Kalaallit Nunaanni Inatsisartut

Oqaluuserisassani immikkoortoq 99		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ataasinngorneq 1. november 1999 nal. 15.16

Oqaluuserisassani immikkoortoq 99

Nunaqarfinni namminersortut KNI Pilersuisullu akornanni niueqatigiinnermi periarfissat pitsaanerulersinneqarsinnaanerata Naalakkersuisut qanoq siunnersuuteqarfigisinnaanerannut tunngatillugu pingasunngornikkut apeqquteqaat.

(Anthon Frederiksen)

Ataatsimiinnermik aqutsisoq: Johan Lund Olsen, Inatsisartut Siulittaasuat.

Anthon Frederiksen, Kattusseqatigiit:

Namminersortut periarfissinneqarnissaat inimi maani aamma eqqartortaqaarput tapersersorlugulu, tamannalumi aamma OECD-ip nalunaarusiaani periarfissat ilaattut eqqartorneqarpoq, tassa nunatsinni aningaasarsiornikkut iluaqusiisinnaasutut aamma.

Nalunngilarput nunaqarfinni namminersortut ilaat pisiniarfeeqqanik ingerlataqartut aammalu taakkua amerlanertigut KNI Pilersuisumut isumaqatigiissuteqartartut niueqatigiinnermut tunngasunik, kisiannili aamma ajoraluartumik nunaqarfiit ilaanni KNI Pilersuisoq ima sakkortutigisumik pissuseqarsinnaasarsimavoq, allaat pisiniarfeeraatillip quersuarmulluunniit isersinnaanera mattutivittarsimallugu, taamaallaalli nioqqutissanik allakkatigut inniminniisinnaaneq kisiat periarfissiullugu, aammalu nioqqutissat ilaatigut ajoqutillit utertissinaanerannut mattussivittarsimallutik.

Nalunngilarput nunaqarfimmiut periarfissaat allanut naleqqiullugit annikinneralaarsuusut, taamaattumik apeqqutiginiarpara ilumut KNI Pilersuisoq nunaqarfinni namminersortunut allamik isumalluutissaqanngitsunut taama sakkortutigisumik iliuuseqarsinnaanera Naalakkersuisunit akuerineqarsinnaanersoq imaluunniit namminersortut nunaqarfinni najugaqartut taamatut KNI Pilersuisullu akornanni niueqatigiinnermi periarfissaat qanoq ilillugit pitsaanerulersinneqarsinnaanerat Naalakkersuisut siunnersuuteqarfigisinnaaneraat?

Josef Motzfeldt, Aningaasaqarnermut Niuernermullu Naalakkersuisoq:

Inatsisartunut ilaasortap Anthon Frederiksenip apeqqutigaa namminersortut allanik periarfissaqanngitsut KNI Pilersuisoq A/S-imiit sakkortuumik pissuseqarfigineqartarnerat Naalakkersuisunit akuersaarneqarsinnaanersoq, kiisalu nunaqarfinni namminersortut aamma KNI Pilersuisoq A/S-ip akornanni periarfissat suleqatigiinnerullu pitsanngorsarneqarnissaanik Naalakkersuisut qanoq isumaliuteqarnersut.

Siullermik, KNI Pilersuisoq A/S-ip niuertarfiutaasa saniatigut nunaqarfinni niuertarfiit qassiunersut iluamik ilisimaneqanngilaq. Tamanna erseqqinnerusumik ilisimalissavarput assersuutigalugu inuussutissarsiummik ingerlaqartunik nalunaarsuiffik ippassigami akuerineqartoq atorneqalissappat. Tamannattaaq pissutigalugu KNI Pilersuisoq A/S-ip nunaqarfinni namminersortunut sakkortuumik pissuseqartarsimaneranik oqarneq Naalakkersuisut isummerfigiuminaatsippaat. Naalakkersuisut ilisimatinneqarput KNI Pilersuisoq A/S-ip nunaqarfinni niuertui quersuarnit nioqqutissarsisarnissaq pillugu isumaqatigiissuteqarfigineqarsinnaasut imaluunniit illoqarfimmi qaninnermi Pisiffik A/S-ip quersuinit toqqaannartumik pisinikkut KNI Pilersuisoq A/S-ip niuertuisa nioqqutissat pisiarisartagaasut akillit nunaqarfinni namminersortunit pisiarineqarsinnaasut.

Aammattaaq nunaqarfinni namminersortut taamaallaat KNI Pilersuisoq A/S-imit imaluunniit KNI Pisiffik A/S-imit nioqqutissanik inniminniisinnaanerat ilumuunngilaq. Namminersortut niuertumit allamit nioqqutissanik inniminniinissaminnut, soorlu Danmarkimiit kimilluunniit akornusersorneqanngillat, imaluunniit illoqarfinni namminersortut allat pisiniaqatigisarnissaannik isumaqateqarnissaminnut kimilluunniit akornusersorneqaratik. KNI Pilersuisoq A/S-ip pisariinnerpaajunera immaqaluunniit akikinnerpaajnera, quersuarneersunik pisiniarnisamut periarfissat atuuttut atorneqartarnerannut pissutaagunarpoq. Kisiannili tassa niuertut namminersortut ataasiakkaat namminneerlutik aalajangertarpaat nioqqutissaarniat sorliit atussanerlugit.

Nunaqarfinni quersuit eqqarsaatigalugit niuertut namminersortut ataasiakkaat sikuunerani nioqqutissaatiminnik KNI Pilersuisoq A/S-ip quersuiniititsisinnaapput akeqanngitsumik. Taamaalillutik namminersortut quersuarniititsinissaminnut akissaajaatit ileqqaartarpaat. Aammattaaq nunaqarfinni niuertut ataasiakkaat allanik iluaqutissaqarput. Niuertoq KNI Pilersuisoq A/S-imik niueqateqartuartarpat nioqqutissallu amikkisaarutaalerpata taava nioqqutissat niuertumit KNI Pilersuisoq A/S-imillu kammagiittut avinneqassapput.

Nioqqutissanik pilersuinermi kiffartuunneqarnissamik isumaqatigiissutit tunngaviusut ilisimaneqartutut nutaat aappaagut Naalakkersuisunit isumaqatigiinniutigineqassapput. Namminersornerullutik Oqartussat KNI Pilersuisoq A/S-illu tunngaviusumik isumaqatigiissutaat isumaqatigiissutit siullersaattut taaneqartarsimavoq. Isumaqatigiissutikkut tassuuna KNI Pilersuisoq A/S-ip patajaallisarneqarnissaa anguniagaasivoq, Naalakkersuisullu isumaqarput tamanna anguneqarsimasoq, allaammi naatsorsuutigineqaraluartumit pitsaanerusumik. Taamaammallu Naalakkersuisut aamma isumaqarput tunngaviusumik isumaqatigiissut nutaaq aallaqqaammut isumaqatigiissuteqarfigineqarsimasumut, tassa KNI Pilersuisoq A/S-imut, isumaqatigiinniutigineqassasoq. Naalakkersuisullu isumaqarput tunngaviusumik isumaqatigiissutitut atuuttutut ullumikkut nunatta karsianut artukkiinnginnerusumik nutaamik isumaqatigiissuteqarnissamik naatsorsuutigineqarsinnaasoq taarserneqassasut.

Anthon Frederiksen, Kattusseqatigiit: Qujanaq.