Oqaluuserisassani immikkoortoq 17-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 05. maj l997 nal. 15:57
Ataatsimiinnermik
aqutsisoq: Inatsisartut Siulittaasuat Jonathan Motzfeldt.
Daniel Skifte, Aningaasaqarnermut Ineqarnermullu Naalakkersuisoq:
Siullermik
oqaatigissavara, saqqummiiussissutip matuma 7. April l997 agguaanneqareersoq, tapersermagu.
Matumuuna naalakkersuisut
sinnerlugit l997-imut inatsisartut ilassutitut aningaasaliissutinut
inatsisissaannut siullermut Naalakkersuisut saqqummiussaat saqqmmiutissavara.
Naalakkersuisut siunnersuutigisimagaluarpaat inatsisartut ataatsimiinneranni
matumani ilassutitut aningaasaliissutinut inatsisissamut siunnersuutinik
marlunnik saqqummiussaqarniarlutik, inatsisartut ataatsimiinnerata
naatsorsuutigisamit kingusinnerusumik aallartinnera qaammallu ataaseq
qaangiuppat naammassineqarnissaata naatsorsuutigineqarnerata malitsigisaanik
naalakkersuisut aalajangerput upernaakkut ataatsimiinnermi, ilassutitut
aningaasaliissutitut inatsisissap aappaanut siunnersuummik
saqqummiussisoqassanngitsoq.
Taarsiullu majip qiteqqunnerani
inatsisartut aningaasaqarnermut ataatsimiititaliaanut allannguutissatut
sinnersuutinik nassiussisoqarumaartoq, ilassutitut aningaasaliissutinut
inatsisissamut siunnersuutip inatsisartuni aappassaaneerneqarnissaanut
ilanngunneqarnissaat siunertaralugu. 1997-imut Inatsisartut ilassutitut
aningaasaliissutinut inatsisissaanut ukua ilanngunneqarput. Siullertut
Sanaartornermi ingerlatat pillugit akuersissuteqaqqinnissamik siunnersuut
aappaat aningaasaliissutinut allannguutit siusinnerusukkut aningaasaqarnermut
ataatsimiititaliamit kiisalu suleriaatsimut ataatsimiititaliamit
akuerineqarsimasut. Pingajuat aningaasaliissutissat nutaat nukinginnartumik
suliarisariallit kiisalu sisamaat aningaasaliissutinik allanngortitsinerit
annertunerusutigut politikkikkut allanngortinneqartut taaneqarsinnaasut.
Aallaqqaasiutaasumik oqaaseqaatit taakku kingorna l997-mi ilassutitut
aningaasaliissutissatut inatsisissamut siullermut siunnersuut naatsumik
saqqummiutissavara. Inatsisissatut siunnersuutip ilaatigut imarai, sanaartornerup
ingerlanneqarnerata allanngornera pissutigalugu sanaartugassatut katillugit
94.48o tusintinik akuersissuteqaqqinneq ilaatigullu naliginnaasumik
missingersuutinut ilanngussat. Siunnersuutit taaneqartut katillugit taaneqartut
kingulliit ataatsimut isigalugu ingerlatsinermut, sanaartornermut
taarsigassarsititsisarnermullu missigersuutinik IST-mut suuniuteqassanngillat.
Akuersissuteqaqqinnerit pingaartumik nunap immikkoortuini suluusalinnut
mittarfiliortiternernut tunngapput, tassanimi l996-mi 4l,8 millioner kroninik
atuinikinnerusoqarsimammat. 1997-mut nuunneqarnissaannik qinnutigineqartunik.
Taakku saniatigut pingaartumik
teknikkimut tunngasutigut kinguartoornerit pineqarput matumani aamma
pineqarput nunami sanaartorfigissaaneq 2l millioner kroninik aningaasartaqartoq
kiisalu inissialiortitsinermi kinguartoornerit l9 millioner kroninik
aningaasartaqartut.ĉ Aningaasartuutit l996-mi atorneqartussat
naatsorsuutigineqartutut pineqarmata naalakkersuisut siunnersuutigaat
aningaasat taakku l997-mi atorneqassasut taamaalillutik akuersissuteqannginnerit
l997-mi sinneqartoorutissatut siunniunneqartut ikilineqarnerisigut
aningaasalersorlugit.
Taamaaliornikkut l996-mi
sanaartornerup ingerlarngini kinguartoorutaasut sanaartugassanit l997-mut
aningaasanik inatsimmi akuerineqareersimasunut sunniuteqassanngillat. 1997-mi
aningaasanut inatsimmi IST-p 5.o23.ooo million kroninik
sinneqartooruteqarnissaq inerneraa. Massakkut ilassutitut aningaasaliissutinut
inatsisissamut siunnersuummi matumani naalakkersuisut siunnersuutigaat
akuersissuteqaqqinnissasmut pisariaqartitat l997-imi IST-mi angusassat taakku
amerlaqataannik ikilisitsinikkut aningaasalersorneqassasut tamatuma kingorna
ukioq manna tassa l997-mi aningaasanut inatsimmi 89.4ol.ooo kroninik
amingartooruteqalissaaq.
Oqaatigineqareersutut
naliginnaasumik missingersuutinut ilanngussat katillutik IST-mi inernerat
O-voq. Suliassaqarfimmi tassani allannguutissatut annertunerusutut
naalakkersuisut ilaatigut tikkuassavaat PLATINOVA-mut aktietigut lo millioner
koruuninik aningaasaliineq. Aatsitassarsiorfiup imaluunniit
aatsitassarsiornerup iluani ineriartortitsinerup nukittorsarneqarnissaa
siunertaralugu.
Umiarsualivinnik sanaartornerit
pillugit pilersaarummi aaqqiissuteqartoqarnissaanik siunnersuuteqartoqarpoq
taamaalillu l997-mi aamma l998-mi katillugit 35 millioner koruuninik sipaaruteqarnissamik
naalakkersuisut siunnersuutaat naammassineqarsinnaallutik tamatumunnga peqatigitillugu
Narsami -Kujallermi Kapisilinni Kuummiunilu sissiukkat ajoquserneqarsimaneri
piaartumik aaqqittariaqartut suliarineqarsinnaaqqullugit.
Ineqarnermut tunngasuni
naalakkersuisut siunnersuutigaat immikkut iluarsaassinermut aamma
piginneqatigiilluni inissianut tassa andelsboliginut, aningaasaliissutinik amerlanerusunik
nikisitsisoqassasoq. Aalisakkanik suliffissuaqarnermi suliassaqartitsinerup
siuarsarneqarnissaanut 22 millioner kroninik imaluunniit taakkua missaannik
atuisoqarnissaa aamma siunnersuutigineqarpoq kiisalu saartuarniarnerup suli
ineriartorteqqinneqarnisssaanut aningaasaliisoqaqqinnissaa aamma
siunnersuutigineqarluni. Aammattaaq aalisarneq pillugu EU-mut
isumaqatigiissutitigut suli l3 millioner koruunit missaanik
isertitsisoqaqqippoq aamma inuussutissarsiutinut tapiisarnermut tunngassuteqartuni
lo millioner kronit missaannik pitsanngoriaateqartoqarpoq ilaatigut
taarsigassarsianik immikkut ittunik akiliisoqarneratigut.
Avatangiisinut tunngasuni
naalakkersuisut siunnersuutigaat l997-mi l0 millioner kronit missingajaannik
aningaasaliisoqassaoq tassa Qaqortumi eqqakkanik ikuallaaviup
pilersinneqarneranut atorneqartussanik. Siunnersuutit sinneri teknikkimut
tunngassuteqarnerupput ataatsimullu isigalugit inatsisissatut siunnersuummut
oqaaseqaatit itisiligaanerusut innersuussutigissavakka.
Paatsoortoqaqqunagulu aamma
erseqqissarneqassaaq malugeqquneqarluni naalakkersuisunin-ngaanniit
suliassaqarfik 0l, inatsisartut siulittaasuat pillugu siunnersuutit
ilanngunneqartut l997-mi katillugit 3 millioner 835 tusind kroninik
aningaasartuutaanerusussat naalakkersuisuni suliarineqarsimanngimmata.
Siunnersuummulli ilanngunneqaannarsimallutik, inatsisartut
siulittaasoqarfiannit tiguneqarsimaneratut iluseqarlutik. Taamaattumik
siunnersuutit taakkua isummerfigineqarnissaat inatsisartunut tunniunneqarpoq.
l997-mi inatsisartut ilassutitut aningaasaliissutitut inatsisissaannut
siullermut siunnersuutip ilanngaatissat ilanngaatingereerlugit sunniutissaa
tassaavoq l997-mi sinneqartoorutissatut siunniunneqartut 94.924.ooo koruuninik
ikilillugit minus 89.4ol.ooo kroninngortinneqarnerat sanaartornermut
akuersissuteqaqqinnissamut pisariaqartinneqartut amerlaqaterpiannik.
Taamaattorli naalakkersuisut
malugeqqussavaat naak ilassutitut aningaasaliissutinut inatsisissamut
siullermut siunnersuut IST-mut sunniutissaqanngikkaluartoq, sanaartugassatigut
sillimmatitigullu katillugit 26 millioner kronit missaannik ajorseriarnermik
nassataqartussaammat. Naalakkersuisut allannguutissanut siunnersuutinik
nassiussaqarnerinut atatillugu sillimmatit naammattumik amerlassuseqaqqilernissaat
anguniarneqarumaarpoq. Taamatut oqaaseqarlunga siunnersuut inatsissartunut
oqaluuserisassanngortippara, kaammattuutigissallugulu inimi maani oqaluuserineqarnerata
kingorna inatsisartut aningaasaqarnermut ataatsimiititaliaanni
oqaluuserisassanngorteqqullugu ingerlateqqinneqassasoq. Qujanaq.
Lars Karl Jensen, Siumup oqaaseqartua:
1997-mut inatsisartut ilassutitut
aningaasaliissutinut inatsisissaannut siullermut naalakkersuisut saqqummiussaat
tunngaviisigut taperserlugit, Siumumiit imatut oqaaseqaateqassaagut. Siumumiit
nuannaarutigaarput takusinnaagatsigu ilassutitut aningaasaliissutinut
inatsisissap siulliup suliarineqarnerani naalakkersuisut pilersaarusiornerminni
l996-mi sanaartukkatigut ingerlatassat akuersissutaareersut kisiannili
assigiinngitsumik peqquteqartumik kinguartoorfiusut ukioq manna
naammassineqarnissaat qulakkeerniarlugu aningaasaliissutaasut
illikartissimammatigit tapiissutinik ilallugit.
Siumumiit siusinnerusukkut
oqaaseqartarnitsigut oqaaseqartarnigut innersuussutigalugit inatsisartut
allattoqarfianni sullissinnermi suleriaatsip allanngortinneqarneranut
naleqquttumik aaqqissuussinikkut naalakkersuisut allattoqarfiinik
suleqateqarnerup pisariillisarnissaani atortorissaarutinik elektronik atorlugu
allagaateqalernissaq qarasaasiatigut allakkanik ujaasisarfeqalernissaq,
inatsiseqarfimmillu pilersitsinissaq tassunga kingullermut taaneqartumut
sulisorisat sullitallu inatsisaateqarfimmi atuineranni eqaallisaaffiginissaat
siunertaralugu naalakkersuisut aningaasaliissutissanut siunnersuutaat Siumumiit
taperserpagut.
Nunat Avannarliiit Killiit
inatsisartuisa suleqatigiinnissamut siunersuisooqatigiivisa naalisarlugu
NAKIS-imik taaneqartartup allaffeqalernissaanut aningaasaliisoqarnissaa
Siumumiit isumaqatigaarput, taamaalilluni nunani taakkuna, tassalu
Savalimmiut, Island-ip Kalaallit Nunaatalu akornanni suleqatigiinneq
nukittorsarneqartussaasoq allaffissornikkut sulinermik pitsanngorsaavigineqassammat.
Naalakkersuisut allattoqarfianni
pisussaaffiit assigiinngitsorpassuit iluanniippoq inatsisartut inatsisaat nr. 9
ulloq 3o. Oktober l995-meersoq taanna malillugu naalakkersuinikkut
suliniaqatigiif-finnut aningaasaliisussaaneq issannguarlu nunatsinni kommuninut
qinersinermi aningaasaliissuteqarneq pisussaaffittut avaqqunneqarsinnaanngitsutut
pissusissamisuuginnartutullu Siumumiit isumaqarfigaarput.
Taamatullu pisortaqarfiit ilaanni
sulisutigut aaqqissuusseqqinnermi sulisorisat Pisortaqarfinnut allanut
nuutsinneranni aningaasartuutinik itigartitsinertut isigalugu.
Namminersornerullutik Oqartussat
paasissutissiisarfiannut tunngatillugu aningaasaliissutit aqunneqarnerisa
allamut inissinneqarnissaanni Siumumiit inassutigeriissavarput inuiaqatigiit
sullinneqarneranni inatsisit maleruagassallu atuuttut pillugit annertunerusumik
suliniuteqartoqarnissaa anguniaqqullugu raatiukkut aallakaatitsisarnerit
tassani eqqarsaatigalugit. Maannakkummi raatiukkut aallakaatinneqartartut
innuttaasuniit iluarisimaarneqarput amerlinissaasalu anguneqarnissaat
kissaatigineqarluni.
Sanaartortitsinermut aqutsisoqarfiup
Nanortalimmut nuunneqannginneranut taarsiullugu Nanortalimmi tunisassiassanik
ineriartortitsinermut atugassatut Naalakkersuisut aningaasaliissutissatut
siunnersuutaat taperserlugu Siumumiit tamanna neriuutigissavarput. Siunissami
Nanortalimmi suliffissat ataavartut amerlanerusullu Royal Greenland A/S-imiit
pilersinneqarnerannik kinguneqarumaartoq.
Siumumiillu Naalakkersuisut isumaqatigaagut
aktiatigut aningaasaliissutit patajaallisarnerannut atugassanik
immikkoortitsisimammata. Isumaqarpugut aatsitassanik ujarlernermi
suliffeqarfiit namminersortut aatsitassarsiornermik ingerlatsisut soqutigisaat
tapersersorlugit nunatta peqataanermigut sunniuteqarnerunissaa
anguneqartariaqartoq. Soorlu Platinovap Namminersornerullutik Oqartussaniik 10
mio. kr.-nik aningaasaliiffigineqarneratigut, tassani soqutigisanut isumalluarnartunut
pitsaasumik sunniuteqartussaavoq siunissamut piareersimaffiusussaq.
Maannakkummi ilisimaneqareersutuut Kalaallit Nunatta Tunuani Kangerlussuarmi
Citronfjordimi aatsitassaqarfiusinnaasumik isumalluarneq annertoqaaq Kalaallit
Nunattalu ilaani allani aatsitassaqarfinnik misissuilluarnissamut
Namminersornerullutik Oqartussat annertunerusumik peqataasariaqarput.
Suliffissaqartitsinermut atugassat
aningaasartaasa suliffissaqartitsiniarnermut immikkut ittumik suliniutinut
nuutsinneqarnissaat Siumumiit taperserparput. Tassuuna takusinnaagatsigu
aningaasat taakkua 22,3 mio. kr. sinnilaarlugit amerlassuseqartut atorlugit
Alluitsup Paani Qaqortumi Qasigiannguani Qeqertarsuarmilu suliffissanik ukiumut
150 missaannik amerlassusilinnik qulakkeerisussaasoq.
Siumumiit ilanngullugu
Naalakkersuisunut inassutigissavarput illoqarfinni allani suliffissuaqarfiusuni
taamaakkaluartorli suliffissaaleqiffiuqisuni tassalu Paamiuni Maniitsumi
Kangaatsiamilu suliassaqartitsinermut periarfissanik Royal Greenland A/S
peqatigalugu pilersitsiniaqqullugit.
Siumumiillu ilanngullugu oqaatigissavarput
suliassaqartitsineq anguniarlugu nioqqutissiassanik pisiortornermut kommuunit
aningaasaliissuteqartarnerat qaangerniartariaqalersutut isumaqarfigigatsigu.
Ukiummi arlaqalerput suliffissuarmi suliassaqartitsineq anguniarlugu kommuunit
ilaasa Royal Greenlandimut akiliuteqartarnerat. Periaatsip taassuma ukiut
tamaasa suliassaqartitsisarneq kingunerisaraluaraa Siumumiit
inassutigissavarput periutsip tamatuma suliffissanik ataavartunik
pilersitsiffiunissaa anguniarlugu ukiunulluunniit tallimanut killiliiffigineqarnissaa.
Kommuunimmi ukiut tamaasa aningaasaliissutigisartakkatik suliniutinut allanut
illoqarfinni ineriartortitsinermi atorfissaqartimmatigit.
Umiarsualiveqarfiit
pilersaarusiornerannut atatillugu Siumumiit takusinnaavarput ukioq silarlorujussuarneratigut
Narsaq Kujallermi talittarfiup aseruatiternerata suliarineqarnissaa, kiisalu
nunaqarfinnik Kulusumi Kapisilinnilu talittarfiit aserfallassimaqisut
iluarsaannissaat pissutigalugu Upernavimmi Uummannamilu aalisartut
talittarfissaat nutaat suliarineqalernissaasa ukiunik marlunnik
kinguartinneqarnerat. Upernavimmi Uummannamilu umiarsuarnut talittarfiit
atorlugit aalisartut pisanik usingiaanerminni ajornartorsiutigisartagaat
imaannaanngitsuusoq Siumumiit ilisimavarput. Umiarsuaqartillugu aalisartut
usingiarsinnaannginnertik pissutigalugu pisatik asiusoorutigisarpaat allaat
ingiinnartariaqalertarlugit. Taamaattumik Upernaviup Uummannallu
talittarfeqarnerannut aaqqiissutissamik Naalakkersuisut
inassuteqarfiginiarpagut aningaasaliissutit
allannguutissaannik suliaqarnermikkut tamanna iluarsiniassangaat.
Sanaartungassanut allanullu
pilersaarutit ataatsimut isigalugit Siumumiit iluarisimaarpagut
takusinnaagatsigu nunaqarfinni illuliortitsinermut tunngasut, Uummannami
meeqqat angerlarsimaffianni innarluutilinni immikkoortortaqarfimmut
sanaartornissaq, Nanortalimmi Nuummilu utoqqaat angerlarsimaffiisa sananissaasa
siuartinneqarnissaat, Alluitsup Paani atuarfiup iluarsaallugu nutarternissaa,
Oqaatsinik ilinniarfiup aallartinnissaa angulertorumallugu sulisussanik
atorfinitsitsinissaq, Upernavimmi illoqarfiup pisoqartaata iluarsaanneqarluni
inaarutissaanut aningaasaliissutissat suliniutillu allat aningaasalersornerisa
pilersaarusiornerannut naleqqussarlugit Naalakkersuisut aningaasaliissutissanik
siunnersuuteqarnerat maani iluarisimaarparput.
Taamatullu arfanniarnermi
atorneqartartut qamutillit iluarsaanneqarnerannut aningaasaleeqqinnissaq,
kiisalu assagiarsunniarnerup ineriartortinnerata siuarsarneqarnissaa
assagiarsunniarnermi pullatinik sanaartornermi sipilinillu amoorutinut
atortulersuutinut tapiissutissanut aningaasaliissutissat Siumumiit
isumaqatigaagut. Naalakkersuisunullu inassutigissavarput assagiarsunniarnermi
pullatinik sanaartortitsinermi saffiuut illoqarfinni assagiarsunniarnermik
aallartisartuniittut sulisorineqarnissaat periarfissarsiuuteqqullugu,
eqqaamasariaqarpormi illoqarfiit Nuup avataaniittut aalisartuisa pullatit
Nuummi sanaat pissarsiarissagunikkik nassiunnerannut aningaasartuuteqartussaammata.
Siumumiit nuannaarutigalugu
maluginiarsimavarput Namminersornerullutik Oqartussat Ilulissat Kommuunianut taarsigassarsiarititat
Ilulissat Kommuuniata tamakkerlugit akilersimammagit, Siumumiit Ilulissat
Kommuuniat nersualaanngitsoorusunngilarput, taamaattumillu Naalakkersuisut
inakkumavagut Kommuunit Namminersornerullutik Oqartussanut akiligassallit
suliffissaqartitsiniarnerup tungaatigut periarfissaannik annertusaanissamut
ikiuuteqqullugit, taamaaliornikkut Kommuunit namminneq aningaasaqarnerat
pitsanngorsarneqassammat.
Taamatuttaaq Siumumiit
nuannaarutigaarput takusinnaagatsigu Inuussutissarsiutitigut Tapersiisarnermi
Ataatsimiititaliamut akilersukkat annertunerusut pissarsiarineqarneranni
aammalu EU-mut aalisagartassat tunineqarnerat naatsorsuutiniit amerlanerusunik
Landskarsimut isertitsissutaasimammat, tamannalu kinguneqartoq aningaasat
tiguinnarissat amerlanerulernerannik.
Naggataatigut Naalakkersuisunut
inassutigissavarput Inatsisartut ilassutitut aningaasaliissutinut
inatsisissaata matuma aappassaaneerlugu suliarineqarnissaanut allannguutissatut
siunnersuutit suliarineqalerpata, 1996-ip ukiaani ataatsimiinnermi
aningaasaliissutissat suliarineqarneranni Grĝnlandsfly-mut aningaasaliissutitut
aaqqiissutissat isumaqatigiissutaareersut ilanngullugit suliariniaqqullugit.
Siumumiit taamatut oqaaseqarluta
Inatsisartut ilassutitut aningaasaliissutinut inatsisissaannut siullermut
siunnersuut, aningaasaqarnermut ataatsimiititaliamut innersuussutigaarput.
Anders Nilsson, Atassutip oqaaseqartua:
Soorlu saqqummiussami allassimasoq,
siunnersuut taaneqartoq ataatsimiinnitsinni matumani siunnersuutinit
marluusunit siulliuvoq. Siunnersuummi taaneqartumi 1997-mut aningaasanut
inatsimmut teknikkikkut naleqqussaanerit ataatsimoortut suliarineqarsimapput.
tamatumani ilaatinneqarput sanaartornermut aningaasaliissuteqaqqinnissamik
siunnersuutit, tamakkuupput pissutsit assigiinngitsut pissutigalugit 1996-mi
naammassineqarsinnaasimanngitsut.
Aningaasaliissuteqaqqinnissamut
saqqummiussarpassuarni Atassutip maluginiarsimavaa, ta-matumani inisianik
sanaartornermi naammassineqanngitsoorsimasunut taamaallaat 19 mio. kr.-nit
pisariaqartinneqartut. Paasitinneqarpugut inissianik nutaanik sanaartornissamik
pilersaarutit pimoorunneqalersimasut ukiuni siuliini noqqaassutigisimasatsitut.
Sanaartornissamik isumaqatigiissutit
Namminersornerullutik Oqartussat Kommuunillu matuma kingornagut
ataatsimoorlutik aningaasaliiffiginiarlugit isumaqatigiissutigisassaat,
sanaartornerulernissaq nassatarisussaavaat, inissianik - paaqqinnittarfinnillu
sanaartornermik kinguarsaanerujussuit piaartumik atorunnaartussaassapput.
Tamannalu nuannaarutissaavoq.
Teknikkikkut 3 mio. kr.-nik
nuussineq ataaseq Namminersornerullutik Oqartussat Tusagassiiviannut
tunngatinneqartoq apererusulersitsivoq: "Sorpiaammitaava Tusagassiivimmi
tassani suliarineqartarpat". Namminersornerullutik Oqartussat
immikkoortortaannut allanut tunngatillugu apeqqut taanna
eqqumiiginassagaluarpoq, kisiannili Tusagassiivimmut, Namminersornerullutik
Oqartussaanerup avammut sammitinniarneqarnera pillugu pilersinneqarsimasumut
taamaan-ngilaq. Aammami Landskarsimit aningaasaliiffigineqartunut KNR Raatiu
TV-mullu unammillertuummat, taakkulu inuiaqatigiinni apeqqutinik
pingaaruteqartunik sulissuteqartarmata - pisussaaffigisamik ilaattut - kiisalu
tusagassiutit ilaat allat pissusissamisoortumik suliaasa tamanna ilagimmassuk.
Ilassutitut
aningaasaliissuteqarnissamik siunnersuummi 4 mio. kr.-nit ilannguteqquneqarsimapput
Nanortalimmi nioqqutissiornerup ineriartortinneqarnissaanut pilersaarutinut
atugassatut. Uagut Atassutip tungaaniit sulissutigisaq taamaattoq
nuannaarutigaarput, neriuutigaarpullu tamanna nioqqutissiorneq imminut
akilersinnaasunngorlugu ineriartortinneqarumaartoq. Pisariaqarluinnartutummi
isigaarput Nanortalimmi aamma suliffiit nioqqutissiorfiit pilersinneqartariaqartut.
Atassutip nuannaarutigalugu
maluginiarpaa Qaqortumi ikuallaavissamut aningaasaliisoqarsimasoq.
Isumaqarpugut 9,8 mio. kr.-nik taamatut aningaasaliissuteqarnikkut
pimoorussamik isumannaatsumillu eqqaaveqarneq (eqqaavilerineq)
ingerlanniarneqalersoq, ukiuni qaninnerni nunatsinni tamarmi
atorneqalersussatut.
Tamakkiisumik tapersersorparput
PLATINOVA A/S-imut 10 mio. kr.-nik aningaasaliisoqarsimanera. Pisariaqartutut
isigaarput aningaasaliisimasut avataaneersut takutinneqartariaqartut, aamma
uagut upperigipput siunissami aatsitassarsiulernissarput.
Taamatut naatsumik oqaaseqarluta
siunnersuut Aningaasaqarnermut Ataatsimiititaliamut ingerlateqqissavarput maani
inimi aappassaaneerlugu oqaluuserineqannginnerani.
Josef Motzfeldt, Inuit Ataqatigiit oqaaseqartuat:
Aallaqqaatigalugu Inuit Ataqatigiit
maluginiarparput ilassutitut aningaasaliissutissanut inatsisissatut
siunnersuutikkut matumuuna aningaasat 100 mio. kr. pallillugit
amerlassuseqartut affangajaat, tassalu 42 mio. kr. pallillugit suluusalinnut
mittarfiliortiternermi 1996-mi atunngitsuukkaneersuummata. Sanaartugassat
allat soorlu illuliortiternermi kinguartoornikkut atunngitsuukkat ukiunut
siuliinut sanilliullugu malunnaateqarluartumik ikileriarsimammata qujanarpoq.
Ataatsimulli isigalugu ukioq
mannamut aningaasanut inatsisikkut Landskarsip 5 mio. kr.-nit sinnilaarlugit
amerlassusilinnik sinneqartooruteqassanganerigalua 89 mio. kr.-ninik
amigartooruteqarfiusussanngorpoq. Naalakkersuisunut ilaasortamut
apeqqutigissavarput, tamatuma nunanut allanut akiitsunik taarsersuinermut
sunniutigeratarsinnaasai suunersut.
Inatsisissatulli siunnersuummi
ilaatigut talittarfiliassatut pilersaarutaareersimagaluartunut,
nikititerinikkut sorna Aningaasaqarnermut Ataatsimiititaliamit
inassutigineqartut malillugit allannguinerummata, taarsiulluguli Narsarmijini,
Kapisilinni Kuummiunilu talittarfiit aserorsimasut aaqqiiviginiarneqarmata
pisariaqartitsivinneq najoqqutaralugu aaqqiineq iluaraarput.
Eqqakkanik ikuallaavilersorneq
aallarnerlugu Qaqortumi, Kommuuninit allanit malinneqarumaartumik,
ikuallaaviliornermut aningaasaliinissamik inassuteqarneq Aningaasaqarnermut
Ataatsimiititaliap 1996-mi ukiakkut ataatsimiinnermi inassuteqaataanik
piviusunngortitsineruvoq. Taama eqqakkanik isumannaatsumik
isumannaarinninniarneq pisariaqavippoq, tassungami atatillugu kiak eqqakkat
ikuallanneqarneranneersoq kiassarnermut iluatiginiarneqarpoq. Qaqortumi
misiliineq sukumiisumik malinnaavigineqassasoq naatsorsuutigaarput,
illoqarfiimmi taama pisariaqartitsivissut arlaqaqaat, aaqqiissuteqarnissamut
pilersaaruteqartut.
Naalakkersuisut inatsisissaq
saqqummiutiutigalugu inatsisissap aappassaaneerlugu oqaluuserineqannginnerani
allannguutissanik saqqummiussiniarnertik ilimasaarutigaat. Tassungalu
atatillugu Inuit Ataqatigiit pingaartippaat naalakkersuisunut
eqqaasitsissutigissallugu, aningaasat sillimmatit inatsisissakkut matumuuna 26
mio. kr.-nit nalinginik ilanngarneqartut pingaarnerutillugit allannguutissatut
siunnersuutigilersaakkaminni aaqqiissuteqarfiginiassagaat.
Taama aallaqqaataasumik
oqaaseqareerluta suliassanut ataasiakkaanut tunngatillugu, Aningaasaqarnermut Ataatsimiititaliamut,
nalilersortikkusutagut ataasiakkaat eqqaalaassavagut, makkuusut:
Konto 01.11.01, Inatsisartut
Ombudsmandiat.
Aningaasaliissutit ilaatigut 1,3
mio.-ninik qaffattariaqarnerannik qinuteqaammut ilaatigut tunngavilersuutigineqarpoq
sulisooreersunngooq sulisoriinnarneqarnissaat tamatumuuna siuner-tarineqartoq.
Tamanna ima paasineqartariaqarnerluni, sulisooreersut isumaqatigiissutit
saniatigut ajunngitsorsiassaqartinniarneqalersut?
Konto 10.06.17, Nanortalimmi tunisassiassanik
ineriartortitsineq.
Inuit Ataqatigiit piumasaraat
suliniutini taamaattuni nammineq pigeriikkagut maniitsumi ATI aamma Narsami
INUILI kiisalu Nanortalimmi oqartussaasut qanimut suleqatigineqarnissaat.
Suliniutit nutaaviit nutaanik ineriartortitsiviusut matumani pineqartut
iluatsissappata nammineq ilisimasagut periarfissagut oqartussaaqataanerpullu
pingaartinneqassasut pisariaqarluinnarpoq.
Konto 10.13.13, Aktiatigut aningaasaliissutit.
Namminersornerulluni Oqartussanut pituttorsimanatik ingerlaniaraluartut, Atuakkiorfik aammalu Nunatta Naqiterivia, namminersornerusunit pisiarineqassasut matumuuna pineqarput. Ilisimaleriikkatsitulli aningaasat 2 mio. kr. Atuakkiorfik eqqarsaatigalugu naammanngillat. Atuakkiorfik inuiattut atuagassaqarnitsinnut pingaaruteqartoq ingerlariaqqissinnaajunnaaqqajaavoq. Tassungalu sanilliullugu KNR ukiumut 50 mio. kr. sinnerlugit aningaasaliiffigineqartarpoq. Inuit Ataqatigiit Aningaasaqarnermut Ataatsimiititaliaq kaammattussavaat tamanna sukumiisumik naliliiffigeqqullugu. KNR-immi aningasaqarnini takoqqusaautitigut namnineq ukiumut 10 mio. kr.-nit pallillugit qaffatsissinnaagaa uppernarsaatissaqareerpoq, taassumalu ssaniatigut Naalakkersuisut tusagassaqartitsiviata ukiumut 3 mio. kr.-nit nalinginik siorna qaffaavigineqarneratigut KNR-mi aallakaatitassat illumi maani suliarineqartartut annikigisassaanngillat.
Innuttaasut tusagassaqartinnissaat, isiginnaagassaqartinnissaat atuagassaqartinnissaallu ataatsimut nalilerneqartariaqarpoq.
Aamma Atuakkiorfiup aningaasatigut ingerlanerliorneranut sunarpiaq pissutaanersoq misissorneqassappat ilanngullugu meeqqat atuarfiisa ilinniarfiillu atuagarsiniarsinnaanerisa isumannaarnissaat pisariaqarpoq. Ullumikkummi tamakkunani ingerlatsisuusut naliliinerat najoqqutaralugu, atuagarsiniarnissamut aningaasat ikiliartortinneqarsimanerat pissutaasutut isigineqartutut nalilerneqarpoq.
Konto 20.10.42, Kommuuninut taarsigassarsiarititat, akilersuutillu.
Siusinnerusukkut Inuit Ataqatigiinnit aammalumi Aningaasaqarnermut Ataatsimiititaliamit aaqqiivigeqqullugu tikkuarneqartareersutut Kangaatsiap Kommuunia aningaasatigut annertoorujussuarmik ajornartorsiuteqarpoq. Ajornartorsiutillu taamaattut taarsigassarsisitseqattaarnerinnakkut qaangerneqarsinnaanngillat. Kangaatsiami pisariaqarluinnarpoq inuussutissarsiutitigut piorsaanissaq. Aatsaammi taamaasiornikkut kommuunip aningaasaqarnera naatsorsuutigineqarsinnaasumik ilorraap tungaanut saatsinneqarsinnaavoq. Taama inuussutissarsiutitigut suliffissaqarnikkullu iluarsiissuteqarniarnermi Naalakkersuisut Kangaatsiap Kommuunia peqatigalugu nukinginnarluinnartumik suliassaqarput. Matumuunalu apeqqutigissavarput Naalakkersuisut manna tikillugu qanoq pineqartumut iliuuseqareersimanersut.
Konto 22.11.18, Kommuunini nammineq illuliassat.
Inuit Ataqatigiit ilisimatinneqarsimapput innuttaasut qinnuteqaataat tunngavigalugit kommuunit ataasiakkaat qinnuteqaatinik ingerlatitseqqittarnerat assigiinngitsunik nalilersorneqarluni suliarineqartarsimasoq. Ajornatorsiut tamanna sumik pissuteqarnersoq, Ineqarnermut Pisortaqarfiup, INI A/S-ip KANUKOKA-llu paaseqatigiissutigisariaqarpaat aaqqiissuteqarfigalugulu.
Konto 50.01.03 aamma konto 50.06.14,
Assagiarniarnermut tunngasut.
Assagialeriffinnik matumani
pineqartunik akilersinnaannginneraaneq siunnersuummi pineqarpoq,
assagiarsuleriffiit akilersinnaassappata immikkut
aningaasaliisoqartariaqarnerarlugu. Soormi tamanna muminneqarsinnaanngila,
tunisassiorfissatut sanaassat annertussusissaat pisassatyut akuerineqartut
assagiarsunniartussatullu ilisimasat aallaavigalugit aalajangertarlugu.
Assagiarniarnerup
ingerlaqqinnissaani tapiissuteqartarnissami aalajangersaaneq aalisarnermut
Naalakkersuisup kisermaannagu Inatsisartulli Aalisarnermut Taarsigassarsiniartarnermullu
Ataatsimiititaliaa peqatigalugit ingerlatissagaa Inuit Ataqatigiit piumasaraat.
Aamma periuseq tamanna atorneqassasoq piumasaraarput qinnuteqartut
tulleriiaarneranni oqartussaaneq eqqarsaatigalugu. Tamannami kontonut pineqartunut
missingersuutinut ilanngussat nalinginnaasuni Naalakkersuisunut ilaasortaq
kisermaassitillugu piginnaatinniarneqaraluarpoq.
Konto 50.06.20, EU-mik aalisarnermik
isumaqatigiissutit.
Aalisagartassanik
isumaqatigiissutaareersup saniatigut 8,5 mio. kr.-nit nalinginik annertussusilimmik
aalisartunut EU-meersunut tunisaqarsimanermut tunngatillugu Inuit Ataqatigiit
paaserusuppaat, taamaaliorsimaneq Aalisarnermut Siunnersuisoqatigiit
peqatigalugit aaqqinneqarsimanersoq. Kiisalu Narsami illulioriaaseq nutaaq
misiligarneqarluni ukiuni arfinilinni ingerlanneqareersoq pillugu,
Naalakkersuisut apeqquteqarfigissavagut suliassarlu iluatsillugu Aningaasaqarnermut
Ataatsimiititaliamut nalilersoqqussallugu, ilisimagatsigu ingerlatsiniartut
aningaasatigut taarsigassarsitinneqarnissaminnik Naalakkersuisunut
arlaleriarlutik saaffiginnittareersimagaluartut.
Taama oqaaseqarluta inatsisissatut
siunnersuut aappassaaneerneqannginnermini Aningaasaqarnermut
Ataatsimiititaliamit misissoqqissaarneqassasoq kaammattuutigaarput.
Bjarne Kreutzmann, Akulliit Partiiat:
Inatsisartut 1997-mi ilassutitut
aningaasaliissutinut inatsisissaattut siullertut siunnersuut soqutigalugu
nuannaralugulu atuarsimavara, taavalu missingersuutinut ilanngussat ilaat
amerlanngitsut annikitsunnguaannarmik oqaaseqarfigissallugit, tassa
siunnersuutip maanna isikkua naapertussagaanni aningaasanut inatsimmi
tulleriissaarinitsinnut allannguutinik kinguneqartussaannginnguatsiarmat.
Konto 01.10.10-mut, Inatsisartut, tassunga
tunngatillugu assut toqqissisimanartippara ima
missingersuusiullaqqitsigisimammata allaat maannangaaq takuneqarsinnaalluni
konto 15.000 kr.-nik sinneqartoorumaartoq. Qilanaaraara naatsorsuutit
naammassippata paasissallugu konto eqqoqqissaartumik missingersuusiorneqarsimasoq.
Tamatuma saniatigut isumaqarpunga
ilassutitut aningaasaliissutinut qinnuteqarsinnaanerup ammut killissaa
aalajangiiffigisariaqartoq. Ammut killissaa 50.000 kr.-niussanersoq imaluunniit
100.000 kr.-niussanersoq oqaatigisinnaanngilara, kisianni missingersuutit
naatsorsuutillu qanoq nikingassuteqartigisartut eqqarsaatigigaanni 15.000
kr.-nik ilassutitut aningaasaliissutissanik qinnuteqarneq
quianaannangajapporluunniit.
Konto 10.13.13-mut, tassa Aktiatigut
aningaasaliissutit, tassunga tunngatillugu itisilerlugu nassuiaasoqaqqullugu
qinnutigaara, ajornanngippat allaganngorlugu, Atuakkiorfik A/S-ip aamma Nunatta
Naqiterivia A/S-ip taamatut paarlattuanut
namminersortunngorsarneqarsimanerannut suna patsisaanersoq.
Taama naatsumik oqaaseqarlunga siunnersuutip
taamatut isikkoqarluni aappassaaneerneqartinnani Aningaasaqarnermut
Ataatsimiititaliamut ingerlanissaa innersuussutigaara.
Anthon Frederiksen, Kattusseqatigiit:
1997-mut Inatsisartut ilassutitut
aningaasaliissutinut inatsisissaannut siullermut siunnersuutip Kattusseqatigiit
sinnerlugit pisarnertut soqutigalugu misissorsimavara.
Inatsisartut allattoqqarfiannut
tunngatillugu ilassutitut aningaasaliissutaasussat sanioqqunneqarsinnaanngillat,
tamannami Inatsisartut ukiakkut 1996-mi ataatsimiinnitsinni Inatsisartut
suleriaasiata allanngortinneqarneranut tunngavoq akuersissutigineqareerlunilu.
Ukiunullu missingersuusiorfiusunut pinngitsoorani sunniuteqartussaammat
sillimaffigineqarnissaa eqqaasitsissutigisariaqarluni.
Aningaasanik suli amerlanerusunik nunatta
karsianut isaatitsisoqarnissaa tamatta kissaatigaarput, soorunami inatsisinik
tunngavilimmik, taamaattumik soqutiginarpoq Aningaasaqarnermut
Ataatsimiititaliamut misissortissallugu, imaluunniit maannakkut
akineqarsinnaappat paasissallugu; akiliisinnaajunnaarsimasut siusinnerusukkut
isumakkeerneqarsimasut pigisaasa tunineqarneranni agguagarsianik inatsisitigut
tunngavilimmik nunatta karsia pissarsisinnaanersoq? - imaanngitsoq
isertinneqarsimasut 566.000 kr.-nit ajoringakkit, kisianni akiligassat
isumakkeerneqareersimasut pissarsissutigineqarsinnaappat?
Sanaartornermut sillimmatit inatsisissap
matuma akuersissutigineqarneratigut ilaatigut mittarfiliornermi suliat aappaata
ingerlanneqarneranut immikkut nalunaaqutserneqarnissaat Kattusseqatigiinniit
akuersaarsinnaanngilara, tassami mittarfiliortiternermi aningaasat
aalajangersimasut ukiunut missingersuusiorfiusunut
immikkoortiterneqareersimammata, aammalu 1996 eqqarsaatigalugu
mittarfiliortiternernut aningaasanik 42 mio. kr.-ningajannik
atuinikinneruffioreermat, taamaattumik sillimmatit ilaasa meeqqat atuarfiisa,
imaluunniit palaseqarfinni aningaasanik pisariaqartitsivioqisuni immikkut
nalunaaqutserneqarnissaat kissaatiginarnerummat.
Kangaatsiami talittarfiup tallineqarnissaa
1998-mut aningaasaliiffigineqartup, 1999-mut kinguartinneqarnera
akuersaarneqarsinnaanngilaq, tassani talittarfeeqqami tattoqiffioreeqisumi
aalisariutit usingiartillugit - umiarsuaaqqanik pajuttunik tikittoqartillugu,
aalisariutit usingiarniaasaartut avalatsiinnarneqartarput, taamaalillunilu
assigiinngitsutigut ajornartorsiortinneqartarlutik. Taamaattumik pissutsit
taama ajortigisut piaartumik iluarsineqarnissaat anguaniarlugu sanaartugassamik
kinguartitsiniarneq taamaatittariaqarpoq - pilersaarutigineqartutullu suliassap
1998-mi aningaasaliiffigineqarluni ingerlanneqarnissaa Kattusseqatigiinniit
Aningaasaqarnermut Ataatsimiititaliamut inassutiginiarpara, tassami
talittarfik maannakkutut ittillugu ilaasortaatinilluunniit taliffigineqarneq
ajorpoq, aammalu talittarfik ima ajortigaaq allaat talittarfiup qaava
nakkaakkiartulersimalluni, tamanna uanga nammineerlunga ukioq marts-imi
uppernarsillugu takuara.
Immikkut oqaatigisariaqarsoraara Nunatsinni
filmiliarineqartussamut 1 mio. kr.-nik aningaasaliiniarneq nunatta nunanut
allanut annerusumik nittarsaanneqarnissaanut periarfissiisussaq tapersersortariaqarmat.
Ilumoorluinnarpoq saattuarniarnerup
ineriartortinneqarnerani immikkut ittumik aningaasaliisoqarnissaa
pisariaqarluinnarmat, tassami aalisakkat maannakkut aalisarneqartut
killeqaleriartortillugit - pisariaqarpoq aalisakkanik, qalerualinnillu allanik
nioqqutissiulernissamut suli annerusumik periarfissiisoqarnissaa.
Naluneqanngitsutut aalisariuterpassuit
ukiut kingulliit tallimat, arfinillit ingerlanerini atorunnaarsiortorneqarsimapput,
kisiannili aalisariaatsinutallanut naleqqussaaneq isumagineqarsimanani,
taamaattumik pisariaqarpoq aningaasat saattuarniarnermut atatillugu
piorsaanermi atortussaannarnut atungassat kisiisa
akuersissutigisariaqanngitsut, aammali aalisariutinut nutaanut marlussunnut,
kisalu aalisariutit pigineqareersut atorluarsinnaasullu naleqqussarnissaannut,
iluarsaanneqarnissaannullu annerusumik aningaasaliisoqartariaqartoq.
Aalisariutit, aalisartullu nunami allamiut
misileraanermi, aalisarnermilu aalisarnermilu isumalluutigisariaqanngillat,
taamaattumik Kattusseqatigiinniit Aningaasaqarnermut Ataatsimiititaliamut
inassutiginiarpara piaartumik Royal Greenland-illu suliffissuaqarnikkut
naleqqussaaniarneranut inortuinngitsumik aalisariutitigut naleqqussaanissamut
piorsaanissamullu aningaasanik suli amerlanerusunik nassaarniaqqullugu, tassami
inuussutissarsiutitigut piorsaaneq siulliit ilaattut aningaasaliiffigisariaqarmat.
ESU-mut taarsigassarsianut tunngatillugu
10,5 mio. kr.-nit akilerneqarsimanerat ajunngeqaaq. Naleqanngitsutullu
ukiualuit matuma siornatigut akiligassat ilaat isumakkeerneqarput, tassungalu
atatillugu isumakkeerinniffiusut kingusinnerusukkut akileraarutitigut
malersorneqarput - qujanartumillu akileraarutitigut 1996-ip ingerlanerani
iluarsiisoqarpoq; aalisartullu taamaallutik akileraarutinut
akiliutigisimasaraluatik utertittussanngorsimallugit, kisianni aalisartut
ilaanniit paasitinneqarpunga; utertoorutissat ilaatigut Kommuunini
ataasiakkaani tunniukkumaneqaratik maannamut uninngatinneqartut - soormita? -
taamaaliornikkummi aalisartumut erniatigut, inger-latsinermut allarpassuarnullu
annaasaqaataavoq, taamaattumik Aalisarnermut Pisortaqarfiup pissutsit
iluarinanngitsut atortinneqartullu iluarsinissaat isumagisariaqarpai.
Illoqarfinni eqqagassalerinermut
atortulersuutinut tapiissutinut tunngatillugu eqqakkanut
ikuallaaveqalernissamut tapiissutigineqartartussatut 50 %-imut aalajangiunneqarnissaat
Kattusseqatigiinniit tapiissutit 75 %-imut qaffanneqarnissaat
inassutigerusuppara, tassami Kommuunit akissaqarnerusuinnaat kisimik
periarfissinneqartariaqanngimmata.
Nuup avataaniittut illoqarfiit ilaasa
aqquserngi ajoraluaqisut - Qeqertarsuup, Kangaatsiallu aqqusinikassaasa
iluarsaanneqarnissaat pisariaqalivissimapput, tassami aqquserngit
isuman-naatsumik perlasiffiunngitsumillu angallaffigineqarsinnaasariaqarput,
taamaattumik Kangaatsiami aqquserngit iluarsaanneqarnissaannut aningaasaliissutit
annertunngikkaluartut pisariaqarput.
Ilageeqarnermi aningaasaqarnermut
akuersissutigineqaqqittussanut atatillugu Ilulissani ilagiit paaserusutaat,
tassalu Zionip oqaluffiani assiliarsuup maannamut ukioq ataaseq sinnerlugu
iluarsaanniarsarineqaraluartup Kultureqarnermut Pisortaqarfimmiit qanoq
iliuuseqarfiginiarneqarnersoq, soqutiginarpoq paasissallugu, tassami tamanna
saaffiginnissutigineqareersimammat.
Immikkut ittumik inissiarsuarnik
iluarsaassinernut atatillugu Qasigiannguani inissiat ilaasa iluarsaattariaqalivissimasut,
iluarsaanneqarnissaat sooq pilersaarutini ilaatinneqanngillat, ima-luunniit
ineqarnermut Naalakkersuisoq qanoq isumaliutersuuteqarpa?
Suliassat pisussaaffiliisunik
isumaqatigiissuteqarfioreersimasut arlalissuit, kinguaattoortarnerat
akueriuminaalluinnarpoq, eqqarsaatigeqqittariaqarlunilu - suliassat
naammassineqarsinnaanerat ajornartorsiutaavaa? - imaluunniit
Namminersornerullutik Oqartussat Kommuunillu akornanni suleqatigiinneq
arlaatigut iluarsisariaqarpaa? Tassami suliassat marloriaqattaarlugit
suliarineqartarneri piffissaajaataallutillu aningaasartuutaasarput.
Taamatut oqaaseqarlunga ilaasutitut
aningaasalissutinut inatsisissap aappassaanneerneqannginnerani
Aningaasaqarnermut Ataatsimiititaliami suliarilluarneqarnissaa inassutigaara.
Daniel Skifte, Aningaasaqarnermut Ineqarnermullu Naalakkersuisoq:
Siullermik qujassaanga partiit
oqaaseqartuinut oqariartuutit assigiinngitsut ataatsimut katitissagaanni
oqartariaqarsorinarpoq, siunnersuutigineqartut taakkua ataatsimut katikkaanni
iluarineqarput, kisiannili ataasiakkaat partiit oqaaseqarfigeqqaassavakka.
Siumup oqaaseqartuata tikitai
assigiinngitsorpaalussuit ataatsimut oqaatigissagukkit tamakkiisumik
tapersiivoq Siumut aammalu taassuma saniatigut oqaaseqarluni Siulittaasoqarfiup
tassa Landstingip aningaasat qinnutai aamma akuerineqartut. Assigiinngitsunik
kaammattuissutit Siumuminngaanniit soorlu ilaatigut Naalakkersuisut Royal
Greenland-illu suliniarnerannut tunngasut assersuutigalugu Paamiut Maniitsoq
Kangaatsiarlu eqqaaneqarput, tassani nangeq-qinnagit Naalakkersuisut
siulittaasuata ullormut oqaluuserisassami siusinnerulaartukkut akissuteqaataa
innersuutigissavara, taamaallaat Qeqertarsuaq illoqarfik tassunga tapiullugu.
Apeqqutigineqarpoq aamma Upernavimmi
Uummannamilu umiarsuit talittarfiat taanna qanoq aaqqinneqassanersoq. Imatut
naatsumik oqaatigisariqarunarpoq, tassa ukiuni kingullerni pingaartumik siorna
illoqarfiit taakkua Inatsisartunit aalajangiiffigineqarput timmisartumik
mittarfiliorfiginissaattut kisianni siusinnerusukkullu ukiorpassuarni
pilersaarutaasimagaluarpoq umiarsuit talittarfissaat pilersaarut angisooq
aningaasarpassuarnik nalilik taanna pilersaarutaasimalluni. Kisiannili ukiuni
kingullerni pissutsit aammalu mittarfiliortiternermut tunngaviusut allanngornerat
peqqutigalugu nalunngilara Naalakkersuisut eqqartussallugu piareersimaffigigaat
nalileqqinniassallugu immaqa illoqarfinni taakkunani pilersaaruterujussuit
pinngikkaluarlugit allaanerusumik taakkununnga pitsaanerusumik
annikinnerugaluartumik aaqqiiniartoqarnissaa.
Grĝnlandsfly pillugu apeqqut aamma
naatsumik oqaaseqarfigissavara, tassalu ukiarmi Inatsisartut 1996-mi naak -
naqinnerlulaannguaraluartoq - isummerput suliassaq tunngaviatigut taperserlugu,
kisiannili naatsorsuutit erseqqinnerusut Grĝnlandsfly-minngaanniit
peqqaarniarlugit erseqqinnerusumik akisinnaaniassagatsigu. Suliassaq taanna
ilaatigut qaffatsinneqartussaavoq allannguutissatut siunnersuummi maannangaaq
ilimasaarutigineqareersumi. Taamaattumik taanna apeqqut tassunga
innersuussutigissavara. Naatsumik oqaatigalugu Siumup siunnersuut tamakkiisumik
taperserpaa.
Aamma taamatut oqaatigisariaqarpara
Atassut innersuussuteqarpoq assigiinngitsunik maannakkumut pilersaarutit
ingerlaannarnissaannik soorlulu aningaasaliissutit assigiinngitsunut assersuutigalugu
aatsitassarsiornermut aamma Namminersornerullutik Oqartussat 10 mio. kr.-nik
ani-ngaasaliinerat siunissamut qaamanerusumut isikkoqartorlusooq. Aamma
maluginiarpara isumaqatigiissutit sanaartornermi kommuunit ataasiakkaat
aammalu Naaminersornerullutik Oqartussat isumaqatigiissutaat taakkua
inissivittariaqartut suliassaq taanna pimoorullugu KANUKOKA suleqatigalugu
anguniarneqarsimavoq, tassani pilersaarusiorneq imminut ataqatigiinnerusoq
ukiunut arlalinnut tunngasoq naak ukiumiit ukiumut aningaasaliissutit
Inatsisartuni aammalu kommunalbestyrelsini aatsaat
akuersissutigineqartassagaluartut, taamaattoq taassuma inernerissagaa ukiunut
aggersunut soorlu inissialiortiternermut isumaqatigiissutit aallaavigalugit
pilersaarusiorneq torernerusoq aammalu pimoorussinerusoq aammalu
aningaasanik qiliinerusoq
ingerlanneqassappat taanna siunnerfuik pitsaanerusoq, taanna maluginiarpara
Atassutip taanna oqariartuutigimmagu.
Aamma tupiginngilara oqariartormat
paasissutissiisarfipput informationskontori taanna tamanut ammanerusumik
aammalu erseqqinnerusumik siunissami tutsiuttalernissaa. Taanna pillugu
naatsumik oqaatigissavara taanna pilersaarut ingerlavoq maannakkut illu tassunga
atungassaq iluarsaanneqarpoq. Ilisimatinneqarneralu tunngavigalugu qaammatit
marlussuit qaangiuppata naammassisussaavoq taamaalilluni suleriarnissaq tassani
oqinnerulissalluni aammalu ammanerusumik iliuuseqarfigineqassalluni.
Tamakkuupput ilaatigut peqqutaasut immikkut aningaasanik aamma
qinusariaqarnermut.
Inuit Ataqatigiit pillugit
oqaaseqassaanga. Siullermik oqaatigissavara tunngaviatigut IA-p iluarinninnera
siunnersuutinut assigiinngitsunut tulluunnarmat tusarlugu nuannermat tusarlugu.
Taavali taassuma tulliatullusooq assigiinngitsut apeequtit qaffatsinneqarput
ilaatigut apeqqutigaat 1997-mi tassa ukioq manna 5 mio. kr.-nik nunatta karsia
sinneqartoortussaagaluarluni aningaasat atunngitsuukkat ukioq manna aningaasat
akuersissutit qaavannut ileriarmata taamaalilluni amigartoorutissat 89 mio.
kr.-ninngornissaat tamatuma nunanut allanut akiitsunik taar-sersuinermut
sunniuteqartarsinnaanissaa qanoq innersoq; apeqqunni nipeqartimmagu imalu
akissuteqarfigissavara.
Ilumoorpoq ukioq manna 502 mio. kr.-nik sinneqartooriarluni
aappaagu ilimagineqarmat ami-gartooruteqassasoq maannakkut ilisimasagut
aallaavigalugit 89 mio. kr.-nit missaanni. Kisianni taamaakkaluartoq nunatta
karsiata aningaasat tigoriaannaat pigisai ukiup nikinnerani 1,6 mio.
kr.-niupput.
Taamaattumik allannguutissatut
siunnersuummi imaluunniit piffissani qaninnerni naatsorsuutigineqanngilaq
nunanut allanut taarsersuinerput allanngussasoq, akerlianilli aningaasat
sinneqar-toorutit akilertariaqartut taamaalilluta ulluinnarni periuserput
tigusassaqarsinnaanerput nukilaallissanngikkaluarlugu nunanut allanut
akiitsutta pilersaarutit malillugit akilersorneqarnissaat naammassineqassasoq
siunertarineqarpoq. Neriuppunga taanna erseqqissumik oqaatigalugu, tassa
nunanut allanut akiitsutta pisussaaffitsinnik naammassiilluni
akilersorneqarnissaa taanna aamma ukioq manna amigartooraluaruttaluunniit
aarlerinanngilaq, aningaasat tigoriaannaat karsimiittuutigineri peqqutigalugit.
Qaqortumi misiliilluni ikuallaasarfimmik
pilersitsiniarnerup malinnaavigineqaqqissaarnissaa taanna IA-p
kaammattuutigimmagu nalunngilara taanna tusaatissatut tigussallugu.
Naalakkersuisut malinnaaviginiaqqissaaraat taanna qularissanngilarsi. Aamma
Aningaasaqarnermut Ataatsimiititaliamut IA-p assigiinngitsut apeqqutit
suliassiissutigai. Soorlu ombudsmandimut tunngasoq, Nanortalimmut tunngasoq,
aktiatigut aningaasaliissutit assigiinngitsullu. Taakkununnga tunngatillugu
erseqqissaatigissavara Naalakkersuisut ataasiakkaat apeqqutinut ataasiakkaanut
soorunami namminneq akissuteqassammata taannalu naatsorsuutigigakku, kisiannili
ombudsmandimut tunngatillugu taanna Naalakkersuisut
akissuteqarfigissanngilaat, tassami taanna Inatsisartut Siulittaasoqarfiata
akissuteqarfigisussaammagu - apeqqut taanna taakkunaniimmat Naalakkersuisuniigani.
Kangaatsiamut tunngasumik
naatsorsuutigaara Naalakkersuisut tamakkununnga susassaqartup
akissuteqarfigissagaa. Naggataatigut aamma IA-mut tunngatillugu
oqaatigissavara, nalunaarusiaq INI A/S-imut tunngasoq taanna eqqartormassuk.
Nalunaarusiaq INI A/S-imut ineqarnermullu tunngasoq maannakkut
agguaanneqareerpoq, aammalu IA-mi Inatsisartunut ilaasortap Johan Lund Olsenip
INI A/S-i pillugu siunnersuutaa aqagu eqqartortussaavarput. Taassuma aamma
akissuteqaateqarfiginera agguaanneqareerpoq, taamaattumik uani annertunerusumik
oqaaseqarfiginagu taakkua taasakka innersuussutigissavakka. Isumaqarpunga
pingaartoq apeqqut qaffatsinneqartoq aammalu oqallinnissamut
kingusinnerusukkut periarfissaqarmat taamaannaq akissuteqarallarpunga.
SIKU-Blokki pillugu uani
naqissimanngikkaluartoq taaginnarlugu naatsumik oqaatigissavara, tassa
SIKU-Blokkimik ingerlatsisut Narsami STI-p atuarfiup allinissaa suliarisimavaat
taavalu illu pitsaasoq Narsarsuarmi ilinniartitsisut illussaa aamma suliarisimallugu.
Tassunga tunngatillugu suliassaq qanittumik malinnaavigineqartussaavoq Narsap
Kommuunianit isumaqatigiissut Namminersornerullutik Oqartussat Narsallu
Kommuunia aallaavigalugu. Taanna Namminersornerullutik Oqartussat maannamut
aningaasat 945.000 kr.-nit
missaanniittunik tapiiffigisimavaat. Suliassaq taanna aningaasanut
inatsisissaq una naammasseriarpat inernivissaa taavara naatsorsuutigigakku
akuersissutigineqassasoq. Kisianni siusinnerusukkut Narsap Kommuuniata aam-malu
Namminersornerullutik Oqartussat aningaasat taasama iluaniittut ilai atorlugit
aamma tapiiffigineqarsimavoq, Narsap Kommuuniata tapiissutai uani
eqqartussanngilakka. Taamaannaq oqaaseqarfigigallarpakka Inuit Ataqatigiit
saqqummiussaat.
Akulliit Partiiata oqaaseqarnera
tusaatissatut tigussavarput erseqqinnerusumik Nunatta Naqiterivianut tunngasut
aammalu Atuakkiorfimmut tunngasut akissuteqarfiginissaat naatsorsuutigaara
piffissami allami piumaartoq. Kattusseqatigiit inassutaat aamma tusaatissatut
tigussavagut ataatsimut Aningaasaqarnermut Ataatsimiititaliami
nalilersorneqassapput uanili taasaat ataaseq maannangaaq
oqaaseqarfigeriilaassavara. Tassa paatsoorneqaqqunagu Kangaatsiaq eqqartorneqarpoq
talittarfiup tallineqarnissaa 1998-mut aningaasaliiffigineqartup 1999-mut
kinguartinneqarnera akuersaarsinnaanngimmagu Kattusseqatigiit. Tassa nunatta
ilaatigooriarluni ukiorluusarnera peqqutigalugit Narsaq Kujallermi kapisilinni
kiisalu Kuummiuni talittarfiit aserorsimapput.
Taavalu aningaasat akuersissutit misissuataaqqissaarneranni
aammalu sanaartugassat tulleriiaarinermi qanoq ilillutik aaqqinneqarsinnaaneri
aallaavigalugit taakkua aningaasat akuersissutigineqarsimapput
kinguartitsinertaqanngitsumik, kisiannili imatut oqarluni sanaartugassat ilai
ukiut arlallit sanasussaapput kisianni ulloq atulerfissaat kinguartinnagu
aallartiffissaat kinguartillugu, atulerfissaalli aalajangiusimallugu tassaavoq
taamaaliornikkut Narsami Kujallermi Kapisilinni Kuummiunilu talittarfiit
pisariaqavissumnik aaqqittariaqarneri anguneqarsinnaasimammata. Taamaattumik
naatsorsuutigaara taanna paatsoornikkut oqariartuutaasoq
kinguartitsisoqanngilaq ullormik atulerfissaannik aalajangiusimanninneruvoq
aamma Kangaatsiamut. Taamatut naatsumik oqaaseqarallarpunga qujanaq.
Paaviaaraq Heilmann, Aalisarnermut, Piniarnermut
Nunalerinermullu Naalakkersuisoq:
Qujanaq. Siullermik Inuit Ataqatigiit
oqaaseqartuanut maani
inimiinngikkaluartoq ilisimatitsissutigissavara assagiarsunnik Royal
Greenlandip tunisassiorfimmik pilersitsisimanera tassa Aasianni Sisimiuni
Nuummilu soorunami aamma taakku pilersinneqarsimapput aningaasarsiorneq
imminut akilersinnaasoq aallaavigalugu. Taavalu pilersaarutigineqartut
Maniitsumi Paamiunilu taakkua aamma sanaartorfigineqarnissaat Royal
Greenlandimit ilisimatitsissutigineqarsimammat 2000 tons assagiarsunnik
tulaassisoqartarnissaa aallaavigalugu imminut akilersinnaasumik
ingerlasinnaasut. Ilisimatitsissutigiinnassavara taakkua maannamut paasisat
malillugit 2000 tons annertuvinngimmata, taamaattumik piujuaannartitsinissaq
eqqarsaatigalugu taamatut piumasaqaatit imminnut assortuutinngimmata.
Aappassaattut apeqqutigivaa ersarissumik
konto 50.06.20-mut tunngatillugu tassa EU-mik aalisarnermut isumaqatigiissutit
eqqarsaatigalugit EU-p aalisakkanik pissarsiareriikkami saniatigut
pissarsisimaneranik atatillugu 8,5 mio. kr.-nik nunatta karsinut akiliineranut
tunngatillugu apeqqutigivaa aalisartut siunnersuisoqatigiit peqatigalugit
aaqqiisoqarsimanersoq. Tassunga tunngatillugu oqaatigissavara aap, tassa
pisassanik tunisisoqartussaatillugu aalisartut kattuffii paaseqatigalugit
tamanna ingerlanneqartarpoq.
Konrad Steenholdt, Kultureqarnermut, Ilinniartitaanermut
Ilageeqarnermullu Naalakkersuisoq:
Apeqqutigineqartoq ataaseq toqqaannartumik
akisinnaagakku taanna akilaassavara, tassa Kattusseqatigiinninngaanniit
apeqqutigineqarmat Ilulissani Zionip oqaluffiata assialiarsuata
iluarsaanniarneqarneranut tunngasoq. Tassa pisariaqanngilaq immikkut taanna
massakkut aningaasaliinermi uani ilanngutissallugu. Ilagiit sinniisaat palasilu
aalajangersimasoq oqaloqatigereersimavakka tassunga tunngatillugu
oqaatigisimallugulu aningaasat pigineqareersut, tassa Kulturikkut
assigiinngitsunut aningaasat atorneqartartut taakkua ilaannik
tapissuteqarsinnaasugut, tassuma assilissap iluarsaanneqarneranut. Paasivara
massakkut tigusimallutigu siunnersussavagullu assilissap taassuma qanoq
ilillugu, tassa Danmarkimut ingerlatittariaqassagami, aningaasalersorneqarnissaa.
Taassuma suliassap sivisuumik
ingerlasimanera utoqqatsissutigissavara uatsinnut paaseqatigiikkaluarluta,
kisianni immaqa paarlaatillattaalaarsimavugut uatsinnut utaqqeqatigiilluta
kisianni paasivara nalilersuutit aningaasanik nalillit takkussimasut taannalu
aningaasaliiffigissaqqaarparput pissusissamisoortumik inissaminut
nivinngarneqarsinnaaqqullugu.
Taavalu aamma oqaatigiinnassavara partiit
oqaaseqartuisa assigiingitsut soorlu atuakkiorfimmut taavalu Kujataata
Naqiterivianut tunngatillugu oqaaserisaat inassutaapput Ataatsimiititaliami
erseqqissumik itisilerlugit paasiniarneqaqqullugit. Tassani
neriorsuutigiinnassavara apeqqutit taakkua saqqummiunneqartut
pisortaqarfitsinninngaanniit suleqataaffigissagatsigit.
Mikael Petersen, Siumut:
Siumup oqaluttuata saniatigut
pinngitsoorusunngilanga oqaaseqalaassallunga.
Tassa Ummannami Upernavimmilu umiarsuarnut
aalisartunullu talittarfissatut pilersaarutaasut tamakkiisumik ukiuni marlunni
kinguartinneqarnissaannik Naalakkersuisut siunnersuutaat
oqaa-seqarfigilaarusukkakku.
Uummannami talittarfissatut pilersaarutaasoq
ukioq maana tassa aasamut sanarneqartussatut pilersaarutaavoq, pineqartoq
ukiorpassuanngortumi ilami ukiut qulit sinneqalerput kinguartinneqartuarluni.
Taamatut kinguartitsisaqattaarneq KNI-mut,
Royal Greenland-mut, Uumannap Kommuunianut minnerungitsumillu aalisartunut
assorujussuaq pakatsinartuuvoq.
Soorlu taakku tamarmik talittarfissaq
pillugu oqaaseqaateqartartut aammalu massakkut kinguartitsineq pillugu
oqaaseqaateqartut.
Upernavimmi ullumikkut aalisartunut
talittarfeqanngilaq taamaallaat talittarfinnguaq annikitsoq nioqqutissanut
usingiaavittut aalisartut nioqqaaviattut atorneqartarpoq.
Naluneqanngilaq avannaani aasaanerani
Uummannap Upernaviullu kommuuniini qanoq ukiuni kingullerni
talittarfissaaleqineq annertutigisoq. Ilami soorlu Siumup oqaaseqartua oqartoq
allaat aalisartut usingiaaneq ajulerlutik aalisakkat maangaannaq
nakkartiinnartariaqartarsimavaat.
Soorunami oqartoqarsinnaagaluarpoq
avannaami sikuusarpoq qaammatit arfinillit, qaammatit arfinillit imaasarpoq,
kisianni piffissannguaq taanna qaammatini arfinilinni annertoorujurujus-suarmik
aalisartunik tulaassuiviusarpoq.
Taamaatumik neriuppunga paasineqarluarluni
aalisartunut talittarfissat pilersaarutaasut Ummannami Upernavimmilu
piviusunngortinneqarsinnaajumaartut, massakkut pilersaarutaasut talittarferujussuit
imaqa annertuvallaangikkaluarlutik akisoorujussuarmik pilersaarutaasut taakku
tamakkiisumik naammassinngikkaluarlugit. Tassami talittarfissatut Uummannami
pilersaarutaasoq 44,6 mio.-nik naleqartussatut naatsorsuutigineqarpoq.
Upernavimmilu 33,7 mio.-nik akeqassasoq,
tassa katikkaanni talittarfinnguit taakku marluk pilersaarutaasut 78,3 mio.-nik
naleqartussaapput.
Mittarfik imaqa taamatut aamma
naleqarsinnaagaluarpoq, mittarfiliorfissani qartitsigassaanngitsuni.
Taamaattumik nuannaarutigaara
Aningaasaqarnermut Naalakkersuisup oqaatigimmagu aalisartunut talittarfitsigut
aaqqiiniartoqarsinnaanera Naalakkersuisuninngaanniit aamma ammaffigineqartoq.
Naggataarutigalugu oqaatigissuara, Aningaasaqarnermut
Ataatimiitsitaliaq sinnerlugu taamak suliakkiisutigineqartut Aningaasaqarnermut
Ataatimiitsitaliamit qilanaarluta tigugatsigit, aamma piviusorsiortumik
sapinngisamillu tamakkiisumik suliassarput naammassiniarumaaparput.
Anders Nilsson, Atassut:
Inuit Ataqatigiit aamma Akulliit
Partiiata oqaluttuisa eqqaavaat marluullutik Atuakkiorfiup Nunattalu
Naqiteriviata utertillugit pisiarineqarnissaat.
Tassalu taanna annaasiniarneruvoq
ukiut nikinneqarnerani tassa taakku suliffeqarfiit pisiarineqarmata,
Atassumminngaannit tamanna arqiigallarnertut isimaqarfigaarput. Tassa
Landskarsimiikkaallaannartussatut. Kalaallit Nunaata Naqiterivia taanna
Sermitsiamut Atuagalliutinullu immaqa tuniniarneqarsinnaavoq, immaqa qallunaat
naqiteriviannut piginneqataatitsisoqarluni.
Tassa Bjarne-ip oqaaseqaataanut
taakku oqaatigiumasakka.
Niels Mattaaq, Siumut:
Tassa aalisariutinut talittarfiup
sanaartorneqarnissaanik pilersaarutip kinguartinneqarnerata
pissarneqarnissaanut piumasaqaataavoq una saqqummiussassara, siulinnit
oqaatigineqareerpoq ukiorpassuit matuma siorna pilersaarutaasoq
talittarfiliornissaq, sulilu kinguartinneqartuarluni.
Maannakkullu aamma 1997-mi upernaakkut
Inatsisartut ataatsimiinnissaanni aningaasanut missingersuutini siunnersuutini
takusinnaasara malillugu Upernavimmi Uummannamilu aalisariutinut
talittarfissanut tapiissutit kinguartinneqarsimapput.
Illoqarfinni pineqqartuni aalisarneq
annertuumik ingerlanneqarpoq, talittarfeqarnerillu iluarsiivigineqarnissaanik
pilersaarut saqqummermat assut qujagineqarsimagaluarluni; aalisartunummi
tamanna pingaaruteqartuummaat.
Kalaallit Nunatta avannaani qaleralinnik
aalisarneq annertuumik ingerlanneqaleruttorpoq ukiuni makkunani, tamatuma
qaleralinniarnerup ingerlanneqarnera aalisartunut iluaqutaarisup, aasakkut
talittarfeqarnikkut aaqqiissutissat annertuumik usingiartartut
pisariaqartippaat.
Upernavikkut eqqarsaatigalugit
aalisariutinik angisuunik mikisunillu amerlasuunik piqalernikuupput, tamakkuli
ataatsikkut illoqarfimmut usingiartarnerat ajornakusoortorujussuuvoq.
Isumaqarlungalu pingaartumik
iluarsiivigisariaqartut, matumuuna nalunngilara naluneqanngitsoq Upernaviup
Ummannallu eqqaanni qaleralinnik aalisarnermi pisat annertunersaasa
illoqarfinni kujatitsinni tunisassiorfissuit tamakkulu inuttaasa
suliffissaqarnerannut annertuumik iluaqutaammata. Taamaattumik pisariaqartutut
isigineqarpoq Upernavimmi Uummannamilu aalisariutit talittarfiit
iluarsiivigineqarnissaat.
Matumuuna Aningaasaqarnermut
Ataatsimiitsitaliaq qinnuvigissavara qulaani pineqartoq angu-saqarniarfigalugu
suliariumaaraa.
Kiisalu ilanngullugu oqaatiginiarpara
aamma Aningaasaqarnermut Naalakkersuisup oqaatigisaa neriulluarnartutut
tigugakku, tassami Aningaasaqarnermut Ataatsimiititaliami sulinermi angusaqarluarnissaq
annikitsumik oqaatigineqartoq.
Josef Motzfeldt, Inuit Ataqatigiit:
Naalakkersuisunut Ilaasortat
akissuteqaataannut qujavugut, kiisalu pinngaarnertut erseqqissaateqarfigisassara
tamaallaat tassaavoq, Aningaasaqarnermut Ineqarnermullu Naalakkersuisup
oqaaseqaaterput Inuit Ataqatigiit ilisimatinneqarsimapput inuttaasut
qinnuteqaataat tunngavigalugit kommuunit ataasiakkaat qinuuteqaatinik
ingerlateqittarnerat assigiingitsumik nalinersorneqarluni
suliarineqartarsimasoq.
Tassani Ineqarnermut Pisortaqarfik
pivarput, INI A/S pivarput; assersuutissaqarpoq kommuunini qinnuteqartut
piumasarisaasut sunik nammassinnissimagaluartut qinnuteqarnerminni - naak
nammineq illuliassat tamakkerlutik agguaaneqqarsimanngikkaluartut oqimaaqatigiingitsumik
nuna immikkoortuini agguaasoqarsimasoq, naak Ineqarnermut Naalakkersuisoq
ukiarmi Inatsisartut ataatsimiineranni oqaraluartoq nammineq illuliassanik
qinnuteqarsimasut piumasaqaatinik naammassinnissimasut tamakkerlutik
tunineqarsimasut.
Tamannaana pigipput INI A/S pillugu
nalunaarusiaq oqaaseqarnitsinni eqqaanngilarput, taamaattunik matumuuna
Naalakkersuisunut Ilaasortaq ilimasaariiginnassavarput apeqqut tamanna
imaaliallaannaq akisinnaangippagu, Naalakkersuisunut Ilaasortatut isumasioqatigiinissaanni
Aningaasaqarnermut Ataatsimiititamiit tamanna sammitinniaratsigu.
Kiisalu talittarfissat Uummannami
Upernavimmilu eqqarsaatigalugit 80 mio.-nit pallillugit akeqartut ukiarmi
aningaasanut inatsisissap suliarinerani Aningaasaqarnermut Ataatsimiititaliami
apeqqut taannarpiaq inassuteqaatigaarput, tamatta atsioqataaffigisatsinnik.
Akikillilerisoqarsinnaaneranik misissuisoqarnissaa Naalakkersuisunut
kaammattuutigigatsigu.
Ajornartorsiut taamanikkut immikkut
taaneqangitsoq tassaavoq umiarsuarnut talittarfik, kiisalu aalisartunuunerusoq
talittarfiit immikkoortillugit pilersaarusiorneqarnissaat.
Matumuuna Inuit Ataqatigiinniit
nalunaarutigissavarput nunatsinni talittarfeqarneq eqqarsaatigalugu
nalunaarusiaq, Aningaasaqarnermut Ataatsimiititaliami pigisarput,
aallaavigalugu misissoqqinnissaannut Upernavimmi Uummannamilu pissutsit
aaqqivigineqarnissaat nuna tamakkerlu- gu pissutsinut naleqqussaanermi
ilanngullugu peqataarusukkatta.
Kiisalu manna iluatsillugu INI A/S
nalunaarusiorneqarnera eqqartorneqarmat, Naalakkersuisunut Ilaasortamiit,
Inatsisartut Siuttaasoqarfiannut apeqqutigissavarput, oqaluuserisaassanut
piuma-saqaatit ulluliunneqartut eqqarsaatigalugit nutaat qanoq
paasisariaqarnersut. Tassami aqagumut oqaluuserisassamut Naalakkersuisut akissuteqaataat
ulloq qeqqata siorna atsaat agguaanneqarmat, tamanna ataatsimiinnerup
ullumikkut naanginnerani isummerfigineqarnissaa kissaatigigatsigu.
Daniel Skifte, Aningaassaqarnermut Ineqarnermullu
Naalakkersuisoq:
IA-p ujartugaa, ilaatigut illussanut qinnuteqaatinut
assigiitsumik iliortoqarsimasut, taanna soorunami maannakkut
imaaliallaannarlugu akisinnaanngilara, neriorsuutigissavara misissorneqassasoq.
Aammalu nuannaarpunga IA-p
pilersaarutigerpasimmagu, kisiannili tassani oqassallunga, Aningaasaqarnermut
Ataatsimiititaliap siulittaasuata qaaqqoriarpanga aggingaassaanga.
Oqaluttarfik manna atorlugu imminut
qaaqqusaqattaarneq ileqquliutissangilarput, tassani najoqqutassaqarpugut
erseqqissumik, najoqqutassagut malikkusoqaakka.
Aamma oqaatigissavara Uummannamut
tunngatillugu, aamma Upernavimmut, Uummannamin-ngaaniit aamma saaffiginnissut
pisimagatsigu, taannalu suliassaq maj-ip 2-ni ullulerneqarsimasoq
aallaavigalugu suliassaq sukkasuumik ingerlanniarparput, taamaattumillu maannangaaq
akissutissaqalaalereersimanera pisinnaasimavoq, pilersaarupiluunersuit 80 mio.
imaaliallaannaq atunngikkaluarlugit, qanoq iliortariaqarneranik isuma
oqariartuutigigakku.
Taamatut akissuteqarfigaara oqaluttoq
kingulleq, qaaqquteriaruma aggissaqqaarpunga.
Jonathan Motzfeldt, ataatsimiinnermik aqutsisoq, Inatsisartut
Siulittaasuat:
Ja, taamaalilluni siullermeerneqarnera -
ilassutissanut aningaasaliissutissat - naammassivoq.
Allanik oqaaseqartoqarumanngilaq.
Taamaalilluni Aningaasaqarnermut Ataatsimiititaliamut
ingerlateqqinneqassaaq, aapassaaneerneqartinnagu.