Kalaallit Nunaanni Inatsisartut

Oqaluuserisassani immikkoortoq 93		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 28.oktober nal. 18.20

 

Oqaluuserisassani immikkoortoq 93

(Inatsisartunut ilaasortap Anthon Frederiksenip apeqquteqaataa)

 

Ataatsimiinnermik aqutsisoq: Anders Andreassen, Inatsisartut Siulittaasuat.

 

Anthon Frederiksen, Kattusseqatigiit (apeqquteqartup tullia):

Sumi inunngorsimaneq tunngavigalugu akissarsiaqartitsineq Kattusseqatigiinniit akuersaarneqar­sinnaanngitsoq siusinnerusukkut aamma ataatsimiinnermi matumani erseqqissareersimavara. Kisiannili peqqinnissaqarfimmi atuarfeqarfinnilu pissutsit ilungersunartut pissutigalugit, min­nerunngitsumik peqqinnissaqarfimmi ilaatigut 42 mio.-it tungaannut aningaasartuuteqarneruler­nissaq aammalu ilinniartitsisunik amigaateqarnerujussuaq tunngavigalugut, sulisut taakkua tassa kalaaliugunik danskiugunik allamiuungunilluunniit akissarsiaasa tamarmik assigiimmik pissutsi­nut naleqqusarneqarnissaat aamma ilaatigut siunnersuutitut apeqquteqaatitullu saqqummiuttareer­simavara.

 

Minnerunngitsumik innuttaasut peqqinnissaqarfimmiit kiffartuunneqarnerisa ajorsingaluttuinnar­nerat aammalu meerartatta inuusuttattalu ilinniartitsisoqarnikkut naammaginanngitsumik atugassaqartitaalersimanerat pissutigalugit.

 

Kisiannili ullumikkut, tassa taamanikkut 16.oktober , tusagassiuutitigut saqqumminneqarpoq kialluunniit akuersaarsinnaanngisaa, tassalu tikisitat nunaqavissullu ilaatigut qaammammut 4.000 koruunit angullugit akissarsiamikkut assigiinngisinneqartut. Sunaaffa allaat Namminersornerullu­tik Oqartussat suliffeqarfiutaasa ilaanni suli atuuttumik.

 

Taamaattumik matumuuna apeqqutiginiarpara ilumut taamaattoqarnersoq, aammalu Namminer­sornerullutik Oqartussat suliffeqarfiutaanni qassini sorlernilu tamanna atuunnersoq ?

 

Daniel Skifte, Aningaasaqarnermut Ineqarnermullu Naalakkersuisoq:

Inatsisartunut ilaasortaq hr. Anthon Frederiksen apeqquteqarpoq ilumut Namminersornerullutik Oqartussat suliffeqarfiutaanni sumi inunngorsimaneq tunngavigalugu suli assigiinngisitsisoqar­nersoq, aamma Nammanersornerullutik Oqartussat sulisullu atorfiutaanni qassini sorlernilu tamanna atuunnersoq.

 

Sapaatip akunnera kingulleq atorfinitsitseriaatsit pillugit Inatsisartut oqallinneranni apeqqut pineqartoq aamma tikillatsiarneqarpoq.

 

Pingaarnerusutigut Naalakkersuisut oqaatigissavaat, Naalakkersuisut 1991-imi Namminersor­nerullutik Oqartussani Kommuninilu sulisut eqqarsaatigalugit sulisitsisutut isumaqatiginninniar­sinnaatitaaneq Pisortat isumaqatiginninniartartoqatigiivi taarserlugit tigummassulli. Sumi inunngorsimaneq tunngavigalugu assigiinngissititsinitoqqap atorunnaarsinneqarnissaa assersuuti­galugu akissarsiatigut assigiinngissutit peerneqarnissaat, feeriarluni akiliunneqarluni angalasar­nerit peerneqarnissaat, pigisat nuunneqarneranni maleruagassat allanngortinneqarnissaat, ajunn­gitsorsiassat soorlu soraarnermi aningaasarsiassat aamma marloriaammik ukiunik soraarnerussu­tiaqaataasussanik katersinerit peerneqarnissai il.il sulisitsisunik immikkut soqutigineqarsimam­mat.

 

Peqatigitillugu sanileriinnik isumaqatiissuteqarfiusuni assersuutigalugu allaffimmiut niuernermil­lu suliaqartut nalunaarasuartaateqarnermi teknikkerit il.il. eqqarsaatigalugit, akissarsiat naligiis­sarneqarnissaannut immikkut agguaassassanik, kiisalu nunaqavissut akissarsiakinnerusut iluaquserniarlugit isumaqatigiinniarnerni agguaqatigiissillugu pissarsiarineqarnissaannut immik­koortitsisoqartarsimavoq.

 

Suli isumaqatigiinninniarfiusartut ataatsimut isigissagaanni, sumi inunngorsimaneq tunngavigalu­gu assigiinngisitsinerup kingunerisaanik equngassuteqartoqartussaavoq. Isumaqatigiinniarnerni kingullerni danskit isumaqatigiissutaat arlallit matuneqarputtaaq.

 

Ilisimaneqartutut ukioq manna 16.oktober naqiterinermut tunngasunik suliaqartut typografit, tusagassiorfinnit saqqumminneqarput, tassani sulisut akissarsiamikkut assigiinngissuteqarnerat erseqqissarneqarluni. Tassunga tunngatillugu oqaatigineqassaat naqiterinermut tunngatillugu suliaqartut tikisitat isumaqatigiissutaat 1997-imi isumaqatigiinniarnermi atortussaajunnaarlugit matuneqarmata/peerneqarmata.

 

Tamatumap kinguneraa isumaqatigiissut taanna malillugu nutaanik atorfinitsitsisoqarsinnaajun­naarpoq imaluunniit tikisitaqarsinnaajunnaarpoq.

 

Oqaatigineqassaartaaq Pilersuiffiup naqiteriviani, naqiterinermut tunngasumik suliallit ilinniagal­lit  nunaqavissut 1993-imiilli suliamik ilinniagalinnut, suliamillu ilinniagaqanngitsunut qaam­mammusialinnut SIK-mut isumaqatigiissut malillugu atorfinitsinneqarsinnaalersimammata.

 

Anthon Frederiksen, Kattusseqatigiit:

Tassa paasivara uani assersuutigineqartoq, tassalu naqiterinermut tunngasoq imatut paasisariaqar­simassagunarpoq, tassani atorfimmi assigiinngisitsinerusimangaluaq 1997-imi atorunnaartoq.

 

Daniel Skifte, Aningaasaqarnermut Ineqarnermullu Naalakkersuisoq:

Taamatut isumaqatigiinniarnerni periusiusartoq unaavoq, kikkulluunniit isumaqatigiissutit malillugit killiffissaa tikillugu taakkuninnga atugassaqartitaasut, taava nutaaminngaanniit aallartinnermi allat atugassarititaasut atortarpaat.

 

Taamaattumik 1997-imi isumaqatigiissut allatut oqaatigalugu naqiterisut Danmarkiminngaanne­ersut tikisinneqarsinnaajunnaarput. Taanna matuvoq SIK-p isumaqatigiinniarneq tigummagu, taannaku tunngaviuvoq SIK 1993-imiilli suliassaq taanna tigummagu, taakkulu sinnerlugit isumaqatiginninniuttarlugit. Taamaatumik taanna erseqqippoq, assersuutigalugu kinaluunniit atorfieqartitaaguni assersuutigiinnarpara, soraarnerussutisiaqalersinnaasunik 60-inik ukioqalerlu­ni.

Inatsisartut nutaamik aalajangerpata 63-inik ukioqalernikkut aatsaat soraarnerussutisiaqarsinnaa­voq.

 

Isumaqatigiissutit taassuminnga eqqorneqartut soorlu 61-inik ukiullit, soorunami 60-inik ukioqa­lerlutik imaattui sulisinneqaqqissanngillat 63-inik ukioqalernissaminnut. Taamaattumik taanna ajornartorsiutaanngilaq, pisut taamaattuartarput, pisullu taamaattuassapput.

 

Naqiterisunut tunngatillugu isumaqatiginninniarsinnaaneq SIK-p aqutaraa.