Oqaluuserisassani immikkoortoq 51-52 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsmiinnermi
aqutsisoq, Inatsisartut Siulittaasuat Johan Lund Olsen:
Ataatsimiineq ammarpoq, tassalu
ullumikkut marlunngorneq oktoberip 12-ani Inatsisartut oqaluuserisassagut
immikkoortut tallimaapput, tassalu siullermik immikkoortoq 51, tassalu nunatta
eqqiluitsuutinnissaa tikikkuminartuunissaalu siunertaralugu nuna tamakkerlugu
ulloq aalajangersimasoq sulinani saleersuaqatigiittarnissamik apeqquteqaat
pillugu oqallinneq kiisalu kiisalu immikkoortoq 52, Avatangiisitta
mingutsaaliornissaa, siunissamilu sermersuup kommunillu avataani pisussanut
nunatsinniit aalajangeeqataanerusarnissatsinnik apeequteqaat pillugu
oqallinneq, tassa immikkoortoq 51 52-ilu taakku Inatsisartunut ilaasortamit
Maliinannguaq Markussen Mølgaardimit siunnersuuteqarfigineqarput. Taakkulu
ataatsimoortillugit maani Inatsisartuni oqaluuserineqassapput.
Taava immikkoortoq 54, tassa
suliffeqarfissuit pisortaasa siulersuisuisalu ingerlatsinermi
kukkuluttortoqartillugu akisussaatinneqartalernissaanik suliffeqarfissuarnut
piginnittut sinnerlugit Inatsisartut aalajangiisalernissaanik piumasaqaateqartalernissamik
apeqquteqaat pillugu oqallinneq, Inatsisartunut ilaasortap Anthon Frederiksenip
siunnersuutaa, kiisalu immikkoortoq 8, misissuisussatut kommissionit pillugit
inatsisip Kalaallit Nunaannut atortussanngortinneqarnissaa pillugu
Namminersornerullutik Oqartussat oqaaseqaataat.
Taakku kingulliit marluk
eqqarsaatigalugit immikoortoq 54, immikkoortorlu 8 oqaatigissavarput taakkua
uiguleriissillugit maani oqaluuserineqassammata, tassa taamaalillutik taamatut
aamma inissinneqarsimapput.
Taavalu kingullertut ullumikkut
oqaluuserineqassaaq immikkoortoq 62, tassa Etik-ki, ileqqorissaarneq
tunngavigalugu ataatsimiititalionissaanik siunnersuisartussamik
pilersitsisoqarnissaanik apeqquteqaat pillugu oqallinnissaq, Inatsisartunut
ilaasortap Per Rosing Petersenip siunnersuuteqarfigisaa.
Siullermilli
oqaatigineqareersutuut tassa immikkoortoq 51 immikkoortorlu 52 ataatsimoorlugit
oqaluuserineqartussat, tassa siunnersuuteqartoq qinnuigissavara
siunnersuutiminik marluusunik saqqummiusseqqullugu. Tamatuma kingorna
Naalakkersuisoq akissuteqassaaq.
Maliinannguaq Markussen
Mølgaard,
siunnersuuteqartoq, Inuit Ataqatigiit:
Qujanaq. Nunarput eqquluitsutut
avammut nittarsaanniartarparput tulluussimaarutiginiartarlugulu, tamannali
tamatigut ilumoortuunngilaq, ilami sumiiffiit ilaanni takornarianut
kusananngilluinnartunik takutitassaqartoqartarluni.
Tamanna nunatta isigineqarneranut
iluaqutaanngilluinnartarpoq, naallu kommunikkaartumik saliisarnerit
saliisitsisarnerillu ingerlanneqartaraluartut, tamanna tamatigut iluatsittutut
oqaatigineqarsinnaaneq ajorpoq.
Taamaattumik nunarput
tamakkerlugu ataatsikkoortumik saliisoqartalernissaa siunnersuutigaara, ullormi
tassani saliinerup saniatigut illoqarfiit nunaqarfiillumi nunagisamik
pinnersaanermik ingerlatsisoqarsinnaavoq, immaqalu illoqarfiup
takujuminarsaatissaanik kulturikkut takusassiaasinnaasumik
pinnersaasiortoqarsinnaalluni.
Suliffeqarfiit silatitik
kusassarsinnaavaat, kusassaallaqqinnerpaallu akissarsitinneqarsinnaallutik.
Saliineq illoqarfiup avataanut angalaarluni saliinermik ilaqarsinnaavoq,
avatangiiserpummi tulluussimaarutiginiartagarput aamma ilaatigut
salitassaassaqimmat.
Ataatsimoorussamik taama nuna
tamakkerlugu saleersuaqatigiittarnerit kingunerisinnaavaa meeqqat,
inersimasullumi eqqiluittuutitsinissamik eqqummaarinnerulernerat, imaanngitsoq
saligaatsuunissaq inuit pisortalluunniit ataasiakkaaginnaat akisussaaffigigaat.
Taamaattumik Inatsisartunut
oqaluuserisassanngorlugu siunnersuutigaara nunarput tamakkerlugu
aaqqissuussamik eqqiluitsuutitsinissamik, nunagisallu pinnersarnissaanik
ullormik ataatsimik sulinngiffeqarluni periarfissiuussinissaq, taamatullu
saleeqataanissaq tamanit pisussaaffittut ingerlanneqartassasoq aamma
siunnersuutigalugu.
Taava siunnersuutima aappaa, ima
nipeqarpoq:
Ukini kingullerni oqallinnerit
annertuut pisarput, ilaatigut nunatta avannaa sinerlugu snescooterinik
angalanissamut akuersissutit, sermersuup biilersuarnik itivinneqarnissaanut
akuersissutit il.il. oqallinnernik annertuunik pilersitsisarlutik, tamatumanilu
paasisagut malillugit aalajangiinerit toqqammaviusut Qallunaat Nunaannit
akuersissutigineqartarput, taamatullu aamma ilisimassassarsiorluni
sermersuarmik nunattalumi sineriaani angalanissamut akuersissutaasartut
qulaatiinnarluta aalajangerneqartarlutik.
Tamanna qaangerneqartariaqarpoq,
uagummi nammineq nunaqartutut avatangiisitta qanoq sumullu atorneqarnissaat
erseqqissumik najoqqutassaqartittariaqarparput, pisumiit pisumut
oqallinnerujussuit pisassanngippata.
Taamaattumik Inatsisartunut
oqaluuserisassanngorlugu siunnersuutigaara avatangiisitta
ilisimasassarsiornerit assigisaasalu sumut qanorlu atornissaannut nunatsinnit
tamakkiisumik oqartussaaffigilernissaat, kiisalu Inatsisartut toqqammaviusumik
taamatut akuersissuteqartarnissamut aallaaviusussanik oqallinnissaat.
Alfred Jakobsen, Peqqinnissamut, Avatangiisinut
Ilageeqarnermullu Naalakkersuisoq:
Qujanaq, tassa nunatta
eqqiluitsuutinnissaa tikikkuminartuunissaalu siunertaralugu nuna tamakkerlugu
ulloq aalajangersimasoq sulinani saleersuaqatigiittarnissamik kiisalu Avatangiisitta
mingutsaaliornissaa, siunissamilu sermersuup kommunillu avataani pisussanut
nunatsinniit aalajangeeqataanerulernissatsinnik oqallinnissamik siunnersuut
Inatsisartuni ilaasortap Maliinannguaq Markussen. Mølgaardip siunnersuutaa
matumuuna Naalakkersuisut sinnerlugit imaattumik akissuteqarfigissavara:
Aallaqqaasiullugu Inatsisartunut
ilaasortaq apeqqutaanut qutsaviginiarpara periarfissaqalersimmangami
illoqarfiit nunaqarfiillu killeqarfiisa avataanni nunaannarni angallanneq
pillugu malittarisassanik naatsumik nassuiaanissannut kiisalu illoqarfiit
nunaqarfiillu eqqiluitsuutinneqarneri pillugit oqaaseqarnissannut
periarfissimmanga.
Avatangiisit
innarlitsaaliorneqarnissaannik Inatsisartut peqqussutaata allanngortinneqarneranik
Inatsisartut peqqussutaat nr. 14, 31. oktober 1996-imeersoq naapertorlugu
nunaannarni, tassa illoqarfiit nunaqarfiillu killingisa avataanni, angallanneq
pillugu nalunaarusiornissaminnut Naalakkersuisut periarfissaqarput, aamma sermersuaq
eqqarsaatigalugu.
Nalunaarutit taakku
suliarineqarnerat kommunit suleqatigilluinnarlugit pisarpoq, taakkulu
angallassivissiat kiisalu motorilinnik angallavigineqarsinnaasut pillugit
siunnersuutinik nassiussaqartarnermikkut inatsisiliornermut sunniuteqarluinnartarput.
Nalunaarutit taamaattut
siullersaat ukioq manna juunip 15-iani atuutilerpoq, tassalu Sisimiut
Maniitsullu kommuniinut aammalu Kangerlussuarmut atuulluni. Tulleq
tusarniaassutigineqarpoq, taannalu Upernaviup Uummannallu kommuniinut ukioq
manna decemberip aallaqqaataani atuutilertussaalluni. Aammattaaq nunatsinni
kommunit sinneri ukiup affaata tulliuttup ingerlanerani
nalunaarusiorfigineqartussapput.
Tamatuma kingorna angallavissiat
nalunaarutini aalajangersarneqarsimasut avataanni nunaannarmi motorillit
atorlugit angallanneq sunaluunniit inerteqqutaalissaaq. Taamaattorli
Naalakkersuisut kommuninut attorneqartunut tusarniaaqqaarlutik immikkut
akuersissuteqartarnissaminnut periarfissaqassapput.
Tassa imaappoq, siunissami
Naalakkersuisut tassaassapput assersuutigalugu sermersuaq qarsullugu
ilisimasassarsiorniartut immikkut akuersissuteqarfigineqarnissaannut
isummertartussat.
Ukioq manna tikillugu
imaassimagaluarpoq nunaannarni eqqissisimatitat avataanni pisut, soorlu ukioq
manna siusinnerusukkut KNI-p sermersuaq qarsullugu angalatitsinera, uagut
inatsisitta suulluuniit ataaniigatik. Pisuni taamaattuni inatsisitigut
tunngavissatuaq tassaavoq Angalaneq pillugu nalunaarut 1967-imeersoq
kingusinnerusukkut allannguutitaqartinneqartoq, nalunaarullu taanna
naapertorlugu Dansk Polarcenter akuersissuteqarsinnaatitaavoq.
Ilanngullugu
ilisimatitsissutigineqarsinnaavoq angalaneq pillugu nalunaarut danskit
oqartussaasuia susassaqarfigisaat maanna iluarsaateqqinneqalermat,
tamatumunngalu atatillugu ilisimassassarsiornerit pillugit oqartussaaffiup
Kalaallit Nunaannut Ministeriaqarfiup atorunnaarsinneqarnerata kingorna Dansk
Polarcenterimit isumagineqarsimasup Inatsisartunit erseqqilluinnartumik
isummerfigineqarnissaa iluaqutaassammat.
Ulloq aalajangersimasoq sulinani
saleersuaqatigiittarnissamik Inatsisartunut ilaasortap siunnersuutaanut
tunngatillugu aallaqqaammut erseqqissassavara eqqagassalerineq - aamma
maaniinnarmiittunik - kommunalbestyrelsit akisussaaffigimmassuk.
Saleersuarnissamut nuna tamakkerlugu sulinngiffeqartitsinissaq Naalakkersuisut
tulluartuusorinngilarput, tamannalu pillugu tulliuttuni nassuiaateqalaassaanga.
Sulinngiffeqartitsisalerneq
pisortani sulisitsisunut, namminersortunullumi, aningaasatigut
kinguneqartussaavoq. Eqqagassalerisut ulloq naallugu sulisartut akissarsiaannut
inuiaqatigiit immikkoorsitsinissaat naalakkersuisunit
soqutiginarnerutinneqarpoq.
Ulloq manna tikillugu
illoqarfinni nunaqarfinnilu amerlaqisuni upernaakkut ataatsimoorluni
saliisarneq ileqquuvoq. Isumaqarpunga taamaaliortarneq ingerlateqqissagipput,
immaqalu Inatsisartunut ilaasortap siunnersuutigisaatut tikikkuminarsaanermik
ilallugu. Septemberimi Aasianniillunga nuannarutigeqisannik illoqarfimmiunik
illoqarfiup salinneqarnerani suliniuteqarluarsimasunik nersornaaseeqqataavunga.
Taamaaliortarneq immaqa illoqarfinni allani ingerlanneqalersinnaagaluarpoq.
1996-imi Inatsisartut
eqqagassalerinermi iliuusissatut pilersaarut akuersissutigaat, taassumalu
kingunerisaanik illoqarfinni nunaqarfinnilu ikuallaaviit pilersiortorneqarput;
eqqagassalli taamaaliornerinnakkut isumagineqarneq ajorput. Innuttaasulli
ataasiakkaat aamma isumagisariaqarpaat eqqagassat tamarmik
ikuallaaviliaanneqartarnissaat imaluunniit kommunit eqqagassanut ulorianartunut
tigooraavigilerumaagaannut ingerlanneqartarnissaat.
Kommunini avatangiisitigut
iliuusissat pillugit pilersaarusiortussanik, aamma eqqagassalerinermut
tunngassuteqartunik pilersaarusiortussanik, Avatangiisinut Pinngortitamullu
Pisortaqarfik KANUKOKA-lu suleqatigiissitaliorsimapput. Oqallisigineqartussanullu
ilanngunneqarsimavoq Agenda 21-imik taaneqartartup qanoq iliornikkut
kulturitsinnut nunatsinnilu pissutsinut tulluarsarneqarsinnaanera.
Taamaammat innuttaasut
ataasiakkaat eqqagassaatiminnik isumatuumik suujunnaarsitsisalernissaat pissusissavittut
isigineqartussanngorlugu isiginnittaatsitsinnik qanoq ililluta
allanngortitsinissarput oqallisigilerniartigu. "Nunarput qanoq
eqqiluitsunngortissavarput" qulequtsiullugu oqallisilernissarput
pingaartutut isigaara.
Ruth Heilmann, Siumup oqaaseqartua:
Qujanaq. Nunatta
eqqiluitsuutinnissaa tikikkuminartuunissaalu siunertaralugu nuna tamakkerlugu
ulloq aalajangersimasoq sulinani saleersuaqatigiittarnissamik kiisalu
Avatangiisitta mingutsaaliornissaa, siunissamilu sermersuup kommunillu avataani
pisussanut nunatsinniit aalajangeeqataanerulernissatsinnik oqallinnissamik
siunnersuut.
Inatsisartuni ilaasortap
Maliinannguaq Markussen Mølgaardip taamatut apeqquteqaataatigisunik
Inatsisartuni oqaluuserisassanngortitsinera Siumumit imatut oqaaseqarfigerusupparput:
Siumumit
pingaartitarilluinnarparput nunatta eqqiluitsuutinneqarluinnarnissaa. Nunarput
tulluusimaarutigalugu avammut nittarsaattarparput tassaasoq nuna
eqqiluitsorsuaq, sermeqarluni imeqarlunilu minguilluinnartumik
silaannarilluinnartuusorlu.
Nunatta sutigut tamatigut
mingutsaaliorneqarnissaa annertuumik nakkutigisariaqarparput, taamaattumillu
avatangiisitta innarlitsaaliorneqarnissaat nammineq nunatsinni
oqartussaaffigisariaqarparput,tamannalu Namminersornerulernitta anersaavanut
ilaalluinnarpoq.
Tamatta takorloorsinnaavarput
nunarput nammineerluta paarilluanngikkutsigu inuuniutitta siuaasatsinnillu
kingornussarsiatta imaani nunamilu miluumasut, timmissat aalisakkallu
inuus-sutigisatta imaaliinnarlutik qimassinnaagaatigut, tamannalu kinguaariit
uagut kalaaliusut ataasiinnaalluunniit kissaatigisarinngilluinnarpaa.
Nunatsinni mingutitsinerup
annertoreeqisup ilaqqinneqannginnissaa tamatta suleqataaffigisariaqarparput.
Akerlianillu mingutsitaareersup ileqquatut kusanartunngorlugu suliarineqarnissaa
pisussaafigisariaqarparput.
Nappartakorsuit uuliakut puukui,
saviminikut biilikullu kusassaataanngivissut tamatta taku-saannarpavut,
oqartarlutalu qaquguuku taakkua piiarneqarniartut? Umiarsuaq sinersortoq
saligisussaq naalakkersuisunit misissorumaneqarnikuusoq sumummitaava killippa?
Nappartakorsuit uulianik imallit
mingutitsisut aamma Inatsisartuni ilaasortap Per Rosing Petersenip Ikatsini
piiarneqaqqullugit apeqquteqaataa uunga oqaluuserisamut ilanngunneqarluni
oqaluuserineqarsinnaagaluartoq Siumumit isumaqarfigaarput.
Siumumit isumaqarpugut kikkut
tamatta pisussaaffigigipput nunatta eqqiluitsuutinneqarnissaa,
taamaattumik sumut tamaanga
eqqaasarneq qaangertariaqarparput.
Siunnersuutigineqartumut
Naalakkersuisut akissuteqaataanni tassa saliiffissamik ullormik sulinngiffimmik
pilersitsisoqarnissaanik piumasaqaateqarneq Siumumit
naleqquttuusorinngi-larput. Isumaqarlutali maannakkut kommunikkaartumik
imaluunniit illoqarfikkuutaartumik nunaqqatigiit namminneerlutik suliniutaat
annertunerusumik tapersersorneqarnissaat pisariaqartuusoq, aamma tassani
KANUKOKA suleqataasariaqartutut Siumumit isumaqarfigilluinnarparput.
Upernaat tamaasa aputip
aattoreerneratigut kommunit arlaqartut illoqarfimmi saliginissamik
kaammattuuteqartarput, tassami pissusissamisoorpoq inuit namminneq
pisussaaffigimmassuk illumi eqqaata sukuluitsuutinneqarnissaa. Qujanartuuvoq
kommunini ileqquuleriartormat inuiattut ullorsiorneq tikitsinnagu
illoqarfigisap nunaqarfigisallu salinneqartarnera, tamanna pissuseq
kusanartuuvoq atorluarneqartariaqarluinnartoq.
Ukiuni kingullerni najugaqartut
namminneerlutik oqartussaaqataanerannik paasisitsiniutit annertusarneqarnerat
ilutigalugu najugaqartut ataatsimoorlutik eqqaminnik saliisarnerat
ingerlanneqartartup peqataaffigilluarneqartarnera nuannaarutigisariaqartut
ilagilluinnarpaat.
Peqatigiiffiit aamma allat
maligassiuisarput soorlu Paamiuni sunngiffimmi piniartartut aalisartullu
piniariartarfinni eqaloqarfinnilu saliisalernerat. Suliniutit taamaattut aamma
tusagassiuutitigut sammineqarnerusariaqartuupput allanut pitsaasumik
tuniluussinnaagamik.
Taamaattumik Siumumit
isumaqarpugut qujanartumik inuit qaammaasaqariartuinnartut
saligaatsuutitsinissaminnut. Kisiannili puigortariaqanngilaq suli ilaqaratta
pisussaaffimminnik paasinnissimanngitsunik, taamaattumik qaammarsaaneq
suliniuteqarnerlu suli annertusartuartariaqarpoq.
Nammineq kommunerisami tamanna
ajornartorsiutigineqarsimappat KANUKOKA-mit Ava-tangiisinilluunniit
pisortaqarfimmit ikiorserneqarnissamik noqqaasoqarsinnaanera periarfissa-qartinneqartariaqartoq
Siumumit kaammattuutigaarput. Nalunngisarpummi unaammat mande-tiimit aammalu
suliffissaqartitsiniutit tassunga siunertamut atorneqartarmata allamut
siunertamut aamma atorneqarsinnaagunaraluartut.
Kommunit saliinerinnarmut
aningaasarpassuarnik aamma atuisarput, uffa uagut naamineq mingutitsinersuarput
annikillisikkaluarutsigu aningaasat allanut atorluarneqarsinnaagaluartut,
soorlu suliffinnik aamma ataavartunik pilersitsinikkut.
Nunaqarfippassuit eqqagassanut
ajornartorsiuteqarput, ilaatigullumi ikuallaavinnik pilersitsisoqartaraluartoq
ikuallaaviit sananeqaatsimiikkut kukkuneqartarneri pissutaallutik
ilimagisaraluamit ilaat iluaqutaanerminnik tamakkiisumik suli
takutitsinngillat.
Illoqarfinni
ikuallaaveqarfiunngitsuni eqqagassat annertuumik ajornartorsiutaapput
niviugappassuaqarnera allaat erngumatitsilersarluni.Taamaattumik
ikuallaaviliorneq Qaqortumi misiligutaasup iluatsittullu illoqarfinnut allanut
siammapallannissaa pisariaqarluinnarpoq. Ilaatigummi aalisakkat perlukui
mingutitsinerujussuarmik pilersitsisartut allatigut soorlu aamma
fiskemel-iliaralugilluunnit iluaqutiginiarneqarsinnaanerat Siumumit
misissullaqquarput. Aammalu kommunit qanitariit ikuallaavilinnut qanoq
ilillutik eqqagassanik ikioqatigiiffeqarsinnaanertik eqqartortariaqaraat
Siumumit isumaqarfigaarput.
Sumi tamaani aqquserngup
killingini inuit najornerusaanni eqqaavinnik ilioraasarneq aamma
iluaqutaasarpoq kisianni eqqaaviit ammaannaraangata anorlilersorlu igitat
qangaattakaasarput nunamiileqqillutillu. Taamaattumik soorlu
ajussanngikkaluaqisoq nunatsinni namminersortut ilaat eqqaaviliortuuppata
nunatsinnut naleqqussakkanik, taakkulu nunatsinnut tamarmut siam-maallugit.
Dansk Polarcenterip
isumagisartagaasa nunatsinnut nuunneqarnissaat upernaaq Eqqissisimatitsinermi
Ataatsimiititaliami eqqartorsimasarput misissuiffigalugu aallartinneqartoq
Siumumit ilisimavarput, taamaattumik Inatsisartuni ilaasortap Maliinannguaq
Markussen Mølgaard-ip aamma Eqqissisimatitsinermi ilaasortaasup taamatut
kissaateqarnera Siumumit tapersiinnassavarput.
Taamatut Siumumit oqaaseqarpugut
ilaatigut misissugassanik siunnersuutinillu ilaqartillugu, taamaattumik
kissaatigaarput Ataatsimiititaliamit suliareqqinneqassasoq Naalakkersuisunit
suliareqqinneqarlutillu ingerlatinneqaqqiniassammata.
Siverth K. Heilmann, Atassutip oqaaseqartua:
Inatsisartuni ilaasortap
Maliinannguaq Markussen Mølgaard-ip avatangiisitta mingutsaaliornissaa,
siunissamilu sermersuup kommuunillu avataani pisussanut nunatsinniit
aalajangeeqataanerunissatsinnik oqallinnissamik siunnersuutaanut imatut
Atassummiit oqaaseqassaagut.
Siunnersuuteqartup
tunngavilersuutai Atassummiit tunngaviatigut isumaqatigilluinnarpagut, tassami
imaattariaqanngimmat ukiut tamaasa qamutinik motoorilinnik sunilluunniit
atortoqarluni nunarput sinerlugu imaluunniit sermersuaq itivillugu
angalaniartoqalersillugu Qallunaat Nunaanniit akuersissutigineqartuassasut,
tamannalu qaangerneqartariaqarpoq uvagut nammineq Inatsisartuni oqartussaaneq
tigusariaqarparput.
Atassummiit nuannaarutigaarput,
Naalakkersuisut Avatangiisit innarlitsaaliorneqarnissaannik Inatsisartut
peqqussutaata allanngortinneqarneranik Inatsisartut peqqussutaat nr. 14, 31
oktober 1996-imeersup Naalakkersuisut periarfissaqartitaanerat kommuunit
susassaqartut peqatigilluinnarlugit inatsisiliornermut sunniuteqarsinnaanerat
nangillugu nunatsinni kommuunit taaneqareersut saniatigut sinneruttut ukiup
affaata tulliuttup ingerlanerani nalunaarusiorfigineqarniarmata.
Ukiut ingerlanerini pingaartumik
tusagassiuutit aqqutigalugit tusartaannarpagut, ukugooq nunatsinni
ilisimasassarsiortut allatulluunniit siunertaqarlutik angalanerminnik
ajornartorsiortut, ajunaalernermik kalerrisaarisut il.il. Angalanissanik
akuersissuteqartartut akuersissuteqarnerminni pingaartinnerpaasarsimagunarpaat
angalanermi ajutoorsimanissamut sillimmasersimanissamut akiliisimanissaq,
pingaarnerutinnagu ujaasinerit annaassiniarnerilluunniit qanoq
ulorianartorsiorfiutigisarneri imaluunniit qanoq inuiaqatigiinnut
akisutigisinnaaneri.
Taamatut oqaaseqarluta Atassummiit
siunnersuuteqartoq aammalu Naalakkersuisut avatangiisit
innarlitsaaliorneqarnissaannik Inatsisartut peqqussutaata tamakkiisumik
nunatsinniit oqartussaaffigineqalernissaanut Atassummiit isumaqataanerput
nalunaarutigaarput.
Nunatta eqqiluitsuutinnissaa tikikkuminartuunissaalu
siunertaralugu nuna tamakkerlugu ulloq aalajangersimasoq sulinani
saleersuaqatigiittarnissamik Inatsisartuni ilaasortap Maliinannguaq Markussen
Mølgaard-ip siunnersuutaanut tunngatillugu Atsssummiit siunnersuuteqartup
tunngavia paasilluaraluarlugu oqaatigerusupparput Naalakkersuisut
tulluartuusorinninnginnerat aamma uvagut Atassummiit taamatut
isumaqarfigigatsigu.
Inatsisartuni ilaasortap
siuunnersuuteqarnermini oqaatigivaa, nunarput eqqiluitsutut avammut
nittarsaanniartaripput tulluusimaarutigisarippullu, tamannali tamatigut
ilumoortuunnginneranik siunnersuuteqartoq oqaaseqarnera Atassummiit
ilumoornerassavarput.
Nammineq illoqarfigisarput
nunaqarfigisarpulluunniit Kommunalbestyrelsini eqqagassalerinermut
aalajangersagaareersut malitsinneqarnissaannut innuttaasugut tamatta
piumassuseqarnerusariaqarpugut. Oqaatigineqareersutummi kommuunerpassuit
nunaqarfinnilu aqutsisut pingaartittarunaqaarput aningaasanut
missingersuusiornitsinni pingaartumillu upernalerneraniilli apinissaata tungaanut
illoqarfinni nunaqarfinnilu saliinermut aningaasanik immikkoortitsisarluta,
ilami pingaartittaqigatsigu nunagisatta saligaatsuunissaa.
Saligaatsuunissamillu
pingaartitsigaluarluni miserratigineqarsinnaanngilaq ilaatigut illoqarfiup
nunaqarfiillu iluini kommuunit eqqaavigineqarsinnaasunik amigartunik
inissiisarmata, aammalu ajornartorsiutaasarmat illoqarfiup nunaqarfiulluunniit
avataasigut eqqaavissuarnik taaneqartartuniik igitat anorimik
teqqakalaartarnerat.
Taamaattumik Atassutip
tapersersortuarpaa anguniartuassallugulu illoqarfiit nunaqarfiillu suli
ikuallaasarfitsigut inerisartittuarneqarnissaat, kiisalu ikuallaasarfeqarnikkut
kiak pilersitaq kiassarnermut atorluarniarneqarnissaata pimoorullugu
pilersaarusiorluarnikkullu anguniarneqartuassasoq.
Sinerissami inissiarsuarnik
peqatigiiffiit pilersiortorneqarneranni aammalu angerlarsimaffiit nammineq
pigineqartut kiisalu suliffeqarfiit assigiinngitsut nammineq najugarisamik
eqqaanni kusassaanarnerittakujuminarsaasarnerallu takussaaleraluttuinnarput,
taamatullu ineriartorneq maligassiuineruvoq kusanartoq,
paasisitsiniaajuarnissarli pingaaruteqartuassaaq.
Nunani allani ilaatigut
inigisamik pisortalluunniit pigigaluarpatigit qanoq saligaatsuunissamik
pingaartitsigisoqarnera takunngitsoorneq ajornartarpoq, taamaattumik
paasisitsiniaanermut ilanngullugu TV-ikkut takutitaqartoqartarnissaa
kajungilersitsiniarnermut aqqutissat ilagilluassavaat. Imaanngilaq nunatsinni
taamaattoqanngitsoq, periarfissat suulluunniit isumassarsiorfigineqarsinnaasut
oqallinnermut ilanngullugit eqqartortuartariaqarpagut. Soorlumi aamma
nunaqarfitta ilaanni Napassumi qanoq nunaqarfigisamik kusassarnissaannut
pingaartitsisoqartigisoq uagut nalunngikkipput.
Taamatut oqaaseqarluta
Atassummiit Naalakkersuisut saleersuarnissamut nuna tamakkerlugu
sulinngiffeqartitsinissaq Naalakkersuisut isumaannut Atassummiit
isumaqataanerput nalunaarutigaarput, kajumissaarutigissalluguli
eqqiluitsuunissamik illoqarfinni, nunaqarfinnilu oqallinnerit
paasisitsiniaanerillu ingerlaajuassasut.
Lars Sørensen, Inuit Ataqatigiit oqaaseqartuat:
Inuit Ataqatigiit Inatsisartunut
ilaasortaq Maliinannguaq Markussen Mølgaard-ip nunatta eqqiluitsuutinnissaa
tikikkuminartuunissaalu siunertaralugu oqallisissamik siunnersuummik
saqqummiussaqarnera ilassilluarparput, nalunngikkaluarlugu maannakkut
eqqagassalerineq aamma maanniinnarmiittunik eqqagassalerineq
kommunalbestyrelsit ataasiakkat akisussaaffigigaat.
Ilumoorpoq saligaatsuunissaq
inuit pisortalluunniit ataasiakkaaginnat kisimik
akisussaaffigisariaqanngimmassuk, pingaaruteqarluinnarpoq tamatta
akisussaaqatigiilluta nunatta eqqiluitsutut avammut nittarsaannisaanik
suleqatigiinnissarput.
Qujanarpoq ulloq manna tikillugu
illoqarfinni nunaqarfinnilu amerlaqisuni pingaartumik upernaakkut
ataatsimoorluni saliisarneq kunasartumik ileqquliunneqarsimammat, tamannali
naammagimmat Inuit Ataqatigiit kommunini avatangiisit iliuusissat pillugit
pilersaarusiortunut Avatangiisinut Pinngortitamullu pisortaqarfimmit
KANUKOKA-millu suleqataaffigineqartumut kaammattuutigissavarput nunarput tamakkerlugu
ataatsimut iliuusaasinnaasunik suliniuteqaqqullugit illoqarfinni nunaqarfinnilu
assigiinnerusumik periuseqartoqarnissaa siunertaralugu.
Naluneqanngitsumik
kommuuneqarfiit illoqarfimminni nunaqarfimminnilu skolebestyrelsit
suleqatigalugit avatangiisitta mingutsaaliornissaanik suliniuteqartut aamma
amerliartuinnarput, taamatut suliniuteqarnerit kommuneqarfinniit tamanit
peqataaffigineqarnissaat kaammattuutigisariaqarpoq. Maannakkut
nalinginnaavallaaleqaaq assersuutigalugu niuertarfimmi puulinnik
mamakujussigutta imaluunniit sikusigutta taava eqqarsanngilluinnarluta puukua
maangaannaq igissavarput, taamatut ileqquliussaqarnivut skolebestyrelsit
suleqatigalugit allangortinneqarsinnaasutut isigaavut. Minnerunngitsumillu
aningaasarsiornikkut ukiuni makkunani nunatta avammut takornariaqarnikkut
eqqiluitsutut nittarsaaffigileruttorfiani tamatta akisussaaqatitiinnerput
takutittariaqarparput.
Inuit Ataqatigiit aamma
arajutsisimanngilarput ukiuni kingullerni pingaartumik kommuunit kujataani
suleqatigiit Islandimi illoqarfittut ikinngutitik suleqatigalugit
nunagissaanissamik pikkorissaanerit aqqutigalugit illoqarfitsik
takujuminartuunissaanik tikikkuminartuunissaallu pillugit suliniuteqarnerat
ingerlalluarmat. Taamatut suliniuteqarneq kommuuninit amerlanernit
peqataaffigineqarnissaa aamma kaammattuutigissavarput. Islandinimiummi
uagutsituulli isittumi najugaqaramik ukiorpassuarni nunagisaminni
nunagissaanermik tikikkuminartuunissamillu misilittagaat suleqatigiinnitsigut
atorluartariaqarpavut.
Inuit Ataqatigiit isumaqaratta
nunatta eqqiluitsuutinnissaata tikikkuminartuunisaatalu siunertaralugu
suliniuteqartuartariaqartugut aammalu piffinni ataasiakkaani kommunit
assigiinngitsorpassuarnik misilittagaqarmata kaammattuutigissavarput KANUKOKA
aqqutigalugu misilittakkat tunngavigalugit paarlaateqatigiinnissamik
siunertalimmik eqqartueqqullugit.
Maliinannguaq Markussen
Mølgaardip avatangiisitta mingutsaaliornissaa siunissamilu sermersuup
kommuunillu avataani pisussanut nunatsinniit aalajangeeqataanerunissatsinik siunnersuutaa
Inuit Ataqatigiit tunngaviusumik taperserparput.
Nuannaarutigalugu
maluginiarparput Naalakkersuisut Inatsisartut siusinnerusukkut oqallittarnerat
tunngavigalugit maannakkut nalunaarutit peqqussutillu aqqutigalugit suliniarneq
aallartissimamassuk.
Tamatumani
pingaaruteqarluinnarpoq nalunaarutit peqqussutillu suliarineqarnerani kommunit
qanimut suleqatigilluarnissaat, puigornagit aalisarnermik piniarnermillu
inuussutissarsiuteqartut, takornariaqarnermik suliaqartut assigiinngitsut aamma
taakku misilittagaat ilanngullugit. Taakkuuppummi aamma avatangiiserput
ataqqillugu mingutsinnaveersaarlugulu kingulissatsinnut ingerlateqqikkusutaat,
taamatuttaaq aamma nuannaarniutinik atuinitta killilersimaarneqarnissaat
qangali kissaateqartut, ilaatigut piniakkatik aamma illersorneqarnissaat
eqqissisimatinneqaratarnissaallu aamma soqutigisarigamikku.
Inuit Ataqatigiit
Naalakkersuisunut kaammattuutigissavarput illoqarfiit nunaqarfiillu killingisa
avataani angallanneq pillugu nalunaarusiortoqartillugu mingutsisineq
pinaveersaartinniarlugu maleruagassanik aqukkuminartumik aammalu aningaasanik
malitseqassappata ilanngullugit kommuunit pineqartut eqaatsumik
periuseqarfigeqqulugit.
Inuit Ataqatigiinnit
qilanaaraarput nunatsinni kommunit tamarmik ukiup affaata tulliuttup
ingerlanerani nalunaarusiorfigineqartussaammata, taamaaliornikkut avataanni
nunaannarmi motorillit atorlugit angalanneq sunaluunniit kiisami
inerteqqutaalissammat, taamaasilluni Naalakkersuisut siunissami
tassaalersussaapput assersuutigalugu sermersuaq qarsullugu
ilisimassassasiorniartunik immikkut akuersissuteqartartussat.
Inuit Ataqatigiit isumaqarpugut
ilisimasassarsiornerit pillugit oqartussaaffiup Kalaallit Nunaannut
Ministeriaqarfiup atorunnaarsinnerata kingorna Dansk Polarcenter-imut
nuunneqarsimanerata allanngortinneqarnissaa siunertaralugu Naalakkersuisut
suliniuteqassasut akisussaaffiup tamakkiisumik nunatsinnut nuunneqarnissaanut.
Taamatut oqaaseqarluta
Inatsisartunut ilaasortap Maliinannguaq Markussen Mølgaard-ip siunnersutai
marluusut Inatsisartut Avatangiisinut Eqqissisimatitsinermut
Ataatsimiititaliaani eqqartoqqinneqarnissaat innersuussutigaarput.
Mads Peter Grønvold, Kattusseqatigiit oqaaseqartuat:
Inatsisartunut ilaasortap Maliinannguaq Markussen Mølgaard-ip siunnersuutaa Kattusseqatigiinnit imatut oqaaseqarfigissavagut:
Kattusseqatigiinniit nunatta eqqiluitsuutinnissaa aammalu tikikkuminartuunissaanut oqaluuserisassatut siunnersuutit soqutigalugit misissorluarsimavagut.
Kattusseeqatigiinnit isumassarsiaq pitsaasutut isigaarput, taamaatumik pisariaqalerpoq ullormik aalajangersimasumik nuna tamakkerlugu saleersuaqatigiittarnissamik isumap tapersersornissaa.
Kattuseqatigiinniit arajutsisimanngilluinnarparput illoqarfiit nunaqarfiillu ilaanni eqqiluitsuutitsinissamik ilaatigut annertuumik pisariaqartitsisoqartoq, aammalu illoqarfiit avataanni soorlu asiartarfinni, eqalunniartarfinni illuaraqarfinnilu, illuaraqarfiillu ilaanni.
Maannakkut illoqarfinni nunaqarfinnilu arlalinni, immaqami illoqarfinni tamani upernalernerani annertuumik saliisoqartaraluarpoq, kisiannili illoqarfinni saliisoqartillugu inuit peqataasinnaasut killeqangaatsiartarput, taamaattumik pisariaqarpoq ullormik aalajangersimasumik saleersuaqatigiittarnissamik aalajangiussinissaq, soorlu sapaatip akunnera naanerani sulinerit innarlinngikkaluarlugit.
Kattusseqatigiinniit isumaqarpugut saleersuaqatigiittarnissami sulinerit innarlinngikkaluarlugit suliffeqarfiit piumaffigineqartariaqartut ullormi tassani suliffeqarfiup eqqaa salinneqassasoq.
Kattusseqartigiinnit pingaartilluinnarparput nunatsinni avatangiisitta minguitsuunissaa, taamaattumik pisariaqarpoq ilisimasassarsiortoqarniartillugu imaluunnit sermersuaq qarsullugu angalaniartoqartillugu Naalakkersuisut akuersissuteqannginnerminni Inatsisartut Avatangiisinut Ataatsimiititaliaanut tusarniaasarnissaat Kattusseqatigiinnit kaammattuutigissavarput.
Taamaaliornikkut tamanut naammaginarnerusumik aaqqiissoqarnissaa qulakkeqqullugu, tassami assersuutigalugu upernaaq inatsisartut ataatsimiinnerata nalaani avatangiisinut naalakkersu-isumut apeqquteqaatigisimavarput sermersuakkut biilerluni itivinnermut/ituinnermut kikkut aaliangiisuusimanersut aammalu qanoq iliortoqarsinnaanersoq. Paasitinneqarpugulli sermersuakkut ituinniarnermi Dansk Polar Center-ip aaliangiiffigisaraa, taamaattumik Dansk Polar Center-ip oqartussaaffia nunatsinnut nuunneqartariaqartoq Kattusseqatigiinnit kaammatuutigissuarput, tassami nunatsinni oqartussaasut qulaatiinnarlugit Qallunaat Nunaanniit aaliangiisarneq pissusissamisuunngimmat. Taamatut oqaaseqarluta siunnersuut Inatsisartut Avatangiisinut ataatsimiititaliaannut oqaluusereqqullugu inassutigaagut.
Alfred Jakobsen Avatangiisinut Peqqinnissamut Ilageeqarnermullu Naalakkersuisoq:
Siullermik naalakkersuisut sinnerlugit qujassutigissavara partiit oqaaseqartuisa aammalu Kattuseqatigiit oqaaseqartuata ukununnga oqaluuserisassanut imaluunniit siunnersuutinut marlunnut oqaaserisai pillugit. Tassalu oqaatigissavara uani sermersuaq imaluunniit oqaluuserisassaq nr. 52 sermersuarmik qarsutsilluni angalasarnermut tunngasoq.
Taassumunnga tunngatillugu erseqqissaatigissavara uani ilaatigut paatsuungassuseqarpaluttumik partiit aammalu Kattusseqatigiit oqaaseqartuisa oqaaseqarnerat imatut erseqqissaateqarfigilaassavara tassami naalakkersuisut maannakkut peqqussut 1996-miit uani akissutinni taakkartugara tassalu nr. 14 31. oktober 1996-meersoq taanna aqqutigalugu maannakkut kommunit suleqatigalugit illoqarfiit nunaqarfiillu killeqarfiisa avataanni nunaannarmi nalunaarutit assigiinngitsut maannakkut atuuttussanngortinniarlugit suliarigatsigit, taavalu taakkua nalunaarutit atorlugit taamaalilluta naalakkersuisuninngaanniit taamatullu aamma Inatsisartuninngaanniit ilaatigut sorlu sermersuaq qarsullugu angalasinnanermut imaluunniit angalarusuttut qinnuteqartarneri pillugit isummersinnaasuserput tassuuna angusinnaassagatsigu.
Taamaammat kommunit uani suleqatigineqarnissaat pingaaruteqarpoq aamma kommunit tassa- ni qitiulluinnartumik inissisimasuunerat taama erseqqissaatigerusuinnarpara aallaqqaammut. Taavalu partiinut aamalu Kattuseqatigiit oqaaseqartuinut ataasiakkarlugit imaalillugit oqaaseqarfigilaassuakka.
Siullermik Simup oqaaseqartuanut Ruth Heilmann-imut qujassutigissavara partiip aamma pingaartimmagu Nunatta minguitsutittuarnissaa aamma partiip nammineerluni aamma taanna pingaartitaralugu eqqaammagu, kiisalu aamma eqqaavaa kingornussagut taakkua aamma sapinngisamik mianeralugit inujuarnissatsinnik oqariartuuteqarnera aammalu malugaara ullormik ataatsimik sulinngiffeqarluni saleersuartitsisarnermik siunnersuuteqarnermut naaggaartut.
Tassungattaaq aamma maluginiarpara Atassutikkormiut oqaaseqartuat aamma taamatut isumaqartoq. Kiisalu aamma qujassutigissavara Siumup oqaaseqartuata kaammattuutigimmagu inuit namminneq pisussaaffigimmassuk eqqagassanik isumaginninnerit, taamatullu aamma kaam-mattuutaammat eqqaasaalu tassalu sinerissami innuttaasut namminneerlutik imaluunniit peqatigiiffiit allatigulluunniit nunaqqatigiikkuutaat ikioqatigiillutik upernaat tamaasa taamatut nunaqarfimminni illoqarfimminniluunniit ikioqatigiillutik saliisarnerat saqqumilaarnerusumik ilaatigut aamma tamakkua immaqa tusagassiutitigut isiginnaarutitigulluunniit sammineqarsinnaanerat taanna aamma kaammattuutigimmagu.
Kiisalu Siumukkormiut oqaseqartuanut oqaatigissuara ikuallaaviit maannakkut sinerissami atorneqalersut assigiinngitsutigut ajornartorsiuteqarsimammata aallaqqaataaniit tassalu ajornartorsiutit ilaatigut taakkua nalakkersuisuniit misissuiffigaagut ataasiakkaarlugit qanoq sutigullu ajornartorsiuteqarneri nalunaarsorlugit. Tamannalu qanittukkut nalunaarsuineq suliaralugu naammassinissa naatsorsuutigaarpput, kisianni ilisimatitsissutigilaaginnassuara nunaqarfinni ikuallaaviit pilersinneqaraangata taava isumagineqarnissaat kommuniminngaanniit isumagineqalertartussaammat. Taavalu kommuni qaqugukkulluunniit ikuallaaviup isumagineqarneranut tunngassuteqartunik arlaatigut pisariaqartitsinertik tunngavigalugu pisortaqarfimmut qaqugukkulluunniit saaffiginnittarsinnaammata. Tamatumanilu aamma pisortaqarfik piareersimajuarpoq assigiinngitsutigut siunnersuinissamut ammalu ikiuunnissamut.
Taavalu aamma Ruth-ip Siumukkut oqaaseqartuata eqqaava soorlu eqqaaviliortoqarsinnaasorluunniit immaqa nunatsinnut naleqqunnerusumik, isumaqarpunga aamma taanna misissugassaqqissuusoq aamma nammineerluni oqaatigivaa ataatsimiititaliamut ingerlateqqinnissa kaammattuutigalugu. Taavalu Atassutip oqaaseqartuanut Sivert K. Heilmann-imut qujassutigissuara uani naalakkersuisut sinnerlugit akissutigisannut isumaqataanerit qujanarmat, taavalu aamma nammineerluni uparuarpaa ilaatigut nunaqarfinni illoqarfinniluunniit ataasiakkaani eqqaavigineqarsinnaasut amigartarnerat, tamannak aamma isumaqarpunga matumuuna kaammattugissallugu eqqaasitsissutigissallugulu iluartuusoq.
Kiisalu Siivartip aamma oqaatigivaa ikuallaaviit atorluarlugit soorlu erngup kissartup ilaatigut kiassaanermut atorneqarsinnaaneranut. Tamakkua eqqaallugit isumaqarpunga aamma taanna isumaq misissugassaqqissuusoq, kisianni oqaatigiinnassuara aamma illoqarfinni ataasiakkaani angisuuni soorlu ikuallaaviit qanoq annertutigisumik ukioq kaajallallugu ikuallatassanik ikummatissanik peqarsinnaanerat aamma uani apeqqutaasinnaammat imermut kiassaasinnaasumik atortulersuinissamut, tassalu ruujorilersuilluni allatigullu erngup aqqutaanik nunagissaalluni sanaartornerup aningaasartuutigineqarnerata illuatungaani kiassaanikkut pissarsiarineqarsinnaasoq qanoq imminnut akilersinnaassusaat tassani aamma apeqqutaalluinnartussaammat. Taamatullu aamma qujassutigerusuppara paasititsiniaanerit ingerlajuarnissaannik uannut kaammatuinera.
Taavalu Inuit Ataqatigiit oqaaseqartuannut aamma Naalakkersuit sinnerlugit qujarusuppunga erseqqissaatigeqqimmagit taassuma tamatta akisussaaqatigiilluta nunatta eqqiluitsutinnissaa peqataaffigisariaqaripput aammalu uani kaammattuinera ilaatigullu eqqaasaqarnera tassalu atuarfinni ataasiakkaani siulersuisut ilaatigut aamma peqataallutik meeqqat qanoq eqqiluitsuu-nissamik pissuseqarsinnaanerannik tunngasunik suleqataanerat qujanartuuvoq. Kiisalu Laasip aamma Inuit Ataqatigiit sinnerlugit oqaatigivaa Kanukoka kaammattorneqarsinnaasoq soorlu sinerissami taamatut saligaatsuunissamik imaluunniit eqqiluisaarnermik suliniutit misilitttar-neqartut pillugit imminnut paarlaateqatigiittarsinnaanerit taakkua misissorneqarsinnaasut imaluuniit aqqutaasinnaasut.
Illoqarfiit nunaqarfiillu killeqarfiisa avataanni nunaannakkut motorilinnik angalasarnerit pillugit erseqqissumik maleruagassanik aqukkuminartunik naalakkersuisut uagut pilersitsisariaqar-nitsinnik imaluunniit ineriariartortittisariaqarnittinniik aamma kaammattuinera pillugu oqaa-tigissavara tassa maannakkut peqqussut taanna oktober 14. 1996-meersoq avatangiisit mingutsaaliorneqarnissaannut tunngasoq, taanna aqqutigalugu nalunaarutit maannakkut pilersiortorneqartut taakkua iluanniipput qanoq ilinikkut naalakkersuisut arlaatiguta akuersisariaqarnerannit imaluunniit matutitsigallartariaqarnerannilluunniit inerteqqutitsissutigisariaqarnerannilluunniit tunngaviliisut.
Taamaattumik taakkua nalunaarutit imarisaatigut qanorpiaq nunatsinnut maannakkut ukiunut pissuttinut atuuttunut naleqquttiginerat takulaarallartigu taavalu kingusinnerusukkut immaqa naliliisinnaalluassuugut sutigut killiliinerit pitsanngorsaqqittariaqarnersut imaluunniit sukateqqittariaqarnersut. Taava aama Inuit Ataqatigit oqaaseqartuata kaammattuutigivaa uumap siunnersuutit marluussut taakkua avataangiisinut eqqissisimatitsinermullu ataatsimiititaliamut ingerlatinneqarnissaat.
Taavalu naggataatigut Kattusseeqatigiit oqaaseqartuanut tassa Mads Peter Grønvold-imut uani maluginiarpara Mads-ip ullormi aaliangersimasumi saleersuaqatigiittarnissamik aaliangiuussinissaq Kattusseqatigiit isumaqataaffigigaat, kisianni tassa malugisinnaavara maannakkut inimi maani amerlanerussuteqartut taamatut ullormik aalajangersimasumik ullormik ataatsimik ukiumut sulinngiffeqarluni saleersuaqatigiittarnissamut atugaqarnissaq akerliliiffigigaat, taavalu taamalillugu naggataatigut erseqqissaatigilaaginnassavara partiit aamma Kattusseqatigiit oqaaseqartuinut qujagama.
Maliinannguaq Markussen Mølgård siunnersuuteqartoq, Inuit Ataqatigiit:
Qujavunga oqaaseqartunut aammalu isummanut saqqummiussuunneqartunut, tassa una isuma ilaatigut nalunngilara taamatut sulinngiffeqarluni saleersuaqatigiittaarnissamut tunngasoq imaaliallaannarlugu akuerineqarnavianngitsoq, aamma nalunngilluinnarpara soorlu siunner-suutinni oqaatigigiga kommunit tassani oqartussaasut aammalu isumaginnittussaasut inatsisit malillugit. Kisianni tassa aallaavia nassuiaateqafigilaassuara.
Tassa siullermik siorna Iginniarfiimi nunaqarfimmi aqutsisut Inatsisartunut allagaqarnikuupput taamatut ilusilimmik siunnersuuteqarlutik apuusseqqullugit. Taannali uanga uninngatikkallarsimavara ilaatigut taanna kommunit oqartussaanerat pissutigalugu. Taavali aasap ingerlanerani ilaatigut aalaterneqaatinnik timmisartortartup saaffigisimavaanga nunani allamiunik takornarianik angallassisartup kanngusulluni nunarput ipeqaruttormat pinngortitami angallassinermini nammineq nunami allamiut uparuartorsimagaat aaligooq nittarsaakkipput kusanartutut.
Taamatut oqarfigineqarluni nunami allamiuminngaanniit annernarpoq, taamaattumillu eqqarsaatigilersimavara una siunnersuutigineqartoq, soormi misiliinianngilagut uagut pisussaaffik pisortanut tunniutiinnarnagu kisianni inuiaqatigiittut ataatsitut perorsaaqatigiinnertullusooq ilillugu saleersuaqatigiinnissamik aaqqissuussilluta. Katersuiniartarpugut ilaatigut ulloq ataaseq atorlugu kaattunut imaluuniit sorsuttunut, taavalu tassani pilersinneqartarpoq nukerujussuaq angusallu annertusarlutik.
Taamaattumik taamatut ilusilerlugu nuna tamakkerlugu aamma TV-kut immaqa malinnaaffigineqartumik iliuuseqarsinnaanissaq takorloorsimavara. Ilaatigut nalunngikkaluarlugu immaqa suliffeqarfiit kissaatigissanngikkaluaraat imaluunniit sulisoqarnikkut pissutsit tassani nalunartoqaraluartut kisianni namminersortut aamma eqqarsaatigalugit, kisianni namminneq piumassutsiminnik qanoq iliuuseqarsinnaanertik naalakkinngikkaluarlugit immaqa kaammattorneqarsinnaagaluarput aamma nalunnginnatsigu nunanut allanut pigaagatta eqqiluisaarnissaq aammalu silatit illup silataasa illorsuit igarsuisa imaluunniit suliffeqarfiit iigaasa kusanartuutinnissaannut immaqa aama sulisut namminneq peqataasinnaanerat sooq suliffissuit karsersuussappat pinnersarneqanngivillutik.
Soorlu tamakkua eqqarsaatersuutigineqarsinnaapput immaqa kulturitsinnut tunngasumik qanoq kusassarlugillu iliuuseqartoqarsinnaavoq aamma eqqarsaatigalugu massakkut kusanartumik nuannersumillu maani Nuummi apummik eqqumiitsuliortartut eqqarsaatigalugit - suliffeqarfiit assigiinngitsut taamaaliortarput. Kisianni ajoraluartumik taakkua suliaat maanaannartarput aattaramik. Immaqa ataavartussanik uffa ataatsimoorussamik iliuuseqarnittigut illoqafiit pinnersarsinnaarsuugaluarigut qalipaanikkut imaluunniit arlaatigut ujaqqanik eqqumiitsuliornikkut, inuit piginnaanernik ulikkaartut takusinnaavagut taamatut iliuuseqarnerit maani apummik eqqumiitsuliorneq eqqarsaatigalugu, soorlu tamatuma takutikkaa.
Taanna taamatut aallaveqarpoq aammalu nuannaarutigivara oqallisigineqarmat aamma ilimagilluinnarsimavara taamatut akineqarumaartoq. Kisianni isumaqarpunga tassunga uniinnarani pimoorussamik aamma oqallinneq ingerlaqqittariaqartoq; ilaatigut immaqa oqartoqarsinnaa-galuarpoq ukioq ataaseq nunarput tamakkerlugu nunatta eqqiluitsuutinnissaanut ukiuanik taasinnaagaluaripput, taavalu taanna ukioq ulloq ataaseq atorlugu ukiumi tassani ataatsimi saleersuaqatigiittoqarsinnaagaluarpoq. Imaanngitsoq ukiut tamaasa ingerlasussamik - kommunit soorunami namminneq aaqqissuutissuaat qanoq iliuseqassanerlutik, kisianni ataatsimoorussamik iliuuseqarnissap kimia immaqa tassani anguneqarsinnaagaluarpoq taavalu siunissami qanorpiaq ingerlateqqinnissa takorloorneqarsinnaalluni. Uanga uani partiit oqaaseqartuinut qujavunga Kattusseqatigiit tapersiinerannut - aammalu una immaqa suliffeqarfiit innarlinngikkaluarlugit qanoq iliuuseqarsinnaanissaq taanna aamma isumaqatigalugu maani tusarliunneqartoq eqqarsaatigalugu.
Taava uunga aappaanut, tassa sermersuaq ituillugu - angalasarnerit eqqarsaatigalugit 1996-mit inatsit atuutilersoq ilaatigut inatsisartuni maani oqallittarnitsinni sukaterinissat avatangiisit migutsaaliornissaat eqqarsaatigalugu sukaterinissat annertuumik oqallisigisarsimavagut taavalu taakku aallavigalugit peqqussutit ingerlanneqarsimallutik. Maannamut misilittakkat eqqarsaatigalugit assersuutigiinnarsinnaavarput ilaatigut Sisimiut kommunalbestyrelsiata naammagittaalliutaa namminneq Kangerlussuup tungaanut qamuteralaat aqquteqannginnissaannik kissatigisaa amerlanerussuteqarlutik kissatigisartik tusarniarneqanngimmat; taanna assorujussuaq mamiagimmassuk soorunami paasisinnaavarput aamma ilaatigut taamatut ileqqoreqqusaliornermi imaluunniit peqqussusiornermi inatsisartuninngaanniit oqariartuutitsinni siunertarisimanngikkaluaratsigu inatsisit sakkukillinissaat, kisianni illuatunganiit avatangiisit illersornissat pillugit sakkortu-sinissaat siunertarisimallugu.
Taamaattumik tamakku eqqarsaatigalugit aammalu assersutitut taasinnaavara uagut nammineq kommunitsinni ukiut marlunngulerput sukateriniarluta taamatut inatsimmik nutaamik pilersitsigatta. Kisianni ulloq maana tikillugu pisortatigoortumik atulinngitsumik ilatigut patsisigineqarluni utaqqineqarlunigooq Qeqertarsuamiit Aasiannut Qeqertarsuarmiillu Ilulissanut aqqummik pilersitsisariaqaratta. Qanoq ililluta aqqusiorsinnaagatta ilaatigut imarsuaq sikulu aalaakkaaneq ajortoq aammalu pisariaqartinneqanngitsoq kommunimiit ingammik piniartuniit kissatigineqan-ngilluinnartoq qilalukkat angalaarfissuarimmassuk. Taamaatumik isumaqarpunga avatangiisinut ataatsimiititaliami oqaluuserineqartariaqaartoq - taassani taassuma inatsisip ilumut taanna kissaatigineqartoq tunngavigalugu ingerlanneqarsimanersoq, aammalu sukkut equngassuteqarnersoq misissussallugu pisariaqartoq. Qujavunga aamma neriuppunga oqallinneq ingerlaqqikkumaartoq. Akissuteqartunut tamanut qujavunga.
Ruth Heilmann Siumup oqaaseqartua:
Siusinnerujussuakkut aamma
nalunngilara siunnersuuteqartoqartartoq taamatut nunatta
eqqiluitsuutinneqarnissaa pillugu, kisiannilu allakkatigut
akineqaannartarsimapput tassami kommunip pisussaaffigimmagu
eqqiluitsuutitsinissaq tassanilu aalajangersakkani amma taamatut
allassimasoqarluni. Uanilu massakkut oqallisigineqartumut tunngatillugu
ilaatigut uanga immaqa Siumuminngaanniit paatsuunganalaartumik uani
oqaasertalersimavarput. Ilumoorpoq ullormik ataatsimik sulinngiffissamik
pilersitsisoqarnissaanik taanna Maliinannguup siunnersuutaa, uagut
Siumuminngaanniik ilalernartuutinngilarput, tassami soorlu kaattusseqatigiit
oqartut imatut, sulinerit innarlinngikkaluarlugit aamma ingerlanneqartareermata,
aammalu ingerlanneqartarnerat taanna ilaatigut sungiunneqarnikuulluuni.
Taamaattumik taanna
pissusissamisoorsorinngilarput soorlu aamma naalakkersuisut taamatut
tunngavilersuutaat Siumumiit isumaqatigalugu oqaaseqartugut. Tassa uani
ilaatigut naalakkersuisup akissuteqaataani imaluunniit oqaaseqaataani Aasianni
taamatut nersornaasiinermi aamma peqataasimanera isumaqarpunga illoqarfinnut
allanut aamma tuniluuttariaqartoq tassami pingaruteqarpoq taamatut
suliniuteqarsimasut aamma nersorinninnermik tunissuteqarfigissallugit ilaatigut
aamma Ataasutip oqaatigaa Napasumi eqqiluisaarneq qanoq pitsaatigisumik
massakkut ingerlanneqartoq. Aamma taanna maligassiusuuvoq tamakkulu
eqqumaffigineqartuuppata aamma qangalili nersornaasikkanut aamma Napasoq ilanngunneqarsimasinnaagaluarpoq.
Taamaattumik allat aamma
eqqarsaatigalugit neriuppunga aamma taamatut naalakkersuisoq
iliuuseqartarumaartoq nunaqarfiit aammalu illoqarfiit allat eqqarsaatigalugit.
Uani akissuteqarnerani naalakkersuisup amigaatigivara oqaatigineqanngimmat
oliakut nappartakorsuillu qanoq iliorniarneqarnersut aammalu suli Per Rosing
Petersen-ip aamma taanna apeqquteqaataa suli akineqarsimanngilaq; ilaatigullu
aamma siusinnerusukkut taamatut oqallinnissamik kissaateqartaraluarnermik
allakkatigut aamma akineqarnikuuvoq naalakkersuisut suliniuteqarniartut
umiarsuarmik sinerissami eqqagassarsuarnik anginerusunik
arrortinneqarsinnaanngitsunillu katersuisitsinissaminut.
Tamakku suliat sumut killinnersut
ingerlatinneqaqqissimanersullu assorujussuaq Siumumin-ngaanniit
paaserusukkaluarparput. Uani aama oqaatigisariaqarpoq, nunaqarfinni aqutsisut
tassani annertuumik pisinnaatitaaffeqarput kommunalbestyrelsip
pisinnaatitaaffilerpagit nunaqarfinni aqutsisut namminerlutik aamma
aningaasanik aqutaminnut qanoq illoqarfimmik imaluunniit nunaqarfimmik
saligaatsuutinneqarnissaa aamma tassani pingaarnersiuinermi namminneerlutik
aaqqissuusinnaavaat. Tamannalu periarfissinneqarsinnaavoq kommunalbestyrelsip
tungaanin-ngaanniit. Aamma uani IA-p oqaatigisaa - neriuppunga mamakujuit
puukuinik maangaannaq eqqaasassanngitsugut. Uani taamatut paasineqarsinnaasumik
ilaatigut oqaatigineqarmat aammalu isumaqatigilluinnarpara skolebestyrelsit
aqqutigalugit aamma paasititsiniaaneq annerusoq pineqartariaqartoq, kisianni
uagut qinikkat tassaavugut maligassiuussisussat pingaarnerpaat. Aammalu uani
angajoqqaat inersimasullu aamma maligassiuinissaat tassani annertoorujussuarmik
pisussaaffigaarput. Uagut qanoq iliuuseqanngikkutta meeqqatta
ilaartuassammatigut.
Lars Karl Jensen Siumup oqaaseqartuata saniatigut:
Uani oqaluuserissassami
saqqummiisup illoqarfiit aammalu nunarput tamaat pillugu qanoq
iliuseqartoqarnissaanik kaammattuutaa taanna aallavigalugu isumaqarpunga
naalakkersuisup nunarput tamaat ataatsimut isigalugu oqaaseqaataani amigaateqartoq.
Uani eqqaasitsissutigissavara naalakkersuisut siulerisassi angusarinikuuat
aammalu inatsisartunut neriorsuutaareerluni Qallunaat Nunaanni
ministeriaqarfiit ilaat aalajangersimasoq arlaat suleqatigalugu soorlu
makkuninnga umiarsuarnik kiviinnarnikunik - maannakummi Nuup avataatunginnguani
kanani qeqertani umiarsuit iliveqarfiannik taaguuteqartoqalernikuuvoq -
saliginissaq aammalu mittarfeqarfiit loranstationeqarfiillu qimaannakkat
eqqagassaataannik saliginissaq taanna naalakkersuisutigoortumik qanoq ilillugu
sulissutiginiarneqarnera ingerlateqqinneqassanersoq taanna
eqqaasitsissutigiitigalugu apeqquteqaatigivara.
Isumaqarama maannakkut nunatsinni
taama ittut pissusissaannartut isigisagut pimoorullugit aallartittariaqartut
piaarneqarneri. Uagut Paamiuni Greenland Stari qatsutivipparput ukiut 15nit
eqqatsinni kusanarsiartorani inissisimavoq, peerneqarnissaanillu
noqqaasarnerugaluaq kinguneqassanani. Aamma misissuisartut nunatsinni
sulisinneqartut soorlu imermut nukissiorfinnik assigisaanilluunniit, aamma
qimagaasarput tamakkua aamma suliakkerneqaraangata aamma piumasarisariaqarpoq
naalakkersuinikkut atortutik misissuereerunik pinngortitaminngaanniit
piiassagaat.
Aaffarni imaluunniit allani
piniariartarfiunngikkaluartuni nunami angalaartilluni tamakkua
naammattugaasartut nunatsinni sullissinerup kingunerisaanik qimatat
tammajuitsussatut isigerusunngilagut piiaarneqarnissaat kissaatigisarigatsigu.
Taamatut uani naatsunnguamik apeqquteqaatiga ilalaarpara.
Siverth K. Heilmann Atassutip oqaaseqartua:
Siunnersuuteqartumut
akissutigineqartut taakkua siunnersuuteqartup pingaartumik tunngavilersuutai
aallaavigalugit partiininngaannit assigiingitsuninngaanniit
oqaaseqarniartarpugut, taakkulu sapinngisannguarput aallaavigalugu kisiisa
oqaaseqarfiginiartarlugit, taanna pingaartumik Atassummi ataaqigajuttarparput.
Ussernartorsiornartartorujussuaq annerujussuarmik immaqa nammineq nalunngisagut
illoqafigisatsinninngaanniit kommunerisatsinninngaanniit
oqariartuutigisinnaasagut kusanartut immaqa aammalu kusananngitsuusinnaasut
taagorneqarsinnaagaluarlutik, kisianni uani nalornissutiginngilara inatsisartut
erseqqilluinnartumik siunnersuutit marluk pineqartut tamarmik
amerlanerussuteqarluartut naalakkersuisut inassutaat malimmatigit.
Taamaattumik ataatsimititaliami ingerlaqqinnissaannut
paasiuminaatsilaarpara suna tassani suliarissaneripput. Tassani
saleersuartarnissamut tunngatillugu amerlanerussuteqarluartut uani
inatsisartuni oqarput taanna naalakkersuisut inassutaat tassalu
saleersuartitsisoqannginnissaa ulloq ataaseq atorlugu Maliinannguup
siunnersuutaatut pisoqassanngitsoq. Kisiannili avata-ngiisit
mingutsaaliorneqarnissaannut uku motorillit atorlugit isumaqatigilluinnarlugit
siunnersuuteqartoq inatsisartut tamarmik taanna isumaqatigiissutigivaat.
Uani akissutigineqartut
partiilluunnit allat oqaaseqaataat annerusumik oqaaseqarfiginianngilakka,
kisianni tassa oqareernittuut nammineq illoqafigisatsinni kommunerisatsinnilu
qanoq iliorsimanerput aamma uagut taagukutsoorsinnaagaluarpavut Maniitsoq
maniitsorsuusimasoq manissarsimagatsigu kusassarlugulu allatulli.
Anthon Frederiksen Kattusseqatigiinni oqaaseqartup
sanatigut:
Nalunngilara tamatta
ataasiakkaarluta pisussaaffigigipput eqqiluitsuutitsinissamik
suliaqassaal-luta, kisianni aamma eqqaanngitsoorsinnaanngilara asimi kisimi
angalatilluta innimigisaqartaratta soorlu assersuutigalugu qassutit
qimaannakkat. Tamakkununnga tunngatillugu aamma isumaqarpunga matumani
oqallinnermi eqqaaneqanngitsoorsinnaanngitsoq, tassalu piniarnermi
nakkutilliisut pisussaaffi aamma tamakkua ilanngullugit eqqaamasariaqarmata.
Tassa ilaatigut takornartaaneq ajormat eqalunniartarfinni qassutit
qimaannarneqarsimasut aamma ilaatigut migutitseqataasarnerat, piniakkanillu
soorunami aamma illersuinissamut akornutaasinnaasarlutik. Tamakkua aamma pisussaaffiliinernut
tunngatillugu erseqqissarneqartariaqartut.
Kiisalu oqaluttut ilaasa
oqaatigivaat aamma ikuallaasarfiit eqqakkanut taakkua kiassarnermut
atorneqarsinnaanerinut tunngatillugu isumaqatiginarpoq, aamma nutaajunngilaq
taanna taamatut saqqummiunneqartarnera, kisianni pissutsit imaattut
ilumoorsimappata assersuutigiinnarlugu Nuup Kommunia aammalu Nukissiorfiit
isumaqatigiissinnaannginnertinngooq pissutigalugu nukik annertooq kommunip
ikuallaasarfiutaani pilersinneqartartoq maangaannartinneqartartoq. Soorlu
pissutsit taamaattut eqqarsaatigalugit ilumut kommunip nukissiorfiillu
akornanni isumaqatigiissinnaannginneq pissutigiinnarlugu nukerujussuaq
asuliinnartinneqartassappat inuiqatiigiinnut sipaarniaqaluta oqaluttunut
aaqqiissuteqartoqartariaqartoq isumaqarnarpoq.
Taamaattumik tamatumunnga
naalakkersuisoq akisussaasoq qinnuigerusunnarpoq pissutsit taamaassimappata
iluarsineqarnissaat sulissutigeqqullugu, atorluaasariaqaraluarattami
tamak-kununnga aamma.
Steffen Ulrich Lynge Ineqarnermut, Attaveqarnermut
Pilersuinermullu Naalakkersuisoq:
Anhon Frederiksen-ip
toqqaannarlugu taanna apeqqutaa aammalu suliareqqusaa soorlu Nuup Kommuniata
Nukissiorfiillu ajornartorsiutaat, taanna massakkut ingerlavoq aama
aaqqinniarlugu sulisoqarpoq, taamaattumik itinerusumik oqaatiginagu tassa
suliaq ingerlavoq aammalu soorunami naammassinissa kusanartumik utaqqissavarput
taanna.
Alfred Jakobsen Peqqinnissamut, Avatangiisinut
Ilisimatusarnermullu Naalakkersuisoq:
Siunnersuuteqartoq inatsisartunut
ilaasortaq Maliinannguaq Markussen Mølgård qaqeqqinnermini siunnersuutigivaa
soorlu naalakkersuisuninngaanniilluunniit eqqarsaatigineqarsinnaasoq ukioq
ataaseq avatangiisit pillugit ukiorititassatuut siunnersuutigalugu, tassa ukioq
manna naluneqanngitsutuut 1999 utoqqarnut ukiorititaavoq, taavalu aamma ukioq
2000 meeqqanut ukioritinneqarnissaa naalakkersuisuninngaanniit taanna
eqqarsaatigigatsigu. Taamaattumik siunnersuutigisat taanna isumaqarpunga
tulluartuusoq uani ilissinni eqqarsaatigeqqulaaqqullugu tassa ukioq 2001-luunniit
avatangiisit pillugit ukiorititassatuut taanna
kaammattuutigerusunnarsinnaammat.
Taavalu siunnersuuteqartup
eqqaavaa Sisimiut Kommunalbestyrelsiata tusarniarneqannginnera taanna
ajuusaarnartuusoq. Aap, akissutigissanni oqaatigivara kommunalbestyrelsit
illoqarfiit killeqarfigisaasa iluanni susassaqarfiat taanna uagut soorunalimi
aamma ataqqivarput, kisiannili uani illoqarfiit killeqarfigisaat taakkua
avataanni susassaqarfik tassaavoq inatsisartuni susassaqarfiusoq, taannalu
tassa maannakkut pillugu inatsisartuninngaanniit peqqussut 1996-mi
nutarterneqarsimavoq. Taannalu aqqutigalugu taava maannakkut ilaatigut maani
nunap immikkoortuani qeqqaniittumi Maniitsup Kommunia, Sisimiut Kommunia
kiisalu Kangerlussuaq ataatsimoortillugit tassani ataqatigiissaakkamik immikkut
nalunaarummik atuuttussanngortitsisimavugut, tassanilu tusarniaffigineqartut
tassa pingasuupput Maniitsup Kommunalbestyrelsia taavalu Sisimiut
Kommunalbestyrelsiat ammalu Kangerlussuarmi innuttaasut
siunnersuusoqatigiiffiat.
Taakkunani - aap
naalakkersuisuniit nalunngilarput aamma maluginiarparput Sisimiut
kommunalbestyrelsi amerlanerussuteqartoq taamatut immikkut nunaannakkut
aqqusinniornissamik akerliusimasoq. Kisianni uani inatsisartut susassaqarfigisaat
taanna aallaavigalugu nalakkersuisuninngaanniit maannakkut taamatut
suliaqarsimavugut.
Taamaattumik uani arlaatigut
paatsuunganartoqarsimappat annertunerusumik soorunalimi
nassuiaateqarnerusinnaavugut kingusinnerusukkut ataatsimiititaliamulluunniit
saqqummiunneqartussamik. Naalakkersuisut soorunalimi uagut aamma avatangiisitta
mingutsaaliorneqarluni illersortuarneqarnissaa pingaartikkatsigu taava aamma
ilaatigut motorillit atorlugit tamaaniinnaq nunaannarmi angallannerit
killilersorniarlugit ilaatigut inatsisartut taamatut sukaterisimanerat
aallaavigalugu taakkua nalunaarutit maannakkut suliaralugit ingerlakkatsigu.
Taamaammat uani kommunit
qitiusumik inissisimasupilussuupput aamma kommunit siunnersuusioqqaarnissaat
uani utaqqimaartuartarparput aamma taamatut suliaq ingerlanneqarpoq. Taavalu
Siumup oqaaseqartuanut Ruth Heilmann-imut eqqaavaa ilaatigut septemberimi
Aasianniinnermi nalaani Aasiaanni saligaatsuunissamik immikkut
akissarsisitsinitsinnut peqataasimanera, tassani eqqaagakku - aap ilumoorpoq
taavaniinnerma nalaani kommunalbestyrelsip nammineerluni ukiumoortumik taamatut
innuttaminut akissarsisitsisarnera ingerlanneqartoq nalaatsornerinnakkut
peqataaffigigakku. Tassanilu iluatsillugu uanga avatangiisinut
naalakkersuisutuut borgmesterip peqataatinniarlunga kaammattormanga
taamaaliorsimavunga. Aamma isumaqarpunga kommunit namminerisaminnik
taamaaliortarnerat kusanartuusoq. Taava Ruth-ip ingerlaqqinnermini oqaatigivaa
nuna tamakkerlugu taamatut akissarsisitsisarsinnaaneq qitiusuminngaanniit
aallaaveqartoq soorlu naalakkersuisuninngaanniilluunniit aallaaveqartoq taanna
isuma isumaqarpunga kusanartuusoq aamma tulluartuusoq.
Taamaammat tamanna isumaqarpunga
naalakkersuisuninngaanniik periarfissaasoq pitsaasoq aammalu
atorluarniartariaqartoq siunissami. Kiisalu Siumut sinnerlugu oqaaseqartoq
tassa Ruthip eqqaava Per Rosing Petersen-ip apeqquteqaataa suli
akineqarsimanngitsoq - aap tassa maani Inatsisartut
siulittaasoqarfianinngaanniit taamatut apeqquteqaatit aammalu siunnersuutit
Inatsisartuni ilaasortaninngaannersut, soorunalumi Naalakkersuisuninngaanniit
qaqugukkulluunniit akisarnissaat piareersimaffigivarput taamaallaat
Inatsisartut Siulittaasoqarfianiit ullormut oqaluuserisassanik
assigiinngitsunik inissitsiterisimanera naapertorlugu taamatut ingerlappavut,
taamaammat Per Rosing-Petersen-ip apeqquteqaatigisimasaa naatsorsuutigaarput
taanna kingusinnerusukkut Inatsisartut uani ataatsimiinnerisa nalaani
ilanngunneqariarpat akineqarumaartoq.
Inatsisartunut ilaasortattaaq
Lars-Karl Jensen-ip eqqaasitsissutigivaa sioranatigunngooq Naalakkersuisut
ilaatigut Danmarkimi ministeriaqarfimmi aalajangersimasumi
isumaqatigiissuteqarsimasut Umiarsuit kivisiinnarneqartartut pillugit
eqqaaviliortoqarsimasoq. Kisianni manna tikillugu taamatut iluseqartumik
isumaqatigiissuteqarsimanermik takusaqarsimanngilanga. Taamaattumik
paatsuungalaarpunga taassumunngarpiaq tunngasumut, kisiannilu allanut
tunngassuteqartut pillugit periarfissaavoq uani maannakkut siunnersuutit
taakkua marluk oqallinnerup kingunerisaanik ataatsimiititaliamut suliassat
ingerlateqqinneqarnerisigutarlaatigut Naalakkersuisuninngaanniit immikkut
paasissutissanik aamma taassumunnga tunngasumik itinerulaartumik
saqqummiussisinnaanissarput periarfissaammat. Tassami Atassutikkut
oqaaseqartuata Siverth K. Heilmann-ip oqaatigaa nammineq nalornilaarlugu
maannakkut oqallisigineqartut sooq ataatsimiititaliani
ingerlateqqinneqassanersut. Uanga saqqummiussisut partiit Kattusseqatigiillu
oqaaseqartuisa saqqummiussai imatut paasigakkit ersarissumik Siumukkormiut
aammalu Inuit Ataqatigiit oqaaseqartisa oqaatigimmassuk ataatsimiititalianut
taakkua siunnersuutit pillugit suliarineqarnissaat ingerlatinneqartassasoq,
taamaattumik eqikkaaninni taamatut oqaaseqarpunga.
Taavalu uani Anthon
Frederiksen-ip apeqquteqaataa akineqareermat taamaalillunga oqaaserineqartunut
qujaqqillunga akissutigisakka saqqummiuppakka.
Otto Steenholdt, Atassut.
Immaqa ilaannikkut maani Inatsisartuni ilaasortaasugut ilagut oqaluleraangata tusarnaartariaqartaraluarigut Inatsisartunut ilaasortaanngitsutut Inatsisartunut ilaasortaanngitsutut eqqarsarluta,
avataaninngaanniit tusarnaartutuut.
Ullumikkut oqaluuserisarput assorujussuaq tusarnaarlugu eqqumiigaara. Oqaluttut ilaat oqarpoq sukkulaatisigaangatta puunngua igittaripput allalu tamaasa ataasiakkaarsinnaagaluarpavut.
Ilumullumi inuup nammineq naleqassusia inuup nammineq eqqarsarsinnaassusia aallaavigalugu oqartuugutta "taamaaliorneq ajorpoq" ataasiakkaarlugu isumagigussiuk tamarmi ajoqutissaqanngilaq.
Naalakkersuisunik isumalluuteqarnerujussuup tikitaa torinngilluinnassusia, ataatsikkorluta tamatta sulinata suliavut qimaannarlugit - ilami uani allassimavoq ulloq aalajangersimasoq ulloq aalajangersimasoq sulianani saleersuaqatigiittarnissaq. Inuup tassani pisinnaassusia piugorlugu inuiaqatigiit tamaasa oqarfigigaanni saleersuallarumaarpusi - taava inuit ataasiakkaat qanoq iliussappat?
- ajunngilaq taanna sukkulaap puukasia igiinnaqilara upernassaru saleersualerutta tamakkununnga ilanngullugu salinneqarumaarpoq. Inuit taamatut eqqarsalersinnaapput soorlu taamatut isumalluuteqarnerujussuarmik siunnersuuteqaraanni. Allat eqqaasinnaavagut arlatta sullissui ipeqarpallaaqippata errorserujorujussuarnermik aamma ullormik pissarsiornialissaagut. Tamakkua taama suunngitsigisut maani Inatsisartuni taamatorujussuaq oqallissutigineqarsinnaanngillat - ataatsimiititaliullugit allaat, soorlu taanna pisariaqanngilluinnartoq oqarfigiinnarsigit - nunarput taamaattussaanera tamatta sulissutigerusukkatsigu inungaa illit aamma ataasiakkaaq pisussaavutit taamaaliornaveersaassallutit, oqarfigiinnarnagit "Naalakkersuisut tamakku isumagiumaarpaat" saleersuaarnerit, unngiaqatigiittarnerit errorsisarnersuillu Naalakkersuisut susassarinngilaat.
Lars-Karl Jensen, Siumut.
Naalakkersuisoq paatsoortissimassagukku taanna ajuusaarutigissavara. Oqarsorinngilangami qallunaat ministerii suleqatigalugit angallatinut eqqaaviliortoqarsimasoq imaluunniit kiviorartitsiviliortoqarsimasoq. Unaliuna pigiga - isumaqatigiissuteqarsimasut ilisimatinneqarpugut nunatsinni eqqagassanik aammalu assigiinngitsunik nunatta eqqaavigineqarneranut tunngasunik saliinissamut qallunaat Naalakkersuisui suleqatigineqarniarniarlik nunatsinni Naalakkersuninngaannik, taanna ersarissaatigilaaginnassavara. Taassumallu suliap - taamatut suleqatiginninnissap sumut killinnera ingerlateqqinneqarneraluunniit ujartorpara, siumaqarama iluatinnartuusoq nunatsinnimmi laranstationeqarfikorpassuit qimaannakkat amerlaqimmata. Aammalu tulluarsorinnginnakku umiarsuit iliveqarfiliullugit taamaasilluta ajornartorsiut qaangissagipput.
Ruth Heilmann, Siumup oqaaseqartua.
Siverth K. Heilmann-ip
paatsuungammagu uagut aamma Siumuminngaanniit ataatsimiititaliamut
innersuukkatsigu. Tassani pineqarpoq landspolarcenter-ip isumagisartagaasa
nunatsinnut nuunneqarnissaannut apeqqut isumaqaratta ataatsimiititaliamut
ingerlateqqinneqartariaqartoq aammalu maanga saqqummiuteqqinneqarluni, taamatut
iliornissaq maanngaanniit akuersissutigineqartariaqarluni. Unaana aamma
Naalakkersuisumut oqaatigilaaginnarniarlugu, qujassutigigakkit taamatut pisortaqarfimmut
ammalluni saaffiginnissinnaasunut - soorlu ikuallaavinnik
ajornartorsiuteqartunut taamatut peqqusinera, neriuppunga aamma
atorluarneqarumaartoq, nalunnginnakku ilaatigut amutsiveqarfiit tamakku
ingerlannikuugaat aammalu ajornartorsiutinik annertuunik
pilersitsisoqarnikuulluni. Kangaamiuni ikuallaavik ikuallannikuuvoq -
assersuutigiinnarlugu. Aammalu Napasumi imatut aatsangatigaaq atulerneqaruni
tassuunakkut taamaallaat pujoq aniasussaalluni. Taamaattumik
ajornartorsiuteqartoqarpoq pinngitsoorani tassuunakkut aammalu
saaffiginnittoqartaraluarluni sivisuumillu akineqassanatik ilaatigullu
akineqaratik suli.
Maliinannguaq Markussen
Mølgaard, Inuit
Ataqatigiit.
Tassa una - ilaatigut olie-t
puukorsui aammalu asimiilluni pinngortitaq minguitsoq ornillugu
eqqagassakorsuit takullugit aatsaat taamak nuanninngitsigisumik
misigisaqarnartarpoq. Taamaattumik manna apeqqut isumaqarpunga
quiassuaatigalugu oqaluttarfimminngaanniit oqaaseqartut ilaannit Otto
Steenholdt-imit pineqartariaqanngikkaluartoq. Tassami ilaatigut imanna
eqqarsarniarutta - aap Naalakkersuisut suliariumaarpaat imaluunniit
Inatsisartut suliariumaarpaat illuatungaanut saatinneqarsinnaavoq imaalillugu,
ataatsimoorluta susassareqatigiilluta saleeqatigiittaleraluarutta
eqqarsalissagaluarpugut: tulliani salitassagut ikinnerussapput maangaannaq
eqqaajunnaarniarta, taamaattumik unngiaqatigiittarnissamik maani oqalunneq
isumaqarpunga asuli quiassuaatiginninnertut taasariaqartoq aammalu
ajornartorsiut aatsaat ajornartorsiutaammat maanga apuunneqarpoq. Asuli
pinnguarluta Inatsisartuni sulinngilagut, aamma Avatangiisit pillugit
Ataatsimiititaliaqarpugut, avatangiiserput illersorniarlugu, aamma eqqagassat
avatangiisinut attuumassuteqarput. Naammaginartumik
naammassineqarsinnaanngippata aamma maani pisussaaffigivarput qanoq iliorluta
avatangiisitta kusanarnerusumik isikkoqarnissaa oqallisigissallugu aamma
pisussaaffigivarput. Taamaattumik taamatut unngiaqatigiittarnissamik
siunnersuuteqartoqanngilaq maani.
Lars Sørensen, Inuit Ataqatigiit oqaaseqartua.
Otto Steenholdt-imut aamma taanna
akissutaaneruvoq.
Isumaqarpunga Otto Steenholdt-ip
pingaartittaqigaa Siulittaasoqarfik ataqqinartoq Inatsisartut
oqaluuserisassanngortitaanik aalajangiisimagaangat taava aamma inimut
apuunneqarsimagaangata pimoorullugit oqaluuserisassagigut. Partiit
assigiinngitsut tamarmik taamaaliorput, tupinnaqaaq ukiuni taamak
amerlatigisuni Inatsisartuni ilaasortat taamatut Inatsisartut
Oqaluttarfianninngaanniit kusanaatsigisumik pissusilersorsinnaammata. Kiap
arajutsisimassagamiuk maangaannaq eqqaanerujussuarput, tamatta nalunngilarput.
Taamaattumik Inuit Ataqatigiinniit oqaatigaarput tamanna iliuuseqarfiginiarlugu
pinngitsoornata assigiinngitsutigut suleqatigiilluta tamassuma
aaqqiivigineqarnissaa suliniarfigisariaqaratsigu.
Inatsisartuni ataasiarnata maani
oqaluttarfimminngaanniit oqaatigisarparput siunissami inuussutissarsiuutit
pingaarnersaasa ilassaat tassaasoq takornariaqarneq. Takornariaqarneq
siuarsarneqassappat maanna pissusilersuutigut allanngortittariaqarpavut,
tamannaavorli ilaatigut Inatsisartuni ilaasortap siunnersuuteqarnerminut
erseqqissaatiginiagai.
Ataatsimiititaliami
ingerlaqqinnissaanut Siumukkormiut oqaaserisaat taperserniarpavut. Inuit
Ataqatigiinniit polarcenter-ip nunatsinnnut nuunneqarsinnaanissaata nalilerneqarnissaa
uaguttaaq kissaatigaarput.
Mads Peter Grønvold, Kattusseqatigiit oqaaseqartua.
Siullermik nuannaarutigaara Siumut oqaaseqartuata eqqaammagu Dansk Polarcenter-ip oqartussaaffigineqarnera nunatsinnut nuunneqarnissaa oqaluuserineqartariaqartutut eqqaammagu ataatsimiititaliamit.
Aamma saqqummiussatsinni imatut allassimavarput: "Taamaattumik Dansk Polarcenter-i oqartussaaffigineqarnera nunatsinnut nunneqartariaqartoq Kattusseqatigiinniit kaammattuutigissavarput", tassa taamatut oqariartuuteqarpugut qulaatiinnarluta aalajangertoqartassanngimmat. Aammalu oqaluuserisassamik siunnersuuteqartup Maliinannguaq Markussen Mølgaard-ip eqqaasaa uanga iluatinnartuutippara TV-kkut radiukkullu malinnaajutigalutik saleersuaqatigiittarnissamut ullormik aalajangiisoqarsinnaappat. Taamatummi aalajangiisoqanngippat illoqarfiit kusanartumik takujuminartuunissaat angujartorunnanngilagut. Aalajangiisariaqarpugut saleersuaqatigiittarnissamik ullormik. Pitsaassaqaaq taamatut aalajangiisinnaagutta soorlu katersuiniartoqartarpoq aamma siunnersuuteqartup oqaaseqaqqinnermini eqqaavaa nuna tamakkerlugu ullormi ataatsimi katersuiniartoqartarpoq. Aamma taamaaliorsinnaagutta uani saleersuaqatigiinnermi ullormi ataatsimi aalajangersimasumi qanoq iluaqutaatigissagaluaqinerpa. Suminngaanneerfigut aamma apeqqutaallutik ilaani ilisimasaqarnerusarpugut taamaattumik saleersuaartitsinermi illoqarfinni kommunini assigiinngitsuni pisartoqarpoq, aammma Qasigiannguit eqqarsaatigigaanni ukiut tamaasa innutaasut saliitinneqartarput taavalu innuttaasuni inuit assigiinngitsut pingasut akissarsitinneqartarlutik kommuniminnganniit. Tamakku pissutsit ingerlareerput aamma ingerlalluaqqinnissaat kissaatigiinnartariaqarpoq. Taavalu Atassutip oqaluttuata saniatigut oqaluttoq naveerneqareermat uagut oqaaseqarfigissanngilara oqaaseqarfiginialeraluarakku uani siunnersuummi pineqarnngimmata atallaat ipertuut allallu.
Godmand Rasmussen, Atassut.
Uanga Oqaluttarfimmut
qaqinianngikkaluarama, naatsuarannguamik ilassutissiilaarniarpunga.
Isumaqarpunga una oqallisissiaq
annertunerusumik qassiiliutissaanngitsoq. Ersereerpoq uani
siunnersuutigineqartoq, Naalakkersuisut oqaaseqaataat ersaripportaaq.
Kisianni tupigusulaarpunga
tassami tamatta aamma kukkussuteqartarpugut. Inuit Ataqatigiit oqaaseqartuata
oqaaseq atugaa una aamma Kattusseqatigiit tapersersugaat, naatsunnguamik
issualaassuara: "taamaattumik nunarput tamakkerlugu ataatsikkoortumik
saliisoqartalernissaa siunnersuutigaara ullormi tassani saliinerup saniatigut
illoqarfiit nunaqarfiillu nunagisami pinnerssanermik
ingerlatsisoqartassaaq". Ersarilluinnarpoq piumasarineqartoq ulloq
ataaseq, ullormi assigiimmi Kalaallit Nunaat. Qaqortoq aputaarpat Qaanaaq
Ummannakkut suli qimusserfiussapput. Taanna inuiaqatigiit tamarmik akuerissappassuk
nuannarinavianngilara silaannakkut angallanneq aamma unitsinneqassammat.
Tassami usilersornissaq pillugu timmisartut ullumikkut aallassanngillat. Tassa
uani pineqarmat ullormi ataatsimi taamak pissusilersornissaq.
Aajuna
pitsaanerpaasorinaannartoq: Nunatsinni taamatut saliisarneq inuiaqatigiit
paasiartorparput. Kommuneqarfiit ilaanni pitsaalluinnaqqeqqissaartunik
takutitsisoqartalereerpoq. Atagu pisortat tassani kalluutsinnagit aningaasanik
naleqanngitsunik immitsinnut piumaffigiinnarta kommunillu siunnersorlugit
periaaseq taanna kusanartoq pitsaasumik inuiaqatigiinnut ingerlatiinnaqqullugu.
Ullormi ataatsimik aalajangiinata aamma ilaatigut sapaatip akunnera
naammatsillugu Kalaallit Nunaat angisoorsuugami nunaqarfiit ilaat
silarlussuaartorsuusarput saleeqataangitsoortoqaqinooq.
Johan Lund Olsen, ataatsimiinnermi aqutsisoq, Inuit
Ataqatigiit.
Oqaaseqartussaq tullinnguuttoq
oqaaseqartinnagu una erseqqissaatigilaarlara.
Suleriaaserput malillugu
soorunami maani Inatsisartuni ingerlasussaavugut pingaartumik maani inersuarmi
ataatsimiinnerit eqqarsaatigalugit.
Ataatsimiititalianut
sinniisoqarfinnullu suliassanngortinneqarsinnaasut eqqarsaatigalugit
erseqqilluinnartumik malittarisassaqarpugut. Taakku allassimapput
suleriaatsitsinni § 9-mi, taanna maannakkut isumaqarpunga pissusissamisuussasoq
atualaartuugukku erseqqilluinnartumik imaattumik aalajangersagaqarmat:
"§ 9 Inatsisartut
erseqqinnerusumik aalajangiinitik malillugit ataatsimiititalianik ataavartunik
ataatsimiititaliaagallartunilluunniit pilersitsissapput allamik
aalajangersagaqartoqartinnagu ataatsimiititaliap siulittaasussani nammineerluni
qinertassavaa suleriaasissanilu aalajangersassallugu. Tassani
atuarneqarsinnaassaaq ataatsimiititaliat suliassaasa pingaarnersarigaat
suliassat ataatsimiititaliamut innersuunneqarsimasut suliarineqarnissaat.
Aammali ataatsimiisitaliaq suliassaqarfimmi iluani ingerlanermut malinnaassasoq
kiisalu suliassaqarfimmi iluani nakkutigissallugu inatsisiliornikkut
killiliussat Naalakkersuisunit qaangerneqannginnissaat.
Imm.2 Suliaq suliarineqarnermi
nalaani qanoq ilisukkulluunniit ataatsimiisitaliamut nutaamut
ataatsimiisitaliaareersumullunniit oqaluuserisassanngortinneqarsinnaavoq".
Tassa erseqqarilluinnareerput
uani oqaluuserisatsinni partiit Kattusseqatigiillu eqqarsaatigalugit Siumut,
Inuit Ataqatigiit Kattusseqatigiillu ataatsimiititaliamut suliassaq uani
eqqartugarput ingerlateqqinneqassasoq innersuussutigivaat, taamaammat taanna
paatsuungatigineqartariaqanngilaq.
Taavalu aamma una
oqaatigilaarlara. Ullormut oqaluuserisassat Inatsisartut ullormut
oqaluuserisassaat septemberip 24-anniit 13.oktober ilanngullugu
aalajangersoreerpaat, tassanilu aamma tamatta eqqaamajunnarsivarput maani
Atassutip partiaa aamma ullormut oqaluuserisassat tamakkivillugit
akuersissutigimmatigit.
Otto Steenholdt, Atassut.
Oqaasissaarulluinnaraanni inuup qanoq sivisutigisumik sulisimanera allaat taakkartorneqalersarpoq - tamakku uniffigineqassanngillat. Makku olie-t puukorsui tassasarput selskabit angisuut namminneq akissarsillutik qimassimasaat. Tamakkua qangalili suliariniartarpavut, taakkua namminneerlutik salissagaat, eqqortuuvorlu taanna. Oqalutsiarnini taavakka tamakkua sukkullaap puukunnguiluunniit, tamakku suarsumininnguit angisoorsuanngortillugit oqallisigineranuna uanga qamuuna quijatsaassutigiinnariga.
Oqallinnermi eqqaaneqanngillat suliffeqarfiit - akuersaarsinnaappat sulisutik tamaasa oqarfigalugit: ajunngilaq saliiniaritsi, qanormita oqassappat, akissarsissappat akissarsissanngillat? Saleersuarusunngitsorsuit aallakaassapput pujortuleerannguarlutillu freertorsuullutillu ullukkut, tamarsuarmik immaqa saliisussat ikittoralaarsuit kiserngorutissapput, pillarneqassappat tamakkua? Naalakkersuisut maani imaluunniit Inatsisartut aalajangermassuk ulloq taanna tamarsuarmik saliissapput. Kiap nakkutigissavaa kina eqiasulerluni takkutinngitsoorsimasoq? Tamakkua eqqartorneqanngillat saliijumasimanngitsut qanoq pineqassasut Inatsisiliornikkut tamakkua tamarmik aaqqissuunneqassappata quianartorujussuarmik aallarpugut, taamaattumik Sørensen-imut oqaatigaara tamakkua maani Naalakkersuisutigoortumik suliassaanngillat, oqaluttut amerlaqaat kommuninngooq aallartereerput. Kommunit nammineersinnaassusiat tatigalugu Naalakkersuisut oqaannarniarlik kommunit suliaat tatigalugu maannakkut sulivugut, taamaattuarnissaat - suli pitsanngoriarnissaat tapersersorlugu. Kisianni nuna tamakkerlugu ulloq tamaat taamatut sulinngitsoorluni saliinissaq asuli oqallinneruvoq silaannarminngaannillu tigusatut allaat taasariaqarluni - itigartinniarneqarluinnarniarli.
Hans Enoksen, Siumut.
Siunnersuutiginiarlugu oqaluuseerisassaq taanna saleeqatigiittarnissamut tunngasoq itigartinneqareermat nipangiunneqassasoq, taavalu oqaluuserisassanut allanut ingerlaqqissasugut. Tupigaara maani ajornartorsiut taamak annertutigisumik eqqartorneqarmat. Inuup nammineq pisussaaffigivaa najugaqarfigisamini saliinissani. Assesuutigalugu uagut nunaqarfinnguatsinni Inatsisartut angunngikkaluarlugit ajornartorsiuteqanngilluinnarluta eqqiluitsuutitsineq ingerlapparput. Inuttut nammineq pisussaaffigigatsigu taanna suliarissallugu.
Alfred Jakobsen, Peqqinnissamut, Avatangiisimut Ilageeqarnermullu Naalakkersuisoq, Inuit Ataqatigiit.
Siullermik oqaatigilaaginnassavara eqqagassat assigiinngitsut ulorianartortaqarsinnaasut aammalu
mingunnarpallaartortaqarsinnaasut ilaatigut taakua aalajangersimasumik tigooraaveqalernissaannik suliniutit maannakkut ingerlanneqarmata. Taannalu Naalakkersuisuninngaanniit qanittumi aaqqiiffigineqarnissaa naatsorsuutigaarput. Kiisalu eqqaasitsissutigilaaginnarniarlugu KANUKOKA maannakkut nammineerluni Danmarkimi immikkut tamakkuninnga eqqakkanik eqqagassanillu ulorianartortaqarsinnaasunik immikut ilisimasalimmik suliffeqarfimmik MOKANA-mik taagorneqartumik suleqatiginnilluni tamakkuninnga siunissami isumaginnittalernissat piareersaasiorlugit ingerlammagit.
Naggataarutaasumik Naalakkersuisut sinnerlugit qujassutigissavara Inatsisartuni ilaasortap siunnersuutai marluk taakkununngalu partiit Kattusseqatigiillu oqaaseqartuinit oqaaserineqartut. Naggataasumillu oqaatigilaaginnassavara uagut Naalakkersuisuninngaanniit naatsorsuutigigatsigu peqqussut nr. 14 1996-iminngaannit atuutilersoq tunngavigalugu nalunaarutit taakkua kommunikkaartumik atuuttussanngortussat, taakkua aaqqereeriarpata, taava Dansk Polarcenter-ip sermersuarmi sermersuarluunniit qarsullugu ilaatigut ilisimasassarsiorniartunut oqartussaaffeqarnera taanna tassuunatigut kipineqartussaammat. Taamaattumik uani Naalakkersuisuninngaannit akornutissaqartinngilarput ataatsimiititaliami taakkua immikkut itinerusumik eqqartorniarneqarpata.