Kalaallit Nunaanni Inatsisartut

Oqaluuserisassani immikkoortoq 63		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngoneq 27. oktober 1999 nal. 15.17

 

 

Oqaluuserisassani immikkoortoq 63

 

 

Aalisartut piniartullu piniutiminnik annaasaqarsimasut ataatsimiititaliuunneqarnissaannik apeqquteqaat pillugu oqallinneq.

(Hans Enoksen)

 

 

Ataatsimiinnermik aqutsisoq: Anders Andreassen, Siulittaasoqarfimmi ilaasortaq, Siumut.

 

 

Hans Enoksen, Siumut:

Aalisartut piniartullu piniutiminnik annaasaqarsimasut ataatsimiitaliuunneqarnissaannik siunnersuutiga matumuuna saqqummiutissavara.

Matumuuna siunnersuutigaara nunatsinni inuutissarsiutit pingaarnersaannik ingerlatsisut, tassalu aalisartut piniartullu silap pissaaneranik nalaanneqarlutik annaasaqarsimasut sulissunniarlugit ataatsimiititaliortoqassasoq.

Siornatigut taanna taasarparpugt Ajunaarnersuarmi aningaasaateqarfik, ullumikkullu atorunnaarsitaanikuuvoq massakkullu politikkerit atorfillillu kisimik ingerlappaat. Isumaqarpunga taamak ingerlaneq pitsaasumik ingerlanertut taaneqarsinnaanngitsoq.

Uagut qarsupiivallaaqaagut inuutissarsiutit pingaarnersaanik ingerlatsisut sulissunneqarnerat taamak pitsaanngitsigisumik ingerlakkatsigu. Assersuutigiinnarlugu ataatsimiititaliarpassuit allat pilersittaqattaarpagut uffalu aningaasanik isaatitsinatik asuli atuisutut taaneqarsinnaasut, ilaatigut arlalippassuarnik inuttalerlugit.

Nunanut maanga aningaasalersuisut ingerlariaqqinnissaanni inuutissarsiornermikkut sapinngisamik unittoortinnaveersaartariaqarpagut, taamaammat ajutoornermikkut sukkasuumik ikiorsiiffigineqartarnissaat anguniartariaqarparput, tassanilu misilittagallit aalisartut piniartullu inuttaatillugit ataatsimiititaliaq pilersinneqartariaqarpoq, taakkuummata inuutissarsiornerminni ajutoorsimasunik tunngavilinnik nalilersuisinnaasut.

Taamatut siunnersuutiga saqqummiuppara, qujanaq.

Simon Olsen, Inuussutissarsiornermut Naalakkersuisoq:

Inatsisartunut ilaasortap Hans Enoksen-ip aalisartut piniartullu piniutiminnik annaasaqarsimasut ataatsimiititaliuunneqarnissaannik siunnersuutaa aningaasanut inatsimmi kontomit 50 01 04-mit Immikkut Ikiorsiisarnermut Aningaasaateqarfik aningaasaliissuteqartanermi periaaserineqartartunut tunngavoq.

1998-ip naanissaata tungaanut kontomi aningaasaliissutit siulersuisunit allaffissornikkut aqunneqarput, siulersuisuni ilaasortat kattuffiit ilaasortassanik arfinilinnik inassuteqartartut inassuteqarnerisigut inatsisartunit toqqagaapput. Naalakkersuisullu ilaasortassamik ataatsimik inassuteqartarlutik, siulersuisunut ilaasortaasussamik, kattuffiit pineqartut tassaapput KNAPK aamma Saavaatillit Peqatigiit Suleqatigiissut.

Aningaasaqarnermut Ataatsimiititaliap 1998-mut inatsisartut aningaasassaannut aningaasanut inatsisissaattut siunnersuut inatsisartut aappassaanerinninnissaannut saqqummiunneqartoq pillugu isumaliutissiissumminni imatut allappoq:

Aningaasaqarnermut Ataatsimiititaliap siusinnerusukkut ujartorsimavaa kontomut pingaarnermut 50 01 04-mut Immikkut Ikiorsiisarnermut Aningaasaateqarfimmi, maleruagassiat iluarsaateqqinneqarnissaannut siunnersuut. Ataatsimiititaliap pingaartorujussuartut isumaqarfigaa kontomit tassannga ikiorsiissutaasussat aalisartup piniartup savaatillip imaluunniit tuttuutillip aningaasaqarnikkut periarfissaasa ulorianartorsiorujussuartinneqarneranni aatsaat tunniunneqartarnissaasa qularnaarneqarnissaat.

Taamaattumik ataatsimiititaliap inassutigissavaa, kontomit tassannga ikiorsiissutaasut tunniunneqarnissaannut sulissutiginnittartussatut inissisimaneq naalakkersuisut tigussagaat, aammalu kontomit tassannga tunniunneqartussat Aningaasaqarnermut Ataatsimiititaliamut akuersissutigisassanngorlugit saqqummiunneqartalissasut.

Immikkut Ikiorsiisarnernut Aningaasaateqarfimmik aaqqissuussinermut aningaasat siusinnerusukkut pissarsiarineqartarput, Aningaasanut Inatsimmi kontomit siusinnerusukkut taasannit, aamma aalisartut piniartut savaatillillu tunisassiaannit taamatut aaqqissuussinermut ilanngussassanik akiliuteqartitsisarnikkut, taamaattoq aningaasartuutit amerlanerpaartaat nunatta karsianit akilerneqartarput. Aammattaaq siulersuisunut ataatsimik sulisussaqartitsisartumik.

Inuussutissarsiortut akiliutaat piffissami kingullermi aaqqissuussinermik, allaffissornikkut aqutsinermut aningaasartuutinit tamarmiusunit ikinnerusarput. 1998-mi KNAPK nalunaaruteqarpoq, kattuffik aaqqissuussinermut akiliuteqartarunnaarniartoq. Tassami aalisartut piniartullu KNAPK-mut ilaasortaanngitsut aaqqissuusinermut tassunga akiliuteqartanngimmata, Aningaasaqarnermut Ataatsimiititaliap kaammattuuteqarnerata aamma KNAPK-p immikkut ikiorsiisarnermut aningaasaateqarfimmut aningaasanik akileeqataasarunnaarniarluni aaliangernerata kingunerisaanik, 1999-mut Aningaasanut Inatsisissap akuersissutigineqarnerani oqaasertaliussani ilaatigut aaliangerneqarpoq kontomi 50 01 04 Immikkut Ikiorsiisarnermut Aningaasaateqarfimmi aningaasaliissutit siulersuisunit allaffissornikkut aqunneqarunnaassasut.

Aningaasaqarnermut Ataatsimiititaliap tamatuma kingornagut 1999-mi junip 27-ani akuersissutigaa kontomi 50 01 04-mi Immikkut Ikiorsiisarnermut Aningaasaateqarfimmut aningaasaliissutit inuussutissarsiornermut naalakkersuisumit allaffissornikkut aqunneqalissasut, najoqqutassiat 1998-ip naanerani immikkut ikiorsiisarnermut aningaasaateqarfimmit atorneqartut assingi malillugit.

Takuneqarsinnaasutut aaqqissuussineq naalakkersuisut sivikitsuinnarmik allaffissornikkut aqutarisimavaat, taamaakkaluartoq paasinarsereerpoq aaqqissuussinerup allanngortinneqarnissaani inatsisartut aaliangernerat pingaaruteqarsimasoq. Taamaalilluta ukioq manna aaqqissuussineq sukateriffigisinnaasimavarput, naalakkersuisut matumani inatsisartunut ilaasortap Lars Karl Jensen-ip (S) immikkut ikiorsiisarnermut aningaasaateqarfimmut atatillugu suleriaatsit pillugit, pingasunngornikkut apeqquteqaataanut akissutigisimasartik innersuusutigissavaat.

Apeqquteqaat 1999-imi oktoberip 20-ani akissuteqarfigineqarpoq, oqaluuserisassani ukiakkut ataatsimiinnermi 99 71-imut atatillugu. Taamatut sukaterisimanerup kinguneraa, aaqqissuussinerup ullumikkut aallaqqaammut siunertaasut 1985-imi aaqqissuussinerup akuersissutigineqarneranut tunngavigineqartut naapertorluinnarlugit allaffissornikkut aqunneqalernera.

Naalakkersuisuni aamma isumaqarpugut, Aningaasaqarnermut Ataatsimiititaliap siusinnerusukkut kutsiuteqarneranut pissutaasimassasoq. Aningaasaqarnermut Ataatsimiititaliap siusinnerusukkut siulersuisut aningaasaliisartuutillugit aaqqissuussinermik naammaginninnginnera.

Oqaatigeriikkattut aalisartut piniartullu kattuffiata ilaasortami aaqqissuussinermut aningaasanik akileeqataasarnerat kissaatigiunnaarpaa. Tamatuminnga pissuteqartumik nalilersorluartariaqarparput, taamatut aaqqissuussineq ilumut suli pisariaqartitaanersoq, taamatuttaaq eqqaamasariaqarparput inuussutissarsiutinik ingerlataqartut allat akileraartartut akiligaannik immikkut taamatut aaqqissuussiffigineqarsimanngimmata. Eqqarsaatigisariaqarportaaq aaqqissuussineq Immikkut Ikiorsiinermut Aaningaasaateqarfittut ittoq annaasassat inuussutissarsiornermi ilaanneeriarluni pinngitsoorneqarsinnaasanngitsut sillimaffiginiarlugit aningaasanik ileqqaagaqarnissamut kajumilersitsinavianngimmat.

Naalakkersuisuni siunertaraarput aaqqissuussinerup maannakkut allaffissornikkut aqunneqarneratigut ukioq manna naallugu misilittagaqarfigileriarutsigu, aaqqissuussineq pisariaqaannassanersoq sukumiisumik naliliiffigissallugu, taamatut naliliinikkut paasinarsissagaluarpat aaqqissuussineq suli pisariaqartinneqartoq, Naalakkersuisut tamatumunnga peqatigitillugu aaqqissuussinermut najoqqutassiassanik nutaanik siunnersuusiussapput.

Aaqqissuussineq pillugu maani oqaatigineqartut tunngavigalugit inatsisartut maannakkuugallartoq inatsinartunut ilaasortamit Hans Enoksen-mit siunnersuutigineqartutut ataatsimiititaliamik pilersitsisoqarnissaanut aaliangissasut naalakkersuisuniit, kaammattuutigisinnaanngilarput.

Lars Karl Jensen, Siumup oqaaseqartua:

Inatsisartunut ilaasortap Hans Enoksen-ip aalisartut piniartullu piniutiminnik annaasaqarsimasut ataatsimiititaliunneqarnissaanut siunnersuutaa Siumumiit imatut oqaaseqarfigissavarput:

Siulliullugu oqaatigeqqaassavarput siunnersuuteqartup aalisartut piniartullu silap pissusii peqqutigalugit, piniutinik annaasaqartartut ataatsimiititaliunneqarnissaannik siunnersuuteqarnera paasilluaratsigu. Uanilu aamma ilanngullu maluginiarparput siunnersuuteqartup ilanngullugu ajunaarnersuarmi aningaasaateqarfiup, taamatut taaneqartarnikup, allatut ittumik aaqqissuunneqarluni ingerlanneqalernera pitsaasumik ingerlanneqarnersoq apeqquseraa.

Tassunga kingullermut tunngatillugu naalakkersuisut akissuteqaataat Siumumiit paasilluarparput, tassami Immikkut Ikiorsiisarnermut Aningaasaateqarfik maannakkut nutaamik periuseqarluni allaffissornikkut aqunneqalernikuuvoq. Oqaatigeriissavarput tamatuma taamatut pissueqarluni ingerlanneqarnera Siumumiit pissanngatigigatsigu, alaatsinaanniaratsigulu siusinnerusukkut ingerlatsinermut sutigut pitsaaquteqarnissaa ajoquteqarsinnaaneralu.

Siumumiit maannakkut Immikkut Ikiorsiisarnermut Aningaasaateqarfik allaffissornikkut allanngortinneqarnera isumalluarfigaarput. Isumaqaratta tamatuma pisariaqartitsinerani immikkoortilluinnartariaqartut pisussaaffiit ingerlassanut sillimasersimasassat aammalu sillimasersimagaluarluni suut sillimasiisarfimmit pisussaaffiginnginnerat aallavigalugit Immikkut Ikiorsiisarnermut Aningaasaateqarfiup aqunneqarneranut sulinermi ersarissartariaqarpoq.

Sillimmasiisarnermi oqarnerput paatsoorneqaqqunngeqaarput ilisimagatsigu inuppassuaqartoq, sillimmasiisarfiit akisunerujussuat pissutigalugu tamatumunnga tunuarsimaarfigineqartartunik.

Tamanna arlaatigut oqilisaaffigineqarsinnaanersoq Siumumiit naalakkersuisunut misissugassaqqitsipparput, piniartulluunniit qimmeqarnerat kisiat eqqaagaanni piniartup qimmini qamutini atortunilu sillimmasersimanngippagit tamakkununnga annaasaqartuartillugu Immikut Ikiorsiisarnermut Aningaasaateqarfik akulerutsinneqartussaasoq ilisimagatsigu.

Taamatut oqaaseqareerluta Immikkut Ikiorsiisarnermut Aningaasaateqarfiup inuttalersugaanera, tassanilu suleriaaseq nalilersuiffigineqaqqilerpata naalakkersuisunut isumaliutigeqqussavarput tamatumunnga ilanngullu atuisut ataatsimilluunniit sinniisoqalersinnaanerat eqqarsaatigeqqullugu, soorlu kattuffimmit KNAPK-mit siulersuisut ilaannik toqqaanikkut.

Taamatut oqaaseqarluta inatsisartunut ilaasortap Hans Enoksen-ip (S) siunnersuutaa, siuliani oqaaserisatsinnut ilanngullugu naalakkersuisunut misissoqquarput. Kiisalu siunnersuuteqartup isumaanut qanittumik suliniuteqarnissaq Siumumiit iluatinnartoqartikkatsigu oqallinneq manna iluatsillugu naalakkersuisut suliassanik ingerlatsinerannik suleriaqqinnissamut eqqarsaatigeqqussavarput aalisarnermik ingerlatsiffiit paaseqatiginiarneqarsinnaanersut imaani aalisarfinni piniutit annaaneqarsimasut sumiiffiinik nalunaarsuinermi ingerlatsisoqarsinnaaneranik periarfissarsiornissamut.

Isumaqaratta taamatut aaqqissuussisoqarsinnaappat, tassalu piniutit soorlu ningittakka qassutillu annaaneqarsimasut katersorneqarfianik peqalerpat tamakkununnga aannaneqarsimasunik qalluisoqassatillugu tuliniarnermut aningaasaliinermullu eqaallisaanermi tamanna aqqutissaasinnaasoq.Taamatut oqaaseqarluta siunnersuuteqartumut naalakkersuisut akissuteqaataat tusaatissatut tiguarput

Siverth K Heilmann, Atassutip oqaaseqartua:

Aallaqqaammut Atassummiit oqaatigissarvarput inatsisartunut ilaasortap Hans Enoksen-ip aalisartut piniartullu piniutiminnik annaasaqarsimasut ataatsimiititaliuunneqarnissaannut isumaqataannginnatta. Inatsisartunut ilaasortap Hans Enoksen-ip tunngavilersuutai Atassummiit paasilluarpagut aammalu siunnersuuteqartoq isumaqatigilluinnarlutigu oqarmat inuussutissarsiutit pingaarnersaannik ingerlatitsisut sulissunneqarnerisa pitsaanerusariaqarnerannik.

Siunnersuuteqartup saqqummiineratigut Atassummiit maluginiarparput aningaasaateqarfimmut qinnuteqartartut sullinneqartarnerat kigaappallaartarsimasoq. Tamatumalu aaqqiivigilertorneqarnissaa Atassummiit naalakkersuisunut kaammattuutigissavarput.

Inuussutissarsiunermut naalakkersuisoq Atassummiit ilumoornerassavarput Immikkut Ikiorsiisarnermut Aningaasaateqarfimmik nutaamik aaqqissuussineq inatsisartuni siusinnerusukkut akuersissutigineqareersimammat. Oqaaserineqareersullu uteqqinngikkaluarlugit Atassummiit isumaqarpugut suli ingerlariaqqinnissamut periarfissiisoqartariaqartoq.

Atassummiit maluginiarparput inatsisartunut ilaasortap Lars Karl Jensen-ip (S) pingasunngornikkut apeqquteqaataagut uka 1999 71-ikkut takuneqarsissaammat Immikkut Ikiorsiisarnermut Aningaasaateqarfimmut qinnuteqarsimasut sullinneqarsimasullu qanoq amerlatigineri. Misilittagarineqartut kingusinnerusukkut naliliiviginiarneqarmata, aammalu pisariaqassappat aaqqissuussineq najoqqutassaasinnaasunillu nutaanik siunnersuusiorsinnaallutik, naalakkersuisut neriorsuimmata Atassummiit naalakkersuisut naliliigallarnerat iluarisimaarparput, taamatullu naatsuinnarmik siunnersuut oqaaseqarfigalutigu.

Ole Lynge, Inuit Ataqatigiit oqaaseqartuat:

Inatsisartunut ilaasortap Hans Enoksen-ip Siumumeersup siunnersuutaa pillugu Inuit Ataqatigiit oqaaseqarfigissavaat:

Suliamut atatillugu Inuit Ataqatigiit maluginiarpaat inuussutissarsiornermut naalakkersuisup Immikkut Ikiorsiisarnermut Aningaasaateqarfiup allaffissornikkut aqunneqarneranut atatillugu qanoq suleriaaseqartoqarnersoq pillugu nassuiaammik oqaluuserisat immikkoortuisa 71-iannut akissuteqarsimasoq.

Tamanna innersuussutigalugu Inuit Ataqatigiinni isumaqarpugut Immikkut Ikiorsiisarnermut Aningaasaateqarfiup siulersorneqarnikkut allanngortinneqarsimanera pissusissamisoortoq, taamaasilluni aningaasaateqarfimmut qinnuteqaatit pilertornerusumik suliarineqarsinnaalersimapput siusinnerusukkut malittarisassat atuutereersut tunngaviisigut allanngortinngikkaluarlugit

Allatut isigaarput KNAPK-p Immikkut Ikiorsiisarnermut Aningaasaateqarfimmut ilaasortaajunnaarsimanera, taamaaliornermut tunngavilersuutaasimavoq aalisartut piniartullu KNAPK-mut ilaasortaanngitsut aaqqissuussinermut tassunga akiliuteqartannginnerat. Inuit Ataqatigiinnit naalakkersuisunut kaammattuutigissavarput aningaasaateqarfiup allaffissornikkut aqunneqarnerani KNAPK-p allaffeqarfiata qanimut suleqatiginissaannut aqqutissiuussisoqaqqullugu.

Aalisartut piniartullu ullumikkut aningaasarsiornikkut inissisimanerat qiviaraanni, taakkuupput aalisagaasannerani piniagassallu tunisatigut isertitsissutaasinnaanerisa killeqarnerini inuussutissarsiornikkut qajannartumik inissisimasutut isigisariaqartut. Taamaattumik ilumoorpoq angallatinik piniutinillu pinngortitap pissusianik annaasaqartillutik, aamma suli qalleqqillugu inuuniarnermikkut annertuumik eqqugaasinnaasartut, taamaasillutik inuussutissarsiumminnik ingerlatseqqinnissaminnut nukissaarutsinneqarsinnaasartut.

Tamanna ilaatigut pissutigalugu Inuit Ataqatigiinnit naalakkersuisunut kaammattuutigissavarput angallatinik piniutinillu sillimmasiisarnermut tunngasut pillugit sukumiisumik misissuiffigineqarnissaat sulissutigissagaat, taamatut sulissuteqarniarnermi KNAPK-p qanimut suleqatigineqarnissaa pisariaqarpoq.

Inuit Ataqatigiit nalilerparput ullumikkut angallateerarsorlutik inuussutissarsiuteqartut sillimmasernissartik tunuarsimaarfigisaraat. Sillimmasiisarnermut akiliutaasartut qaffasippallaarneri pissutigalugit. Taamattumik periarfissat ilaattut taarusupparput angallateeqqat piniutillu ataatsimoortumik immikkullu sillimmasiivigineqarsinnaanerat misissoqqullugu.

Aalisartut piniartullu inuussutissarsiornerisa patajaallisarneqarnissaat siunertaralugu, inuussutissarsiornikkut anguniakkatigut qulakkeerniarneqartariaqarpoq sinerissap qanittuani aalisarnnerup piniarnerullu inuussutissarsiutitut allatulli kajungernarnerulernissaanut aqqutaasinnaasunik suliniuteqarnissaq. Kalaallisut inuusaatsitsinni pinngitsoorsinnaanngilarput aamma sinerissami qanittumi aalisartut piniartullu angallateqarnikkut piniuteqarnikkullu ullutsinnut naleqqussartuarnissaat, oqarsinnaavugut tamanna aallarnisarneqartoq, angallatit piniutillu peqqinnissakkut isumannaatsuunissakkut, aalaakkaasumillu inuussutissarsiutaasinnaanerisa qulakkeerniarnissaa Inuit Ataqatigiinnut pingaaruteqarpoq.

Ukiorpanni angallateerarsorneq ilaqutariippassuarnit inuuniutaalluarsimavoq, namminersorfiullunilu. Taamaakkaluartoq angallateeqqat imminnut napatissinnaassappata pisariaqartinneqaqaaq, sillimmasiisarnikkut inuttaqarnikkut assigisaatigullu ikorfartorluarneqarnissaq. Taamaattumik tamanna siunertaralugu naalakkersuisut kaammattussavagut isumalioqatigiisitamik pilersitsisinnaanissaq eqqarsaatigissagaat. Tassa susassaqartunit tamanit peqataaffigineqarsinnaasoq.

Taamatullu oqaaseqarluta inatsisartunut ilaasortap Hans Enoksen-ip siunnersuutaanut naalakkersuisut akissuteqarnerat tussatissatut tiguarput.

Mads Peter Grønvold, Kattusseqatigiit oqaaseqartuat:

Inatsisartunut ilaasortap Hans Enoksen-ip siunnersuutaa Kattusseqatigiinniit paasilluarparput, tunngaviatigullu taperserlugu. Kattusseqatigiinniit isumaqarpugut ajornartorsiutip siusinnerusukkulli aamma Kattusseqatigiinnit oqaluuserisassanngortissimasatta, ataatsimiititaliornerinnakkut qaangerneqarsinnaanera apeqquserneqartatiaqartoq.

Tassami aalisartut ajunnginnerpaamik piaarnerpaamillu sullinneqassappata, taava kommunit piaarnerpaamik ikiorsiisinnaanissaannut tunngavissiunneqartariaqartut ajornartorsiut qaangerniarlugu. Tassami aalisartut ulluinnarni saaffigisinnaasaat qaninnerpaaq tassaammat sumiiffimmi kommuneqarfik.

Kattusseqatigiinniik assersuutigalugu taakkartorusupparput Ilulissat kangerluani iluliarsuarmik aserortoqarnerani aammalu sermip uukkarneratigut Ilulissat kangerluata sikua silammut aallarneratigut piniuteqapassuit atortullu annaaneqartarmata. Aalisartunut amerlasuunut soorlu Qasigiarmiut Iluliarmiullu piniutiminnik annaasaqartartut eqqarsaatigalugit.

Taammaattumik pisariaqarpoq kommunit aalisartunut qaninnerusumik sullissisut ikiorsiisinnaanerannut tunngaviliisoqartariaqartoq. Taamatut oqaaseqarluta kattusseqatigiinniit kaammattuutigissavarput aalisartut piniutiminnik annaasaqartartut piaarnerpaamik ikiorserneqarnissaat pillugu naalakkersuisut kommunit suleqatigalugit suliniuteqartariaqartut.

Simon Olsen, Inuussutissarsiornermut Naalakkersuisoq:

Siullermik Siumumi oqaaseqartup sillimmasiisarneq inuttalersuinermilu aamma KNAPK-p peqataanissaa kaammattuutigivaa. Taamatuttaaq piniutit annaaneqarsimasut aaqqissuussaanerusumik sulissutigineqalernissaat aamma naalakkersuisuni pilersaarusiorneqassasoq kissaatigalugu .

Atassummiit oqaatigineqartut ilai maluginiarpakka, tassa inuussutissarsiutit pingaarnersaannut ingerlatsisut sulissunneqarnerisa pitsaanerusariaqarnerannik aammattaarlu aningaasaateqarfimmut qinnuteqartartut sullinneqartarnerat kigaappallaarsimasoq. Tamatumalu aaqqiiffigilertornissaa aamma kaammattuutigigaat paasinarluarpoq, tassunga tunngatillugu oqaatigissavara naalakkersuisoqarfimmi takusinnaakannilereerparput ukiumi nutaami qaammatit pingasukkaarlugit sisamariarluni suliarinnittoqartarnissaa siunniukkiartuaaripput, aammattaaq malittarisassat nutarterneqarnissaat aallatinnisarneqalereersoq aamma oqaatigisinnaavara, tassami ingerlariaqqissappat taanna periuseq.

Inuit Ataqatigiinni ilaatigut oqaatigineqarput, aningaasaateqarfiup allaffissornikkut aqunneqarnerani KNAPK-p qanimut suleqatigineqarnissaa. Aalisartut piniartullu ullumikkut aalisagaasannera pissutigalugu, qajannartumik inissisimalersimasut taamaattumik immikkut ittumik ataatsimoorussamillu aamma sillimmasiisoqartalernissaanik misissuequsineq qularutiginngivippara naalakkersuisunit akuersaarnartilluinnassagipput.

Kattusseqatigiinnit kommunit piaarnerpaamik ikiorsiisarsinnaanissaannik tunngavissiuusseqataasariaqartut, aammattaarlu Kattuusseqatigiinni erseqqissaatigineqarpoq malugitinniarneqarlunilu saaffigisassaq qaninnerpaaq tassaagajuttoq kommuneqarfik. Tassami avannaani pingaartumik massakkut aalisarluarfiusuni iluliarsuit aserornerisigut sermit uukkarnerisigut annaasarpassuaqartoqartarmat.

Partiinit suliakkiutigineqartut misissoqqissaassavagut, naalakkersuisuniillu peqqissaartumik suliarissagivut neriorsuutigissavara.

Hans Enoksen, siunnersuuteqartoq:

Qujanaq- taanna matumuuna saqqummiussara tassalu piniartut aalisartullu annaasaqarsimasut ataatsimiititaliuunneqarnissaannik, siunnersuutiga partiinik oqaaseqarfigineqarnera nuannarivara malunnarmat tunngaviatigut pitsaasumik sulissunneqarnissaat illersoraat, aamma taanna tuppalliutigivara.

Tassami ukiuni makkunani aalisarneq eqqarsaatigissagutsigu, qeqqaninngaanniit kujammut, aalisartut isaatitsiniarnerat assorujussuaq ilungersunartumik inissisimavoq. Taavalu aamma massakkut periarfissaqanngilluinnarluni sillimmasiinermut ileqqaarnissamullu akiliinissaminnut, isertitaat ima annikitsigipput ingerlatsinerminnut taamaallaat massakkut matussutissaqarsinnaallutik. Ilaalu aamma immaqa nuliamik suliffeqarnerat iluaqutigalugu taamaallaat, ingerlaniartutut oqaatigineqarsinnaasut amerlasoorpassuit massakkut atorpaat, nunatta sineriaani.

Taava susaavinnerminngaanniit pitsaanerusutut isigaara KNAPK tassani aamma eqqartorneqarmat, taavalu ataatsimiititaliamit nalilersuisartussanik taakkunani aamma peqataasinnaaneruneq periarfissat naalakkersuisumit oqaatigineqartoq qujassutigivara.

Neriuppungalu suleriarneq ullumikkornit suli pitsaanerusumik ingerlanneqalissasoq, aammalu taanna nalilersuinissaq qilanaarivarput, siunissami qanoq ingerlariaqqinnissaanut.

Oqaluuserisaq naammassivoq.