Oqaluuserisassani immikkoortoq 81 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 1. november
1999 nal. 14.20
Ataatsimiinnermik
aqutsisoq:
Inatsisartut Siulittaasuat Johan Lund Olsen.
Loritha Henriksen, Apeqquteqaateqartoq, Kattusseqatigiit:
Qujanaq, naluneqanngilaq
ilinniartut atualertaraluartut, ilaasa atuakkatik kalaallisuunik
amigaateqarneri malinnaaffineq ajormatigit, artorsaatigisarlugillu. Uffa naak
kalaallisut pikkorissuseqaraluarlutik, qallunaatut oqaatsit itisuut pineqaleraangata
malinnaaniarnertik ilungersuulertarpaat.Oqaatsit tunngaviisa sukumiisumik
paasinissaat ajornartorsiutigisaramikkit.
Assersuutigiinnarsinnaavarput
inunnik isumaginnittunngorniat perorsaasunngorniallu atualertaraluartut qassiit
uniinnartartut. Atuakkanik perorsaanermut tunngasunik, kalaalerpaluttunik
peqqutigalugu, tunuarsimaarneq imminullu sapersorineq qaangerneqassappat
pisiaqarpoq, ilinniartunik naleqqussakkanik piaartumik suliniuteqalernissaq.
Nalunngilluinnaraluarparami
qallunaatut ilinniutaasartut ajunngitsortaqaqisut, tamakkulu
pinngitsoorsinnaanngikkigut, ilinniartitaanermimi aamma atussallugit
taamaattut.
Apeqqutigerusupparali
inunnik isumaginnittunngorniat perorsaasunngorniallu atuarfianni atuakkat
kalaalerpaluttut, kalaallinullu naleqqussakkat amigaataaqisut qaqugu
pimoorullugit suliniutigineqalissanersut, ukiummi arlallit taakkua
oqallisigineqarmata.
Lise Skifte
Lennert, Kultureqarnemut
Ilinniartitaanermut Ilisimatusarnermullu Naalakkersuisoq:
Inatsisartunut ilaasortap
Loritha Henriksen-ip kalaallisut ilinniusiorneq pillugu, apeqquteqaataanut
Naalakkersuisut imaattumik paasissutissiissapput:
Naalakkersuisut isumaqarput
ilinniutit kalaallisoortut soorunami salliutinneqartariaqartut, taamaammallu
meeqqat atuarfianni inuussutissarsiutinut ilinniarfinni kiisalu ilinniarfinni
qaffasinnerusuni, atuakkat kalaallisuut ikinngeqisut suliarineqartareerput.
Taamaakkaluartoq atuakkat
kalaallisoortut suli amerlaqisut amigaatigineqarput, tassunga atatillugu
isiginiarneqartariaqarpoq, ilinniusiornerup killeqarneranut aningaasat kisimik
killiliisuunngimmata. AG-mi qanittukkut allaaserineqartutut, ilinniusiorneq
piffissamik sivisoorujussuarmik ingerlanneqartarpoq. Kiisalu atuakkiortut
perorsaanermik ilisimasaqartut pisariaqartinneqarlutik.
Ilinniutit ilaatigut
ajornaquteqanngitsumik , imaallu allanngortinnagit
kalaallisuunngortinneqarsinnaapput. Atuakkalli ilinniutit kalaallisut
oqaasertallit, nunatsinni atukkatsinnut naleqqussakkat suliarineqassappata,
nukiit amerlanerusut pisariaqartinneqarput. Tamatumanilu
nassuerutigisariaqarpoq, kalaallit ilinniusiorsinnaasut piginnaanillit
naammattut pissarsiarinissaat ajornartorsiutaammat.
Tamatumanilu aamma
eqqaamaneqartariaqarpoq ilinniarfinni qaffasinnerusuni, ilinnialissagaanni
ilinniarnertuutut angusisimanissaq piumasarineqartarmat, taamalu marluinnik
oqaaseqarnissaq naatsorsuutigineqartariaqarluni. Naak oqaatsinik
ajornartorsiuteqarneq pissutigalugu ilinniartut ilaatigut ilinniarnerminnik,
unitsitsiinnartaraluartut Naalakkersuisut isumaqarput ilinniakkanik
unitsitsisarnerit allarpassuarnik aamma pissuteqartut.
Isumaginninnermi
perorsaasutut ilinniartitaaneq, apeqquteqaammi immikkut eqqaaneqarmat,
Perorsaanermut Ilinniarfik attavigineqarsimavoq, oqaaseqaateqarnissaanillu
qinnuigineqarluni atuakkiorfimmi ilinniusiorfik aamma
tusarniaaffigineqarsimavoq.
Perorsaanermut Ilinniarfik
ilisimatitsivoq isumaginninnermi peqqissaanermilu ikiortinngorniat,
ilinniartitaaneranni ilinniutit sapinngisaq naapertorlugu
kalaallisuunngortinneqartarsimasut. Taamaattorli ilinniutit isumaginninnermi
atugassat kalaallisut allanneqarsimasut, suli amigaatigineqarput, taakkunanili
ilinniartitsisut sapinngisamik kalaaliutinneqartarlutik.
Inuussutissarsiutinut
Ilinniarfinni kalaallisut ilinniusiornerit qitiusumik ilinniarfiit ataatsiakkaat
akisussaaffigaat . Assersuutigalugu Perorsaanermik Ilinniarfimmi ukiumut
akunnerit 100-it ilinniusiornermut atorneqartarput. Naggataatigullu
oqaatigissavara ilinniusiornermut anigaasartuutit, ilinniarfinnit
ataasiakkaanit isumagineqartarmata, qujanaq.
Loritha Henriksen, Kattusseqatigiit:
Qujassutigaara akissuteqarmat taama erseqqilluinnartigisumik, tassa uanga isumaqarama allakkat taamaattut, avanngaanniit uagutsinnut allagarineqartut ingerlateqqissallugit aamma pisussaasu-nga, taamaattumik tusaatissatut tiguara, aamma qujanaq nassuiaatinnut.
Immikkoortoq 81 naammassivoq.