Oqaluuserisassani immikkoortoq 96 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 1. november
1999 nal. 15.00
Ataatsimiinnermik
aqutsisoq:
Inatsisartut Siulittaasuat Johan Lund Olsen.
Anthon Frederiksen, Kattusseqatigiit, apeqquteqartoq:
Sulisoqarneq pillugu
Namminersornerullutik Oqartussat ersarissumik politikkeqalernissaat pillugu
qnoq isumaliutersuuteqartoqarnersoq paaserusuppara. Tassami kalaallinik
pisortassanik pisortanillu Namminersornerullutik Oqartussat suliffeqarfiutaanni
allaffeqarfiinilu ilinniartitsinerit qanoq ingerlanneqarpat, aammalu kalaallit
suli annerusumik siunissami sulisorineqarnerulernissaat anguniarlugu qanoq
iliuuseqartoqarniarnersoq matumuuna apeqqutigivara.
Josef Motzfeldt, Aningaasaqarnermut Niuernermullu
Naalakkersuisoq, Naalakkersuisut Siulittaasuat sinnerlugu akissuteqarpoq:
Siullermik
erseqqissaqqaarlara sulisut maani inunngorsimasuugunik inuunermilluunniit
ilaanni kingusinnerusukkut maani nuussimasuugunik ilungersorlutik
pisinnaasartillu tamakkerlugu sulissasut Naalakkersuisut tatiginnillutik
tunngaviusumik naatsorsuutigimmassuk.
Taamatut oqartoqarnerani
suliassaqarfinni tamani sulisunik najugaqavissunik imminut pilersulernissarput
Naalakkersuisut anguniagarigaat qularutigineqassanngilluinnarpoq. Qitiusumik allaffeqarfissuarmik
Naalakkersuisut misissueqqissaartitsinerata PLS Consultimit ingerlanneqartup
allaffeqarfissuarmi sulisorineqartut - tikisitaagunik
najugaqavissuugunilluunniit - suliassaqarfimmi tassani Naalakkersuisut
anguniagaat isumaqatigigaat aamma takutippaa.
Namminersornerullutik
Oqartussat eqqarsaatigalugit Naalakkersuisut sulisoqarnikkut ingerlatsineranni
makku suliniutigineqarput:
Siullermik maannakkornit
annertunerusumik, sulisooreersut tigummiinnarneqarnissaat kiisalu
Namminersornerullutik Oqartussani sulinissaminnut piukkunnaateqartunik
sulisussarsiortarnissaq anguniarneqarput. Matumani najugaqavissut tikisitallu
eqqarsaatigineqarput. Tamanna sulisoqarnikkut ilinniartitaanikkulluj
uummaarissumik ingerlatsinikkut sulisut suliffimminni ineriartornissaannut
qaffakkiartornissaannullu annertunerusumik periarfissiinikkut
ingerlanneqassaaq. Sulisut suli annertunerusumik tigummiinnarneqarnerisigut
misilittakkanik piorsaalluni katersisoqarnissaa, suliat ingerlaavartumik
ingerlanneqarnissaat, taamalu ulluinnarni suliat aamma annertunerusumik
pitsaassuseqalernissaat Naalakkersuisut neriuutigalugulu kissaatigaat.
Taamaaliornikkut nunatsinni innuttaasut Namminersornerullutik Oqartussanut
saaffiginninnerminni sapinngisamik pitsaanerpaamik kiffartuunneqartarnissaat
qulakkeerneqassaaq.
Aappaattut Naalakkersuisut
tunngaviusumik isumaqarput atorfik inuttaqanngitsoq qinnuteqaateqartumik
piukkunnaateqarnerpaamik inuttalerneqartassasoq. Tamatumunnga atatillugu
kalaallisut oqaatsitsinnik inuiaqatigiinnillu kalaallinik sivisuumik
sukumiisumillu ilisimasaqarsimanissaq immini piukkunnaataasoq
erseqqissassallugu pingaartuuvoq. Kisiannili aamma nassuerutigisariaqarparput
piginnaasat taakkua, tamatigut suliamut atatillugu ilinniagaqarsimanermik,
inuiaqatigiit nunatsinnisut nutaaliaasut ingerlanneqarnerannut pisariaqartumik,
taarsiisinnaanngimmata.
Naalakkersuisut qitiusumik
allaffeqarfissuarmik PLS Consultip misissueqqissaarnerannit nalunaarusiami
qanittunnguakkut saqqummersumi kaammattuuterpaalussuit ilaapput, taakkulu ilaat
apeqquteqaateqartup paaserusutaanut attuumassuteqarluinnarput. PLS-ip ilaatigut
siunnersuutigaa allaffissuaqarfik sulinerup aaqqissuunneqarneranut
pikkorinnerulertariaqartoq, taamaalillutik tikisitat immikkut ilisimasallit
namminneq suliassaqarfimminnuinnaq tunngassuteqartunik
sulisinneqartaleqqullugit; taamatuttaaq ilinniartitseqqittarnerup
sammivilersorluagaanerunissaa PLS-ip siunnersuutigaa. Suliassaqarfimmi tassani
ingerlatsinermik siuarsarneqarnissaanut nalunaarusiap taassuma qanoq iliorluni
atorluarniarneqarnissaa ukiap ingerlanerani Naalakkersuisut nalilersorniarpaat.
Apeqquteqartup kalaallit
pisortassatut ilinniartitaanerat immikkut apeqqutigaa. Tassunga atatillugu
erseqqissumik oqaatigisinnaavara kalaallit sulisorineqartut arlallit ataatsimoortillugit
massakkut ilinniartinneqalersimammata, immikkoortut sisamat aqqutigalugit
pisortanngornialernermut atatillugu ilinniartinneqalersimallutik.
Pikkorissartitsinermi tassa siunertarineqarpoq Namminersornerullutik
Oqartussani pisortassatut piukkunnaateqarsinnaasut siunissami pisortatut
sulissagaanni sunik piumasaqaateqartoqarneranik paasissutissinneqarnissaat.
Ilinniartitaanerup taassuma ilaatigut pisortatut siulersueriaatsit nutaat
pisortallu siulersueriaatsimi pissutsit assigiinngitsut pillugit atuagarsorneq,
pisortatut siulersuinerup misilinneqartarnera kiisalu pisortatut siulersuinermi
inuttut nammineq anguniakkat pilersaarutillu imarai. Naggataatigullu
minnerunngitsumik pisortatut siulersuinermi attaveqatiginnittarnerup
pingaaruteqassusia aamma ilaatinneqarluni.
Pisortanngornialernermut
atatillugu ilinniartitsinerup saniatigut Namminersornerullutik Oqartussani
massakkut pisortaasut pisortatut siulersueriaatsinik
ineriartortitsisinneqalernissaat Naalakkersuisut pilersaarusiorpaat. Pisortatut
siulersueriaatsinik ineriartortitsisitsinermi tassani siunertarineqarpoq
massakkut pisortaasut pisortallu nutaat pisortatut ulluinnarni
ingerlatsinerminnik sakkussaannik pitsaanerusunik peqalersinneqarnissaat.
Namminersornerullutik Oqartussat qitiusumik allaffeqarfissuata
peqataatinneqarnissaanut periarfissat misissorniarlugit kalaallit pisortatut
sulisorineqartut Naalakkersuisut Aaqqissuussinermut
Ilinniartitseqqittarnermullu immikkoortortaqarfiata attaveqarfigisimagai
erseqqissumik oqaatigisinnaavara.
Suliniutit taakku
inerititaqarfiulluarnissaat Naalakkersuisut neriuutigaat. Kisianni sulisut
ataasiakkaat ilinniartitaanerni qulaani taakkartorneqartuni piffissamik
nukinnillu atuinissaminnut piumassuseqarnissaat tunngaviuvoq
pingaaruteqarluinnartoq. Sulisuvut taamaaliornissaminnut piumassuseqartut
PLS-ip nalunaarusiamini eqikkaalluni naliliinermini oqaatigaa.
Piffissami aggersumi
suliassaqarfimmi tassani suliniutit Naalakkersuisut ineriartorteqqinniarpaat,
PLS-illu nalunaarusiaani kaammattuutigineqartut tunngavigalugit suut
aalajangiunneqarsimanersut Inatsisartullu 2000-imi upernaakkut
ataatsimiinneranni ilisimatitsissutiginiarlugu. Taamatut oqaaseqarlunga
apeqquteqaateqartoq qutsavigaara.
Anthon Frederiksen, Kattusseqatigiit:
Qujavunga akissuteqaammut
ersarissumut, aammalu pilersaarutit nuannersut taamaalillunga
qujassuteqarfigalugit.
Oqaluuserisaq naammassivoq.