Oqaluuserisassani immikkoortoq 110 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 1. november
1999 nal. 15.46
Ataatsimiinnermik
aqutsisoq: Finn Karlsen, Siulittaasoqarfimmi ilaasortaq.
Anthon Frederiksen, Kattusseqatigiit:
Aamma nunatsinni
ajoraluartumik inoqarpoq ilaatigut allaat sumi unnuap tulliani sinissallutik
nalusaraat. Aammalu allaat kommunimi sorlermiittuullutilluunniit
nalunaarsorneqarsinnaanngitsunik, tassa ilaatigut inissaaleqineq pissutigalugu
sumiiffeerulluinnarsimasutut oqaatigineqarsinnaasunik.
Inuit taamatut
inissisimasut amerlanertigut unittoorluinnarsimasutut oqaatigineqarsinnaapput,
tassami angerlarsimaffik pigitinnagu suliffimmik aamma parsiniarneq
ajornartorsiutaalluartarmat, aappaatigullu aamma inuit taakkua kommunimi
najugaqartutut nalunaarsorneqarsimanngitsutut inissisimaneq pissutigalugu
ikiorneqarsinnaanermut periarfissaminnik annikilliliivigineqartarsimallutik.
Taamaattumik
apeqqutiginiarpara inuit qulaani pineqartut inuiaqatigiinni unittoorsimasutut oqaatigineqarsinnaasut
ikiorniarlugit, inuiaqatigiinnilu tamanut iluaqutaasumik
sunniuteqaqqilersinnaanerat anguniarlugu qanoq periarfissaqartinneqarnersut?
Josef Motzfeldt, Aningaasaqarnermut Niuernermullu
Naalakkersuisoq:
Anthon Frederiksen
apeqquteqaatit soqutigalugu atuarpara, oqaatigisinnaallugulu inuit kommunini
najugaqartutut nalunaarsorneqarsimanngitsut qanoq amerlatiginerat
Isumaginninnermi Pisortaqarfimmi ilisimaneqanngimmat. Inuit inissaqarnissartik
suliffissaqarnissartilluunniit qulakkeeqqaarnagu namminneq akilerlugu
kommunimut allamut nuussimasut kommunit sorlermit akiliunneqartarnissaat
pillugu Pisortaqarfik Isumaginninnermut Naalakkersuisoqarfik
saaffigineqartartoq oqaatigisinnaavara.
Isumaginninnermi
inatsisitigut malittarisassat malillugit kinaluunniit nunatsinniittoq
pisortanit ikiorserneqarsinnaavoq, imminut ilaquttaminillu inuuniarnermi
imaluunniit napparsimanermi nalaani pisariaqarnerpaanik
pilersuisinnaanngikkuni. Tassa imaappoq kommunit kommunimut
aaqqissuussaanngitsumik nuuttoqarsimagaluarpalluunniit inuit pineqartut
pisortanit ikiorsiissutinik ikiorserneqartussaasut, tamannalu inuit
ataasiakkaat pisariaqartitaannik nalileereernikkut pisarpoq.
Nunatsinni innuttaasut
tamarmik inuuniarnerminni pitsaasunik atugaqarnissaat Naalakkersuisut
anguniagaraat. Kisianni innuttaasut ilaat kommunimit kommunimut allamut
nuuttarput inissaqarnertik suliffissaqarnertilluunniit qulakkeeqqaarnagu.
Ilaatigummi allaat aalajangersimasumik suliffiit qimaannarneqartarput,
inigisamillu attartorneq unitsinneqartarluni.
Anthon Frederiksen, Kattusseqatigiit:
Aap, naatsunnguamik. Tassa
soorunami taamatut apeqquteqarninni annerusumik siunertarisimagaluarpara
ersarinnerusumik periarfissat inatsisitigut taakkartorneqarnissaat, kisiannili
aamma taanna allaffikkoorlugu pissarsiarineqarsinnaavoq. Qujanaq.
Oqaluuserisaq naammassivoq.