Kalaallit Nunaanni Inatsisartut

Oqaluuserisassani immikkoortoq 90		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ataasinngorneq 25. oktober 1999 nal. 13.25

Oqaluuserisassani immikkortoq 90

Namminersornerullutik Oqartussat naatsorsuuseriveqarnerat il.il. pillugit Inatsisartut inatsisaanni § 5, imm. 1 naapertorlugu kukkunersiuisumik naalagaaffimmit akerisamik Inatsisartut qinersinerat.

(Kukkunersiuinermut Ataatsimiititaliaq)

Ataatsimiinnermik aqutsisoq: Johan Lund Olsen, Inatsisartut Siulittaasuat.

Lars Karl Jensen, ataatsimiititaliap siulittaasua, Siumut:

Namminersornerullutik Oqartussat naatsorsuuseriveqarnerat il.il. pillugit Inatsisartut inatsisaanni § 5, imm. 1 naapertorlugu kukkunersiuisumik naalagaaffimmit akuerisaasumik Inatsisartut qinersinissaat pillugu, Landskarsip naatsorsuutaasa kukkunersiorneqartarneranut ataatsimiititaliap isumaliutissiissutaa.

Landskarsip naatsorsuutaasa kukkunersiorneqartarneranut ataatsimiititaliaat suliarinninnermi ukuninnga inuttaqarpoq:

Lars Karl Jensen, Siumut, siulittaasoq, Lars Sørensen, IA, siulittaasup tullia, Per Rosing Petersen, Siumut, Daniel Skifte, Atassut aamma Mogens Kleist, Kattusseqatigiit.

Inatsisartut Landskarsip naatsorsuutaasa kukkunersiorneqartarnerinut ataatsimiititaliaq ataatsimiippoq ulluni 18. aamma 20. oktober 1999. Kukkunersiuinermut Ataatsimiitaliap Inatsisartunut inassutigaa kukkunersiuisarfik naalagaaffimmik akuerisaasoq Deloitte & Touche Nuuk, ukiumoortumik 1999 Landskarsip naatsorsuutaannik tassungalu ilanngullugu ingerlatseqatigiiffimmik namminersortitanik kukkunersiuisuussasoq.

Deloitte & Touche-lu ukioq 2000-mi ukiakkut ataatsimiinnissap piffissamut Inatsisartut kukkunersiuisumik naalagaaffimmik akuerisaasumik qinerseqqinnissaasa tungaanut Inatsisartunit kukkunersiuisutut atuutissapput.

Siunnersuummi Inatsisartut kukkunersiuinermut ataatsimiititaliaata kukkunersiuisunut avataaneersunut kukkunersiuinermut isumaqatigiissutit akuersissutigisalissavaa imaluunniit aaqqereerpata akuersissutigisalissavai.

Tassalu oqareernittuut ataatsimiititaliami ilaasortat Mogens Kleist, Kattusseqatigiit, Daniel Skifte Atassut, Lars Sørensen Inuit Ataqatigiit, Per Rosing Petersen Siumut, Lars Karl Jensen-ilu Siumut Ataatsimiititaliami siulittaasusoq taamatut inassuteqarput.

Josef Motzfeldt, Aningaasaqarnermut Naalakkersuisoq:

Suliffeqarfiup naatsorsuuserisut Deloitte & Touche-p Nunatta karsiata naatsorsuutaanik kukkunersiuisartutut aamma suliffeqarfiit namminersortitat naatsorsuutaannik kukkunersiuisartutut qinerneqaqqinnissaanik Kukkunersiuinermut Ataatsimiititaliap inassuteqaataanni Naalakkersuisut isumaqataapput.

Kukkunersiuineq pillugu kukkunersiuisunik avataaneersunik isumaqatiissuteqartarnissaq pillugu suleqatigiinnissamut pitsaasumut Naalakkersuisut qilanaarput.

Per Rosing Petersen, Siumup oqaaseqartua:

Landskarsip naatsorsuutaasa kukkunersiorneqartarnerinut ataatsimiititaliap kukkunersiuisumik naalagaaffimmik akuerisaasumik Inatsisartut qinersinissaat pillugu isumaliutissiissutaani inatsisartuniit ima oqaaseqarfigissavarput.

Kukkunersiuinermut ataatsimiititaliaq Inatsisartunut inassutigaa Deloitte & Touche Nuummi allaffeqartoq 1999-imut Landskarsip ukiumoortumik naatsorsuutaannik tassunga ilanngullugu ingerlatseqatigiiffinnik namminersortunik kukkunersiuisassasoq. Tamannalu Siumumiit isumaqatigaarput.

Siumumiilli ilallugu siunissami kukkunersiuisartunik avataaneersunik imminnut attuumassuteqanngitsunik marlunnik toqqaasalernissaq misissugassatut siunnersuutigerusupparput.

Ilanngullugulu siunissami Inatsisartut kukkunersiuinermut Ataatsimititaliaata kukkunersiuisunut avataaneersunut kukkunersiuinermut isumaqatigiissummut isumaqatigiissutinut akuersisalernissaanut misissugassanngorlugit innersuussinera Siumumiit tamakkiisumik taperserparput.

Daniel Skifte, Atassutip oqaaseqartua:

Landskarsip naatsorsuutaasa kukkunersiorneqartarnerinut Ataatsimiititaliap isumaqatigiissup Atassutip malikkumavaa.

Tassalu kukkunersiuisarfik naalagaaffimmit akuerisaasoq Deloitte & Touche Nuummi allaffeqarfeqatoq toqqarneqassasoq. Tamanna atuutissaaq aappaagu ukiakkut Inatsisartut apeqqummik nalileeqqinnissaata tungaanut.

Atassummiit pingaartutut isigaarput Inatsisartut kukkunersiuisussamik avataaneersumik atorfinitsitsisarnissaat. Kukkunersiuisarnermilu suliassap piareersarneqarnerani qaffasinnerusumik akisussaaffeqartinneqarnissaat. Soorlu taamatut inatsimmi aalajangersaaneq malillugu.

Lars Sørensen, Inuit Ataqatigiit oqaaseqartuat:

Landskarsip naatsorsuutaasa kukkunersiorneqarnerinut Ataatsimiititaliap isumaliutissiissutaani inassutigineqartut Inuit Ataqatigiinniit akuersaarpavut.

Tassalu kukkunersiuisarnermut tunngasut 1999-mi Deloitte & Touche-minngaanniit tassa Nuummi allaffeqartuminngaanniit ingerlanneqarnissaat akuersaarparput.

Mogens Kleist, Kattusseqatigiit oqaaseqartuat:

Namminersornerullutik Oqartussat naatsorsuusivigineqarnerat il.il. pillugit Inatsisartut inatsisaanni § 5, imm. 1 naapertorlugu kukkunersiuisumik naalagaaffimmik akuerisaasumik Inatsisartut qinersinerat pillugu Kattusseqatigiinniit imatut oqaaseqassaagut.

Inatsisartut Kukkunersiuisuisa innersuussutaat tassalu Deloitte & Touche-mik taasinerat tapersersorlugu Kattusseqatigiinniit akuersaarluta taaseqataassaagut.