Oqaluuserisassani immikkoortoq 98 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 1. november
1999 nal. 15.12
Ataatsimiinnermik
aqutsisoq: Johan
Lund Olsen, Inatsisartut Siulittaasuat.
Anthon Frederiksen, Kattusseqatigiit:
Qujanartumik kommunit ukiuni
kingullerni aningaasaqarnikkut inissisimanerat pitsanngoriarsimavoq, aammalu
qularnanngilaq kommunit tamarmik inuussutissarsutinik ineriartortitsinissaq
soqutigalugu pimoorullugulu sulissutigigaat.
Kommunimmi arlallit
pilersaarutiminnik anguniakkaminnillu soqutiginnillutik Namminersornerullutik
Oqartussanut saaffiginnissuteqartartut ilisimaneqarpoq, kisiannili landskarsip
amerlanertigut kisimi isumalluutigineqartarnera aammalu nuna tamakkerlugu
pilersaarusiortarnermi periutsit ilaatigut pissutigalugit kommunit ilaat
suliniutiginiaraluakkamik ingerlateqqeriarsinnaaneranik mattunneqartarput. Uffa
massa Naalakkersuisut kommunit pisinnaatitaaffiisa annertusineqarnissaat
oqaatigineqartaraluartoq, taamaattoq kommunit piffiit ilaanni
nammineersinnaatitaanerat akimmisinneqartarluni.
Taamaattumik apeqqutiginiarpara
kommunit nammineersinnaatitaanerat qaqugu tamakkiisumik atuutilissanersoq,
tassa kommunit pilersaarutiminnik namminneq aningaasatigut inissisimanertik
akiliisinnaassusertillu aallaavigalugu ilaatigut aningaasalersueriaatsit assigiinngitsut
atorlugit landskarsi kisiat isumalluutiginngikkaluarlugu
piviusunngortitsisinnaanerat qanoq Naalakkersuisuniit isumaqarfigineqarnersoq
paaserusuppara.
Steffen Ulrich-Lynge, Ineqarnermut, Attaveqarnermut
Pilersuinermullu Naalakkersuisoq:
Siullermik oqaatigissavara,
isumaqarpunga apeqquteqaat paatsoorneqalaarsimasoq, taamaattumik akissutaa
aamma tamakkiisuunngitsoq. Kisianni taanna pingaarnersiulaarusuppara.
Namminersornerullutik
Oqartussat nuna tamakkerlugu pilersaarusiorneranni sanaartugassanillu
pilersaarusiorneranni Naalakkersuisoqarfiit ataasiakkaat immikkoortunut
pilersaarusiaat kommunillu piersaarusiaat kommunit sanaartugassatut
kissaatigisaminnik Namminersornerullutik Oqartussanut saqqummiuttagaat
ilanngullugit aallaavigineqartarput.
Kommunit kommunimut
pilersaaruminnut inuussutissarsiutinut tunngasut siunissamilu
ineriartortitsinissamut pilersaarutit ilanngullugit suliarisarpaat.
Pilersaarutit tamakku kommunit Namminersornerullutik Oqartussat
ingerlaavartumik attaveqarfigisarnerisigut aamma sanaartugassanik
kissaatigisanik Namminersornerullutik Oqartussanut ukiumut
nalunaaruteqartarnertigut malitseqartittarpaat.
Anthon Frederiksen, Kattusseqatigiit:
Tassa Naalakkersuisup
nammineerluni oqaatigivaa apeqquteqaatiga iluamik Naalakkersuisoqarfimminngaanniit
itinerulaartumik paasineqarsimanngitsoq. Naatsorsuutigissavara
itisiliinerulluni akissuteqarfigiumaaraanga kingusinnerulaartukkut. Qujanaq.
Oqaluuserisaq naammassivoq.