Oqaluuserisassani immikkoortoq 49 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Pingasunngorneq 13. oktober 1999 nal. 17.20
Ataatsimiinnermi aqutsisoq: Anthon Fredriksen, Kattusseqatigiit.
Ruth Heilmann, apeqquteqaateqartoq, Siumut:
Apeqqutiginiarpara Namminersornerusuni konsulentinik atuinerup
annikillisarneqarnissaa Inatsisartuni kissaatigineqartareersoq, taanna pillugu
aningaasartuutit tassunga atorneqartartut annertuginartaqimmata. Maannakkut
qanorpiaq ingerlatsisoqarnersoq Inatsisartut ukiaanerani ataatsimiinneranni
nassuiaatigineqallaqunarpoq aamma killiliisarluni atuisoqarnersoq. Tassani
pisortaqarfiit tamaasa nassuiaateqarnissaat eqqarsaatigalugit taamatut
apeqquteqaateqarniaerpunga.
Jonathan Motzfeldt, Naalakkersuisut Siulittaasuat:
Inatsisartunut ilaasortap Ruth Heilmannip Namminersornerullutik Oqartussat
siunnersortinik avataaneersunik atuinerat pillugu Naalakkersuisut
nassuiaateqaqquai, matumani atuineq appartikkiartuaarneqarnersoq ilanngullugu
eqqarsaatigalugu, tassami aningaasartuutit amerlavallaartutut isigineqarmata.
Aqutsinermut Pisortaqarfik tamatumunnga atatillugu kontumi tassani 1999-imi
aggustip 31-iani atuisimanermik naatsorsuisimavoq, naatsorsuinerullu taassuma
takutippaa piffissap taamaalinerani 36 mio. kr.-it missaat atorneqarsimasut.
Taamaalilluni siorna piffissap taamaalinerani 48,7 mio. kr.-inik atuisimanermut
sanilliullugu 12,7 mio. kr.-inik atuinikinnerusoqarsimavoq, tamannalu
Aatsitassanut Ikummatissanullu Pisortaqarfimmi naatsorsuuserinerup
allanngortinneqarsimaneranut atatillugu isiginiarneqassaaq, tassami suliassaqarfimmi
tassani 1999-mi aggustip 31-iata siorna piffissap taamaalinerani
naatsorsuutinut ilanngunneqarsimasunut sanilliullugit 12,8 mio. kr.-inik
ikinnerusunik naatsorsuutinut ilanngussisoqarsimammat.
Taamaattumik 1999-imi atuineq 1998-imi atuinertukanneq annertussuseqarpoq.
Taamaalilluni ataatsimut isigalugu takuneqarsinnaavoq atorfinitsitsisarnermik
unitsitsineq atorfiit inuttaqanngitsut matussuserniarlugit siunnersortinik
avataaneersunik atuinerup annertusineranik nassataqarsimanngitsoq.
Tamatumunnga sanilliussissutitut oqaatigineqarsinnaavoq 1998-imi atuineq
tamarmiusoq 78,6 mio. kr.-inik aningaasartaqarsimammat. Atuineq taanna
eqqarsaatigalugu Naalakkersuisut Inatsisartut Kukkunersiuinermut
Ataatsimiititaliaannut allakkatigut 1999-imi marsip 22-ianeersutigut
nassuiaateqarput.
Naalakkersuisut aamma oqaatigisinnaavaat atorfinitsitsisarunnaarnermut
atatillugu aamma Namminersornerullutik Oqartussani siunnersortinik
avataaneersunik atuinerup sukumiisumik qulaajarneqarnera eqqarsaatigalugu suliassaqarfimmi
tassani arlalitsigut suliniuteqartoqarsimammat. Taamaalilluni suliassaqarfimmi
tassani naatsorsuutini nassuiaasersugaanerusumik ingerlatsisoqalersimavoq,
suliassaqarfillu 1999-imi naatsorsuutit ingerlaavartumik
kukkunersiorneqartarnerannut atatillugu immikkut eqqumaffigineqarluni.
Tamakku saniatigut 1999-imi naatsorsuutit inaarsarneqarnerannut atatillugu
siunnersortinik avataaneersunik atuineq aamma ingerlatsinermut
misissueqqissaarnerillu pillugit avataaneersunut isumaqatigiissuteqartoqartarsimappat
tamakku pillugit pisortaqarfiit immikkut nassuiaaqquneqartussaallutik.
1999-imi aggustip 31-iani atuinerup killiffia eqqarsaatigalugu
naalakkersuisoqarfiit ataasiakkaat nassuiaatinik naatsukullannik makkuninnga
saqqummiussisimapput:
Allattoqarfiup atuinera 3,4 mio. kr.-iuvoq, tassanilu
filmiliornermut/TV-kkut aallakaatitassiornermut kiisalu OECD-p misissuineranut
annertuumik atuisoqarsimavoq.
Aatsitassanut Ikummatissanullu Pisortaqarfiup atugaasa 5,9 mio. kr.-it
ilarpassui misissueqqissaartartunut atorneqarsimapput, tassami aatsitassanik
piiaanermut atatillugu pisortaqarfiup immikkut ilisimasallit
annertoorujussuarmik atortarmagit. 1999-imi ilaatigut Greenland Ressources 4,6
mio. kr.-inik nalilimmik isumaqatigiissuteqarfigineqarsimavoq, taakkunanngalu 3
mio. kr.-it 1999-imi aggustip 31-iani atorneqareersimallutik.
Aqutsinermut Pisortaqarfiup Namminersornerullutik Oqartussat
kukkunersiuisuinut avataaneersunut, qarasaasianik ingerlatsinermut atatillugu
siunnersuinermut ineriartortitsinermullu kiisalu Namminersornerullutik
Oqartussat ilinniartitseqqittarnerinut aningaasartuuteqarnerusarpoq. 1999-imi
aggustip 31-iani 3,4 mio. kr.-it atorneqarsimapput.
Aningaasaqarnermut Pisortaqarfiup 0,6 mio. kr.-it atorsimavai, taakkulu
inatsisiliornermut atatillugu siunnersortinut atorneqarnerusimallutik.
Naatsorsueqqissaartarfiup 0,7 mio. kr.-it atorsimasai ukiumoortumik
nalunaarusiap suliarineqarneranut naqitertinneqarneranullu aningaasartuutinut
ilaapput.
Isumaginninnermut Suliffeqarnermullu Pisortaqarfiup atorsimasaasa 2 mio.
kr.-it ilarpassui taartaagallartunit ikiorneqarnermut atatillugu
siunnersuinermut kiisalu meeqqanik inuusuttunillu paaqqinniffinnut
ilitsersuisunut atorneqarsimapput.
Kultureqarnermut, Ilinniartitaanermut Ilisimatusarnermullu Pisortaqarfiup
7,0 mio. kr.-it atorsimavai, taaakkunanngalu 6,1 mio. kr.-it ilaatigut meeqqat
atuarfianni atuartitsinerup pitsanngorsarneqarnissaa siunertaralugu
suliniutitut aallartisarneqarsimasumut atorneqarsimapput.
Peqqinnissamut Pisortaqarfiup katillugit 10,4 mio. kr.-it atorsimavai,
taakkunanngalu 8,6 mio. kr.-it nakorsanut peqqissaasunullu taartaasartunuinnaq
atorneqarsimallutik.
Avatangiisinut Pinngortitamullu Pisortaqarfiup 0,6 mio. kr.-it atorsimavai,
taakkulu Pinngortitaleriffimmi siunnersortinik ikiorteqarnermut
tunngasuullutik.
Ineqarnermut, Attaveqarnermut Pilersuinermullu Pisortaqarfiup 1,2 mio.
kr.-it atorsimavai, taakkulu Amutsiviit allanngortinneqarneranut atatillugu
siunnersuisunuunerusoq atorneqarsimapput, taakkunanngalu 0,6 mio. kr.-it
Greenland Ressourcesinuinnaq atorneqarsimallutik.
Akissuteqarnissamut piffissaliunneqartup sivikisissusia pissutigalugu
pisortaqarfinnit paasissutissiissutigineqartut assigiinngisitaakulupput.
Tamanna oqaatigineqareersutut 1999-imi naatsorsuutit inaarsarneqarnerannut
atatillugu aaqqinneqassaaq, pisortaqarfiillu tamarmik ataasiakkaarlutik
siunnersortinik atuinertik pillugu tunaartarisassat Aqutsinermut
Pisortaqarfimmit suliarineqarsimasut malillugit immikkut nassuiaateqaqqullugit
peqquneqassallutik. Tamatuma kingorna, soorlu ukioq maanna aamma
taamaaliortoqarsimasoq, tamanna pillugu ataatsimoortumik nassuiaat
Naalakkersuisut Kukkunersiuinermut Ataatsimiititaliamut nassiutissavaat.
Ruth Heilmann, Siumut:
Nuannaarutigaara apeqquteqaatiga taama ersaritsigisumik Naalakkersuisut
Siulittaasuaniit akineqarmat pujorsuup iluaniikkunnaajallattorujussuuvunga.
Uanili akissuteqaataasut ilaat neriorsuutigineqartut kukkunersiuinermut
ataatsimiititaliamut ingerlateqqinneqartussaapput, taannalu aamma
iluarisimaarnarpoq taamatut akissuteqaatip suli aamma itinerusumik
ingerlateqqillugu taamatut kukkunersiuinermut ataatsimiititaliamut
ingerlateqqinniarneqarmat. Kisianni takullugit millionerpaalussuupput tassunga
atorneqartut, kisianni tassa paasivara.
Oqaluuserisaq naammassivoq.