Oqaluuserisassani immikkoortoq 109 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 1. november
1999 nal. 15.40
Oqaluuserisassani
immikkoortoq 109.
Nunatsinni
ilinniagaqartut atugaannik misissuisitsinerup sumut killinnera aammalu
Naalakkersuisut taakku pillugit qanoq pilersaaruteqarnerat pillugu
pingasunngornikkut apeqquteqaat.
(Anthon Frederiksen)
Ataatsimiinnermik
aqutsisoq: Finn Karlsen, Siulittaasoqarfimmi ilaasortaq.
Anthon Frederiksen, Kattusseqatigiit:
Nunatsinni ilinniagaqartut
atugaasa pitsanngorsarneqarnissaat siusinnerusukkut Inatsisartunut
ataasiarnanga saqqummiuttarsimavara, kingullermillu apeqquteqaateqarninni
akineqarpunga ilinniagaqartut Kattuffiat suleqatigalugu ilinniartut atugaannik
misissuineq ingerlanneqartoq. Taamaattumik minnerunngitsumik aamma
ilinniagaqartut ilinniakkaminnik taamaatiinnartartorpassuit
isiginngitsuusaaginnarneqarsinnaannginnerat aammalu ilinniagaqartut
atukkamikkut pitsaanerusunik atugaqartinneqarnissaat anguniarlugu matumuuna
apeqqutiginiarpara, ilinniagaqartut atugaannik misissuisitsineq sumut
killissimanersoq aammalu ilinniagaqartut atugaat pillugit Naalakkersuisut qanoq
pilersaaruteqarnersut.
Lise Skifte
Lennert, Kultureqarnermut,
Ilinniartitaanermut Ilisimatusarnermullu Naalakkersuisoq:
Siullermik
apeqqutigilaassavara Naalakkersuisut akissuteqaataat apeqquteqaateqartup
tigoreermagu naalisalaarsinnaaneriga.
Inatsisartunut ilaasortap
Anthon Frederiksenip ilinniartut atugaasa misissuiffigineqarnerat pillugu
apeqquteqarneranut Naalakkersuisut makkuninnga ilisimatitsissapput:
1998-imi novemberimi
Naatsorsueqqissaartarfiup ilinniartut atugaannik misissuinini naammassisimavaa.
Misissuineq ilinniartut kattuffiisa KIK-ip aamma DKIK-ip suliniuteqarnerisigut
suleqatigineqarnerisigullu ingerlanneqarpoq. Misissuinerlu tassani
Ilinniartitaanermut Pisortaqarfik aningaasalersueqataavoq.
Ilinniartitaanermut taamani
Naalakkersuisuusoq KIK-mut isumaqatigiissuteqarsimavoq misissuinermit paasisat
pissarsiarineqartinnagit Naalakkersuisuniit qanoq iliuuseqartoqassanngitsoq.
Nalunaarusiaq tamanut
saqqummiunneqarmat nalunaarutigineqarpoq KIIP-ip KIK-mik DKIK-millu
suleqateqarluni nalunaarusiaq ilinniartut atugaannik misissueqqissaarnermut
atugassaa, ilanngunneqassallutillu ilinniagaqarnersiutisiaqarnermut
piumasaqaatit atuuttup iluarsaaqqiinissaat.
Naalakkersuisunngornerma
kinguninngua KIK-ip DKIK-illu sinniisai ataatsimeeqatigaakka uppernarsarlugulu
sulineq aallartinneqassasoq. Tamatumalu kingorna ilinniagaqarnersiutit
allanngortiternerannik suliaqartussanut suliassarititat suliaraakka.
Iluarsaasseqqinnermi
tassani ilinniartut ilinniakkaminnik aallartitsisarnerannut
naammassinnittarnerannullu sunniuteqartartut misissuiffigineqarnissaat
siunertarineqarpoq.
Siunnersuusiortoqassaarlu
qanoq ilinniagaqarnersiutit pillugit malittarisassat qanoq
pisariillisarneqarsinnaanersut - atuisunut piuminarnerulersillugit.
Aamma
siunnersuusiortoqassaaq ilinniagaqarnersiutit pillugit malittarisassat qanoq
ajornannginnerusumik atortinneqalersinnaanersut.
Iluarsaaqqinneq
Ilinniagaqarnersiuteqartitsivimmiit aqunneqassaaq taannalu aamma
allattoqarfiussalluni.
Nassuerutigineqartariaqarporli
sulineq kigaaqisumik ingerlanneqarmat. Qarasaasiani programmit ima
ajoquteqartigalutillu kukkuneqartigipput aqutsisut sulisullumi ilinniagaqarnersiutit
tunniuttakkallu allat piffissaq eqqorlugu nalunaarsorneqarnissaat
tunniunneqarnissaallu qularnaarniarlugu piffissartik tamaat
atortariaqartarsimallugu. Tassa suliassanut allanut
piffissaqartoqarsimanngilaq.
Taamaammat
allanngortiterinerit kinguaattoorput, ajornartorsiutilli aaqqinneqarniariarpata
sulineq nanginneqassaaq pimoorunneqarnerulissallunilu.
Anthon Frederiksen,
Kattusseqatigiit:
Akissuteqaammut qujanaq.
Tassa Naalakkersuisup akissuteqarnermini nassuerutigivaa ilumut suliaq taanna
kingaalavallaartumik ingerlanneqarsimasoq, tassalu neriussaagut maannakkut
piaarnerusumik taassuma tungaa aaqqinneqarsinnaajumaartoq.
Oqaluuserisaq naammassivoq.