Oqaluuserisassani immikkoortoq 01 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq, Inatsisartut Siulittaasuat Knud Sĝrensen:
Inatsisartunut Naalakkersuisunullu ilaasortat matumuuna uummammik pisumik tikilluaqqussavakka.
Marlunngornermi aprilip arfineq pingajuanni - eqqaamaneqarluarunarpoq - Kalaallit Nunaanni kommunimut qinersisoqarpoq. Tamanna pissutigalugu Inatsisartunut ilaasortat arlallit maanna upernaakkut ataatsimiinnitta aallartinnerani peqataasinnaannginnertik pillugu qinnuteqaateqarsimapput, kommunalbestyrelset inissititerlutik ataatsimiinnissaanni peqataanissartik kissaatigisimagamikku.
Inatsisartut Siulittaasoqarfianni aalajangersimavugut Inatsisartunut inassutiginiarlugu, kommunalbestyrelset inissititerlutik ataatsimiinnerat pissutigalugu Inatsisartut ataatsimiinneranni peqataasinnaannginneq pissuteqavilluni peqataasinnaannginnertut isigineqassasoq.
Taamaattumillu ataatsimiinnerup matuma ammarnerani ilaasortat nalunaarsorsimasut peqataasinnaanngikkallarnissaminnik qinnuteqaataat Inatsisartut isummerfigissavaat:
Hans Enoksen - ullumimiit majip tallimaat 1997 ilanngullugu
Anthon Frederiksen - ullumimiit majip aallaqqaataa 1997 ilanngullugu
Siverth K. Heilmann - ullumimiit majip 22-at 1997 ilanngullugu
Finn Karlsen - ullumimiit aprilip 21-at 1997 ilanngullugu
Maliinannguaq M. Mĝlgaard - ullumimiit aprilip 28-at 1997 ilanngullugu
Peter Ostermann - ullumimit majip sisamaat
1997 ilanngullugu
Taaneqartut tamarmik kommunalbestyrelsenut
qinersineq pissutigalugu peqataasinnaannginnertik qinnuteqaatigisimavaat.
Tulliullugu siniisussat uku
aggersarneqaqquneqarsimapput:
Tage Lennert - Hans Enoksen-ip peqataannginnerani
aprilip 18-aniit majip tallimaat ilanngullugu
Mikael Eriksen - Anthon Frederiksen-imut
sinnissussaq piffissaq tamaat
Amalie Markussen - Maliinannguaq M.
Mĝlgaard-imut sinniisussaq, aamma piffissaq tamaat
John Ibsen - Finn Karlsen-ip sinniisussaa
- ullumimiit aprilip 20-at 1997 ilanngullugu
Sofie Kielsn - Peter Ostermann-ip
peqataannginnerani - ullumimiit majip sisamaat 1997 ilanngullugu
Siverth K. Heilmann-ip sinniisussaanut
atatillugu Siulittaasoqarfiup sinniisussaq kingusinnerusukkut aggersarniarpaa,
maannakkumut periarfissaqarsimanngimmat Inatsisartut ataatsimiinneranni
ullormi siullermi najuutissalluni.
Siulittaasoqarfiup qinnuteqaatit
akuersissutigisimavai soorunami naatsorsuutigalugu Inatsisartuninngaanniit
akuerineqassasut. Kiisalu aamma Siulittaasoqarfiup immikkut isiginiarsimavaa
Qinersinermi Misilinneqarnissamut Ataatsimiititaliap akuersaarnissaa
naatsorsuutigalugu akuerineqarumaartut.
Qinersinerup Misilinneqarnissaanut
Ataatsimiititaliap ullumikkut akuerisimavaa inassutigissallugulu sinniisussat
Inatsisartuninngaanniit immikkut oqaaseqarfiginagit akuerineqarnissaat.
Qinigaasinnaanermut tunngasumik
misiliineq, sinniisussanut tunngatillugu, pisimavoq ' 8 imm. 5 Inatsisartut Naalakkersuisullu pillugit
Inatsimmi, kiisalu ' 1, 17
aamma 18 Inatsisartut Suleriaasianni naapertorlugit.
Tamatuma kingorna Siulittaasoqarfiup
Inatsisartunut inassutigissavaa peqannginnissamik qinnuteqaatit Qinersinerup
Misilinneqarnissaanut Ataatsimiititaliamminngaanniit akuersissutigineqarsimasut
akuereqqullugit.
Akuerineqarput.
Taamaattumik Mikael Eriksen, John Ibsen,
Sofie Kielsen kiisalu Amalie Markussen qinnuigissavakka Inatsisartut
ataatsimiittarfianni inissaminnut igeqqullugit. Sinniisussallu Inatsisartut
upernaaq manna 1997-imi ataatsimiinnissaannut tikilluaqquakka.
Taavalu maannakkut ullormut
oqaluuserisassaq saqqummiuttussaagakku Inatsisartut siulittaasuata tullia
siulleq Ruth Heilmaan qinnuigissavara ataatsimiinneq aqulaaqqullugu.
Ataatsimiinnermik aqutsisoq, Ruth Heilmann.
Knud Sĝrensen, Inatsisartut Siulittaasuat:
Tikilluaqqusereernerup kingornagut tulliullugu ataasiakkaat oqaaseqarfigissavakka.
Siulittaasoqarfiup ippassaq ualikkut Inatsisartut partiiviniit Siumumit, Atassummit Inuit Ataqatigiinnillu kiisalu Naalakkersuisunit kaammattuut tiguaa - matumani pineqarpoq Inatsisartut Inatsisartuni suliassat oqaluuserineqarnissaannut suli sivisunerusumik piffissaqartinneqartariaqarnerat.
Siulittaasoqarfiup tamanna isumaliuutersuutigisimavaa aalajangersimallunilu qinnuteqaat aku-erineqassasoq.
Tullianik Inatsisartut ataatsimiittarfianni ataatsimiittoqassaaq tallimanngornermi majip aappaanni nal. 13.00.
Taamaattorli Inatsisartut ataatsimiititaliaasa sulinerat pisarnertut ingerlaannartumik aallartinneqassaaq.
Inatsisartut Siulittaasoqarfiat Suleriaatsimi ' 2, imm. 3 malillugu aamma Inatsisartut Oqaluuserisassat pillugit Ataatsimiititaliaraat. Ataatsimiititaliaq aalajangersimavoq ataatsimiinnermi ma-tumani oqaluuserisassatut immikkoortunik allanik ilanngussisoqassanngitsoq.
Jonathan Motzfeldt, Siumup oqaaseqartua:
Siumut tungaaninngaanniit nalunngilarput aamma Naalakkersuisut kissaatigisimagaat taamatut Inatsisartut ataatsimiinnissaat majip aappaani ukioq manna aallartissasut.
Aamma uagut isumaqarpugut atortussagut maani agguaanneqarsimasut kingusippallaartumik pissarsiarineqarsimasut taamaattumillu ataatsimiinnissaq kinguartittariaqartoq. Tamanna isu-maqataaffigaarput.
Illuatungaatigullu isumaqarpugut Inatsisartut ataavartumik ataatsimiititaliai maanna suliassaqartut taakkua suliassaminnik aallarniisinnaallutik, imaluunniit ingerlatseqqissinnaallutik, maani tamakkiisumik ataatsimiinneq aallartinngikkaluartoq. Ataatsimiititalianimi taakkunani suliassat ingerlanneqareersut maannakkut nangittumik ingerlaqqissinnaammata.
Taama oqaaseqarluta majip aappaannut ataatsimiinnissap kinguartinneqarnera isumaqatigaarput.
Otto Steenholdt, Atassutip oqaaseqartua:
Atassummiit ilimagereersimavarput Inatsisartut suleriaasiata annertuumik pisariusumillu al-lanngortiterneqarnera, Landstingip tamarmiusup akuersaarsimasaa, arlalitsigut ilaasortanut ilaatigut paatsuungalersitsisinnaassasoq.
Landstingip sulinera inuiaqatigiinnut pigaaruteqarluartoq paatsuunganertalimmik aallarteqqunagu Atassummit Inatsisartut qullersaqarfiat allaffigisimavarput Inatsisartut ataatsimiinnissaat kinguartikkallaqqullugu.
Atassutip Landsstyremi ilaasortamik suliassamik pappiarartaasa kingusippallaamik imminnut tunniunneqarsimanerat pillugu maalaarutaat paasilluarpaa.
Atassummiit kaammattuutigissavarput ataatsimiititaliat suliassaminnik tigusereersimasut a-taatsimiittarnissaat maannangaaq aallartinneqaqqullugit.
Landstingip ataatsimiileqqinnissaata ullussaa aalajangerneqarsinnaassaaq piareersagassat qanoq piffissamik annertutigisumik pisariaqartitsinerat naapertorlugu. Tamannalu Inatsisartut qullersaqarfianni Naalakkersuisullu allaffeqarfiisa suleqatigiilluarnerisigut eqqortumik nalilerneqarsinnaavoq.
Taamaakkaluartoq ulloq ataatsimiilerfissaq siunnersuutigineqartoq Atassumminngaanniit aku-ersaarumavarput.
Josef Motzfeldt, Inuit Ataqatigiit oqaaseqartuat:
Inatsisartuni suleriaasitta isumaliutissiissusiortussanik pilersitsinikkut 1994-imi nutarterneqarnerata Inatsisartuni 1996-imi ukiakkut akuerineqartup siunertarisimanngilaa Inatsisartut Siulittaasoqarfiata Naalakkersuisullu illuatungeriittut imminnut mattullutik suliassanik ingerlatsinissaat.
Inatsisartuni suleriaatsitta 1996-imi ukiakkut ataatsimiinnermi akuerineqarnerata siunnerfiisa pingaarnerit ilagaat Inatsisartuni ilaasortat ataatsimiinnerit aallartinnerini Inatsisartunut ilaasortanit Naalakkersuisoqarfinnillu oqaluuserititassatut siunnersuutigineqarsimasut piareersimaffiginerullugit aammalu pisariaqarfiisigut innuttaasunut isumasiutigereerlugit oqaluuserinnittarnissaat.
Ajuusaruutigaluguli Inuit Ataqatigiit Inatsisartuni ilaasortaatitaasa maluginiarpaat, siullermik, Inatsisartut Siulittaasoqarfiat oqaluuserisassatut siunnersuutigineqartut pillugit 14. april aatsaat ataatsimiitinneqartoq, tassa ippassaq. Aappaattut, Naalakkersuisoqarfinnit siunnersuutit qulequtaannaat kisimik ilisimaneqartut. Pingajuattut, oqaluuserisassat ullunut ataasiakkaanut suliluunniit piareersaasiorfigineqarsimanngitsut. Sisamaattullu, Inatsisartuni ilaasortat ataasiakkaat oqaluuserisassatut siunnersuutaasa qanoq pineqarnissaat, tassa oqaluuseritinneqarnissaat, oqaluuseritinneqannginnissaat imaluunniit allakkatigut akineqaannarnissaat, Inatsisartunut Siulittaasup kisimiilluni, immaqaluunniit Inatsisartut Allattoqarfiata kisermaallugit aalajangersareerlugit siunnersuusiorsimagaat. Siulittaasoqarfik ilaatinngivillugu.
Taamaattumik Inuit Ataqatigiit Siulittaasoqarfimmut matumuuna inussiarnersumik kaammattuutigaat siullermik, Oqaluuserisassat pillugit Ataatsimiititaliaq piaartumik ataatsimiitinneqassasoq, ataatsimiititaliallu siunnersuusiussagaa Inatsisartut ataatsimiinnerat qaqugu aallartivissanersoq qanorlu sivisutigisumik ingerlanneqassanersoq. Aappaattut, kaammattuutigaarput Inatsisartut suleriaasiata nutaap qanoq malitsinneqarnissaa qanoq isumaqarnera Siulittaasoqarfiup Naalakkersuisullu isumaqatigiissutigissagaat/paaseqatigiissuutigissagaat.
Sooq Siulittaasoqarfik sulisinneqarsimannginnersoq Inatsisartut Siulittaasuata nassuiaateqarfigisariaqarpaa. Ippassarlimi ullumilu apeqqutit tusagassiutitigut sammineqarnerani Naalakkersuisut oqaaseqartinneqarnerat Inatsisartunut Siulittaasup suli oqaaseqarfiginngilaa.
Inatsisartut qaqugu qanorlu sivisutigisumik ataatsimiinnissaat Naalakkersuisut aalajangigassarinngilaat, naak Naalakkersuisut Siulittaasuata tusagassiutitigut oqaaseqarnermigut taama isikkoqalertuusigaluaraa.
Inatsisartut nammineq siulittaasoqarpugut soorlu aamma Naalakkersuisut taamaattut. Tamanna- li ima paasineqassanngilaq taakku akornanni qalliuniuttoqassasoq. Tamakkumi aalajangersak-kanik najoqqutassaqareerput.
Inuit Ataqatigiit ajuusaarutigeqaarput Inatsisartut Siulittaasuata suliami matumani Inatsisartut isigineqarnerat iluaqusinngilluinnarmagu.
Bjarne Kreutzmann, Akulliit Partiiata oqaaseqartua:
Akulliit Partiianni
uissuummissutigisimaqaarput pisimasoq, ajuusaarutigeqalugulu. Oqaatigisariaqarparpullu
akisussaassutsimik, aamma politikkimik allatigullu, tigusiartornitsinnik
ilungersuutigisatsinnik una pisoq kusassaataasutut isigineqarsinnaanngimmat.
Uissuumminarsimavortaaq aamma aatsaat
ataatsimiinnissaq sioqqullugu ulloq kingulleq taamatut nalunaarutigineqarmat.
Unali tassa pinngitsoorsinnaanngilaq,
taamatut kinguartitsinissaq pisariaqarpoq. Taamaattumik Akulliit Partiiata
majimut kinguartitsinissaq tapersersorlugu matumuuna nalunaarutigaa.
Mikael Eriksen, Kattusseqatigiit oqaaseqartuat:
Naalakkersuisunut ilaasortat ataqqinartut
aamma Inatsisartunut ilaasortat ataqqinartut Kattusseqatigiinniit imannak
uagut oqaaseqarniarpugut.
Inatsisartut ukiakkut 1996-imi
ataatsimiinnerminni upernaakkut ataatsimiinnissaq 15. april 1997-imut
aalajangiussimavaat. Tamannalu tunngavigalugu Inatsisartunut ilaasortat
piareersaateqarsimapput, ilaatigut Inatsisartut suleriaasissaata
nutarterneqarnera aallaavigalugu. Siunnersuutit nassiussuunneqarsimapput,
aammalu angerlarsimaffimmi, ilaquttani qinigaaffimmilu isumagisassat allat
tamatuma pinissaanut isumannaarsorneqareersimallutik.
Taamaattumik Kattusseqatigiit
akuersaarsinnaanngilluinnarparput ataatsimiinnissap kinguar-tinneqarnera.
Siulittaasoqarfik Naalakkersuisullu
periarfissinneqareersimapput ataatsimiinnissamut suliassanik piareersaateqarnissamut;
taamaattumik Siulittaasoqarfik Naalakkersuisullu innuttaasunik pitsaasumik
tatiginartumillu sullississagunik, ataatsimiinnissap ukiarli ullulerneqarluni
Inatsisartunit aalajangerneqareersup naammassinissaa
sulissutigisariaqarsimagaluarpaat, tusagassiutitigut pisuusussarsiutiinnaratik.
Taamaattumik Siulittaasoqarfiup
Naalakkersuisullu suliaminnik paamaarussisimavallaarnerat
akuersaarsinnaanngilluinnarparput, tamannami suliassanut inuiaqatigiinnut
pingaaruteqartunut kinguarsaanngitsoornavianngimmat aammalu akisoorujussuarmik
kinguneqartussaassalluni.
Taamaattumillu Naalakkersuisut
suliassaminnik sumiginnaasimanerat tunngavigalugu uagut ataatsimiinnissap
kinguartinneqarnera akuersaarsinnaanngilarput.
Naalakkersuisut piffissaqarluarsimagamik
kommunimut qineqqusaarnermut akuliussuupput allaallu ilaatigut kommunimut
qineqqusaartut oqaaseqartinngilluinnarlugit.
Taamaattumik maannakkut taanna
aqqutigalugu massakkut uanga naaggaassuunga, ataatsimiinnissap
kinguartinneqarnissaanut.
Qujanaq.
Ataatsimiinnermik aqutsisoq: Inatsisartut Siulittaasuat Knud Sĝrensen
akissuteqassaaq.
Knud Sĝrensen, Inatsisartut Siulittaasuat:
Toqqammavigissavara Partiit Naalakkersuisullu kinguartitseqqusillutik qinnuteqarsimanerat. Taanna oqallisigineqarsimavoq, sukumiisumik peqqissaartumillu aammalu paasisinnaavara partiit amerlanerussuteqarluartut akuerimmassuk ataatsimiinerup matuma maani inersuarmi pisartussap majip aappaannut kinguartinneqarnissaa.
Taamatullu aamma akueralugu ataatsimiititaliat suliassaqareersut, aammami taakkua qanittun-nguami agguaanneqareersussaammata, taakkua sulinissaat. Tamanna Inatsisartut Siulittaasoqarfiat sinnerlugu qujassutigissavara.
Ukiarmi allanngortitsineqarmat eqqaamaneqassaaq, puigorneqarnavianngilaq, oqarama: Aallartinneq ajornartorsiorfiusinnaavoq, kisiannili naatsorsuutigaara ukiakkut ataatsimiinnissamut pisussat piffissaminnut pisinnaajumaartut. Tamanna suli naatsorsuutigaara, aamma taamaas- saaq.
Maannakkut pisut Siulittaasoqarfimmit ajuusaarutigaagut, aammalu maani oqaaserineqartut tusaatitut tiguagut. Taamatut annertunerusumik oqaaseqarnanga partiit kinguartitsinissamik akuersaarnerat qujassutigaara.
Lars Emil Johansen, Naalakkersuisut Siulittaasuat:
Naalakkersuisut sinnerlugit uangattaaq annertuumik ajuusaarutigaara pilersaarutit malillugit aallartissinnaanngimmat. Tamanna nunatta isigineqarneranut, inumminit aammalu avataanit, iluaqutaanngilaq, kusanarsaataanngilaq. Nunarput sorpassuartigut ingerlallualersimagaluartoq taamaattoq ataatsimiittarfiit ataqqinarnersaanni ullumikkut aallartinnerliorpoq. Tamanna ajuusaarnarpoq, pakatsinarpoq.
Oqaaseqartut ilaat maanga qaqiniutaa Naalakkersuisunik, Mikael Eriksen-ip, uparuaanera oqaaseqarfiginngiinnartariaqaraluarlugu, kisianni aamma paaseqatigiissutaasariaqarmat, paa-sissutissiissutaasariaqarmat oqaatigissavara Naalakkersuisut Inatsisartut ataatsimiinerata piareersarnerani uani peqataatinneqanngilluinnarsimammata, Inatsisartut Siulittaasoqarfianni tamanna ingerlanneqarmat.
Allaat apeqqut taanna itinerusumik oqaloqatigiissutigisariaqarluni. Naalakkersuisut Siulittaasuattut oqaaserisimasannut atatillugu Inuit Ataqatigiit siulittaasuata hr. Josef Motzfeldt-ip oqaaseqarneranut tunngatillugu oqaatigissavara Naalakkersuisut Siulittaasuattut soorunami suut oqaaseqarfigisinnaanerikka killeqarput. Kisianni aamma Inatsisartunut ilaasortaavunga aammalu Inatsisartuni partiit annersaannut siulittaasuullunga, aamma taakkua piginnaatitsipput uannut Inatsisartut ataatsimiinnerannut tunngasumik isummertarnissannut. Aammalu tamanna tunulequtaralugu oqaaseqarpunga, Inatsisartut ilaasortaannit 31-it 13-inik ilaasortalimmik partiimik siulittaasuugama, Inatsisartunullu ilaasortaallunga.
Kisianni tassa oqaatigineqareersutut apeqqutit maani ataatsimiinnerup aallartinnissaanut kinguartitsinermut pissutaasut sukumiisumik oqaluuserisariaqarpagut, aammalu taakkua oqaluuserinissaannut periarfissaq maannakkut ammaanneqartoq atortariaqarparput. Ajuusaarnartuuteqaarput uaguttaaq Naalakkersuisunit ataatsimiinnerup pilersaarutit malillugit aallartissinnaannginnera.
Josef Motzfeldt, Inuit Ataqatigiit oqaaseqartuat:
Qujanaq, erseqqissaatigissavara Inuit Ataqatigiinninngaanniit Inatsisartut Siulittaasuannut ip-passaq allagaqarnitsinni toqqaannartumik kinguartitsinissamik Inuit Ataqatigiit kaammattuinatalu siunnersuuteqarsimannginnatta. Kisiannili Oqaluuserisassat pillugit Ataatsimiititaliap ataatsimiitinneqarnissaa taassumalu aalajangiinissaa, Inatsisartut qaqugu ataatsimiinnitta aallartivinnissaanik isummernissaq taakkununnga isumagisassanngortillugu kaammattuutigigatsigu.
Matumuunali ilumut kinguartitsisariaqarnermik aalajangertussatut isikkoqalerneq ima paasisariaqarnerpa Inatsisartut Siulittaasuata Inatsisartut sineriammiit ataatsimiigiaqqusimagaatigut ataatsimilluunniit oqaluuserisassanik piareersimasuutitaqarnani. Sapaatit akunnerinimmi pingasungajannik kinguartitsineq ima paasisariaqarpoq aqaguluunniit oqaluuserisassaqarsiman-ngitsugut.
Isumaqarpunga qaammatit arfinilingajaat Inatsisartunit aalajangernitta kingorna ataatsimiittarnerup najoqqutassaanut tunngasunik aallaaveqarluni Siulittaasoqarfik piffissaqarsimagaluartoq pissutsit qanoq atuutsinneqarnissaannik sukumiisumik piareersassalluni.
Ajuusaarutigaarput, taamaattumik kinguartitsinissamik isumamut taarsiullugu eqqaasitsissutigerusupparput Inuit Ataqatigiit siunnersuutigigatsigu, Oqaluuserisassat pillugit Ataatsimiititaliaq ataatsimiitinneqassasoq. Taassumalu aalajangissavaa, qaqugu ataatsimiinneq sukumiisumik piviusumik aallartissanersoq qanorlu sivisutigissanersoq.
Kinguartitsinissamulli aalajangertoqassappat Inuit Ataqatigiinninngaanniit ilungersorluta inus-siarnersumilli kaammattuutigissavarput Naalakkersuisoqarfinniit inatsisissatut peqqussutissatullu siunnersuutit oqaluuserititassaasut siunnersuutit sapinngisaq tamaat piaarnerpaamik Inatsisartunut apuunneqarnissaat. Sukumiisumik piareersarnissamut pisariaqartitsitseqigatta, tamannami allanngortitsinerup siunertaasa pingaarnerit ilagimmassuk.
Bjarne Kreutzmann, Akulliit Partiiata oqaaseqartua:
Akulliit Partiianninngaanniit taamatut
kinguartitsinissamut allatut ajornartumik isumaqataagatta, oqaatigissallugu
ilanngutinngitsooriga, neriuppugut taamatut kinguartitsineq isumaqanngitsoq
pilersaarutaareersut malillugit ataatsimiinnissap killilerneqarsimanera aamma
allanngortinneqassasoq. Tassa tassuuna aasaanerani pilersaarutinut
allarpassuarnut aamma sunniuteqartussaassammat. Tamanna aappaatigut
tusaqqajareeraluarlugu erseqqissumik paaserusunnarpoq taamatut kinguartitsineq
aamma ataatsimiinnissap naggataanut pilersaarummut allannguuteqarnersoq.
Kisianni neriuppunga taamaassanngitsoq.
Tassami taassuma uanninngaanniit isummerfiginera annertoorujussuarmik
pissuteqarmat taamatut
killeqartinneqarnissaanik pilersaarutip allanngortinneqannginnissaa.
Jonathan Motzfeldt, Siumup oqaaseqartua:
Akulliit Partiaata taasaa kingulleq
najoqqutaralugu uagut takorloorparput suliassat ima pilersaarusiorneqassasut
siunnerfipput isumaqatigiissutaareersoq ataatsimiinnerup naanissaa, pilersaarutitut
junip aallartilaarnerani naammassisariaqassasoq. Naatsorsuutiginngilarput aasaq
naallugu ataatsimiinnissamik ingerlatsinissarput. Aamma naatsorsuutigaarput
pilersaarusiaq taanna tamatta ukiup ingerlaneranut pilersaarusiatsinnut
piffissamik atorluaanissatsinnut aamma nalilersorsimagipput.
Inatsisartut sukkulluunniit
ataatsimiinnissamik qaqugu qanorlu ingerlanissaa aalajangigassaraat, tamanna
nalunngilarput. Aamma oqartoqarpoq ukiarmili aalajangersimagipput ullumikkut
aallartissasugut, tamanna aamma ilumoorpoq.
Taamaattumik maannakkut Atassutip
oqaaseqartuata hr. Otto Steenholdt-ip oqarneratuulli suleriaaseq nutaaq
aallartinniagaavoq. Immaqa arlaatigut oqaloqatigiinnerit annerusut ingerlanneqartussaassapput,
ataatsimiititaliat Pisortaqarfiillu akornanni Naalakkersuisut aammalu uangut
qullersaqarfitta akornanni.
Kisianni aamma naatsorsuugissanngilarput
ileqquliuutiinnassagipput, ataatsimiiffissagut aat- saat katersuutereerluta allanngortittassallugit. Una pisoq
Siumuminngaanniit immikkorluinnaq ittutut isigaarput, ataasiaannarluni
pisussatut aammalu kingorna taamaattumik naammattoorseqqissanata
naatsorsuutigaarput.
Inatsisartut Siulittaasuat, Knud Sĝrensen:
Una erseqqissaatigissavara ukiarmili ataatsimiinneq naammat tamatta nalusimannginnatsigut qaqugu ataatsimiissalluta.
Kommunalbestyrelsemut qinersinissaq pissutigalugu ullumikkut aallartinnissarput aalajangiunneqarpoq, aammalu taamanikkulli tamatta ilisimavarput aalajangiullutigulu piffissat tunniussivissat atorunnaartut. Taamaattumik tamatta naatsorsorsinnaassavarput kingusinnerpaamik qaqugu tunniussigutta ataatsimiinnissami uani qaqugukkut suliarineqarsinnaassanersut. Tassa Inatsisartunut ilaasortanut siunnersuutit sap.ak. pingasunik tigusiffik kingoqqullugu suliarineqarsinnaassapput, taavalu aamma Naalakkersuisuninngaanneersut sap.ak. marluk tigunerininngaanniit kingornatigut suliarineqarsinnaassallutik.
Tassa naatsorsuutigisimavara soorunami tamanna tamatta eqqaamasimassagipput. Kisianni ajuu-saarnarput ilumut taakkua eqqaasitsissutigisimannginnatsigit.
Soorunami ataatsimiititaliaq, tassa Inatsisartut Siulittaasoqarfiat, maaniippoq tamarmi aammalu pisariaqartillugu sukkulluunniit ataatsimiissinnaavoq suliassallu misissorsinnaallugit.
Ulloq ataatsimiiffissaq kingulleq aalajangerneqarsimasutut junip sisamaanut killilerneqarsimavoq. Taamatut aalajangernermut ilaatigut pissutiginiarsimavarput upernaattuuppallaannginnissaq, naak pingaaraluaqisoq soorunalimi Inatsisartunut ataatsimiinneq, pissutaasariaqanngikkaluartoq. Ilaatigut Nunaqarfiit pillugit ataatsimeersuarnissaq akornuserusunnagu ilaatigut pissutiginiarsimavarput. Naak immaqa akornutaasariaqanngikkaluarnersoq, kisianni taanna aalajangerniarnitsinni assupilorujussuaq pingaartissimavarput toqqammavigalugulu.
Qularutiginngilara pissutsit assigiinngitsut oqaloqatigiissutigalugit aaqqittariaqassasut, pingaartumik paatsuungasoqarsimappat. Taakkua naammassiniartariaqarput, tamanna neriorsuutigissavara.
Lars Emil Johansen, Naalakkersuisut Siulittaasuat:
Ajornartorsiummik sumilluunniit naammattuuigaangatta ajornartorsiutip iterna tikillugu paasin-ngikkutsigu aaqqissinnaanngilarput. Ajornartorsiorpugut. Kalaallit Nunaanni parlamentarisme ajornartorsiorpoq. Suna pissutaanersoq assigiinngitsumik maanngaanniit oqaatigineqarpoq.
Isumaqarpunga erseqqilluinnartumik oqaatigisariaqartoq, nuannerpat nuanninngippallu, ajornartorsiorneq Inatsisartut Siulittaasoqarfianiippoq. Imaanngitsoq Inatsisartunut ilaasortat eqqaama-simanngimmassuk tunniussivissaq killeeruttoq. Kisianni Inatsisartunut ilaasortat oqaluuserisassatik ippassaq tikillugu suusut naluaat. Taamaattumik ataatsimiinneq manna aallartissinnaasiman-ngilaq.
Taamaattumik isumaqarpunga piffissaq tulliuttoq atortariaqaripput ajornartorsiutip qanoq ililluni aaqqinneqarnissaanut, pissutaasoq sunarpiaaneralu isertortutut illugu qatangiinnartinnagu. Taanna erseqqissartariaqarpara inuiaqatigut aamma paasisaqartariaqarmata sooq-una Inatsisartut ataatsimiinnissaraluat aallartinngitsoq.
Josef Motzfeldt, Inuit Ataqatigiit oqaaseqartuat:
Inatsisartuni ataatsimiinnissatta massakkut majip aappaanut aallartittussanngorlugu kinguartinneqarnerata paasinarsimavoq nassatarisussaanngikkaa ataatsimiinnerup sivitsorneqartariaqarneranik nassataqartussaanngitsoq.
Taamaattumik naatsorsuutigisariaqarpoq suleriaatsip allanngortinneqarnerata siunertaa sukumiisumik piffissaqarnerulluni oqaluuserisat ataasiakkaat sammineqartarnissaat siunnerfiummat Inatsisartut majip aappaaniit junip sisamaanut ataatsimiinnissaminni oqaluuserisassat naammattoorsinnaasaat annikitsoralaajussasut. Tamanna ajuusaarnaqaaq.
Otto Steenholdt, Atassutip oqaaseqartua:
Siumup oqaluttuata oqaasii kingulliit isumaqatigilluinnarpakka. Aamma uagut tamatta maani isersimasugut taama eqqarsannguatsiarpugut: Taamaalisoqaqqinngisaannassaaq.
Kisianni tassa soorlu oqareersunga nutaaq aallartitarput nalornissuteqarfiusimavoq. Taamaattumik taakku oqaatsit: Taamaattoqaqqinngisaannassaaq, aammalu Naalakkersuisut Siulittaasuata erseqqissumik oqaatigimmagu, suut pissutaasimasut toqqortorneqassanngitsut aamma isumaqatigilluinnarpara.
Taamaattumik tamakku tunngavigalugit pisariaqannginnerpoq Landstingimi partiit tamarmik aallartitaqarfigisaannik ataatsimiititaliornissaq paasiniaasussamik sooq-una taamaattoqartoq, suut-uku pissutaasut piaarnerpaamik aaqqillugu, oqarfigisariaqarpoq taamaalisoqaqqinnginnissaa kissaatigigatsigu uku ajoqutaasut piaarnerpaamik aaqqinneqarlik.
Taamaattumik ataatsimiititaliamik misissuisinnaasumik pilersitsinnaasumik pilersitsinissaq maanga neqeroorutigerusuppara Landstingip partiivinut.
Bjarne Kreutzmann, Akulliit Partiiata oqaaseqartua:
Siuliani oqaaseqarama oqarpunga
akisussaassutsimik tigusiartornitsinni una pisoq kusanarsaataanngitsoq.
Tassami avataanit akisussaassutsimik tigusiartornerput allallu
alapernaanneqaqimmata.
Taamaattumik oqaannassaanga tamarluinnatta
isumaqatigiissutigigunarparput taamatut pisoqaqqissanngitsoq.
Oqanngikkaluartulluunniit taamaatut isumaqartut naatsorsuutigaakka.
Aamma uanga oqaaseqanngilanga
nassuiaasoqarnissaanik, naatsorsuutigigakku tamanna pissasoq. Uuma pisup qanoq
ilungersornarsusia naatsorsuutigissagaanni naatsorsuutigilluinnarakku tamanut
naammaginartumik nassuiaasoqassasoq. Taamaattumik erseqqissumik
nassuiaasoqarnissaanut ujartuisunut tapersersuivugut.
Jonathan Motzfeldt, Siumup oqaaseqartua:
Naatsumik oqassaanga qujanaq. Otto
Steenholdt-ip oqaatigisaa, ataatsimiititaliorluni misissuisoqarnissaa
ussernartoqaraluarpoq. Kisianni aamma suut pigaangata ataatsimiititaliorluta misissuinersuarput
piusiutiinnarsimagatsigu taamatut eqqarsarpugut.
Ottop ujartugaa ilumoorpoq,
paasisariaqarparput tusiassutigut suunersut aammalu taanna maannakkut
piffissami neriuppunga qaninnerpaami, aamma paasivara taanna ilaatigut Siumup
tungaaninngaanniit oqaloqatigiissutigiumaneqartoq. Taavalu aamma Inatsisartut
Siulittaasoqarfianni tamanna oqallisigisariaqarpoq. Uagullu aamma maannakkut
majip aappaata tungaanut pinngikkaluarluta piaartumik oqallisigisariaqarparput.
Taamaattumik kaammattuutigissavarput
prĉsidiemilu aammalu partiini allani maannakkut oqaloqatigiinnermi
nanginneqaqqullugu.
Ataatsimiinnermik aqutsisoq, Ruth Heilmann:
Maannakkut amerlanerussuteqarluartut
kinguartitsineq isumaqatigimmassuk matumani ataatsimiititaliap paasisai
naapertorlugit oqaluuserisassamik immikoortumik allamik oqallisigisassamik
ilanngussisoqarsimanngitsoq, taamaammallu ullumikkut ataatsimiinneq
naammassivoq. Tullianik ataatsimiinnissaq pissaaq majip aappaani 1997 nal.
13.00.