Oqaluuserisassani immikkoortoq 95 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataatsimiinnermik aqutsisoq: Anders Andreassen, Inatsisartut Siulittaasuat.
Johan Lund Olsen, Inatsisartunut ilaasortaq, Inuit Ataqatigiit:
Naalakkersuisunut PET pillugu apeqquteqaateqarpunga, tassa Politiet Efterretnings Tjeneste, ilisimaneqartutuut Danmarkimi politiit isertortumik paasiniaasartui pillugit tassagooq, Politiet Efterretnings Tjeneste pillugu maannakkut Danmarkimi misissuisitsisoqartussanngorpoq Folketingimut kingusinnerusukkut aamma nalunaarutigineqartussamik.
Naalakkersuisunut apeqquteqaatiginiarparput PET-p pilersaarutaasumik misissuiffigineqarneranut atasumik nunatsinni inatsisit tunngaviusut unioqqutinnagit naalakkersuinikkut sulianiaqatigiiffinnut PET qanoq iliuuseqartarsimanersoq iliuuseqartarsimannginnersorluunniit ilanngullugu misissuiffigineqarnissaat qulakkeerniarlugu danskit Naalakkersuisuinut Naalakkersuisuvut kajumissaarilersaannginnersut.
Inuit Ataqatigiit isumaqarpugut PET-p misissuiffigineqarnissaanik innuttaaqativut nunatsinneersut politiit isertortumik paasianiaasartuinit marserneqartarsimasinnaanerat aamma eqqarsaatigalugu nunarput misissuinissami tassa aamma ilaatinneqartariaqartoq.
Jonathan Motzfeldt, Naalakkersuisut Siulittaasuat:
Tassa piffissaq una, ullut kingulliit atorlugit naammassiniarneqarsimammat oqaatigissavara, danskit Naalakkersuisutigoortumik Justitsministeriaqarfimminngaanniit ilisimatinneqarsimagatta, maannakkut danskit Naalakkersuisut saqqummiussaat PET-ip suliarisimasaanut tunngasut.
Tassani Kalaallit Nunaat ilanngunneqarsinnaasoq, tamannalu aamma maani apeqqutigineqartumut tamanna erseqqissumik akissutigineqassaaq, tassa PET-p taamanikkut suliarisimasaanut aamma Kalaallit Nunaannut tunngasut aamma ilanngunneqarsinnaasut erseqqissumik ilisimatitsissutaapput.
Johan Lund Olsen, Inuit Ataqatigiit.
Naalakkersuisut Siulittaasuata akissuteqaataanut qujangaarpunga.
Ilisimaneqartutuut ullumikkut PET-p misissuiffigineqarnissaanut atatillugu inatsisissatut siunnersuut Folketing-imi siullermeerneqarpoq, taamaattumik maannakkut Naalakkersuisut Siulittaasuata Naalakkersuisut sinnerlugit aamma akuersaartumik oqaaseqareermat, naatsorsuutigilluinnarpara Folketing-ip aappassaaneeraluni taava suliaqalinnginnarani nunatsinninngaanniit piumasarineqartussaq aamma pissusissamisoortumik apuunniarneqarumaartoq.
Anders Andreassen, Inatsisartut Siulittaasuat:
Tassa taamaalilluta ullumikkut oqaluuserisassavut tamakkerpavut.
Oqaluuserisat naammassipput.