Oqaluuserisassani immikkoortoq 79 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinermik
aqutsisoq: Inatsisartut siulittaasuata tullia Finn Karlsen.
Kristine
Raahauge, Kukkunersuinermi ataatsimiititalip siulittaasua,
Siumut:
Isumaliutissiissut
Landskassip 1997-imut naatsorsuutaanut Landskassip naatsorsuutaasa kukkunersiorneqartarneranut
ataatsimiititaliami, Landskassip naatsorsuutaasa kukkunersiorneqartarnerannut
ataatsimiititami suliarinninnermi peqataapput:
Inatsisartuni
ilaasortaq Kristine Raahauge, Siumut, siulittaasoq, Inatsisartuni ilaasortaq
Anders Nielsson, Atassut, Inatsisartuni ilaasortaq Ruth Heilmann, Siumut,
Inatsisartuni ilaasortaq Jakob Sivertsen, Atassut aamma Inatsiartuni ilaasortaq
Lars Sĝrensen, Inuit Ataqatigiit.
Inatsisartut
Landskassip naatsorsuutaasa kukkunersiorneqartarneranuut ataatsimiititaa
ukuakkut ataatsimiinnermi ulluni 24. september, 29. september aamma oktober-ip
aappaani 1998 ataatsimiippoq.
Isumaliutissiissummi
pineqarput, siullertut aallarniut:
Landskassip
naatsorsuutaasa kukkunersiorneqartarnerannut ataatsimiititami ilaasortat
siulittaasoq Kristine Raahauge, Anders Nielsson,(Knud Sĝrensen-imut
sinniisussatut) Ruth Heilmann, Lars Sĝrensen aamma Jakob Sivertsen (Finn
Karlsen-imut sinniisussatut) Landskassip naatsorsuutaanik kukkunersiuisut atsiugaannik aamma 1997-imut
kukkunersiuisut oqaaseqaataanik misissuataaripput.
Naalakkersuisut
upernaakkut ataatsimiinnermi 27. april 1998 Inatsisartut allattoqarfiannut
Landskassip 1997-imut naatsorsuutaanik tunniussipput. 12. maj 1998
Isumaliutissiissummini ataatsimiititaq kissaateqarpoq immikkoortunut
pingaarnernut tulliini taagorneqartunut tunngasunik paasissutissanik
annertunerusumik piumalluni. Ukuusullu:
Naatsorsuusiornermi
ilitsersuutit, qarasaasiatigut nakkutilliinerit, atorfimmut atasumik
biileqarneq aamma taakkua akileraaruteqarnermi nalingisa
nalunaarutigineqartarnerat. Naalakkersuisut aamma aktie-atileqateqatigiiffiit
Namminersornerusunit pigineqartut akornanni sullissinermut isumaqatigiissutit,
Kalaallit Nunaata Radio-ata ingerlaavartumik nalunaaruteqartarnera kiisalu
1997-imi siunnersortit avataaneersut sullissinerannik atuineq.
Tamaanga
killinnermi oqaatigineqariissaaq paasissutissat nassiunneqartut
arlaannaalluunniit uparuartarialinnik imaqanngimmata. Taamaakkaluartorli
ataatsimiititaliamit isornartoqarsorigatigit Naalakkersuisunut piumasaqaatinik
inassuteqaatinillu saqqummiussiniarpugut.
Landskassip
naatsorsuutaisa kukkunersiorneqartarnerannut ataatsimiititami tamanut atuuttumik
oqaaseqaatit:
Landskassip
naatsorsutaasa kukkunersiorneqartarnerannut ataatsimiititaq paasissutissanik
piumasaminik tigusinermi kingorna, paasissutissanik sukumiisumik misissuivoq
tassungalu atasumik taakkununnga tunngasumik oqaaseqaateqassalluni.
Naatsorsuusiornermut
ilitsersuutinut tunngatillugu Landskassip naatsorsuutaasa kukkunersiorneqartarnerannut
ataatsimiititaq piffissaq sivisujaaq atorlugu naatsorsuusiornermik
ilitsersuusianik amigaateqarneq pillugu Naalakkersuisunut apeqqutilliisarsimavoq.
Ataatsimiititaliamiili naatsorsuutigineqarpoq taakkua suliarineqarneranni
suliaq ukioq manna, tassa 1998, naammassillugu saqqummiussisoqassasoq.
Taamaammat naatsorsuusiornermut ilitsersuusiat taakku atorneqalernissaannik
suliaq naammassippat ataatsimiititaliamit naatsorsuutigineqarpoq
nassuiaateqartoqassasoq.
Qarasaasiatigut
nakkutilliinerit: Landskassip naatsorsuutaasa kukkunersiorneqartarnerannut
ataatsimiititaq ukiakkut 1997-imi Namminersornerusuni akissarsititseriaatsip
tamakkiisumik isumannaatsuunnginnera naammaginninninnginnini pillugu
oqaaseqarsimavoq. Naalakkersuisunut apeqquteqarluni. Ataatsimiititaliap
naammagisimaarlugu maluginiarpaa Namminersornerusuni akissarsititseriaatsip
isumannaatsuunnissaata pitsanngorsaavigineqarnera pillugu suli naammassingajalermat.
Taamaakkaluartoq ataatsimiititamit inassutigineqassaaq Naalakkersuisut
kukkunersiuisut avataaneersut suleqatigalugit nakkutilliinermut atortussanik
suliaqassasut. Taamaaliornikkut akissarsianut tunngasut
kukkunersiuiffigineqartarnerat ingerlanneqarsinnaaleqqullugu, assersuutigalugu
sulliviit pillugit.
Tamatuma
malitsigisaanik ataatsimiititamit qinnutigineqassaaq Naalakkersuisut
qarasaasiatigut ajornartorsiuteqartarnermut tunngasumik kukkunersiuisuniit
nalunaarutitut sulianik taamaattoqartaannassapput nassinneqartarumalluni.
Atorfimmut
atasumik biileqarneq aamma taakkua akileraaruteqarnermi nalingisa
nalunaarutigineqartarnerat: Landskassip naatsorsuutaasa
kukkunersiorneqartarnerannut ataatsimiititaq isumaliutissiissutip matuma
suliarineranut atasumik aamma pisortat suliffiutaanni akissarsiaqartitsineq
atorfinitsitsisarnerlu pilllugit ajornartorsiutinik oqallisiginnippoq.
Atorfinitsitsisarnermut
tungasut ilaat ajunngitsorsiatut taaneqarput. Taamaammallu ataatsimiititaq
makkununnga tunngasumik apeqquteqarniarpoq. Najoqqutassat tamanut
atortinneqartut qanoq ittut malillugit Naalakkersuisut biilinik
atugassiisarnersut, inuit kikkut 1997-imi Namminersornerullutik Oqartusssani
atorfinitsitaanerminnut atasumik biilimik atugassinneqarsimanersut.
Paasissutissat
taakkununnga tunngasut misissuataareerlugit pissutsini tulliini taagorneqartuni
ataatsimiititaq isornartorsiuiniarpoq. Ataatsimut isigalugu tamanut
atortuusunik biilinik atugassiinermut maleruagassiavinnik suliaqartoqarsimanngitsoq
takuneqarsinnaavoq. Taamaammat ataatsimiititaliamit inassutigineqarpoq
ukununnga tunngatillugu tamanut atuuttumik sapinngisamik piaarnerpaamik
Naalakkersuisut maleruagassiussasut. Siullertut, ajunngitsorsiamik taamaattumik
inuit kikkut pissarsisinnaanersut, tulliatut, takusassiaq tulliani taaneqartoq
tunngavigalugu immikkoortitaartunut ataasiakkaanut biilit qanoq ittuussusiinut
agguataakkanik takussutissiisoqassasoq kiisalu nalunaarneqassasoq
ajunngitsorsiaq taamaattoq qanoq akulikitsigisumik taarserneqartarsinnaasoq.
Ataatsimiititaliamiit
nalunaarutigineqariissaaq ataatsimiititap kissaatigigaa tamatuma tungaanut
nassuiaateqartoqassasoq 1998-imut Landskassip naatsorsuutaasa
saqqummiunneqarneranni. Ataatsimiitialiartaaq isumaqarpoq pissutsit tulliini
taagorneqartut isornartorsiussallugit tunngavissaqartoq. Ajunngitsorsiat
taamaattut akileraarutitigut nalingata akileraaruserivimmut nalunaarutigineqarnissaa
atorfilimmut ataatsimut akisussaaffigitinneqartussaanngitsoq.Tamatuunnga akisussaaneq
sulisitsisumiinneruvoq, taamaammallu ataatsimiititap Naalakkersuisut
qinnuigissavai Landskassip 1998-imut naatsorsuutaasa saqqummiunnneqarnerannut
atasumik uppernarsarneqassasoq Akileraartarnermut Pisortaqarfiup Nalunaarutaa
nr. 362, 24. April 1997-imeersoq malinneqarpoq.
Naalakkersuisut
aamma aktie-atileqatileqatigiiffiit Namminersornerusunit pigineqartut akornanni
sullissinermut isumaqatigiissutit. Landskassip naatsorsuutaasa
kukkunersiorneqartarnerannut ataatsimiititamiittaaq sullissinermut ingerlatsinermullu
Naalakkersuisunut allanut isumaqatigiissutigineqartut assigiinngitsut
pissarsiarai. Taakkua taamatut isigalugit annertunerusumik oqaaseqarfigineqartariaqartutut
isigineqanngillat.
Taamaattorli
ataatsimiititamit oqaatigineqassaaq tunngavissaq massakkut atortoq malillugu
inassutigineqassasoq ingerlataq 08025094, ikaartarfinnik sanaartorneq Sisimiut
pillugu ataatsimoortumik aningaasaliissutigineqartartut Kanukokamut
isumaqatigiinniutigineqarnissaanut atasumik akiligassap akilerneqarnissaanut
taakkua ilaatinneqassasut. Ataatsimiititaliamit qularutigineqanngilaq
akiligassat ataatsimoortumik aningaasaliissutini tiguneqartariaqartut.
Kalaallit
Nunaata Radio-ata ingerlaavartumik nalunaaruteqartarnera: Landskassip
naatsorsuutaasa kukkunersiorneqartarnerannut ataatsimiititamit
maluginiarneqarpoq Naalakkersuisoqarfimmit pisussaaffiusoq Kalaallit Nunaata
Radio-ata Naalakkersuisoqarfimmut suli nalunaaruteqartarnissaa.
Ataatsimiititaliamit ilalerneqarpoq Kalaallit Nunaata Radio-ata ingerlatsiinnarnissaa.
1997-imi
siunnersortit avataaneersut sullissinerannik atuineq: Landskassip
naatsorsuutaasa kukkunersiorneqartarnerannut ataatsimiititattaaq akissarsianut
atorfinitsitaanermullu tunngasut oqaluuserinerannut atatillugu kissaatigaa
siunnersortit avataaneersut sullissinerat takussutissiissutigineqartariaqartoq.
Paasissutissat taakkununnga tunngasut misissuataarnerisigut paasissutissaqarpoq
pissutsit tulliini taagorneqartut ataatsimiititamik isornartorsiussallugit.
Ataatsimiititaq
isumaqarpoq eqqarsarnartoqartoq aningaasartuuteqarfik 100 mill. kr.-nit
ataasungarlugit ataatsimut aningaasartalik pillugu Naalakkersuisut
ataatsimiititap naammattumik naammaginassusilimmik
nassuiaateqarsinnaanngimmata. Naalakkersuisunit oqaatigineqarpoq aningaasat
atorneqartut ingerlatanut sulianulluunniit siunnersortinik ikiorteqarnikkut
ingerlatatut akilerneqartut. Aalajangersimasunut attuumassuteqartutut
isigineqartariaqanngitsut, kontomi taamaappoq kommuninit Namminersornerusut
sinnerlugit akissarsianut aningaasartuutinut atorneqartarmat. Assersuutigalugu
innarluutilinnik sullissinermut atasumik akissarsianut aningaasartuutinut.
Tamanna
tunngavigalugu ataatsimiititamit inassutigineqarpoq Naalakkersuisut,
landskarsip kukkunersiusui avataanneersut suleqatigalugit, sapinngisamik
piaarnerpaamik najoqqutassanik erseqqissunik suliarinnissasut,
taamaaliornikkut landskarsip naatsorsuutaanut atugassamik aningaasat taakkua
sukumiisumik kukkunersiuigineqarsinnaaleqqullugit.
Landskarsip
naatsorsuutaasa kukkunersiorneqartarneranut Ataatsimiititami oqaaseqaatit
allat:
Ataatsimiititap
suliassarisaasa ilaatigut ilagaat aningaasaliissutigineqartunut naapertuuttumik
aningaasartuutit isertitallu atorneqarsimanersut naliliivigissallugit,
aningaasaliissutigisap siunertaa anguneqarsimanersoq kiisalu aningaasanik
aqutsineq siunertamut naapertuuttumik pisimanersoq.
Aningaasanik
aqutsinerup siunertamut naapertuuttumik pisimanera apeqqummut tunngasumik
Ataatsimiititami oqallinneq tunngavigalugu Ataatsimiititaq inassutigissavaa
atorfillit, Naalakkersuisunit atorfinitsitaanerminni ingerlatsivinni,
Namminersornerullutik tamakkiisumik ilaannakuusumilluunniit pigineqartuni,
piginnittumik sinniisutut siulersuisunut ilaasortanngortinneqartartut ajunngitsorsiaqartinneqartarnerannut
periuseq atorneqartoq allanngortinneqartariaqartoq.
Landskarsip
naatsorsuutaasa kukkunersiorneqartarnerannut Ataatsimiititaq isumaqarpoq, maannakkut taamatut- erseqqissumik
taaneqanngitsoq- aaqqissuussinerup
kingunerissagaa atorfillit taakkua sulinerminnut atasumik marloriarlutik
ajunngitsorsiaqartinneqarnerat. Taakkuami naliginnaasumik akissarsiatik aamma
ajunngitsorsiat/ akilerneqarnerit siulersuisunit sulinermut attuumassuteqartut
tigusarmatigit.
Taamaammat
Ataatsimiititamit inassutigineqassaaq taamatut aaqqissuussisimaneq
Naalakkersuisut piaarnerpaamik allanngortissagaat, taamaalilluni
ajunngitsorsiat /akilerneqarnerit maannamut atorfimmut tunniunneqarsimasut
toqqaannartumik Landskarsimut ingerlasartussanngortinneqassasut.
Landskarsip
naatsorsuutaasa kukkunersiorneqartarnerannut Ataatsimiitsitamittaaq Namminersornerullutik
Oqartussat naatsorsuussiveqarneq il.il pillugit Inatsisartut inatsisaata 3.
november 1994-imeersumi kingusinnerusukkut allanngortinneqartartumi, '
5 naapertorlugu Inatsisartut akuersinissaat qinnutigineqarpoq, Landskarsip
naatsorsuutaasa kukkunersiuisumik naalagaaffimmik akuerisaasumik
kukkunersiuisoqarnissaanut atasumik toqqaasinnaalernissamik.
Taamatut
akuersissuteqartoqarpat Ataatsimiititaq isumaqarpoq kukkunersiuisumut
avataaneersuumut tulliini taaneqartut piumasaqaatigineqartariaqartut,
ukuusullu:
- Kukkunersiuisutut ingerlatsivik
tamatumap peqatigisaanik Aktier-tileqatigiiffinnut Namminersornerusunit 100%-nik pigineqartunut aamma
kukkunersiuisutut atuutissan ngitsoq.
- Inatsisartutut toqqagaasutut
kukkunersiuisutut ingerlatsiviup isumagissagaa, ingerlatsi vinnut nammineerlutik
ingerlasunut aamma Landskarsip naatsorsuutaannut tunngasumut kukkunersiuisuujutigaluni
inissisimasoqassanngitsoq.
Naggasiutigalugulu
oqaatigissavarput, Ataatsimiititaliami nuannaarutigineqarpoq kukkunersiuisut
atsiugaanni ersermat Landskarsip naatsorsuutai eqqortumik takussutissiisut.
Taamaalilluni
Landskarsip naatsorsuutaasa kukkunersiorneqartarnerannut Ataatsimiititaq
isumaqatigiittoq Inatsisartunut inassuteqarpoq, Landskarsip naatsorsuutai
Inatsisartunit inaarutaasumik akuersissutigineqassasut naatsorsuutigalugu
qulaani inassutigineqartut Naalakkersuisunit malinneqassasut.
Daniel
Skifte, Aningaasaqarnermut Ineqarnermullu Naalakkersuisoq:
Upernaakkut
ataatsimiinnermi Naalakkersuisut sinnerlugit Landskarsip 1997-imut
naatsorsuutai saqqummiuppakka, Landskarsillu Naatsorsuutaasa
Kukkunersiorneqartarnerannut Ataatsimiititaliami oqaluuserisassanngortillugit.
Landskarsip
1997-imut naatsorsuutaasa takutippaat ingerlatsinermi, sanaartornermi
taarsigassarsisitsisarnermilu 89 mio. kr.-inik sinneqartooruteqartoqartoq 152
mio. kr.-inik amigartooruteqarnissaq missingersuutaasimagaluartoq.
1997-imut
naatsorsuutit kukkunersiuisunit uparuaaffigineqanngillat. Tamanna isumaqarpoq
naatsorsuutini kukkunernik amigaatinillu pingaarutilinnik kukkunersiuisut
nassaarsimanngitsut, taamaattumillu taakku ilumoortutut isigineqartut.
Landskarsip
Naatsorsuutaasa Kukkunersiorneqartarnerannut Ataatsimiititaliaq 1998-imi
upernaakkut ataatsimiinnermi Landskarsip 1997-imut naatsorsuutaasa ilai
pillugit isumaliutissiissuteqarpoq taamanikkut akissuteqarfigisimasannik.
Ataatsimiititaliaq ukiakkut ataatsimiinnermut matumunnga Landskarsip 1997-imut
naatsorsuutai pillugit inaarutaasumik isumaliutissiissuteqarpoq.
Landskarsip
Naatsorsuutaasa Kukkunersiorneqartarnerannut Ataatsimiititaliap inaarutaasumik
isumaliutissiissummini erseqqissaavigisai maannakkut oqaaseqarfigissavakka.
Landskarsip
Naatsorsuutaasa Kukkunersiorneqartarnerannut Ataatsimiititaliap inaarutaasumik
isumaliutissiissummini nalunaarutigaa, ataatsimiititaliap naatsorsuutigigaa,
naatsorsuusiornermut ilitsersuusiat suliarineqarnerannik suliaq, ukioq manna
naammassillugu suliarineqarsimassasoq. Ataatsimiititaliap aamma
naatsorsuutigaa, suliaq naammassippat nassuiaammik tigusaqarnissani.
Naalakkersuisut isumaginiarpaat, nassuiaatip taassuma, Landskarsip
Naatsorsuutaasa Kukkunersiorneqartarnerannut Ataatsimiititaliamut 1998-ip
naanerani nassiunneqarnissaa.
Landskarsip
Naatsorsuutaasa Kukkunersiorneqartarnerannut Ataatsimiititaliap,
naammagisimaarlugu maluginiarpaa, Namminersornerullutik Oqartussani
akissarsialereriaatsip isumannaatsuunissaata pitsanngorsaavigineqarnera pillugu
sulineq naammassingajalermat. Tamatuma saniatigut ataatsimiititaliap
inassutigaa, nakkutilliinermut atortussat suliarineqassasut, akissarsianut
tunngasut kukkunersiuiffigineqartarnerat ingerlanneqarsinnaaleqqullugu.
Tassunga
atatillugu naalakkersuisut oqaatigissavaat, akissarsiat tunniunneqartartut
ataavartumik kukkunersiorneqartarmata. Taamatut kukkunersiuineq sullissivinnut
Landskarsip naatsorsuutaasa kukkunersiorneqartarnerannut ilanngullugu pisarpoq,
ilaatigullu ingerlanneqartarluni Namminersornerullutik Oqartussat namminneq
kukkunersiuisuinit akissarsiat kukkunersiorneqartarnerat pillugu ilitsersuut
nr. 1.001 naapertorlugu.
Tamatuma
saniatigut ataatsimiititaliamut ilisimatitsissutigisinnaavara,
Namminersornerullutik Oqartussat qarasaasiat atorlugit aningaasaqarnermik
aqutseriaasiata, akissarsialereriaasiata, ilinniartitaanernut tunngasunik
aqutseriaasiata Qarasaasialeriffimmilu periaatsit isumannaassusiat nakkutigineqartarnerilu
kukkunersiuiffigineqaqqammermata. Kukkunersiuineq tamanna pillugu nalunaarusiaq
naalakkersuisunit tingoreerpat, suliarineqareerpallu kukkunersiuinermut
ataatsimiititaliamut ingerlateqqinneqarumaarpoq.
Landskarsip
Naatsorsuutaasa Kukkunersiorneqartarnerannut Ataatsimiititaliap
isumaliutissiissummini isornartorsiorpaa, Namminersornerullutik Oqartussani
sulisunut @biilimik atugassiisarnerminni@
tamanut atortumik maleruagassat suliarineqarsimanngimmata. Tamatuma saniatigut
ataatsimiititaliap uparuarpaa, sulisitsisoq - matumani Namminersornerullutik
Oqartussat - pisussaammat, biilimik atugassiinerup akileraarutitigut nalingata
akileraartarnermi oqartussaasunut nalunaarutigineqartarnissaa.
Naalakkersuisut
sulissutiginiarpaat, Namminersornerullutik Oqartussat sulinermut atatillugu
biiliutaasa pissarsiarineqartarnerannut atorneqarnerannullu
najoqqutassiortoqarnissaa. Suliaq tamanna pillugu, kukkunersiuinermut
ataatsimiititaliaq ilisimatinneqarumaarpoq 1998-imut Landskarsip
naatsorsuutaasa saqqummiunneqarnerannut atatillugu.
Isumaliutissiissummi
ataatsimiititaliap inassutigaa, Sisimiuni ikaartarfiliorneq pillugu aningaasat
pisassarisat ataatsimoortumik tapiissutinit tiguneqassasut. Naalakkersuisut
oqaatigissavaat, naluneqanngitsutut 1998-imut ilassutitut
aningaasaliissutinut, inatsimmi siullermi 1997-imut naatsorsuutini,
pisassarisat amerlaqataat landskarsip isertitassaatut
akuersissutigineqareermata. Naalakkersuisut naatsorsuutigaat, inaarutaasumik
naatsorsuutit suliarineqassasut sanaartornermut naatsorsuutit piareerpata,
tamannalu pereerpat kommunip aningaasartuutini akiligassani akilissagai.
Ataatsimiititaliap,
isumaliutissiissummini oqaatigaa eqqarsarnartoqartillugu, siunnersortinik
avataaneersunik atuisarneq pillugu naqqa tikillugu nassuiaasoqarsinnaanngimmat.
Naalakkersuisut ilisimatitsissutigisinnaavaat, nalunaarsuisarneq ukiormanna
augustip aallaqqaataaniit allanngortinneqarmat, taamaalillutik
innarluutilinnut tunngasuni aningaasartuutit, siunnersortit sullissinerinit
allanit immikkoortinneqarsinnaalersillugit. Ataatsimiititaliap oqaasii tunngavigalugit,
naalakkersuisut tamatuma saniatigut kukkunersiuisunik avataaneersunik
isumaqatigiissuteqarniarput, suliassaqarfik immikkut eqqumaffigineqassasoq,
1998-imut Landskarsip naatsorsuutaasa kukkunersiorneqarnerannut atatillugu.
Atorfillit
siulersuisuni ilaasortaanerminnut ajunngitsorsiassaqartinneqartarnerat pillugu,
ataatsimiititaliap oqaasii eqqarsaatigalugit, 1996-imi majimi naalakkersuisut
aalajangerput, sulisut aktier-teqarluni ingerlatseqatigiiffiit
Namminersornerullutik Oqartussanit pigineqartut siulersuisuini
ilaasortanngortinneqartut ajunngitsorsiaqartinneqassasut, tassa
aktier-teqarluni ingerlatseqatigiiffiit pillugit inatsisip aamma ukiumoortumik
naatsorsuusiortarneq pillugu inatsisip allanngortinneqarnerisa
kingunerimmassuk, annertunerusumik suliassaqalerneq aammalu siulersuisuni
ilaasortat, taakkununnga ilanngullugit Namminersornerullutik Oqartussani
sulisut inuttut akisussaaffeqarnerulersitaanerat.
Aalajangernermut
tassunga tunngaviusut suli atuupput. Taamaattoq ataatsimiititaliap oqaaseqaataa
naalakkersuisut tusaatissatut tiguaat, aalajangernerlu 1999-ip aallartinnerani
isumaliutigeqqinniarlugu, soorluttaaq naalakkersuisut sulissutiginiaraat,
atorfillit siulersuisuni ilaasortaasartut ilaasortassatut toqqarneqartarneri
suli annikinnerulersinneqarnissaa.
Landskarsip
Naatsorsuutaasa Kukkunersiorneqartarnerannut Ataatsimiititaliap,
isumaliutissiissummini ilanngullugu qinnutigaa, Landskarsip naatsorsuutaasa
kukkunersiorneqarnissaannut kukkunersiuisumik naalagaaffimmit akuerisaasumik
toqqaasinnaalernissamut piginnaatinneqarnissani. Naalakkersuisut sinnerlugit
oqaatigissavara, apeqqutip taassuma 1997-imut Landskarsip naatsorsuutai
pillugit ataatsimiititaliap isumaliutissiissutaata akuersissutigineqarnissaanut
peqatigitillugu oqaluuserineqarnissaa tulluartuunngimmat.
Landskarsip
naatsorsuutaanik kukkunersiuisussap, atorfinitsitsinneqartarnera pillugu
apeqqut, tunngaviatigut apeqqutaavoq, Inatsisartunit tamarmiusunit
oqaluuserineqartariaqartoq, tamatuminnga Namminersornerullutik Oqartussat
naatsorsuuseriveqarnerat il.il. pillugit, Inatsisartut inatsisaanni novembarip
pingajuani 1994-imi aalajangersarneqarsimasoq, Inatsisartut
aalajangiivigisartussaassammassuk tamanna apeqqut. Kukkunersiuinermut
ataatsimiititaliap, kukkunersiusumik naalagaaffimmit akuerisaasumik
toqqaasinnaatitaalernissaa Inatsisartut kissaatigippassuk, inatsisit allanngortinneqartariaqarput.
Tamatuma
saniatigut erseqqissarneqassaaq, maannakkut kukkunersiuisuusoq 1971-imit
toqqagaammat. Taamaattumik kukkunersiuisumik toqqaasarneq pillugu apeqqummik
oqaluuserinnittarneq aalajangersimasumik periuseqarfigineqalersimanngilaq.
Taamaattumik pingaarutilerujussuuvoq immikkoortup immikkut
oqallisigineqarnissaa, tassungalu atatillugu apeqqutit assigiinngitsut
paaseqqissaarneqarnissaat.
Ilanngullugu
naalakkersuisut isumaqarput Inatsisartut tunuartussat
Inatsisartunngorumaartussanut nutaanut pituttuisariaqanngitsut, susassaqarfimmi
immikkut ittumi aalajangiisuusumilu, massakkorpiaq aalajangiinissamut tunngavissaqanngiffiusumi
aalajangiinikkut.
Taamaattumik
naalakkersuisut akuersaarsinnaanngilaat, ataatsimiititaliap
isumaliutissiissutaatigut, kukkunersiuinermut ataatsimiititaliaq, Landskarsip
naatsorsuutaasa kukkunersiorneqarnissaannut kukkunersiuisumik naalagaaffimmit
akuerisaasumik toqqaasinnaatitaalissappat.
Landskarsip
Naatsorsuutaasa Kukkunersiorneqartarnerannut, Ataatsimiititaliap
isumaliutissiissummini inassutigaa, Landskarsip 1997-imut naatsorsuutai,
Inatsisartunit inaarutaasumik akuersissutigineqassasut naatsorsuutigalugu,
ataatsimiititaliap inassuteqaatai Naalakkersuisunit malinneqassasut.
Soorunami
Naalakkersuisut sulissutiginiarpaat, ataatsimiititaliap kaammattuutaasa
inassuteqaataasalu 1998-ip ingerlanerani siunissamilu naammassineqarnissaat.
Landskarsip 1997-imut naatsorsuutai pissutsinik eqqortumik takutitsipput,
tamannalu kukkunersiuinermut ataatsimiititaliap isumaliutissiissutaani
assortorneqanngilaq. Taamaattumik Landskarsip 1997-imut naatsorsuutai
apeqqusiiffiginagit akuersissutigineqartariaqarput. Landskarsip
naatsorsuutaasa akuersissutigineqarnissaat, iliuusissanik 1998-imi siunissamilu
naammassineqartussanik tunngavissalerneqassappat, tamanna avatitsinniittunit
tatigineqannginnitsinnik pilersitsissaaq.
Tamanna tunngavigalugu, Naalakkersuisut
inassutigissavaat, Inatsisartut kukkunersiuinermut ataatsimiititaliap
isumaliutissiissutaa akuersissutigissagaat, Naalakkersuisut oqaaseqaataanik
oqaasertalerlugu, tassalu:
kukkunersiuisumik toqqaanissamut
ataatsimiititaliaq piginnaatinneqassanngitsoq
1997-imut naatsorsuutit,
siunissami iliuusissat aalajangiisuutinnagit, akuersissutigineqassasut.
Ruth
Heilmann, Siumup oqaaseqartua:
Siumumi
pingaartitaraarput landskarsip naatsorsuutaasa pitsaanerpaamik aammalu tatiginarnerpaamik
suliarineqarlutillu innuttaasunut susassaqartunullu saqqummiunneqartarnissaat.
Taamaattumik
Ataatsimiititaliap isumaliutissiissutaani uparuaatit aaqqitassatut
Ataatsimiititaliami isigineqartut aamma
Siumumiit isumaqatigaavut aammalu taamatut Naalakkersuisut akissuteqarnerminni
Ataatsimiititaliamit suliakkiissutaasunut amerlanerpaatigut malikkumanninnerat
oqaatigissavarput tamanna Siumumiit iluarisimaaratsigu.
Ilanngullugu
aamma Siumumiit siusinnerusukkut uparuaassutigisartakkavut Naalakkersuisunit
aaqqinniarlugit ilungersuutigineqartut malugisaannaratsigu
toqqissisimanartuutittarparput. Taamaattumik taakkunani suliaqartut
pikkorissiartuaarlutillu atortorissaarutinik qarasaasiakkut eqaallingaluttuinnartumik
sullissinerat pissusimisoortutut isumaqarfigaarput, tassuunakkummi aamma
aningaasat annikitsuunngitsut atortussanngortittakkavut kinguneqarluartumik
takussutissiipput.
Landskarsip
ukiumoortumik naatsorsuutaanik kukkunersiuinermi Ataatsimiititaliap
suleriaasiani pisussaaffinnut ilaavoq Naalakkersuisunut apeqquteqaatinik
oqaaseqaatinillu imalinnik isumaliutissiissuteqartarnissamut. Aammalu
kukkunersiuinermi immikkut periaaseqarluni naammassinnittoqarsinnaanera
inassutigisarsinnaallugu, soorluttaaq Landskarsip naatsorsuusereriaasianut
pitsan ngoriaatissanik siunnersuuteqarsinnaatitaalluni.
Siumumi
maluginiarparput Ataatsimiititaliaq maannakkut Inatsisartuni nutaamik
suleriaaseqalerneq ilutigalugu kukkunersiuisunik toqqaasarnissami apeqqut
nutaamik periuseqarfiginiarneqartoq. Tamanna Siumumiit
pissusissamisoortuutipparput, tassami maannakkut periuserineqarluni ukiorpassuarni
atuuttup allanngortinnissaanut piffissanngortutut aamma Siumumiit
isumaqarfiginarmat.
Naak
Naalakkersuisut akissumminni oqaatigigaluaraat nutaami Inatsisartuni qinigaasut
tamanna isummerfigigunikku naleqqunnerpaassasumik isumaqarneq
paasilluaraluarlugu Siumumiit isumaqarpugut Inatsisartut Ataatsimiititaliamut
piginnaassutsimik maannakkut tunniussaqartariaqartut, kukkunersiuinermi
ullutsinnut naleqqunnerusunngortinniarnissaanut aaqqissuussiniartoqarniassammat,
taamaalilluni ukiup tullia aallarnerfigalugu malinneqartussanngorlugu.
Aamma
naatsorsuutit ukiut tamaasa saqqummiunneqarnerani akuerineqarnerannilu
tamatigut kukkunersiuisussanik toqqaasarneq siunissami pisalerniassaaq, soorlu
inatsisitigut taamatut suleriaaseqarnissaq tikkuussiffigineqartoq maannakkut
suli piviusunngortinneqanngitsumik.
Imatut
paasineqaqqunngilagut maannakkut kukkunersiuinermik tigumminnittut
naammaginnginnatsigit, naamik sulilluarput, aammalu ukiut tamaasa
pissutissaqarluinnartumik sulilluarnerat pillugu qujassuteqarfigisaannarpavut.
Uanilu
pineqarpoq inatsisit suleriaaserlu malinneqartussaq malillugu nutaamik
naleqquttumillu periaaseqartoqalissammat.
Allat
isumaliutissiissummi saqqummiunneqartut uparuaataasut immikkut
oqaaseqarfigissanngilavut. Tassani Naalakkersuisut akissuteqarnerminni
iluarsiissuteqarniarlutik suliniutaat isumaqatigigatsigit.
Siumumiit
Ataatsimiititaliaq isumaqatigaarput 1997-imi naatsorsuutit annertuujullutillu
eqqortumik takutitsisuusut, siulianisulli suliarilluagaasut erseqqarillutillu,
taamaattumik annerusumik oqaaseqarfiginagit akuersaarniarpavut.
Taamatut
oqaaseqarluta neriuutigaarput Inatsisartuni suleriaatsimi nutaami siunnerfik
isumaliutissiissummi saqqummiunneqartoq, Siumumiillu isumaqatigisarput
Inatsisartunit paatsoorneqarani ilassilluarneqarumaartoq.
Naggataatigut
minnerunngitsumik Naalakkersuisut qutsavigissavavut ukiuni taakkunani
pitsaasumik kusanartumillu naatsorsuutinik saqqummiisarnerat pillugu. Taamalu
aamma Inatsisartunit aaqqiivigeqqusaasut assigiinngitsut Ataatsimiititaliamit
isumaliutigeqquneqartartut aaqqiiviginiartarmatigik.
Kukkunersiuisuttaaq
pitsaasumik paasiuminartumillu naatsorsuutinik suliaqartarsimanerannik
uummammik pisumik qutsaviginiarpavut. Suleqatigilluarsimavavut taamalu
Ataatsimiititaliap naatsorsuutinik eqqortumik takutitsinerannik naliliinerat,
akuersaartumillu inassuteqaataat isumaqatigalugu Siumumiit Landskarsip
naatsorsuutai akuersaarlugit taaseqataanissarput matumuuna nalunaarutigaarput.
Anders Nilsson, Atassutip oqaaseqartua:
Atassummiit kukkunersiunermut
Ataatsimiititaliaq isumalitissuussimmik maanna saqqummiussaani
isumaqatigaarput.
Isumaliutissiissuummi
immikkoortuni ataasiakkaani Naalakkersuisullu akissuteqaataanni immik
koortuni ataasiakkaani
itisilerilluta oqaaseqaatissaqarpugut.
Siulersuisunut atorfilittanut
Namminnersornerullutik Oqartussat sinnerlugit inuttaatinneqartunut akissarsiat
tunniunneqartartut Landskarsimiit akilerneqartarnissaat Atassutip kissaatigaa.
Siulersuisuni suliaq atorfilittat suliassaasa ilassaattut naliginnaasumillu
akissarsiaqarfiusussattut isigaarput.
Matumani erseqqissassallugu
pingaartuuvoq, angutit arnallu atorfilittaasut siulersuisuni Namminersornerullutik
Oqartussat soqutigisaat eqqarsaatigalugit ilaasortatut toqqarneqarneq ajormata.
Siulersuisunut toqqangaasarput eqqarsaatit ilisimasallu
pisortaqarfinninngaanniit taperserneqarsinnaasut pisariaqartinneqaraangata.
Inatsisilerituut inatsisitigut ilisimasatigut siulersuisut ilisimasariaqagaannik
aammalu aningaasaqarnermut tunngasunik ilisimasallit, siulersuisut
aningaasaqarnermut tunngasunik ilisimasariaqangaannik ilinniartitsisinnaanerat
assigerluinnarlugu.
Siulersuisuni suliaq
atorfeqareersunut annertunerusumik akisussaassuseqarnermik kinguneqarneq
ajorpoq. Naliginnaasumik siulersuisunut ilaasortap akisussaassuseqarneranut
sillimmasiisoqartarpoq, kukkussutaasinnaasut annikitsuinnaanerusut
akiliutaasussamik. Taamaallaat siulersuisuni piaarinaatsoorujussuarluni
iliuuseqarneq aningaasatigut akisussaassuseqarfigineqarsinnaavoq.
Namminersornerullutillu Oqartussani atorfilittaqarunanngilagut
piaarinaatsoorujussuarlutik iliuuseqariataarsinnaasunik. Suliap artornarnera
eqqarsaatigissagaanni siulersuisuni sulineq, atorfillip naliginnaasumik
suliaqarfiisa ilagilluinnarpaat isumaqatigiissutillu malillugit
akissarsiaqarfiulluni.
Taamatut naapertuuttumik
isumaliornerup saniatigut siulersuisuni ilaasortat suliaminnut piukkunnartuunerat
malillugu akissarsiaqartitaanissaat atorfilinnut ataasiakkaanut
akissarsisitsinngitsoornermik kinguneqartarpoq, atorfillip atorfimmini qanoq
inissisimanera apeqqutaatinnagu. Tamatuma ullumikkut tamatigut taamatut ingerlajuaannarsinnaanera
qularnarpoq. Tamatumani direktĝriuneq namminermi siulersuisuni
ilaasortaanermini pitsaaqutaanngippat.
Naalakkersuisut aalajangernertik
sulisunut ataasiakkaanut siulersuisunut ilaasortanut akissarsiat
tunniunneqartassanersut 1999-ip aallartinnerani isumaliutersuutigeqqikkumavaat.
Atassummiillu tamanna imatut paasivarput, Inatsisartuni ullumikkut
amerlanerussuteqartut kukkunersiuinermut Ataatsimiitsitaliap siunnersuutaa
malissappassuk, taava suliffeqarfinni pineqartuni ataatsimeersuarnerit
aallarnerfigalugit malittarineqartussamik aalajangiisoqassaaq.
Qularnaarniarlugu aamma
ilassutigineqassaaq Inatsisartunut ilaasortat politikkikkut suliniutiminnut
atatillugu siulersuisuni inissitsitersimasut akissarsiaqaatigalugu, Atassummiit
allaanerunngitsumik isigigatsigit.
Naatsoruutit
kukkunersiorneqartarnerannut ataatsimiititaliap Inatsisartunik
piginnaatitsissummik Landskarsip kukkunersiortarnissaannut Naalagaaffimmiit
akuerineqartumik kukkunersiuisumik toqqaanissaannut qinnuteqartillugit,
Inatsisartut ataatsimiinnerat taamaasereermat piffissaalatsilissapput. Inatsit
tunngavigineqartoq malillugu, Inatsisartut kukkunersiuisussatut toqqaasussat
suliassanik pisariaqartunik piareersaanissaat ajornakusuulissaaq.
Apeqqullu pineqartoq ukiuni
kingullerni arlaleriarluni inimi maani saqqummiunneqartarsimagaluartoq,
aatsaat paasineqalerpoq, inatsisip sukumiisumik atorneqarnerata
kingunerisaanik, Naalakkersuisut pinnatik kisiannili Inatsisartut Landskarsip
kukkunersiuisuisa toqqartussaagaat.
Naalakkersuisuniik akissuteqartuni
erserpoq, kukkunersiuisutut suliffeqarfik 1971-imiilli taannaajuarsimasoq.
Oqartoqarsinnaasorinarporluunniit Landskarsi kukkunersiuisullu suliffeqarfik
atorneqarsimasoq ukiut 25-it sinnerlugit katiffissioqatigiinneqareersimasoq.
Qallunaat Nunaanni
pissusissamisoorsorineqarneq ajorpoq, kukkunersiuinermi suliffeqarfik
ingerlataqartoq aningaasanik kaaviiaartitami 20 %-ii sinnerlugit sullitap
ataatsip sullinnerani isertitsissutigissallugu. Taamatut ileqqoqarnerup
tunngavigisarpaa, aningaasatigut pituttorsimalinnginnissaq kukkunersiuisup
suliffeqarfiullu sullinneqartup akornanni. Kisitsisinik ersarissunik
eqqoqqinnaartunillu takussutissaqanngikkaluarluta, taamaattoq Landskarp kukkunersiuisuutitaasa
aningaasat kaaviiaartittakkami, ila immaqami amerlanersai sullitamiit
ataatsimit isertittassavai: Namminersornerullutik Oqartussat
suliffeqarfippassuillu A/S-itut ingerlasuusut. Kukkunersiuisarnerup
anersaavaniinngilaq tatiginassuseqarsinnaananilu.
Kisiannili suut tamaasa
paasiuminaallisarumanagit, Atassummit siunnersuutigissavarput, kukkunersiuisussamik
toqqaanissaq Inatsisartut upernaakkut ataatsimiinnissaannut ullormut
oqaluuserisassatut ilanngunneqassasoq. Akerleriissuteqarnavianngilagullu,
kukkunersiuinermut Ataatsimiititaliap -aataatsimiititaliatut susassaqartutut-
siunnersuutigissappagu aappariinneq Landskarsip ukiorpassuanngulersunilu
aappannaavata akornanni suleqatigiinneq ingerlateqqinneqassangaluarpat.
Naalakkersuisut oqaaseqaateqarnissaminnut
tunngavissaqalersimapput, isumaqatigisinnaanngikkitsik, Ataatsimiititaliap
isumaliutissiissuteqarneratigut kukkunersiuinermik Ataatsimiititaliap piginnaatitsissummik
tunineqassasoq Naalagaaffimmit akuerisaasumik kukkunersiuisumik toqqaanissaanut.
Ilanngulluguttaaq
erseqqissaatigineqassaaq paasinarsorinarmat, Inatsisartut maannakkut atorunnaalersut
Inatsisartut nutaassat pituttuiffigissanngikkaat. Pitsaanerusorineqarnerlunimi,
Naalakkersuisut maannakkut atorunnaalersut Naalakkersuisussanut nutaanut
pituttuisussaappata?
Atassummiit oqaatigissavarput
pissusissamisoorsorinanngilluinnaratsigu Naalakkersuisut suliffeqarfittut
taama sakkortutigisumik suliamik maani isummersimanissaat. Kukkunersiuineq
Inatsisartut sakkussaasa pingaarnersarivaat qularnaassallugu, Naalakkersuisut
Inatsisartut suliakkiisimanerat naapertorlugu, pisussaaffiillu
taakkartorneqartut iluini sulinersut.
Taamatut Atassummiit oqaaseqarluta
kukkunersiuinermut Ataatsimiititaliap isumaliutissiissutai
isumaqataaffigaarput.
Lars Sĝrensen, Inuit Ataqatigiit oqaaseqartuat:
Inuit Ataqatigiit Landskarsip
1997-imut naatsorsuutai Inatsisartunut upernaaq majip 19-ianni
saqqummiunneqarmata naatsorsuutit ataatsimut isigalugit oqaaseqarfigaavut.
Upernaarlu oqaaseqarnitsinni oqaatsivut pingaarnerit aallaqqaasiutigissavakka:
Inuit Ataqatigiit kissaatigaarput
Landskarsip naatsorsuutaasa saqqummiunneqartarnerat pisassasoq upernaakkut
Inatsisartut ataatsimiinnissaat ullunik 14-inik sioqqullugu.
Taamatut kissaateqarnitsinni
tunngavigaarput Inatsisartut Kukunersiuinermut Ataatsimiititaani naatsorsuutit
saqqummiunneqartut sukumiisumik piffissaqarluarlunilu suliarineqartarnissaat
pigaaruteqarmat.
Sanaartugassat ukioq aningasaliiffiusumi
atorneqartannginnerat Landskarsip naatsorsuutaanut taamatuttaaq Landskarsip
aningaasanut uninngasuutaanut eqqunngitsumik takussutissiisarnerat ukiuni
arlaqartuni Kukkunersiuinermut Ataatsimiititaliamit uparuarneqartuartup
kingumut uppernarsaqqippaa, Landskarsip naatsorsuutai naatsorsuutiginngisamik
89 mio.-nit koruunit sinneqartooruteqarnerat.
Naatsorsuutinik 241 mio.-nit
koruuninik uniuineq siunissami pinaveersaartinneqassappat saneqqunneqarsinnaajunnaarpoq
Naalakkersuisut Inatsisartut Aningaasaqarnermut Ataatsimiititaliaat
peqatigalugu piaarnerpaamik siunissami sanaartugassat eqqarsaatigalugit
suleriaasissamik nutaamik ujartuinissaat.
1997-imut naatsorsuutit
Namminersornerullutik Oqartussat kukkunersiuisunit avataaneersunit immikkut
uparuaaffigineqarsimannginnerat maluginiarnikuuarput, taamaalilluni
naatsorsuutit ataatsimut isigalugit eqqortutut isigaavut.
Landskarsip naatsorsuutaasa
Kukkunersiorneqartarnerannut Ataatsimiititaliap inaarutaasumik
isumaliutissiissummini paasissutissat nassiunneqartut tunngavigalugit
inassuteqaatai oqaaseqarfigissavavut.
Inuit Ataqatigiit isumaqarpugut,
Namminersornerullutik Oqartussani naatsorsuuserinermut ilitsersuusianik
amigaateqarneq pissutigalugu aningaasanik aqutsiniarneq suli annertuumik
sanngeequteqartoq. Tamanna kingumut uppernarsarneqarpoq ukiaq manna 1998-imut
Inatsisartut ilassutitut aningaasaliissutinut inatsisaata aappassaanut
siunnersuut suliarineqarmat.
Naalakkersuisut nassuerutigaat
aningaasanik aqutsiniarneq annertuunik ajornartorsiutigineqartoq, pingaartumik
Peqqinnissaqarfiup taamatuttaaq Isumaginnittoqarfiup iluani. Taamaattumik
naatsorsuusiornermut ilitsersuusiat suliarineqarnerannik suliaq ukioq manna
naammassillugu suliarineqarnissaanik Ataatsimiititaliap kissaateqarnera
Naalakkersuisunit naammassineqassasoq naatsorsuutigaarput.
Inuit Ataqatigiit maluginiarparput
Namminersornerulluni Oqartussani akissarsialereriaatsip isumannaatsuunissaata
pitsanngorsaavigineqarnera pillugu suliaq naammassingajalermat, naluneqanngitsutut
akissarsialeriffiup ukiumut kr. mia.-init amerlanerusunik aningaasarsianut
akiliutaasartut allaffissornikkut aqutarai. Sulisoqarnermut Pisortaqarfiup
akissarsialeriffiata sullitaminit tatigineqarnissaa pingaaruteqarpoq.
Aqutsinerlu aamma Landskarsip 1994-imut naatsorsuutai saqqummiunneqarmata
taamanikkut oqaatigineqarpoq isornartoqarluinnartoq.
Suliffimmut atatillugu atuisumut
akileraarutitigut taamaallaat 8.000 koruunit taamaallaat ukiumut
aningaasartuutaasarpoq. Suliffeqarfiata orsussaq, sillimmasiineq oqimaassuserlu
najoqqutaralugu akiliutaasartut akilertarpai. Taamaattumik Inuit Ataqatigiit
tamanut atortumik maleruagassiuussisoqarnissaanik ataatsimiititaliap
uparuaanera pissusissamisoortutut isigaarput, piaarnerpaamillu Namminersornerullutik
Oqartussat sulinermut atatillugu biiliutaasa pissarsiarineqartarnerannut
atorneqartarnerannullu najoqqutassiortoqarnissaa kissaatigaarput,
minnerunngitsumik sulititsisup pisussaaffia, tassalu biilimik atuinerup
akileraarutitigut naligata akileraartarnermut oqartussaasunut
nalunaarutigineqartarnissaat ilanngullugu.
Siunissami Sisimiuni
ikaartarfiliorneq, siunnersortinik avataaneersunik atuisarneq taamatuttaaq
KNR-imik ingerlatsinikkut ingerlaavartunik suli nalunaaruteqartarnissaq
pillugit Inatsisartut Kukkunersiortarneranik Ataatsimiititaliap
isumaliutissiissutaani kaammattuutit isumaqatigigatsigit oqaatigissavara.
Inuit Ataqatigiit isumaqarpugut
ingerlatitsiveqatigiiffiit Namminersornerullutik Oqartussanik pigineqartunit
atorfillit siulersuisuni ilaasortaminnut ajunngitsorsiaqartinneqartarnerata
nutaamik malittarisassiuunneqarnissaa pisariaqartoq.
Naluneqanngitsutuummi
assersuutigalugu Kommunalbestyrelsimi imaluunniit nunaqarfinni aqutsisunut
ilaasortaq ataatsimiinnerminni peqataassaguni ataatsimiinnerup nalaanni
sulisitsisuminiit akissarsiaqartinneqarneq ajorpoq, naatsorsuutigineqartarmat
qinikkatut ilaasortaanermut ajunngitsorsiassat ilaatigut tassaasut sulisartup
ataatsimiittarnermini akissarsiamigut annaasaqartarnermut matussutissai.
Paasitinneqarnerpullu
najoqqutaralugu atorfillit Namminersornerullutik Oqartussani pigineqartunik
siulersuisunut ilaasortat sulititsisuminniit akissarsiamikkut ilanngaanneqarneq
ajorput, taamaalilluni sulinerminnut atasumik marloriarlutik ajunngitsorsiaqartinneqartarlutik.
Tamanna akuersaarneqarsinnaanngilaq, taamaattumik Naalakkersuisut
piaarnerpaamik piviusunngortissagaat Inuit Ataqatigiit isumaqarpugut, tassalu
atorfimminnut atatillugu ingerlatitseqatigiiffiit siulersuisunut ilaasortaasut ajunngitsorsiaasa
Landskarsimut nakkartinneqartarnissaannik ataatsimiititaliamit
inassutigineqartoq, tamanna nunani allani sanilliuttakkatsinni atorneqareerpoq,
tamannalu qinikkatut qanittukkut pikkorissartinneqarnitsinni aamma
erseqqissarneqarpoq.
Inuit Ataqatigiit isumaqarpugut
Inatsisartut naatsorsuutaasa Kukkunersiorneqartarnerannut Ataatsimiititaq
tassaasoq aningaasanik aqutsinerup siunertamut naapertuuttumik pisimaneranik
taamatuttaaq aningaasanik aqutsinerup suli pitsanngorsartinneqarnissaannik
Inatsisartut sinnerlugit nakkutilliisoq.
Inatsisartut tassaapput
Landskarsip naatsorsuutaasa kukkunersiuisumit Naalagaaffimmit akuerisaasumit
kukkunersiorneqarnissaanut atasumik ukiut tamaasa toqqaasussat,
Naalakkersuisuunngitsut.
Taamaatuumik Inuit Ataqatigiit
siunnersuutiginiarparput Ataatsimiititaliap kukkunersiuisumit toqqaanissamik
kissaateqarnera immikkut oqaluuserisassanngorlugu Inatsisartuni
eqqartorneqartariaqartoq, tamannalu pissasoq ukioq manna Inatsisartu
ataatsimiinnissaat naatinnagu.
Tulluartuunngilaq
aktier-teqarfinni Namminersornerusunit 100 %-imik pigineqartunit kukkunersiuisut
atukkatta aamma taakkununnga atuunnissaat.
Taama oqaaseqarluta Inatsisartut
Kukkunersiorneqartarneranik Ataatsimiititaliamit inassuteqaatit kaammattuutillu
tamakkiisumik taperserpavut.
Anthon Frederiksen, Kattusseqatigiit:
Landskarsip 1997-imut
naatsorsuutai pillugit Naatsorsuutit Kukkunersiorneqartarnerannut Ataatsimiititaliap
isumaliutissiissutaa Kattusseqatigiit sinnerlugit, aammalu ilaatigut
naatsorsuutit upernaaq saqqummiunneqarneranni oqaaseqaatikka
innersuussutigalugit imaattumik oqaaseqarfigissavara:
Ataatimiititaliaq isumaqatigaara,
Naalakkersuisut sulisunut ajunngitsorsiassaritinneqartut aammalu suliffimmut
atatillugu il.il. pillugit maleruagassiortoqarnissaanik piumasaqaat. Taakkulu
1998-imut Landskarsip naatsorsuutasa saqqummiunneqarnissaanut ilanngullugit
nassuiaassutigineqarnissaa ilanngullugu isumaqatigaara.
Ataatsimiititaliamiit
naammagittaalliutigineqartut paasillugit taperserpakka. Naalakkersuisut
siunnersortinik avataaneersunik atuisarnermut 100 mio.-nit pallillugit
aningaasartuuteqarfiusumut tamakkiisumik Ataatsimiititaliamut
nalunaarusiortariaqarneranik Ataatsimiititaliap piumasaqaata aamma
Kattusseqatigiit sinnerlugit tamakkiisumik taperserpara.
Kiisalu suliffeqarfinni
Namminersornerullutik Oqartussani pigineqartuni atorfillit Namminersornerullutik
Oqartussat ataani atorfeqartut, suliffeqarfinnilu siulersuisoqarfinni
inissisimasut ajunngitsorsiassaqartinneqartarnerisa atorunnaarsinneqarnissaat
aamma isumaqatigaara, taakkuami sulinerminnut atatillugu
akissarsiaqartinneqareermata, taammaattumik taassumap tungaatigut allanngortitsisoqarnissaanik
piumasaqaat tamakkiisumik aamma taperserpara.
Taamatullu naatsumik oqaaseqarlunga
Landskarsip 1997-imut naatsorsuutaasa kukkunersiorneqarnerat
akuersissutigaara.
Daniel Skifte, Aningaasaqarnermut Ineqarnermullu
Naalakkersuisoq:
Siullermik oqaatigissavara partiit
tamakkiisumik naatsorsuutit 1997-imeersut akuersissutigineqarnissaannut
isumaqataanerat, taanna qujassutigigakku Naalakkersuisut sinnerlugit.
Taava assigiinngitsut
uparuaassutit aammalu assigiinngitsut kaammattuutit maannakkut oqaaseqarfigilaassavakka.
Siumup qularnaatsumik oqaatigaa maannakkut
ukiortaaminnganniit ilaatigut kukkunersiuinermut tunngasut
isummerfigineqareertariaqartut, aammalu naatsorsuutit annertunerusumik
oqaaseqarfiginagit tunngaviatigut taperseraat, tamanna akuersineq
qujassutigaara.
Ukua allat annertunerusumik oqaaseqarfigissanngilakka,
tassa una tunngaviatigut isummerfigisussaajumaarmat ukiortaaminngaanniit
nutaamik toqqaasoqassanersoq. Taanna soorunami Inatsisartut
isummerfigisussaavaat.
Atassumminnganniit
oqariartuutigineqarpoq, ilaatigut siulersuisunut tunngassuteqartut, atorfillit
toqqarneqartarnerat taakkualu ajunngitsorsiassaata Landskarsimut
tutsinneqartarnissaat. Aamma taanna apeqqut pillugu akissuteqaatiga
innersuussutigissavara.
Kisianni maluginiarpara, partiinit
allanit kisimiilluni apeqqut qaqimmagu, ilaatigut unaasoq, Inatsisartunut
ilaasortat siulersuisunit toqqarneqartut taakku qanoq pineqassappat? Taanna
Atassutip kisimi eqqartorpaa, taanna taamaattumik maluginiarpara.
Aamma oqaatigissavara
innersuussutigineqartut assigiinngitsut Atassumminngaanniit aamma soorunami
qanoq iliuuseqarfiginiassagatsigit, soorluli aamma taama Siumup oqaaseqartuanut
oqaaseqartunga.
Inuit Ataqatigiit naatsorsuutit
akueraat, kisianni tassa tikkuagaasa ilagaat, soorlu siunissami sanaartugassat
eqqarsaatigalugit suleriaasissamik nutaamik ujartuineq. Oqaatigissavara taanna
tikinneqartussaangaluarmat ippassaanikkunni, ilaatigut Anders Nilsson-ip
Atassumminngaanneertup siunnersuuteqarnera aallaavigalugu, tassa upernaakkut
Inatsisartut sanaartugassanut tunngasut aningaasartaat akuersissutigisassagai,
ingerlatsinermullu tunngasut ukiakkut ataatsimiinnermi. Taannali
maannakkuugallartoq qatagiinnartinneqarpoq siunnersuuteqartumit
kissaateqarnikkut.
Naalakkersuisut kissaatigaat
anguniarlugulu soorlu, siunissami taanna ajornartorsiut Inuit Ataqatigiit
qaffatsitaat aaqqinneqassappat pitsaanerungaluartoq ukiut tulleriit soorlu,
1999-imi aningaasaliisoqassappat aammalu aningaasaliissutit 2000-imut
tunngasut, taamaalillutik ukioq tulliuttumi aningaasaliissutit
naatsorsuutigalugit aaqqiiniartoqassappat taava taanna pitsaanerusoq, suliassaq
taanna ininngimmat, taamaattumik oqaatigineqartutuut upernaamut
qaffatsinneqarpat ilimagaara, taanna taamatut aaqqeriarnissaa
uterfigineqarumaartoq. Tassanili soorunami Inatsisartut aalajangiisuujumaarput.
Kisianni tassa Naalakkersuisut qanoq iliuuseqarfiginiarpaat sanaartukkat
kinguaatsoortartut, taakkua annikillisaaffiginiarlugit taamaalillunilu
pitsaanerusumik pilersaarusiorneq anguneqarsinnaaqqullugu.
Uani Inuit Ataqatigiit tikkuagaat
ilaatigut Pilersaarusiornermi tunngasumik aammalu Peqqinnissaqarfiup aammalu
Inunnik Isumaginninnerup iluani pissutsit, taakkua Ataatsimiititaliap
kissaateqarnera aallaavigalugu naatsorsuutigaarput pingaartorujussuusoq
najoqqutassat aningaasat aqunneqarneranut tunngasut, malittarisassat
immikkoortortaqarfii imaluunniit direktorateqarfii assigiinngitsut
malittariaqaraat, taamaattumik oqaatigissavara tamatumap kinguneranik ulluni
makkunanerpiaq allakkat direktorateqarfinnut nassiussorneqarmata, taamaalillutik
malittarisassat ukioq una naatinnagu sanareersimaneqartariaqartut
naammassineqaqqullugit. Kisiannili aamma tassunga tunngatillugu
oqaatigissavara, uani taaneqartut pinnagit kisiannili Naalakkersuisoqarfiit
amerlanerpaarpaartaasa taanna suliassaq naammassereersimammassuk, kisianni
amigaatit kingulliit pissarsiariniarneqarput.
Uani Inuit Ataqatigiit ilaatigut
sakkortuumik akuersaarnartuutinngivillugu oqaatigaat atorfilittat marloriaammik akissarsisarnerat, allaallu
uanga aamma apeqquserusuppara una, ilaatigut partiit ilaata qaffatsitaa
politikerimmi sussavavut, taanna akineqallaqunarpoq.
Naalakkersuisut oqaatigaat taakkua apeqqutit naliliiffiginiarlugit
generalforsamlingissani tullerni.
Taamatullu Inuit Ataqatigiit
oqaaseqaataat oqaaseqarfigilaarpakka, aammali maluginiarlugu Kattusseqatigiit
aamma tunngaviatigut akissuteqaatima iluani qaffatsitaat
akissuteqarfigereerlugit.
Immikkut oqaaseqarfigilaassavara
ilaatigut qaffatsinneqartoq partiinit tamanit, kukkunersiuisut
piginnaatitaanissaat.
Paatsoorneqaqqunagit
erseqqissaatigissavara una, Naalakkersuisut siunnerfigimmassuk taamatut
allanngortitsineqassappat, soorunami Inatsisartut kissaataat malinneqassaaq,
taanna apeqquserneqassanngilaq, apeqquserneqarnianngilarlu Naalakkersuisunit,
kisianni Naalakkersuisut oqariartuutaat inassutaat uaniippoq, taamatut
aalajagiinissami apeqquteerarpassuit assigiinngitsut suliarilluaqqaarlugit
aatsaat Inatsisartut isummernissaminnut tunngavissaat qulaajareerlugit
qaffatsinneqarpat- pitsaanerusoralugu- taamatullu oqarnerminni oqaatigaat,
Inatsisartut akuerisaat inatsit Kalaallit Nunaanni naatsorsuuserinermut
tunngasoq 3.november 1994 akuerineqarsimasoq. Taanna aallaavigalugu
isummernissaq isornartoqanngitsoq anguniarlugu, taamaattumik immikkut
suliarilluaqqaarlugu isummerfigineqartariaqartoq apeqqut taanna.
Taamaattumik taanna
erseqqissaqqippara, inatsit atuuttoq aallaavigalugu Inatsisartut isummertussaammata
apeqqummut tassunga, piginnaataaffik taanna uunga illuartinneqarani
Inatsisartut inatsisiliartik aallaavigalugu isummertussaammata. Tassaana taanna
Naalakkersuisut uniffigisimagaat, taanna erseqqissaatigaara.
Kristine Raahauge, Landskarsip Naatsorsuutaasa
Kukkunersiorneqarnerannut Ataatsimiititaliap Siulittaasua:
Isumaliutissiissutitsinnut
oqaaseqaatit partiinit Kattusseqatigiinnillu nuannaarutigigaarparput, tassami
isumaliutissiissuterput akuersaarlugu tamarmik taaseqataarusullutik
ersarissumik nalunaarmata, aammalu aaqqikkusutatta taakku aaqqinnissaanut
Naalakkersuisunut inassuteqaatitsinni annertuumik tapersersuimmata.
Taakku annertunerusumik
oqaaseqarfiginianngilakka, qujaffigerujussuarpakka aammalu ataatsimiititaliami
sulinitsinni suleqatigiilluarnerput partiinit suleqatitsinni taakkunani, soorlu
aamma takusinnaagissi atsioqataasimasuni isumaqatigeeqqinnaarluta
suliarisimagipput. Pingaartingaaratsigulu suliarput aamma Naalakkersuisut
akissuteqaataasa tiguneqarnerata kingornatigut aamma naapeqqissimavugut,
tassami suliarput kukkuluttornaveersaaqqissaarluta suliarisimagatsigu
akissuteqaat tupaallannalaarsorisimagatsigu.
Taavalu Naalakkersuisup
akissuteqaataa tikinniarpara, tassalu aamma qujaffigerusuppakka inassuteqaatitigut
aaqqitassat, tassami soorlu aamma ersarissumik ilaatigut partiinit
oqaatigineqartoq suliassarigipput aningaasartuutissat tunniunneqarsimasut
atorluarneqarsimanissaat aammalu naapertuuttumik atorneqarnissaat, tassungalu
aamma atatillugu uagut suliassarigipput Naalakkersuisunut
inassuteqaateqarsinnaanitsinni pitsaasumik siunnissami sulinissaannut,
tikkuartuilluta aammalu tassa taamaaliorsimavugut, taakkulu amerlanersaat
malinniarmassuk qutsatigaakka.
Taavalu Sisimiuni ikaartarfimmut
tunngatillugu taamatut oqariartuuterput immaqa ilaatigut tupigineqarsinnaavoq,
kisiannili tassa una tunngaviginiarsimavarput upernaaq ataatsimiinnitsinni
taanna saqqummiunneqarmat kommunit akiliiumanngitsutut nipeqartinneqarsimavoq,
taavalu uagut misissuereernitsinni ilaatigut aasaanerani Danmarkiminngaanniit
rigsrevisorimik ataatsimeeqateqarnitsinni isumasiorsimavugut taamatut
pisoqartillugu qanoq iliortoqarsinnaanersoq. Tassalu taanna aallaavigalugu ukua
kommuninut tapiissutaasartut tunniussassaagaluit ilanngaalluni
akiliisitsisinnaaneq, taanna periarfissaasoq eqqartorneqarmat taavalu aamma
uagut taanna atorsinnaagatsigu tikkuarsimavarput, kisianni paasivara taanna
suliaq aamma naammassiniarneqartoq, immaqa bloktilskudinit tigunngikkaluarlugu.
Taavalu atorfilinnut tunngatillugu
biilinut allanullu taanna aamma Naalakkersuisut aaqqiiniarnissaminnut, tassa
Akileraartarnermut Qullersaqarfimminngaanniit ersarissumik pappilissamik
pissarsisimavugut suut malillugit taama suleriartoqartassasoq, taannalu aamma
malinniarneqarmat nuannaarutigaarput.
Ajunngitsorsiassanut tunngatillugu
tassani taamatut oqariartuuteqarnitsinni soorunami aamma
misissoqqissaarsimavagut, aammalu taakku eqqorniakkagut taakkununnga
sunniuteqarsinnaanera aamma soorunami eqqartorsimavagut, kisiannili tassa aamma
nalilersoqqissaarsimavagut, soorlu aamma finanslovimi takuneqarsinnaasoq
ilaatigut uagut nalunngisagut kikkut tamanikkuninnga siulersuisunut
ilaasortaasut aningaasarsiaqartarput lĝnramme 38 ilaatigut, taassumalu
saniatigut tapiissutit immaqa 120-p missaani aammalu taassumap saniatigut
immikkut tapiissutit 90. - 100.000-it missaanni, taava isumaqaratta
pissarsereertartut ajunngitsorsiassanik naammattunik, taavalu uku saniatigut
Namminersornerullutik Oqartussat namminneq suliffeqarfiutaanni imaluunniit
ilaannakuusumik suliffeqarfiutaanni aamma uagut ilaatigut aningaasalersukkatsinni
taamatut aamma qaavatigut tunineqartarneri, soorlu aamma paasigikka aasaq
Inatsisartunut ilaasortat ataatsimiinnerminni Danmarkiminngaanniit tamakku
periutsit paasiniaaneranni aallaaveqartumik taamatut siunnersuuteqarpugut,
kisiannili aamma uanga maluginiarpara tassami massakkut taamatut
inissereernikut uagut allanngortissinnaanngilagut, kisianni aamma
paasisinnaavara Naalakkersuisut siunissami tamanna malinniaraat.
Taavalu landskarsip
naatsorsuutaasa kukkunersiorneqartarneranut atatillugu kukkunersiuisunik
atornitsitsinissamut tunngasoq, taanna qinnutigisimavarput inatsisit malillugit
aaqqinneqassasoq, inatsisillu taakku malillugit aaqqinnniarnerini uagut
toqqaasinnaanermi qinnuteqarsimavugut. Uaguttaaq aamma Naalakkersuisutuulli
Inatsisartunut qinnuteqarpugut aalajangigassanngoqqullugu.
Taamatut aalajangiisinnaanermut
tunineqarsinnaanitsinnut aamma tunngasut paasiniarsimavagut inatsisitigut
tunngavissaqarnersugut, taamaasiorsinnaavugut tassami Inatsisartuni
ataatsimiititaliat pingasut inatsisit naapertorlugit pilersitaapput uagut
taakku ilagivaatigut. Tassalu taanna tunngavigalugu taamatut
akuerineqarsinnaanissarput inatsisitigut ajornartoqanngilaq.
Taavalu una Naalakkersuisut
qinersinissaq pillugu massakkut taamatut toqqaasinnaaneq allaat eqqartormassuk,
taava aamma apererusunnarsinnaavoq, taava massakkut Inatsisartuni
ataatsimiinnitsinni inatsisit suliagut aamma unitsiinnassavagut? Isumaqarpunga
una assigerluinnaraa aamma inatsisit 1994-imili atuulersut kingunerisaannik
aaqqiiniarneq pisariaqalermat immaqaluunniit pingaarneruvuoq qinersiviup uumap
naannginnerani aaqqinneqarnissaa. Apeqquterpassuit massakkut aaqqiiniarnermi
apeqquserlugu Naalakkersuisup oqaatigisai paatsuunganalaarput, inatsisit
qangali atuukkami, apeqquterpassuit tamakku qulakkeerneqarsimassapput
toqqaaniarnermi piareersimanissami taamanikkulli inatsisiliornermi
eqqartorneqarsimassammata, kisianni uani tassa toqqaanerinnaasussaavoq.
Taamaattumik tassunga atatillugu
massakkut partiini aamma Atassumminngaanniit
eqqaaneqartoq, tassa piginnaatitsisinnaaneq aallaavigalugu toqqaanissamut
immikkut ataatsimiinnerup uuma ingerlanerani - ataatsimiinnerup naannginnerani
oqaluuserisassanngorlugu inissinneqarnissaa aamma uagut naaperiarfittut
kissaatigaarput, tassalu taamatut aalajangiinissamut uagut ataatsimiititaliat
immaqa aamma siunnersuummik saqqummiisinnaassagatta, tassungalu aamma soorunami
atatillugu ukiuni tulliuttuni tassami, aamma inatsimmi tassani
periarfissaqarpoq ukiut tamaasa kukkunersiuisumik avataaneersumik
toqqaasarnissat, taanna aamma aalajangiiffigineqarsinnaammat, tassuuna
naaperiarusuppugut, tassa immikkut oqaluuserisassanngorlugu qaqeqqinneqassasoq
ataatsimiinnerup uuma iluani.
Taavalu Naalakkersuisup
akissuteqarnermini aamma akuersinissamut isumaliutissiissutitsinnut
akuersinissamut, tassa taanna siullertut piginnaatitaanissatsinnut
akerliunertut oqaatigisaa naaperiarfiusinnaasumik saqqummiivunga aammalu
paasinarpoq partiit ilaanni taanna periarfissaq ammatinneqartoq.
Taavalu aappaattut akuersissutiginninnissamut
tunngatillugu oqaatigalugu 1997-imi naatsorsuutit siunissami iliuusissanik
aalajangiisuutinnagit akuersissutigineqassasut, taanna assut uanga paatsuulaarpara,
tassami uagut ilaatigut aamma suliassarigatsigu siunissaq eqqarsaatigalugu
aningaasaqarniarnitta aammalu aningaasat eqqortumik atorneqartarnissaat taava
sooq taamaasiortoqarniarnersoq suna isertugaqarnersoq, paatsoorneqarsinnaavoq
aamma taamatut piumasaqarneq. Uagut tatiginninnerput aallaavigalugu tassami
uani tikkuartorpagut assigiinngitsut aammalu tikkuartuinitsinni ersarissumik
oqaatigisarpagut naatsorsuutit 1998-imi saqqummersussat kukkunersiornerini
atasumik nalunnginnatsigit suleriaatsit allanngugaanngitsut, immaqa
ajornartorsiutit taakku assingi aamma saqqummernerini takussutissatigut
aaqqinneqassasut, taakkualu aamma Naalakkersuisup akissuteqarnermini
malinniarpaat, taamaattumik taassuma oqariartuutip oqariartuutigineqarnera
apeqquserneqarsinnaavoq, allaat tatiginninnginnermik tatiginassusermik
pilersitsisinnaanera tamakku eqqartorneqarlutik. Kisianni isumaqarpugut uani
naatsorsuutit saqqummiunneqarnikuupput, taakkulu kisitsisit
allanngortissinnaanngilagut massakkut tamatta, tassa 1997-imili tamarmik
aningaasartuutit taakkua attorneqarnikut aallaavigalugit suligatta, taakku
uterfigisinnaanngilagut, kisiannili suleriaqqinnissatsinni suut
pitsaanerpaamik siunissami aningaasaqarnermut aqutsinermi siunertaralugit
oqariartuutigigatsigit.
Ruth
Heilmann, Siumut:
Naatsunnguamik
erseqqissaateqalaaginnarniarpunga, tassa ilumoorpoq Aningaasaqarnermut
Naalakkersuisoq akissuteqarnermini oqarami, Inatsisartut inatsisiliartik
aallaavigalugu isummertussaasut, taannalu massakkut tassa isummissutigaarput
aamma Siumuminngaanniit erseqqissaatigissavara ukioq manna taanna
ataatsimiinnerput naatinnagu taamatut pisinnaatitaaffimmik kukkunersiuisunik
toqqaanissatsinnik, taanna siunnersuut uagut aamma Siumuminngaanniit
akuersaarparput.
Daniel
Skifte, Aningaasaqarnermut Ineqarnermullu Naalakkersuisoq:
Siullerminguna
paatsuuisoqaqqunagu erseqqissaatiginiariga una; tassa minnerunngitsumik unneqqarissaarneq
eqqarsaatigalugu, maannakkumut ataatsimiititaliap ujartugaa, tassalu
malittarisassat, najoqqutassat suliarineqarsimanngitsut taakku
suliarisariaqartut aamma taanna partiit amerlasuut oqaatigimmassuk.
Unneqarinnissaq peqqutigalugu oqaatigissavara maannakkumut marluk kisimik
taamaattoqanngillat, siulleq tassaavoq Inatsisartut namminneq allaffeqarfiat,
taamaattoqanngilaq, neriuppugut Inatsisartut kissaataat naammassillugu ukiortaannginnerani
taanna naammassissasoq.
Aappassaannik
Isumaginninnermut Pisortaqarfik, sinneri tamarmik pisortaqarfiit
malittarisassanik eqq.... peqarput,
taava tassa unneqqarinneq.
Ataatsimiititaliap siulittaasuata
assigiinngitsut eqqaasai erseqqissumik oqaatigissavakka, tassaasut uani
Naalakkersuisut taamatut suliarilluakkamik qaffaanissamut
kissaateqarnerannut peqqutaavoq
Kalaallit Nunaanni naatsorsuuserinermik suliaqartut naalagaaffimmi akuerisaasut
ikittuararsuupput, taava avataaninngaanniit tikkuaassagutta/toqqaassagutta
taava aningaasat tikisitsinermut atugassat aammalu ilaatigut akileraarnermut
annaasassagut, Danmarkimi toqqaassagutta Danmarkimi suliffeqarfiit
akissarsiassat allallu, taava annaassavagut tamakkuaqqanuku apeqqutit
qularnaarniarlugit taamaattumik Naalakkersuisut kissaatigigaat apeqqutit
misissorluarneqarnissaat.
Oqaatigeqqissavara
paatsuuisoqaqqunagu oqareernittuut taanna apeqqut Inatsisartut aalajangigassaraat,
taavalu taanna naalassavarput, kisianni tamakkuninnga uanga ilisimasaqaruma
apeqqutinik suut kingunerisinnaasaasa ilai maani oqaatigisinnaallugit, taava
oqaatiginngikkukkit misigisimassaanga siunnersuilluarnanga,
siunnersueqataanissaraana tunngavigalugu taamatut oqartunga, apeqqutit ilai
akileraarutinut tunngasut qinigassat ikinneri allallu tamakkua
misissorluaqqaarnissaat nalilersornissaallu pillugit
inatsisiliortoqartariaqartoq, qujanaq.
Lars Sĝrensen, Inuit Ataqatigiit:
Aap tassa ilaatigununa
Atassumminngaanniit taamatuttaaq aamma Aningaasaqarnermut Naalakkersuisuminngaanniit
ilaatigut ujartorniarneqarmat Namminersornerullutik Oqartussani 100%-imik
pigineqartuni Inatsisartuni ilaasortat ajunngitsorsiassaat aamma siunissami
atortuujunnaarsinneqarnissaanut tunngatillugu Inuit Ataqatigiinninngaanniit oqaatigissavarput
qangali tamassumap aaqqinneqarnissaa ilaatigut kissaatigisarsimagatsigu.
Naluneqanngitsutuummi Inatsisartuni ilaasortat arlallit siulittaasuunertik
tunngavigalugu Inatsisartuni akissarsiamik saniatigut aamma siulittaasutut
ukiumut taamannaannaq akissarsiaqartinneqarmata.
Taamatuttaaq aamma
puiorneqartariaqanngilaq upernaaq ataatsimiinnitsinni ilaatigut Atassutikkormiut
Siumukkormiullu suleqatigiinnermikkut taakkua aningaasarsiaat allaat
marloriaatinngorlugit qaffatsimmatigit, taamaattumik piviusumik tamakkua
eqqartorneqarnissaanni Inuit Ataqatigiinninngaanniit annertuumik
suleqataarusuppugut.
Naggataatigullu aamma
oqaatigissavara sanaartugassanut tunngatillugu ilaatigut maannakkut
aaqqiisoqarsimannginnera uagut 1995-iminngaanniit, 1996, 1997 aammalu ukioq
manna taakkortaanut tunngasunut aaqqiisoqarnissaanik kaammattuuterput
piviusunngortinneqartariaqarpoq, tassami maannakkut oqallittarnerni
Naalakkersuisut oqartarput aningaasatigut ingerlanerput ajunngilaq, kisiannili
Inatsisartuni ilaasortat taamatuttaaq aamma Aningaasaqarnermut
Ataatsimiititaliaq kalerrinneqartarpoq aningaasatigut ingerlanerput ammut
ingerlaarpoq, tassani peqqutaaqataanngitsuunngilaq ukiut tamaviisa, tassa 1997
eqqarsaatigalugu 241 mio. kr.-inik landskarsip naatsorsuutai, oqartariaqarpugut
uniuinertut ingerlanneqarsimaneri tamatumani assigiinngitsutigut toqqissisimannginnermik
kinguneqartitsisarnerit taanna pinngitsoornani unitsinniarneqartariaqarpoq.
Taamaattumillu Inuit
Ataqatigiinninngaanniit kaammattuutigut apeqqutaatinnagu kina taamatut
siunnersuuteqarsimanera, taassumap aaqqinneqarnissaa pisariaqarpoq,
taamaalilluta Inatsisartuni ilaasortaasugut aningaasaqarnermut killiffitta
tamatta ilisimanissaa pisariaqarami. Tassami qularnanngitsumik
assigiinngitsutigut pissutissaqanngitsumik assortuuttarnerit annertoorujussuit
ingerlanneqartarput, ilaatigut ukiut tamaasa taamatut annertoorujussuarmik
aningaasanik uniuineq ingerlanneqartarmat.
Taamatut oqaaseqarluta una
kukkunersiuinermut toqqaasarnermut tunngatillugu aamma Inuit
Ataqatigiinninngaanniit suleqataarusuppugut, tamatumammi aamma
aaqqinneqarnissaa pisariaqarpoq, taamaattumik suleqataanissarput maanngaanniit
oqaatigiinnassavara.
Anders Andreassen, ataatsimiinnermik aqutsisoq:
Tassa oqaatigeqqissavara una amerlanerussuteqartuninngaanniit
kissaatigineqartoq tassaammat, kukkunersiuisartussanik toqqaanissaq immikkut
ullormut oqaluuserisassanngorlugu inissinneqassasoq, oqareernittut aamma
tamanna malinneqassaaq aamma taanna isumaqatigiissutaareermat isumaqarpunga
annertunerusumik pulaffigeqqittariaqanngikkipput.
Taamaalillugu ullumikkut
oqaluuserisassani immikkoortoq 79, tassa landskarsip 1997-imut naatsorsuutai
pillugit isumaliutissiissut isumaqatigineqartoq naammassivoq.
Oqaluuserisaq naammassivoq.