Oqaluuserisassani immikkoortoq 05 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq ataatsimiiffik siulleq,
Tallimanngorneq 24. september 1999, nal. 11.06
Ataatsimiinnermik
aqutsisoq: Otto
Steenholdt, Atassut, sivisunerpaamik Inatsisartunut ilaasortaasoq:
1999-imi Inatsisartut ukiakkut
ataatsimiinnerata ammarsiorneqarnerani ullormut oqaluuserisassani immikkoortoq
5, Inatsisartut siulittaasuannik qinersineq. Maannalu tassa Inatsisartut
siulittaasuannik qinersisoqassaaq.
Suleriaasissat naapertorlugit
siulittaasumik qinersinermik amerlanerussuteqarluinnartunit
qinerneqarsimanissaq piumasaqaataavoq.
Inatsisartut siulittaasuattut
inissisimaffimmut qinigassanngortitassatut siunnersuuteqartoqaqqullugu
qinnutigissavara. Qinigassanngortittoq ataasiinnaagaluarpalluunniit
taasisitsisoqassaaq. Tassa partiit angissusertik tunngavigalugu
ilisimatitsissutigissavaat siulittaasup tulliatut kina qinigassanngortinneqarnersoq.
Siulliullugu partii Siumut
qinnuvigissavara qinigassanngortitamik kinaanera maani oqaatigeqqullugu.
Per Berthelsen, Siumup oqaaseqartua:
Siumut tungaanit
nalunaarutigissavarput Naalakkersuisoqatigiinnermi isumaqatigiissut
tunngavigalugu Inuit Ataqatigiinninngaaniik siunnersuutigineqartoq Johan Lund
Olsen, Siumut tungaanit siulittaasussatut akuersaarumagatsigu.
Siverth K. Heilmann, Atassutip oqaaseqartua:
Atassutip gruppe-ani
sivisungaatsiartumik eqqartuereerluta oqaatigissavarput siulittaasoqartitsinissaq
tamarmi Inatsisartuni katersuuffiusariaqartoq. Kisiannili
siulittaasoqartitsiniarnermut atatillugu misilittagaasimasut qiviaraanni uagut
Atassutip gruppe-ani allaanerusumik Atassutip iluani nammineq
siunnersuuteqarsinnaagaluarluta, maani inimi piukkussaqarpugut. Taamaattumillu
Atassutip siunnersuutigerusuppaa Anders Andreassen, Siumut, taassumap
sulisimanera naammagisimaarsimagatsigu. Aammalu tassani immikkoortitsineq
immaqa illuinnaasiunngitsutut oqaatigineqarsinnaasoq ingerlassimagaa naammagisimaaratsigu.
Lars Sørensen, Inuit Ataqatigiit oqaaseqartuat:
Inuit Ataqatigiinninngaanniit
Inatsisartut siulittaasussaatut Johan Lund Olsen-ip ingerlaqqinnissaa
inassutigaarput.
Anthon Frederiksen, Kattusseqatigiit oqaaseqartuat:
Kattuseqatigiit sinnerlugit uagut
aalajangiussaqarsimanngilagut inummik aalajangersimasumik qinersissalluta,
taamaattumik pissutsit qinersilernermi takutikkumaarpaat akuerseqataassanerluta
akuerseqataassannginnerlutaluunniit.
Per Rosing Petersen, Kisimiilluni qinigassanngortittoq:
Uanga
qinigassanngortitsinianngilanga aamma.
Ataatsimiinnermik
aqutsisoq: Otto
Steenholdt, Atassut, sivisunerpaamik Inatsisartunut ilaasortaasoq:
Tassa massakkut erserpoq
qinigassanngortitsisoqartoq marlunnik. Tassa arlalinnik siunnersuuteqartoqarpat
siulliullugu siunnersuutigineqartoq taasissutigineqartussaavoq. Siulliulluni
siunnersuutigineqartoq tassaavoq Johan Lund Olsen, Inuit
Ataqatigiinninngaanneersoq. Taamaattumik Inatsisartut aperissavakka
siunnersuutigineqartumut isumaqataanertik, isumaqataannginnertik
taasinngitsoorniarnertilluunniit nalunaarutigissagaat.
Taamaattumik siullermik
apeqqutigissavara imaluunniit inassutigissavara siunnersuutigineqartumut
isumaqataasut nikueqqullugit. 16-it isumaqataallutik taasipput.
Maannakkullu Inatsisartut
siunnersuutigineqartumut akerliullutik taasiniartut nikueqqullugit
qinnuigissavakka. 9-at taasipput akerliullutik.
Taavalu massakkut aamma
apeqqutigissavara siunnersuutigineqartumut isumaqataallutik, akerliullutilluunniit
taaseqataanngitsut nikueqqullugit. Tallimat.
Tassa taasineq iluamik
paasinarluartumillu pisariaqassammat, kingumut taaseqqinnissarput
pisariaqalerpoq. Tassa massakkut kingumut taaseqqinnissami uteqqissavara.
Siunnersuutigineqartoq siulleq, tassalu Johan Lund Olsen. Tassunga
isumaqataasut nikueqqullugit qinnuigissavakka. 18-it isumaqataallutik
taasipput.
Taavalu massakkut
akerliullutik taasisussat taasiniartut qinnuigissavakka nikueqqullugit.
Arfineq-pingasut.
Taavalu massakkut isumaqataallutik
akerliullutilluunniit taaseqataanngitsut qinnuigaakka nikueqqullugit. Tallimat.
Soorlu taasilluni
nikueqattaarnerup takutikkaa, maannakkut ersarippoq Johan Lund Olsen 18-inik
taaneqartoq, taavalu akerliullutik tamatumunnga 8-t taasinngitsoortullu
tallimaallutik. Tassa taamaalilluni Johan Lund Olsen qinigaasutut maanngaanniit
nalunaarutigaara, pilluarit.
Oqaluuserisaq naammassivoq.