikkut allannguutissaq saqqummiunneqarpoq, taannalu
peqqussutip ilusaanut allannguutaaniimmat Atassummit isumaqatigisimavarput.
Kiisalu naammagittaalliuuteqartarfiup
tassa Isumaginninnermi Naammagittaalliuuteqartarfiup, inuttalersugaaneranut
tunngatillugu siulittaasup inatsisilerituujunissaanik peqqussutissami
kissaatigineqartup inatsisinik suliassanullu paasisimasaqartuunissaanik ilaneqarnissaa
Ataatsimiititaliamit piumasarineqartoq Atassummit akornutissaqartinngilarput.
Nunatsinni inunnik isumaginninnermut
tunngasunik suliaqarneq mianernartuuvoq inuit misigissusaannut annertuumik
attuisarnera peqqutigalugu. Taamaammat pisariaqarpoq inunnik isumaginninnermik
tunngasunik suliaqartut innuttaasunik eqqortumik sullissisarnissaat Atassummit
assut pingaartikkatsigu.
Matumuuna Atassummit
oqaatigissavarput peqqussutissaq manna oqaluuserisarput innuttaasut inunnik
isumaginninnermut tunngasunik sullinneqartut eqqunngitsumik pineqarsorisut
naammagittaalliuuteqarnissaminut periarfissaat pitsaanerullutillu
sukkanerusumillu naammassineqartalernissaannik kinguneqartussaammat.
Taamatut oqaaseqarluta
peqqussutissamut siunnersuut teknikkikkut aaqqiissutissaq
allannguutimininnguarlu ilanngullugu taamatut isikkoqarluni
pingajussaaneerneqarnissaminut ingerlaqqinnissaa Atassummit
taaseqataaffigissagatsigu.
Lars Sørensen, Inuit Ataqatigiit oqaaseqartuat:
Inuit Ataqatigiit Inatsisartut Isumaginninnermut
Ataatsimiititaliaata isumaliutissiissutaa tunngaviatigut tamakkiisumik
taperseratsigut oqaatigiinnassavarput.
Taamatullu Naalakkersuisut
allannguutissanut siunnersuutinut paasinnittumik akissuteqaataata aamma
iluarisimaarlugu oqaatigissallugu.
Taamaattumik peqqussutissatut
siunnersuut taamatut isikkoqarluni pingajussaaneer-neqarnissamiut
ingerlaqqinnissaa innerssuussutigaarput.
Anthon Frederiksen, Kattusseqatigiit:
Peqqussutissatut siunnersuutip upernaaq ataatsimiinnermi
siullermeerneqarluni oqaluuserineqarnerani Kattusseqatigiit sinnerlugit
oqaaseqaatikka innersuussutigalugit erseqqissaassutigissuara
Kattusseqatigiinniit pingaartikkatsigu, inuit ikiortariaqalersimasut
pissusissaq eqqorlugu inatsisinillu peqqussutinullu atuuttunut naapertuuttumik
kiffartuunneqartarnissaat.
Taamatut kiffartuussinermi
pingaaruteqarluinnarpoq suliamut immikkut ilisimasaqarluarnissaq eqqortumik
aalajangiinissat qulakkeerniarlugit. Taamaattumik Ataatsimiititaliap
allannguutissatut siunnersuutai tamakkiisumik taperserlugit taaseqataassuunga.
Taamatut naatsumik oqaaseqarlunga
siunnersuutip taamatut isikkoqarluni pingajussaaneerneqarnissaminut
ingerlateqqinneqarnissaa isumaqatigaara.
Anders Andreassen, ataatsimiinnermik aqutsisoq:
Taavalu taasissaagut, tassa suliap
Isumaginninnermut Ataatsimiititaliap isumaliutissiissutaasut iluseqarluni
pingajussaaneernissaanut akuersisut nikueqqussavakka 27. Isersimasut tamarmik
taanna akueraat.
Taamaasilluta imm. 76, Isumaginnittoqarfiup
aqunneqarnera aaqqissuunneqarneralu pillugit Inatsisartut peqqussutissaannut
siunnersuutip aappassaaneerneqarnera naammassivarput. Pingajussaanullu
ingerlaqqinnissaminut piareerluni.
Oqaluuserisaq naammassivoq.
Ataatsiminneq maannakkut unikkallarpoq.