Oqaluuserisassani immikkoortoq 34-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 5. oktober
1999 nal. 14.10
Anders Andreassen, ataatsimiinnermik aqutsisoq,
Siulittaasoqarfimmi ilaasortaq, Siumut:
Taava immikkoortoq tulleq tikissinnaangorparput,
tassalu immikkoortoq-34, Peqqissaasutut ilinniartitaaneq pillugu Inatsisartut
Peqqussutissaattut Siunnersuut, tassanilu saqqummiussissaaq - Kultureqarnermut
Ilinniartitaanermut Ilisimatusarnermullu Naalakkersuisoq; Lise Lennert - Siumut.
Lise Lennert, Kultureqarnermut
Ilinniartitaanermut Ilisimatusarnermullu Naalakkersuisoq:. Siullermik
siulittaasup tullia qinnuigerusuppara, una agguaanneqareersoq, peqqissaasutut
ilinniartitaaneq pillugu inatsisartut peqqusutissaattut siunersuut.
Taanna saqqummiussinermut
agguaanneqareersup quppernerup aappaani imaqarnermigut allannguutaanngitsumik
erseqqissaateqalaarsimagama allaalaartumik quppernerup aappaa
saqqummiutissavara.
Matumuuna Naalakkersuisut
sinnerlugit Peqqissaasutut iliniartitaaneq pillugu Inatsisartut
peqqussutissaattut siunnersuut saqqummiutissavara. Siunnersuutip
Napparsimasunik Paarsisutut Peqqinnissamullu Ikiortitut ilinniartitaanerit
pillugit Inatsisartut peqqussutaat nr. 9, 13.maj 1993-imeersoq taarsissavaa.
Peqqinnissamut tunngasuni
ilinniartitaanissanut pisariaqartitsineq pillugu misissuinerit tunngavigalugit
siornatigut Naalakkersuisuusut aggustimi 1997-imi aalajangiipput
Isumaginninermi Peqqissaanermilu Ikiortitut, tassa - Social og
Sunhedshjælperitut ilinniartitaanerup ukiunik marlunnik sivisussusillip
nanginneqarfigisinnaasaanik ukiup aappaa qeqqa sivisussuseqartussamik
ilinniartitaanermik nutaamik pilersitsisoqassasoq. Taamanikkulli taassuma
piviusunngortinneqarnissaa sulissutigineqalerpoq, maannalu suliaq ima
siuartigilersimavoq, ilinnialersussat siulliit ukioq 2000 januaarimi
ilinniarlutik aallartinnissaat naatsorsuutigineqarluni.
Tamatuma saniatigut ukiuni
tulliuttuni Isumaginninnermi Peqqissaanermilu Ikiortitut ilinniartitaanerup
tamarmiusup pitsaanerulersinneqarnissaa siunertaralugu
iluarsartuunniarneqassaaq.
Ilinniartitaanermut
nangitsiviusumut nutaamut ilinniartitaanerup aaqqissuunneqarneranut missingiut
ilaatigut najukkani peqqinnissaqarfinnut kommunenullu
tusarniaatigineqarsimavoq, Peqqissaanermullu Ilinniarfimmi sukumiinerusumik
pilersaarusiorneqarnissaminut piareerluni.
Peqqinnissamut ikiortitut,
tassa - Sundhedsassistent-itut ilinniartitaaneq nutaaq taanna Isumaginninnermi
Peqqissaanermillu ikiortit, tassa - Social og Sundhedshjælperit
ilinniaqqiffissatut periarfissiinerup saniatigut, Napparsimasunik Paarsisutut
Peqqinnissamullu Ikiortitut ilinniartitaanerit pillugit, Inatsisartut
peqqussutaat malillugu ilinniarnerup immikkoortuata siulliip naammassinerani
ilinniarnermik unitsitsisinnaanermik periarfissiinermut taartaassaaq.
Peqqinnissamut Ikiortitut,
tassa - Sundhedsassistentitut ilinniagaqassagaanni piumasaqaataapput
Isumaginninnermi Peqqissaanermilu Ikiortitut - Social Sundhedsmedhjælperitut
ilinniagaqarsimanissaq, kiisalu Meeqqat Atuarfianni naliginnaasumik soraarummeersimanissaq
fageni aalajangersimasuni minnerpaamik 7-mik karaktereqarluni, Peqqissaasumut
ilinniarnermut piumasaqaataasut Peqqinnissamut Ikiortimut ilinniarnissamut,
Inatsisartut Peqqussutaanni nr 9, 13 maj, 1993-imeersumi aalajangersakkat tunngaviussappata,
Peqqinnissamut Ikiortit atorfissaqartinneqartut naammattut ilinniarnerminnik
aallartissinnaanngillat, misilittakkami tamanna erseqqissumik
pasinarsisereerpaat.
Ilinniartut marluinnaat
peqqussut 1993-imeersoq malillugu, Peqqinnissamut Ikiortitut naammassisimapput,
peqqussut 1993-imeersoq malillugu peqqissaasunngorniartut ilinniarnerminnik
unitsiteriarlutik, Peqqinnissamut Ikiortitut allagartartaartut,
Peqqinnissaqarfiup iluani suliassanut ilinniarnerisas tulluussarnerunissaat
pisariaqarpoq.
Peqqissaasutut ilinniarneq
ilinniartitaanerit ingerlaqqiffiusut ilagaat, tassanilu piumasaqaataalluni
ilinniarnertuunngorniarfimmit soraarummeersimanissaq, ilinniakkani
aalajangersimasuni minnerpaamik 7-imik karaktereqarluni.
Ilisimatitsissutigineqarsinnaavoq
ukioq manna Peqqissaasutut ilinniarsimasut aqqaneq marluk qinnuteqarmata,
taakkunanngalu arfineqpingasut ilinnialerlutik.
Siunnersuut taakkununngalu
nassuiaatit innersuussutigalugit, matumuuna Inatsisartunut akuersaartumik
oqaluuserisassanngortippara, Qujanaq!.
Per Berthelsen. Siumup oqaaseqartua:
Peqqissaasutut
ilinniartitaaneq pillugu Inatsisartut peqqussutissaattut siunnersuummut
atasumik saqqummiunneqartunut qujalluta Siumumit makku taajumavagut.
Siullermik Siumumit
nuannaarutigaarput maanna suliaasut ima inerisimatigilersimammata, ilinniartut
siulliit ukiup nutaap aallartinnerani aallartissinnaasutut nalilerneqarluni.
Peqqinnissamummi ikiortitut
ilinniartitaanerup nutaap inuiaqatigiinni assut pisariaqartinneqarlunilu
pingaaruteqarluinnartuunera Siumumit nalilerparput, nuannaarutigaarpullu
periarfissaq tamanna aqqutigalugu Peqqissaasutut ilinniarnissamut aqqutissat
annertusisussaassammata.
Siumumiimmi
pingaartilluinnarparput ilinniarfissaasut assigiinngitsut suli
qaffasinnerusumik ingerlaqqinnissamut sapinngisamik
ammaassisinnaassuseqarnissaat, qularinnginnatsigu tamanna kajumissutsimut
malunnaatilimmik annertusaasinnaassasoq.
Siunissaq eqqarsaatigalugu
Siumumiit neriuutigaarput; Peqqinnissamut ikiortitut ilinniarsinnaanerup
sumiiffik qimannagu ingelanneqarsinnaasutut
ilusileriartuaartinneqarsinnaanissaa eqqumaffigineqarlunilu
ammatinneqarsinnaassasoq. Taamak iliornikkut ilinniagaqartuusut sumiiffimminni
pisariaqartinneqarnerat sanngiillisarnagu - aammalu tamatuma minnerunngitsumik
ilaatigut ilaquteqalereersimasut akornanni ilinniarnissamut kajumissutsimik
atitunerusumik tunngavissiuussisinnaanera iluatigalugu -
ingerlanneqarsinnaanissaa ineriartortinneqarsinnaaqqullugu.
Matumani iluatsillugu
Siumumit taajumavarput isumaqaratta ilinniakkanut taaguutit, taggisit
assigiinngitsut, oqaasilerisut aqqutigalugit nalilersortinneqartariaqartut,
ilaatigummi ullumikkut taaguutigitinneqartut imminnut ima qanitsigimmata,
allaat ilaatigut immikkoortinneqarsinnaanerat ajornakusoorsinnaasarluni,
taamallu paatsuuisinnaanerit qanippallaarsinnaasarlutik.
Siumumit neriuutigalugu
periarfissaq pineqartoq soqutigineqarluarluni aqqutissatut
iluatigineqarluarumaartoq appassaaneerinninnissaq pitinnagu Ilinniartitaanermut
Ataatsimiititaliamut suliassanngortinneqassasoq inassutigiumavarput.
.
Augusta Salling. Atassutip oqaaseqartua:
ATASSUTIP-ip paasivaa
peqqinnissamut tunngasuni, ilinniartitaanissanut pisariaqartitsineq pillugu
misissuinerit tunngavigalugit Naalakkersuisut 1997-imi aalajangiisimasut
ilinniartitaanerit iluarsartuunniarneqassasut, suliassarlu tamanna
piviusunngortinniarlugu taamanili suliaq ingerlanneqarsimasoq.
Peqqinnissaqarfimmi
sulisussaaleqinerujussuaq qaangerniarlugu, ilinniartitaanerit pillugit
peqqussutinik allanngortiterisoqarniarnerani, ATASSUT suleqataajumavoq.
ATASSUT isumaqarpoq, 1993
sioqqullugu Peqqinnissamut Ikiortitut ilinniartitaaneq pitsaasoq
qaqeqqinneqartariaqannginnersoq nalilersortariaqartoq. Ilinniartitaaneq taanna
taamanikkut atuukkallarmat napparsimaveqarfimmi sulisussat pikkorilluinnartut
naammassiortortarsimapput, ilinniariaatsillu taassuma taamaatinneqarneratigut
illoqarfinni nunaqarfinnilu amigaateqaleriartornerat
malunniukkaluttuinnarsimalluni. Matumuunalu siunnersuutigissavarput,
peqqussutissatut siunnersuutip aappassaaneerneqannginnerani, peqqinnissamut
ataatsimiititaliamut ingerlatinneqassasoq. Ilaatigut nalilersoqullugu,
napparsimaveqarfimmi sulisussat pisariaqartinneqartut, ilumut - matumani
aaqqissuusseqqinnermi angorusutagut anguneqassanersut.
ATASSUTIP-ip Peqqinnissamut
ilinniartitaaneq pillugu, Inatsisartut peqqussutissaatut siunnersuut
naggataagut ima oqaaseqarfigiumavaa: Tunngaviatigut ATASSUT-ip
akerleriffissaqartinngila ilinniartitaanerup pineqartup,
ilinniartunngorsinnaanermut piumasaqaatitai qaffaaffigineqarniarmata
tulluartutullu isigalugu ilinniartitaanerup ilusilersugaanerata
ilinniartitaanernut ingerlaqqiffiusunut allanut naleqqussarniarneqarnera,
peqqussutissamilu allannguutit allat naleqqussaanerusut
pissusissamisoortuummata immikkut oqaaseqarfigissanngilagut.
Taamaakkaluartoq ATASSUT,
peqqussutissap aappassaaneerneqarnissaanut paasissutissanik makkuninnga
paasitinneqarumavoq: Peqqissaasutut ilinniartitaanerup 1993-imi
aallartinneraniit, napparsimaveqarfimmi sulisooreersut Peqqissaasutut
Ikiortitut ilinniagaqarsimasut Peqqissaasutut qassit ilinnialersimappat?,
Peqqissaasut qassit naammassisimappat? taakkunanngalu qassit ullumikkut
napparsimaveqarfimmi sulippat?. Taamatuttaaq paaserusupparput qassit
ilinniakkaminnik angusinngitsoorsimanersut.
Taamatut oqaaseqarluta
siunnersuutigissavarput peqqussutissap aappassaaneerneqannginnermini
Peqqinnissamut Ataatsimiititaliamut ingerlatinneqaqqaarnissaa.
Olga Poulsen. Inuit Ataqatigiit oqaaseqartuat:
Peqqissaasutut
ilinniartitaaneq pillugu Inatsisartut peqqussutissaatut siunnersuut, Inuit
Ataqatigiit imannak oqaaseqarfigissavarput. Inuit Ataqatigiinniit
nuannaarutigalugu oqaatigissavarput Peqqissaasutut ilinniartitaaneq pillugu
Inatsisartut peqqussutissaattut siunnersuutip saqqummiunneqarnera, tassami taassumap
ersarissisissammagu napparsimaveqarfimmi sulisut kikkorpiaat pineqarnersut.
Naluneqanngilarmi napparsimaveqarfiup iluani naapparsimasunik
paaqqutarinninermik suliaqartut arlaqartut. Assersuutigalugit - peqqissaasut,
peqqinnissamik siammarsaasut, Inunnik isumaginninnermik Peqqinnissamullu
Ikiortit, naliginnaasumillu ikiortit ilinniarsimanngitsut.
1997-imi
napparsimaveqarfiup iluani napparsimasunik paaqqutarinninermut tunngatillugu
sulisunik ilinniarsimasunik pisariaqartitsinerup misissuiffigineqarnerata
takutippaa annertoorujussuarmik naapparsimasut tikillugit paaqqutarinninneq
amigarluinnartoq. Paaqqutarinninerup amigarluinnarnerata kingunerisarpaa
napparsimavinni inuit nappaateqarlutik uninngasut toqqissisimasannginnerat
aammalu napparsimasunut ilaqutaasut toqqissisimasannginnerat
napparsimasortamillu qanoq inneranik malinnaatinneqannginnermik
misigisimatinneqalersarneq.
Tassunga peqqutaanerpaavoq
sulisussanik, napparsimasunik aamalu ilaqutaasunik oqaloqatiginnissinnaasunik
amigaateqarnerujussuaq. Peqqissaasut eqqarsaatigalugit nalunngilarput
taartaagallartartut kalaallisut oqaaseqanngitsut amerlasoorpassuusut tamakkulu
peqqissaasut nunaqavissut peqatigalugit sapinngisartik tamaat atorlugu
napparsimasunik ikiuerusuttartut ajoraluartumillu
naammattumik napparsimasoq
ilaqutaasullu oqaloqatigineqarsinnaanngikkaangata paaqqutarinninneq naammattoq
tunniunneqarsinnaaneq ajorpoq. Taassumap saniatigut napparsimasut
pisariaqartitaat tassaavoq piffissaqarfigineqarneq.
Peqqissaasut suliassamik
saniatigut annertoorujussuarmik allaffissornerit, pilersaarusiornerit,
peruluttunik paaqqutarinninnerit, ilinniartitsinerit, nakorsaatilerinerit
peqqinnissamut siammarsaasut peqatigalugit suliassarisarpaat taamaalillutillu
napparsimasunik pitsaanerpaanik sullissiniarnerat ajornakusoortarluni.
Peqqinnisamut siammarsaasut taaneqartut saniatigut annertuumik
suliassarisarpaat tikisitanik suliffiup iluani pissutsinik
ilinniartitsisarnerit.
Peqqinnissamut ikiortip,
taamatummi taaguuteqarnissaa tulluarsorinarnerummat, amerlanerusut
pigilernerisigut peqqissaasut peqqinnissamillu siammarsaasut suliassaat
naammaginarnerusumik naammassineqarsinnaalissapput, tassami; suliassat allat
soorlu - napparsimasunik asattuinerit nerisitsinerit, pisuttuartitsinerit,
kiserliortitsinaveersaarnerit, sammisassaqartitsinerit ilaqutaasunillu
oqaloqatiginninnerit peqqissaasumut ikiortip ilinniartilluarneqarnermigut
pitsaasumik naammassisinnaammagit. Taamaattumik Inuit Ataqatigiinniit
sakkortuumik kaammattuutigissavarput ilinniartitsinerit pilersaarutaareersut
eqqorlugu aallartinneqarumaartut.
Isumaginninnermi
Peqqissaanermilu Ikiortit STI-ip iluani ingerlanneqartut
pitsaanerulersinneqarnissaanut suliniuteqalersaarneq; Inuit Ataqatigiinniit
nuannaarutigivarput tapersersorlugulu. Isumaqarpugut taanna ilinniagaq
pitsanngorsaavigineqarnermigut annertuumik Inuiaqatigiinnut
iluaqutaalerumaartoq, puigussanngilarpummi napparsimaveqarfiinnaanngitsuni
napparsimasuuteqartaratta, napparsimasuuteqarpugut aamma
piginnaanikittuuteqarpugut angerlarsimaannartunik , tamakkua pitsaasumik
ilinniarsimasunillu sullinneqarsinaanissaat aamma ineriartortittariaqarparput,
suliniutigineqartariaqarpoq peqqinnissakkut isumaginninnikkullu
sullinneqartarialinnut ilinniartitsisarnerit pisortaqarfiit taakkua marluk
suleqatigiillutik immersugaannik pilersaarusiornissaq. Isumaginninermi
Peqqinnissamilu Ikiortit ilinniartitaanerat annertunerusumik innarluutilinnik
sullissinissamik periusaasartunik imaqartariaqarpoq, taamalilluni
angerlarsimaffinni innarluutilinnik aammalu piginnaanikittunik
sullissisinnaanissaat pitsanngorsarneqarsinnaassammat, taassumalu saniatigut
innarluutilinnik angerlakaatitsiniarnermut sulisussatigut piareersarnerit
aaqqissuussaasumik aallartinneqarsinnaassammata.
Ungasinngitsukkut
nunaqarfinni peqqinnissakkut sullissisut nunamik tamarmi aggersut peqqinnissami
ilinniarfimmi pikkorissartinneqarput. Nunaqarfinni peqqinnissakkut sullissisut
tassaapput peqqinnissaqarfiup iluani sulisuusut pingaaruteqarnerpaat ilaat.
Nunaqarfinnimi amerlasoorpassuartigut kisimiillutik peqqinnissamut
tunngasuteqartunik sulisuusut akisussaaffimmillu annertuumik tigummiartuusut.
Taakku nunaqqatitik
qanilluinnarlugit sullissisinnaapput annertuumillu pinaveersaartitsinermik
suliaqarnissamik
atorneqarsinnaallutik. Piffissaq ungasinnerusoq eqqarsaatigalugu innuttaasut
imminnut paarinerulernissaannik kinguneqarsinaasumik; taamaattoqassappalli
pisariaqarluinnarpoq katsorsaanermut tunngasunik pikkorissartinneqartarnermik
saniatigut aamma pinaveersaartitsinermut tunngassuteqartunik pikkorissartinneqartarnissaat.
Inuiaqatigiinni
paasisariaqarparput angerlarsimaffinnut ornigullutik ikiortaasartut
pisariaqartilluinnaratsigit aammalu iluaqutigigatsigit, taamaattumik kommunet
assut kajumissaarusunnarput angerlarsimaffinni ikiortinik pikkorissaasarnerit ataavartumik
ingerlanniartaqqullugit, taamatut kajumissaaruteqarnitsinnut ilaasussatut
pingaarluinnartutut isigisavut tassaapput - utoqqaat angerlarsimaffiini
sulisut. Tamakkunani pikkorissaasarnerit KANUKOKA kommunet isumaginninnermut
peqqinnissamullu ilinniarfiit suleqatigiinnerisigut ingerlanneqarsinnapput.
Inuit Ataqatigiinniit isumaqarpugut aaqqissuussinerit kommunenit
pissaqarnerusunut kisimik periarfissiinatik kommunenut pissakinnerusunut aamma
periarfissiisuusariaqartut.
Tassunga atatillugu
Peqqinnissamik Ilinniarfiup pikkorissaasarnernut neqeroorutigisartagai
annertunerusumik aamma angerlarsimaffinni ikiortaasartunut utoqqaallu
angerlarsimaffiini sulisunik pikkorissartitsisarnernik
ilaqarnerusariaqarsinnaaneri kissaatigissavarput. Inatsisissatut siunnersuutip
kingunerisussaavaa Napparsimasunik Paarsisutut Peqqinnissamullu Ikiortitut
ilinniartitaanerit pillugit Inatsisartut Peqqussutaat nr 9. 13 maj
1993-imeersup atorunnaarsinneqarnera. Atorunnaarsitsinerup peqqutigaa
Peqqinnissamut Ikiortit immikkut ilinniartitaasalissammata STI-ip ataani
ilinniagaareersimasup, tassalu - Inunnut Isumaginninnermik Peqqinnissamullu
Ikiortitut ilinniagaareersimasup ingerlaqqeriarfissaatut.
Tamanna Inatsisartut
inatsisaanni siunnersuummi naliginnaasumik nassuiaataanni ersersinneqarpoq;
taamaattumik pissusissamisoorpoq Kultureqarnermut Ilinniartitaanermut
Ilisimatusarnermullu Naalakkersuisoq aperissallugu Peqqinnissamut Ikiortit
ilinniartinneqartarnerat immikkut peqqussusiortariaqannginnersoq imaluunniit
Inatsisartut peqqussutaat nr 2. 31 maj 1993-imeersoq
allannguteqartinneqarnissaanik siunnersuusiortariaqannginnersoq. Inatsisissamut
siunnersuummi Naalakkersuisut annertuumik piginnaatitaaffilerniarneqarput,
taamaatumik Inuit Ataqatigiinniit kissaatigissavarput Kultureqarnermu
Ilinniartitaanermut Ilisimatusarnermullu Ataatsimiititaliap inatsisissatut
siunersuutip aappassaaneerneqannginneranik Naalakkersuisumut tusarniaassasoq;
piginnaatitsinerit qanoq ilusilersorniarneqarnersut paasiniarlugu.
Peqqussutissatut
siunnersuummi § 6-i, naapertorlugu - Ilinniartitaanermut pisortaqarfik
pisinnaatinneqassaaq ilinniartitaanermut siunnersuisoqatigiinnik
pilersitsinissamik. Ilinniartitaanermut siunnersuisoqatigiit; inunnik
peqqinnissamut ilinniartitaanermullu tunngasunik ilisimasaqartuussapput. Namminersornerullutik Oqartussat
nalunaarutaat nr 36. 27 december 1993-imeersoq qiviarutsigu takuneqarsinnaavoq
kapitali 6-imi, § 13, imm.2-mi, nr.4-mi ilinniagaqartut akunnerminni ataatsimik
toqqaassasut.
Inuit Ataqatigiinniit
piumasarissavarput taassumap peqqussutissamut siunnersuummi
ersarissarneqarnissaa, taamaalilluni ilinniagaqartut sunniuteqarsinnaanerat
apeqquserneqarsinnaassanngimmat; tassami siunnersuummi siunnersuisoqatigiit
inuttassaat tassaassammata inuit peqqinnissamut ilinniartitaanermullu
ilisimasaqartut. Peqqussutissami siunnersuummi kallaallisuuani § 7-imi
allassimasoq, ,,1 januar 1999 atuutilerpoq" aaqqinneqarnissaa
piumasarissavarput naqinnerlutat allat tamaasa ilanngullugit. Taakkua
saniatigut Kultureqarnermut Ilinniartitaanermut Ilisimatusarnermullu
Naalakkersuisoq qinnuigissavarput, peqqinnissamik suliaqartunik aammalu
oqaasileriffik suleqatigiillutik peqqinnissamik tunngasunik suliaqartut,
taaguuterpassuit paatsuugassaajunnaarlugit taaguusersueqqullugu imaluunniit
taaguutinik erseqqarissaateqaqqullugu.
Taamatut oqaaseqarluta
peqqissaasutut ilinniartitaaneq pillugu Inatsisartut peqqussutissaattut
siunnersuut aappassaaneerneqannginnermini Kultureqarnermut Ilinniartitaanermut
Ilisimatusarnermullu ataatsimititaliamut ingerlateqqipparput. Qujanaq!.
Mogens Kleist, Kattusseqatigiit oqaaseqartuat:
Peqqissaasutut ilinniartitaaneq
pillugu Inatsisartut peqqussutissaattut siunnersuummut Kattusseqatigiinnit
imatut oqaaseqarusuppugut: Naalakkersuisup saqqummiussai soqutiginartut
Kattusseqatigiinnit tapersersorpagut. Nalunaarutaalu toqqammavigissagaanni
Isumaginninnermi Peqqissaanermi Ikiortitut ilinniarnerup
aaqqiivigineqarnissannut piffissanngorsimammat, ilinniartitaanerup
naliliiffigineqarnissaa, ilaatigullu misilittagaasimasut tunngavigalugit,
minnerunngitsumillu pissutsit, ullumikkut nunani allani ilinniartitaanerup
aaqqissuunneranut naleqqussartariaqalersimammata.
Aammalu ilinniartitaanerup
allanngortinneratigut ilinniartut periarfissinneqarmata
ilinniaqqissinnaanerminnut Kattusseqatigiinniit tapersersorusupparput.
Naalakkersuisuusimasut aggustimi 97-imi aalajangiisimanerat
toqqammavigissagaanni periarfissat ilinniaqqinnissamut amaassisuunerat aammalu
ingerlariaqqinnissamut aqqutissiuisuunerat maluginiarparput. Ilinniarnissamullu
piumasaqaatit aamma Peqqissaasutut ilinniarnerup sakkortusineratigut nunani
allani piumasaqaatit malinniarneqarneri maluginiarpavut. Taasinnaavarpummi
Qallunaat Nunaanni Social og Sundhedsassistentitut atuartitaaneq
assigikannerlugu maannakkut iluarsaassisoqarniartoq. Nunatsinnimi taamatut
ilinniarsimasut pisariaqarteqaagut, napparsimaveqarfinniinnaanngitsoq
inuiaqatigiilli iluanni sullissinernik assigiinngitsuni, Kattusseqatigiinniillu
oqaatigerusupparput assigiinngitsut suli qulakkeerneqarsimanngimmata ilinniartitaanerup
taamatut aallartinneqarnissaanut. Qulakkeerneqarsimanngitsut
taakkartorsinnaasavut tassaapput - ilinniartitsisussat, inissaqarniarneq inillu
atuartitsivissat, taamaattumik Naalakkersuisumut apeqqutigerusupparput
taakkartoriikkavut piffissami qaninnermi qanoq qulakkeerneqarsinnaanersut
ilinniartitaanerup aallartinnginnerani.
Peqqissaasutut ilinniarnerup
sukaternera isarissumik maluginiarparput, tassami siornatigut ilinniartut
ikerinnakkut atuarunnaarlutik Socialassistentitut sulilersinnaasarmata,
tamannalu peerlugu ilinniarneq aallaqqaataaniit nammassinissaanut
ingerlanneqartalernissaa pissusissamisoortutut isigaarput. Aammalumi ukiut
marluk ingerlareernerisigut atuarnerminnik unitsitsillutik sulilersimasut
akissarsiatigut aaqqiivigineqarsimannginneri maluginiarpavut.
Nunarsuarmi Peqqissaasutut
ilinniartitaanerup piumasaqaatai sakkortuut nunatsinni atuutsinniarneqalerneri
naleqquttuutippavut sulilersinnaanermilu Peqqissaasutut akuersissummik
pigisaqalernissap anguniarneqarnera pisussaaffittut ilinniarsimasumut
naleqquttutut isigaarput. Peqqissaasut nunatsinni taakkartortuarpavut
amigaatigalugit aningaasarpassuillu atorlugit taartaagallartussanik
tikisitsisarluta, tamakkua suli siunissami ingerlatiinnarneqassanerput?,
qaqugulu peqqissaasunik ajornartorsiornerput aaqqiivigineqassava?, tassami
innuttaasut napparsimavinni saaffiginnissinnaasariaqarput toqqissisimallutik
aammalu pitsaasumik pineqarsinnaasariaqarlutik. Nalunngilarpummi illoqarfinni
arlaqaqisuni innuttaasut toqqissisimaneq ajortut peqqissaasussaaleqineq
aammalumi nakorsassaaleqineq pissutigalugu.
Taamatut oqaaseqarluta
aappassaaneerneqarnissaanut innersuussutigissavarput, Naalakkersuisumiilli
taakkartorsimasavut akineqarnissaat kissaatigaagut. Qujanaq!.
Lise Lennert. Kultureqarnermut ilinniartitaanermut
Ilisimatusarnermullu Naalakkersuisoq:
Siullermik qutsatigissavara
Partiinut tamanut taamatut tapersersuerpaluttumik nipeqartumik aappassaanik
suliareqqinneqarnissaanut tapersiissuteqarmata. Taavalu utoqqatsissutigissavara
saqqummiussininni quppernermi kingullermi oqaaseqatigiit kingulliit siuliini
imatut oqartoorsimagama: "Ilisimatitsissutigineqarsinnaavoq ukioq manna
peqqissaasumut ilinniarsimasut", imaassaaq ilinnialernissamut aqqaneq
marluk qinnuteqarsimammata. Ilinnnialernissamut, taamaassaaq.
Taava partiit oqaaseqartut
ataasiakkaarlugit akissuteqarfigilaassavakka. Siumut oqaluttuata
peqqissaanissamut ikiortitut ilinniarnerup siunissami najugaq qimannagu
ilinniarnertut aaqqissuullugu aamma neqeroorutigineqarsinnaanissaa
Naalakkersuisunut eqqumaffigineqarluni ammatinneqarnissaa oqaatigaa.
Peqqinnissamut ikiortitut
Peqqinnissaqarfiup aamma inunnik isumaginninerup iluani sulisussaapput. Tassami
napparsimavinni aamma utoqqaat nammineersinnaajunnaarsimasut illuini
sulisinnaapput. Ilinniarnerminnilu taakkunani sapaatit akunnerini 35-ni
sulinermik sungiusartussaallutik. Sulinermik sungiusarneq najugaq qimannagu
illoqarfimmi napparsimavimmiluunniit utoqqarnulluunniit illulinni
ingerlanneqarsinnaavoq. Ilinniarnerullu ilaa atuagarsornerussaaq Peqqissaanermut
Ilinniarfimmi sapaatit akunnerini 34-ni ingerlanneqartassalluni. Peqqinnissamut
ikiortitut ilinniarneq misilittagaqarfigineqaleriarpat, kiisalu misilittakkat
siulliit nalilerneqareerpata najugaq qimannagu peqqinnissamut ikiortitut
ilinniarsinnaaneq Naalakkersuisut Peqqissaanermut Ilinniarfik peqatigalugu
nalilersussavaat.
Taava Atassumminngaanniit.
Tassani ujartuineq peqqinnissamut ikiortitut ilinniartitaaneq pitsaasoq
qaqeqqinneqartariaqannginnersoq nalilersorneqartariaqarnera Atassutip ujarorpaa.
Tassani innersuussutigissavara, soorunami qimerluueqqilertinnata aamma
apeqqutaassaaq udvalgimi suliarineqarnermini qanoq taassuma nalilerneqarnera.
Tassalu taanna udvalgimut innersuussutigissavara, ataatsimiititaliamut taassuma
apeqqutip ingerlateqqinnissaa.
Taavalu naggataatigut Atassutip
apeqqutigisai, kisitsisinik ujartuipput, taavalu soorunami aappassaanik uuma
peqqussutissap aappassaaniinnginnerani Atassummut taakkua ujartugai kisitsisit
apuukkumaarpagut.
Taavalu Inuit Ataqatigiit saqqummiussaannut.
Quppernerit pingajuanni Inuit Ataqatigiit apeq-quteqarput. Tassani apeqqut
imaappoq immikkut peqqussuteqartariaqannginnersoq imaluunniit Inatsisartut
peqqussutaat allannguuteqarnissaanik siunnersuusiortoqartariaqannginnersoq
massakkut atuutilertinnagu. Tassani pivara qupperneq 3-mi immikkoortut
aappaanni Inuit Ataqatigiit apeqqutigisaat.
Tassa taanna imatut
aaqqinneqarsinnaavoq aammalu piareersarluta aallartereerpugut
nalu-naarusiornikkut januarip aallaqqaataani ukioq 2000-imi atulersussatut,
tassalu taamaaliorsinnaavugut una tunngaviaglugu: Inuussutissarsiutinut
ilinniatitaanerit pillugit Inatsisartut peqqussutaat nr. 2 31. maj
1999-imeersoq tunngavigalugu taamaaliorsinnaatitaavugut.
Aappassaanik Inuit Ataqatigiit
kissaatigivaat, Kultureqarnermut Ilinniartitaanermut Ilisimatusarnermullu
Ataatsimiititaliap Inatsisartut siunnersuutip aappassaaneerinnginnerani
Naalakkersuisumut tusarniaassasoq piginnaatitsinerit qanoq
ilusilersorniarneqarnersut paasiniarlugit. Tassani oqaatigisinnaavara sinaakkutissiissutit
nalunaarutit aqqutigalugit taanna iluarsisinnaagatsigu.
Kiisalu pingajussaatut aamma
ujartugaat piumasariniarlugu peqqussutissamut siunnersuummi
ersarissarneqarnissaa ilinniagaqartut sunniuteqarsinnaanerat
apeqquserneqarsinnaajunnaartillugu. Taava tassani innersuussutigerusuppara
ataatsimiititaliami sulilernermi taassuma apeqqutip erseqqissarneqarnissaa
aamma ilangullugu oqaluuserillaqullugu.
Kiisalu una kingulleq. Taaguutit
assigiinngitsut assigiiaartorujussuit imminnut ujartorpaat qinnutigalugulu
taakkua taaguutit peqqinnissamik suliaqartunik aammalu Oqaasileriffimmik
suleqateqarluni taaguuteqarpassuit paatsuunganartut
erseqqissuliuuteqarfigeqqullugit. Taamatullu kissaateqarnerat
naammassiniassavarput, tusaatillugu aamma uani tigorusullugu.
Taava Kattusseqatigiit taamatut
tapersiinerat soorunami aamma qutsatigissavara. Aamma tassani
uparuartorneqartut maluginiarpakka. Uani ukua qulakkerneqarsinnaanersut
apeqqutigineqarput taakkartorlugit ilinniartitsisusassat inissaqarniareq inillu
atuartitsivissat ujartorneqarput. Soorunami tassa uuma aappassaaniinnginnerani
neriorsuutigisinnaanngilara taanna akissuteqarfigisinnaallugu. Kisiannili tassa
erseqqissaatigisinnaasannik aggiussiumaarpunga. Aammalu una ukiut marluk
ingerlareernerisigut atuarnerminnik unitsitsillutik sulilersimasut
akissarsiaatigut aaqqiivigineqarsimannginneri maluginiarneqarsimasut, massakkut
aamma taanna akissuteqarfigisinnaanngikkallarpara, kisianni misissorumavara.
Mikael Petersen, Isumaginninnermut Suliffeqarnermullu Naalakkeruisoq,
Siumut:
Kultureqarnermut
Iliniartitaanermullu Naalakkeruisup akissuteqaataanut ilangutilaarlugit ukua
eqqaalaarniarpakka. Tassa Inuit Ataqatigiinninngaanniit oqaaseqartup
oqaatigisai soqitiginarluinnartuummata aamma Ilinniartitaanermut Naalakkeruisup
akissuteqarfigilaareeraluarai kisianni isumaqarpunga inunnik isumaginninnermut
tunngasutigut isigalugit aamma oqaaseqarfigineqalaartariaqartut.
Ilumoorluinnarpoq ullumikkut
inunnik isumaginninnikkut suliassat ingerlanneqartut, utoqqaat illuini aammalu
immikkut nammineerlutik pisinnaanngitsut paaqqutarineqarneranni
ilinniarsimasussaatitaanermut piumasaqaatit ullumikkut annertupput.
Minnerunngitsumillu innarluutillit nunatsinni annertusiartuinnartumik
paaqqinnittarfitsigut inerisaaffigisagut, aammalu Danmarkimiittuutitta
innarluutillit nunatsinnut utersinnaasut utertikkiartuaarnissaat
eqqarsaatigalugu ilinniarsimasunik pisariaqartitsineq annikilliartorani
annertusiartortorujussuuvoq.Ullumikkut naak ilinniarsimasunik aamma suli
annertoorujussuarmik amigaateqareeraluartugut.
Taamaattumik uagut Inunnik
Isumaginninnikkut Pisortaqarfimmi aammalu Sulisoqarnermut Pisortaqarfimmi
suliavut tassunga attuumassuteqarluinnartuupput. Tassa sulisussatigut inunnik
isumaginninnikkut sulliveqarfinni soorunalumi aamma Peqqinnissaqarfik
eqqarsaatigalugu suli-sussatigut ilinniarsimasutigut pisariaqartitatta
nalilersortuarnissat pisariaqarmat. Aammalu siunissaq eqqarsaatiglaugu
pisariaqartinneqarumaartussat siunissami qanoq amerlatigissusaat, tamakku
tamarmik ilisimaneqartariaqarmata, taamaattumik naatsorsueqqissaarnerit
misissueqqissaarnerillu tassani suli amigaatigineqarput.
Kisiannili tassa oqaatigissavara
Naalakkersuisoqarfitsinni tamakku pillugit iluarsaaqqinneq aqqutigalugu
suliassanik piareersaagatta, ukioq 2000-ilu aallarnerfigalugu sukumiinerusumik
kisitsisitigut paasissutissat tassani neriuutigaarput pisinnaalerumaarlugit
ukioq 2000-ip ingerlanerani.
Tassuuna ilanngullugu
erseqqissaatigilaartariaqarpoq inunnik isumaginninnikkut peqqissaanikkullu
ilinniartitaanerit eqqarsaatigalugit Inunnik Isumaginninnermut Pisortaqarfik
aammalu Ilinniartitaanermullu Pisortaqarfik Peqqinnissaqarfillu pingasuullutik
taakkua Naalakkersuisoqarfiit ataatsimoortumik aamma suleqatigiimmata. Aammalu
tassuuna suleqatigiinnerup suli annertusarneqarnissaa Naalakkersuisut uagut
siunertarigatsigu oqaatigissallugu.
Tassa neriuutigilluinnarparput
inunnik isumaginninnikkut sulianut tunngatillugu ilinniartitaanerit aammalu
peqqinnissaqarfimmi sulianut tunngatillugu ilinniartitaanerit taakkua suliassanut
aammalu suliarivitassanut naapertuunnerusungorlugit ilusilersorneqarnerat
taanna anguneqarsinnaajumaartoq uagut Naalakkersuisoqarfivut pingasut taakku
assigiingitsut Peqqinnissamut Ilinniartitaanermut Isumaginninnermullu akornanni
suleqatigiinnerup aamma annertusarneratigut.
Per Berthelsen, Siumut:
Siumut tungaaninngaanniit
annikitsunnguamik taasaqalaarumavunga. Tassa siullermik Kultureqarnermut
Ilinniartitaanermut Ilisimatusarnermullu Naalakkeruisup nassuiaatai
akissutigisaalu naammagisimaarlugit tiguagut, suleriaqqinnissamilu
sulilluarnissamik kissaakkumallusi.
Aappaattut taalaarumasara
aallaaveqarpoq Atassutip paasisutissatut kisitsisaanerusunik ujartugaanik
attuumassuteqartunik. Tassunga iluatsillugu Siumut tungaaninngaanniit
taarusukkakku apequtigineqartut taakkua Inatsisartunit qularnanngitsumik
tamanit soqutiginartinneqarmata, assut nuannaarutigissagaluarlugu
iluatigissallugulu paasissutissat taakkua Inatsisartunut tamanut
agguaanneqarsinnaassappata.
Taavalu aamma taaguutit
erseqqissarnissaannut atatillugu akissutigineqartoq iluarisimaarparput, tassa
isumaqartuarsinnaratta taaguutit ilinniakkanullu attuumassuteqartut ilaatigut
imminnut assinguallaartut, taamaattumillu immikkuullarissarneqarnissaat tassani
kissaatiginartillugu.
Olga Poulsen, Inuit Ataqatigiit:
Tassa uani eqqartorparput
peqqissaasut, tassalu sygeplejerskit, ilinniartinneqartarnissaannik
peqqussummik allannguiniarneq. Tassani allannguutissap ersarinnerpaartarivaa
taanna sundhedsassistentimik taneqartut taakkua peerneqarnissaat, taassumallu
saniatigut peqqissaasungorniarnermut iserniarnermi piumasaqaatit
allanngortinneqarnerat.
Tassunga tunngatillugu
Atassutikkunninngaanniit saqqummiunneqartoq ilinniarneq 93-ip siornatigut
ingerlanneqartoq eqquteqqinneqarnissaanut tunngasoq, isumaqarpunga imannak
toqqaannanngitsumik allassimanngikkaluarluni peqqussutissamik siunnersuummi
taanna ammaanneqartoq. Pissutigalugu peqqussutissami tassani Peqqissaanermut
Ilinniarfimmi ningiuusoq naliliisinnaanngussagami qinnuteqartoq ilinniarnera
arlaatigut nalilersorlugu tigusisinnaanngussalluni ilinniartumik.
Tassani taamatut
periarfissaqarsinnaasut uanga takorloorsinnaasakka qaninnerpaat tassaapput,
peqqinnissamik siammarsaasut, tassa sundhedsmedhjælperit. Sygeplejerskolemi
ilinnialernissami taamatut nalilersuinermi qaninnerpaasutut ilaasutut
taaneqarsinnaapput.
Taava tassunga najugaq
qimannagu ilinniartitsinissamik tunngatillugu Siumukkut oqaatigisaa piffissaq
ungasinnerusoq eqqarsaatigalugu siammasissumik
ilinniartitsissutaalersinnaaneranut, isumaqarpunga pingaaruteqartorujussuusoq
uumap ilinniartitaanerup naammassisumik aammalu inerititaqartumik
Peqqissaanermut Ilinniarfimmi suliarineqaqqaarnissaa taanna
annertoorujussuarmik pingaaruteqartoq.
Pissutigalugu siunissami
taamatut siammasinnerusumik ilinniartitsinermik ingerlatsilissagutta
pisariaqartitassagut amerlasoorpassuit tassaasussaammata taassuminnga
faggruppimi ilinniartitsisussat. Taassuminngalu faggruppimi ilinniartitsisussat
tassaasussaapput taakkua sundhedsassistentimik uani massakkut taagorneqarallartumik
ilinniarsimasuusut.Taamaattumik pingaaruteqarpoq taakkua
inerititaqarluarnissaat siullerpaarpaamik massakkut
suliniutigineqartariaqartoq.
Taava Mogens Kleistip
oqaaseqarnermini assersuutigivaa Danmarkimi sundhedsassistentitut
qanipajaartut. Immaqa taanna ilumoortortaqarsinnaavoq. Kisianni uani aammalu
illoqarfiit iluani kommeqarfinni sulisinnaasutut aamma uani taagorneqarput.
Uani isumaqarpunga pingaaruteqartuusoq ilinniartinneqarniartut tassaamata
napparsimaveqarfiit iluini afdelingini assigiinngitsuni nappaatinik
assigiinngitsunik aalajangersimasunut pikkoriffeqalertutut inissinniarneqartut.
Tassa assersuutigalugu
pualuttunut imaluunniit anersaartuutimikkut nappaateqartunut inalukkamikkut
aqajaqqumikkut nappaateqartunut naffakunut tarnimikkut napparsimasunut
assigisaannullu, soorlu immikkut sammiveqartumik ingerlanneqartussamik
ilinniartinneqarniartut.
Taamaattumik Inuit Ataqatigiinningaanniit aamma oqaaseqarnitsinni qujassutigivarput STI aqqutigalugu social og sundhedsmedhælperitut taaneqartartut taakkua ilinniartitaanerat pitsanngorsaviginiarneqarnerat Naalakkersuisut sulissutiginiarmassuk. Kommunimi taakkua annertuumik atorfissaqartikkatsigit.
Augusta Salling, Atassut:
IA-minngaanneersup Olgap oqaasianut tunngatillugu oqaatigisinnaavara Atassumminngaanniit peqqissaanermut ikiortit 1993 sioqqullugu ilinniartitaasarsimanerat iluatigalugu oqaaseqarnitsinni tunngavigigatsigu siusinnerusukkut ilinniartitaanerup taassumap atuunnerata nalaani peqqinnissamut ikiortit annertunerujussuarmik akisussaaffeqarlutik suliaqartitaasarsinnaasimanerat.
Taanna iluatinnartutut isigigatsigu, pissutigalugu ullumikkut paasisagut tunngavigalugit ilinniartitaanerup kingunerisaanik akisussaaffiit annikinnerusut taamaallaat tigummineqarsinnaasarsimapput. Allaat massakkut ajornartorsiut ima annertutigilersimalluni unnuami nutserisunut allaat atortariaqartalerimallutik sulisussaaleqinerq annertuallaaqimmat.
Taamaattumik uagut kissaatigisimavarput Peqqinnissamut ataatsimiititaliami nalilersuilluartoqartariaqartoq ilumut taanna iliniartitaaneq siulleq annertunerusumik peqqinnissamut ikiortit annertunerusumik akisussaaffeqarsinnasut aammalu suliaqartitaasinnaasut ilinniartitaanerata eqquteqqinneqarnissaat taanna piffissangunnginnersoq.
Mogens Kleist, Kattusseqatigiit:
Naalakkersuisup oqaaserisai
tusaatissatut tigussavagut aammalu neriuutigalugu taakku ujartukkagut
ataatsimiititaliamulluunniit saqqummiukkumaarai. Uku ujartuinitsinni
pingaartipparput ilinniartitsisut qassit pisariaqartinneqarpat inissat
assigiinngitsut. Massakkut oktoberiuvoq, november december, januar.
Naatsorsuutigineqarpoq januarilluunniit naalernerani immaqa
aallartissinnaassasoq. Piffissaq sivikitsuaraararsuuvoq.
Taamaattumik isumaqarpunga
tuaviuussaavallaartumik taamatut ingerlatitsiniaraanni sukumiisumik aatsaat
misissueqqaarluni qulakkeereqqaarluni aatsaat tamakkua saqqummiuttariaqartutut
uagut tungitsinninngaanniit taakkartorusuppagut. Aammalu Olgap taakkartugaanut,
napparsimaveqarfinniinnaq uanga naatsorsuutiginngilakka taakku
sulilertussaassasut social og sundhedsassistentitut taakku STI-mut
tunngatillugu ingerlasut. Kisianni uani immikkortut taakkua
peqqissaasunngorniat taakkua immikkorluinnaq isigisariaqaratsigit.
Taamaattumik social og
sundhedsassistentitut taanna massakkut ingerlanneqartumut tunngatillugu
isumaqarpunga sumiluunniit sulisinnaapput kommunip iluani, peqqinnissaqarfiup
iluani sulisinnaapput. Aamma peqqissaasumut atuartut taakku
napparsimaveqarfinni sulisinnaapput. Taamaattumik naatsorsuutigilluinnarpara
ataatsimiititaliami taakku eqqartorneqalerpata annertungaatsiartorujussuarmik
aamma tusarniaanissagut ingerlanneqartussaassasut.
Tassami atorfinitsitassagut qanoq
inissisimasappat, qanoq ilinniarsimassappat inissaat akissarsiassaat tamakku
tamarmik qulakkeerneqartariaqarput. Taamaattumik piffissamik taamak
sivikitsigisumik qaammatit pingasut sisamat ingerlanerinnaani isumaqanngilanga
aaqqinneqarsinnaasut.
Ataatsimiinnermik
aqutsisoq: Anders
Andreassen, Siumut:
Allanik oqaaseqartussaarummat,
taamaalilluta ullumikkut oqaluuserisaq immikkoortoq 34 Peqqissaasut
Ilinniartitaaneq pillugu Inatsisartut peqqusstissaattut siunnersuutip
siullermeerneqarera naammassigallarparput.
Aappassaaneerneqartinnanilu
Kultureqarnermut Ilinniartitaanermullu Ataatsimiititaliami
suliarineqaqqaarallassaaq. Tassa tassani ilinniartitaanerit
eqqartorneqartarmata, naak Atassutip innersuussutigigaluaraa Peqqinnissamut
Ataatsimiititalimi aaqqinneqassasoq. Kisianni ilinniartitaanermut attuumassuteqarnera
taava tassunga Ilinniartitaanermut Ataatsimiititaliami
suliarineqaqqaarallassaaq. Aammalu isumasioqatigiissinnaapput taakkua marluk
akornamminni. Tamatumalu kingorna aappassaaneerneqarumaarpoq. Tassa
ullumikkullu oqaluuserisassagut tassa tamakkerpagut.
Oqaluuserisaq naammassivoq.