Kalaallit Nunaanni Inatsisartut

Oqaluuserisassani immikkoortoq 01-1

Ataatsimiinnerit ] Op ] Nęste ]

Siullermeerneqarnera Aappassaanneerneqarnera Pingajussaaneerneqarnera

Ulloq ataatsimiiffik siulleq, tallimanngorneq 24. september 1999, nal. 11.00

Oqaluuserisassani immikkoortoq 1

Ataatsimiinnerup ammarneqarnera.

Ataatsimiinnermik aqutsisoq: Otto Steenholdt, Atassut, sivisunerpaamik Inatsisartunut ilaasortaasoq:

Inatsisartut ataatsimiinnerat ammarpoq. Inatsisartut suleriaasissaat naapertorlugu Siulittaasoqarfimmik qinersineq pereerserlugu, ammaanersiorluni ataatsimiinneq Inatsisartut ilaasortaanit sivisunerpaamik ilaasortaasimasumit siullermik siulersorneqartussaavoq.

Taamak inissisimasutuut Inatsisartuni ilaasortat 1999-imi Inatsisartut ukiakkut ataatsimiinnerannut tikilluaqqungaarpakka, oqaatigiumallugulu pitsaasumik imartuumillu ataatsimiittarnissatta ingerlannissaat assut kissaatigigiga. Oqaatigeriikkattut uanga suliassaraara Siulittaasoqarfiup tamarmiusup qinerneqarnissaata tungaanut Inatsisartut ataatsimiinnerata siulersornissaa.

Ullormut oqaluuserisassani immikkoortut 5, 6-ilu Inatsisartut siulittaasuannik, siulittaasullu tulliinik sisamanik qinersineq tikitsinnagu ilaasortanut peqataasinnaanngitsunut sinniisussat Inatsisartunit akuersissutigineqaqqaartussaapput.

Tassa Inatsisatuni ilaasortaq Daniel Skifte, Atassummeersoq ulloq 18. oktober 1999 tikillugu Naalagaaffiit Peqatigiit New York-imi ataatsimeersuarneranni peqataasussaavoq. Taamaammallu Inatsiisartunut inassutigissavara Daniel Skifte-p sulinngiffeqarallarnissaa Inatsisartut akuersissutigissagaat. Qinigaanerup misilinneqarnissaanut ataatsimiititaliap akuersissutigaa Atassutip sinniisussaata siulliup Gudmann Jensen-ip Inatsisartunut qinigaasimanera. Taamaalillunga Inatsisartunut inassutigaara Gudmann Jensen-ip Daniel Skifte-mut sinniisussatut ulloq 18. oktober 1999 ilanngullugu inissinnissaa Inatsisartut akuersissutigissagaat. Taamannak inassuteqarnera akerliuffigineqarnerluni. Naamik, qujanaq.

Kiisalu Inatsisartunut ilaasortaq Jakob Sivertsen, Atassut napparsimanini pissutigalugu Inatsisartut ataatsimiinneranni peqataasinnaanani nalunaarpoq. Qinigaanerup misilinneqarnissaanut ataatsimiititaliap akuersissutigaattaaq Atassutip sinniisussaata tulliata Naimanngitsoq Petersen-ip Inatsisartunut qinigaasinnaanera. Tassa taamaalillunga inassutigaara Naimanngitsoq Petersen-ip Jakob Sivertsen-imut sinniisussatut ulloq 18. oktober 1999 ilanngullugu inissinnissaa Inatsisartut akuersissutigissagaat. Aamma Gudmann Jensen-ip Jakob Sivertsen-imut sinniisussatut ulloq 19. oktober 1999-miit ataatsimiinnerup sinneranut inissinnissaa taamatuttaaq akuersissutigineqassasoq. Taamak siunnersuuteqarneq maanngaaniit akerliuffigineqarnersoq apeqqutigissavara. Akerliusoqanngilaq, qujanaq.

Taava Gudmann Jensen aamma Naimanngitsoq Petersen tikilluangaaritsi. Inatsisartuni inissassinnut ingikkiartornissarsi ammarpoq, ingikkiartorniaritsi tikilluaritsilu.

Oqaluuserisaq naaammassivoq.