Oqaluuserisassani immikkoortoq 25-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 29.september 1999 nal. 14.25
Ataatsimiinnermi
aqutsisoq,
Inatsisartut Siulittaasuat Johan Lund Olsen:
Tassanilu aamma
Ineqarnermut, Attaveqarnermut Pilersuinermullu Naalakkersuisoq
saqqummiussissaaq.
Steffen Ulrich
Lynge, Ineqarnermut,
Pilersuinermut Attaveqarnermullu Naalakkersuisoq:
Grønlands Tekniske
Organisationi pillugu Inatsisartut peqqussutaani allassimavoq
nalunaarasuarnermut akit atuutilersinneqannginneranni Inatsisartut
Aningaasaqarnermut Ataatsimiititaliaannut saqqummiunneqartassasut.
Naalakkersuisut
Inatsisartut Aningaasaarnermut Ataatsimiititaliaannit qinnuigineqarnertik
tunngavigalugu aalajangerput nalunaarasuarnikkut akit allannguutaat
Aningaasaqarnermut Ataatsimiititaliamut akuerisassanngorlugit
saqqummiunneqartarunnaassasut.
Taamatulli
aalajangiisoqassappat Grønlands Tekniske Organisationi pillugu Inatsisartut
peqqussutaat kiisalu TELE Greenland A/S pillugu Namminersornerullutik
Oqartussat nalunaarutaat iluarsineqartariaqarput.
Akit allannguutaat
landskarsimut toqqaannartumik sunniuteqarneq ajorput TELE Greenland A/S
aktiaateqarluni ingerlatseqatigiiffiummat imminut aningaasalersortoq. TELE Greenland
A/S-ip landskarsimut akiliutigisartagai pissarsianit akiliutissat aqqutigalugit
akilerneqartarput.
Akit allanngornerinik
Naalakkersuisut suli akuersissuteqartassapput, tamatumuunakkullu akit
appariartortuarnissaat qularnaassallugu. Taamaaliornikkut innuttaasut
attaveqarnikkut periarfissaat pitsanngorsarneqassapput. Aammattaaq Kalaallit
Nunaanni, aamma avataaniit nunamiillu namminermit akit nunarsuarmi akinut
nallersuunnissaannik anguniakkamut Naalakkersuisut taamaalillutik
peqataasinnassapput.
Allannguinikkuttaaq
akuersisarneq pilertornerusoq pisalissaaq akit allanngutaat kiisalu akit nutaat
pilertornerusumik akuerineqarsinnaanngorlugit.
Taamaalillunga
oqaluuserisassaq Inatsisartunut oqaluuserisassanngortippara. Qujanaq.
Tommy Marø, Siumup oqaaseqartua:
Qujanaq. Grønland Teknisk
Organisationi kalaallisuut paasinarnerusunngorlugu G.T.O - pillugu Inatsisartut
peqqussutaata allanngortinneqarneranik Inatsisartut peqqusstissaattut
Naalakkersuisut siunnersuutaat Ineqarnermut, Pilersuinermut Attaveqarnermullu
Naalakkersuisup Steffen Ulrich Lynge-p saqqummiussaa, Grønland Teknisk
Organisationi pillugu Inatsisartut peqqussutaata nr.8, 19 december
1986-imeersuup § 3, imm. 4-p imarisaata allanngortinnissaanik imaqartoq
siunnersuut Siumumiit taama isikkoqartillugu aappassaaneerneqarnissaanut
ingerlateqqinneqarnissaa innersuusutigerusupparput.
Peqqussutip
allanngortinniarneqarneranut tunngaviuvoq siornatigut Aningaasaqarnermut
Ataatsimiititaliaq erngup nalunaarasuarnerullu akiinik allannguisoqassatillugu
aperineqaqqaartarmat.
Grønlands Tekniske
Organisationi pillugu peqqussut naapertorlugu Inatsisartut Aningaasaqarnermut
Ataatsimiititaliaanut telemi kiffartuussissutit saqqummiunneqaqqaartarnerat
unitsinneqarpoq TELE Greenland aktieselskabitut pilersinneqarmat.
Godmand Rasmussen, Atassutip oqaaseqartua:
Ineqarnermut, Pilersuinemut
attaveqarnermullu Naalakkersuisup oqaluuserisassanngorlugu Inatsisartunut
saqqummiussaa, qulaani pineqartoq Atassummit qimerlooratsigu annerusumik
oqaaseqarfiginagu akuersaagassatut nalilerparput.
Isumaqarpugut
saqqummiussami oqaatigineqartut ersersikkaat siunnersuutigineqartutut
saqqummiussap, tassa innuttaasut attaveqarnikkut periarfissaat
pitsanngorsarneqassasut aammalu Naalakkersuisut akuersissuteqartassasut, akit
appariartornissaat qularnaassallugu. Taama pissusississaatut aallaavissaatullu
oqaatigineqartut isumaqatigaagut, taakkununngalu ilanngussaq Kalaallit Nunarput
akinut avatitsinniittunut malinnaatinneqassasoq.
Taama naatsumik
oqaaseqarluta peqqussutip allanngortinneqarnissaanut Naalakkersuisup
siunnersuutaa Atassummiit akuersaarparput.
Ole Lynge,Inuit Ataqatigiit oqaaseqartuat:
GTO pillugu Inatsisartut
peqqussutaata allanngortinneqarneranik Inatsisartut peqqussutissaattut
siunnersuummut atatillugu Inuit Ataqatigiit aamma akuersaarmata
nuannaarutigissuara. Tassa tassani Inatsisartut oqaatigineqareersutut
Inatsisartut Aningaasaqarnermut Aaatsimiititaliaata kissaateqarnera
tunngavigalugu allannguutissatut siunnersuut saqqummiunneqarpoq. Taamatullu
allannguallatitsineq, toqqaannartumik kinguuneqassanngilaq
Namminersornerullutik Oqartussat, Tele Greenland A/S-ip akigititaanik
allannguisoqassatillugu sunniutaarunnerannik.
Tassa taamatut naatsumik
oqaaseqarluta allannguutissatut siunnersuutip aappassaaneerneqarnissaanut
ingerlaqqinnissaa akuersaarparput.
Mogens Kleist,Kattusseqatigiit oqaaseqartuat:
Grønlands Teknisk Organisationi
pillugu, tassa GTO pillugu Inatsisartut peqqussutaata allan-ngortinneqarneranik
Inatsisartut peqqussutissatut siunnersuut Kattusseqatigiinnit imatut oqaaseqaatigerusupparput.
Naalakkersuisut saqqummiussaannut
tunngatillugu Kattusseqatigiinniit allannguinissaq ajoqutissaqartinngilarput,
tassami suliap ingerlannerani akitigut allannguisoqartussaatillugu
Aningaasaqarnermut Ataatsimiititaliaq akuersaartuussapput Naalakkersuisut
sinnerlugit.
Tassami
maluginiaqquneqarnerulissapput Naalakkersuisunut illuatungiliuttut
Aningaasaqarnermut Ataatsimiititaliami oqaaseqaateqarsinnaammata. Taava
ilanngussigilaarnikuuara naluara qanoq issanersoq. Ilanngullugu taakkartorusupparput
qulaani taaneqareersup atia tassalu GTO sooq suli atortinneqarnersoq.
Kattusseqatigiinniit
innersuutigerusupparput GTO-p taagutaa allanngortinneqarnissaa, tassami
peqqussut tigulaariffigineqartoq 1986-iminngaanneersuummat. GTO atorunnaarlugu kalaallilli
oqaasiinut naleqqussarnissaa taakkartorusupparput. Nalunngilarpummi GTO
assigiinngitsunut aggulunneqarnikuusoq. Taasinnaasatta ilagivaat Nukissiorfiit,
Amutsiviit, Tele Greenlandilu.
Taamatut oqaaseqarluta suliap
aappassaaneerneqannginnerani ataatsimiititaliamut attuumassutilimmut tassalu
Nukissiuuteqarnermut nalunaarasuartaatitigullu attaveqaammut
ataatsimiititaliamut innersuutigerusupparput suliassanngortillugu.
Steffen Ulrich Lynge, Ineqarnermut, Attaveqarnermut
Pilersuinermullu Naalakkersuisoq, akissuteqartoq:
Tassa maluginiarpara partiit
tamarmik aappassaaneernissaanut innersuukkaat, kisialli Kattusseqatigiit
Inatsisartut Ataatsimiititaliaannut arlalinnut ingerlateqqinnissaa taanna
innersuutigaat.
Isumaqarpunga taannartaa
aallaaveqartoq immaqa paatsuuinermik, tassami aallaaveqarpunga uunga GTO-p sooq
taanna atuinnarnissaanik aallaaveqartutut isigigakku.
Oqaatigilaassavara tassa
1986-iminngaanneersup peqqussutip taassumap, suli taanna ingerlavoq,
taamaallaat annikitsunnguit tassaniipput nammineq uagut allannguinerit
malillugit peeriartortartut. Soorlu aamma tassaniinnikuugaluarput soorlu erngup
akianik aalajangersaatit. Taakku peernikuuagut assigisaanik soorlu
kiassarnermut tunngasut il.il.
Taakku assigiinngitsutigut
peeriartorput, tassa taamaalilluni GTO-p atia taamaalilluni nammineq
peeriartortutut imaluunniit tammariartortutut ippoq, kisialli innersuunneqartoq
taanna isumaqarpunga innersuussutinut taanna Inatsisartut præsidiaanut tassunga
aalajangiissuteqarfigeqqussallugu.
Johan Lund Olsenn, ataatsimiinnermik aqutsisoq:
Naalakkersuisup, tassa
Ineqarnermut, Attaveqarnermuut Pilersuinermullu Naalakkersuisup aatsaaginnaq
oqaatigisaatuut immaqa una GTO-p taaguutaa, tassa eqqortuumik
oqaatigineqartutuut ulluinnarni atorneerutereersoq suli ingerlaannarmat
peqqussummi immaqa taaguutaa taanna aaqqinneqartariaqassaaq.
Taamaammat
siunnersuutigerusunnarpoq maanngaanniit aqutsisutuut taanna, tassa GTO-toq- qap
taaguutaa, ila alianaassusia, taanna taaguutaa immaqa
allanngortinneqarsinnaanissaa eqqarsaatigalugu inatsiseqarnermut
ataatsimiititaliarput tassani immaqa nalilersuisikkutsigu
pitsaanerussagaluarpoq.
Taavalu aamma maannakkut
oqaaseqarumalluni nalunaaruteqarpoq, tassalu Aningaasaqarnermut Niuernermullu
Naalakkersuisoq.
Josef Tuusi Motzfeldt, Aningaasaqarnermut Niuernermullu
Naalakkersuisoq:
Oqaluuserisaq
naammassivitsinnaguuna Kattusseqatigiinninngaaanniit paatsuuisoqarsimagunarnera
isumaqarpunga Inatsisartuni pissusissamisoortoq naqqiissuteqarfigissallugu.
Naalakkersuisuni ilaasortap saqqummiinermini
oqaatigaa, issuarpara imannak:"Naalakkersuisut Inatsisartut
Aningaasaqarnermut Ataatsimiititaliaannit qinnuigineqarnertik tunngavigalugu
aalajangerput, nalunaarasuarnikkut akit allannguutaat aningaasaqarnermut
ataatsimiititaliamut akuerisassanngorlugit
saqqummiunneqaqqaartarunnaassasut".
Kattusseqatigiinniilli
oqaatigineqarpoq paatsuuinikkut ajuusaarnartumik, "Naalakkersuisut
saqqummiussaannut tunngatillugu Kattusseqatigiinnit allannguinissaq
ajoqutissaqartinngilarput, tassami suliap ingerlanneqarnerani akitigut
allannguiffeqartussaatillugu aningaasaqarnermut ataatsimiititaliaq
akuersisartuussappat, Naalakkersuisut sinnerlugit".
Mumillugu paatsoorsimagassiuk
maluginiaqqussavara ingerlaqqinnermi.
Johan Lund Olsen, ataatsimiinnermik aqutsisoq:
Maannakkut allanik
oqaaseqartussaarummat, tassa siunnersuutigissavara GTO-toqqap taanna
taaguutitoqaa eqqarsaatigalugu inatsiseqarnermut ataatsimiititaliap taanna
nalilersulaarumaaraa.
Tassalu taamatut oqaaseqarluta
ullumikkut oqaluuserisassatsinni, tassa immikkoortoq 25 naammassivarput,
tassalu ullumikkut sammisassagut taamaalilluta naammassivagut.
Tullianik Inatsisartut
ataatsimiissapput ataasinngorneq oktoberip 4-aanni, tassani
oqaluuserineqassallutik immikkoortut marluk, tassalu immikkoortoq 27, Kalaallit
Nunaanni aalisakkanik misissuinerit aaqqissuussaanerat sulinerallu pillugit
Inatsisartut peqqussutissaattut siunnersuut, siullermiigassaq, taavalu aamma
immikkoortoq 28, Pinngortitaleriffik pillugu Inatsisartut inatsisaata
allannguutissaatut siunnersuut, tassa aamma siullermiigassaq.
Tassalu taamaalilluta ullumikkut
ataatsimiinnerput tamaanga killeqarpoq.
Oqaluuserisaq
naammassivoq.